১. ৰূপাদিৱগ্গো

১. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘নাহং, ভিক্খৱে, অঞ্ঞং একৰূপম্পি সমনুপস্সামি যং এৱং পুৰিসস্স চিত্তং পৰিযাদায তিট্ঠতি যথযিদং, ভিক্খৱে, ইত্থিৰূপং. ইত্থিৰূপং, ভিক্খৱে, পুৰিসস্স চিত্তং পৰিযাদায তিট্ঠতী’’তি. পঠমং.

২. ‘‘নাহং, ভিক্খৱে, অঞ্ঞং একসদ্দম্পি সমনুপস্সামি যং এৱং পুৰিসস্স চিত্তং পৰিযাদায তিট্ঠতি যথযিদং, ভিক্খৱে, ইত্থিসদ্দো. ইত্থিসদ্দো, ভিক্খৱে, পুৰিসস্স চিত্তং পৰিযাদায তিট্ঠতী’’তি. দুতিযং.

৩. ‘‘নাহং, ভিক্খৱে, অঞ্ঞং একগন্ধম্পি সমনুপস্সামি যং এৱং পুৰিসস্স চিত্তং পৰিযাদায তিট্ঠতি যথযিদং, ভিক্খৱে, ইত্থিগন্ধো. ইত্থিগন্ধো, ভিক্খৱে, পুৰিসস্স চিত্তং পৰিযাদায তিট্ঠতী’’তি. ততিযং.

৪. ‘‘নাহং, ভিক্খৱে, অঞ্ঞং একৰসম্পি সমনুপস্সামি যং এৱং পুৰিসস্স চিত্তং পৰিযাদায তিট্ঠতি যথযিদং, ভিক্খৱে, ইত্থিৰসো. ইত্থিৰসো, ভিক্খৱে, পুৰিসস্স চিত্তং পৰিযাদায তিট্ঠতী’’তি. চতুত্থং.

৫. ‘‘নাহং, ভিক্খৱে, অঞ্ঞং একফোট্ঠব্বম্পি সমনুপস্সামি যং এৱং পুৰিসস্স চিত্তং পৰিযাদায তিট্ঠতি যথযিদং, ভিক্খৱে, ইত্থিফোট্ঠব্বো. ইত্থিফোট্ঠব্বো, ভিক্খৱে, পুৰিসস্স চিত্তং পৰিযাদায তিট্ঠতী’’তি. পঞ্চমং.

৬. ‘‘নাহং, ভিক্খৱে, অঞ্ঞং একৰূপম্পি সমনুপস্সামি যং এৱং ইত্থিযা চিত্তং পৰিযাদায তিট্ঠতি যথযিদং, ভিক্খৱে, পুৰিসৰূপং. পুৰিসৰূপং, ভিক্খৱে, ইত্থিযা চিত্তং পৰিযাদায তিট্ঠতী’’তি. ছট্ঠং.

৭. ‘‘নাহং, ভিক্খৱে, অঞ্ঞং একসদ্দম্পি সমনুপস্সামি যং এৱং ইত্থিযা চিত্তং পৰিযাদায তিট্ঠতি যথযিদং, ভিক্খৱে, পুৰিসসদ্দো. পুৰিসসদ্দো, ভিক্খৱে, ইত্থিযা চিত্তং পৰিযাদায তিট্ঠতী’’তি. সত্তমং.

৮. ‘‘নাহং, ভিক্খৱে, অঞ্ঞং একগন্ধম্পি সমনুপস্সামি যং এৱং ইত্থিযা চিত্তং পৰিযাদায তিট্ঠতি যথযিদং, ভিক্খৱে, পুৰিসগন্ধো. পুৰিসগন্ধো, ভিক্খৱে, ইত্থিযা চিত্তং পৰিযাদায তিট্ঠতী’’তি. অট্ঠমং.

৯. ‘‘নাহং, ভিক্খৱে, অঞ্ঞং একৰসম্পি সমনুপস্সামি যং এৱং ইত্থিযা চিত্তং পৰিযাদায তিট্ঠতি যথযিদং, ভিক্খৱে, পুৰিসৰসো. পুৰিসৰসো, ভিক্খৱে, ইত্থিযা চিত্তং পৰিযাদায তিট্ঠতী’’তি. নৱমং.

১০. ‘‘নাহং, ভিক্খৱে, অঞ্ঞং একফোট্ঠব্বম্পি সমনুপস্সামি যং এৱং ইত্থিযা চিত্তং পৰিযাদায তিট্ঠতি যথযিদং, ভিক্খৱে, পুৰিসফোট্ঠব্বো. পুৰিসফোট্ঠব্বো, ভিক্খৱে, ইত্থিযা চিত্তং পৰিযাদায তিট্ঠতী’’তি. দসমং.

ৰূপাদিৱগ্গো পঠমো.