ཙོ་ད་ནཱ་ཀ་ཎྜཾ

༡. ཨ་ནུ་ཝི་ཛྫ་ཀ་ཨ་ནུ་ཡོ་གོ

༣༦༠. ཨ་ནུ་ཝི་ཛྫ་ཀེ ཙོ་ད་ཀོ པུ་ཙྪི་ཏ་བྦོ – ‘‘ཡཾ ཁོ ཏྭཾ, ཨཱ་ཝུ་སོ, ཨི་མཾ བྷི་ཀྑུཾ ཙོ་དེ་སི, ཀི་མྷི ནཾ ཙོ་དེ་སི, སཱི་ལ་ཝི་པ་ཏྟི་ཡཱ ཝཱ ཙོ་དེ་སི, ཨཱ་ཙཱ་ར་ཝི་པ་ཏྟི་ཡཱ ཝཱ ཙོ་དེ་སི, དི་ཊྛི་ཝི་པ་ཏྟི་ཡཱ ཝཱ ཙོ་དེ་སཱི’’ཏི? སོ ཙེ ཨེ་ཝཾ ཝ་དེ་ཡྻ – ‘‘སཱི་ལ་ཝི་པ་ཏྟི་ཡཱ ཝཱ ཙོ་དེ་མི, ཨཱ་ཙཱ་ར་ཝི་པ་ཏྟི་ཡཱ ཝཱ ཙོ་དེ་མི, དི་ཊྛི་ཝི་པ་ཏྟི་ཡཱ ཝཱ ཙོ་དེ་མཱི’’ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘‘ཛཱ་ནཱ་སི པ་ནཱ་ཡ་སྨཱ སཱི་ལ་ཝི་པ་ཏྟིཾ, ཛཱ་ནཱ་སི ཨཱ་ཙཱ་ར་ཝི་པ་ཏྟིཾ, ཛཱ་ནཱ་སི དི་ཊྛི་ཝི་པ་ཏྟི’’ནྟི? སོ ཙེ ཨེ་ཝཾ ཝ་དེ་ཡྻ – ‘‘ཛཱ་ནཱ་མི ཁོ ཨ་ཧཾ, ཨཱ་ཝུ་སོ, སཱི་ལ་ཝི་པ་ཏྟིཾ, ཛཱ་ནཱ་མི ཨཱ་ཙཱ་ར་ཝི་པ་ཏྟིཾ, ཛཱ་ནཱ་མི དི་ཊྛི་ཝི་པ་ཏྟི’’ནྟི, སོ ཨེ་ཝ་མ་སྶ ཝ་ཙ་ནཱི་ཡོ – ‘‘ཀ་ཏ་མཱ པ་ནཱ་ཝུ་སོ, སཱི་ལ་ཝི་པ་ཏྟི? ཀ་ཏ་མཱ ཨཱ་ཙཱ་ར་ཝི་པ་ཏྟི? ཀ་ཏ་མཱ དི་ཊྛི་ཝི་པ་ཏྟཱི’’ཏི? སོ ཙེ ཨེ་ཝཾ ཝ་དེ་ཡྻ – ‘‘ཙ་ཏྟཱ་རི ཙ པཱ་རཱ་ཛི་ཀཱ་ནི, ཏེ་ར་ས ཙ ས་ངྒྷཱ་དི་སེ་སཱ – ཨ་ཡཾ སཱི་ལ་ཝི་པ་ཏྟི. ཐུ་ལླ་ཙྩ་ཡཾ, པཱ་ཙི་ཏྟི་ཡཾ, པཱ་ཊི་དེ་ས་ནཱི་ཡཾ, དུ་ཀྐ་ཊཾ, དུ་བྦྷཱ་སི་ཏཾ, ཨ་ཡཾ ཨཱ་ཙཱ་ར་ཝི་པ་ཏྟི. མི་ཙྪཱ་དི་ཊྛི, ཨ་ནྟ་གྒཱ་ཧི་ཀཱ དི་ཊྛི – ཨ་ཡཾ དི་ཊྛི་ཝི་པ་ཏྟཱི’’ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘‘ཡཾ ཁོ ཏྭཾ, ཨཱ་ཝུ་སོ, ཨི་མཾ བྷི་ཀྑུཾ ཙོ་དེ་སི, དི་ཊྛེ་ན ཝཱ ཙོ་དེ་སི སུ་ཏེ་ན ཝཱ ཙོ་དེ་སི པ་རི་ས་ངྐཱ་ཡ ཝཱ ཙོ་དེ་སཱི’’ཏི? སོ ཙེ ཨེ་ཝཾ ཝ་དེ་ཡྻ – ‘‘དི་ཊྛེ་ན ཝཱ ཙོ་དེ་མི སུ་ཏེ་ན ཝཱ ཙོ་དེ་མི པ་རི་ས་ངྐཱ་ཡ ཝཱ ཙོ་དེ་མཱི’’ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘‘ཡཾ ཁོ ཏྭཾ, ཨཱ་ཝུ་སོ, ཨི་མཾ བྷི་ཀྑུཾ དི་ཊྛེ་ན ཙོ་དེ་སི, ཀིཾ ཏེ དི་ཊྛཾ ཀི་ནྟི ཏེ དི་ཊྛཾ, ཀ་དཱ ཏེ དི་ཊྛཾ, ཀ་ཏྠ ཏེ དི་ཊྛཾ པཱ་རཱ་ཛི་ཀཾ ཨ་ཛ྄ཛྷཱ་པ་ཛྫ་ནྟོ དི་ཊྛོ, ས་ངྒྷཱ་དི་སེ་སཾ ཨ་ཛ྄ཛྷཱ་པ་ཛྫ་ནྟོ དི་ཊྛོ, ཐུ་ལླ་ཙྩ་ཡཾ… པཱ་ཙི་ཏྟི་ཡཾ… པཱ་ཊི་དེ་ས་ནཱི་ཡཾ… དུ་ཀྐ་ཊཾ… དུ་བྦྷཱ་སི་ཏཾ ཨ་ཛ྄ཛྷཱ་པ་ཛྫ་ནྟོ དི་ཊྛོ, ཀ་ཏྠ ཙ ཏྭཾ ཨ་ཧོ་སི, ཀ་ཏྠ ཙཱ་ཡཾ བྷི་ཀྑུ ཨ་ཧོ་སི, ཀི་ཉྩ ཏྭཾ ཀ་རོ་སི, ཀིཾ ཙཱ་ཡཾ བྷི་ཀྑུ ཀ་རོ་ཏཱི’’ཏི? སོ ཙེ ཨེ་ཝཾ ཝ་དེ་ཡྻ – ‘‘ན ཁོ ཨ་ཧཾ, ཨཱ་ཝུ་སོ, ཨི་མཾ བྷི་ཀྑུཾ དི་ཊྛེ་ན ཙོ་དེ་མི, ཨ་པི ཙ སུ་ཏེ་ན ཙོ་དེ་མཱི’’ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘‘ཡཾ ཁོ ཏྭཾ, ཨཱ་ཝུ་སོ, ཨི་མཾ བྷི་ཀྑུཾ སུ་ཏེ་ན ཙོ་དེ་སི, ཀིཾ ཏེ སུ་ཏཾ, ཀི་ནྟི ཏེ སུ་ཏཾ, ཀ་དཱ ཏེ སུ་ཏཾ, ཀ་ཏྠ ཏེ སུ་ཏཾ, པཱ་རཱ་ཛི་ཀཾ ཨ་ཛ྄ཛྷཱ་པ་ནྣོ་ཏི སུ་ཏཾ, ས་ངྒྷཱ་དི་སེ་སཾ… ཐུ་ལླ་ཙྩ་ཡཾ… པཱ་ཙི་ཏྟི་ཡཾ… པཱ་ཊི་དེ་ས་ནཱི་ཡཾ… དུ་ཀྐ་ཊཾ… དུ་བྦྷཱ་སི་ཏཾ ཨ་ཛ྄ཛྷཱ་པ་ནྣོ་ཏི སུ་ཏཾ, བྷི་ཀྑུ་སྶ སུ་ཏཾ, བྷི་ཀྑུ་ནི་ཡཱ སུ་ཏཾ, སི་ཀྑ་མཱ་ནཱ་ཡ སུ་ཏཾ, སཱ་མ་ཎེ་ར་སྶ སུ་ཏཾ, སཱ་མ་ཎེ་རི་ཡཱ སུ་ཏཾ, ཨུ་པཱ་ས་ཀ་སྶ སུ་ཏཾ, ཨུ་པཱ་སི་ཀཱ་ཡ སུ་ཏཾ, རཱ་ཛཱུ་ནཾ སུ་ཏཾ, རཱ་ཛ་མ་ཧཱ་མ་ཏྟཱ་ནཾ སུ་ཏཾ, ཏི་ཏྠི་ཡཱ་ནཾ སུ་ཏཾ, ཏི་ཏྠི་ཡ་སཱ་ཝ་ཀཱ་ནཾ སུ་ཏ’’ནྟི? སོ ཙེ ཨེ་ཝཾ ཝ་དེ་ཡྻ – ‘‘ན ཁོ ཨ་ཧཾ, ཨཱ་ཝུ་སོ, ཨི་མཾ བྷི་ཀྑུཾ སུ་ཏེ་ན ཙོ་དེ་མི, ཨ་པི ཙ པ་རི་ས་ངྐཱ་ཡ ཙོ་དེ་མཱི’’ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘‘ཡཾ ཁོ ཏྭཾ, ཨཱ་ཝུ་སོ, ཨི་མཾ བྷི་ཀྑུཾ པ་རི་ས་ངྐཱ་ཡ ཙོ་དེ་སི, ཀིཾ པ་རི་ས་ངྐ་སི, ཀི་ནྟི པ་རི་ས་ངྐ་སི, ཀ་དཱ པ་རི་ས་ངྐ་སི, ཀ་ཏྠ པ་རི་ས་ངྐ་སི, པཱ་རཱ་ཛི་ཀཾ ཨ་ཛ྄ཛྷཱ་པ་ནྣོ་ཏི པ་རི་ས་ངྐ་སི, ས་ངྒྷཱ་དི་སེ་སཾ ཨ་ཛ྄ཛྷཱ་པ་ནྣོ་ཏི པ་རི་ས་ངྐ་སི, ཐུ་ལླ་ཙྩ་ཡཾ… པཱ་ཙི་ཏྟི་ཡཾ… པཱ་ཊི་དེ་ས་ནཱི་ཡཾ… དུ་ཀྐ་ཊཾ… དུ་བྦྷཱ་སི་ཏཾ ཨ་ཛ྄ཛྷཱ་པ་ནྣོ་ཏི པ་རི་ས་ངྐ་སི, བྷི་ཀྑུ་སྶ སུ་ཏྭཱ པ་རི་ས་ངྐ་སི, བྷི་ཀྑུ་ནི་ཡཱ སུ་ཏྭཱ པ་རི་ས་ངྐ་སི, སི་ཀྑ་མཱ་ནཱ་ཡ སུ་ཏྭཱ པ་རི་ས་ངྐ་སི, སཱ་མ་ཎེ་ར་སྶ སུ་ཏྭཱ པ་རི་ས་ངྐ་སི, སཱ་མ་ཎེ་རི་ཡཱ སུ་ཏྭཱ པ་རི་ས་ངྐ་སི, ཨུ་པཱ་ས་ཀ་སྶ སུ་ཏྭཱ པ་རི་ས་ངྐ་སི, ཨུ་པཱ་སི་ཀཱ་ཡ སུ་ཏྭཱ པ་རི་ས་ངྐ་སི, རཱ་ཛཱུ་ནཾ སུ་ཏྭཱ པ་རི་ས་ངྐ་སི, རཱ་ཛ་མ་ཧཱ་མ་ཏྟཱ་ནཾ སུ་ཏྭཱ པ་རི་ས་ངྐ་སི, ཏི་ཏྠི་ཡཱ་ནཾ སུ་ཏྭཱ པ་རི་ས་ངྐ་སི, ཏི་ཏྠི་ཡ་སཱ་ཝ་ཀཱ་ནཾ སུ་ཏྭཱ པ་རི་ས་ངྐ་སཱི’’ཏི?

༣༦༡. དི་ཊྛཾ དི་ཊྛེ་ན ས་མེ་ཏི དི་ཊྛེ་ན སཾ་ས་ནྡ་ཏེ དི་ཊྛཾ;

དི་ཊྛཾ པ་ཊི་ཙྩ ན ཨུ་པེ་ཏི ཨ་སུ་དྡྷ་པ་རི་ས་ངྐི་ཏོ;

སོ པུ་གྒ་ལོ པ་ཊི་ཉྙཱ་ཡ ཀཱ་ཏ་བྦོ ཏེ་ནུ་པོ་ས་ཐོ.

སུ་ཏཾ སུ་ཏེ་ན ས་མེ་ཏི སུ་ཏེ་ན སཾ་ས་ནྡ་ཏེ སུ་ཏཾ;

སུ་ཏཾ པ་ཊི་ཙྩ ན ཨུ་པེ་ཏི ཨ་སུ་དྡྷ་པ་རི་ས་ངྐི་ཏོ;

སོ པུ་གྒ་ལོ པ་ཊི་ཉྙཱ་ཡ ཀཱ་ཏ་བྦོ ཏེ་ནུ་པོ་ས་ཐོ.

མུ་ཏཾ མུ་ཏེ་ན ས་མེ་ཏི མུ་ཏེ་ན སཾ་ས་ནྡ་ཏེ མུ་ཏཾ;

མུ་ཏཾ པ་ཊི་ཙྩ ན ཨུ་པེ་ཏི ཨ་སུ་དྡྷ་པ་རི་ས་ངྐི་ཏོ;

སོ པུ་གྒ་ལོ པ་ཊི་ཉྙཱ་ཡ ཀཱ་ཏ་བྦོ ཏེ་ནུ་པོ་ས་ཐོ.

༣༦༢. ཙོ་ད་ནཱ་ཡ ཀོ ཨཱ་དི, ཀིཾ མ་ཛ྄ཛྷེ, ཀིཾ པ་རི་ཡོ་སཱ་ནཾ? ཙོ་ད་ནཱ་ཡ ཨོ་ཀཱ་ས་ཀ་མྨཾ ཨཱ་དི, ཀི་རི་ཡཱ མ་ཛ྄ཛྷེ, ས་མ་ཐོ པ་རི་ཡོ་སཱ་ནཾ. ཙོ་ད་ནཱ་ཡ ཀ་ཏི མཱུ་ལཱ་ནི, ཀ་ཏི ཝ་ཏྠཱུ་ནི, ཀ་ཏི བྷཱུ་མི་ཡོ, ཀ་ཏི་ཧཱ་ཀཱ་རེ་ཧི ཙོ་དེ་ཏི? ཙོ་ད་ནཱ་ཡ དྭེ མཱུ་ལཱ་ནི, ཏཱི་ཎི ཝ་ཏྠཱུ་ནི, པ་ཉྩ བྷཱུ་མི་ཡོ, དྭཱི་ཧཱ་ཀཱ་རེ་ཧི ཙོ་དེ་ཏི. ཙོ་ད་ནཱ་ཡ ཀ་ཏ་མཱ་ནི དྭེ མཱུ་ལཱ་ནི? ས་མཱུ་ལི་ཀཱ ཝཱ ཨ་མཱུ་ལི་ཀཱ ཝཱ – ཙོ་ད་ནཱ་ཡ ཨི་མཱ་ནི དྭེ མཱུ་ལཱ་ནི. ཙོ་ད་ནཱ་ཡ ཀ་ཏ་མཱ་ནི ཏཱི་ཎི ཝ་ཏྠཱུ་ནི? དི་ཊྛེ་ན སུ་ཏེ་ན པ་རི་ས་ངྐཱ་ཡ – ཙོ་ད་ནཱ་ཡ ཨི་མཱ་ནི ཏཱི་ཎི ཝ་ཏྠཱུ་ནི. ཙོ་ད་ནཱ ཀ་ཏ་མཱ པ་ཉྩ བྷཱུ་མི་ཡོ? ཀཱ་ལེ་ན ཝ་ཀྑཱ་མི ནོ ཨ་ཀཱ་ལེ་ན, བྷཱུ་ཏེ་ན ཝ་ཀྑཱ་མི ནོ ཨ་བྷཱུ་ཏེ་ན, ས་ཎྷེ་ན ཝ་ཀྑཱ་མི ནོ ཕ་རུ་སེ་ན, ཨ་ཏྠ་སཾ་ཧི་ཏེ་ན ཝ་ཀྑཱ་མི ནོ ཨ་ན་ཏྠ་སཾ་ཧི་ཏེ་ན, མེ་ཏྟཱ་ཙི་ཏྟོ ཝ་ཀྑཱ་མི ནོ དོ་ས་ནྟ་རོ་ཏི – ཙོ་ད་ནཱ་ཡ ཨི་མཱ པ་ཉྩ བྷཱུ་མི་ཡོ.

ཀ་ཏ་མེ་ཧི དྭཱི་ཧཱ་ཀཱ་རེ་ཧི ཙོ་དེ་ཏི? ཀཱ་ཡེ་ན ཝཱ ཙོ་དེ་ཏི ཝཱ་ཙཱ་ཡ ཝཱ ཙོ་དེ་ཏི – ཨི་མེ་ཧི དྭཱི་ཧཱ་ཀཱ་རེ་ཧི ཙོ་དེ་ཏི.

༢. ཙོ་ད་ཀཱ་དི་པ་ཊི་པ་ཏྟི

༣༦༣. ཙོ་ད་ཀེ་ན ཀ་ཐཾ པ་ཊི་པ་ཛྫི་ཏ་བྦཾ? ཙུ་དི་ཏ་ཀེ་ན ཀ་ཐཾ པ་ཊི་པ་ཛྫི་ཏ་བྦཾ? ས་ངྒྷེ་ན ཀ་ཐཾ པ་ཊི་པ་ཛྫི་ཏ་བྦཾ? ཨ་ནུ་ཝི་ཛྫ་ཀེ་ན ཀ་ཐཾ པ་ཊི་པ་ཛྫི་ཏ་བྦཾ? ཙོ་ད་ཀེ་ན ཀ་ཐཾ པ་ཊི་པ་ཛྫི་ཏ་བྦ་ནྟི? ཙོ་ད་ཀེ་ན པ་ཉྩ་སུ དྷ་མྨེ་སུ པ་ཏི་ཊྛཱ་ཡ པ་རོ ཙོ་དེ་ཏ་བྦོ. ཀཱ་ལེ་ན ཝ་ཀྑཱ་མི ནོ ཨ་ཀཱ་ལེ་ན, བྷཱུ་ཏེ་ན ཝ་ཀྑཱ་མི ནོ ཨ་བྷཱུ་ཏེ་ན, ས་ཎྷེ་ན ཝ་ཀྑཱ་མི ནོ ཕ་རུ་སེ་ན, ཨ་ཏྠ་སཾ་ཧི་ཏེ་ན ཝ་ཀྑཱ་མི ནོ ཨ་ན་ཏྠ་སཾ་ཧི་ཏེ་ན, མེ་ཏྟཱ་ཙི་ཏྟོ ཝ་ཀྑཱ་མི ནོ དོ་ས་ནྟ་རོ་ཏི – ཙོ་ད་ཀེ་ན ཨེ་ཝཾ པ་ཊི་པ་ཛྫི་ཏ་བྦཾ. ཙུ་དི་ཏ་ཀེ་ན ཀ་ཐཾ པ་ཊི་པ་ཛྫི་ཏ་བྦ་ནྟི? ཙུ་དི་ཏ་ཀེ་ན དྭཱི་སུ དྷ་མྨེ་སུ པ་ཊི་པ་ཛྫི་ཏ་བྦཾ. ས་ཙྩེ ཙ ཨ་ཀུ་པྤེ ཙ – ཙུ་དི་ཏ་ཀེ་ན ཨེ་ཝཾ པ་ཊི་པ་ཛྫི་ཏ་བྦཾ. ས་ངྒྷེ་ན ཀ་ཐཾ པ་ཊི་པ་ཛྫི་ཏ་བྦ་ནྟི? ས་ངྒྷེ་ན ཨོ་ཏི་ཎྞཱ་ནོ་ཏི་ཎྞཾ ཛཱ་ནི་ཏ་བྦཾ. ས་ངྒྷེ་ན ཨེ་ཝཾ པ་ཊི་པ་ཛྫི་ཏ་བྦཾ. ཨ་ནུ་ཝི་ཛྫ་ཀེ་ན ཀ་ཐཾ པ་ཊི་པ་ཛྫི་ཏ་བྦ་ནྟི? ཨ་ནུ་ཝི་ཛྫ་ཀེ་ན ཡེ་ན དྷ་མྨེ་ན ཡེ་ན ཝི་ན་ཡེ་ན ཡེ་ན ས་ཏྠུ་སཱ་ས་ནེ་ན ཏཾ ཨ་དྷི་ཀ་ར་ཎཾ ཝཱུ་པ་ས་མྨ་ཏི ཏ་ཐཱ ཏཾ ཨ་དྷི་ཀ་ར་ཎཾ ཝཱུ་པ་ས་མེ་ཏ་བྦཾ. ཨ་ནུ་ཝི་ཛྫ་ཀེ་ན ཨེ་ཝཾ པ་ཊི་པ་ཛྫི་ཏ་བྦཾ.

༣༦༤. ཨུ་པོ་ས་ཐོ ཀི་མ་ཏྠཱ་ཡ, པ་ཝཱ་ར་ཎཱ ཀི་སྶ ཀཱ་ར་ཎཱ;

པ་རི་ཝཱ་སོ ཀི་མ་ཏྠཱ་ཡ, མཱུ་ལཱ་ཡ་པ་ཊི་ཀ་སྶ་ནཱ ཀི་སྶ ཀཱ་ར་ཎཱ;

མཱ་ན་ཏྟཾ ཀི་མ་ཏྠཱ་ཡ, ཨ་བྦྷཱ་ནཾ ཀི་སྶ ཀཱ་ར་ཎཱ.

ཨུ་པོ་ས་ཐོ སཱ་མ་གྒ་ཏྠཱ་ཡ, ཝི་སུ་དྡྷ་ཏྠཱ་ཡ པ་ཝཱ་ར་ཎཱ;

པ་རི་ཝཱ་སོ མཱ་ན་ཏྟ་ཏྠཱ་ཡ, མཱུ་ལཱ་ཡ་པ་ཊི་ཀ་སྶ་ནཱ ནི་གྒ་ཧ་ཏྠཱ་ཡ;

མཱ་ན་ཏྟཾ ཨ་བྦྷཱ་ན་ཏྠཱ་ཡ, ཝི་སུ་དྡྷ་ཏྠཱ་ཡ ཨ་བྦྷཱ་ནཾ.

ཚ་ནྡཱ དོ་སཱ བྷ་ཡཱ མོ་ཧཱ, ཐེ་རེ ཙ པ་རི་བྷཱ་ས་ཏི;

ཀཱ་ཡ་སྶ བྷེ་དཱ དུ་པྤ་ཉྙོ, ཁ་ཏོ ཨུ་པ་ཧ་ཏི་ནྡྲི་ཡོ;

ནི་ར་ཡཾ ག་ཙྪ་ཏི དུ་མྨེ་དྷོ, ན ཙ སི་ཀྑཱ་ཡ གཱ་ར་ཝོ.

ན ཙ ཨཱ་མི་སཾ ནི་སྶཱ་ཡ;

ན ཙ ནི་སྶཱ་ཡ པུ་གྒ་ལཾ;

ཨུ་བྷོ ཨེ་ཏེ ཝི་ཝ་ཛྫེ་ཏྭཱ;

ཡ་ཐཱ་དྷ་མྨོ ཏ་ཐཱ ཀ་རེ.