༦. སུ་ཏྟ་ཝི་ཉྙ་ཏྟི་སི་ཀྑཱ་པ་དཾ
༦༣༦. ཏེ་ན ས་མ་ཡེ་ན བུ་དྡྷོ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ཙཱི་ཝ་ར་ཀཱ་ར་ས་མ་ཡེ བ་ཧུཾ སུ་ཏྟཾ ཝི་ཉྙཱ་པེ་སུཾ. ཀ་ཏེ་པི ཙཱི་ཝ་རེ བ་ཧུཾ སུ་ཏྟཾ ཨ་ཝ་སི་ཊྛཾ ཧོ་ཏི. ཨ་ཐ ཁོ ཚ་བྦ་གྒི་ཡཱ་ནཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཧ་ནྡ མ་ཡཾ, ཨཱ་ཝུ་སོ, ཨ་ཉྙ་མྤི སུ་ཏྟཾ ཝི་ཉྙཱ་པེ་ཏྭཱ ཏ་ནྟ་ཝཱ་ཡེ་ཧི ཙཱི་ཝ་རཾ ཝཱ་ཡཱ་པེ་མཱ’’ཏི. ཨ་ཐ ཁོ ཚ་བྦ་གྒི་ཡཱ བྷི་ཀྑཱུ ཨ་ཉྙ་མྤི སུ་ཏྟཾ ཝི་ཉྙཱ་པེ་ཏྭཱ ཏ་ནྟ་ཝཱ་ཡེ་ཧི ཙཱི་ཝ་རཾ ཝཱ་ཡཱ་པེ་སུཾ. ཝཱི་ཏེ་པི ཙཱི་ཝ་རེ བ་ཧུཾ སུ་ཏྟཾ ཨ་ཝ་སི་ཊྛཾ ཧོ་ཏི. དུ་ཏི་ཡ་མྤི ཁོ ཚ་བྦ་གྒི་ཡཱ བྷི་ཀྑཱུ ཨ་ཉྙ་མྤི སུ་ཏྟཾ ཝི་ཉྙཱ་པེ་ཏྭཱ ཏ་ནྟ་ཝཱ་ཡེ་ཧི ཙཱི་ཝ་རཾ ཝཱ་ཡཱ་པེ་སུཾ. ཝཱི་ཏེ་པི ཙཱི་ཝ་རེ བ་ཧུཾ སུ་ཏྟཾ ཨ་ཝ་སི་ཊྛཾ ཧོ་ཏི. ཏ་ཏི་ཡ་མྤི ཁོ ཚ་བྦ་གྒི་ཡཱ བྷི་ཀྑཱུ ཨ་ཉྙ་མྤི སུ་ཏྟཾ ཝི་ཉྙཱ་པེ་ཏྭཱ ཏ་ནྟ་ཝཱ་ཡེ་ཧི ཙཱི་ཝ་རཾ ཝཱ་ཡཱ་པེ་སུཾ. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ སཱ་མཾ སུ་ཏྟཾ ཝི་ཉྙཱ་པེ་ཏྭཱ ཏ་ནྟ་ཝཱ་ཡེ་ཧི ཙཱི་ཝ་རཾ ཝཱ་ཡཱ་པེ་སྶ་ནྟཱི’’ཏི!
ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡེ ཏེ བྷི་ཀྑཱུ ཨ་པྤི་ཙྪཱ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ སཱ་མཾ སུ་ཏྟཾ ཝི་ཉྙཱ་པེ་ཏྭཱ ཏ་ནྟ་ཝཱ་ཡེ་ཧི ཙཱི་ཝ་རཾ ཝཱ་ཡཱ་པེ་སྶ་ནྟཱི’’ཏི! ཨ་ཐ ཁོ ཏེ བྷི་ཀྑཱུ ཚ་བྦ་གྒི་ཡེ བྷི་ཀྑཱུ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏུ་མྷེ, བྷི་ཀྑ་ཝེ, སཱ་མཾ སུ་ཏྟཾ ཝི་ཉྙཱ་པེ་ཏྭཱ ཏ་ནྟ་ཝཱ་ཡེ་ཧི ཙཱི་ཝ་རཾ ཝཱ་ཡཱ་པེ་ཐཱ’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, སཱ་མཾ སུ་ཏྟཾ ཝི་ཉྙཱ་པེ་ཏྭཱ ཏ་ནྟ་ཝཱ་ཡེ་ཧི ཙཱི་ཝ་རཾ ཝཱ་ཡཱ་པེ་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༦༣༧. ‘‘ཡོ པ་ན བྷི་ཀྑུ སཱ་མཾ སུ་ཏྟཾ ཝི་ཉྙཱ་པེ་ཏྭཱ ཏ་ནྟ་ཝཱ་ཡེ་ཧི ཙཱི་ཝ་རཾ ཝཱ་ཡཱ་པེ་ཡྻ, ནི་སྶ་གྒི་ཡཾ པཱ་ཙི་ཏྟི་ཡ’’ནྟི.
༦༣༨. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
སཱ་མནྟི ས་ཡཾ ཝི་ཉྙཱ་པེ་ཏྭཱ.
སུ་ཏྟཾ ནཱ་མ ཚ སུ་ཏྟཱ་ནི – ཁོ་མཾ ཀ་པྤཱ་སི་ཀཾ ཀོ་སེ་ཡྻཾ ཀ་མྦ་ལཾ སཱ་ཎཾ བྷ་ངྒཾ.
ཏ་ནྟ་ཝཱ་ཡེ་ཧཱིཏི པེ་ས་ཀཱ་རེ་ཧི ཝཱ་ཡཱ་པེ་ཏི, པ་ཡོ་གེ པ་ཡོ་གེ དུ་ཀྐ་ཊཾ [ཝཱ་ཡཱ་པེ་ཏི, པ་ཡོ་གེ དུ་ཀྐ་ཊཾ (སྱཱ.)]. པ་ཊི་ལཱ་བྷེ་ན ནི་སྶ་གྒི་ཡཾ ཧོ་ཏི. ནི་སྶ་ཛྫི་ཏ་བྦཾ ས་ངྒྷ་སྶ ཝཱ ག་ཎ་སྶ ཝཱ པུ་གྒ་ལ་སྶ ཝཱ. ཨེ་ཝ་ཉྩ པ་ན, བྷི་ཀྑ་ཝེ, ནི་སྶ་ཛྫི་ཏ་བྦཾ…པེ… ཨི་དཾ མེ, བྷ་ནྟེ, ཙཱི་ཝ་རཾ སཱ་མཾ སུ་ཏྟཾ ཝི་ཉྙཱ་པེ་ཏྭཱ ཏ་ནྟ་ཝཱ་ཡེ་ཧི ཝཱ་ཡཱ་པི་ཏཾ ནི་སྶ་གྒི་ཡཾ. ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མཱི་ཏི…པེ… ད་དེ་ཡྻཱ་ཏི…པེ… ད་དེ་ཡྻུ་ནྟི…པེ… ཨཱ་ཡ་སྨ་ཏོ ད་མྨཱི་ཏི.
༦༣༩. ཝཱ་ཡཱ་པི་ཏེ ཝཱ་ཡཱ་པི་ཏ་ས་ཉྙཱི, ནི་སྶ་གྒི་ཡཾ པཱ་ཙི་ཏྟི་ཡཾ. ཝཱ་ཡཱ་པི་ཏེ ཝེ་མ་ཏི་ཀོ, ནི་སྶ་གྒི་ཡཾ པཱ་ཙི་ཏྟི་ཡཾ. ཝཱ་ཡཱ་པི་ཏེ ཨ་ཝཱ་ཡཱ་པི་ཏ་ས་ཉྙཱི, ནི་སྶ་གྒི་ཡཾ པཱ་ཙི་ཏྟི་ཡཾ.
ཨ་ཝཱ་ཡཱ་པི་ཏེ ཝཱ་ཡཱ་པི་ཏ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་ཝཱ་ཡཱ་པི་ཏེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་ཝཱ་ཡཱ་པི་ཏེ ཨ་ཝཱ་ཡཱ་པི་ཏ་ས་ཉྙཱི, ཨ་ནཱ་པ་ཏྟི.
༦༤༠. ཨ་ནཱ་པ་ཏྟི – ཙཱི་ཝ་རཾ སི་བྦེ་ཏུཾ, ཨཱ་ཡོ་གེ, ཀཱ་ཡ་བ་ནྡྷ་ནེ, ཨཾ་ས་བ་ནྡྷ་ཀེ [ཨཾ་ས་ཝ་ཊྚ་ཀེ (སཱི.)], པ་ཏྟ་ཏྠ་ཝི་ཀཱ་ཡ, པ་རི་སྶཱ་ཝ་ནེ, ཉཱ་ཏ་ཀཱ་ནཾ, པ་ཝཱ་རི་ཏཱ་ནཾ, ཨ་ཉྙ་སྶ་ཏྠཱ་ཡ, ཨ་ཏྟ་ནོ དྷ་ནེ་ན, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
སུ་ཏྟ་ཝི་ཉྙ་ཏྟི་སི་ཀྑཱ་པ་དཾ ནི་ཊྛི་ཏཾ ཚ་ཊྛཾ.