༢. དེ་ས་ནཱ་གཱ་མི་ནི་ཡཱ་དི་ཨཱ་པ་ཏྟི
༤༧༥. ཀ་ཏི དེ་ས་ནཱ་གཱ་མི་ནི་ཡོ, ཀ་ཏི ས་པྤ་ཊི་ཀ་མྨཱ ཀ་ཏཱ;
ཀ་ཏེ་ཏྠ ཨ་པྤ་ཊི་ཀ་མྨཱ ཝུ་ཏྟཱ, བུ་དྡྷེ་ནཱ་དི་ཙྩ་བ་ནྡྷུ་ནཱ.
པ་ཉྩ དེ་ས་ནཱ་གཱ་མི་ནི་ཡོ, ཚ ས་པྤ་ཊི་ཀ་མྨཱ ཀ་ཏཱ;
ཨེ་ཀེ་ཏྠ ཨ་པྤ་ཊི་ཀ་མྨཱ ཝུ་ཏྟཱ, བུ་དྡྷེ་ནཱ་དི་ཙྩ་བ་ནྡྷུ་ནཱ.
ཝི་ན་ཡ་ག་རུ་ཀཱ ཀ་ཏི ཝུ་ཏྟཱ, ཀཱ་ཡ་ཝཱ་ཙ་སི་ཀཱ་ནི ཙ;
ཀ་ཏི ཝི་ཀཱ་ལེ དྷ་ཉྙ་ར་སོ, ཀ་ཏི ཉ་ཏྟི་ཙ་ཏུ་ཏྠེ་ན ས་མྨུ་ཏི.
ཝི་ན་ཡ་ག་རུ་ཀཱ དྭེ ཝུ་ཏྟཱ, ཀཱ་ཡ་ཝཱ་ཙ་སི་ཀཱ་ནི ཙ;
ཨེ་ཀོ ཝི་ཀཱ་ལེ དྷ་ཉྙ་ར་སོ, ཨེ་ཀཱ ཉ་ཏྟི་ཙ་ཏུ་ཏྠེ་ན ས་མྨུ་ཏི.
པཱ་རཱ་ཛི་ཀཱ ཀཱ་ཡི་ཀཱ ཀ་ཏི, ཀ་ཏི སཾ་ཝཱ་ས་ཀ་བྷཱུ་མི་ཡོ;
ཀ་ཏི་ནཾ ར་ཏྟི་ཙྪེ་དོ, པ་ཉྙ་ཏྟཱ དྭ་ངྒུ་ལཱ ཀ་ཏི.
པཱ་རཱ་ཛི་ཀཱ ཀཱ་ཡི་ཀཱ དྭེ, དྭེ སཾ་ཝཱ་ས་ཀ་བྷཱུ་མི་ཡོ;
དྭི་ནྣཾ ར་ཏྟི་ཙྪེ་དོ, པ་ཉྙ་ཏྟཱ དྭ་ངྒུ་ལཱ དུ་ཝེ.
ཀ་ཏ་ཏྟཱ་ནཾ ཝ་དྷི་ཏྭཱ་ན, ཀ་ཏི་ཧི ས་ངྒྷོ བྷི་ཛྫ་ཏི;
ཀ་ཏེ་ཏྠ པ་ཋ་མཱ་པ་ཏྟི་ཀཱ, ཉ་ཏྟི་ཡཱ ཀ་ར་ཎཱ ཀ་ཏི.
དྭེ ཨ་ཏྟཱ་ནཾ ཝ་དྷི་ཏྭཱ་ན, དྭཱི་ཧི ས་ངྒྷོ བྷི་ཛྫ་ཏི;
དྭེ་ཏྠ པ་ཋ་མཱ་པ་ཏྟི་ཀཱ, ཉ་ཏྟི་ཡཱ ཀ་ར་ཎཱ དུ་ཝེ.
པཱ་ཎཱ་ཏི་པཱ་ཏེ ཀ་ཏི ཨཱ་པ་ཏྟི་ཡོ, ཝཱ་ཙཱ པཱ་རཱ་ཛི་ཀཱ ཀ་ཏི;
ཨོ་བྷཱ་ས་ནཱ ཀ་ཏི ཝུ་ཏྟཱ, ས་ཉྩ་རི་ཏྟེ་ན ཝཱ ཀ་ཏི.
པཱ་ཎཱ་ཏི་པཱ་ཏེ ཏི་སྶོ ཨཱ་པ་ཏྟི་ཡོ;
ཝཱ་ཙཱ པཱ་རཱ་ཛི་ཀཱ ཏ་ཡོ;
ཨོ་བྷཱ་ས་ནཱ ཏ་ཡོ ཝུ་ཏྟཱ;
ས་ཉྩ་རི་ཏྟེ་ན ཝཱ ཏ་ཡོ.
ཀ་ཏི པུ་གྒ་ལཱ ན ཨུ་པ་ས་མྤཱ་དེ་ཏ་བྦཱ, ཀ་ཏི ཀ་མྨཱ་ནཾ ས་ངྒ་ཧཱ;
ནཱ་སི་ཏ་ཀཱ ཀ་ཏི ཝུ་ཏྟཱ, ཀ་ཏི་ནཾ ཨེ་ཀ་ཝཱ་ཙི་ཀཱ.
ཏ་ཡོ པུ་གྒ་ལཱ ན ཨུ་པ་ས་མྤཱ་དེ་ཏ་བྦཱ, ཏ་ཡོ ཀ་མྨཱ་ནཾ ས་ངྒ་ཧཱ;
ནཱ་སི་ཏ་ཀཱ ཏ་ཡོ ཝུ་ཏྟཱ, ཏི་ཎྞ་ནྣཾ ཨེ་ཀ་ཝཱ་ཙི་ཀཱ.
ཨ་དི་ནྣཱ་དཱ་ནེ ཀ་ཏི ཨཱ་པ་ཏྟི་ཡོ, ཀ་ཏི མེ་ཐུ་ན་པ་ཙྩ་ཡཱ;
ཚི་ནྡ་ནྟ་སྶ ཀ་ཏི ཨཱ་པ་ཏྟི་ཡོ, ཀ་ཏི ཚ་ཌྜི་ཏ་པ་ཙྩ་ཡཱ.
ཨ་དི་ནྣཱ་དཱ་ནེ ཏི་སྶོ ཨཱ་པ་ཏྟི་ཡོ, ཙ་ཏ་སྶོ མེ་ཐུ་ན་པ་ཙྩ་ཡཱ;
ཚི་ནྡ་ནྟ་སྶ ཏི་སྶོ ཨཱ་པ་ཏྟི་ཡོ, པ་ཉྩ ཚ་ཌྜི་ཏ་པ་ཙྩ་ཡཱ.
བྷི་ཀྑུ་ནོ་ཝཱ་ད་ཀ་ཝ་གྒ་སྨིཾ, པཱ་ཙི་ཏྟི་ཡེ་ན དུ་ཀྐ་ཊཱ;
ཀ་ཏེ་ཏྠ ན་ཝ་ཀཱ ཝུ་ཏྟཱ, ཀ་ཏི་ནཾ ཙཱི་ཝ་རེ་ན ཙ.
བྷི་ཀྑུ་ནོ་ཝཱ་ད་ཀ་ཝ་གྒ་སྨིཾ, པཱ་ཙི་ཏྟི་ཡེ་ན དུ་ཀྐ་ཊཱ ཀ་ཏཱ;
ཙ་ཏུ་རེ་ཏྠ ན་ཝ་ཀཱ ཝུ་ཏྟཱ, དྭི་ནྣཾ ཙཱི་ཝ་རེ་ན ཙ.
བྷི་ཀྑུ་ནཱི་ན་ཉྩ ཨ་ཀྑཱ་ཏཱ, པཱ་ཊི་དེ་ས་ནི་ཡཱ ཀ་ཏི;
བྷུ་ཉྫ་ནྟཱ་མ་ཀ་དྷ་ཉྙེ་ན, པཱ་ཙི་ཏྟི་ཡེ་ན དུ་ཀྐ་ཊཱ ཀ་ཏི.
བྷི་ཀྑུ་ནཱི་ན་ཉྩ ཨ་ཀྑཱ་ཏཱ, ཨ་ཊྛ པཱ་ཊི་དེ་ས་ནཱི་ཡཱ ཀ་ཏཱ;
བྷུ་ཉྫ་ནྟཱ་མ་ཀ་དྷ་ཉྙེ་ན, པཱ་ཙི་ཏྟི་ཡེ་ན དུ་ཀྐ་ཊཱ ཀ་ཏཱ.
ག་ཙྪ་ནྟ་སྶ ཀ་ཏི ཨཱ་པ་ཏྟི་ཡོ, ཋི་ཏ་སྶ ཙཱ་པི ཀི་ཏྟ་ཀཱ;
ནི་སི་ནྣ་སྶ ཀ་ཏི ཨཱ་པ་ཏྟི་ཡོ, ནི་པ་ནྣ་སྶཱ་པི ཀི་ཏྟ་ཀཱ.
ག་ཙྪ་ནྟ་སྶ ཙ་ཏ་སྶོ ཨཱ་པ་ཏྟི་ཡོ, ཋི་ཏ་སྶ ཙཱ་པི ཏ་ཏྟ་ཀཱ;
ནི་སི་ནྣ་སྶ ཙ་ཏ་སྶོ ཨཱ་པ་ཏྟི་ཡོ, ནི་པ་ནྣ་སྶཱ་པི ཏ་ཏྟ་ཀཱ.