༥. ཙཱི་ཝ་ར་ཨ་ཙྪི་ནྡ་ན་སི་ཀྑཱ་པ་དཾ
༦༣༡. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ བྷཱ་ཏུ་ནོ ས་དྡྷི་ཝི་ཧཱ་རི་ཀཾ བྷི་ཀྑུཾ ཨེ་ཏ་ད་ཝོ་ཙ – ‘‘ཨེ་ཧཱ་ཝུ་སོ, ཛ་ན་པ་ད་ཙཱ་རི་ཀཾ པ་ཀྐ་མི་སྶཱ་མཱ’’ཏི. ‘‘ནཱ་ཧཾ, བྷ་ནྟེ, ག་མི་སྶཱ་མི; དུ་བྦ་ལ་ཙཱི་ཝ་རོ་མྷཱི’’ཏི. ‘‘ཨེ་ཧཱ་ཝུ་སོ, ཨ་ཧཾ ཏེ ཙཱི་ཝ་རཾ ད་སྶཱ་མཱི’’ཏི ཏ་སྶ ཙཱི་ཝ་རཾ ཨ་དཱ་སི. ཨ་སྶོ་སི ཁོ སོ བྷི་ཀྑུ – ‘‘བྷ་ག་ཝཱ ཀི་ར ཛ་ན་པ་ད་ཙཱ་རི་ཀཾ པ་ཀྐ་མི་སྶ་ཏཱི’’ཏི. ཨ་ཐ ཁོ ཏ་སྶ བྷི་ཀྑུ་ནོ ཨེ་ཏ་ད་ཧོ་སི – ‘‘ན དཱ་ནཱ་ཧཾ ཨཱ་ཡ་སྨ་ཏཱ ཨུ་པ་ན་ནྡེ་ན ས་ཀྱ་པུ་ཏྟེ་ན ས་དྡྷིཾ ཛ་ན་པ་ད་ཙཱ་རི་ཀཾ པ་ཀྐ་མི་སྶཱ་མི, བྷ་ག་ཝ་ཏཱ ས་དྡྷིཾ ཛ་ན་པ་ད་ཙཱ་རི་ཀཾ པ་ཀྐ་མི་སྶཱ་མཱི’’ཏི. ཨ་ཐ ཁོ ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ ཏཾ བྷི་ཀྑུཾ ཨེ་ཏ་ད་ཝོ་ཙ – ‘‘ཨེ་ཧི དཱ་ནི, ཨཱ་ཝུ་སོ, ཛ་ན་པ་ད་ཙཱ་རི་ཀཾ པ་ཀྐ་མི་སྶཱ་མཱ’’ཏི. ‘‘ནཱ་ཧཾ, བྷ་ནྟེ, ཏ་ཡཱ ས་དྡྷིཾ ཛ་ན་པ་ད་ཙཱ་རི་ཀཾ པ་ཀྐ་མི་སྶཱ་མི, བྷ་ག་ཝ་ཏཱ ས་དྡྷིཾ ཛ་ན་པ་ད་ཙཱ་རི་ཀཾ པ་ཀྐ་མི་སྶཱ་མཱི’’ཏི. ‘‘ཡ་མྤི ཏྱཱ་ཧཾ, ཨཱ་ཝུ་སོ, ཙཱི་ཝ་རཾ ཨ་དཱ་སིཾ, མ་ཡཱ ས་དྡྷིཾ ཛ་ན་པ་ད་ཙཱ་རི་ཀཾ པ་ཀྐ་མི་སྶ་ཏཱི’’ཏི, ཀུ་པི་ཏོ ཨ་ན་ཏྟ་མ་ནོ ཨ་ཙྪི་ནྡི.
ཨ་ཐ ཁོ སོ བྷི་ཀྑུ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ བྷི་ཀྑུ་སྶ སཱ་མཾ ཙཱི་ཝ་རཾ ད་ཏྭཱ ཀུ་པི་ཏོ ཨ་ན་ཏྟ་མ་ནོ ཨ་ཙྪི་ནྡི་སྶ་ཏཱི’’ཏི! ཨ་ཐ ཁོ ཏེ བྷི་ཀྑཱུ ཨཱ་ཡ་སྨ་ནྟཾ ཨུ་པ་ན་ནྡཾ ས་ཀྱ་པུ་ཏྟཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏྭཾ, ཨུ་པ་ན་ནྡ, བྷི་ཀྑུ་སྶ སཱ་མཾ ཙཱི་ཝ་རཾ ད་ཏྭཱ ཀུ་པི་ཏོ ཨ་ན་ཏྟ་མ་ནོ ཨ་ཙྪི་ནྡཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, བྷི་ཀྑུ་སྶ སཱ་མཾ ཙཱི་ཝ་རཾ ད་ཏྭཱ ཀུ་པི་ཏོ ཨ་ན་ཏྟ་མ་ནོ ཨ་ཙྪི་ནྡི་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༦༣༢. ‘‘ཡོ པ་ན བྷི་ཀྑུ བྷི་ཀྑུ་སྶ སཱ་མཾ ཙཱི་ཝ་རཾ ད་ཏྭཱ ཀུ་པི་ཏོ ཨ་ན་ཏྟ་མ་ནོ ཨ་ཙྪི་ནྡེ་ཡྻ ཝཱ ཨ་ཙྪི་ནྡཱ་པེ་ཡྻ ཝཱ, ནི་སྶ་གྒི་ཡཾ པཱ་ཙི་ཏྟི་ཡ’’ནྟི.
༦༣༣. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
བྷི་ཀྑུ་སྶཱཏི ཨ་ཉྙ་སྶ བྷི་ཀྑུ་སྶ.
སཱ་མནྟི ས་ཡཾ ད་ཏྭཱ.
ཙཱི་ཝ་རཾ ནཱ་མ ཚ་ནྣཾ ཙཱི་ཝ་རཱ་ནཾ ཨ་ཉྙ་ཏ་རཾ ཙཱི་ཝ་རཾ, ཝི་ཀ་པྤ་ནུ་པ་གཾ པ་ཙྪི་མཾ.
ཀུ་པི་ཏོ ཨ་ན་ཏྟ་མ་ནོཏི ཨ་ན་བྷི་ར་དྡྷོ ཨཱ་ཧ་ཏ་ཙི་ཏྟོ ཁི་ལ་ཛཱ་ཏོ.
ཨ་ཙྪི་ནྡེ་ཡྻཱཏི ས་ཡཾ ཨ་ཙྪི་ནྡ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ [ནི་སྶ་གྒི་ཡཾ ཧོ་ཏི (སྱཱ.)].
ཨ་ཙྪི་ནྡཱ་པེ་ཡྻཱཏི ཨ་ཉྙཾ ཨཱ་ཎཱ་པེ་ཏི, ཨཱ་པ་ཏྟི དུ་ཀྐ་ཊ་སྶ. ས་ཀིཾ ཨཱ་ཎ་ཏྟོ བ་ཧུ་ཀ་མྤི ཨ་ཙྪི་ནྡ་ཏི, ནི་སྶ་གྒི་ཡཾ ཧོ་ཏི. ནི་སྶ་ཛྫི་ཏ་བྦཾ ས་ངྒྷ་སྶ ཝཱ ག་ཎ་སྶ ཝཱ པུ་གྒ་ལ་སྶ ཝཱ. ཨེ་ཝ་ཉྩ པ་ན, བྷི་ཀྑ་ཝེ, ནི་སྶ་ཛྫི་ཏ་བྦཾ…པེ… ཨི་དཾ མེ, བྷ་ནྟེ, ཙཱི་ཝ་རཾ བྷི་ཀྑུ་སྶ སཱ་མཾ ད་ཏྭཱ ཨ་ཙྪི་ནྣཾ ནི་སྶ་གྒི་ཡཾ ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མཱི་ཏི…པེ… ད་དེ་ཡྻཱ་ཏི …པེ… ད་དེ་ཡྻུ་ནྟི…པེ… ཨཱ་ཡ་སྨ་ཏོ ད་མྨཱི་ཏི.
༦༣༤. ཨུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི ཙཱི་ཝ་རཾ ད་ཏྭཱ ཀུ་པི་ཏོ ཨ་ན་ཏྟ་མ་ནོ ཨ་ཙྪི་ནྡ་ཏི ཝཱ ཨ་ཙྪི་ནྡཱ་པེ་ཏི ཝཱ, ནི་སྶ་གྒི་ཡཾ པཱ་ཙི་ཏྟི་ཡཾ. ཨུ་པ་ས་མྤ་ནྣེ ཝེ་མ་ཏི་ཀོ ཙཱི་ཝ་རཾ ད་ཏྭཱ ཀུ་པི་ཏོ ཨ་ན་ཏྟ་མ་ནོ ཨ་ཙྪི་ནྡ་ཏི ཝཱ ཨ་ཙྪི་ནྡཱ་པེ་ཏི ཝཱ, ནི་སྶ་གྒི་ཡཾ པཱ་ཙི་ཏྟི་ཡཾ. ཨུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི ཙཱི་ཝ་རཾ ད་ཏྭཱ ཀུ་པི་ཏོ ཨ་ན་ཏྟ་མ་ནོ ཨ་ཙྪི་ནྡ་ཏི ཝཱ ཨ་ཙྪི་ནྡཱ་པེ་ཏི ཝཱ, ནི་སྶ་གྒི་ཡཾ པཱ་ཙི་ཏྟི་ཡཾ.
ཨ་ཉྙཾ པ་རི་ཀྑཱ་རཾ ད་ཏྭཱ ཀུ་པི་ཏོ ཨ་ན་ཏྟ་མ་ནོ ཨ་ཙྪི་ནྡ་ཏི ཝཱ ཨ་ཙྪི་ནྡཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣ་སྶ ཙཱི་ཝ་རཾ ཝཱ ཨ་ཉྙཾ ཝཱ པ་རི་ཀྑཱ་རཾ ད་ཏྭཱ ཀུ་པི་ཏོ ཨ་ན་ཏྟ་མ་ནོ ཨ་ཙྪི་ནྡ་ཏི ཝཱ ཨ་ཙྪི་ནྡཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ.
༦༣༥. ཨ་ནཱ་པ་ཏྟི – སོ ཝཱ དེ་ཏི, ཏ་སྶ ཝཱ ཝི་སྶ་ས་ནྟོ ག་ཎྷཱ་ཏི, ཨུ་མྨ་ཏྟ་ཀ་སྶ ཨཱ་དི་ཀ་མྨི་ཀ་སྶཱ་ཏི.
ཙཱི་ཝ་ར་ཨ་ཙྪི་ནྡ་ན་སི་ཀྑཱ་པ་དཾ ནི་ཊྛི་ཏཾ པ་ཉྩ་མཾ.