༩. སཱ་ས་ངྐ་སི་ཀྑཱ་པ་དཾ

༦༥༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑཱུ ཝུ་ཏྠ་ཝ་སྶཱ ཨཱ་ར་ཉྙ་ཀེ་སུ སེ་ནཱ་ས་ནེ་སུ ཝི་ཧ་ར་ནྟི. ཀ་ཏྟི་ཀ་ཙོ་ར་ཀཱ བྷི་ཀྑཱུ – ‘‘ལ་དྡྷ་ལཱ་བྷཱ’’ཏི པ་རི་པཱ་ཏེ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨཱ་ར་ཉྙ་ཀེ་སུ སེ་ནཱ་ས་ནེ་སུ ཝི་ཧ་ར་ནྟེ་ན ཏི་ཎྞཾ ཙཱི་ཝ་རཱ་ནཾ ཨ་ཉྙ་ཏ་རཾ ཙཱི་ཝ་རཾ ཨ་ནྟ་ར་གྷ་རེ ནི་ཀྑི་པི་ཏུ’’ནྟི.

ཏེ་ན ཁོ པ་ན ས་མ་ཡེ་ན བྷི་ཀྑཱུ – ‘‘བྷ་ག་ཝ་ཏཱ ཨ་ནུ་ཉྙཱ་ཏཾ ཨཱ་ར་ཉྙ་ཀེ་སུ སེ་ནཱ་ས་ནེ་སུ ཝི་ཧ་ར་ནྟེ་ན ཏི་ཎྞཾ ཙཱི་ཝ་རཱ་ནཾ ཨ་ཉྙ་ཏ་རཾ ཙཱི་ཝ་རཾ ཨ་ནྟ་ར་གྷ་རེ ནི་ཀྑི་པི་ཏུ’’ནྟི ཏི་ཎྞཾ ཙཱི་ཝ་རཱ་ནཾ ཨ་ཉྙ་ཏ་རཾ ཙཱི་ཝ་རཾ ཨ་ནྟ་ར་གྷ་རེ ནི་ཀྑི་པི་ཏྭཱ ཨ་ཏི་རེ་ཀ་ཚཱ་ར་ཏྟཾ ཝི་པྤ་ཝ་ས་ནྟི. ཏཱ་ནི ཙཱི་ཝ་རཱ་ནི ན་སྶ་ནྟི་པི ཝི་ན་སྶ་ནྟི་པི ཌ་ཡ྄ཧ་ནྟི་པི ཨུ་ནྡཱུ་རེ་ཧི་པི ཁ་ཛྫ་ནྟི. བྷི་ཀྑཱུ དུ་ཙྩོ་ལཱ༹ ཧོ་ནྟི ལཱུ་ཁ་ཙཱི་ཝ་རཱ. བྷི་ཀྑཱུ ཨེ་ཝ་མཱ་ཧཾ་སུ – ‘‘ཀི་སྶ ཏུ་མྷེ, ཨཱ་ཝུ་སོ, དུ་ཙྩོ་ལཱ༹ ལཱུ་ཁ་ཙཱི་ཝ་རཱ’’ཏི? ཨ་ཐ ཁོ ཏེ བྷི་ཀྑཱུ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. ཡེ ཏེ བྷི་ཀྑཱུ ཨ་པྤི་ཙྪཱ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑཱུ ཏི་ཎྞཾ ཙཱི་ཝ་རཱ་ནཾ ཨ་ཉྙ་ཏ་རཾ ཙཱི་ཝ་རཾ ཨ་ནྟ་ར་གྷ་རེ ནི་ཀྑི་པི་ཏྭཱ ཨ་ཏི་རེ་ཀ་ཚཱ་ར་ཏྟཾ ཝི་པྤ་ཝ་སི་སྶ་ནྟཱི’’ཏི! ཨ་ཐ ཁོ ཏེ བྷི་ཀྑཱུ ཏེ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑཱུ ཏི་ཎྞཾ ཙཱི་ཝ་རཱ་ནཾ ཨ་ཉྙ་ཏ་རཾ ཙཱི་ཝ་རཾ ཨ་ནྟ་ར་གྷ་རེ ནི་ཀྑི་པི་ཏྭཱ ཨ་ཏི་རེ་ཀ་ཚཱ་ར་ཏྟཾ ཝི་པྤ་ཝ་ས་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏེ, བྷི་ཀྑ་ཝེ, མོ་གྷ་པུ་རི་སཱ ཏི་ཎྞཾ ཙཱི་ཝ་རཱ་ནཾ ཨ་ཉྙ་ཏ་རཾ ཙཱི་ཝ་རཾ ཨ་ནྟ་ར་གྷ་རེ ནི་ཀྑི་པི་ཏྭཱ ཨ་ཏི་རེ་ཀ་ཚཱ་ར་ཏྟཾ ཝི་པྤ་ཝ་སི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –

༦༥༣. ‘‘ཨུ་པ་ཝ་སྶཾ ཁོ པ་ན ཀ་ཏྟི་ཀ་པུ་ཎྞ་མཾ ཡཱ་ནི ཁོ པ་ན ཏཱ་ནི ཨཱ་ར་ཉྙ་ཀཱ་ནི སེ་ནཱ་ས་ནཱ་ནི སཱ་ས་ངྐ་ས་མྨ་ཏཱ་ནི ས་པྤ་ཊི་བྷ་ཡཱ་ནི ཏ་ཐཱ་རཱུ་པེ་སུ བྷི་ཀྑུ སེ་ནཱ་ས་ནེ་སུ ཝི་ཧ་ར་ནྟོ ཨཱ་ཀ་ངྑ་མཱ་ནོ ཏི་ཎྞཾ ཙཱི་ཝ་རཱ་ནཾ ཨ་ཉྙ་ཏ་རཾ ཙཱི་ཝ་རཾ ཨ་ནྟ་ར་གྷ་རེ ནི་ཀྑི་པེ་ཡྻ, སི་ཡཱ ཙ ཏ་སྶ བྷི་ཀྑུ་ནོ ཀོ་ཙི་དེ་ཝ པ་ཙྩ་ཡོ ཏེ་ན ཙཱི་ཝ་རེ་ན ཝི་པྤ་ཝཱ་སཱ་ཡ. ཚཱ་ར་ཏྟ་པ་ར་མཾ ཏེ་ན བྷི་ཀྑུ་ནཱ ཏེ་ན ཙཱི་ཝ་རེ་ན ཝི་པྤ་ཝ་སི་ཏ་བྦཾ. ཏ་ཏོ ཙེ ཨུ་ཏྟ་རི ཝི་པྤ་ཝ་སེ་ཡྻ, ཨ་ཉྙ་ཏྲ བྷི་ཀྑུ་ས་མྨུ་ཏི་ཡཱ, ནི་སྶ་གྒི་ཡཾ པཱ་ཙི་ཏྟི་ཡ’’ནྟི.

༦༥༤. ཨུ་པ་ཝ་སྶཾ ཁོ པ་ནཱཏི ཝུ་ཊྛ་ཝ་སྶཱ་ནཾ.

ཀ་ཏྟི་ཀ་པུ་ཎྞ་མནྟི ཀ་ཏྟི་ཀ་ཙཱ་ཏུ་མཱ་སི་ནཱི ཝུ་ཙྩ་ཏི.

[པཱ་ཙི. ༥༧༣] ཡཱ་ནི ཁོ པ་ན ཏཱ་ནི ཨཱ་ར་ཉྙ་ཀཱ་ནི སེ་ནཱ་ས་ནཱ་ནཱིཏི ཨཱ་ར་ཉྙ་ཀཾ ནཱ་མ སེ་ནཱ་ས་ནཾ པ་ཉྩ་དྷ་ནུ་ས་ཏི་ཀཾ པ་ཙྪི་མཾ.

[པཱ་ཙི. ༥༧༣] སཱ་ས་ངྐཾ ནཱ་མ ཨཱ་རཱ་མེ ཨཱ་རཱ་མཱུ་པ་ཙཱ་རེ ཙོ་རཱ་ནཾ ནི་ཝི་ཊྛོ་ཀཱ་སོ དི་སྶ་ཏི, བྷུ་ཏྟོ་ཀཱ་སོ དི་སྶ་ཏི, ཋི་ཏོ་ཀཱ་སོ དི་སྶ་ཏི, ནི་སི་ནྣོ་ཀཱ་སོ དི་སྶ་ཏི, ནི་པ་ནྣོ་ཀཱ་སོ དི་སྶ་ཏི.

[པཱ་ཙི. ༥༧༣] ས་པྤ་ཊི་བྷ་ཡཾ ནཱ་མ ཨཱ་རཱ་མེ ཨཱ་རཱ་མཱུ་པ་ཙཱ་རེ ཙོ་རེ་ཧི མ་ནུ་སྶཱ ཧ་ཏཱ དི་སྶ་ནྟི, ཝི་ལུ་ཏྟཱ དི་སྶ་ནྟི, ཨཱ་ཀོ་ཊི་ཏཱ དི་སྶ་ནྟི.

[པཱ་ཙི. ༥༧༣] ཏ་ཐཱ་རཱུ་པེ་སུ བྷི་ཀྑུ སེ་ནཱ་ས་ནེ་སུ ཝི་ཧ་ར་ནྟོཏི ཨེ་ཝ་རཱུ་པེ་སུ བྷི་ཀྑུ སེ་ནཱ་ས་ནེ་སུ ཝི་ཧ་ར་ནྟོ.

ཨཱ་ཀ་ངྑ་མཱ་ནོཏི ཨི་ཙྪ་མཱ་ནོ.

ཏི་ཎྞཾ ཙཱི་ཝ་རཱ་ནཾ ཨ་ཉྙ་ཏ་རཾ ཙཱི་ཝ་རནྟི ས་ངྒྷཱ་ཊིཾ ཝཱ ཨུ་ཏྟ་རཱ་ས་ངྒཾ ཝཱ ཨ་ནྟ་ར་ཝཱ་ས་ཀཾ ཝཱ.

ཨ་ནྟ་ར་གྷ་རེ ནི་ཀྑི་པེ་ཡྻཱཏི ས་མ་ནྟཱ གོ་ཙ་ར་གཱ་མེ ནི་ཀྑི་པེ་ཡྻ.

སི་ཡཱ ཙ ཏ་སྶ བྷི་ཀྑུ་ནོ ཀོ་ཙི་དེ་ཝ པ་ཙྩ་ཡོ ཏེ་ན ཙཱི་ཝ་རེ་ན ཝི་པྤ་ཝཱ་སཱ་ཡཱཏི སི་ཡཱ པ་ཙྩ་ཡོ སི་ཡཱ ཀ་ར་ཎཱི་ཡཾ.

ཚཱ་ར་ཏྟ་པ་ར་མཾ ཏེ་ན བྷི་ཀྑུ་ནཱ ཏེ་ན ཙཱི་ཝ་རེ་ན ཝི་པྤ་ཝ་སི་ཏ་བྦནྟི ཚཱ་ར་ཏྟ་པ་ར་མ་ཏཱ ཝི་པྤ་ཝ་སི་ཏ་བྦཾ.

ཨ་ཉྙ་ཏྲ བྷི་ཀྑུ་ས་མྨུ་ཏི་ཡཱཏི ཋ་པེ་ཏྭཱ བྷི་ཀྑུ་ས་མྨུ་ཏིཾ.

ཏ་ཏོ ཙེ ཨུ་ཏྟ་རི ཝི་པྤ་ཝ་སེ་ཡྻཱཏི ས་ཏྟ་མེ ཨ་རུ་ཎུ་གྒ་མ་ནེ ནི་སྶ་གྒི་ཡཾ ཧོ་ཏི. ནི་སྶ་ཛྫི་ཏ་བྦཾ ས་ངྒྷ་སྶ ཝཱ ག་ཎ་སྶ ཝཱ པུ་གྒ་ལ་སྶ ཝཱ. ཨེ་ཝ་ཉྩ པ་ན, བྷི་ཀྑ་ཝེ, ནི་སྶ་ཛྫི་ཏ་བྦཾ. ‘‘ཨི་དཾ མེ, བྷ་ནྟེ, ཙཱི་ཝ་རཾ ཨ་ཏི་རེ་ཀ་ཚཱ་ར་ཏྟཾ ཝི་པྤ་ཝུ་ཊྛཾ, ཨ་ཉྙ་ཏྲ བྷི་ཀྑུ་ས་མྨུ་ཏི་ཡཱ, ནི་སྶ་གྒི་ཡཾ. ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མཱི’’ཏི…པེ… ད་དེ་ཡྻཱ་ཏི…པེ… ད་དེ་ཡྻུ་ནྟི…པེ… ཨཱ་ཡ་སྨ་ཏོ ད་མྨཱི་ཏི.

༦༥༥. ཨ་ཏི་རེ་ཀ་ཚཱ་ར་ཏྟེ ཨ་ཏི་རེ་ཀ་ས་ཉྙཱི ཝི་པྤ་ཝ་ས་ཏི, ཨ་ཉྙ་ཏྲ བྷི་ཀྑུ་ས་མྨུ་ཏི་ཡཱ, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཏི་རེ་ཀ་ཚཱ་ར་ཏྟེ ཝེ་མ་ཏི་ཀོ ཝི་པྤ་ཝ་ས་ཏི, ཨ་ཉྙ་ཏྲ བྷི་ཀྑུ་ས་མྨུ་ཏི་ཡཱ, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཏི་རེ་ཀ་ཚཱ་ར་ཏྟེ ཨཱུ་ན་ཀ་ས་ཉྙཱི ཝི་པྤ་ཝ་ས་ཏི, ཨ་ཉྙ་ཏྲ བྷི་ཀྑུ་ས་མྨུ་ཏི་ཡཱ, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་པྤ་ཙྩུ་དྡྷ་ཊེ པ་ཙྩུ་དྡྷ་ཊ་ས་ཉྙཱི…པེ… ཨ་ཝི་སྶ་ཛྫི་ཏེ ཝི་སྶ་ཛྫི་ཏ་ས་ཉྙཱི… ཨ་ན་ཊྛེ ན་ཊྛ་ས་ཉྙཱི… ཨ་ཝི་ན་ཊྛེ ཝི་ན་ཊྛ་ས་ཉྙཱི… ཨ་ད་ཌྜྷེ ད་ཌྜྷ་ས་ཉྙཱི … ཨ་ཝི་ལུ་ཏྟེ ཝི་ལུ་ཏྟ་ས་ཉྙཱི ཝི་པྤ་ཝ་ས་ཏི, ཨ་ཉྙ་ཏྲ བྷི་ཀྑུ་ས་མྨུ་ཏི་ཡཱ, ནི་སྶ་གྒི་ཡཾ པཱ་ཙི་ཏྟི་ཡཾ.

ནི་སྶ་གྒི་ཡཾ ཙཱི་ཝ་རཾ ཨ་ནི་སྶ་ཛྫི་ཏྭཱ པ་རི་བྷུ་ཉྫ་ཏི, ཨཱ་པ་ཏྟི དུ་ཀྐ་ཊ་སྶ. ཨཱུ་ན་ཀ་ཚཱ་ར་ཏྟེ ཨ་ཏི་རེ་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨཱུ་ན་ཀ་ཚཱ་ར་ཏྟེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨཱུ་ན་ཀ་ཚཱ་ར་ཏྟེ ཨཱུ་ན་ཀ་ས་ཉྙཱི, ཨ་ནཱ་པ་ཏྟི.

༦༥༦. ཨ་ནཱ་པ་ཏྟི – ཚཱ་ར་ཏྟཾ ཝི་པྤ་ཝ་ས་ཏི, ཨཱུ་ན་ཀ་ཚཱ་ར་ཏྟཾ ཝི་པྤ་ཝ་ས་ཏི, ཚཱ་ར་ཏྟཾ ཝི་པྤ་ཝ་སི་ཏྭཱ པུ་ན གཱ་མ་སཱི་མཾ ཨོ་ཀྐ་མི་ཏྭཱ ཝ་སི་ཏྭཱ པ་ཀྐ་མ་ཏི, ཨ་ནྟོ ཚཱ་ར་ཏྟཾ པ་ཙྩུ་དྡྷ་ར་ཏི, ཝི་སྶ་ཛྫེ་ཏི, ན་སྶ་ཏི, ཝི་ན་སྶ་ཏི, ཌ་ཡ྄ཧ་ཏི, ཨ་ཙྪི་ནྡི་ཏྭཱ ག་ཎྷ་ནྟི, ཝི་སྶཱ་སཾ ག་ཎྷ་ནྟི, བྷི་ཀྑུ་ས་མྨུ་ཏི་ཡཱ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.

སཱ་ས་ངྐ་སི་ཀྑཱ་པ་དཾ ནི་ཊྛི་ཏཾ ན་ཝ་མཾ.