༧. པུ་ཙྪཱ་ཝི་བྷཱ་གོ
༣༩༨. ཀིཾ ཏེ དི་ཊྛ་ནྟི ཀ་ཏ་མཱ པུ་ཙྪཱ? ཀི་ནྟི ཏེ དི་ཊྛ་ནྟི ཀ་ཏ་མཱ པུ་ཙྪཱ? ཀ་དཱ ཏེ དི་ཊྛ་ནྟི ཀ་ཏ་མཱ པུ་ཙྪཱ? ཀ་ཏྠ ཏེ དི་ཊྛ་ནྟི ཀ་ཏ་མཱ པུ་ཙྪཱ?
༣༩༩. ཀིཾ ཏེ དི་ཊྛནྟི ཝ་ཏྠུ་པུ་ཙྪཱ, ཝི་པ་ཏྟི་པུ་ཙྪཱ, ཨཱ་པ་ཏྟི་པུ་ཙྪཱ, ཨ་ཛ྄ཛྷཱ་ཙཱ་ར་པུ་ཙྪཱ. ཝ་ཏྠུ་པུ་ཙྪཱ་ཏི – ཨ་ཊྛ་པཱ་རཱ་ཛི་ཀཱ་ནཾ ཝ་ཏྠུ་པུ་ཙྪཱ, ཏེ་ཝཱི་ས་ས་ངྒྷཱ་དི་སེ་སཱ་ནཾ ཝ་ཏྠུ་པུ་ཙྪཱ, དྭེ་ཨ་ནི་ཡ་ཏཱ་ནཾ ཝ་ཏྠུ་པུ་ཙྪཱ, དྭེ་ཙ་ཏྟཱ་རཱི་ས་ནི་སྶ་གྒི་ཡཱ་ནཾ ཝ་ཏྠུ་པུ་ཙྪཱ, ཨ་ཊྛཱ་སཱི་ཏི་ས་ཏ་པཱ་ཙི་ཏྟི་ཡཱ་ནཾ ཝ་ཏྠུ་པུ་ཙྪཱ, དྭཱ་ད་ས་པཱ་ཊི་དེ་ས་ནཱི་ཡཱ་ནཾ ཝ་ཏྠུ་པུ་ཙྪཱ, དུ་ཀྐ་ཊཱ་ནཾ ཝ་ཏྠུ་པུ་ཙྪཱ, དུ་བྦྷཱ་སི་ཏཱ་ནཾ ཝ་ཏྠུ་པུ་ཙྪཱ. ཝི་པ་ཏྟི་པུ་ཙྪཱ་ཏི – སཱི་ལ་ཝི་པ་ཏྟི་པུ་ཙྪཱ, ཨཱ་ཙཱ་ར་ཝི་པ་ཏྟི་པུ་ཙྪཱ, དི་ཊྛི་ཝི་པ་ཏྟི་པུ་ཙྪཱ, ཨཱ་ཛཱི་ཝ་ཝི་པ་ཏྟི་པུ་ཙྪཱ. ཨཱ་པ་ཏྟི་པུ་ཙྪཱ་ཏི – པཱ་རཱ་ཛི་ཀཱ་པ་ཏྟི་པུ་ཙྪཱ, ས་ངྒྷཱ་དི་སེ་སཱ་པ་ཏྟི་པུ་ཙྪཱ, ཐུ་ལླ་ཙྩ་ཡཱ་པ་ཏྟི་པུ་ཙྪཱ, པཱ་ཙི་ཏྟི་ཡཱ་པ་ཏྟི་པུ་ཙྪཱ, པཱ་ཊི་དེ་ས་ནཱི་ཡཱ་པ་ཏྟི་པུ་ཙྪཱ, དུ་ཀྐ་ཊཱ་པ་ཏྟི་པུ་ཙྪཱ, དུ་བྦྷཱ་སི་ཏཱ་པ་ཏྟི་པུ་ཙྪཱ. ཨ་ཛ྄ཛྷཱ་ཙཱ་ར་པུ་ཙྪཱ་ཏི – དྭ་ཡཾ་དྭ་ཡ་ས་མཱ་པ་ཏྟི་པུ་ཙྪཱ.
༤༠༠. ཀི་ནྟི ཏེ དི་ཊྛནྟི ལི་ངྒ་པུ་ཙྪཱ, ཨི་རི་ཡཱ་པ་ཐ་པུ་ཙྪཱ, ཨཱ་ཀཱ་ར་པུ་ཙྪཱ, ཝི་པྤ་ཀཱ་ར་པུ་ཙྪཱ. ལི་ངྒ་པུ་ཙྪཱ་ཏི – དཱི་གྷཾ ཝཱ ར་སྶཾ ཝཱ ཀ་ཎྷཾ ཝཱ ཨོ་དཱ་ཏཾ ཝཱ. ཨི་རི་ཡཱ་པ་ཐ་པུ་ཙྪཱ་ཏི ག་ཙྪ་ནྟཾ ཝཱ ཋི་ཏཾ ཝཱ ནི་སི་ནྣཾ ཝཱ ནི་པ་ནྣཾ ཝཱ. ཨཱ་ཀཱ་ར་པུ་ཙྪཱ་ཏི གི་ཧི་ལི་ངྒེ ཝཱ ཏི་ཏྠི་ཡ་ལི་ངྒེ ཝཱ པ་བྦ་ཛི་ཏ་ལི་ངྒེ ཝཱ. ཝི་པྤ་ཀཱ་ར་པུ་ཙྪཱ་ཏི ག་ཙྪ་ནྟཾ ཝཱ ཋི་ཏཾ ཝཱ ནི་སི་ནྣཾ ཝཱ ནི་པ་ནྣཾ ཝཱ.
༤༠༡. ཀ་དཱ ཏེ དི་ཊྛནྟི ཀཱ་ལ་པུ་ཙྪཱ, ས་མ་ཡ་པུ་ཙྪཱ, དི་ཝ་ས་པུ་ཙྪཱ, ཨུ་ཏུ་པུ་ཙྪཱ. ཀཱ་ལ་པུ་ཙྪཱ་ཏི པུ་བྦ་ཎྷ་ཀཱ་ལེ ཝཱ མ་ཛ྄ཛྷ་ནྷི་ཀ་ཀཱ་ལེ ཝཱ སཱ་ཡ་ནྷ་ཀཱ་ལེ ཝཱ. ས་མ་ཡ་པུ་ཙྪཱ་ཏི པུ་བྦ་ཎྷ་ས་མ་ཡེ ཝཱ མ་ཛ྄ཛྷ་ནྷི་ཀ་ས་མ་ཡེ ཝཱ སཱ་ཡ་ནྷ་ས་མ་ཡེ ཝཱ. དི་ཝ་ས་པུ་ཙྪཱ་ཏི པུ་རེ་བྷ་ཏྟཾ ཝཱ པ་ཙྪཱ་བྷ་ཏྟཾ ཝཱ ར་ཏྟིཾ ཝཱ དི་ཝཱ ཝཱ ཀཱ་ལེ༹ ཝཱ ཛུ་ཎྷེ ཝཱ. ཨུ་ཏུ་པུ་ཙྪཱ་ཏི ཧེ་མ་ནྟེ ཝཱ གི་མྷེ ཝཱ ཝ་སྶེ ཝཱ [ཝ་སྶཱ་ནེ ཝཱ (སཱི.)].
༤༠༢. ཀ་ཏྠ ཏེ དི་ཊྛནྟི ཋཱ་ན་པུ་ཙྪཱ, བྷཱུ་མི་པུ་ཙྪཱ, ཨོ་ཀཱ་ས་པུ་ཙྪཱ, པ་དེ་ས་པུ་ཙྪཱ. ཋཱ་ན་པུ་ཙྪཱ་ཏི བྷཱུ་མི་ཡཱ ཝཱ པ་ཐ་ཝི་ཡཱ ཝཱ དྷ་ར་ཎི་ཡཱ ཝཱ ཛ་ག་ཏི་ཡཱ ཝཱ. བྷཱུ་མི་པུ་ཙྪཱ་ཏི བྷཱུ་མི་ཡཱ ཝཱ པ་ཐ་ཝི་ཡཱ ཝཱ པ་བྦ་ཏེ ཝཱ པཱ་སཱ་ཎེ ཝཱ པཱ་སཱ་དེ ཝཱ. ཨོ་ཀཱ་ས་པུ་ཙྪཱ་ཏི པུ་ར་ཏྠི་མེ ཝཱ ཨོ་ཀཱ་སེ པ་ཙྪི་མེ ཝཱ ཨོ་ཀཱ་སེ ཨུ་ཏྟ་རེ ཝཱ ཨོ་ཀཱ་སེ ད་ཀྑི་ཎེ ཝཱ ཨོ་ཀཱ་སེ. པ་དེ་ས་པུ་ཙྪཱ་ཏི པུ་ར་ཏྠི་མེ ཝཱ པ་དེ་སེ པ་ཙྪི་མེ ཝཱ པ་དེ་སེ ཨུ་ཏྟ་རེ ཝཱ པ་དེ་སེ ད་ཀྑི་ཎེ ཝཱ པ་དེ་སེ་ཏི.
མ་ཧཱ་ས་ངྒཱ་མོ ནི་ཊྛི་ཏོ.