৩. ততিযৱগ্গো

২৮৭. ‘‘অট্ঠানমেতং, ভিক্খৱে, অনৱকাসো যং কাযসুচৰিতস্স অনিট্ঠো অকন্তো অমনাপো ৱিপাকো নিব্বত্তেয্য. নেতং ঠানং ৱিজ্জতি. ঠানঞ্চ খো এতং, ভিক্খৱে, ৱিজ্জতি যং কাযসুচৰিতস্স ইট্ঠো কন্তো মনাপো ৱিপাকো নিব্বত্তেয্য. ঠানমেতং ৱিজ্জতী’’তি.

২৮৮-২৮৯. ‘‘অট্ঠানমেতং, ভিক্খৱে, অনৱকাসো যং ৱচীসুচৰিতস্স…পে… মনোসুচৰিতস্স অনিট্ঠো অকন্তো অমনাপো ৱিপাকো নিব্বত্তেয্য. নেতং ঠানং ৱিজ্জতি. ঠানঞ্চ খো এতং, ভিক্খৱে, ৱিজ্জতি যং মনোসুচৰিতস্স ইট্ঠো কন্তো মনাপো ৱিপাকো নিব্বত্তেয্য. ঠানমেতং ৱিজ্জতী’’তি.

২৯০. ‘‘অট্ঠানমেতং, ভিক্খৱে, অনৱকাসো যং কাযদুচ্চৰিতসমঙ্গী তন্নিদানা তপ্পচ্চযা কাযস্স ভেদা পৰং মৰণা সুগতিং সগ্গং লোকং উপপজ্জেয্য. নেতং ঠানং ৱিজ্জতি. ঠানঞ্চ খো এতং, ভিক্খৱে, ৱিজ্জতি যং কাযদুচ্চৰিতসমঙ্গী তন্নিদানা তপ্পচ্চযা কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপজ্জেয্য. ঠানমেতং ৱিজ্জতী’’তি.

২৯১-২৯২. ‘‘অট্ঠানমেতং, ভিক্খৱে, অনৱকাসো যং ৱচীদুচ্চৰিতসমঙ্গী…পে… যং মনোদুচ্চৰিতসমঙ্গী তন্নিদানা তপ্পচ্চযা কাযস্স ভেদা পৰং মৰণা সুগতিং সগ্গং লোকং উপপজ্জেয্য. নেতং ঠানং ৱিজ্জতি. ঠানঞ্চ খো এতং, ভিক্খৱে, ৱিজ্জতি যং মনোদুচ্চৰিতসমঙ্গী তন্নিদানা তপ্পচ্চযা কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপজ্জেয্য. ঠানমেতং ৱিজ্জতী’’তি.

২৯৩. ‘‘অট্ঠানমেতং, ভিক্খৱে, অনৱকাসো যং কাযসুচৰিতসমঙ্গী তন্নিদানা তপ্পচ্চযা কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপজ্জেয্য. নেতং ঠানং ৱিজ্জতি. ঠানঞ্চ খো এতং, ভিক্খৱে, ৱিজ্জতি যং কাযসুচৰিতসমঙ্গী তন্নিদানা তপ্পচ্চযা কাযস্স ভেদা পৰং মৰণা সুগতিং সগ্গং লোকং উপপজ্জেয্য. ঠানমেতং ৱিজ্জতী’’তি.

২৯৪-২৯৫. ‘‘অট্ঠানমেতং, ভিক্খৱে, অনৱকাসো যং ৱচীসুচৰিতসমঙ্গী…পে… যং মনোসুচৰিতসমঙ্গী তন্নিদানা তপ্পচ্চযা কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপজ্জেয্য. নেতং ঠানং ৱিজ্জতি. ঠানঞ্চ খো এতং, ভিক্খৱে, ৱিজ্জতি যং মনোসুচৰিতসমঙ্গী তন্নিদানা তপ্পচ্চযা কাযস্স ভেদা পৰং মৰণা সুগতিং সগ্গং লোকং উপপজ্জেয্য. ঠানমেতং ৱিজ্জতী’’তি.

ৱগ্গো ততিযো.

অট্ঠানপাড়ি পন্নৰসমো.