དུ་ཏི་ཡ་གཱ་ཐཱ་ས་ངྒ་ཎི་ཀཾ

༡. ཀཱ་ཡི་ཀཱ་དི་ཨཱ་པ་ཏྟི

༤༧༤. ཀ་ཏི ཨཱ་པ་ཏྟི་ཡོ ཀཱ་ཡི་ཀཱ, ཀ་ཏི ཝཱ་ཙ་སི་ཀཱ ཀ་ཏཱ.

ཚཱ་དེ་ནྟ་སྶ ཀ་ཏི ཨཱ་པ་ཏྟི་ཡོ, ཀ་ཏི སཾ་ས་གྒ་པ་ཙྩ་ཡཱ.

ཚཱ་པ་ཏྟི་ཡོ ཀཱ་ཡི་ཀཱ, ཚ ཝཱ་ཙ་སི་ཀཱ ཀ་ཏཱ;

ཚཱ་དེ་ནྟ་སྶ ཏི་སྶོ ཨཱ་པ་ཏྟི་ཡོ, པ་ཉྩ སཾ་ས་གྒ་པ་ཙྩ་ཡཱ.

ཨ་རུ་ཎུ་གྒེ ཀ་ཏི ཨཱ་པ་ཏྟི་ཡོ, ཀ་ཏི ཡཱ་ཝ་ཏ་ཏི་ཡ་ཀཱ;

ཀ་ཏེ་ཏྠ ཨ་ཊྛ ཝ་ཏྠུ་ཀཱ, ཀ་ཏི་ཧི ས་བྦ་ས་ངྒ་ཧོ.

ཨ་རུ་ཎུ་གྒེ ཏི་སྶོ ཨཱ་པ་ཏྟི་ཡོ, དྭེ ཡཱ་ཝ་ཏ་ཏི་ཡ་ཀཱ;

ཨེ་ཀེ་ཏྠ ཨ་ཊྛ ཝ་ཏྠུ་ཀཱ, ཨེ་ཀེ་ན ས་བྦ་ས་ངྒ་ཧོ.

ཝི་ན་ཡ་སྶ ཀ་ཏི མཱུ་ལཱ་ནི, ཡཱ་ནི བུ་དྡྷེ་ན པ་ཉྙ་ཏྟཱ;

ཝི་ན་ཡ་ག་རུ་ཀཱ ཀ་ཏི ཝུ་ཏྟཱ, དུ་ཊྛུ་ལླ་ཙྪཱ་ད་ནཱ ཀ་ཏི.

ཝི་ན་ཡ་སྶ དྭེ མཱུ་ལཱ་ནི, ཡཱ་ནི བུ་དྡྷེ་ན པ་ཉྙ་ཏྟཱ;

ཝི་ན་ཡ་ག་རུ་ཀཱ དྭེ ཝུ་ཏྟཱ, དྭེ དུ་ཊྛུ་ལླ་ཙྪཱ་ད་ནཱ.

གཱ་མ་ནྟ་རེ ཀ་ཏི ཨཱ་པ་ཏྟི་ཡོ, ཀ་ཏི ན་དི་པཱ་ར་པ་ཙྩ་ཡཱ;

ཀ་ཏི་མཾ་སེ་སུ ཐུ་ལླ་ཙྩ་ཡཾ, ཀ་ཏི་མཾ་སེ་སུ དུ་ཀྐ་ཊཾ.

གཱ་མ་ནྟ་རེ ཙ་ཏ་སྶོ ཨཱ་པ་ཏྟི་ཡོ, ཙ་ཏ་སྶོ ན་དི་པཱ་ར་པ་ཙྩ་ཡཱ;

ཨེ་ཀ་མཾ་སེ ཐུ་ལླ་ཙྩ་ཡཾ, ན་ཝ་མཾ་སེ་སུ དུ་ཀྐ་ཊཾ.

ཀ་ཏི ཝཱ་ཙ་སི་ཀཱ ར་ཏྟིཾ, ཀ་ཏི ཝཱ་ཙ་སི་ཀཱ དི་ཝཱ;

ད་ད་མཱ་ན་སྶ ཀ་ཏི ཨཱ་པ་ཏྟི་ཡོ, པ་ཊི་གྒ་ཎྷ་ནྟ་སྶ ཀི་ཏྟ་ཀཱ.

དྭེ ཝཱ་ཙ་སི་ཀཱ ར་ཏྟིཾ, དྭེ ཝཱ་ཙ་སི་ཀཱ དི་ཝཱ;

ད་ད་མཱ་ན་སྶ ཏི་སྶོ ཨཱ་པ་ཏྟི་ཡོ, ཙ་ཏྟཱ་རོ ཙ པ་ཊི་གྒ་ཧེ.

༢. དེ་ས་ནཱ་གཱ་མི་ནི་ཡཱ་དི་ཨཱ་པ་ཏྟི

༤༧༥. ཀ་ཏི དེ་ས་ནཱ་གཱ་མི་ནི་ཡོ, ཀ་ཏི ས་པྤ་ཊི་ཀ་མྨཱ ཀ་ཏཱ;

ཀ་ཏེ་ཏྠ ཨ་པྤ་ཊི་ཀ་མྨཱ ཝུ་ཏྟཱ, བུ་དྡྷེ་ནཱ་དི་ཙྩ་བ་ནྡྷུ་ནཱ.

པ་ཉྩ དེ་ས་ནཱ་གཱ་མི་ནི་ཡོ, ཚ ས་པྤ་ཊི་ཀ་མྨཱ ཀ་ཏཱ;

ཨེ་ཀེ་ཏྠ ཨ་པྤ་ཊི་ཀ་མྨཱ ཝུ་ཏྟཱ, བུ་དྡྷེ་ནཱ་དི་ཙྩ་བ་ནྡྷུ་ནཱ.

ཝི་ན་ཡ་ག་རུ་ཀཱ ཀ་ཏི ཝུ་ཏྟཱ, ཀཱ་ཡ་ཝཱ་ཙ་སི་ཀཱ་ནི ཙ;

ཀ་ཏི ཝི་ཀཱ་ལེ དྷ་ཉྙ་ར་སོ, ཀ་ཏི ཉ་ཏྟི་ཙ་ཏུ་ཏྠེ་ན ས་མྨུ་ཏི.

ཝི་ན་ཡ་ག་རུ་ཀཱ དྭེ ཝུ་ཏྟཱ, ཀཱ་ཡ་ཝཱ་ཙ་སི་ཀཱ་ནི ཙ;

ཨེ་ཀོ ཝི་ཀཱ་ལེ དྷ་ཉྙ་ར་སོ, ཨེ་ཀཱ ཉ་ཏྟི་ཙ་ཏུ་ཏྠེ་ན ས་མྨུ་ཏི.

པཱ་རཱ་ཛི་ཀཱ ཀཱ་ཡི་ཀཱ ཀ་ཏི, ཀ་ཏི སཾ་ཝཱ་ས་ཀ་བྷཱུ་མི་ཡོ;

ཀ་ཏི་ནཾ ར་ཏྟི་ཙྪེ་དོ, པ་ཉྙ་ཏྟཱ དྭ་ངྒུ་ལཱ ཀ་ཏི.

པཱ་རཱ་ཛི་ཀཱ ཀཱ་ཡི་ཀཱ དྭེ, དྭེ སཾ་ཝཱ་ས་ཀ་བྷཱུ་མི་ཡོ;

དྭི་ནྣཾ ར་ཏྟི་ཙྪེ་དོ, པ་ཉྙ་ཏྟཱ དྭ་ངྒུ་ལཱ དུ་ཝེ.

ཀ་ཏ་ཏྟཱ་ནཾ ཝ་དྷི་ཏྭཱ་ན, ཀ་ཏི་ཧི ས་ངྒྷོ བྷི་ཛྫ་ཏི;

ཀ་ཏེ་ཏྠ པ་ཋ་མཱ་པ་ཏྟི་ཀཱ, ཉ་ཏྟི་ཡཱ ཀ་ར་ཎཱ ཀ་ཏི.

དྭེ ཨ་ཏྟཱ་ནཾ ཝ་དྷི་ཏྭཱ་ན, དྭཱི་ཧི ས་ངྒྷོ བྷི་ཛྫ་ཏི;

དྭེ་ཏྠ པ་ཋ་མཱ་པ་ཏྟི་ཀཱ, ཉ་ཏྟི་ཡཱ ཀ་ར་ཎཱ དུ་ཝེ.

པཱ་ཎཱ་ཏི་པཱ་ཏེ ཀ་ཏི ཨཱ་པ་ཏྟི་ཡོ, ཝཱ་ཙཱ པཱ་རཱ་ཛི་ཀཱ ཀ་ཏི;

ཨོ་བྷཱ་ས་ནཱ ཀ་ཏི ཝུ་ཏྟཱ, ས་ཉྩ་རི་ཏྟེ་ན ཝཱ ཀ་ཏི.

པཱ་ཎཱ་ཏི་པཱ་ཏེ ཏི་སྶོ ཨཱ་པ་ཏྟི་ཡོ;

ཝཱ་ཙཱ པཱ་རཱ་ཛི་ཀཱ ཏ་ཡོ;

ཨོ་བྷཱ་ས་ནཱ ཏ་ཡོ ཝུ་ཏྟཱ;

ས་ཉྩ་རི་ཏྟེ་ན ཝཱ ཏ་ཡོ.

ཀ་ཏི པུ་གྒ་ལཱ ན ཨུ་པ་ས་མྤཱ་དེ་ཏ་བྦཱ, ཀ་ཏི ཀ་མྨཱ་ནཾ ས་ངྒ་ཧཱ;

ནཱ་སི་ཏ་ཀཱ ཀ་ཏི ཝུ་ཏྟཱ, ཀ་ཏི་ནཾ ཨེ་ཀ་ཝཱ་ཙི་ཀཱ.

ཏ་ཡོ པུ་གྒ་ལཱ ན ཨུ་པ་ས་མྤཱ་དེ་ཏ་བྦཱ, ཏ་ཡོ ཀ་མྨཱ་ནཾ ས་ངྒ་ཧཱ;

ནཱ་སི་ཏ་ཀཱ ཏ་ཡོ ཝུ་ཏྟཱ, ཏི་ཎྞ་ནྣཾ ཨེ་ཀ་ཝཱ་ཙི་ཀཱ.

ཨ་དི་ནྣཱ་དཱ་ནེ ཀ་ཏི ཨཱ་པ་ཏྟི་ཡོ, ཀ་ཏི མེ་ཐུ་ན་པ་ཙྩ་ཡཱ;

ཚི་ནྡ་ནྟ་སྶ ཀ་ཏི ཨཱ་པ་ཏྟི་ཡོ, ཀ་ཏི ཚ་ཌྜི་ཏ་པ་ཙྩ་ཡཱ.

ཨ་དི་ནྣཱ་དཱ་ནེ ཏི་སྶོ ཨཱ་པ་ཏྟི་ཡོ, ཙ་ཏ་སྶོ མེ་ཐུ་ན་པ་ཙྩ་ཡཱ;

ཚི་ནྡ་ནྟ་སྶ ཏི་སྶོ ཨཱ་པ་ཏྟི་ཡོ, པ་ཉྩ ཚ་ཌྜི་ཏ་པ་ཙྩ་ཡཱ.

བྷི་ཀྑུ་ནོ་ཝཱ་ད་ཀ་ཝ་གྒ་སྨིཾ, པཱ་ཙི་ཏྟི་ཡེ་ན དུ་ཀྐ་ཊཱ;

ཀ་ཏེ་ཏྠ ན་ཝ་ཀཱ ཝུ་ཏྟཱ, ཀ་ཏི་ནཾ ཙཱི་ཝ་རེ་ན ཙ.

བྷི་ཀྑུ་ནོ་ཝཱ་ད་ཀ་ཝ་གྒ་སྨིཾ, པཱ་ཙི་ཏྟི་ཡེ་ན དུ་ཀྐ་ཊཱ ཀ་ཏཱ;

ཙ་ཏུ་རེ་ཏྠ ན་ཝ་ཀཱ ཝུ་ཏྟཱ, དྭི་ནྣཾ ཙཱི་ཝ་རེ་ན ཙ.

བྷི་ཀྑུ་ནཱི་ན་ཉྩ ཨ་ཀྑཱ་ཏཱ, པཱ་ཊི་དེ་ས་ནི་ཡཱ ཀ་ཏི;

བྷུ་ཉྫ་ནྟཱ་མ་ཀ་དྷ་ཉྙེ་ན, པཱ་ཙི་ཏྟི་ཡེ་ན དུ་ཀྐ་ཊཱ ཀ་ཏི.

བྷི་ཀྑུ་ནཱི་ན་ཉྩ ཨ་ཀྑཱ་ཏཱ, ཨ་ཊྛ པཱ་ཊི་དེ་ས་ནཱི་ཡཱ ཀ་ཏཱ;

བྷུ་ཉྫ་ནྟཱ་མ་ཀ་དྷ་ཉྙེ་ན, པཱ་ཙི་ཏྟི་ཡེ་ན དུ་ཀྐ་ཊཱ ཀ་ཏཱ.

ག་ཙྪ་ནྟ་སྶ ཀ་ཏི ཨཱ་པ་ཏྟི་ཡོ, ཋི་ཏ་སྶ ཙཱ་པི ཀི་ཏྟ་ཀཱ;

ནི་སི་ནྣ་སྶ ཀ་ཏི ཨཱ་པ་ཏྟི་ཡོ, ནི་པ་ནྣ་སྶཱ་པི ཀི་ཏྟ་ཀཱ.

ག་ཙྪ་ནྟ་སྶ ཙ་ཏ་སྶོ ཨཱ་པ་ཏྟི་ཡོ, ཋི་ཏ་སྶ ཙཱ་པི ཏ་ཏྟ་ཀཱ;

ནི་སི་ནྣ་སྶ ཙ་ཏ་སྶོ ཨཱ་པ་ཏྟི་ཡོ, ནི་པ་ནྣ་སྶཱ་པི ཏ་ཏྟ་ཀཱ.

༣. པཱ་ཙི་ཏྟི་ཡཾ

༤༧༦. ཀ་ཏི པཱ་ཙི་ཏྟི་ཡཱ་ནི, ས་བྦཱ་ནི ནཱ་ནཱ་ཝ་ཏྠུ་ཀཱ་ནི;

ཨ་པུ་བྦཾ ཨ་ཙ་རི་མཾ, ཨཱ་པ་ཛྫེ་ཡྻ ཨེ་ཀ་ཏོ.

པ་ཉྩ པཱ་ཙི་ཏྟི་ཡཱ་ནི, ས་བྦཱ་ནི ནཱ་ནཱ་ཝ་ཏྠུ་ཀཱ་ནི;

ཨ་པུ་བྦཾ ཨ་ཙ་རི་མཾ, ཨཱ་པ་ཛྫེ་ཡྻ ཨེ་ཀ་ཏོ.