১২. অনাপত্তিৱগ্গো

১৫০. ‘‘যে তে, ভিক্খৱে, ভিক্খূ অনাপত্তিং আপত্তীতি দীপেন্তি তে, ভিক্খৱে, ভিক্খূ বহুজনঅহিতায পটিপন্না বহুজনঅসুখায, বহুনো জনস্স অনত্থায অহিতায দুক্খায দেৱমনুস্সানং. বহুঞ্চ তে, ভিক্খৱে, ভিক্খূ অপুঞ্ঞং পসৱন্তি, তে চিমং সদ্ধম্মং অন্তৰধাপেন্তী’’তি. পঠমং.

১৫১. ‘‘যে তে, ভিক্খৱে, ভিক্খূ আপত্তিং অনাপত্তীতি দীপেন্তি তে, ভিক্খৱে, ভিক্খূ বহুজনঅহিতায পটিপন্না বহুজনঅসুখায, বহুনো জনস্স অনত্থায অহিতায দুক্খায দেৱমনুস্সানং. বহুঞ্চ তে, ভিক্খৱে, ভিক্খূ অপুঞ্ঞং পসৱন্তি, তে চিমং সদ্ধম্মং অন্তৰধাপেন্তী’’তি. দুতিযং.

১৫২-১৫৯. ‘‘যে তে, ভিক্খৱে, ভিক্খূ লহুকং আপত্তিং গৰুকা আপত্তীতি দীপেন্তি…পে… গৰুকং আপত্তিং লহুকা আপত্তীতি দীপেন্তি…পে… দুট্ঠুল্লং আপত্তিং অদুট্ঠুল্লা আপত্তীতি দীপেন্তি…পে… অদুট্ঠুল্লং আপত্তিং দুট্ঠুল্লা আপত্তীতি দীপেন্তি…পে… সাৱসেসং আপত্তিং অনৱসেসা আপত্তীতি দীপেন্তি…পে… অনৱসেসং আপত্তিং সাৱসেসা আপত্তীতি দীপেন্তি…পে… সপ্পটিকম্মং আপত্তিং অপ্পটিকম্মা আপত্তীতি দীপেন্তি…পে… অপ্পটিকম্মং আপত্তিং সপ্পটিকম্মা আপত্তীতি দীপেন্তি তে, ভিক্খৱে, ভিক্খূ বহুজনঅহিতায পটিপন্না বহুজনঅসুখায, বহুনো জনস্স অনত্থায অহিতায দুক্খায দেৱমনুস্সানং. বহুঞ্চ তে, ভিক্খৱে, ভিক্খূ অপুঞ্ঞং পসৱন্তি, তে চিমং সদ্ধম্মং অন্তৰধাপেন্তী’’তি. দসমং.

১৬০. ‘‘যে তে, ভিক্খৱে, ভিক্খূ অনাপত্তিং অনাপত্তীতি দীপেন্তি তে, ভিক্খৱে, ভিক্খূ বহুজনহিতায পটিপন্না বহুজনসুখায, বহুনো জনস্স অত্থায হিতায সুখায দেৱমনুস্সানং. বহুঞ্চ তে, ভিক্খৱে, ভিক্খূ পুঞ্ঞং পসৱন্তি, তে চিমং সদ্ধম্মং ঠপেন্তী’’তি. একাদসমং.

১৬১. ‘‘যে তে, ভিক্খৱে, ভিক্খূ আপত্তিং আপত্তীতি দীপেন্তি তে, ভিক্খৱে, ভিক্খূ বহুজনহিতায পটিপন্না বহুজনসুখায, বহুনো জনস্স অত্থায হিতায সুখায দেৱমনুস্সানং. বহুঞ্চ তে, ভিক্খৱে, ভিক্খূ পুঞ্ঞং পসৱন্তি, তে চিমং সদ্ধম্মং ঠপেন্তী’’তি. দ্ৱাদসমং.

১৬২-১৬৯. ‘‘যে তে, ভিক্খৱে, ভিক্খূ লহুকং আপত্তিং লহুকা আপত্তীতি দীপেন্তি… গৰুকং আপত্তিং গৰুকা আপত্তীতি দীপেন্তি… দুট্ঠুল্লং আপত্তিং দুট্ঠুল্লা আপত্তীতি দীপেন্তি… অদুট্ঠুল্লং আপত্তিং অদুট্ঠুল্লা আপত্তীতি দীপেন্তি… সাৱসেসং আপত্তিং সাৱসেসা আপত্তীতি দীপেন্তি… অনৱসেসং আপত্তিং অনৱসেসা আপত্তীতি দীপেন্তি… সপ্পটিকম্মং আপত্তিং সপ্পটিকম্মা আপত্তীতি দীপেন্তি… অপ্পটিকম্মং আপত্তিং অপ্পটিকম্মা আপত্তীতি দীপেন্তি তে, ভিক্খৱে, ভিক্খূ বহুজনহিতায পটিপন্না বহুজনসুখায, বহুনো জনস্স অত্থায হিতায সুখায দেৱমনুস্সানং. বহুঞ্চ তে, ভিক্খৱে, ভিক্খূ পুঞ্ঞং পসৱন্তি, তে চিমং সদ্ধম্মং ঠপেন্তী’’তি. ৱীসতিমং.

অনাপত্তিৱগ্গো দ্ৱাদসমো.