༡. ཀ་ཐི་ན་ཨ་ཏྠ་ཏཱ་དི
༤༠༣. ཀ་སྶ ཀ་ཐི་ནཾ [ཀ་ཋི་ནཾ (སཱི. སྱཱ.)] ཨ་ན་ཏྠ་ཏཾ? ཀ་སྶ ཀ་ཐི་ནཾ ཨ་ཏྠ་ཏཾ? ཀི་ནྟི ཀ་ཐི་ནཾ ཨ་ན་ཏྠ་ཏཾ? ཀི་ནྟི ཀ་ཐི་ནཾ ཨ་ཏྠ་ཏཾ?
ཀ་སྶ ཀ་ཐི་ནཾ ཨ་ན་ཏྠ་ཏནྟི? དྭི་ནྣཾ པུ་གྒ་ལཱ་ནཾ ཨ་ན་ཏྠ་ཏཾ ཧོ་ཏི ཀ་ཐི་ནཾ – ཨ་ན་ཏྠཱ་ར་ཀ་སྶ ཙ ཨ་ན་ནུ་མོ་ད་ཀ་སྶ ཙ. ཨི་མེ་སཾ དྭི་ནྣཾ པུ་གྒ་ལཱ་ནཾ ཨ་ན་ཏྠ་ཏཾ ཧོ་ཏི ཀ་ཐི་ནཾ.
ཀ་སྶ ཀ་ཐི་ནཾ ཨ་ཏྠ་ཏནྟི? དྭི་ནྣཾ པུ་གྒ་ལཱ་ནཾ ཨ་ཏྠ་ཏཾ ཧོ་ཏི ཀ་ཐི་ནཾ – ཨ་ཏྠཱ་ར་ཀ་སྶ ཙ ཨ་ནུ་མོ་ད་ཀ་སྶ ཙ. ཨི་མེ་སཾ དྭི་ནྣཾ པུ་གྒ་ལཱ་ནཾ ཨ་ཏྠ་ཏཾ ཧོ་ཏི ཀ་ཐི་ནཾ.
ཀི་ནྟི ཀ་ཐི་ནཾ ཨ་ན་ཏྠ་ཏནྟི? ཙ་ཏུ་ཝཱི་ས་ཏི་ཡཱ ཨཱ་ཀཱ་རེ་ཧི ཨ་ན་ཏྠ་ཏཾ ཧོ་ཏི ཀ་ཐི་ནཾ, ན ཨུ་ལླི་ཁི་ཏ་མ་ཏྟེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན དྷོ་ཝ་ན་མ་ཏྟེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན ཙཱི་ཝ་ར་ཝི་ཙཱ་ར་ཎ་མ་ཏྟེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན ཚེ་ད་ན་མ་ཏྟེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན བ་ནྡྷ་ན་མ་ཏྟེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན ཨོ་ཝ་ཊྚི་ཡ་ཀ་ར་ཎ་མ་ཏྟེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན ཀ་ཎྜུ་ས་ཀ་ར་ཎ་མ་ཏྟེ་ན [ན ག་ཎྜུ་ས་ཀ་ར་ཎ་མ་ཏྟེ་ན (ཀ.)] ཨ་ཏྠ་ཏཾ ཧོ་ཏི ཀ་ཐི་ནཾ, ན ད་ལ༹ྷཱི་ཀ་མྨ་ཀ་ར་ཎ་མ་ཏྟེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན ཨ་ནུ་ཝཱ་ཏ་ཀ་ར་ཎ་མ་ཏྟེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན པ་རི་བྷ་ཎྜ་ཀ་ར་ཎ་མ་ཏྟེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན ཨོ་ཝ་དྡྷེ་ཡྻ་ཀ་ར་ཎ་མ་ཏྟེ་ན [ན ཨོ་ཝ་ཊྚེ་ཡྻ་ཀ་ར་ཎ་མ་ཏྟེ་ན (སཱི. སྱཱ.), ན ཨོ་ཝ་དེ་ཡྻ་ཀ་ར་ཎ་མ་ཏྟེ་ན (ཀ.)] ཨ་ཏྠ་ཏཾ ཧོ་ཏི ཀ་ཐི་ནཾ, ན ཀ་མྦ་ལ་མ་དྡ་ན་མ་ཏྟེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན ནི་མི་ཏྟ་ཀ་ཏེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན པ་རི་ཀ་ཐཱ་ཀ་ཏེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན ཀུ་ཀྐུ་ཀ་ཏེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན ས་ནྣི་དྷི་ཀ་ཏེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན ནི་སྶ་གྒི་ཡེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན ཨ་ཀ་པྤ་ཀ་ཏེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན ཨ་ཉྙ་ཏྲ ས་ངྒྷཱ་ཊི་ཡཱ ཨ་ཏྠ་ཏཾ ཧོ་ཏི ཀ་ཐི་ནཾ, ན ཨ་ཉྙ་ཏྲ ཨུ་ཏྟ་རཱ་ས་ངྒེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན ཨ་ཉྙ་ཏྲ ཨ་ནྟ་ར་ཝཱ་ས་ཀེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན ཨ་ཉྙ་ཏྲ པ་ཉྩ་ཀེ་ན ཝཱ ཨ་ཏི་རེ་ཀ་པ་ཉྩ་ཀེ་ན ཝཱ ཏ་ད་ཧེ་ཝ ས་ཉྪི་ནྣེ་ན ས་མ་ཎྜ་ལཱི་ཀ་ཏེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ན ཨ་ཉྙ་ཏྲ པུ་གྒ་ལ་སྶ ཨ་ཏྠཱ་རཱ ཨ་ཏྠ་ཏཾ ཧོ་ཏི ཀ་ཐི་ནཾ, ས་མྨཱ ཙེ ཨ་ཏྠ་ཏཾ ཧོ་ཏི ཀ་ཐི་ནཾ ཏཾ ཙེ ནི་སྶཱི་མ་ཊྛོ ཨ་ནུ་མོ་ད་ཏི. ཨེ་ཝ་མྤི ཨ་ན་ཏྠ་ཏཾ ཧོ་ཏི ཀ་ཐི་ནཾ.
ནི་མི་ཏྟ་ཀ་མྨཾ ནཱ་མ ནི་མི་ཏྟཾ ཀ་རོ་ཏི – ‘‘ཨི་མི་ནཱ དུ་སྶེ་ན ཀ་ཐི་ནཾ ཨ་ཏྠ་རི་སྶཱ་མཱི’’ཏི. པ་རི་ཀ་ཐཱ ནཱ་མ པ་རི་ཀ་ཐཾ ཀ་རོ་ཏི – ‘‘ཨི་མཱ་ཡ པ་རི་ཀ་ཐཱ་ཡ ཀ་ཐི་ན་དུ་སྶཾ ནི་བྦ་ཏྟེ་སྶཱ་མཱི’’ཏི. ཀུ་ཀྐུ་ཀ་ཏཾ ནཱ་མ ཨ་ནཱ་དི་ཡ་དཱ་ནཾ ཝུ་ཙྩ་ཏི. ས་ནྣི་དྷི ནཱ་མ དྭེ ས་ནྣི་དྷི་ཡོ – ཀ་ར་ཎ་ས་ནྣི་དྷི ཝཱ ནི་ཙ་ཡ་ས་ནྣི་དྷི ཝཱ. ནི་སྶ་གྒི་ཡཾ ནཱ་མ ཀ་ཡི་ར་མཱ་ནེ ཨ་རུ་ཎཾ ཨུ་ཊྛ་ཧ་ཏི [ཨུ་དྲི་ཡ་ཏི (སཱི. སྱཱ.)]. ཨི་མེ་ཧི ཙ་ཏུ་ཝཱི་ས་ཏི་ཡཱ ཨཱ་ཀཱ་རེ་ཧི ཨ་ན་ཏྠ་ཏཾ ཧོ་ཏི ཀ་ཐི་ནཾ.
ཀི་ནྟི ཀ་ཐི་ནཾ ཨ་ཏྠ་ཏནྟི? ས་ཏྟ་ར་ས་ཧི ཨཱ་ཀཱ་རེ་ཧི ཨ་ཏྠ་ཏཾ ཧོ་ཏི ཀ་ཐི་ནཾ. ཨ་ཧ་ཏེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ཨ་ཧ་ཏ་ཀ་པྤེ་ན ཨ་ཏྠ་ཏཾ ཧོ་ཏི ཀ་ཐི་ནཾ, པི་ལོ་ཏི་ཀཱ་ཡ ཨ་ཏྠ་ཏཾ ཧོ་ཏི ཀ་ཐི་ནཾ, པཾ་སུ་ཀཱུ་ལེ་ན ཨ་ཏྠ་ཏཾ ཧོ་ཏི ཀ་ཐི་ནཾ, པཱ་པ་ཎི་ཀེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ཨ་ནི་མི་ཏྟ་ཀ་ཏེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ཨ་པ་རི་ཀ་ཐཱ་ཀ་ཏེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ཨ་ཀུ་ཀྐུ་ཀ་ཏེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ཨ་ས་ནྣི་དྷི་ཀ་ཏེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ཨ་ནི་སྶ་གྒི་ཡེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ཀ་པྤ་ཀ་ཏེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ས་ངྒྷཱ་ཊི་ཡཱ ཨ་ཏྠ་ཏཾ ཧོ་ཏི ཀ་ཐི་ནཾ, ཨུ་ཏྟ་རཱ་ས་ངྒེ་ན ཨ་ཏྠ་ཏཾ ཧོ་ཏི ཀ་ཐི་ནཾ, ཨ་ནྟ་ར་ཝཱ་ས་ཀེ་ན ཨ་ཏྠ་ཏཾ ཧོ་ཏི ཀ་ཐི་ནཾ, པ་ཉྩ་ཀེ་ན ཝཱ ཨ་ཏི་རེ་ཀ་པ་ཉྩ་ཀེ་ན ཝཱ ཏ་ད་ཧེ་ཝ ས་ཉྪི་ནྣེ་ན ས་མ་ཎྜ་ལཱི་ཀ་ཏེ་ན ཨ་ཏྠ་ཏཾ ཧོ་ཏི ཀ་ཐི་ནཾ, པུ་གྒ་ལ་སྶ ཨ་ཏྠཱ་རཱ ཨ་ཏྠ་ཏཾ ཧོ་ཏི ཀ་ཐི་ནཾ, ས་མྨཱ ཙེ ཨ་ཏྠ་ཏཾ ཧོ་ཏི ཀ་ཐི་ནཾ, ཏཾ ཙེ སཱི་མ་ཊྛོ ཨ་ནུ་མོ་ད་ཏི, ཨེ་ཝ་མྤི ཨ་ཏྠ་ཏཾ ཧོ་ཏི ཀ་ཐི་ནཾ. ཨི་མེ་ཧི ས་ཏྟ་ར་ས་ཧི ཨཱ་ཀཱ་རེ་ཧི ཨ་ཏྠ་ཏཾ ཧོ་ཏི ཀ་ཐི་ནཾ.
ས་ཧ ཀ་ཐི་ན་སྶ ཨ་ཏྠཱ་རཱ ཀ་ཏི དྷ་མྨཱ ཛཱ་ཡ་ནྟི? ས་ཧ ཀ་ཐི་ན་སྶ ཨ་ཏྠཱ་རཱ པ་ནྣ་ར་ས དྷ་མྨཱ ཛཱ་ཡ་ནྟི – ཨ་ཊྛ མཱ་ཏི་ཀཱ, དྭེ པ་ལི་བོ་དྷཱ, པ་ཉྩཱ་ནི་སཾ་སཱ. ས་ཧ ཀ་ཐི་ན་སྶ ཨ་ཏྠཱ་རཱ ཨི་མེ པ་ནྣ་ར་ས དྷ་མྨཱ ཛཱ་ཡ་ནྟི.