༧. མ་ཧཱ་པེ་ས་ཀཱ་ར་སི་ཀྑཱ་པ་དཾ
༦༤༡. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ པུ་རི་སོ པ་ཝཱ་སཾ ག་ཙྪ་ནྟོ པ་ཛཱ་པ་ཏིཾ ཨེ་ཏ་ད་ཝོ་ཙ – ‘‘སུ་ཏྟཾ དྷཱ་ར་ཡི་ཏྭཱ ཨ་མུ་ཀ་སྶ ཏ་ནྟ་ཝཱ་ཡ་སྶ དེ་ཧི, ཙཱི་ཝ་རཾ ཝཱ་ཡཱ་པེ་ཏྭཱ ནི་ཀྑི་པ, ཨཱ་ག་ཏོ ཨ་ཡྻཾ ཨུ་པ་ན་ནྡཾ ཙཱི་ཝ་རེ་ན ཨ་ཙྪཱ་དེ་སྶཱ་མཱི’’ཏི. ཨ་སྶོ་སི ཁོ ཨ་ཉྙ་ཏ་རོ པི་ཎྜ་ཙཱ་རི་ཀོ བྷི་ཀྑུ ཏ་སྶ པུ་རི་ས་སྶ ཨི་མཾ ཝཱ་ཙཾ བྷཱ་ས་མཱ་ན་སྶ. ཨ་ཐ ཁོ སོ བྷི་ཀྑུ ཡེ་ནཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨུ་པ་ན་ནྡཾ ས་ཀྱ་པུ་ཏྟཾ ཨེ་ཏ་ད་ཝོ་ཙ – ‘‘མ་ཧཱ་པུ་ཉྙོ་སི ཏྭཾ, ཨཱ་ཝུ་སོ ཨུ་པ་ན་ནྡ, ཨ་མུ་ཀ་སྨིཾ ཨོ་ཀཱ་སེ ཨ་ཉྙ་ཏ་རོ པུ་རི་སོ པ་ཝཱ་སཾ ག་ཙྪ་ནྟོ པ་ཛཱ་པ་ཏིཾ ཨེ་ཏ་ད་ཝོ་ཙ – ‘‘སུ་ཏྟཾ དྷཱ་ར་ཡི་ཏྭཱ ཨ་མུ་ཀ་སྶ ཏ་ནྟ་ཝཱ་ཡ་སྶ དེ་ཧི, ཙཱི་ཝ་རཾ ཝཱ་ཡཱ་པེ་ཏྭཱ ནི་ཀྑི་པ, ཨཱ་ག་ཏོ ཨ་ཡྻཾ ཨུ་པ་ན་ནྡཾ ཙཱི་ཝ་རེ་ན ཨ་ཙྪཱ་དེ་སྶཱ་མཱི’’ཏི. ‘‘ཨ་ཏྠཱ་ཝུ་སོ, མཾ སོ ཨུ་པ་ཊྛཱ་ཀོ’’ཏི. སོ་པི ཁོ ཏ་ནྟ་ཝཱ་ཡོ ཨཱ་ཡ་སྨ་ཏོ ཨུ་པ་ན་ནྡ་སྶ ས་ཀྱ་པུ་ཏྟ་སྶ ཨུ་པ་ཊྛཱ་ཀོ ཧོ་ཏི. ཨ་ཐ ཁོ ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ ཡེ་ན སོ ཏ་ནྟ་ཝཱ་ཡོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཏཾ ཏ་ནྟ་ཝཱ་ཡཾ ཨེ་ཏ་ད་ཝོ་ཙ – ‘‘ཨི་དཾ ཁོ, ཨཱ་ཝུ་སོ, ཙཱི་ཝ་རཾ མཾ ཨུ་དྡི་སྶ ཝི་ཡྻ་ཏི; ཨཱ་ཡ་ཏ་ཉྩ ཀ་རོ་ཧི ཝི་ཏྠ་ཏ་ཉྩ. ཨ་པྤི་ཏ་ཉྩ སུ་ཝཱི་ཏ་ཉྩ སུ་པྤ་ཝཱ་ཡི་ཏ་ཉྩ སུ་ཝི་ལེ་ཁི་ཏ་ཉྩ སུ་ཝི་ཏ་ཙྪི་ཏ་ཉྩ ཀ་རོ་ཧཱི’’ཏི. ‘‘ཨེ་ཏེ ཁོ མེ, བྷ་ནྟེ, སུ་ཏྟཾ དྷཱ་ར་ཡི་ཏྭཱ ཨ་དཾ་སུ; ཨི་མི་ནཱ སུ་ཏྟེ་ན ཙཱི་ཝ་རཾ ཝི་ནཱ་ཧཱི’’ཏི. ‘‘ན, བྷ་ནྟེ, ས་ཀྐཱ ཨཱ་ཡ་ཏཾ ཝཱ ཝི་ཏྠ་ཏཾ ཝཱ ཨ་པྤི་ཏཾ ཝཱ ཀཱ་ཏུཾ. ས་ཀྐཱ ཙ ཁོ, བྷ་ནྟེ, སུ་ཝཱི་ཏ་ཉྩ སུ་པྤ་ཝཱ་ཡི་ཏ་ཉྩ སུ་ཝི་ལེ་ཁི་ཏ་ཉྩ སུ་ཝི་ཏ་ཙྪི་ཏ་ཉྩ ཀཱ་ཏུ’’ནྟི. ‘‘ཨི་ངྒྷ ཏྭཾ, ཨཱ་ཝུ་སོ, ཨཱ་ཡ་ཏ་ཉྩ ཀ་རོ་ཧི ཝི་ཏྠ་ཏ་ཉྩ ཨ་པྤི་ཏ་ཉྩ. ན ཏེ་ན སུ་ཏྟེ་ན པ་ཊི་བ་དྡྷཾ བྷ་ཝི་སྶ་ཏཱི’’ཏི.
ཨ་ཐ ཁོ སོ ཏ་ནྟ་ཝཱ་ཡོ ཡ་ཐཱ་བྷ་ཏཾ སུ་ཏྟཾ ཏ་ནྟེ ཨུ་པ་ནེ་ཏྭཱ ཡེ་ན སཱ ཨི་ཏྠཱི ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཏཾ ཨི་ཏྠིཾ ཨེ་ཏ་ད་ཝོ་ཙ – ‘‘སུ་ཏྟེ་ན, ཨ་ཡྻེ, ཨ་ཏྠོ’’ཏི. ‘‘ན་ནུ ཏྭཾ ཨ་ཡྻོ [ཨ་ཡྻ (སྱཱ.)] མ་ཡཱ ཝུ་ཏྟོ – ‘ཨི་མི་ནཱ སུ་ཏྟེ་ན ཙཱི་ཝ་རཾ ཝི་ནཱ་ཧཱི’’’ཏི. ‘‘ས་ཙྩཱ་ཧཾ, ཨ་ཡྻེ, ཏ་ཡཱ ཝུ་ཏྟོ – ‘ཨི་མི་ནཱ སུ་ཏྟེ་ན ཙཱི་ཝ་རཾ ཝི་ནཱ་ཧཱི’ཏི. ཨ་པི་ཙ, མཾ ཨ་ཡྻོ ཨུ་པ་ན་ནྡོ ཨེ་ཝ་མཱ་ཧ – ‘ཨི་ངྒྷ ཏྭཾ, ཨཱ་ཝུ་སོ, ཨཱ་ཡ་ཏ་ཉྩ ཀ་རོ་ཧི ཝི་ཏྠ་ཏ་ཉྩ ཨ་པྤི་ཏ་ཉྩ, ན ཏེ་ན སུ་ཏྟེ་ན པ་ཊི་བ་དྡྷཾ བྷ་ཝི་སྶ་ཏཱི’’’ཏི. ཨ་ཐ ཁོ སཱ ཨི་ཏྠཱི ཡ་ཏྟ་ཀཾ་ཡེ་ཝ སུ་ཏྟཾ པ་ཋ་མཾ ཨ་དཱ་སི ཏ་ཏྟ་ཀཾ པ་ཙྪཱ ཨ་དཱ་སི. ཨ་སྶོ་སི ཁོ ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ – ‘‘སོ ཀི་ར པུ་རི་སོ པ་ཝཱ་ས་ཏོ ཨཱ་ག་ཏོ’’ཏི. ཨ་ཐ ཁོ ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ ཡེ་ན ཏ་སྶ པུ་རི་ས་སྶ ནི་ཝེ་ས་ནཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི. ཨ་ཐ ཁོ སོ པུ་རི་སོ ཡེ་ནཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨུ་པ་ན་ནྡཾ ས་ཀྱ་པུ་ཏྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ སོ པུ་རི་སོ པ་ཛཱ་པ་ཏིཾ ཨེ་ཏ་ད་ཝོ་ཙ – ‘‘ཝཱི་ཏཾ ཏཾ ཙཱི་ཝ་ར’’ནྟི? ‘‘ཨཱ་མཱ་ཡྻ, ཝཱི་ཏཾ ཏཾ ཙཱི་ཝ་ར’’ནྟི. ‘‘ཨཱ་ཧ་ར, ཨ་ཡྻཾ ཨུ་པ་ན་ནྡཾ ཙཱི་ཝ་རེ་ན ཨ་ཙྪཱ་དེ་སྶཱ་མཱི’’ཏི. ཨ་ཐ ཁོ སཱ ཨི་ཏྠཱི ཏཾ ཙཱི་ཝ་རཾ ནཱི་ཧ་རི་ཏྭཱ སཱ་མི་ཀ་སྶ ད་ཏྭཱ ཨེ་ཏ་མ་ཏྠཾ ཨཱ་རོ་ཙེ་སི. ཨ་ཐ ཁོ སོ པུ་རི་སོ ཨཱ་ཡ་སྨ་ཏོ ཨུ་པ་ན་ནྡ་སྶ ས་ཀྱ་པུ་ཏྟ་སྶ ཙཱི་ཝ་རཾ ད་ཏྭཱ ཨུ་ཛ྄ཛྷཱ་ཡ་ཏི ཁི་ཡྻ་ཏི ཝི་པཱ་ཙེ་ཏི – ‘‘མ་ཧི་ཙྪཱ ཨི་མེ ས་མ་ཎཱ ས་ཀྱ་པུ་ཏྟི་ཡཱ ཨ་ས་ནྟུ་ཊྛཱ. ན་ཡི་མེ སུ་ཀ་རཱ ཙཱི་ཝ་རེ་ན ཨ་ཙྪཱ་དེ་ཏུཾ. ཀ་ཐ་ཉྷི ནཱ་མ ཨ་ཡྻོ ཨུ་པ་ན་ནྡོ མ་ཡཱ པུ་བྦེ ཨ་པྤ་ཝཱ་རི་ཏོ ཏ་ནྟ་ཝཱ་ཡེ [ག་ཧ་པ་ཏི་ཀ་སྶ ཏ་ནྟ་ཝཱ་ཡེ (ཀ.)] ཨུ་པ་ས་ངྐ་མི་ཏྭཱ ཙཱི་ཝ་རེ ཝི་ཀ་པྤཾ ཨཱ་པ་ཛྫི་སྶ་ཏཱི’’ཏི.
ཨ་སྶོ་སུཾ ཁོ བྷི་ཀྑཱུ ཏ་སྶ པུ་རི་ས་སྶ ཨུ་ཛ྄ཛྷཱ་ཡ་ནྟ་སྶ ཁི་ཡྻ་ནྟ་སྶ ཝི་པཱ་ཙེ་ནྟ་སྶ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ པུ་བྦེ ཨ་པྤ་ཝཱ་རི་ཏོ ག་ཧ་པ་ཏི་ཀ་སྶ ཏ་ནྟ་ཝཱ་ཡེ ཨུ་པ་ས་ངྐ་མི་ཏྭཱ ཙཱི་ཝ་རེ ཝི་ཀ་པྤཾ ཨཱ་པ་ཛྫི་སྶ་ཏཱི’’ཏི! ཨ་ཐ ཁོ ཏེ བྷི་ཀྑཱུ ཨཱ་ཡ་སྨ་ནྟཾ ཨུ་པ་ན་ནྡཾ ས་ཀྱ་པུ་ཏྟཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏྭཾ, ཨུ་པ་ན་ནྡ, པུ་བྦེ ཨ་པྤ་ཝཱ་རི་ཏོ ག་ཧ་པ་ཏི་ཀ་སྶ ཏ་ནྟ་ཝཱ་ཡེ ཨུ་པ་ས་ངྐ་མི་ཏྭཱ ཙཱི་ཝ་རེ ཝི་ཀ་པྤཾ ཨཱ་པ་ཛྫཱི’’ཏི? ‘‘ས་ཙྩཾ, བྷ་ག་ཝཱ’’ཏི. ‘‘ཉཱ་ཏ་ཀོ ཏེ, ཨུ་པ་ན་ནྡ, ཨ་ཉྙཱ་ཏ་ཀོ’’ཏི? ‘‘ཨ་ཉྙཱ་ཏ་ཀོ, བྷ་ག་ཝཱ’’ཏི. ‘‘ཨ་ཉྙཱ་ཏ་ཀོ, མོ་གྷ་པུ་རི་ས, ཨ་ཉྙཱ་ཏ་ཀ་སྶ ན ཛཱ་ནཱ་ཏི པ་ཏི་རཱུ་པཾ ཝཱ ཨ་པྤ་ཏི་རཱུ་པཾ ཝཱ ས་ནྟཾ ཝཱ ཨ་ས་ནྟཾ ཝཱ. ཏ་ཏྠ ནཱ་མ ཏྭཾ, མོ་གྷ་པུ་རི་ས, པུ་བྦེ ཨ་པྤ་ཝཱ་རི་ཏོ ཨ་ཉྙཱ་ཏ་ཀ་སྶ ག་ཧ་པ་ཏི་ཀ་སྶ ཏ་ནྟ་ཝཱ་ཡེ ཨུ་པ་ས་ངྐ་མི་ཏྭཱ ཙཱི་ཝ་རེ ཝི་ཀ་པྤཾ ཨཱ་པ་ཛྫི་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༦༤༢. ‘‘བྷི་ཀྑུཾ པ་ནེ་ཝ ཨུ་དྡི་སྶ ཨ་ཉྙཱ་ཏ་ཀོ ག་ཧ་པ་ཏི ཝཱ ག་ཧ་པ་ཏཱ་ནཱི ཝཱ ཏ་ནྟ་ཝཱ་ཡེ་ཧི ཙཱི་ཝ་རཾ ཝཱ་ཡཱ་པེ་ཡྻ, ཏ་ཏྲ ཙེ སོ བྷི་ཀྑུ པུ་བྦེ ཨ་པྤ་ཝཱ་རི་ཏོ ཏ་ནྟ་ཝཱ་ཡེ ཨུ་པ་ས་ངྐ་མི་ཏྭཱ ཙཱི་ཝ་རེ ཝི་ཀ་པྤཾ ཨཱ་པ་ཛྫེ་ཡྻ – ‘ཨི་དཾ ཁོ, ཨཱ་ཝུ་སོ, ཙཱི་ཝ་རཾ མཾ ཨུ་དྡི་སྶ ཝི་ཡྻ་ཏི. ཨཱ་ཡ་ཏ་ཉྩ ཀ་རོ་ཐ ཝི་ཏྠ་ཏ་ཉྩ. ཨ་པྤི་ཏ་ཉྩ སུ་ཝཱི་ཏ་ཉྩ སུ་པྤ་ཝཱ་ཡི་ཏ་ཉྩ སུ་ཝི་ལེ་ཁི་ཏ་ཉྩ སུ་ཝི་ཏ་ཙྪི་ཏ་ཉྩ ཀ་རོ་ཐ. ཨ་པྤེ་ཝ ནཱ་མ མ་ཡ་མྤི ཨཱ་ཡ་སྨ་ནྟཱ་ནཾ ཀི་ཉྩི་མ་ཏྟཾ ཨ་ནུ་པ་ད་ཛྫེ་ཡྻཱ་མཱ’ཏི. ཨེ་ཝ་ཉྩ སོ བྷི་ཀྑུ ཝ་ཏྭཱ ཀི་ཉྩི་མ་ཏྟཾ ཨ་ནུ་པ་ད་ཛྫེ་ཡྻ ཨ་ནྟ་མ་སོ པི་ཎྜ་པཱ་ཏ་མ་ཏྟ་མྤི, ནི་སྶ་གྒི་ཡཾ པཱ་ཙི་ཏྟི་ཡ’’ནྟི.
༦༤༣. བྷི་ཀྑུཾ པ་ནེ་ཝ ཨུ་དྡི་སྶཱཏི བྷི་ཀྑུ་སྶ་ཏྠཱ་ཡ བྷི་ཀྑུཾ ཨཱ་ར་མྨ་ཎཾ ཀ་རི་ཏྭཱ བྷི་ཀྑུཾ ཨ་ཙྪཱ་དེ་ཏུ་ཀཱ་མོ.
ཨ་ཉྙཱ་ཏ་ཀོ ནཱ་མ མཱ་ཏི་ཏོ ཝཱ པི་ཏི་ཏོ ཝཱ ཡཱ་ཝ ས་ཏྟ་མཱ པི་ཏཱ་མ་ཧ་ཡུ་གཱ ཨ་ས་མྦ་དྡྷོ.
ག་ཧ་པ་ཏི ནཱ་མ ཡོ ཀོ་ཙི ཨ་གཱ་རཾ ཨ་ཛ྄ཛྷཱ་ཝ་ས་ཏི.
ག་ཧ་པ་ཏཱ་ནཱི ནཱ་མ ཡཱ ཀཱ་ཙི ཨ་གཱ་རཾ ཨ་ཛ྄ཛྷཱ་ཝ་ས་ཏི.
ཏ་ནྟ་ཝཱ་ཡེ་ཧཱིཏི པེ་ས་ཀཱ་རེ་ཧི.
ཙཱི་ཝ་རཾ ནཱ་མ ཚ་ནྣཾ ཙཱི་ཝ་རཱ་ནཾ ཨ་ཉྙ་ཏ་རཾ ཙཱི་ཝ་རཾ ཝི་ཀ་པྤ་ནུ་པ་གཾ པ་ཙྪི་མཾ.
ཝཱ་ཡཱ་པེ་ཡྻཱཏི ཝི་ནཱ་པེ་ཏི.
ཏ་ཏྲ ཙེ སོ བྷི་ཀྑཱུཏི ཡཾ བྷི་ཀྑུཾ ཨུ་དྡི་སྶ ཙཱི་ཝ་རཾ ཝི་ཡྻ་ཏི སོ བྷི་ཀྑུ.
པུ་བྦེ ཨ་པྤ་ཝཱ་རི་ཏོཏི པུ་བྦེ ཨ་ཝུ་ཏྟོ ཧོ་ཏི – ‘‘ཀཱི་དི་སེ་ན ཏེ, བྷ་ནྟེ, ཙཱི་ཝ་རེ་ན ཨ་ཏྠོ, ཀཱི་དི་སཾ ཏེ ཙཱི་ཝ་རཾ ཝཱ་ཡཱ་པེ་མཱི’’ཏི?
ཏ་ནྟ་ཝཱ་ཡེ ཨུ་པ་ས་ངྐ་མི་ཏྭཱཏི གྷ་རཾ ག་ནྟྭཱ ཡ་ཏྠ ཀ་ཏྠ་ཙི ཨུ་པ་ས་ངྐ་མི་ཏྭཱ.
ཙཱི་ཝ་རེ ཝི་ཀ་པྤཾ ཨཱ་པ་ཛྫེ་ཡྻཱཏི – ‘‘ཨི་དཾ ཁོ, ཨཱ་ཝུ་སོ, ཙཱི་ཝ་རཾ མཾ ཨུ་དྡི་སྶ ཝི་ཡྻ་ཏི, ཨཱ་ཡ་ཏ་ཉྩ ཀ་རོ་ཐ ཝི་ཏྠ་ཏ་ཉྩ. ཨ་པྤི་ཏ་ཉྩ སུ་ཝཱི་ཏ་ཉྩ སུ་པྤ་ཝཱ་ཡི་ཏ་ཉྩ སུ་ཝི་ལེ་ཁི་ཏ་ཉྩ སུ་ཝི་ཏ་ཙྪི་ཏ་ཉྩ ཀ་རོ་ཐ. ཨ་པྤེ་ཝ ནཱ་མ མ་ཡ་མྤི ཨཱ་ཡ་སྨ་ནྟཱ་ནཾ ཀི་ཉྩི་མ་ཏྟཾ ཨ་ནུ་པ་ད་ཛྫེ་ཡྻཱ་མཱ’’ཏི.
ཨེ་ཝ་ཉྩ སོ བྷི་ཀྑུ ཝ་ཏྭཱ ཀི་ཉྩི་མ་ཏྟཾ ཨ་ནུ་པ་ད་ཛྫེ་ཡྻ ཨ་ནྟ་མ་སོ པི་ཎྜ་པཱ་ཏ་མ་ཏྟ་མྤཱིཏི. པི་ཎྜ་པཱ་ཏོ ནཱ་མ ཡཱ་གུ་པི བྷ་ཏྟ་མྤི ཁཱ་ད་ནཱི་ཡ་མྤི ཙུ་ཎྞ་པི་ཎྜོ་པི ད་ནྟ་ཀ་ཊྛ་མྤི ད་སི་ཀ་སུ་ཏྟ་མྤི, ཨ་ནྟ་མ་སོ དྷ་མྨ་མྤི བྷ་ཎ་ཏི.
ཏ་སྶ ཝ་ཙ་ནེ་ན ཨཱ་ཡ་ཏཾ ཝཱ ཝི་ཏྠ་ཏཾ ཝཱ ཨ་པྤི་ཏཾ ཝཱ ཀ་རོ་ཏི, པ་ཡོ་གེ དུ་ཀྐ་ཊཾ. པ་ཊི་ལཱ་བྷེ་ན ནི་སྶ་གྒི་ཡཾ ཧོ་ཏི. ནི་སྶ་ཛྫི་ཏ་བྦཾ ས་ངྒྷ་སྶ ཝཱ ག་ཎ་སྶ ཝཱ པུ་གྒ་ལ་སྶ ཝཱ. ཨེ་ཝ་ཉྩ པ་ན, བྷི་ཀྑ་ཝེ, ནི་སྶ་ཛྫི་ཏ་བྦཾ…པེ… ཨི་དཾ མེ, བྷ་ནྟེ, ཙཱི་ཝ་རཾ པུ་བྦེ ཨ་པྤ་ཝཱ་རི་ཏོ ཨ་ཉྙཱ་ཏ་ཀ་སྶ ག་ཧ་པ་ཏི་ཀ་སྶ ཏ་ནྟ་ཝཱ་ཡེ ཨུ་པ་ས་ངྐ་མི་ཏྭཱ ཙཱི་ཝ་རེ ཝི་ཀ་པྤཾ ཨཱ་པ་ནྣཾ ནི་སྶ་གྒི་ཡཾ. ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མཱི་ཏི…པེ… ད་དེ་ཡྻཱ་ཏི…པེ… ད་དེ་ཡྻུ་ནྟི…པེ… ཨཱ་ཡ་སྨ་ཏོ ད་མྨཱི་ཏི.
༦༤༤. ཨ་ཉྙཱ་ཏ་ཀེ ཨ་ཉྙཱ་ཏ་ཀ་ས་ཉྙཱི པུ་བྦེ ཨ་པྤ་ཝཱ་རི་ཏོ ག་ཧ་པ་ཏི་ཀ་སྶ ཏ་ནྟ་ཝཱ་ཡེ ཨུ་པ་ས་ངྐ་མི་ཏྭཱ ཙཱི་ཝ་རེ ཝི་ཀ་པྤཾ ཨཱ་པ་ཛྫ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཉྙཱ་ཏ་ཀེ ཝེ་མ་ཏི་ཀོ པུ་བྦེ ཨ་པྤ་ཝཱ་རི་ཏོ ག་ཧ་པ་ཏི་ཀ་སྶ ཏ་ནྟ་ཝཱ་ཡེ ཨུ་པ་ས་ངྐ་མི་ཏྭཱ ཙཱི་ཝ་རེ ཝི་ཀ་པྤཾ ཨཱ་པ་ཛྫ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཉྙཱ་ཏ་ཀེ ཉཱ་ཏ་ཀ་ས་ཉྙཱི པུ་བྦེ ཨ་པྤ་ཝཱ་རི་ཏོ ག་ཧ་པ་ཏི་ཀ་སྶ ཏ་ནྟ་ཝཱ་ཡེ ཨུ་པ་ས་ངྐ་མི་ཏྭཱ ཙཱི་ཝ་རེ ཝི་ཀ་པྤཾ ཨཱ་པ་ཛྫ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ.
ཉཱ་ཏ་ཀེ ཨ་ཉཱ་ཏ་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཉཱ་ཏ་ཀེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཉཱ་ཏ་ཀེ ཉཱ་ཏ་ཀ་ས་ཉྙཱི, ཨ་ནཱ་པ་ཏྟི.
༦༤༥. ཨ་ནཱ་པ་ཏྟི – ཉཱ་ཏ་ཀཱ་ནཾ, པ་ཝཱ་རི་ཏཱ་ནཾ, ཨ་ཉྙ་སྶ་ཏྠཱ་ཡ, ཨ་ཏྟ་ནོ དྷ་ནེ་ན, མ་ཧ་གྒྷཾ ཝཱ་ཡཱ་པེ་ཏུ་ཀཱ་མ་སྶ ཨ་པྤ་གྒྷཾ ཝཱ་ཡཱ་པེ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
མ་ཧཱ་པེ་ས་ཀཱ་ར་སི་ཀྑཱ་པ་དཾ ནི་ཊྛི་ཏཾ ས་ཏྟ་མཾ.