༧. ས་པྤཱ་ཎ་ཀ་ཝ་གྒོ

༡༧༡. ས་ཉྩི་ཙྩ པཱ་ཎཾ ཛཱི་ཝི་ཏཱ ཝོ་རོ་པེ་ནྟོ ཀ་ཏི ཨཱ་པ་ཏྟི་ཡོ ཨཱ་པ་ཛྫ་ཏི? ས་ཉྩི་ཙྩ པཱ་ཎཾ ཛཱི་ཝི་ཏཱ ཝོ་རོ་པེ་ནྟོ ཙ་ཏ་སྶོ ཨཱ་པ་ཏྟི་ཡོ ཨཱ་པ་ཛྫ་ཏི. ཨ་ནོ་དི་སྶ ཨོ་པཱ་ཏཾ ཁ་ཎ་ཏི – ‘‘ཡོ ཀོ་ཙི པ་པ་ཏི་ཏྭཱ མ་རི་སྶ་ཏཱི’’ཏི, ཨཱ་པ་ཏྟི དུ་ཀྐ་ཊ་སྶ; མ་ནུ་སྶོ ཏ་སྨིཾ པ་པ་ཏི་ཏྭཱ མ་ར་ཏི, ཨཱ་པ་ཏྟི པཱ་རཱ་ཛི་ཀ་སྶ; ཡ་ཀྑོ ཝཱ པེ་ཏོ ཝཱ ཏི་ར་ཙྪཱ་ན་ག་ཏ་མ་ནུ་སྶ་ཝི་གྒ་ཧོ ཝཱ ཏ་སྨིཾ པ་པ་ཏི་ཏྭཱ མ་ར་ཏི, ཨཱ་པ་ཏྟི ཐུ་ལླ་ཙྩ་ཡ་སྶ; ཏི་ར་ཙྪཱ་ན་ག་ཏོ ཏ་སྨིཾ པ་པ་ཏི་ཏྭཱ མ་ར་ཏི, ཨཱ་པ་ཏྟི པཱ་ཙི་ཏྟི་ཡ་སྶ – ས་ཉྩི་ཙྩ པཱ་ཎཾ ཛཱི་ཝི་ཏཱ ཝོ་རོ་པེ་ནྟོ ཨི་མཱ ཙ་ཏ་སྶོ ཨཱ་པ་ཏྟི་ཡོ ཨཱ་པ་ཛྫ་ཏི.

ཛཱ་ནཾ ས་པྤཱ་ཎ་ཀཾ ཨུ་ད་ཀཾ པ་རི་བྷུ་ཉྫ་ནྟོ དྭེ ཨཱ་པ་ཏྟི་ཡོ ཨཱ་པ་ཛྫ་ཏི. པ་རི་བྷུ་ཉྫ་ཏི, པ་ཡོ་གེ དུ་ཀྐ་ཊཾ; པ་རི་བྷུ་ཏྟེ ཨཱ་པ་ཏྟི པཱ་ཙི་ཏྟི་ཡ་སྶ.

ཛཱ་ནཾ ཡ་ཐཱ་དྷ་མྨཾ ནི་ཧ་ཏཱ་དྷི་ཀ་ར་ཎཾ པུ་ན་ཀ་མྨཱ་ཡ ཨུ་ཀྐོ་ཊེ་ནྟོ དྭེ ཨཱ་པ་ཏྟི་ཡོ ཨཱ་པ་ཛྫ་ཏི. ཨུ་ཀྐོ་ཊེ་ཏི, པ་ཡོ་གེ དུ་ཀྐ་ཊཾ; ཨུ་ཀྐོ་ཊི་ཏེ ཨཱ་པ་ཏྟི པཱ་ཙི་ཏྟི་ཡ་སྶ.

བྷི་ཀྑུ་སྶ ཛཱ་ནཾ དུ་ཊྛུ་ལླཾ ཨཱ་པ་ཏྟིཾ པ་ཊི་ཙྪཱ་དེ་ནྟོ ཨེ་ཀཾ ཨཱ་པ་ཏྟིཾ ཨཱ་པ་ཛྫ་ཏི. པཱ་ཙི་ཏྟི་ཡཾ.

ཛཱ་ནཾ ཨཱུ་ན་ཝཱི་ས་ཏི་ཝ་སྶཾ པུ་གྒ་ལཾ ཨུ་པ་ས་མྤཱ་དེ་ནྟོ དྭེ ཨཱ་པ་ཏྟི་ཡོ ཨཱ་པ་ཛྫ་ཏི. ཨུ་པ་ས་མྤཱ་དེ་ཏི, པ་ཡོ་གེ དུ་ཀྐ་ཊཾ; ཨུ་པ་ས་མྤཱ་དི་ཏེ ཨཱ་པ་ཏྟི པཱ་ཙི་ཏྟི་ཡ་སྶ.

ཛཱ་ནཾ ཐེ་ཡྻ་ས་ཏྠེ་ན ས་དྡྷིཾ སཾ་ཝི་དྷཱ་ཡ ཨེ་ཀ་དྡྷཱ་ན་མ་གྒཾ པ་ཊི་པ་ཛྫ་ནྟོ དྭེ ཨཱ་པ་ཏྟི་ཡོ ཨཱ་པ་ཛྫ་ཏི. པ་ཊི་པ་ཛྫ་ཏི, པ་ཡོ་གེ དུ་ཀྐ་ཊཾ; པ་ཊི་པ་ནྣེ ཨཱ་པ་ཏྟི པཱ་ཙི་ཏྟི་ཡ་སྶ.

མཱ་ཏུ་གཱ་མེ་ན ས་དྡྷིཾ སཾ་ཝི་དྷཱ་ཡ ཨེ་ཀ་དྡྷཱ་ན་མ་གྒཾ པ་ཊི་པ་ཛྫ་ནྟོ དྭེ ཨཱ་པ་ཏྟི་ཡོ ཨཱ་པ་ཛྫ་ཏི. པ་ཊི་པ་ཛྫ་ཏི, པ་ཡོ་གེ དུ་ཀྐ་ཊཾ; པ་ཊི་པ་ནྣེ ཨཱ་པ་ཏྟི པཱ་ཙི་ཏྟི་ཡ་སྶ.

པཱ་པི་ཀཱ་ཡ དི་ཊྛི་ཡཱ ཡཱ་ཝ་ཏ་ཏི་ཡཾ ས་མ་ནུ་བྷཱ་ས་ནཱ་ཡ ན པ་ཊི་ནི་སྶ་ཛྫ་ནྟོ དྭེ ཨཱ་པ་ཏྟི་ཡོ ཨཱ་པ་ཛྫ་ཏི. ཉ་ཏྟི་ཡཱ དུ་ཀྐ་ཊཾ; ཀ་མྨ་ཝཱ་ཙཱ་པ་རི་ཡོ་སཱ་ནེ ཨཱ་པ་ཏྟི པཱ་ཙི་ཏྟི་ཡ་སྶ.

ཛཱ་ནཾ ཏ་ཐཱ་ཝཱ་དི་ནཱ བྷི་ཀྑུ་ནཱ ཨ་ཀ་ཊཱ་ནུ་དྷ་མྨེ་ན ཏཾ དི་ཊྛིཾ ཨ་པྤ་ཊི་ནི་སྶ་ཊྛེ་ན ས་དྡྷིཾ ས་མྦྷུ་ཉྫ་ནྟོ དྭེ ཨཱ་པ་ཏྟི་ཡོ ཨཱ་པ་ཛྫ་ཏི. ས་མྦྷུ་ཉྫ་ཏི, པ་ཡོ་གེ དུ་ཀྐ་ཊཾ; ས་མྦྷུ་ཏྟེ ཨཱ་པ་ཏྟི པཱ་ཙི་ཏྟི་ཡ་སྶ.

ཛཱ་ནཾ ཏ་ཐཱ་ནཱ་སི་ཏཾ ས་མ་ཎུ་དྡེ་སཾ ཨུ་པ་ལཱ་པེ་ནྟོ དྭེ ཨཱ་པ་ཏྟི་ཡོ ཨཱ་པ་ཛྫ་ཏི. ཨུ་པ་ལཱ་པེ་ཏི, པ་ཡོ་གེ དུ་ཀྐ་ཊཾ; ཨུ་པ་ལཱ་པི་ཏེ ཨཱ་པ་ཏྟི པཱ་ཙི་ཏྟི་ཡ་སྶ.

ས་པྤཱ་ཎ་ཀ་ཝ་གྒོ ས་ཏྟ་མོ.