১৩. একপুগ্গলৱগ্গো

১৭০. ‘‘একপুগ্গলো, ভিক্খৱে, লোকে উপ্পজ্জমানো উপ্পজ্জতি বহুজনহিতায বহুজনসুখায লোকানুকম্পায অত্থায হিতায সুখায দেৱমনুস্সানং. কতমো একপুগ্গলো? তথাগতো অৰহং সম্মাসম্বুদ্ধো. অযং খো, ভিক্খৱে, একপুগ্গলো লোকে উপ্পজ্জমানো উপ্পজ্জতি বহুজনহিতায বহুজনসুখায লোকানুকম্পায অত্থায হিতায সুখায দেৱমনুস্সান’’ন্তি.

১৭১. ‘‘একপুগ্গলস্স, ভিক্খৱে, পাতুভাৱো দুল্লভো লোকস্মিং. কতমস্স একপুগ্গলস্স? তথাগতস্স অৰহতো সম্মাসম্বুদ্ধস্স. ইমস্স খো, ভিক্খৱে, একপুগ্গলস্স পাতুভাৱো দুল্লভো লোকস্মি’’ন্তি.

১৭২. ‘‘একপুগ্গলো, ভিক্খৱে, লোকে উপ্পজ্জমানো উপ্পজ্জতি অচ্ছৰিযমনুস্সো. কতমো একপুগ্গলো? তথাগতো অৰহং সম্মাসম্বুদ্ধো. অযং খো, ভিক্খৱে, একপুগ্গলো লোকে উপ্পজ্জমানো উপ্পজ্জতি অচ্ছৰিযমনুস্সো’’তি.

১৭৩. ‘‘একপুগ্গলস্স, ভিক্খৱে, কালকিৰিযা বহুনো জনস্স অনুতপ্পা [আনুতপ্পা (সী.)] হোতি. কতমস্স একপুগ্গলস্স? তথাগতস্স অৰহতো সম্মাসম্বুদ্ধস্স. ইমস্স খো, ভিক্খৱে, একপুগ্গলস্স কালকিৰিযা বহুনো জনস্স অনুতপ্পা হোতী’’তি.

১৭৪. ‘‘একপুগ্গলো, ভিক্খৱে, লোকে উপ্পজ্জমানো উপ্পজ্জতি অদুতিযো অসহাযো অপ্পটিমো অপ্পটিসমো অপ্পটিভাগো অপ্পটিপুগ্গলো অসমো অসমসমো দ্ৱিপদানং অগ্গো. কতমো একপুগ্গলো? তথাগতো অৰহং সম্মাসম্বুদ্ধো. অযং খো, ভিক্খৱে, একপুগ্গলো লোকে উপ্পজ্জমানো উপ্পজ্জতি অদুতিযো অসহাযো অপ্পটিমো অপ্পটিসমো অপ্পটিভাগো অপ্পটিপুগ্গলো অসমো অসমসমো দ্ৱিপদানং অগ্গো’’তি.

১৭৫-১৮৬. ‘‘একপুগ্গলস্স, ভিক্খৱে, পাতুভাৱা মহতো চক্খুস্স পাতুভাৱো হোতি, মহতো আলোকস্স পাতুভাৱো হোতি, মহতো ওভাসস্স পাতুভাৱো হোতি, ছন্নং অনুত্তৰিযানং পাতুভাৱো হোতি, চতুন্নং পটিসম্ভিদানং সচ্ছিকিৰিযা হোতি, অনেকধাতুপটিৱেধো হোতি, নানাধাতুপটিৱেধো হোতি, ৱিজ্জাৱিমুত্তিফলসচ্ছিকিৰিযা হোতি, সোতাপত্তিফলসচ্ছিকিৰিযা হোতি, সকদাগামিফলসচ্ছিকিৰিযা হোতি, অনাগামিফলসচ্ছিকিৰিযা হোতি, অৰহত্তফলসচ্ছিকিৰিযা হোতি. কতমস্স একপুগ্গলস্স? তথাগতস্স অৰহতো সম্মাসম্বুদ্ধস্স. ইমস্স খো, ভিক্খৱে, একপুগ্গলস্স পাতুভাৱা মহতো চক্খুস্স পাতুভাৱো হোতি, মহতো আলোকস্স পাতুভাৱো হোতি, মহতো ওভাসস্স পাতুভাৱো হোতি, ছন্নং অনুত্তৰিযানং পাতুভাৱো হোতি, চতুন্নং পটিসম্ভিদানং সচ্ছিকিৰিযা হোতি, অনেকধাতুপটিৱেধো হোতি, নানাধাতুপটিৱেধো হোতি, ৱিজ্জাৱিমুত্তিফলসচ্ছিকিৰিযা হোতি, সোতাপত্তিফলসচ্ছিকিৰিযা হোতি, সকদাগামিফলসচ্ছিকিৰিযা হোতি, অনাগামিফলসচ্ছিকিৰিযা হোতি, অৰহত্তফলসচ্ছিকিৰিযা হোতী’’তি.

১৮৭. ‘‘নাহং ভিক্খৱে, অঞ্ঞং একপুগ্গলম্পি সমনুপস্সামি যো এৱং তথাগতেন অনুত্তৰং ধম্মচক্কং পৱত্তিতং সম্মদেৱ অনুপ্পৱত্তেতি যথযিদং, ভিক্খৱে, সাৰিপুত্তো. সাৰিপুত্তো, ভিক্খৱে, তথাগতেন অনুত্তৰং ধম্মচক্কং পৱত্তিতং সম্মদেৱ অনুপ্পৱত্তেতী’’তি.

একপুগ্গলৱগ্গো তেৰসমো.