༥. ཨ་ཏྟཱ་དཱ་ན་ཝ་གྒོ
༤༣༦. [ཙཱུ་ལ༹་ཝ. ༣༩༩; ཨ. ནི. ༡༠.༤༤] ‘‘ཙོ་ད་ཀེ་ན, བྷ་ནྟེ, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཀ་ཏི དྷ་མྨེ ཨ་ཛ྄ཛྷ་ཏྟཾ པ་ཙྩ་ཝེ་ཀྑི་ཏྭཱ པ་རོ ཙོ་དེ་ཏ་བྦོ’’ཏི? ‘‘ཙོ་ད་ཀེ་ནུ་པཱ་ལི, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན པ་ཉྩ དྷ་མྨེ ཨ་ཛ྄ཛྷ་ཏྟཾ པ་ཙྩ་ཝེ་ཀྑི་ཏྭཱ པ་རོ ཙོ་དེ་ཏ་བྦོ. ཀ་ཏ་མེ པ་ཉྩ? ཙོ་ད་ཀེ་ནུ་པཱ་ལི, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཨེ་ཝཾ པ་ཙྩ་ཝེ་ཀྑི་ཏ་བྦཾ – པ་རི་སུ་དྡྷ་ཀཱ་ཡ་ས་མཱ་ཙཱ་རོ ནུ ཁོ་མྷི, པ་རི་སུ་དྡྷེ་ན་མྷི ཀཱ་ཡ་ས་མཱ་ཙཱ་རེ་ན ས་མ་ནྣཱ་ག་ཏོ ཨ་ཙྪི་དྡེ་ན ཨ་པྤ་ཊི་མཾ་སེ་ན, སཾ་ཝི་ཛྫ་ཏི ནུ ཁོ མེ ཨེ་སོ དྷ་མྨོ ཨུ་དཱ་ཧུ ནོ’’ཏི. ནོ ཙེ, ཨུ་པཱ་ལི, བྷི་ཀྑུ པ་རི་སུ་དྡྷ་ཀཱ་ཡ་ས་མཱ་ཙཱ་རོ ཧོ་ཏི, པ་རི་སུ་དྡྷེ་ན ཀཱ་ཡ་ས་མཱ་ཙཱ་རེ་ན ས་མ་ནྣཱ་ག་ཏོ ཨ་ཙྪི་དྡེ་ན ཨ་པྤ་ཊི་མཾ་སེ་ན, ཏ་སྶ བྷ་ཝ་ནྟི ཝ་ཏྟཱ་རོ – ‘ཨི་ངྒྷ, ཏཱ་ཝ ཨཱ་ཡ་སྨཱ ཀཱ་ཡི་ཀཾ སི་ཀྑ་སྶཱུ’ཏི ཨི་ཏི་སྶ བྷ་ཝ་ནྟི ཝ་ཏྟཱ་རོ.
‘‘པུ་ན ཙ་པ་རཾ, ཨུ་པཱ་ལི, ཙོ་ད་ཀེ་ན བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཨེ་ཝཾ པ་ཙྩ་ཝེ་ཀྑི་ཏ་བྦཾ – ‘པ་རི་སུ་དྡྷ་ཝ་ཙཱི་ས་མཱ་ཙཱ་རོ ནུ ཁོ་མྷི, པ་རི་སུ་དྡྷེ་ན་མྷི ཝ་ཙཱི་ས་མཱ་ཙཱ་རེ་ན ས་མ་ནྣཱ་ག་ཏོ ཨ་ཙྪི་དྡེ་ན ཨ་པྤ་ཊི་མཾ་སེ་ན, སཾ་ཝི་ཛྫ་ཏི ནུ ཁོ མེ ཨེ་སོ དྷ་མྨོ ཨུ་དཱ་ཧུ ནོ’ཏི. ནོ ཙེ, ཨུ་པཱ་ལི, བྷི་ཀྑུ པ་རི་སུ་དྡྷ་ཝ་ཙཱི་ས་མཱ་ཙཱ་རོ ཧོ་ཏི, པ་རི་སུ་དྡྷེ་ན ཝ་ཙཱི་ས་མཱ་ཙཱ་རེ་ན ས་མ་ནྣཱ་ག་ཏོ ཨ་ཙྪི་དྡེ་ན ཨ་པྤ་ཊི་མཾ་སེ་ན, ཏ་སྶ བྷ་ཝ་ནྟི ཝ་ཏྟཱ་རོ – ‘ཨི་ངྒྷ, ཏཱ་ཝ ཨཱ་ཡ་སྨཱ ཝཱ་ཙ་སི་ཀཾ སི་ཀྑ་སྶཱུ’ཏི ཨི་ཏི་སྶ བྷ་ཝ་ནྟི ཝ་ཏྟཱ་རོ.
‘‘པུ་ན ཙ་པ་རཾ, ཨུ་པཱ་ལི, ཙོ་ད་ཀེ་ན བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཨེ་ཝཾ པ་ཙྩ་ཝེ་ཀྑི་ཏ་བྦཾ – ‘མེ་ཏྟཾ ནུ ཁོ མེ ཙི་ཏྟཾ པ་ཙྩུ་པ་ཊྛི་ཏཾ ས་བྲ་ཧྨ་ཙཱ་རཱི་སུ ཨ་ནཱ་གྷཱ་ཏཾ, སཾ་ཝི་ཛྫ་ཏི ནུ ཁོ མེ ཨེ་སོ དྷ་མྨོ ཨུ་དཱ་ཧུ ནོ’ཏི. ནོ ཙེ, ཨུ་པཱ་ལི, བྷི་ཀྑུ་ནོ མེ་ཏྟཾ ཙི་ཏྟཾ པ་ཙྩུ་པ་ཊྛི་ཏཾ ཧོ་ཏི ས་བྲ་ཧྨ་ཙཱ་རཱི་སུ ཨ་ནཱ་གྷཱ་ཏཾ, ཏ་སྶ བྷ་ཝ་ནྟི ཝ་ཏྟཱ་རོ – ‘ཨི་ངྒྷ, ཏཱ་ཝ ཨཱ་ཡ་སྨཱ ས་བྲ་ཧྨ་ཙཱ་རཱི་སུ མེ་ཏྟཾ ཙི་ཏྟཾ ཨུ་པ་ཊྛཱ་པེ་ཧཱི’ཏི ཨི་ཏི་སྶ བྷ་ཝ་ནྟི ཝ་ཏྟཱ་རོ.
‘‘པུ་ན ཙ་པ་རཾ, ཨུ་པཱ་ལི, ཙོ་ད་ཀེ་ན བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཨེ་ཝཾ པ་ཙྩ་ཝེ་ཀྑི་ཏ་བྦཾ – ‘བ་ཧུ་སྶུ་ཏོ ནུ ཁོ་མྷི སུ་ཏ་དྷ་རོ སུ་ཏ་ས་ནྣི་ཙ་ཡོ, ཡེ ཏེ དྷ་མྨཱ ཨཱ་དི་ཀ་ལྱཱ་ཎཱ མ་ཛ྄ཛྷེ་ཀ་ལྱཱ་ཎཱ པ་རི་ཡོ་སཱ་ན་ཀ་ལྱཱ་ཎཱ སཱ་ཏྠཾ ས་བྱ་ཉྫ་ནཾ ཀེ་ཝ་ལ་པ་རི་པུ་ཎྞཾ པ་རི་སུ་དྡྷཾ བྲ་ཧྨ་ཙ་རི་ཡཾ ཨ་བྷི་ཝ་ད་ནྟི, ཏ་ཐཱ་རཱུ་པཱ མེ དྷ་མྨཱ བ་ཧུ་སྶུ་ཏཱ ཧོ་ནྟི དྷཱ་ཏཱ ཝ་ཙ་སཱ པ་རི་ཙི་ཏཱ མ་ན་སཱ་ནུ་པེ་ཀྑི་ཏཱ དི་ཊྛི་ཡཱ སུ་པྤ་ཊི་ཝི་དྡྷཱ, སཾ་ཝི་ཛྫ་ཏི ནུ ཁོ མེ ཨེ་སོ དྷ་མྨོ ཨུ་དཱ་ཧུ ནོ’ཏི. ནོ ཙེ, ཨུ་པཱ་ལི, བྷི་ཀྑུ བ་ཧུ་སྶུ་ཏོ ཧོ་ཏི སུ་ཏ་དྷ་རོ སུ་ཏ་ས་ནྣི་ཙ་ཡོ, ཡེ ཏེ དྷ་མྨཱ ཨཱ་དི་ཀ་ལྱཱ་ཎཱ མ་ཛ྄ཛྷེ་ཀ་ལྱཱ་ཎཱ པ་རི་ཡོ་སཱ་ན་ཀ་ལྱཱ་ཎཱ སཱ་ཏྠཾ ས་བྱ་ཉྫ་ནཾ ཀེ་ཝ་ལ་པ་རི་པུ་ཎྞཾ པ་རི་སུ་དྡྷཾ བྲ་ཧྨ་ཙ་རི་ཡཾ ཨ་བྷི་ཝ་ད་ནྟི, ཏ་ཐཱ་རཱུ་པ་སྶ དྷ་མྨཱ ན བ་ཧུ་སྶུ་ཏཱ ཧོ་ནྟི དྷཱ་ཏཱ ཝ་ཙ་སཱ པ་རི་ཙི་ཏཱ མ་ན་སཱ་ནུ་པེ་ཀྑི་ཏཱ དི་ཊྛི་ཡཱ སུ་པྤ་ཊི་ཝི་དྡྷཱ, ཏ་སྶ བྷ་ཝ་ནྟི ཝ་ཏྟཱ་རོ – ‘ཨི་ངྒྷ, ཏཱ་ཝ ཨཱ་ཡ་སྨཱ ཨཱ་ག་མཾ པ་རི་ཡཱ་པུ་ཎ་སྶཱུ’ཏི ཨི་ཏི་སྶ བྷ་ཝ་ནྟི ཝ་ཏྟཱ་རོ.
‘‘པུ་ན ཙ་པ་རཾ, ཨུ་པཱ་ལི, ཙོ་ད་ཀེ་ན བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཨེ་ཝཾ པ་ཙྩ་ཝེ་ཀྑི་ཏ་བྦཾ – ‘ཨུ་བྷ་ཡཱ་ནི ཁོ མེ པཱ་ཏི་མོ་ཀྑཱ་ནི ཝི་ཏྠཱ་རེ་ན སྭཱ་ག་ཏཱ་ནི ཧོ་ནྟི སུ་ཝི་བྷ་ཏྟཱ་ནི སུ་པྤ་ཝ་ཏྟཱི་ནི སུ་ཝི་ནི་ཙྪི་ཏཱ་ནི སུ་ཏྟ་སོ ཨ་ནུ་བྱ་ཉྫ་ན་སོ, སཾ་ཝི་ཛྫ་ཏི ནུ ཁོ མེ ཨེ་སོ དྷ་མྨོ ཨུ་དཱ་ཧུ ནོ’ཏི. ནོ ཙེ, ཨུ་པཱ་ལི, བྷི་ཀྑུ་ནོ ཨུ་བྷ་ཡཱ་ནི པཱ་ཏི་མོ་ཀྑཱ་ནི ཝི་ཏྠཱ་རེ་ན སྭཱ་ག་ཏཱ་ནི ཧོ་ནྟི སུ་ཝི་བྷ་ཏྟཱ་ནི སུ་པྤ་ཝ་ཏྟཱི་ནི སུ་ཝི་ནི་ཙྪི་ཏཱ་ནི སུ་ཏྟ་སོ ཨ་ནུ་བྱ་ཉྫ་ན་སོ, ‘ཨི་དཾ པ་ནཱ་ཝུ་སོ ཀ་ཏྠ ཝུ་ཏྟཾ བྷ་ག་ཝ་ཏཱ’ཏི ཨི་ཏི པུ་ཊྛོ ན ས་མྤཱ་ཡ་ཏི [ན ས་མྤཱ་ད་ཡ་ཏི (ཀ.), ན ས་མྤཱ་དེ་ཏི (སྱཱ.)], ཏ་སྶ བྷ་ཝ་ནྟི ཝ་ཏྟཱ་རོ – ‘ཨི་ངྒྷ, ཏཱ་ཝ ཨཱ་ཡ་སྨཱ ཝི་ན་ཡཾ པ་རི་ཡཱ་པུ་ཎ་སྶཱུ’ཏི ཨི་ཏི་སྶ བྷ་ཝ་ནྟི ཝ་ཏྟཱ་རོ. ཙོ་ད་ཀེ་ནུ་པཱ་ལི, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཨི་མེ པ་ཉྩ དྷ་མྨེ ཨ་ཛ྄ཛྷ་ཏྟཾ པ་ཙྩ་ཝེ་ཀྑི་ཏྭཱ པ་རོ ཙོ་དེ་ཏ་བྦོ’’ཏི.
༤༣༧. ‘‘ཙོ་ད་ཀེ་ན, བྷ་ནྟེ, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཀ་ཏི དྷ་མྨེ ཨ་ཛ྄ཛྷ་ཏྟཾ ཨུ་པ་ཊྛཱ་པེ་ཏྭཱ པ་རོ ཙོ་དེ་ཏ་བྦོ’’ཏི? ‘‘ཙོ་ད་ཀེ་ནུ་པཱ་ལི, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན པ་ཉྩ དྷ་མྨེ ཨ་ཛ྄ཛྷ་ཏྟཾ ཨུ་པ་ཊྛཱ་པེ་ཏྭཱ པ་རོ ཙོ་དེ་ཏ་བྦོ. ཀ་ཏ་མེ པ་ཉྩ? ཀཱ་ལེ་ན ཝ་ཀྑཱ་མི ནོ ཨ་ཀཱ་ལེ་ན, བྷཱུ་ཏེ་ན ཝ་ཀྑཱ་མི ནོ ཨ་བྷཱུ་ཏེ་ན, ས་ཎྷེ་ན ཝ་ཀྑཱ་མི ནོ ཕ་རུ་སེ་ན, ཨ་ཏྠ་སཾ་ཧི་ཏེ་ན ཝ་ཀྑཱ་མི ནོ ཨ་ན་ཏྠ་སཾ་ཧི་ཏེ་ན, མེ་ཏྟཱ་ཙི་ཏྟོ ཝ་ཀྑཱ་མི ནོ དོ་ས་ནྟ་རོ་ཏི – ཙོ་ད་ཀེ་ནུ་པཱ་ལི, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཨི་མེ པ་ཉྩ དྷ་མྨེ ཨ་ཛ྄ཛྷ་ཏྟཾ ཨུ་པ་ཊྛཱ་པེ་ཏྭཱ པ་རོ ཙོ་དེ་ཏ་བྦོ’’ཏི.
༤༣༨. [ཙཱུ་ལ༹་ཝ. ༤༠༠] ‘‘ཙོ་ད་ཀེ་ན, བྷ་ནྟེ, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཀ་ཏི དྷ་མྨེ ཨ་ཛ྄ཛྷ་ཏྟཾ མ་ན་སི ཀ་རི་ཏྭཱ པ་རོ ཙོ་དེ་ཏ་བྦོ’’ཏི? ‘‘ཙོ་ད་ཀེ་ནུ་པཱ་ལི, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན པ་ཉྩ དྷ་མྨེ ཨ་ཛ྄ཛྷ་ཏྟཾ མ་ན་སི ཀ་རི་ཏྭཱ པ་རོ ཙོ་དེ་ཏ་བྦོ. ཀ་ཏ་མེ པ་ཉྩ? ཀཱ་རུ་ཉྙ་ཏཱ, ཧི་ཏེ་སི་ཏཱ, ཨ་ནུ་ཀ་མྤ་ཏཱ, ཨཱ་པ་ཏྟི་ཝུ་ཊྛཱ་ན་ཏཱ, ཝི་ན་ཡ་པུ་རེ་ཀྑཱ་ར་ཏཱ – ཙོ་ད་ཀེ་ནུ་པཱ་ལི, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཨི་མེ པ་ཉྩ དྷ་མྨེ ཨ་ཛ྄ཛྷ་ཏྟཾ མ་ན་སི ཀ་རི་ཏྭཱ པ་རོ ཙོ་དེ་ཏ་བྦོ’’ཏི.
༤༣༩. ‘‘ཀ་ཏི་ཧི ནུ ཁོ, བྷ་ནྟེ, ཨ་ངྒེ་ཧི ས་མ་ནྣཱ་ག་ཏ་སྶ བྷི་ཀྑུ་ནོ ཨོ་ཀཱ་ས་ཀ་མྨཾ ཀཱ་རཱ་པེ་ནྟ་སྶ ནཱ་ལཾ ཨོ་ཀཱ་ས་ཀ་མྨཾ ཀཱ་ཏུ’’ནྟི? ‘‘པ་ཉྩ་ཧུ་པཱ་ལི, ཨ་ངྒེ་ཧི ས་མ་ནྣཱ་ག་ཏ་སྶ བྷི་ཀྑུ་ནོ ཨོ་ཀཱ་ས་ཀ་མྨཾ ཀཱ་རཱ་པེ་ནྟ་སྶ ནཱ་ལཾ ཨོ་ཀཱ་ས་ཀ་མྨཾ ཀཱ་ཏུཾ. ཀ་ཏ་མེ་ཧི པ་ཉྩ་ཧི? ཨ་པ་རི་སུ་དྡྷ་ཀཱ་ཡ་ས་མཱ་ཙཱ་རོ ཧོ་ཏི, ཨ་པ་རི་སུ་དྡྷ་ཝ་ཙཱི་ས་མཱ་ཙཱ་རོ ཧོ་ཏི, ཨ་པ་རི་སུ་དྡྷཱ་ཛཱི་ཝོ ཧོ་ཏི, བཱ་ལོ ཧོ་ཏི ཨ་བྱ་ཏྟོ, ན པ་ཊི་བ་ལོ ཨ་ནུ་ཡུ་ཉྫི་ཡ་མཱ་ནོ ཨ་ནུ་ཡོ་གཾ དཱ་ཏུཾ – ཨི་མེ་ཧི ཁོ, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏ་སྶ བྷི་ཀྑུ་ནོ ཨོ་ཀཱ་ས་ཀ་མྨཾ ཀཱ་རཱ་པེ་ནྟ་སྶ ནཱ་ལཾ ཨོ་ཀཱ་ས་ཀ་མྨཾ ཀཱ་ཏུཾ.
‘‘པ་ཉྩ་ཧུ་པཱ་ལི, ཨ་ངྒེ་ཧི ས་མ་ནྣཱ་ག་ཏ་སྶ བྷི་ཀྑུ་ནོ ཨོ་ཀཱ་ས་ཀ་མྨཾ ཀཱ་རཱ་པེ་ནྟ་སྶ ཨ་ལཾ ཨོ་ཀཱ་ས་ཀ་མྨཾ ཀཱ་ཏུཾ. ཀ་ཏ་མེ་ཧི པ་ཉྩ་ཧི? པ་རི་སུ་དྡྷ་ཀཱ་ཡ་ས་མཱ་ཙཱ་རོ ཧོ་ཏི, པ་རི་སུ་དྡྷ་ཝ་ཙཱི་ས་མཱ་ཙཱ་རོ ཧོ་ཏི, པ་རི་སུ་དྡྷཱ་ཛཱི་ཝོ ཧོ་ཏི, པ་ཎྜི་ཏོ ཧོ་ཏི བྱ་ཏྟོ པ་ཊི་བ་ལོ ཨ་ནུ་ཡུ་ཉྫི་ཡ་མཱ་ནོ ཨ་ནུ་ཡོ་གཾ དཱ་ཏུཾ – ཨི་མེ་ཧི ཁོ, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏ་སྶ བྷི་ཀྑུ་ནོ ཨོ་ཀཱ་ས་ཀ་མྨཾ ཀཱ་རཱ་པེ་ནྟ་སྶ ཨ་ལཾ ཨོ་ཀཱ་ས་ཀ་མྨཾ ཀཱ་ཏུ’’ནྟི.
༤༤༠. [ཙཱུ་ལ༹་ཝ. ༣༩༨] ‘‘ཨ་ཏྟཱ་དཱ་ནཾ ཨཱ་དཱ་ཏུ་ཀཱ་མེ་ན, བྷ་ནྟེ, བྷི་ཀྑུ་ནཱ ཀ་ཏི་ཧ་ངྒེ་ཧི ས་མ་ནྣཱ་ག་ཏཾ ཨ་ཏྟཱ་དཱ་ནཾ ཨཱ་དཱ་ཏ་བྦ’’ནྟི? ‘‘ཨ་ཏྟཱ་དཱ་ནཾ ཨཱ་དཱ་ཏུ་ཀཱ་མེ་ནུ་པཱ་ལི, བྷི་ཀྑུ་ནཱ པ་ཉྩ་ངྒ་ས་མ་ནྣཱ་ག་ཏཾ [པ་ཉྩ་ཧ་ངྒེ་ཧི ས་མ་ནྣཱ་ག་ཏཾ (སཱི. སྱཱ.)] ཨ་ཏྟཱ་དཱ་ནཾ ཨཱ་དཱ་ཏ་བྦཾ. ཀ་ཏ་མེ པ་ཉྩ [ཀ་ཏ་མེ་ཧི པ་ཉྩ་ཧི (སྱཱ.)]? ཨ་ཏྟཱ་དཱ་ནཾ ཨཱ་དཱ་ཏུ་ཀཱ་མེ་ན, ཨུ་པཱ་ལི, བྷི་ཀྑུ་ནཱ ཨེ་ཝཾ པ་ཙྩ་ཝེ་ཀྑི་ཏ་བྦཾ – ‘ཡཾ ཁོ ཨ་ཧཾ ཨི་མཾ ཨ་ཏྟཱ་དཱ་ནཾ ཨཱ་དཱ་ཏུ་ཀཱ་མོ, ཀཱ་ལོ ནུ ཁོ ཨི་མཾ ཨ་ཏྟཱ་དཱ་ནཾ ཨཱ་དཱ་ཏུཾ ཨུ་དཱ་ཧུ ནོ’ཏི. ས་ཙེ, ཨུ་པཱ་ལི, བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཨ་ཀཱ་ལོ ཨི་མཾ ཨ་ཏྟཱ་དཱ་ནཾ ཨཱ་དཱ་ཏུཾ ནོ ཀཱ་ལོ’ཏི, ན ཏཾ, ཨུ་པཱ་ལི, ཨ་ཏྟཱ་དཱ་ནཾ ཨཱ་དཱ་ཏ་བྦཾ.
‘‘ས་ཙེ པ་ནུ་པཱ་ལི, བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཀཱ་ལོ ཨི་མཾ ཨ་ཏྟཱ་དཱ་ནཾ ཨཱ་དཱ་ཏུཾ ནོ ཨ་ཀཱ་ལོ’ཏི, ཏེ་ནུ་པཱ་ལི བྷི་ཀྑུ་ནཱ ཨུ་ཏྟ་རི པ་ཙྩ་ཝེ་ཀྑི་ཏ་བྦཾ – ‘ཡཾ ཁོ ཨ་ཧཾ ཨི་མཾ ཨ་ཏྟཱ་དཱ་ནཾ ཨཱ་དཱ་ཏུ་ཀཱ་མོ བྷཱུ་ཏཾ ནུ ཁོ ཨི་དཾ ཨ་ཏྟཱ་དཱ་ནཾ ཨུ་དཱ་ཧུ ནོ’ཏི. ས་ཙེ, ཨུ་པཱ་ལི, བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཨ་བྷཱུ་ཏཾ ཨི་དཾ ཨ་ཏྟཱ་དཱ་ནཾ ནོ བྷཱུ་ཏ’ནྟི, ན ཏཾ, ཨུ་པཱ་ལི, ཨ་ཏྟཱ་དཱ་ནཾ ཨཱ་དཱ་ཏ་བྦཾ.
‘‘ས་ཙེ པ་ནུ་པཱ་ལི བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘བྷཱུ་ཏཾ ཨི་དཾ ཨ་ཏྟཱ་དཱ་ནཾ ནོ ཨ་བྷཱུ་ཏ’ནྟི, ཏེ་ནུ་པཱ་ལི བྷི་ཀྑུ་ནཱ ཨུ་ཏྟ་རི པ་ཙྩ་ཝེ་ཀྑི་ཏ་བྦཾ – ‘ཡཾ ཁོ ཨ་ཧཾ ཨི་མཾ ཨ་ཏྟཱ་དཱ་ནཾ ཨཱ་དཱ་ཏུ་ཀཱ་མོ, ཨ་ཏྠ་སཾ་ཧི་ཏཾ ནུ ཁོ ཨི་དཾ ཨ་ཏྟཱ་དཱ་ནཾ ཨུ་དཱ་ཧུ ནོ’ཏི. ས་ཙེ, ཨུ་པཱ་ལི, བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི –’ ཨ་ན་ཏྠ་སཾ་ཧི་ཏཾ ཨི་དཾ ཨ་ཏྟཱ་དཱ་ནཾ ནོ ཨ་ཏྠ་སཾ་ཧི་ཏ’ནྟི, ན ཏཾ, ཨུ་པཱ་ལི, ཨ་ཏྟཱ་དཱ་ནཾ ཨཱ་དཱ་ཏ་བྦཾ.
‘‘ས་ཙེ པ་ནུ་པཱ་ལི བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཨ་ཏྠ་སཾ་ཧི་ཏཾ ཨི་དཾ ཨ་ཏྟཱ་དཱ་ནཾ ནོ ཨ་ན་ཏྠ་སཾ་ཧི་ཏ’ནྟི, ཏེ་ནུ་པཱ་ལི བྷི་ཀྑུ་ནཱ ཨུ་ཏྟ་རི པ་ཙྩ་ཝེ་ཀྑི་ཏ་བྦཾ – ‘ཨི་མཾ ཁོ ཨ་ཧཾ ཨ་ཏྟཱ་དཱ་ནཾ ཨཱ་དི་ཡ་མཱ་ནོ ལ་བྷི་སྶཱ་མི ས་ནྡི་ཊྛེ ས་མྦྷ་ཏྟེ བྷི་ཀྑཱུ དྷ་མྨ་ཏོ ཝི་ན་ཡ་ཏོ པ་ཀྑེ ཨུ་དཱ་ཧུ ནོ’ཏི. ས་ཙེ, ཨུ་པཱ་ལི, བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཨི་མཾ ཁོ ཨ་ཧཾ ཨ་ཏྟཱ་དཱ་ནཾ ཨཱ་དི་ཡ་མཱ་ནོ ན ལ་བྷི་སྶཱ་མི ས་ནྡི་ཊྛེ ས་མྦྷ་ཏྟེ བྷི་ཀྑཱུ དྷ་མྨ་ཏོ ཝི་ན་ཡ་ཏོ པ་ཀྑེ’ཏི, ན ཏཾ, ཨུ་པཱ་ལི, ཨ་ཏྟཱ་དཱ་ནཾ ཨཱ་དཱ་ཏ་བྦཾ.
‘‘ས་ཙེ པ་ནུ་པཱ་ལི བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཨི་དཾ ཁོ ཨ་ཧཾ ཨ་ཏྟཱ་དཱ་ནཾ ཨཱ་དི་ཡ་མཱ་ནོ ལ་བྷི་སྶཱ་མི ས་ནྡི་ཊྛེ ས་མྦྷ་ཏྟེ བྷི་ཀྑཱུ དྷ་མྨ་ཏོ ཝི་ན་ཡ་ཏོ པ་ཀྑེ’ཏི, ཏེ་ནུ་པཱ་ལི བྷི་ཀྑུ་ནཱ ཨུ་ཏྟ་རི པ་ཙྩ་ཝེ་ཀྑི་ཏ་བྦཾ – ‘ཨི་མཾ ཁོ མེ ཨ་ཏྟཱ་དཱ་ནཾ ཨཱ་དི་ཡ་ཏོ བྷ་ཝི་སྶ་ཏི ས་ངྒྷ་སྶ ཏ་ཏོ་ནི་དཱ་ནཾ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ས་ངྒྷ་བྷེ་དོ ས་ངྒྷ་རཱ་ཛི ས་ངྒྷ་ཝ་ཝ་ཏྠཱ་ནཾ ས་ངྒྷ་ནཱ་ནཱ་ཀ་ར་ཎཾ ཨུ་དཱ་ཧུ ནོ’ཏི. ས་ཙེ, ཨུ་པཱ་ལི, བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཨི་མཾ ཁོ མེ ཨ་ཏྟཱ་དཱ་ནཾ ཨཱ་དི་ཡ་ཏོ བྷ་ཝི་སྶ་ཏི ས་ངྒྷ་སྶ ཏ་ཏོ་ནི་དཱ་ནཾ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ས་ངྒྷ་བྷེ་དོ ས་ངྒྷ་རཱ་ཛི ས་ངྒྷ་ཝ་ཝ་ཏྠཱ་ནཾ ས་ངྒྷ་ནཱ་ནཱ་ཀ་ར་ཎ’ནྟི, ན ཏཾ, ཨུ་པཱ་ལི, ཨ་ཏྟཱ་དཱ་ནཾ ཨཱ་དཱ་ཏ་བྦཾ.
‘‘ས་ཙེ པ་ནུ་པཱ་ལི བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཨི་མཾ ཁོ མེ ཨ་ཏྟཱ་དཱ་ནཾ ཨཱ་དི་ཡ་ཏོ ན བྷ་ཝི་སྶ་ཏི ས་ངྒྷ་སྶ ཏ་ཏོ་ནི་དཱ་ནཾ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ས་ངྒྷ་བྷེ་དོ ས་ངྒྷ་རཱ་ཛི ས་ངྒྷ་ཝ་ཝ་ཏྠཱ་ནཾ ས་ངྒྷ་ནཱ་ནཱ་ཀ་ར་ཎ’ནྟི, ཏཾ ཨཱ་དཱ་ཏ་བྦཾ, ཨུ་པཱ་ལི, ཨ་ཏྟཱ་དཱ་ནཾ. ཨེ་ཝཾ པ་ཉྩ་ངྒ་ས་མ་ནྣཱ་ག་ཏཾ ཁོ, ཨུ་པཱ་ལི, ཨ་ཏྟཱ་དཱ་ནཾ ཨཱ་དི་ནྣཾ པ་ཙྪཱ་པི ཨ་ཝི་པྤ་ཊི་སཱ་ར་ཀ་རཾ བྷ་ཝི་སྶ་ཏཱི’’ཏི.
༤༤༡. ‘‘ཀ་ཏི་ཧི ནུ ཁོ, བྷ་ནྟེ, ཨ་ངྒེ་ཧི ས་མ་ནྣཱ་ག་ཏོ བྷི་ཀྑུ ཨ་དྷི་ཀ་ར་ཎ་ཛཱ་ཏཱ་ནཾ བྷི་ཀྑཱུ་ནཾ བ་ཧཱུ་པ་ཀཱ་རོ ཧོ་ཏཱི’’ཏི? ‘‘པ་ཉྩ་ཧུ་པཱ་ལི, ཨ་ངྒེ་ཧི ས་མ་ནྣཱ་ག་ཏོ བྷི་ཀྑུ ཨ་དྷི་ཀ་ར་ཎ་ཛཱ་ཏཱ་ནཾ བྷི་ཀྑཱུ་ནཾ བ་ཧཱུ་པ་ཀཱ་རོ ཧོ་ཏི. ཀ་ཏ་མེ་ཧི པ་ཉྩ་ཧི? སཱི་ལ་ཝཱ ཧོ་ཏི, པཱ་ཏི་མོ་ཀྑ་སཾ་ཝ་ར་སཾ་ཝུ་ཏོ ཝི་ཧ་ར་ཏི ཨཱ་ཙཱ་ར་གོ་ཙ་ར་ས་མྤ་ནྣོ ཨ་ཎུ་མ་ཏྟེ་སུ ཝ་ཛྫེ་སུ བྷ་ཡ་ད་སྶཱ་ཝཱི, ས་མཱ་དཱ་ཡ སི་ཀྑ་ཏི སི་ཀྑཱ་པ་དེ་སུ; བ་ཧུ་སྶུ་ཏོ ཧོ་ཏི སུ་ཏ་དྷ་རོ སུ་ཏ་ས་ནྣི་ཙ་ཡོ; ཡེ ཏེ དྷ་མྨཱ ཨཱ་དི་ཀ་ལྱཱ་ཎཱ མ་ཛ྄ཛྷེ་ཀ་ལྱཱ་ཎཱ པ་རི་ཡོ་སཱ་ན་ཀ་ལྱཱ་ཎཱ སཱ་ཏྠཾ ས་བྱ་ཉྫ་ནཾ ཀེ་ཝ་ལ་པ་རི་པུ་ཎྞཾ པ་རི་སུ་དྡྷཾ བྲ་ཧྨ་ཙ་རི་ཡཾ ཨ་བྷི་ཝ་ད་ནྟི ཏ་ཐཱ་རཱུ་པ་སྶ དྷ་མྨཱ བ་ཧུ་སྶུ་ཏཱ ཧོ་ནྟི དྷཱ་ཏཱ ཝ་ཙ་སཱ པ་རི་ཙི་ཏཱ མ་ན་སཱ་ནུ་པེ་ཀྑི་ཏཱ དི་ཊྛི་ཡཱ སུ་པྤ་ཊི་ཝི་དྡྷཱ, ཨུ་བྷ་ཡཱ་ནི ཁོ པ་ན་སྶ པཱ་ཏི་མོ་ཀྑཱ་ནི ཝི་ཏྠཱ་རེ་ན སྭཱ་ག་ཏཱ་ནི ཧོ་ནྟི སུ་ཝི་བྷ་ཏྟཱ་ནི སུ་པྤ་ཝ་ཏྟཱི་ནི སུ་ཝི་ནི་ཙྪི་ཏཱ་ནི སུ་ཏྟ་སོ ཨ་ནུ་བྱ་ཉྫ་ན་སོ; ཝི་ན་ཡེ ཁོ པ་ན ཋི་ཏོ ཧོ་ཏི ཨ་སཾ་ཧཱི་རོ; པ་ཊི་བ་ལོ ཧོ་ཏི ཨུ་བྷོ ཨ་ཏྠ་པ་ཙྩ་ཏྠི་ཀེ ཨ་སྶཱ་སེ་ཏུཾ ས་ཉྙཱ་པེ་ཏུཾ ནི་ཛ྄ཛྷཱ་པེ་ཏུཾ པེ་ཀྑེ་ཏུཾ པ་སཱ་དེ་ཏུཾ – ཨི་མེ་ཧི ཁོ, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏོ བྷི་ཀྑུ ཨ་དྷི་ཀ་ར་ཎ་ཛཱ་ཏཱ་ནཾ བྷི་ཀྑཱུ་ནཾ བ་ཧཱུ་པ་ཀཱ་རོ ཧོ་ཏི.
‘‘ཨ་པ་རེ་ཧི་པི, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏོ བྷི་ཀྑུ ཨ་དྷི་ཀ་ར་ཎ་ཛཱ་ཏཱ་ནཾ བྷི་ཀྑཱུ་ནཾ བ་ཧཱུ་པ་ཀཱ་རོ ཧོ་ཏི. ཀ་ཏ་མེ་ཧི པ་ཉྩ་ཧི? པ་རི་སུ་དྡྷ་ཀཱ་ཡ་ས་མཱ་ཙཱ་རོ ཧོ་ཏི, པ་རི་སུ་དྡྷ་ཝ་ཙཱི་ས་མཱ་ཙཱ་རོ ཧོ་ཏི, པ་རི་སུ་དྡྷཱ་ཛཱི་ཝོ ཧོ་ཏི, པ་ཎྜི་ཏོ ཧོ་ཏི བྱ་ཏྟོ, པ་ཊི་བ་ལོ ཨ་ནུ་ཡུ་ཉྫི་ཡ་མཱ་ནོ ཨ་ནུ་ཡོ་གཾ དཱ་ཏུཾ – ཨི་མེ་ཧི ཁོ, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏོ བྷི་ཀྑུ ཨ་དྷི་ཀ་ར་ཎ་ཛཱ་ཏཱ་ནཾ བྷི་ཀྑཱུ་ནཾ བ་ཧཱུ་པ་ཀཱ་རོ ཧོ་ཏི.
‘‘ཨ་པ་རེ་ཧི་པི, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏོ བྷི་ཀྑུ ཨ་དྷི་ཀ་ར་ཎ་ཛཱ་ཏཱ་ནཾ བྷི་ཀྑཱུ་ནཾ བ་ཧཱུ་པ་ཀཱ་རོ ཧོ་ཏི. ཀ་ཏ་མེ་ཧི པ་ཉྩ་ཧི? ཝ་ཏྠུཾ ཛཱ་ནཱ་ཏི, ནི་དཱ་ནཾ ཛཱ་ནཱ་ཏི, པ་ཉྙ་ཏྟིཾ ཛཱ་ནཱ་ཏི, པ་ད་པ་ཙྩཱ་བྷ་ཊྛཾ ཛཱ་ནཱ་ཏི, ཨ་ནུ་ས་ནྡྷི་ཝ་ཙ་ན་པ་ཐཾ ཛཱ་ནཱ་ཏི – ཨི་མེ་ཧི ཁོ, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏོ བྷི་ཀྑུ ཨ་དྷི་ཀ་ར་ཎ་ཛཱ་ཏཱ་ནཾ བྷི་ཀྑཱུ་ནཾ བ་ཧཱུ་པ་ཀཱ་རོ ཧོ་ཏཱི’’ཏི.
༤༤༢. ‘‘ཀ་ཏི་ཧི ནུ ཁོ, བྷ་ནྟེ, ཨ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ནཱ་ནུ་ཡུ་ཉྫི་ཏ་བྦ’’ནྟི? ‘‘པ་ཉྩ་ཧུ་པཱ་ལི, ཨ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ནཱ་ནུ་ཡུ་ཉྫི་ཏ་བྦཾ. ཀ་ཏ་མེ་ཧི པ་ཉྩ་ཧི? སུ་ཏྟཾ ན ཛཱ་ནཱ་ཏི, སུ་ཏྟཱ་ནུ་ལོ་མཾ ན ཛཱ་ནཱ་ཏི, ཝི་ན་ཡཾ ན ཛཱ་ནཱ་ཏི, ཝི་ན་ཡཱ་ནུ་ལོ་མཾ ན ཛཱ་ནཱ་ཏི, ན ཙ ཋཱ་ནཱ་ཋཱ་ན་ཀུ་ས་ལོ ཧོ་ཏི – ཨི་མེ་ཧི ཁོ, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ནཱ་ནུ་ཡུ་ཉྫི་ཏ་བྦཾ.
‘‘པ་ཉྩ་ཧུ་པཱ་ལི, ཨ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ཨ་ནུ་ཡུ་ཉྫི་ཏ་བྦཾ. ཀ་ཏ་མེ་ཧི པ་ཉྩ་ཧི? སུ་ཏྟཾ ཛཱ་ནཱ་ཏི, སུ་ཏྟཱ་ནུ་ལོ་མཾ ཛཱ་ནཱ་ཏི, ཝི་ན་ཡཾ ཛཱ་ནཱ་ཏི, ཝི་ན་ཡཱ་ནུ་ལོ་མཾ ཛཱ་ནཱ་ཏི, ཋཱ་ནཱ་ཋཱ་ན་ཀུ་ས་ལོ ཙ ཧོ་ཏི – ཨི་མེ་ཧི ཁོ, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ཨ་ནུ་ཡུ་ཉྫི་ཏ་བྦཾ.
‘‘ཨ་པ་རེ་ཧི་པི, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ནཱ་ནུ་ཡུ་ཉྫི་ཏ་བྦཾ. ཀ་ཏ་མེ་ཧི པ་ཉྩ་ཧི? དྷ་མྨཾ ན ཛཱ་ནཱ་ཏི, དྷ་མྨཱ་ནུ་ལོ་མཾ ན ཛཱ་ནཱ་ཏི, ཝི་ན་ཡཾ ན ཛཱ་ནཱ་ཏི, ཝི་ན་ཡཱ་ནུ་ལོ་མཾ ན ཛཱ་ནཱ་ཏི, ན ཙ པུ་བྦཱ་པ་ར་ཀུ་ས་ལོ ཧོ་ཏི – ཨི་མེ་ཧི ཁོ, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ནཱ་ནུ་ཡུ་ཉྫི་ཏ་བྦཾ.
‘‘པ་ཉྩ་ཧུ་པཱ་ལི, ཨ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ཨ་ནུ་ཡུ་ཉྫི་ཏ་བྦཾ. ཀ་ཏ་མེ་ཧི པ་ཉྩ་ཧི? དྷ་མྨཾ ཛཱ་ནཱ་ཏི, དྷ་མྨཱ་ནུ་ལོ་མཾ ཛཱ་ནཱ་ཏི, ཝི་ན་ཡཾ ཛཱ་ནཱ་ཏི, ཝི་ན་ཡཱ་ནུ་ལོ་མཾ ཛཱ་ནཱ་ཏི, པུ་བྦཱ་པ་ར་ཀུ་ས་ལོ ཙ ཧོ་ཏི – ཨི་མེ་ཧི ཁོ, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ཨ་ནུ་ཡུ་ཉྫི་ཏ་བྦཾ.
‘‘ཨ་པ་རེ་ཧི་པི, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ནཱ་ནུ་ཡུ་ཉྫི་ཏ་བྦཾ. ཀ་ཏ་མེ་ཧི པ་ཉྩ་ཧི? ཝ་ཏྠུཾ ན ཛཱ་ནཱ་ཏི, ནི་དཱ་ནཾ ན ཛཱ་ནཱ་ཏི, པ་ཉྙ་ཏྟིཾ ན ཛཱ་ནཱ་ཏི, པ་ད་པ་ཙྩཱ་བྷ་ཊྛཾ ན ཛཱ་ནཱ་ཏི, ཨ་ནུ་ས་ནྡྷི་ཝ་ཙ་ན་པ་ཐཾ ན ཛཱ་ནཱ་ཏི – ཨི་མེ་ཧི ཁོ, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ནཱ་ནུ་ཡུ་ཉྫི་ཏ་བྦཾ.
‘‘པ་ཉྩ་ཧུ་པཱ་ལི, ཨ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ཨ་ནུ་ཡུ་ཉྫི་ཏ་བྦཾ. ཀ་ཏ་མེ་ཧི པ་ཉྩ་ཧི? ཝ་ཏྠུཾ ཛཱ་ནཱ་ཏི, ནི་དཱ་ནཾ ཛཱ་ནཱ་ཏི, པ་ཉྙ་ཏྟིཾ ཛཱ་ནཱ་ཏི, པ་ད་པ་ཙྩཱ་བྷ་ཊྛཾ ཛཱ་ནཱ་ཏི, ཨ་ནུ་ས་ནྡྷི་ཝ་ཙ་ན་པ་ཐཾ ཛཱ་ནཱ་ཏི – ཨི་མེ་ཧི ཁོ, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ཨ་ནུ་ཡུ་ཉྫི་ཏ་བྦཾ.
‘‘ཨ་པ་རེ་ཧི་པི, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ནཱ་ནུ་ཡུ་ཉྫི་ཏ་བྦཾ. ཀ་ཏ་མེ་ཧི པ་ཉྩ་ཧི? ཨཱ་པ་ཏྟིཾ ན ཛཱ་ནཱ་ཏི, ཨཱ་པ་ཏྟི་ས་མུ་ཊྛཱ་ནཾ ན ཛཱ་ནཱ་ཏི, ཨཱ་པ་ཏྟི་ཡཱ པ་ཡོ་གཾ ན ཛཱ་ནཱ་ཏི, ཨཱ་པ་ཏྟི་ཡཱ ཝཱུ་པ་ས་མཾ ན ཛཱ་ནཱ་ཏི, ཨཱ་པ་ཏྟི་ཡཱ ན ཝི་ནི་ཙྪ་ཡ་ཀུ་ས་ལོ ཧོ་ཏི – ཨི་མེ་ཧི ཁོ, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ནཱ་ནུ་ཡུ་ཉྫི་ཏ་བྦཾ.
‘‘པ་ཉྩ་ཧུ་པཱ་ལི, ཨ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ཨ་ནུ་ཡུ་ཉྫི་ཏ་བྦཾ. ཀ་ཏ་མེ་ཧི པ་ཉྩ་ཧི? ཨཱ་པ་ཏྟིཾ ཛཱ་ནཱ་ཏི, ཨཱ་པ་ཏྟི་ས་མུ་ཊྛཱ་ནཾ ཛཱ་ནཱ་ཏི, ཨཱ་པ་ཏྟི་ཡཱ པ་ཡོ་གཾ ཛཱ་ནཱ་ཏི, ཨཱ་པ་ཏྟི་ཡཱ ཝཱུ་པ་ས་མཾ ཛཱ་ནཱ་ཏི, ཨཱ་པ་ཏྟི་ཡཱ ཝི་ནི་ཙྪ་ཡ་ཀུ་ས་ལོ ཧོ་ཏི – ཨི་མེ་ཧི ཁོ, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ཨ་ནུ་ཡུ་ཉྫི་ཏ་བྦཾ.
‘‘ཨ་པ་རེ་ཧི་པི, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ནཱ་ནུ་ཡུ་ཉྫི་ཏ་བྦཾ. ཀ་ཏ་མེ་ཧི པ་ཉྩ་ཧི? ཨ་དྷི་ཀ་ར་ཎཾ ན ཛཱ་ནཱ་ཏི, ཨ་དྷི་ཀ་ར་ཎ་ས་མུ་ཊྛཱ་ནཾ ན ཛཱ་ནཱ་ཏི, ཨ་དྷི་ཀ་ར་ཎ་སྶ པ་ཡོ་གཾ ན ཛཱ་ནཱ་ཏི, ཨ་དྷི་ཀ་ར་ཎ་སྶ ཝཱུ་པ་ས་མཾ ན ཛཱ་ནཱ་ཏི, ཨ་དྷི་ཀ་ར་ཎ་སྶ ན ཝི་ནི་ཙྪ་ཡ་ཀུ་ས་ལོ ཧོ་ཏི – ཨི་མེ་ཧི ཁོ, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ནཱ་ནུ་ཡུ་ཉྫི་ཏ་བྦཾ.
‘‘པ་ཉྩ་ཧུ་པཱ་ལི, ཨ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ཨ་ནུ་ཡུ་ཉྫི་ཏ་བྦཾ. ཀ་ཏ་མེ་ཧི པ་ཉྩ་ཧི? ཨ་དྷི་ཀ་ར་ཎཾ ཛཱ་ནཱ་ཏི, ཨ་དྷི་ཀ་ར་ཎ་ས་མུ་ཊྛཱ་ནཾ ཛཱ་ནཱ་ཏི, ཨ་དྷི་ཀ་ར་ཎ་སྶ པ་ཡོ་གཾ ཛཱ་ནཱ་ཏི, ཨ་དྷི་ཀ་ར་ཎ་སྶ ཝཱུ་པ་ས་མཾ ཛཱ་ནཱ་ཏི, ཨ་དྷི་ཀ་ར་ཎ་སྶ ཝི་ནི་ཙྪ་ཡ་ཀུ་ས་ལོ ཧོ་ཏི – ཨི་མེ་ཧི ཁོ, ཨུ་པཱ་ལི, པ་ཉྩ་ཧ་ངྒེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ཨ་ནུ་ཡུ་ཉྫི་ཏ་བྦ’’ནྟི.
ཨ་ཏྟཱ་དཱ་ན་ཝ་གྒོ ནི་ཊྛི་ཏོ པ་ཉྩ་མོ.
ཏ་སྶུ་དྡཱ་ནཾ –
པ་རི་སུ་དྡྷ་ཉྩ ཀཱ་ལེ་ན, ཀཱ་རུ་ཉྙཾ ཨོ་ཀཱ་སེ་ན ཙ;
ཨ་ཏྟཱ་དཱ་ནཾ ཨ་དྷི་ཀ་ར་ཎཾ, ཨ་པ་རེ་ཧི་པི ཝ་ཏྠུ་ཉྩ;
སུ་ཏྟཾ དྷ་མྨཾ པུ་ན ཝ་ཏྠུ་ཉྩ, ཨཱ་པ་ཏྟི ཨ་དྷི་ཀ་ར་ཎེ་ན ཙཱ་ཏི.