༨. ཨ་ཙྩེ་ཀ་ཙཱི་ཝ་ར་སི་ཀྑཱ་པ་དཾ
༦༤༦. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ མ་ཧཱ་མ་ཏྟོ པ་ཝཱ་སཾ ག་ཙྪ་ནྟོ བྷི་ཀྑཱུ་ནཾ ས་ནྟི་ཀེ དཱུ་ཏཾ པཱ་ཧེ་སི – ‘‘ཨཱ་ག་ཙྪ་ནྟུ བྷ་ད་ནྟཱ ཝ་སྶཱ་ཝཱ་སི་ཀཾ ད་སྶཱ་མཱི’’ཏི. བྷི་ཀྑཱུ – ‘ཝ་སྶཾ་ཝུ་ཊྛཱ་ནཾ བྷ་ག་ཝ་ཏཱ ཝ་སྶཱ་ཝཱ་སི་ཀཾ ཨ་ནུ་ཉྙཱ་ཏ’ནྟི, ཀུ་ཀྐུ་ཙྩཱ་ཡ་ནྟཱ ནཱ་ག་མཾ་སུ. ཨ་ཐ ཁོ སོ མ་ཧཱ་མ་ཏྟོ ཨུ་ཛ྄ཛྷཱ་ཡ་ཏི ཁི་ཡྻ་ཏི ཝི་པཱ་ཙེ་ཏི – ‘‘ཀ་ཐ་ཉྷི ནཱ་མ བྷ་ད་ནྟཱ མ་ཡཱ དཱུ་ཏེ པ་ཧི་ཏེ ནཱ་ག་ཙྪི་སྶ་ནྟི! ཨ་ཧ་ཉྷི སེ་ནཱ་ཡ ག་ཙྪཱ་མི. དུ་ཛྫཱ་ནཾ ཛཱི་ཝི་ཏཾ དུ་ཛྫཱ་ནཾ མ་ར་ཎ’’ནྟི. ཨ་སྶོ་སུཾ ཁོ བྷི་ཀྑཱུ ཏ་སྶ མ་ཧཱ་མ་ཏྟ་སྶ ཨུ་ཛ྄ཛྷཱ་ཡ་ནྟ་སྶ ཁི་ཡྻ་ནྟ་སྶ ཝི་པཱ་ཙེ་ནྟ་སྶ. ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨ་ཙྩེ་ཀ་ཙཱི་ཝ་རཾ པ་ཊི་གྒ་ཧེ་ཏྭཱ ནི་ཀྑི་པི་ཏུ’’ནྟི.
༦༤༧. ཏེ་ན ཁོ པ་ན ས་མ་ཡེ་ན བྷི་ཀྑཱུ – ‘‘བྷ་ག་ཝ་ཏཱ ཨ་ནུ་ཉྙཱ་ཏཾ ཨ་ཙྩེ་ཀ་ཙཱི་ཝ་རཾ པ་ཊི་གྒ་ཧེ་ཏྭཱ ནི་ཀྑི་པི་ཏུ’’ནྟི, ཨ་ཙྩེ་ཀ་ཙཱི་ཝ་རཱ་ནི པ་ཊི་གྒ་ཧེ་ཏྭཱ ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་ནྟི. ཏཱ་ནི ཙཱི་ཝ་རཱ་ནི ཙཱི་ཝ་ར་ཝཾ་སེ བྷ་ཎྜི་ཀཱ་བ་དྡྷཱ་ནི ཏི་ཊྛ་ནྟི. ཨ་དྡ་ས ཁོ ཨཱ་ཡ་སྨཱ ཨཱ་ན་ནྡོ སེ་ནཱ་ས་ན་ཙཱ་རི་ཀཾ ཨཱ་ཧི་ཎྜ་ནྟོ ཏཱ་ནི ཙཱི་ཝ་རཱ་ནི ཙཱི་ཝ་ར་ཝཾ་སེ བྷ་ཎྜི་ཀཱ་བ་དྡྷཱ་ནི. ཏི་ཊྛ་ནྟེ དི་སྭཱ བྷི་ཀྑཱུ ཨེ་ཏ་ད་ཝོ་ཙ – ‘‘ཀ་སྶི་མཱ་ནི, ཨཱ་ཝུ་སོ, ཙཱི་ཝ་རཱ་ནི ཙཱི་ཝ་ར་ཝཾ་སེ བྷ་ཎྜི་ཀཱ་བ་དྡྷཱ་ནི ཏི་ཊྛ་ནྟཱི’’ཏི? ‘‘ཨ་མྷཱ་ཀཾ, ཨཱ་ཝུ་སོ, ཨ་ཙྩེ་ཀ་ཙཱི་ཝ་རཱ་ནཱི’’ཏི. ‘‘ཀཱི་ཝ་ཙི་རཾ པ་ནཱ་ཝུ་སོ, ཨི་མཱ་ནི ཙཱི་ཝ་རཱ་ནི ནི་ཀྑི་ཏྟཱ་ནཱི’’ཏི? ཨ་ཐ ཁོ ཏེ བྷི་ཀྑཱུ ཨཱ་ཡ་སྨ་ཏོ ཨཱ་ན་ནྡ་སྶ ཡ་ཐཱ་ནི་ཀྑི་ཏྟཾ ཨཱ་རོ་ཙེ་སུཾ. ཨཱ་ཡ་སྨཱ ཨཱ་ན་ནྡོ ཨུ་ཛ྄ཛྷཱ་ཡ་ཏི ཁི་ཡྻ་ཏི ཝི་པཱ་ཙེ་ཏི – ‘‘ཀ་ཐ་ཉྷི ནཱ་མ བྷི་ཀྑཱུ ཨ་ཙྩེ་ཀ་ཙཱི་ཝ་རཾ པ་ཊི་གྒ་ཧེ་ཏྭཱ ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་སྶ་ནྟཱི’’ཏི! ཨ་ཐ ཁོ ཨཱ་ཡ་སྨཱ ཨཱ་ན་ནྡོ ཏེ བྷི་ཀྑཱུ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སི…པེ… – ‘‘ས་ཙྩཾ ཀི་ར, བྷི་ཀྑ་ཝེ, བྷི་ཀྑཱུ ཨ་ཙྩེ་ཀ་ཙཱི་ཝ་རཾ པ་ཊི་གྒ་ཧེ་ཏྭཱ ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་ནྟཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏེ, བྷི་ཀྑ་ཝེ, མོ་གྷ་པུ་རི་སཱ ཨ་ཙྩེ་ཀ་ཙཱི་ཝ་རཾ པ་ཊི་གྒ་ཧེ་ཏྭཱ ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༦༤༨. ‘‘ད་སཱ་ཧཱ་ནཱ་ག་ཏཾ ཀ་ཏྟི་ཀ་ཏེ་མཱ་སི་ཀ་པུ་ཎྞ་མཾ བྷི་ཀྑུ་ནོ པ་ནེ་ཝ ཨ་ཙྩེ་ཀ་ཙཱི་ཝ་རཾ ཨུ་པྤ་ཛྫེ་ཡྻ, ཨ་ཙྩེ་ཀཾ མ་ཉྙ་མཱ་ནེ་ན བྷི་ཀྑུ་ནཱ པ་ཊི་གྒ་ཧེ་ཏ་བྦཾ, པ་ཊི་གྒ་ཧེ་ཏྭཱ ཡཱ་ཝ ཙཱི་ཝ་ར་ཀཱ་ལ་ས་མ་ཡཾ ནི་ཀྑི་པི་ཏ་བྦཾ. ཏ་ཏོ ཙེ ཨུ་ཏྟ་རི ནི་ཀྑི་པེ་ཡྻ, ནི་སྶ་གྒི་ཡཾ པཱ་ཙི་ཏྟི་ཡ’’ནྟི.
༦༤༩. ད་སཱ་ཧཱ་ནཱ་ག་ཏནྟི ད་སཱ་ཧཱ་ནཱ་ག་ཏཱ་ཡ པ་ཝཱ་ར་ཎཱ་ཡ.
ཀ་ཏྟི་ཀ་ཏེ་མཱ་སི་ཀ་པུ་ཎྞ་མནྟི པ་ཝཱ་ར་ཎཱ ཀ་ཏྟི་ཀཱ ཝུ་ཙྩ་ཏི.
ཨ་ཙྩེ་ཀ་ཙཱི་ཝ་རཾ ནཱ་མ སེ་ནཱ་ཡ ཝཱ ག་ནྟུ་ཀཱ་མོ ཧོ་ཏི, པ་ཝཱ་སཾ ཝཱ ག་ནྟུ་ཀཱ་མོ ཧོ་ཏི, གི་ལཱ་ནོ ཝཱ ཧོ་ཏི, ག་བྦྷི་ནཱི ཝཱ ཧོ་ཏི, ཨ་སྶ་དྡྷ་སྶ ཝཱ ས་དྡྷཱ ཨུ་པྤ་ནྣཱ ཧོ་ཏི, ཨ་པྤ་ས་ནྣ་སྶ ཝཱ པ་སཱ་དོ ཨུ་པྤ་ནྣོ ཧོ་ཏི, སོ ཙེ བྷི་ཀྑཱུ་ནཾ ས་ནྟི་ཀེ དཱུ་ཏཾ པ་ཧི་ཎེ་ཡྻ – ‘‘ཨཱ་ག་ཙྪ་ནྟུ བྷ་ད་ནྟཱ ཝ་སྶཱ་ཝཱ་སི་ཀཾ ད་སྶཱ་མཱི’’ཏི, ཨེ་ཏཾ ཨ་ཙྩེ་ཀ་ཙཱི་ཝ་རཾ ནཱ་མ.
ཨ་ཙྩེ་ཀཾ མ་ཉྙ་མཱ་ནེ་ན བྷི་ཀྑུ་ནཱ པ་ཊི་གྒ་ཧེ་ཏ་བྦཾ པ་ཊི་གྒ་ཧེ་ཏྭཱ ཡཱ་ཝ ཙཱི་ཝ་ར་ཀཱ་ལ་ས་མ་ཡཾ ནི་ཀྑི་པི་ཏ་བྦནྟི ས་ཉྙཱ་ཎཾ ཀ་ཏྭཱ ནི་ཀྑི་པི་ཏ་བྦཾ – ‘‘ཨི་དཾ ཨ་ཙྩེ་ཀ་ཙཱི་ཝ་ར’’ནྟི.
ཙཱི་ཝ་ར་ཀཱ་ལ་ས་མ་ཡོ ནཱ་མ ཨ་ན་ཏྠ་ཏེ ཀ་ཐི་ནེ ཝ་སྶཱ་ན་སྶ པ་ཙྪི་མོ མཱ་སོ, ཨ་ཏྠ་ཏེ ཀ་ཐི་ནེ པ་ཉྩ་མཱ་སཱ.
ཏ་ཏོ ཙེ ཨུ་ཏྟ་རི ནི་ཀྑི་པེ་ཡྻཱཏི ཨ་ན་ཏྠ་ཏེ ཀ་ཐི་ནེ ཝ་སྶཱ་ན་སྶ པ་ཙྪི་མཾ དི་ཝ་སཾ ཨ་ཏི་ཀྐཱ་མེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ [ནི་སྶ་གྒི་ཡཾ ཧོ་ཏི (སྱཱ.)]. ཨ་ཏྠ་ཏེ ཀ་ཐི་ནེ ཀ་ཐི་ནུ་དྡྷཱ་ར་དི་ཝ་སཾ ཨ་ཏི་ཀྐཱ་མེ་ཏི, ནི་སྶ་གྒི་ཡཾ ཧོ་ཏི. ནི་སྶ་ཛྫི་ཏ་བྦཾ ས་ངྒྷ་སྶ ཝཱ ག་ཎ་སྶ ཝཱ པུ་གྒ་ལ་སྶ ཝཱ. ཨེ་ཝ་ཉྩ པ་ན, བྷི་ཀྑ་ཝེ, ནི་སྶ་ཛྫི་ཏ་བྦཾ…པེ… ཨི་དཾ མེ, བྷ་ནྟེ, ཨ་ཙྩེ་ཀ་ཙཱི་ཝ་རཾ ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མི་ཏཾ ནི་སྶ་གྒི་ཡཾ. ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མཱི་ཏི…པེ… ད་དེ་ཡྻཱ་ཏི…པེ… ད་དེ་ཡྻུ་ནྟི…པེ… ཨཱ་ཡ་སྨ་ཏོ ད་མྨཱི་ཏི.
༦༥༠. ཨ་ཙྩེ་ཀ་ཙཱི་ཝ་རེ ཨ་ཙྩེ་ཀ་ཙཱི་ཝ་ར་ས་ཉྙཱི ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཙྩེ་ཀ་ཙཱི་ཝ་རེ ཝེ་མ་ཏི་ཀོ ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཙྩེ་ཀ་ཙཱི་ཝ་རེ ཨ་ན་ཙྩེ་ཀ་ཙཱི་ཝ་ར་ས་ཉྙཱི ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ན་དྷི་ཊྛི་ཏེ ཨ་དྷི་ཊྛི་ཏ་ས་ཉྙཱི …པེ… ཨ་ཝི་ཀ་པྤི་ཏེ ཝི་ཀ་པྤི་ཏ་ས་ཉྙཱི… ཨ་ཝི་སྶ་ཛྫི་ཏེ ཝི་སྶ་ཛྫི་ཏ་ས་ཉྙཱི… ཨ་ན་ཊྛེ ན་ཊྛ་ས་ཉྙཱི… ཨ་ཝི་ན་ཊྛེ ཝི་ན་ཊྛ་ས་ཉྙཱི… ཨ་ད་ཌྜྷེ ད་ཌྜྷ་ས་ཉྙཱི… ཨ་ཝི་ལུ་ཏྟེ ཝི་ལུ་ཏྟ་ས་ཉྙཱི ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ.
ནི་སྶ་གྒི་ཡཾ ཙཱི་ཝ་རཾ ཨ་ནི་སྶ་ཛྫི་ཏྭཱ པ་རི་བྷུ་ཉྫ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ན་ཙྩེ་ཀ་ཙཱི་ཝ་རེ ཨ་ཙྩེ་ཀ་ཙཱི་ཝ་ར་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་ན་ཙྩེ་ཀ་ཙཱི་ཝ་རེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་ན་ཙྩེ་ཀ་ཙཱི་ཝ་རེ ཨ་ན་ཙྩེ་ཀ་ཙཱི་ཝ་ར་ས་ཉྙཱི, ཨ་ནཱ་པ་ཏྟི.
༦༥༡. ཨ་ནཱ་པ་ཏྟི – ཨ་ནྟོ་ས་མ་ཡེ ཨ་དྷི་ཊྛེ་ཏི, ཝི་ཀ་པྤེ་ཏི, ཝི་སྶ་ཛྫེ་ཏི, ན་སྶ་ཏི, ཝི་ན་སྶ་ཏི, ཌ་ཡ྄ཧ་ཏི, ཨ་ཙྪི་ནྡི་ཏྭཱ ག་ཎྷ་ནྟི, ཝི་སྶཱ་སཾ ག་ཎྷ་ནྟི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཨ་ཙྩེ་ཀ་ཙཱི་ཝ་ར་སི་ཀྑཱ་པ་དཾ ནི་ཊྛི་ཏཾ ཨ་ཊྛ་མཾ.