༡. ཨུ་ཀྐོ་ཊ་ན་བྷེ་དཱ་དི
༣༤༠. [ཙཱུ་ལ༹་ཝ. ༢༡༥; པ་རི. ༢༧༥] ཙ་ཏྟཱ་རི ཨ་དྷི་ཀ་ར་ཎཱ་ནི. ཝི་ཝཱ་དཱ་དྷི་ཀ་ར་ཎཾ, ཨ་ནུ་ཝཱ་དཱ་དྷི་ཀ་ར་ཎཾ, ཨཱ་པ་ཏྟཱ་དྷི་ཀ་ར་ཎཾ, ཀི་ཙྩཱ་དྷི་ཀ་ར་ཎཾ – ཨི་མཱ་ནི ཙ་ཏྟཱ་རི ཨ་དྷི་ཀ་ར་ཎཱ་ནི.
ཨི་མེ་སཾ ཙ་ཏུ་ནྣཾ ཨ་དྷི་ཀ་ར་ཎཱ་ནཾ ཀ་ཏི ཨུ་ཀྐོ་ཊཱ? ཨི་མེ་སཾ ཙ་ཏུ་ནྣཾ ཨ་དྷི་ཀ་ར་ཎཱ་ནཾ ད་ས ཨུ་ཀྐོ་ཊཱ. ཝི་ཝཱ་དཱ་དྷི་ཀ་ར་ཎ་སྶ དྭེ ཨུ་ཀྐོ་ཊཱ, ཨ་ནུ་ཝཱ་དཱ་དྷི་ཀ་ར་ཎ་སྶ ཙ་ཏྟཱ་རོ ཨུ་ཀྐོ་ཊཱ, ཨཱ་པ་ཏྟཱ་དྷི་ཀ་ར་ཎ་སྶ ཏ་ཡོ ཨུ་ཀྐོ་ཊཱ, ཀི་ཙྩཱ་དྷི་ཀ་ར་ཎ་སྶ ཨེ་ཀོ ཨུ་ཀྐོ་ཊོ – ཨི་མེ་སཾ ཙ་ཏུ་ནྣཾ ཨ་དྷི་ཀ་ར་ཎཱ་ནཾ ཨི་མེ ད་ས ཨུ་ཀྐོ་ཊཱ.
ཝི་ཝཱ་དཱ་དྷི་ཀ་ར་ཎཾ ཨུ་ཀྐོ་ཊེ་ནྟོ ཀ་ཏི ས་མ་ཐེ ཨུ་ཀྐོ་ཊེ་ཏི? ཨ་ནུ་ཝཱ་དཱ་དྷི་ཀ་ར་ཎཾ ཨུ་ཀྐོ་ཊེ་ནྟོ ཀ་ཏི ས་མ་ཐེ ཨུ་ཀྐོ་ཊེ་ཏི? ཨཱ་པ་ཏྟཱ་དྷི་ཀ་ར་ཎཾ ཨུ་ཀྐོ་ཊེ་ནྟོ ཀ་ཏི ས་མ་ཐེ ཨུ་ཀྐོ་ཊེ་ཏི? ཀི་ཙྩཱ་དྷི་ཀ་ར་ཎཾ ཨུ་ཀྐོ་ཊེ་ནྟོ ཀ་ཏི ས་མ་ཐེ ཨུ་ཀྐོ་ཊེ་ཏི?
ཝི་ཝཱ་དཱ་དྷི་ཀ་ར་ཎཾ ཨུ་ཀྐོ་ཊེ་ནྟོ དྭེ ས་མ་ཐེ ཨུ་ཀྐོ་ཊེ་ཏི. ཨ་ནུ་ཝཱ་དཱ་དྷི་ཀ་ར་ཎཾ ཨུ་ཀྐོ་ཊེ་ནྟོ ཙ་ཏྟཱ་རོ ས་མ་ཐེ ཨུ་ཀྐོ་ཊེ་ཏི. ཨཱ་པ་ཏྟཱ་དྷི་ཀ་ར་ཎཾ ཨུ་ཀྐོ་ཊེ་ནྟོ ཏ་ཡོ ས་མ་ཐེ ཨུ་ཀྐོ་ཊེ་ཏི. ཀི་ཙྩཱ་དྷི་ཀ་ར་ཎཾ ཨུ་ཀྐོ་ཊེ་ནྟོ ཨེ་ཀཾ ས་མ་ཐཾ ཨུ་ཀྐོ་ཊེ་ཏི.
༣༤༡. ཀ་ཏི ཨུ་ཀྐོ་ཊཱ? ཀ་ཏི་ཧཱ་ཀཱ་རེ་ཧི ཨུ་ཀྐོ་ཊ་ནཾ པ་ས་ཝ་ཏི? ཀ་ཏི་ཧ་ངྒེ་ཧི ས་མ་ནྣཱ་ག་ཏོ པུ་གྒ་ལོ ཨ་དྷི་ཀ་ར་ཎཾ ཨུ་ཀྐོ་ཊེ་ཏི? ཀ་ཏི པུ་གྒ་ལཱ ཨ་དྷི་ཀ་ར་ཎཾ ཨུ་ཀྐོ་ཊེ་ནྟཱ ཨཱ་པ་ཏྟིཾ ཨཱ་པ་ཛྫ་ནྟི?
དྭཱ་ད་ས ཨུ་ཀྐོ་ཊཱ. ད་ས་ཧཱ་ཀཱ་རེ་ཧི ཨུ་ཀྐོ་ཊ་ནཾ པ་ས་ཝ་ཏི. ཙ་ཏཱུ་ཧ་ངྒེ་ཧི ས་མ་ནྣཱ་ག་ཏོ པུ་གྒ་ལོ ཨ་དྷི་ཀ་ར་ཎཾ ཨུ་ཀྐོ་ཊེ་ཏི. ཙ་ཏྟཱ་རོ པུ་གྒ་ལཱ ཨ་དྷི་ཀ་ར་ཎཾ ཨུ་ཀྐོ་ཊེ་ནྟཱ ཨཱ་པ་ཏྟིཾ ཨཱ་པ་ཛྫ་ནྟི?
ཀ་ཏ་མེ དྭཱ་ད་ས ཨུ་ཀྐོ་ཊཱ? ཨ་ཀ་ཏཾ ཀ་མྨཾ, དུ་ཀྐ་ཊཾ ཀ་མྨཾ, པུ་ན ཀཱ་ཏ་བྦཾ ཀ་མྨཾ, ཨ་ནི་ཧ་ཏཾ, དུ་ནྣི་ཧ་ཏཾ, པུ་ན ནི་ཧ་ནི་ཏ་བྦཾ, ཨ་ཝི་ནི་ཙྪི་ཏཾ, དུ་ཝི་ནི་ཙྪི་ཏཾ, པུ་ན ཝི་ནི་ཙྪི་ཏ་བྦཾ, ཨ་ཝཱུ་པ་ས་ནྟཾ, དུ་ཝཱུ་པ་ས་ནྟཾ, པུ་ན ཝཱུ་པ་ས་མེ་ཏ་བྦ་ནྟི – ཨི་མེ དྭཱ་ད་ས ཨུ་ཀྐོ་ཊཱ.
ཀ་ཏ་མེ་ཧི ད་ས་ཧཱ་ཀཱ་རེ་ཧི ཨུ་ཀྐོ་ཊ་ནཾ པ་ས་ཝ་ཏི? ཏ་ཏྠ ཛཱ་ཏ་ཀཾ ཨ་དྷི་ཀ་ར་ཎཾ ཨུ་ཀྐོ་ཊེ་ཏི, ཏ་ཏྠ ཛཱ་ཏ་ཀཾ ཝཱུ་པ་ས་ནྟཾ ཨ་དྷི་ཀ་ར་ཎཾ ཨུ་ཀྐོ་ཊེ་ཏི, ཨ་ནྟ་རཱ་མ་གྒེ ཨ་དྷི་ཀ་ར་ཎཾ ཨུ་ཀྐོ་ཊེ་ཏི, ཨ་ནྟ་རཱ་མ་གྒེ ཝཱུ་པ་ས་ནྟཾ ཨ་དྷི་ཀ་ར་ཎཾ ཨུ་ཀྐོ་ཊེ་ཏི, ཏ་ཏྠ ག་ཏཾ ཨ་དྷི་ཀ་ར་ཎཾ ཨུ་ཀྐོ་ཊེ་ཏི, ཏ་ཏྠ ག་ཏཾ ཝཱུ་པ་ས་ནྟཾ ཨ་དྷི་ཀ་ར་ཎཾ ཨུ་ཀྐོ་ཊེ་ཏི, ས་ཏི་ཝི་ན་ཡཾ ཨུ་ཀྐོ་ཊེ་ཏི, ཨ་མཱུ་ལ༹ྷ་ཝི་ན་ཡཾ ཨུ་ཀྐོ་ཊེ་ཏི, ཏ་སྶ་པཱ་པི་ཡ་སི་ཀཾ ཨུ་ཀྐོ་ཊེ་ཏི, ཏི་ཎ་ཝ་ཏྠཱ་ར་ཀཾ ཨུ་ཀྐོ་ཊེ་ཏི – ཨི་མེ་ཧི ད་ས་ཧཱ་ཀཱ་རེ་ཧི ཨུ་ཀྐོ་ཊ་ནཾ པ་ས་ཝ་ཏི.
ཀ་ཏ་མེ་ཧི ཙ་ཏཱུ་ཧ་ངྒེ་ཧི ས་མ་ནྣཱ་ག་ཏོ པུ་གྒ་ལོ ཨ་དྷི་ཀ་ར་ཎཾ ཨུ་ཀྐོ་ཊེ་ཏི? ཚ་ནྡཱ་ག་ཏིཾ ག་ཙྪ་ནྟོ ཨ་དྷི་ཀ་ར་ཎཾ ཨུ་ཀྐོ་ཊེ་ཏི, དོ་སཱ་ག་ཏིཾ ག་ཙྪ་ནྟོ ཨ་དྷི་ཀ་ར་ཎཾ ཨུ་ཀྐོ་ཊེ་ཏི, མོ་ཧཱ་ག་ཏིཾ ག་ཙྪ་ནྟོ ཨ་དྷི་ཀ་ར་ཎཾ ཨུ་ཀྐོ་ཊེ་ཏི, བྷ་ཡཱ་ག་ཏིཾ ག་ཙྪ་ནྟོ ཨ་དྷི་ཀ་ར་ཎཾ ཨུ་ཀྐོ་ཊེ་ཏི – ཨི་མེ་ཧི ཙ་ཏཱུ་ཧ་ངྒེ་ཧི ས་མ་ནྣཱ་ག་ཏོ པུ་གྒ་ལོ ཨ་དྷི་ཀ་ར་ཎཾ ཨུ་ཀྐོ་ཊེ་ཏི.
ཀ་ཏ་མེ ཙ་ཏྟཱ་རོ པུ་གྒ་ལཱ ཨ་དྷི་ཀ་ར་ཎཾ ཨུ་ཀྐོ་ཊེ་ནྟཱ ཨཱ་པ་ཏྟིཾ ཨཱ་པ་ཛྫ་ནྟི? ཏ་ད་ཧུ་པ་ས་མྤ་ནྣོ ཨུ་ཀྐོ་ཊེ་ཏི ཨུ་ཀྐོ་ཊ་ན་ཀཾ པཱ་ཙི་ཏྟི་ཡཾ, ཨཱ་ག་ནྟུ་ཀོ ཨུ་ཀྐོ་ཊེ་ཏི ཨུ་ཀྐོ་ཊ་ན་ཀཾ པཱ་ཙི་ཏྟི་ཡཾ, ཀཱ་ར་ཀོ ཨུ་ཀྐོ་ཊེ་ཏི ཨུ་ཀྐོ་ཊ་ན་ཀཾ པཱ་ཙི་ཏྟི་ཡཾ, ཚ་ནྡ་དཱ་ཡ་ཀོ ཨུ་ཀྐོ་ཊེ་ཏི ཨུ་ཀྐོ་ཊ་ན་ཀཾ པཱ་ཙི་ཏྟི་ཡཾ – ཨི་མེ ཙ་ཏྟཱ་རོ པུ་གྒ་ལཱ ཨ་དྷི་ཀ་ར་ཎཾ ཨུ་ཀྐོ་ཊེ་ནྟཱ ཨཱ་པ་ཏྟིཾ ཨཱ་པ་ཛྫ་ནྟི.