২. নীৱৰণপ্পহানৱগ্গো

১১. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্নো ৱা কামচ্ছন্দো উপ্পজ্জতি উপ্পন্নো ৱা কামচ্ছন্দো ভিয্যোভাৱায ৱেপুল্লায সংৱত্ততি যথযিদং, ভিক্খৱে, সুভনিমিত্তং. সুভনিমিত্তং, ভিক্খৱে, অযোনিসো মনসি কৰোতো অনুপ্পন্নো চেৱ কামচ্ছন্দো উপ্পজ্জতি উপ্পন্নো চ কামচ্ছন্দো ভিয্যোভাৱায ৱেপুল্লায সংৱত্ততী’’তি. পঠমং.

১২. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্নো ৱা ব্যাপাদো উপ্পজ্জতি উপ্পন্নো ৱা ব্যাপাদো ভিয্যোভাৱায ৱেপুল্লায সংৱত্ততি যথযিদং, ভিক্খৱে, পটিঘনিমিত্তং. পটিঘনিমিত্তং, ভিক্খৱে, অযোনিসো মনসি কৰোতো অনুপ্পন্নো চেৱ ব্যাপাদো উপ্পজ্জতি উপ্পন্নো চ ব্যাপাদো ভিয্যোভাৱায ৱেপুল্লায সংৱত্ততী’’তি. দুতিযং.

১৩. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্নং ৱা থিনমিদ্ধং [থীনমিদ্ধং (সী. স্যা. কং. পী.)] উপ্পজ্জতি উপ্পন্নং ৱা থিনমিদ্ধং ভিয্যোভাৱায ৱেপুল্লায সংৱত্ততি যথযিদং, ভিক্খৱে, অৰতি তন্দী [তন্দি (ক.)] ৱিজম্ভিতা [ৱিজম্ভিকা (সী. স্যা. কং. পী.)] ভত্তসম্মদো চেতসো চ লীনত্তং. লীনচিত্তস্স, ভিক্খৱে, অনুপ্পন্নঞ্চেৱ থিনমিদ্ধং উপ্পজ্জতি উপ্পন্নঞ্চ থিনমিদ্ধং ভিয্যোভাৱায ৱেপুল্লায সংৱত্ততী’’তি. ততিযং.

১৪. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্নং ৱা উদ্ধচ্চকুক্কুচ্চং উপ্পজ্জতি উপ্পন্নং ৱা উদ্ধচ্চকুক্কুচ্চং ভিয্যোভাৱায ৱেপুল্লায সংৱত্ততি যথযিদং, ভিক্খৱে, চেতসো অৱূপসমো. অৱূপসন্তচিত্তস্স, ভিক্খৱে, অনুপ্পন্নঞ্চেৱ উদ্ধচ্চকুক্কুচ্চং উপ্পজ্জতি উপ্পন্নঞ্চ উদ্ধচ্চকুক্কুচ্চং ভিয্যোভাৱায ৱেপুল্লায সংৱত্ততী’’তি. চতুত্থং.

১৫. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা ৱিচিকিচ্ছা উপ্পজ্জতি উপ্পন্না ৱা ৱিচিকিচ্ছা ভিয্যোভাৱায ৱেপুল্লায সংৱত্ততি যথযিদং, ভিক্খৱে, অযোনিসোমনসিকাৰো. অযোনিসো, ভিক্খৱে, মনসি কৰোতো অনুপ্পন্না চেৱ ৱিচিকিচ্ছা উপ্পজ্জতি উপ্পন্না চ ৱিচিকিচ্ছা ভিয্যোভাৱায ৱেপুল্লায সংৱত্ততী’’তি. পঞ্চমং.

১৬. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্নো ৱা কামচ্ছন্দো নুপ্পজ্জতি উপ্পন্নো ৱা কামচ্ছন্দো পহীযতি যথযিদং, ভিক্খৱে, অসুভনিমিত্তং. অসুভনিমিত্তং, ভিক্খৱে, যোনিসো মনসি কৰোতো অনুপ্পন্নো চেৱ কামচ্ছন্দো নুপ্পজ্জতি উপ্পন্নো চ কামচ্ছন্দো পহীযতী’’তি. ছট্ঠং.

১৭. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্নো ৱা ব্যাপাদো নুপ্পজ্জতি উপ্পন্নো ৱা ব্যাপাদো পহীযতি যথযিদং, ভিক্খৱে, মেত্তা চেতোৱিমুত্তি. মেত্তং, ভিক্খৱে, চেতোৱিমুত্তিং যোনিসো মনসি কৰোতো অনুপ্পন্নো চেৱ ব্যাপাদো নুপ্পজ্জতি উপ্পন্নো চ ব্যাপাদো পহীযতী’’তি. সত্তমং.

১৮. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্নং ৱা থিনমিদ্ধং নুপ্পজ্জতি উপ্পন্নং ৱা থিনমিদ্ধং পহীযতি যথযিদং, ভিক্খৱে, আৰম্ভধাতু নিক্কমধাতু পৰক্কমধাতু. আৰদ্ধৱীৰিযস্স, ভিক্খৱে, অনুপ্পন্নঞ্চেৱ থিনমিদ্ধং নুপ্পজ্জতি উপ্পন্নঞ্চ থিনমিদ্ধং পহীযতী’’তি. অট্ঠমং.

১৯. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্নং ৱা উদ্ধচ্চকুক্কুচ্চং নুপ্পজ্জতি উপ্পন্নং ৱা উদ্ধচ্চকুক্কুচ্চং পহীযতি যথযিদং, ভিক্খৱে, চেতসো ৱূপসমো. ৱূপসন্তচিত্তস্স, ভিক্খৱে, অনুপ্পন্নঞ্চেৱ উদ্ধচ্চকুক্কুচ্চং নুপ্পজ্জতি উপ্পন্নঞ্চ উদ্ধচ্চকুক্কুচ্চং পহীযতী’’তি. নৱমং.

২০. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা ৱিচিকিচ্ছা নুপ্পজ্জতি উপ্পন্না ৱা ৱিচিকিচ্ছা পহীযতি যথযিদং, ভিক্খৱে, যোনিসোমনসিকাৰো. যোনিসো, ভিক্খৱে, মনসি কৰোতো অনুপ্পন্না চেৱ ৱিচিকিচ্ছা নুপ্পজ্জতি উপ্পন্না চ ৱিচিকিচ্ছা পহীযতী’’তি. দসমং.

নীৱৰণপ্পহানৱগ্গো দুতিযো.