ඡන්දාරොපනකථා

46. ඡන්දාරොපනකථායං ඡන්දසොති සක්කටභාසාය. න ආරොපෙතබ්බන්ති වාචනාමග්ගං න ආරොපෙතබ්බං. සකාය නිරුත්තියාති මාගධභාසාය. තත්ථ සන්තෙහි කතාති සක්කටා, අට්ඨකවාමකාදීහි සමිතපාපෙහි ඉසීහි කතාති අත්ථො. අථ වා සක්කරිතබ්බා පූජිතබ්බාති සක්කටා මනුස්සානං හිතසුඛාවහනතො, තදත්ථිකෙහි මනුස්සෙහි පූජිතබ්බාති අත්ථො. භාසීයතෙති භාසා, සක්කටා ච සා භාසා චාති සක්කටභාසා. වෙදත්තයගතා නිරුත්ති, සස්ස එසාති සකා, භගවතො වචනන්ත්‍යත්ථො. මගධෙ ජාතා මාගධිකා, ආදිකප්පකාලෙ මගධරට්ඨෙ ජාතාති අත්ථො. උච්චතෙති උත්ති, නීහරිත්වා උත්ති නිරුත්ති, පිටකත්තයතො නීහරිත්වා කථීයතෙත්‍යත්ථො. වුත්තඤ්හෙතං පොරාණෙහි –

‘‘සා මාගධී මූලභාසා;

නරා යායාදිකප්පිකා;

බ්‍රහ්මානො චාස්සුතාලාපා;

සම්බුද්ධා චාපි භාසරෙ’’ති.

සෙසං සුවිඤ්ඤෙය්‍යමෙව.