ཙཱུ་ལ༹་ས་ངྒཱ་མོ
༡. ཨ་ནུ་ཝི་ཛྫ་ཀ་སྶ་པ་ཊི་པ་ཏྟི
༣༦༥. [པ་རི. ༤༢༡] ས་ངྒཱ་མཱ་ཝ་ཙ་རེ བྷི་ཀྑུ་ནཱ ས་ངྒྷཾ ཨུ་པ་ས་ངྐ་མ་ནྟེ་ན ནཱི་ཙ་ཙི་ཏྟེ་ན ས་ངྒྷོ ཨུ་པ་ས་ངྐ་མི་ཏ་བྦོ ར་ཛོ་ཧ་ར་ཎ་ས་མེ་ན ཙི་ཏྟེ་ན; ཨཱ་ས་ན་ཀུ་ས་ལེ་ན བྷ་ཝི་ཏ་བྦཾ ནི་ས་ཛྫ་ཀུ་ས་ལེ་ན; ཐེ་རེ བྷི་ཀྑཱུ ཨ་ནུ་པ་ཁ་ཛྫ་ནྟེ་ན, ན་ཝེ བྷི་ཀྑཱུ ཨཱ་ས་ནེ་ན ཨ་པྤ་ཊི་བཱ་ཧ་ནྟེ་ན, ཡ་ཐཱ་པ་ཏི་རཱུ་པེ ཨཱ་ས་ནེ ནི་སཱི་དི་ཏ་བྦཾ; ཨ་ནཱ་ནཱ་ཀ་ཐི་ཀེ་ན བྷ་ཝི་ཏ་བྦཾ ཨ་ཏི་ར་ཙྪཱ་ན་ཀ་ཐི་ཀེ་ན; སཱ་མཾ ཝཱ དྷ་མྨོ བྷཱ་སི་ཏ་བྦོ པ་རོ ཝཱ ཨ་ཛ྄ཛྷེ་སི་ཏ་བྦོ ཨ་རི་ཡོ ཝཱ ཏུ་ཎྷཱི་བྷཱ་ཝོ ནཱ་ཏི་མ་ཉྙི་ཏ་བྦོ.
ས་ངྒྷེ་ན ཨ་ནུ་མ་ཏེ་ན པུ་གྒ་ལེ་ན ཨ་ནུ་ཝི་ཛྫ་ཀེ་ན ཨ་ནུ་ཝི་ཛྫི་ཏུ་ཀཱ་མེ་ན ན ཨུ་པ་ཛ྄ཛྷཱ་ཡོ པུ་ཙྪི་ཏ་བྦོ, ན ཨཱ་ཙ་རི་ཡོ པུ་ཙྪི་ཏ་བྦོ, ན ས་དྡྷི་ཝི་ཧཱ་རི་ཀོ པུ་ཙྪི་ཏ་བྦོ, ན ཨ་ནྟེ་ཝཱ་སི་ཀོ པུ་ཙྪི་ཏ་བྦོ, ན ས་མཱ་ནུ་པ་ཛ྄ཛྷཱ་ཡ་ཀོ པུ་ཙྪི་ཏ་བྦོ, ན ས་མཱ་ནཱ་ཙ་རི་ཡ་ཀོ པུ་ཙྪི་ཏ་བྦོ, ན ཛཱ་ཏི པུ་ཙྪི་ཏ་བྦཱ, ན ནཱ་མཾ པུ་ཙྪི་ཏ་བྦཾ, ན གོ་ཏྟཾ པུ་ཙྪི་ཏ་བྦཾ, ན ཨཱ་ག་མོ པུ་ཙྪི་ཏ་བྦོ, ན ཀུ་ལ་པ་དེ་སོ པུ་ཙྪི་ཏ་བྦོ, ན ཛཱ་ཏི་བྷཱུ་མི པུ་ཙྪི་ཏ་བྦཱ. ཏཾ ཀིཾ ཀཱ་ར་ཎཱ? ཨ་ཏྲ་སྶ པེ་མཾ ཝཱ དོ་སོ ཝཱ. པེ་མེ ཝཱ ས་ཏི དོ་སེ ཝཱ, ཚ་ནྡཱ་པི ག་ཙྪེ་ཡྻ དོ་སཱ་པི ག་ཙྪེ་ཡྻ མོ་ཧཱ་པི ག་ཙྪེ་ཡྻ བྷ་ཡཱ་པི ག་ཙྪེ་ཡྻ.
ས་ངྒྷེ་ན ཨ་ནུ་མ་ཏེ་ན པུ་གྒ་ལེ་ན ཨ་ནུ་ཝི་ཛྫ་ཀེ་ན ཨ་ནུ་ཝི་ཛྫི་ཏུ་ཀཱ་མེ་ན ས་ངྒྷ་ག་རུ་ཀེ་ན བྷ་ཝི་ཏ་བྦཾ ནོ པུ་གྒ་ལ་ག་རུ་ཀེ་ན, ས་དྡྷ་མྨ་ག་རུ་ཀེ་ན བྷ་ཝི་ཏ་བྦཾ ནོ ཨཱ་མི་ས་ག་རུ་ཀེ་ན, ཨ་ཏྠ་ཝ་སི་ཀེ་ན བྷ་ཝི་ཏ་བྦཾ ནོ པ་རི་ས་ཀ་པྤི་ཀེ་ན, ཀཱ་ལེ་ན ཨ་ནུ་ཝི་ཛྫི་ཏ་བྦཾ ནོ ཨ་ཀཱ་ལེ་ན, བྷཱུ་ཏེ་ན ཨ་ནུ་ཝི་ཛྫི་ཏ་བྦཾ ནོ ཨ་བྷཱུ་ཏེ་ན, ས་ཎྷེ་ན ཨ་ནུ་ཝི་ཛྫི་ཏ་བྦཾ ནོ ཕ་རུ་སེ་ན, ཨ་ཏྠ་སཾ་ཧི་ཏེ་ན ཨ་ནུ་ཝི་ཛྫི་ཏ་བྦཾ ནོ ཨ་ན་ཏྠ་སཾ་ཧི་ཏེ་ན, མེ་ཏྟཱ་ཙི་ཏྟེ་ན ཨ་ནུ་ཝི་ཛྫི་ཏ་བྦཾ ནོ དོ་ས་ནྟ་རེ་ན, ན ཨུ་པ་ཀ་ཎྞ་ཀ་ཛ་པྤི་ནཱ བྷ་ཝི་ཏ་བྦཾ, ན ཛི་མྷཾ པེ་ཀྑི་ཏ་བྦཾ, ན ཨ་ཀྑི ནི་ཁ་ཎི་ཏ་བྦཾ, ན བྷ་མུ་ཀཾ ཨུ་ཀྑི་པི་ཏ་བྦཾ, ན སཱི་སཾ ཨུ་ཀྑི་པི་ཏ་བྦཾ, ན ཧ་ཏྠ་ཝི་ཀཱ་རོ ཀཱ་ཏ་བྦོ, ན ཧ་ཏྠ་མུ་དྡཱ ད་སྶེ་ཏ་བྦཱ.
ཨཱ་ས་ན་ཀུ་ས་ལེ་ན བྷ་ཝི་ཏ་བྦཾ ནི་ས་ཛྫ་ཀུ་ས་ལེ་ན, ཡུ་ག་མ་ཏྟཾ པེ་ཀྑ་ནྟེ་ན ཨ་ཏྠཾ ཨ་ནུ་ཝི་དྷི་ཡ་ནྟེ་ན ས་ཀེ ཨཱ་ས་ནེ ནི་སཱི་དི་ཏ་བྦཾ, ན ཙ ཨཱ་ས་ནཱ ཝུ་ཊྛཱ་ཏ་བྦཾ, ན ཝཱི་ཏི་ཧཱ་ཏ་བྦཾ, ན ཀུ་མྨ་གྒོ སེ་ཝི་ཏ་བྦོ, ན བཱ་ཧཱ་ཝི་ཀྑེ་པ་ཀཾ [ན ཝཱ་ཙཱ ཝི་ཀྑེ་པ་ཀཾ (སྱཱ.)] བྷ་ཎི་ཏ་བྦཾ, ཨ་ཏུ་རི་ཏེ་ན བྷ་ཝི་ཏ་བྦཾ ཨ་སཱ་ཧ་སི་ཀེ་ན, ཨ་ཙ་ཎྜི་ཀ་ཏེ་ན བྷ་ཝི་ཏ་བྦཾ ཝ་ཙ་ན་ཀྑ་མེ, མེ་ཏྟཱ་ཙི་ཏྟེ་ན བྷ་ཝི་ཏ་བྦཾ ཧི་ཏཱ་ནུ་ཀ་མྤི་ནཱ, ཀཱ་རུ་ཎི་ཀེ་ན བྷ་ཝི་ཏ་བྦཾ ཧི་ཏ་པ་རི་ས་ཀྐི་ནཱ, ཨ་ས་མྥ་པྤ་ལཱ་པི་ནཱ བྷ་ཝི་ཏ་བྦཾ པ་རི་ཡ་ནྟ་བྷཱ་ཎི་ནཱ, ཨ་ཝེ་ར་ཝ་སི་ཀེ་ན བྷ་ཝི་ཏ་བྦཾ ཨ་ན་སུ་རུ་ཏྟེ་ན, ཨ་ཏྟཱ པ་རི་གྒ་ཧེ་ཏ་བྦོ, པ་རོ པ་རི་གྒ་ཧེ་ཏ་བྦོ, ཙོ་ད་ཀོ པ་རི་གྒ་ཧེ་ཏ་བྦོ, ཙུ་དི་ཏ་ཀོ པ་རི་གྒ་ཧེ་ཏ་བྦོ, ཨ་དྷ་མྨ་ཙོ་ད་ཀོ པ་རི་གྒ་ཧེ་ཏ་བྦོ, ཨ་དྷ་མྨ་ཙུ་དི་ཏ་ཀོ པ་རི་གྒ་ཧེ་ཏ་བྦོ, དྷ་མྨ་ཙོ་ད་ཀོ པ་རི་གྒ་ཧེ་ཏ་བྦོ, དྷ་མྨ་ཙུ་དི་ཏ་ཀོ པ་རི་གྒ་ཧེ་ཏ་བྦོ, ཝུ་ཏྟཾ ཨ་ཧཱ་པེ་ནྟེ་ན ཨ་ཝུ་ཏྟཾ ཨ་པ་ཀཱ་སེ་ནྟེ་ན ཨོ་ཏི་ཎྞཱ་ནི པ་ད་བྱ་ཉྫ་ནཱ་ནི སཱ་དྷུ་ཀཾ པ་རི་གྒ་ཧེ་ཏྭཱ པ་རོ པ་ཊི་པུ་ཙྪི་ཏྭཱ ཡ་ཐཱ པ་ཊི་ཉྙཱ་ཡ ཀཱ་རེ་ཏ་བྦོ, མ་ནྡོ ཧཱ་སེ་ཏ་བྦོ [ཝེ་པོ པ་ཧཱ་སེ་ཏ་བྦོ (སྱཱ.)], བྷཱི་རཱུ ཨ་སྶཱ་སེ་ཏ་བྦོ, ཙ་ཎྜོ ནི་སེ་དྷེ་ཏ་བྦོ, ཨ་སུ་ཙི ཝི་བྷཱ་ཝེ་ཏ་བྦོ, ཨུ་ཛུ་མ་དྡ་ཝེ་ན ན ཚ་ནྡཱ་ག་ཏིཾ ག་ནྟ་བྦཾ, ན དོ་སཱ་ག་ཏིཾ ག་ནྟ་བྦཾ, ན མོ་ཧཱ་ག་ཏིཾ ག་ནྟ་བྦཾ, ན བྷ་ཡཱ་ག་ཏིཾ ག་ནྟ་བྦཾ, མ་ཛ྄ཛྷ་ཏྟེ་ན བྷ་ཝི་ཏ་བྦཾ དྷ་མྨེ་སུ ཙ པུ་གྒ་ལེ་སུ ཙ. ཨེ་ཝ་ཉྩ པ་ན ཨ་ནུ་ཝི་ཛྫ་ཀོ ཨ་ནུ་ཝི་ཛྫ་མཱ་ནོ ས་ཏྠུ ཙེ་ཝ སཱ་ས་ན་ཀ་རོ ཧོ་ཏི, ཝི་ཉྙཱུ་ན་ཉྩ ས་བྲ་ཧྨ་ཙཱ་རཱི་ནཾ པི་ཡོ ཙ ཧོ་ཏི མ་ནཱ་པོ ཙ ག་རུ ཙ བྷཱ་ཝ་ནཱི་ཡོ ཙ.
༣༦༦. སུ་ཏྟཾ སཾ་ས་ནྡ་ན་ཏྠཱ་ཡ, ཨོ་པ་མྨཾ ནི་ད་སྶ་ན་ཏྠཱ་ཡ, ཨ་ཏྠོ ཝི་ཉྙཱ་པ་ན་ཏྠཱ་ཡ, པ་ཊི་པུ་ཙྪཱ ཋ་པ་ན་ཏྠཱ་ཡ, ཨོ་ཀཱ་ས་ཀ་མྨཾ ཙོ་ད་ན་ཏྠཱ་ཡ, ཙོ་ད་ནཱ སཱ་ར་ཎ་ཏྠཱ་ཡ, སཱ་ར་ཎཱ ས་ཝ་ཙ་ནཱི་ཡ་ཏྠཱ་ཡ, ས་ཝ་ཙ་ནཱི་ཡཾ པ་ལི་བོ་དྷ་ཏྠཱ་ཡ, པ་ལི་བོ་དྷོ ཝི་ནི་ཙྪ་ཡ་ཏྠཱ་ཡ, ཝི་ནི་ཙྪ་ཡོ ས་ནྟཱི་ར་ཎ་ཏྠཱ་ཡ, ས་ནྟཱི་ར་ཎཾ ཋཱ་ནཱ་ཋཱ་ན་ག་མ་ན་ཏྠཱ་ཡ, ཋཱ་ནཱ་ཋཱ་ན་ག་མ་ནཾ དུ་མྨ་ངྐཱུ་ནཾ པུ་གྒ་ལཱ་ནཾ ནི་གྒ་ཧ་ཏྠཱ་ཡ, པེ་ས་ལཱ་ནཾ བྷི་ཀྑཱུ་ནཾ ས་མྤ་གྒ་ཧ་ཏྠཱ་ཡ, ས་ངྒྷོ ས་མྤ་རི་གྒ་ཧ་ས་མྤ་ཊི་ཙྪ་ན་ཏྠཱ་ཡ, ས་ངྒྷེ་ན ཨ་ནུ་མ་ཏཱ པུ་གྒ་ལཱ པ་ཙྩེ་ཀ་ཊྛཱ་ཡི་ནོ ཨ་ཝི་སཾ་ཝཱ་ད་ཀ་ཊྛཱ་ཡི་ནོ.
ཝི་ན་ཡོ སཾ་ཝ་ར་ཏྠཱ་ཡ, སཾ་ཝ་རོ ཨ་ཝི་པྤ་ཊི་སཱ་ར་ཏྠཱ་ཡ, ཨ་ཝི་པྤ་ཊི་སཱ་རོ པཱ་མུ་ཛྫ་ཏྠཱ་ཡ, པཱ་མུ་ཛྫཾ པཱི་ཏ་ཏྠཱ་ཡ, པཱི་ཏི པ་སྶ་དྡྷ་ཏྠཱ་ཡ, པ་སྶ་དྡྷི སུ་ཁ་ཏྠཱ་ཡ, སུ་ཁཾ ས་མཱ་དྷ་ཏྠཱ་ཡ, ས་མཱ་དྷི ཡ་ཐཱ་བྷཱུ་ཏ་ཉཱ་ཎ་ད་སྶ་ན་ཏྠཱ་ཡ, ཡ་ཐཱ་བྷཱུ་ཏ་ཉཱ་ཎ་ད་སྶ་ནཾ ནི་བྦི་ད་ཏྠཱ་ཡ, ནི་བྦི་དཱ ཝི་རཱ་ག་ཏྠཱ་ཡ, ཝི་རཱ་གོ ཝི་མུ་ཏྟ་ཏྠཱ་ཡ, ཝི་མུ་ཏྟི ཝི་མུ་ཏྟི་ཉཱ་ཎ་ད་སྶ་ན་ཏྠཱ་ཡ, ཝི་མུ་ཏྟི་ཉཱ་ཎ་ད་སྶ་ནཾ ཨ་ནུ་པཱ་དཱ་པ་རི་ནི་བྦཱ་ན་ཏྠཱ་ཡ. ཨེ་ཏ་ད་ཏྠཱ ཀ་ཐཱ, ཨེ་ཏ་ད་ཏྠཱ མ་ནྟ་ནཱ, ཨེ་ཏ་ད་ཏྠཱ ཨུ་པ་ནི་སཱ, ཨེ་ཏ་ད་ཏྠཾ སོ་ཏཱ་ཝ་དྷཱ་ནཾ – ཡ་དི་དཾ ཨ་ནུ་པཱ་དཱ་ཙི་ཏྟ་སྶ ཝི་མོ་ཀྑོ་ཏི.
༣༦༧. ཨ་ནུ་ཡོ་ག་ཝ་ཏྟཾ ནི་སཱ་མ་ཡ, ཀུ་ས་ལེ་ན བུ་དྡྷི་མ་ཏཱ ཀ་ཏཾ;
སུ་ཝུ་ཏྟཾ སི་ཀྑཱ་པ་དཱ་ནུ་ལོ་མི་ཀཾ, ག་ཏིཾ ན ནཱ་སེ་ནྟོ ས་མྤ་རཱ་ཡི་ཀཾ.
ཝ་ཏྠུཾ ཝི་པ་ཏྟིཾ ཨཱ་པ་ཏྟིཾ, ནི་དཱ་ནཾ ཨཱ་ཀཱ་ར་ཨ་ཀོ་ཝི་དོ;
པུ་བྦཱ་པ་རཾ ན ཛཱ་ནཱ་ཏི, ཀ་ཏཱ་ཀ་ཏཾ ས་མེ་ན ཙ.
ཀ་མྨ་ཉྩ ཨ་དྷི་ཀ་ར་ཎ་ཉྩ, ས་མ་ཐེ ཙཱ་པི ཨ་ཀོ་ཝི་དོ;
ར་ཏྟོ དུ་ཊྛོ ཙ མཱུ་ལ༹ྷོ ཙ, བྷ་ཡཱ མོ་ཧཱ ཙ ག་ཙྪ་ཏི.
ན ཙ ས་ཉྙ་ཏྟི་ཀུ་ས་ལོ, ནི་ཛ྄ཛྷ་ཏྟི་ཡཱ ཙ ཨ་ཀོ་ཝི་དོ;
ལ་དྡྷ་པ་ཀྑོ ཨ་ཧི་རི་ཀོ, ཀ་ཎྷ་ཀ་མྨོ ཨ་ནཱ་ད་རོ;
ས ཝེ [ས་ཙེ (ཀ.)] ཏཱ་དི་ས་ཀོ བྷི་ཀྑུ, ཨ་པྤ་ཊི་ཀྑོ་ཏི ཝུ་ཙྩ་ཏི.
ཝ་ཏྠུཾ ཝི་པ་ཏྟིཾ ཨཱ་པ་ཏྟིཾ, ནི་དཱ་ནཾ ཨཱ་ཀཱ་ར་ཀོ་ཝི་དོ;
པུ་བྦཱ་པ་ར་ཉྩ ཛཱ་ནཱ་ཏི, ཀ་ཏཱ་ཀ་ཏཾ ས་མེ་ན ཙ.
ཀ་མྨ་ཉྩ ཨ་དྷི་ཀ་ར་ཎ་ཉྩ, ས་མ་ཐེ ཙཱ་པི ཀོ་ཝི་དོ;
ཨ་ར་ཏྟོ ཨ་དུ་ཊྛོ ཨ་མཱུ་ལ༹ྷོ, བྷ་ཡཱ མོ་ཧཱ ན ག་ཙྪ་ཏི.
ས་ཉྙ་ཏྟི་ཡཱ ཙ ཀུ་ས་ལོ, ནི་ཛ྄ཛྷ་ཏྟི་ཡཱ ཙ ཀོ་ཝི་དོ;
ལ་དྡྷ་པ་ཀྑོ ཧི་རི་མ་ནོ, སུ་ཀྐ་ཀ་མྨོ ས་གཱ་ར་ཝོ;
ས ཝེ ཏཱ་དི་ས་ཀོ བྷི་ཀྑུ, ས་པྤ་ཊི་ཀྑོ་ཏི ཝུ་ཙྩ་ཏཱི་ཏི.
ཙཱུ་ལ༹་ས་ངྒཱ་མོ ནི་ཊྛི་ཏོ.