১৬. একধম্মপাড়ি

১. পঠমৱগ্গো

২৯৬. ‘‘একধম্মো, ভিক্খৱে, ভাৱিতো বহুলীকতো একন্তনিব্বিদায ৱিৰাগায নিৰোধায উপসমায অভিঞ্ঞায সম্বোধায নিব্বানায সংৱত্ততি. কতমো একধম্মো? বুদ্ধানুস্সতি. অযং খো, ভিক্খৱে, একধম্মো ভাৱিতো বহুলীকতো একন্তনিব্বিদায ৱিৰাগায নিৰোধায উপসমায অভিঞ্ঞায সম্বোধায নিব্বানায সংৱত্ততী’’তি.

২৯৭. ‘‘একধম্মো, ভিক্খৱে, ভাৱিতো বহুলীকতো একন্তনিব্বিদায ৱিৰাগায নিৰোধায উপসমায অভিঞ্ঞায সম্বোধায নিব্বানায সংৱত্ততি. কতমো একধম্মো? ধম্মানুস্সতি…পে… সঙ্ঘানুস্সতি… সীলানুস্সতি… চাগানুস্সতি… দেৱতানুস্সতি… আনাপানস্সতি… মৰণস্সতি… কাযগতাসতি… উপসমানুস্সতি. অযং খো, ভিক্খৱে, একধম্মো ভাৱিতো বহুলীকতো একন্তনিব্বিদায ৱিৰাগায নিৰোধায উপসমায অভিঞ্ঞায সম্বোধায নিব্বানায সংৱত্ততী’’তি.

ৱগ্গো পঠমো.

২. দুতিযৱগ্গো

২৯৮. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা অকুসলা ধম্মা উপ্পজ্জন্তি উপ্পন্না ৱা অকুসলা ধম্মা ভিয্যোভাৱায ৱেপুল্লায সংৱত্তন্তি যথযিদং, ভিক্খৱে, মিচ্ছাদিট্ঠি. মিচ্ছাদিট্ঠিকস্স, ভিক্খৱে, অনুপ্পন্না চেৱ অকুসলা ধম্মা উপ্পজ্জন্তি উপ্পন্না চ অকুসলা ধম্মা ভিয্যোভাৱায ৱেপুল্লায সংৱত্তন্তী’’তি.

২৯৯. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা কুসলা ধম্মা উপ্পজ্জন্তি উপ্পন্না ৱা কুসলা ধম্মা ভিয্যোভাৱায ৱেপুল্লায সংৱত্তন্তি যথযিদং, ভিক্খৱে, সম্মাদিট্ঠি. সম্মাদিট্ঠিকস্স, ভিক্খৱে, অনুপ্পন্না চেৱ কুসলা ধম্মা উপ্পজ্জন্তি উপ্পন্না চ কুসলা ধম্মা ভিয্যোভাৱায ৱেপুল্লায সংৱত্তন্তী’’তি.

৩০০. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা কুসলা ধম্মা নুপ্পজ্জন্তি উপ্পন্না ৱা কুসলা ধম্মা পৰিহাযন্তি যথযিদং, ভিক্খৱে, মিচ্ছাদিট্ঠি. মিচ্ছাদিট্ঠিকস্স, ভিক্খৱে, অনুপ্পন্না চেৱ কুসলা ধম্মা নুপ্পজ্জন্তি উপ্পন্না চ কুসলা ধম্মা পৰিহাযন্তী’’তি.

৩০১. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা অকুসলা ধম্মা নুপ্পজ্জন্তি উপ্পন্না ৱা অকুসলা ধম্মা পৰিহাযন্তি যথযিদং, ভিক্খৱে, সম্মাদিট্ঠি. সম্মাদিট্ঠিকস্স, ভিক্খৱে, অনুপ্পন্না চেৱ অকুসলা ধম্মা নুপ্পজ্জন্তি উপ্পন্না চ অকুসলা ধম্মা পৰিহাযন্তী’’তি.

৩০২. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা মিচ্ছাদিট্ঠি উপ্পজ্জতি উপ্পন্না ৱা মিচ্ছাদিট্ঠি পৱড্ঢতি যথযিদং, ভিক্খৱে, অযোনিসোমনসিকাৰো. অযোনিসো, ভিক্খৱে, মনসি কৰোতো অনুপ্পন্না চেৱ মিচ্ছাদিট্ঠি উপ্পজ্জতি উপ্পন্না চ মিচ্ছাদিট্ঠি পৱড্ঢতী’’তি.

৩০৩. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা সম্মাদিট্ঠি উপ্পজ্জতি উপ্পন্না ৱা সম্মাদিট্ঠি পৱড্ঢতি যথযিদং, ভিক্খৱে, যোনিসোমনসিকাৰো. যোনিসো, ভিক্খৱে, মনসি কৰোতো অনুপ্পন্না চেৱ সম্মাদিট্ঠি উপ্পজ্জতি উপ্পন্না চ সম্মাদিট্ঠি পৱড্ঢতী’’তি.

৩০৪. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন [যেনেৱং (সী. স্যা. কং. পী.)] সত্তা কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপজ্জন্তি যথযিদং, ভিক্খৱে, মিচ্ছাদিট্ঠি. মিচ্ছাদিট্ঠিযা, ভিক্খৱে, সমন্নাগতা সত্তা কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপজ্জন্তী’’তি.

৩০৫. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি যথযিদং, ভিক্খৱে, সম্মাদিট্ঠি. সম্মাদিট্ঠিযা, ভিক্খৱে, সমন্নাগতা সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তী’’তি.

৩০৬. ‘‘মিচ্ছাদিট্ঠিকস্স, ভিক্খৱে, পুৰিসপুগ্গলস্স যঞ্চেৱ কাযকম্মং যথাদিট্ঠি সমত্তং সমাদিন্নং যঞ্চ ৱচীকম্মং…পে… যঞ্চ মনোকম্মং যথাদিট্ঠি সমত্তং সমাদিন্নং যা চ চেতনা যা চ পত্থনা যো চ পণিধি যে চ সঙ্খাৰা সব্বে তে ধম্মা অনিট্ঠায অকন্তায অমনাপায অহিতায দুক্খায সংৱত্তন্তি. তং কিস্স হেতু? দিট্ঠি হিস্স [দিট্ঠি হি (সী. স্যা. কং. পী.)], ভিক্খৱে, পাপিকা. সেয্যথাপি, ভিক্খৱে, নিম্ববীজং ৱা কোসাতকিবীজং ৱা তিত্তকলাবুবীজং ৱা অল্লায পথৱিযা [পঠৱিযা (সী. স্যা. কং. পী.)] নিক্খিত্তং যঞ্চেৱ পথৱিৰসং উপাদিযতি যঞ্চ আপোৰসং উপাদিযতি সব্বং তং তিত্তকত্তায কটুকত্তায অসাতত্তায সংৱত্ততি. তং কিস্স হেতু? বীজং হিস্স [ৱীজং (সী. স্যা. কং. পী.)], ভিক্খৱে, পাপকং. এৱমেৱং খো, ভিক্খৱে, মিচ্ছাদিট্ঠিকস্স পুৰিসপুগ্গলস্স যঞ্চেৱ কাযকম্মং যথাদিট্ঠি সমত্তং সমাদিন্নং যঞ্চ ৱচীকম্মং…পে… যঞ্চ মনোকম্মং যথাদিট্ঠি সমত্তং সমাদিন্নং যা চ চেতনা যা চ পত্থনা যো চ পণিধি যে চ সঙ্খাৰা সব্বে তে ধম্মা অনিট্ঠায অকন্তায অমনাপায অহিতায দুক্খায সংৱত্তন্তি. তং কিস্স হেতু? দিট্ঠি হিস্স, ভিক্খৱে, পাপিকা’’তি.

৩০৭. ‘‘সম্মাদিট্ঠিকস্স, ভিক্খৱে, পুৰিসপুগ্গলস্স যঞ্চেৱ কাযকম্মং যথাদিট্ঠি সমত্তং সমাদিন্নং যঞ্চ ৱচীকম্মং…পে… যঞ্চ মনোকম্মং যথাদিট্ঠি সমত্তং সমাদিন্নং যা চ চেতনা যা চ পত্থনা যো চ পণিধি যে চ সঙ্খাৰা সব্বে তে ধম্মা ইট্ঠায কন্তায মনাপায হিতায সুখায সংৱত্তন্তি. তং কিস্স হেতু? দিট্ঠি হিস্স, ভিক্খৱে, ভদ্দিকা. সেয্যথাপি, ভিক্খৱে, উচ্ছুবীজং ৱা সালিবীজং ৱা মুদ্দিকাবীজং ৱা অল্লায পথৱিযা নিক্খিত্তং যঞ্চেৱ পথৱিৰসং উপাদিযতি যঞ্চ আপোৰসং উপাদিযতি সব্বং তং মধুৰত্তায সাতত্তায অসেচনকত্তায সংৱত্ততি. তং কিস্স হেতু? বীজং হিস্স, ভিক্খৱে, ভদ্দকং. এৱমেৱং খো, ভিক্খৱে, সম্মাদিট্ঠিকস্স পুৰিসপুগ্গলস্স যঞ্চেৱ কাযকম্মং যথাদিট্ঠি সমত্তং সমাদিন্নং যঞ্চ ৱচীকম্মং…পে… যঞ্চ মনোকম্মং যথাদিট্ঠি সমত্তং সমাদিন্নং যা চ চেতনা যা চ পত্থনা যো চ পণিধি যে চ সঙ্খাৰা সব্বে তে ধম্মা ইট্ঠায কন্তায মনাপায হিতায সুখায সংৱত্তন্তি. তং কিস্স হেতু? দিট্ঠি হিস্স, ভিক্খৱে, ভদ্দিকা’’তি.

ৱগ্গো দুতিযো.

৩. ততিযৱগ্গো

৩০৮. ‘‘একপুগ্গলো, ভিক্খৱে, লোকে উপ্পজ্জমানো উপ্পজ্জতি বহুজনঅহিতায বহুজনঅসুখায, বহুনো জনস্স অনত্থায অহিতায দুক্খায দেৱমনুস্সানং. কতমো একপুগ্গলো? মিচ্ছাদিট্ঠিকো হোতি ৱিপৰীতদস্সনো. সো বহুজনং সদ্ধম্মা ৱুট্ঠাপেত্ৱা অসদ্ধম্মে পতিট্ঠাপেতি. অযং খো, ভিক্খৱে, একপুগ্গলো লোকে উপ্পজ্জমানো উপ্পজ্জতি বহুজনঅহিতায বহুজনঅসুখায, বহুনো জনস্স অনত্থায অহিতায দুক্খায দেৱমনুস্সান’’ন্তি.

৩০৯. ‘‘একপুগ্গলো, ভিক্খৱে, লোকে উপ্পজ্জমানো উপ্পজ্জতি বহুজনহিতায বহুজনসুখায, বহুনো জনস্স অত্থায হিতায সুখায দেৱমনুস্সানং. কতমো একপুগ্গলো? সম্মাদিট্ঠিকো হোতি অৱিপৰীতদস্সনো. সো বহুজনং অসদ্ধম্মা ৱুট্ঠাপেত্ৱা সদ্ধম্মে পতিট্ঠাপেতি. অযং খো, ভিক্খৱে, একপুগ্গলো লোকে উপপজ্জমানো উপ্পজ্জতি বহুজনহিতায বহুজনসুখায, বহুনো জনস্স অত্থায হিতায সুখায দেৱমনুস্সান’’ন্তি.

৩১০. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যং এৱং মহাসাৱজ্জং যথযিদং, ভিক্খৱে, মিচ্ছাদিট্ঠি. মিচ্ছাদিট্ঠিপৰমানি, ভিক্খৱে, মহাসাৱজ্জানী’’তি [ৱজ্জানীতি (সী. স্যা. কং.)].

৩১১. ‘‘নাহং, ভিক্খৱে, অঞ্ঞং একপুগ্গলম্পি সমনুপস্সামি যো এৱং বহুজনঅহিতায পটিপন্নো বহুজনঅসুখায, বহুনো জনস্স অনত্থায অহিতায দুক্খায দেৱমনুস্সানং যথযিদং, ভিক্খৱে, মক্খলি মোঘপুৰিসো. সেয্যথাপি, ভিক্খৱে, নদীমুখে খিপ্পং [খিপং (সী. স্যা. কং. পী.)] উড্ডেয্য [ওড্ডেয্য (সী.), উজ্ঝেয্য (ক.)] বহূনং মচ্ছানং অহিতায দুক্খায অনযায ব্যসনায; এৱমেৱং খো, ভিক্খৱে, মক্খলি মোঘপুৰিসো মনুস্সখিপ্পং মঞ্ঞে লোকে উপ্পন্নো বহূনং সত্তানং অহিতায দুক্খায অনযায ব্যসনাযা’’তি.

৩১২. ‘‘দুৰক্খাতে, ভিক্খৱে, ধম্মৱিনযে যো চ সমাদপেতি [সমাদাপেতি (?)] যঞ্চ সমাদপেতি যো চ সমাদপিতো তথত্তায পটিপজ্জতি সব্বে তে বহুং অপুঞ্ঞং পসৱন্তি. তং কিস্স হেতু? দুৰক্খাতত্তা, ভিক্খৱে, ধম্মস্সা’’তি.

৩১৩. ‘‘স্ৱাক্খাতে, ভিক্খৱে, ধম্মৱিনযে যো চ সমাদপেতি যঞ্চ সমাদপেতি যো চ সমাদপিতো তথত্তায পটিপজ্জতি সব্বে তে বহুং পুঞ্ঞং পসৱন্তি. তং কিস্স হেতু? স্ৱাক্খাতত্তা, ভিক্খৱে, ধম্মস্সা’’তি.

৩১৪. ‘‘দুৰক্খাতে, ভিক্খৱে, ধম্মৱিনযে দাযকেন মত্তা জানিতব্বা, নো পটিগ্গাহকেন. তং কিস্স হেতু? দুৰক্খাতত্তা, ভিক্খৱে, ধম্মস্সা’’তি.

৩১৫. ‘‘স্ৱাক্খাতে, ভিক্খৱে, ধম্মৱিনযে পটিগ্গাহকেন মত্তা জানিতব্বা, নো দাযকেন. তং কিস্স হেতু? স্ৱাক্খাতত্তা, ভিক্খৱে, ধম্মস্সা’’তি.

৩১৬. ‘‘দুৰক্খাতে, ভিক্খৱে, ধম্মৱিনযে যো আৰদ্ধৱীৰিযো সো দুক্খং ৱিহৰতি. তং কিস্স হেতু? দুৰক্খাতত্তা, ভিক্খৱে, ধম্মস্সা’’তি.

৩১৭. ‘‘স্ৱাক্খাতে, ভিক্খৱে, ধম্মৱিনযে যো কুসীতো সো দুক্খং ৱিহৰতি. তং কিস্স হেতু? স্ৱাক্খাতত্তা, ভিক্খৱে, ধম্মস্সা’’তি.

৩১৮. ‘‘দুৰক্খাতে, ভিক্খৱে, ধম্মৱিনযে যো কুসীতো সো সুখং ৱিহৰতি. তং কিস্স হেতু? দুৰক্খাতত্তা, ভিক্খৱে, ধম্মস্সা’’তি.

৩১৯. ‘‘স্ৱাক্খাতে, ভিক্খৱে, ধম্মৱিনযে যো আৰদ্ধৱীৰিযো সো সুখং ৱিহৰতি. তং কিস্স হেতু? স্ৱাক্খাতত্তা, ভিক্খৱে, ধম্মস্সা’’তি.

৩২০. ‘‘সেয্যথাপি, ভিক্খৱে, অপ্পমত্তকোপি গূথো দুগ্গন্ধো হোতি; এৱমেৱং খো অহং, ভিক্খৱে, অপ্পমত্তকম্পি ভৱং ন ৱণ্ণেমি, অন্তমসো অচ্ছৰাসঙ্ঘাতমত্তম্পি’’.

৩২১. ‘‘সেয্যথাপি, ভিক্খৱে, অপ্পমত্তকম্পি মুত্তং দুগ্গন্ধং হোতি… অপ্পমত্তকোপি খেড়ো দুগ্গন্ধো হোতি… অপ্পমত্তকোপি পুব্বো দুগ্গন্ধো হোতি… অপ্পমত্তকম্পি লোহিতং দুগ্গন্ধং হোতি; এৱমেৱং খো অহং, ভিক্খৱে, অপ্পমত্তকম্পি ভৱং ন ৱণ্ণেমি, অন্তমসো অচ্ছৰাসঙ্ঘাতমত্তম্পি’’.

ৱগ্গো ততিযো.

৪. চতুত্থৱগ্গো

৩২২. ‘‘সেয্যথাপি, ভিক্খৱে, অপ্পমত্তকং ইমস্মিং জম্বুদীপে আৰামৰামণেয্যকং ৱনৰামণেয্যকং ভূমিৰামণেয্যকং পোক্খৰণিৰামণেয্যকং; অথ খো এতদেৱ বহুতৰং যদিদং উক্কূলৱিকূলং নদীৱিদুগ্গং খাণুকণ্টকট্ঠানং [খাণুকণ্ডকধানং (সী. পী.)] পব্বতৱিসমং; এৱমেৱং খো, ভিক্খৱে, অপ্পকা তে সত্তা যে থলজা, অথ খো এতেৱ সত্তা বহুতৰা যে ওদকা’’.

৩২৩. … এৱমেৱং খো, ভিক্খৱে, অপ্পকা তে সত্তা যে মনুস্সেসু পচ্চাজাযন্তি; অথ খো এতেৱ সত্তা বহুতৰা যে অঞ্ঞত্ৰ মনুস্সেহি পচ্চাজাযন্তি.

… এৱমেৱং খো, ভিক্খৱে, অপ্পকা তে সত্তা যে মজ্ঝিমেসু জনপদেসু পচ্চাজাযন্তি; অথ খো এতেৱ সত্তা বহুতৰা যে পচ্চন্তিমেসু জনপদেসু পচ্চাজাযন্তি অৱিঞ্ঞাতাৰেসু মিলক্খেসু [মিলক্খূসু (ক.)].

৩২৪. … এৱমেৱং খো, ভিক্খৱে, অপ্পকা তে সত্তা যে পঞ্ঞৱন্তো অজড়া অনেড়মূগা পটিবলা সুভাসিতদুব্ভাসিতস্স অত্থমঞ্ঞাতুং; অথ খো এতেৱ সত্তা বহুতৰা যে দুপ্পঞ্ঞা জড়া এড়মূগা ন পটিবলা সুভাসিতদুব্ভাসিতস্স অত্থমঞ্ঞাতুং.

৩২৫. … এৱমেৱং খো, ভিক্খৱে, অপ্পকা তে সত্তা যে অৰিযেন পঞ্ঞাচক্খুনা সমন্নাগতা; অথ খো এতেৱ সত্তা বহুতৰা যে অৱিজ্জাগতা সম্মূড়্হা.

৩২৬. … এৱমেৱং খো, ভিক্খৱে, অপ্পকা তে সত্তা যে লভন্তি তথাগতং দস্সনায; অথ খো এতেৱ সত্তা বহুতৰা যে ন লভন্তি তথাগতং দস্সনায.

৩২৭. … এৱমেৱং খো, ভিক্খৱে, অপ্পকা তে সত্তা যে লভন্তি তথাগতপ্পৱেদিতং ধম্মৱিনযং সৱনায; অথ খো এতেৱ সত্তা বহুতৰা যে ন লভন্তি তথাগতপ্পৱেদিতং ধম্মৱিনযং সৱনায.

৩২৮. … এৱমেৱং খো, ভিক্খৱে, অপ্পকা তে সত্তা যে সুত্ৱা ধম্মং ধাৰেন্তি; অথ খো এতেৱ সত্তা বহুতৰা যে সুত্ৱা ধম্মং ন ধাৰেন্তি.

৩২৯. … এৱমেৱং খো, ভিক্খৱে, অপ্পকা তে সত্তা যে ধাতানং [ধতানং (সী. স্যা. কং. পী.)] ধম্মানং অত্থং উপপৰিক্খন্তি; অথ খো এতেৱ সত্তা বহুতৰা যে ধাতানং ধম্মানং অত্থং ন উপপৰিক্খন্তি.

৩৩০. … এৱমেৱং খো, ভিক্খৱে, অপ্পকা তে সত্তা যে অত্থমঞ্ঞায ধম্মমঞ্ঞায ধম্মানুধম্মং পটিপজ্জন্তি; অথ খো এতেৱ সত্তা বহুতৰা যে অত্থমঞ্ঞায ধম্মমঞ্ঞায ধম্মানুধম্মং ন পটিপজ্জন্তি.

৩৩১. … এৱমেৱং খো, ভিক্খৱে, অপ্পকা তে সত্তা যে সংৱেজনিযেসু ঠানেসু সংৱিজ্জন্তি; অথ খো এতেৱ সত্তা বহুতৰা যে সংৱেজনিযেসু ঠানেসু ন সংৱিজ্জন্তি.

৩৩২. … এৱমেৱং খো, ভিক্খৱে, অপ্পকা তে সত্তা যে সংৱিগ্গা যোনিসো পদহন্তি; অথ খো এতেৱ সত্তা বহুতৰা যে সংৱিগ্গা যোনিসো ন পদহন্তি.

৩৩৩. … এৱমেৱং খো, ভিক্খৱে, অপ্পকা তে সত্তা যে ৱৱস্সগ্গাৰম্মণং কৰিত্ৱা লভন্তি সমাধিং [চিত্তস্স সমাধিং (সী.)] লভন্তি চিত্তস্সেকগ্গতং [চিত্তস্সেকগ্গং (সী.)]; অথ খো এতেৱ সত্তা বহুতৰা যে ৱৱস্সগ্গাৰম্মণং কৰিত্ৱা ন লভন্তি সমাধিং ন লভন্তি চিত্তস্সেকগ্গতং.

৩৩৪. … এৱমেৱং খো, ভিক্খৱে, অপ্পকা তে সত্তা যে অন্নগ্গৰসগ্গানং লাভিনো; অথ খো এতেৱ সত্তা বহুতৰা যে অন্নগ্গৰসগ্গানং ন লাভিনো, উঞ্ছেন কপালাভতেন যাপেন্তি.

৩৩৫. … এৱমেৱং খো, ভিক্খৱে, অপ্পকা তে সত্তা যে অত্থৰসস্স ধম্মৰসস্স ৱিমুত্তিৰসস্স লাভিনো; অথ খো এতেৱ সত্তা বহুতৰা যে অত্থৰসস্স ধম্মৰসস্স ৱিমুত্তিৰসস্স ন লাভিনো. তস্মাতিহ, ভিক্খৱে, এৱং সিক্খিতব্বং – অত্থৰসস্স ধম্মৰসস্স ৱিমুত্তিৰসস্স লাভিনো ভৱিস্সামাতি. এৱঞ্হি ৱো, ভিক্খৱে, সিক্খিতব্বন্তি.

৩৩৬-৩৩৮. ‘‘সেয্যথাপি, ভিক্খৱে, অপ্পমত্তকং ইমস্মিং জম্বুদীপে আৰামৰামণেয্যকং ৱনৰামণেয্যকং ভূমিৰামণেয্যকং পোক্খৰণিৰামণেয্যকং; অথ খো এতদেৱ বহুতৰং যদিদং উক্কূলৱিকূলং নদীৱিদুগ্গং খাণুকণ্টকট্ঠানং পব্বতৱিসমং. এৱমেৱং খো, ভিক্খৱে, অপ্পকা তে সত্তা যে মনুস্সা চুতা মনুস্সেসু পচ্চাজাযন্তি, অথ খো এতেৱ সত্তা বহুতৰা যে মনুস্সা চুতা নিৰযে পচ্চাজাযন্তি…পে… তিৰচ্ছানযোনিযা পচ্চাজাযন্তি…পে… পেত্তিৱিসযে পচ্চাজাযন্তি’’.

৩৩৯-৩৪১. … এৱমেৱং খো, ভিক্খৱে, অপ্পকা তে সত্তা যে মনুস্সা চুতা দেৱেসু পচ্চাজাযন্তি; অথ খো এতেৱ সত্তা বহুতৰা যে মনুস্সা চুতা নিৰযে পচ্চাজাযন্তি… তিৰচ্ছানযোনিযা পচ্চাজাযন্তি… পেত্তিৱিসযে পচ্চাজাযন্তি.

৩৪২-৩৪৪. … এৱমেৱং খো, ভিক্খৱে, অপ্পকা তে সত্তা যে দেৱা চুতা দেৱেসু পচ্চাজাযন্তি; অথ খো এতেৱ সত্তা বহুতৰা যে দেৱা চুতা নিৰযে পচ্চাজাযন্তি… তিৰচ্ছানযোনিযা পচ্চাজাযন্তি… পেত্তিৱিসযে পচ্চাজাযন্তি.

৩৪৫-৩৪৭. … এৱমেৱং খো, ভিক্খৱে, অপ্পকা তে সত্তা যে দেৱা চুতা মনুস্সেসু পচ্চাজাযন্তি; অথ খো এতেৱ সত্তা বহুতৰা যে দেৱা চুতা নিৰযে পচ্চাজাযন্তি… তিৰচ্ছানযোনিযা পচ্চাজাযন্তি… পেত্তিৱিসযে পচ্চাজাযন্তি.

৩৪৮-৩৫০. … এৱমেৱং খো, ভিক্খৱে, অপ্পকা তে সত্তা যে নিৰযা চুতা মনুস্সেসু পচ্চাজাযন্তি; অথ খো এতেৱ সত্তা বহুতৰা যে নিৰযা চুতা নিৰযে পচ্চাজাযন্তি… তিৰচ্ছানযোনিযা পচ্চাজাযন্তি… পেত্তিৱিসযে পচ্চাজাযন্তি.

৩৫১-৩৫৩. … এৱমেৱং খো, ভিক্খৱে, অপ্পকা তে সত্তা যে নিৰযা চুতা দেৱেসু পচ্চাজাযন্তি; অথ খো এতেৱ সত্তা বহুতৰা যে নিৰযা চুতা নিৰযে পচ্চাজাযন্তি… তিৰচ্ছানযোনিযা পচ্চাজাযন্তি… পেত্তিৱিসযে পচ্চাজাযন্তি.

৩৫৪-৩৫৬. … এৱমেৱং খো, ভিক্খৱে, অপ্পকা তে সত্তা যে তিৰচ্ছানযোনিযা চুতা মনুস্সেসু পচ্চাজাযন্তি; অথ খো এতেৱ সত্তা বহুতৰা যে তিৰচ্ছানযোনিযা চুতা নিৰযে পচ্চাজাযন্তি… তিৰচ্ছানযোনিযা পচ্চাজাযন্তি… পেত্তিৱিসযে পচ্চাজাযন্তি.

৩৫৭-৩৫৯. … এৱমেৱং খো, ভিক্খৱে, অপ্পকা তে সত্তা যে তিৰচ্ছানযোনিযা চুতা দেৱেসু পচ্চাজাযন্তি; অথ খো এতেৱ সত্তা বহুতৰা যে তিৰচ্ছানযোনিযা চুতা নিৰযে পচ্চাজাযন্তি… তিৰচ্ছানযোনিযা পচ্চাজাযন্তি… পেত্তিৱিসযে পচ্চাজাযন্তি.

৩৬০-৩৬২. … এৱমেৱং খো, ভিক্খৱে, অপ্পকা তে সত্তা যে পেত্তিৱিসযা চুতা মনুস্সেসু পচ্চাজাযন্তি; অথ খো এতেৱ সত্তা বহুতৰা যে পেত্তিৱিসযা চুতা নিৰযে পচ্চাজাযন্তি… তিৰচ্ছানযোনিযা পচ্চাজাযন্তি… পেত্তিৱিসযে পচ্চাজাযন্তি.

৩৬৩-৩৬৫. … এৱমেৱং খো, ভিক্খৱে, অপ্পকা তে সত্তা যে পেত্তিৱিসযা চুতা দেৱেসু পচ্চাজাযন্তি; অথ খো এতেৱ সত্তা বহুতৰা যে পেত্তিৱিসযা চুতা নিৰযে পচ্চাজাযন্তি… তিৰচ্ছানযোনিযা পচ্চাজাযন্তি… পেত্তিৱিসযে পচ্চাজাযন্তি.

ৱগ্গো চতুত্থো.

জম্বুদীপপেয্যালো নিট্ঠিতো.

একধম্মপাড়ি সোড়সমো.