༡. ཨ་ནུ་ཝི་ཛྫ་ཀ་ཨ་ནུ་ཡོ་གོ
༣༦༠. ཨ་ནུ་ཝི་ཛྫ་ཀེ ཙོ་ད་ཀོ པུ་ཙྪི་ཏ་བྦོ – ‘‘ཡཾ ཁོ ཏྭཾ, ཨཱ་ཝུ་སོ, ཨི་མཾ བྷི་ཀྑུཾ ཙོ་དེ་སི, ཀི་མྷི ནཾ ཙོ་དེ་སི, སཱི་ལ་ཝི་པ་ཏྟི་ཡཱ ཝཱ ཙོ་དེ་སི, ཨཱ་ཙཱ་ར་ཝི་པ་ཏྟི་ཡཱ ཝཱ ཙོ་དེ་སི, དི་ཊྛི་ཝི་པ་ཏྟི་ཡཱ ཝཱ ཙོ་དེ་སཱི’’ཏི? སོ ཙེ ཨེ་ཝཾ ཝ་དེ་ཡྻ – ‘‘སཱི་ལ་ཝི་པ་ཏྟི་ཡཱ ཝཱ ཙོ་དེ་མི, ཨཱ་ཙཱ་ར་ཝི་པ་ཏྟི་ཡཱ ཝཱ ཙོ་དེ་མི, དི་ཊྛི་ཝི་པ་ཏྟི་ཡཱ ཝཱ ཙོ་དེ་མཱི’’ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘‘ཛཱ་ནཱ་སི པ་ནཱ་ཡ་སྨཱ སཱི་ལ་ཝི་པ་ཏྟིཾ, ཛཱ་ནཱ་སི ཨཱ་ཙཱ་ར་ཝི་པ་ཏྟིཾ, ཛཱ་ནཱ་སི དི་ཊྛི་ཝི་པ་ཏྟི’’ནྟི? སོ ཙེ ཨེ་ཝཾ ཝ་དེ་ཡྻ – ‘‘ཛཱ་ནཱ་མི ཁོ ཨ་ཧཾ, ཨཱ་ཝུ་སོ, སཱི་ལ་ཝི་པ་ཏྟིཾ, ཛཱ་ནཱ་མི ཨཱ་ཙཱ་ར་ཝི་པ་ཏྟིཾ, ཛཱ་ནཱ་མི དི་ཊྛི་ཝི་པ་ཏྟི’’ནྟི, སོ ཨེ་ཝ་མ་སྶ ཝ་ཙ་ནཱི་ཡོ – ‘‘ཀ་ཏ་མཱ པ་ནཱ་ཝུ་སོ, སཱི་ལ་ཝི་པ་ཏྟི? ཀ་ཏ་མཱ ཨཱ་ཙཱ་ར་ཝི་པ་ཏྟི? ཀ་ཏ་མཱ དི་ཊྛི་ཝི་པ་ཏྟཱི’’ཏི? སོ ཙེ ཨེ་ཝཾ ཝ་དེ་ཡྻ – ‘‘ཙ་ཏྟཱ་རི ཙ པཱ་རཱ་ཛི་ཀཱ་ནི, ཏེ་ར་ས ཙ ས་ངྒྷཱ་དི་སེ་སཱ – ཨ་ཡཾ སཱི་ལ་ཝི་པ་ཏྟི. ཐུ་ལླ་ཙྩ་ཡཾ, པཱ་ཙི་ཏྟི་ཡཾ, པཱ་ཊི་དེ་ས་ནཱི་ཡཾ, དུ་ཀྐ་ཊཾ, དུ་བྦྷཱ་སི་ཏཾ, ཨ་ཡཾ ཨཱ་ཙཱ་ར་ཝི་པ་ཏྟི. མི་ཙྪཱ་དི་ཊྛི, ཨ་ནྟ་གྒཱ་ཧི་ཀཱ དི་ཊྛི – ཨ་ཡཾ དི་ཊྛི་ཝི་པ་ཏྟཱི’’ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘‘ཡཾ ཁོ ཏྭཾ, ཨཱ་ཝུ་སོ, ཨི་མཾ བྷི་ཀྑུཾ ཙོ་དེ་སི, དི་ཊྛེ་ན ཝཱ ཙོ་དེ་སི སུ་ཏེ་ན ཝཱ ཙོ་དེ་སི པ་རི་ས་ངྐཱ་ཡ ཝཱ ཙོ་དེ་སཱི’’ཏི? སོ ཙེ ཨེ་ཝཾ ཝ་དེ་ཡྻ – ‘‘དི་ཊྛེ་ན ཝཱ ཙོ་དེ་མི སུ་ཏེ་ན ཝཱ ཙོ་དེ་མི པ་རི་ས་ངྐཱ་ཡ ཝཱ ཙོ་དེ་མཱི’’ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘‘ཡཾ ཁོ ཏྭཾ, ཨཱ་ཝུ་སོ, ཨི་མཾ བྷི་ཀྑུཾ དི་ཊྛེ་ན ཙོ་དེ་སི, ཀིཾ ཏེ དི་ཊྛཾ ཀི་ནྟི ཏེ དི་ཊྛཾ, ཀ་དཱ ཏེ དི་ཊྛཾ, ཀ་ཏྠ ཏེ དི་ཊྛཾ པཱ་རཱ་ཛི་ཀཾ ཨ་ཛ྄ཛྷཱ་པ་ཛྫ་ནྟོ དི་ཊྛོ, ས་ངྒྷཱ་དི་སེ་སཾ ཨ་ཛ྄ཛྷཱ་པ་ཛྫ་ནྟོ དི་ཊྛོ, ཐུ་ལླ་ཙྩ་ཡཾ… པཱ་ཙི་ཏྟི་ཡཾ… པཱ་ཊི་དེ་ས་ནཱི་ཡཾ… དུ་ཀྐ་ཊཾ… དུ་བྦྷཱ་སི་ཏཾ ཨ་ཛ྄ཛྷཱ་པ་ཛྫ་ནྟོ དི་ཊྛོ, ཀ་ཏྠ ཙ ཏྭཾ ཨ་ཧོ་སི, ཀ་ཏྠ ཙཱ་ཡཾ བྷི་ཀྑུ ཨ་ཧོ་སི, ཀི་ཉྩ ཏྭཾ ཀ་རོ་སི, ཀིཾ ཙཱ་ཡཾ བྷི་ཀྑུ ཀ་རོ་ཏཱི’’ཏི? སོ ཙེ ཨེ་ཝཾ ཝ་དེ་ཡྻ – ‘‘ན ཁོ ཨ་ཧཾ, ཨཱ་ཝུ་སོ, ཨི་མཾ བྷི་ཀྑུཾ དི་ཊྛེ་ན ཙོ་དེ་མི, ཨ་པི ཙ སུ་ཏེ་ན ཙོ་དེ་མཱི’’ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘‘ཡཾ ཁོ ཏྭཾ, ཨཱ་ཝུ་སོ, ཨི་མཾ བྷི་ཀྑུཾ སུ་ཏེ་ན ཙོ་དེ་སི, ཀིཾ ཏེ སུ་ཏཾ, ཀི་ནྟི ཏེ སུ་ཏཾ, ཀ་དཱ ཏེ སུ་ཏཾ, ཀ་ཏྠ ཏེ སུ་ཏཾ, པཱ་རཱ་ཛི་ཀཾ ཨ་ཛ྄ཛྷཱ་པ་ནྣོ་ཏི སུ་ཏཾ, ས་ངྒྷཱ་དི་སེ་སཾ… ཐུ་ལླ་ཙྩ་ཡཾ… པཱ་ཙི་ཏྟི་ཡཾ… པཱ་ཊི་དེ་ས་ནཱི་ཡཾ… དུ་ཀྐ་ཊཾ… དུ་བྦྷཱ་སི་ཏཾ ཨ་ཛ྄ཛྷཱ་པ་ནྣོ་ཏི སུ་ཏཾ, བྷི་ཀྑུ་སྶ སུ་ཏཾ, བྷི་ཀྑུ་ནི་ཡཱ སུ་ཏཾ, སི་ཀྑ་མཱ་ནཱ་ཡ སུ་ཏཾ, སཱ་མ་ཎེ་ར་སྶ སུ་ཏཾ, སཱ་མ་ཎེ་རི་ཡཱ སུ་ཏཾ, ཨུ་པཱ་ས་ཀ་སྶ སུ་ཏཾ, ཨུ་པཱ་སི་ཀཱ་ཡ སུ་ཏཾ, རཱ་ཛཱུ་ནཾ སུ་ཏཾ, རཱ་ཛ་མ་ཧཱ་མ་ཏྟཱ་ནཾ སུ་ཏཾ, ཏི་ཏྠི་ཡཱ་ནཾ སུ་ཏཾ, ཏི་ཏྠི་ཡ་སཱ་ཝ་ཀཱ་ནཾ སུ་ཏ’’ནྟི? སོ ཙེ ཨེ་ཝཾ ཝ་དེ་ཡྻ – ‘‘ན ཁོ ཨ་ཧཾ, ཨཱ་ཝུ་སོ, ཨི་མཾ བྷི་ཀྑུཾ སུ་ཏེ་ན ཙོ་དེ་མི, ཨ་པི ཙ པ་རི་ས་ངྐཱ་ཡ ཙོ་དེ་མཱི’’ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘‘ཡཾ ཁོ ཏྭཾ, ཨཱ་ཝུ་སོ, ཨི་མཾ བྷི་ཀྑུཾ པ་རི་ས་ངྐཱ་ཡ ཙོ་དེ་སི, ཀིཾ པ་རི་ས་ངྐ་སི, ཀི་ནྟི པ་རི་ས་ངྐ་སི, ཀ་དཱ པ་རི་ས་ངྐ་སི, ཀ་ཏྠ པ་རི་ས་ངྐ་སི, པཱ་རཱ་ཛི་ཀཾ ཨ་ཛ྄ཛྷཱ་པ་ནྣོ་ཏི པ་རི་ས་ངྐ་སི, ས་ངྒྷཱ་དི་སེ་སཾ ཨ་ཛ྄ཛྷཱ་པ་ནྣོ་ཏི པ་རི་ས་ངྐ་སི, ཐུ་ལླ་ཙྩ་ཡཾ… པཱ་ཙི་ཏྟི་ཡཾ… པཱ་ཊི་དེ་ས་ནཱི་ཡཾ… དུ་ཀྐ་ཊཾ… དུ་བྦྷཱ་སི་ཏཾ ཨ་ཛ྄ཛྷཱ་པ་ནྣོ་ཏི པ་རི་ས་ངྐ་སི, བྷི་ཀྑུ་སྶ སུ་ཏྭཱ པ་རི་ས་ངྐ་སི, བྷི་ཀྑུ་ནི་ཡཱ སུ་ཏྭཱ པ་རི་ས་ངྐ་སི, སི་ཀྑ་མཱ་ནཱ་ཡ སུ་ཏྭཱ པ་རི་ས་ངྐ་སི, སཱ་མ་ཎེ་ར་སྶ སུ་ཏྭཱ པ་རི་ས་ངྐ་སི, སཱ་མ་ཎེ་རི་ཡཱ སུ་ཏྭཱ པ་རི་ས་ངྐ་སི, ཨུ་པཱ་ས་ཀ་སྶ སུ་ཏྭཱ པ་རི་ས་ངྐ་སི, ཨུ་པཱ་སི་ཀཱ་ཡ སུ་ཏྭཱ པ་རི་ས་ངྐ་སི, རཱ་ཛཱུ་ནཾ སུ་ཏྭཱ པ་རི་ས་ངྐ་སི, རཱ་ཛ་མ་ཧཱ་མ་ཏྟཱ་ནཾ སུ་ཏྭཱ པ་རི་ས་ངྐ་སི, ཏི་ཏྠི་ཡཱ་ནཾ སུ་ཏྭཱ པ་རི་ས་ངྐ་སི, ཏི་ཏྠི་ཡ་སཱ་ཝ་ཀཱ་ནཾ སུ་ཏྭཱ པ་རི་ས་ངྐ་སཱི’’ཏི?
༣༦༡. དི་ཊྛཾ དི་ཊྛེ་ན ས་མེ་ཏི དི་ཊྛེ་ན སཾ་ས་ནྡ་ཏེ དི་ཊྛཾ;
དི་ཊྛཾ པ་ཊི་ཙྩ ན ཨུ་པེ་ཏི ཨ་སུ་དྡྷ་པ་རི་ས་ངྐི་ཏོ;
སོ པུ་གྒ་ལོ པ་ཊི་ཉྙཱ་ཡ ཀཱ་ཏ་བྦོ ཏེ་ནུ་པོ་ས་ཐོ.
སུ་ཏཾ སུ་ཏེ་ན ས་མེ་ཏི སུ་ཏེ་ན སཾ་ས་ནྡ་ཏེ སུ་ཏཾ;
སུ་ཏཾ པ་ཊི་ཙྩ ན ཨུ་པེ་ཏི ཨ་སུ་དྡྷ་པ་རི་ས་ངྐི་ཏོ;
སོ པུ་གྒ་ལོ པ་ཊི་ཉྙཱ་ཡ ཀཱ་ཏ་བྦོ ཏེ་ནུ་པོ་ས་ཐོ.
མུ་ཏཾ མུ་ཏེ་ན ས་མེ་ཏི མུ་ཏེ་ན སཾ་ས་ནྡ་ཏེ མུ་ཏཾ;
མུ་ཏཾ པ་ཊི་ཙྩ ན ཨུ་པེ་ཏི ཨ་སུ་དྡྷ་པ་རི་ས་ངྐི་ཏོ;
སོ པུ་གྒ་ལོ པ་ཊི་ཉྙཱ་ཡ ཀཱ་ཏ་བྦོ ཏེ་ནུ་པོ་ས་ཐོ.
༣༦༢. ཙོ་ད་ནཱ་ཡ ཀོ ཨཱ་དི, ཀིཾ མ་ཛ྄ཛྷེ, ཀིཾ པ་རི་ཡོ་སཱ་ནཾ? ཙོ་ད་ནཱ་ཡ ཨོ་ཀཱ་ས་ཀ་མྨཾ ཨཱ་དི, ཀི་རི་ཡཱ མ་ཛ྄ཛྷེ, ས་མ་ཐོ པ་རི་ཡོ་སཱ་ནཾ. ཙོ་ད་ནཱ་ཡ ཀ་ཏི མཱུ་ལཱ་ནི, ཀ་ཏི ཝ་ཏྠཱུ་ནི, ཀ་ཏི བྷཱུ་མི་ཡོ, ཀ་ཏི་ཧཱ་ཀཱ་རེ་ཧི ཙོ་དེ་ཏི? ཙོ་ད་ནཱ་ཡ དྭེ མཱུ་ལཱ་ནི, ཏཱི་ཎི ཝ་ཏྠཱུ་ནི, པ་ཉྩ བྷཱུ་མི་ཡོ, དྭཱི་ཧཱ་ཀཱ་རེ་ཧི ཙོ་དེ་ཏི. ཙོ་ད་ནཱ་ཡ ཀ་ཏ་མཱ་ནི དྭེ མཱུ་ལཱ་ནི? ས་མཱུ་ལི་ཀཱ ཝཱ ཨ་མཱུ་ལི་ཀཱ ཝཱ – ཙོ་ད་ནཱ་ཡ ཨི་མཱ་ནི དྭེ མཱུ་ལཱ་ནི. ཙོ་ད་ནཱ་ཡ ཀ་ཏ་མཱ་ནི ཏཱི་ཎི ཝ་ཏྠཱུ་ནི? དི་ཊྛེ་ན སུ་ཏེ་ན པ་རི་ས་ངྐཱ་ཡ – ཙོ་ད་ནཱ་ཡ ཨི་མཱ་ནི ཏཱི་ཎི ཝ་ཏྠཱུ་ནི. ཙོ་ད་ནཱ ཀ་ཏ་མཱ པ་ཉྩ བྷཱུ་མི་ཡོ? ཀཱ་ལེ་ན ཝ་ཀྑཱ་མི ནོ ཨ་ཀཱ་ལེ་ན, བྷཱུ་ཏེ་ན ཝ་ཀྑཱ་མི ནོ ཨ་བྷཱུ་ཏེ་ན, ས་ཎྷེ་ན ཝ་ཀྑཱ་མི ནོ ཕ་རུ་སེ་ན, ཨ་ཏྠ་སཾ་ཧི་ཏེ་ན ཝ་ཀྑཱ་མི ནོ ཨ་ན་ཏྠ་སཾ་ཧི་ཏེ་ན, མེ་ཏྟཱ་ཙི་ཏྟོ ཝ་ཀྑཱ་མི ནོ དོ་ས་ནྟ་རོ་ཏི – ཙོ་ད་ནཱ་ཡ ཨི་མཱ པ་ཉྩ བྷཱུ་མི་ཡོ.
ཀ་ཏ་མེ་ཧི དྭཱི་ཧཱ་ཀཱ་རེ་ཧི ཙོ་དེ་ཏི? ཀཱ་ཡེ་ན ཝཱ ཙོ་དེ་ཏི ཝཱ་ཙཱ་ཡ ཝཱ ཙོ་དེ་ཏི – ཨི་མེ་ཧི དྭཱི་ཧཱ་ཀཱ་རེ་ཧི ཙོ་དེ་ཏི.