༤. ཚ་བྦ་སྶ་སི་ཀྑཱ་པ་དཾ
༥༥༧. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑཱུ ཨ་ནུ་ཝ་སྶཾ ས་ནྠ་ཏཾ ཀཱ་རཱ་པེ་ནྟི. ཏེ ཡཱ་ཙ་ན་བ་ཧུ་ལཱ ཝི་ཉྙ་ཏྟི་བ་ཧུ་ལཱ ཝི་ཧ་ར་ནྟི – ‘‘ཨེ་ལ༹་ཀ་ལོ་མཱ་ནི དེ་ཐ. ཨེ་ལ༹་ཀ་ལོ་མེ་ཧི ཨ་ཏྠོ’’ཏི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ ཨ་ནུ་ཝ་སྶཾ ས་ནྠ་ཏཾ ཀཱ་རཱ་པེ་སྶ་ནྟི, ཡཱ་ཙ་ན་བ་ཧུ་ལཱ ཝི་ཉྙ་ཏྟི་བ་ཧུ་ལཱ ཝི་ཧ་རི་སྶ་ནྟི – ‘ཨེ་ལ༹་ཀ་ལོ་མཱ་ནི དེ་ཐ, ཨེ་ལ༹་ཀ་ལོ་མེ་ཧི ཨ་ཏྠོ’’’ཏི! ཨ་མྷཱ་ཀཾ པ་ན ས་ཀིཾ ཀ་ཏཱ་ནི ས་ནྠ་ཏཱ་ནི པ་ཉྩ་པི ཚ་པི ཝ་སྶཱ་ནི ཧོ་ནྟི, ཡེ་སཾ ནོ དཱ་ར་ཀཱ ཨུ་ཧ་ད་ནྟི་པི ཨུ་མྨི་ཧ་ནྟི་པི ཨུ་ནྡཱུ་རེ་ཧི་པི ཁ་ཛྫ་ནྟི. ཨི་མེ པ་ན ས་མ་ཎཱ ས་ཀྱ་པུ་ཏྟི་ཡཱ ཨ་ནུ་ཝ་སྶཾ ས་ནྠ་ཏཾ ཀཱ་རཱ་པེ་ནྟི, ཡཱ་ཙ་ན་བ་ཧུ་ལཱ ཝི་ཉྙ་ཏྟི་བ་ཧུ་ལཱ ཝི་ཧ་ར་ནྟི – ‘‘ཨེ་ལ༹་ཀ་ལོ་མཱ་ནི དེ་ཐ, ཨེ་ལ༹་ཀ་ལོ་མེ་ཧི ཨ་ཏྠོ’’ཏི!
ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑཱུ ཨ་ནུ་ཝ་སྶཾ ས་ནྠ་ཏཾ ཀཱ་རཱ་པེ་སྶ་ནྟི, ཡཱ་ཙ་ན་བ་ཧུ་ལཱ ཝི་ཉྙ་ཏྟི་བ་ཧུ་ལཱ ཝི་ཧ་རི་སྶ་ནྟི – ‘ཨེ་ལ༹་ཀ་ལོ་མཱ་ནི དེ་ཐ, ཨེ་ལ༹་ཀ་ལོ་མེ་ཧི ཨ་ཏྠོ’’’ཏི! ཨ་ཐ ཁོ ཏེ བྷི་ཀྑཱུ ཏེ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑཱུ ཨ་ནུ་ཝ་སྶཾ ས་ནྠ་ཏཾ ཀཱ་རཱ་པེ་ནྟི, ཡཱ་ཙ་ན་བ་ཧུ་ལཱ ཝི་ཉྙ་ཏྟི་བ་ཧུ་ལཱ ཝི་ཧ་ར་ནྟི – ‘ཨེ་ལ༹་ཀ་ལོ་མཱ་ནི དེ་ཐ, ཨེ་ལ༹་ཀ་ལོ་མེ་ཧི ཨ་ཏྠོ’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏེ, བྷི་ཀྑ་ཝེ, མོ་གྷ་པུ་རི་སཱ ཨ་ནུ་ཝ་སྶཾ ས་ནྠ་ཏཾ ཀཱ་རཱ་པེ་སྶ་ནྟི, ཡཱ་ཙ་ན་བ་ཧུ་ལཱ ཝི་ཉྙ་ཏྟི་བ་ཧུ་ལཱ ཝི་ཧ་རི་སྶ་ནྟི – ‘ཨེ་ལ༹་ཀ་ལོ་མཱ་ནི དེ་ཐ, ཨེ་ལ༹་ཀ་ལོ་མེ་ཧི ཨ་ཏྠོ’ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༥༥༨. ‘‘ན་ཝཾ པ་ན བྷི་ཀྑུ་ནཱ ས་ནྠ་ཏཾ ཀཱ་རཱ་པེ་ཏྭཱ ཚ་བྦ་སྶཱ་ནི དྷཱ་རེ་ཏ་བྦཾ. ཨོ་རེ་ན ཙེ ཚ་ནྣཾ ཝ་སྶཱ་ནཾ ཏཾ ས་ནྠ་ཏཾ ཝི་སྶ་ཛྫེ་ཏྭཱ ཝཱ ཨ་ཝི་སྶ་ཛྫེ་ཏྭཱ ཝཱ ཨ་ཉྙཾ ན་ཝཾ ས་ནྠ་ཏཾ ཀཱ་རཱ་པེ་ཡྻ, ནི་སྶ་གྒི་ཡཾ པཱ་ཙི་ཏྟི་ཡ’’ནྟི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༥༥༩. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ བྷི་ཀྑུ ཀོ་ས་མྦི་ཡཾ གི་ལཱ་ནོ ཧོ་ཏི. ཉཱ་ཏ་ཀཱ ཏ་སྶ བྷི་ཀྑུ་ནོ ས་ནྟི་ཀེ དཱུ་ཏཾ པཱ་ཧེ་སུཾ – ‘‘ཨཱ་ག་ཙྪ་ཏུ, བྷ་ད་ནྟོ མ་ཡཾ ཨུ་པ་ཊྛ་ཧི་སྶཱ་མཱ’’ཏི. བྷི་ཀྑཱུ་པི ཨེ་ཝ་མཱ་ཧཾ་སུ – ‘‘ག་ཙྪཱ་ཝུ་སོ, ཉཱ་ཏ་ཀཱ ཏཾ ཨུ་པ་ཊྛ་ཧི་སྶ་ནྟཱི’’ཏི. སོ ཨེ་ཝ་མཱ་ཧ – ‘‘བྷ་ག་ཝ་ཏཱ, ཨཱ་ཝུ་སོ, སི་ཀྑཱ་པ་དཾ པ་ཉྙ་ཏྟཾ – ‘ན་ཝཾ པ་ན བྷི་ཀྑུ་ནཱ ས་ནྠ་ཏཾ ཀཱ་རཱ་པེ་ཏྭཱ ཚ་བྦ་སྶཱ་ནི དྷཱ་རེ་ཏ་བྦ’ནྟི. ཨ་ཧ་ཉྩ་མྷི གི་ལཱ་ནོ, ན ས་ཀྐོ་མི ས་ནྠ་ཏཾ ཨཱ་དཱ་ཡ པ་ཀྐ་མི་ཏུཾ. མ་ཡ྄ཧ་ཉྩ ཝི་ནཱ ས་ནྠ་ཏཱ ན ཕཱ་སུ ཧོ་ཏི. ནཱ་ཧཾ ག་མི་སྶཱ་མཱི’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, གི་ལཱ་ན་སྶ བྷི་ཀྑུ་ནོ ས་ནྠ་ཏ་ས་མྨུ་ཏིཾ དཱ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, དཱ་ཏ་བྦཱ. ཏེ་ན གི་ལཱ་ནེ་ན བྷི་ཀྑུ་ནཱ ས་ངྒྷཾ ཨུ་པ་ས་ངྐ་མི་ཏྭཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཝུ་ཌྜྷཱ་ནཾ བྷི་ཀྑཱུ་ནཾ པཱ་དེ ཝ་ནྡི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཨེ་ཝ་མ་སྶ ཝ་ཙ་ནཱི་ཡོ – ‘ཨ་ཧཾ, བྷ་ནྟེ, གི་ལཱ་ནོ. ན ས་ཀྐོ་མི ས་ནྠ་ཏཾ ཨཱ་དཱ་ཡ པ་ཀྐ་མི་ཏུཾ. སོ་ཧཾ, བྷ་ནྟེ, ས་ངྒྷཾ ས་ནྠ་ཏ་ས་མྨུ་ཏིཾ ཡཱ་ཙཱ་མཱི’ཏི. དུ་ཏི་ཡ་མྤི ཡཱ་ཙི་ཏ་བྦཱ. ཏ་ཏི་ཡ་མྤི ཡཱ་ཙི་ཏ་བྦཱ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –
༥༦༠. ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ཨི་ཏྠ་ནྣཱ་མོ བྷི་ཀྑུ གི་ལཱ་ནོ. ན ས་ཀྐོ་ཏི ས་ནྠ་ཏཾ ཨཱ་དཱ་ཡ པ་ཀྐ་མི་ཏུཾ. སོ ས་ངྒྷཾ ས་ནྠ་ཏ་ས་མྨུ་ཏིཾ ཡཱ་ཙ་ཏི. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨི་ཏྠ་ནྣཱ་མ་སྶ བྷི་ཀྑུ་ནོ ས་ནྠ་ཏ་ས་མྨུ་ཏིཾ ད་དེ་ཡྻ. ཨེ་སཱ ཉ་ཏྟི.
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ཨི་ཏྠ་ནྣཱ་མོ བྷི་ཀྑུ གི་ལཱ་ནོ. ན ས་ཀྐོ་ཏི ས་ནྠ་ཏཾ ཨཱ་དཱ་ཡ པ་ཀྐ་མི་ཏུཾ. སོ ས་ངྒྷཾ ས་ནྠ་ཏ་ས་མྨུ་ཏིཾ ཡཱ་ཙ་ཏི. ས་ངྒྷོ ཨི་ཏྠ་ནྣཱ་མ་སྶ བྷི་ཀྑུ་ནོ ས་ནྠ་ཏ་ས་མྨུ་ཏིཾ དེ་ཏི. ཡ་སྶཱ་ཡ་སྨ་ཏོ ཁ་མ་ཏི ཨི་ཏྠ་ནྣཱ་མ་སྶ བྷི་ཀྑུ་ནོ ས་ནྠ་ཏ་ས་མྨུ་ཏི་ཡཱ དཱ་ནཾ, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ.
‘‘དི་ནྣཱ ས་ངྒྷེ་ན ཨི་ཏྠ་ནྣཱ་མ་སྶ བྷི་ཀྑུ་ནོ ས་ནྠ་ཏ་ས་མྨུ་ཏི. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༥༦༡. ‘‘ན་ཝཾ པ་ན བྷི་ཀྑུ་ནཱ ས་ནྠ་ཏཾ ཀཱ་རཱ་པེ་ཏྭཱ ཚ་བྦ་སྶཱ་ནི དྷཱ་རེ་ཏ་བྦཾ. ཨོ་རེ་ན ཙེ ཚ་ནྣཾ ཝ་སྶཱ་ནཾ ཏཾ ས་ནྠ་ཏཾ ཝི་སྶ་ཛྫེ་ཏྭཱ ཝཱ ཨ་ཝི་སྶ་ཛྫེ་ཏྭཱ ཝཱ ཨ་ཉྙཾ ན་ཝཾ ས་ནྠ་ཏཾ ཀཱ་རཱ་པེ་ཡྻ, ཨ་ཉྙ་ཏྲ བྷི་ཀྑུ་ས་མྨུ་ཏི་ཡཱ, ནི་སྶ་གྒི་ཡཾ པཱ་ཙི་ཏྟི་ཡ’’ནྟི.
༥༦༢. ན་ཝཾ ནཱ་མ ཀ་ར་ཎཾ ཨུ་པཱ་དཱ་ཡ ཝུ་ཙྩ་ཏི.
ས་ནྠ་ཏཾ ནཱ་མ ས་ནྠ་རི་ཏྭཱ ཀ་ཏཾ ཧོ་ཏི ཨ་ཝཱ་ཡི་མཾ.
ཀཱ་རཱ་པེ་ཏྭཱཏི ཀ་རི་ཏྭཱ ཝཱ ཀཱ་རཱ་པེ་ཏྭཱ ཝཱ.
ཚ་བྦ་སྶཱ་ནི དྷཱ་རེ་ཏ་བྦནྟི ཚ་བྦ་སྶ་པ་ར་མ་ཏཱ དྷཱ་རེ་ཏ་བྦཾ.
ཨོ་རེ་ན ཙེ ཚ་ནྣཾ ཝ་སྶཱ་ནནྟི ཨཱུ་ན་ཀ་ཚ་བྦ་སྶཱ་ནི.
ཏཾ ས་ནྠ་ཏཾ ཝི་སྶ་ཛྫེ་ཏྭཱཏི ཨ་ཉྙེ་སཾ ད་ཏྭཱ.
ཨ་ཝི་སྶ་ཛྫེ་ཏྭཱཏི ན ཀ་སྶ་ཙི ད་ཏྭཱ.
ཨ་ཉྙ་ཏྲ བྷི་ཀྑུ་ས་མྨུ་ཏི་ཡཱཏི ཋ་པེ་ཏྭཱ བྷི་ཀྑུ་ས་མྨུ་ཏིཾ ཨ་ཉྙཾ ན་ཝཾ ས་ནྠ་ཏཾ ཀ་རོ་ཏི ཝཱ ཀཱ་རཱ་པེ་ཏི ཝཱ, པ་ཡོ་གེ དུ་ཀྐ་ཊཾ. པ་ཊི་ལཱ་བྷེ་ན ནི་སྶ་གྒི་ཡཾ ཧོ་ཏི. ནི་སྶ་ཛྫི་ཏ་བྦཾ ས་ངྒྷ་སྶ ཝཱ ག་ཎ་སྶ ཝཱ པུ་གྒ་ལ་སྶ ཝཱ. ཨེ་ཝ་ཉྩ པ་ན, བྷི་ཀྑ་ཝེ, ནི་སྶ་ཛྫི་ཏ་བྦཾ…པེ… ཨི་དཾ མེ, བྷ་ནྟེ, ས་ནྠ་ཏཾ ཨཱུ་ན་ཀ་ཚ་བྦ་སྶཱ་ནི ཀཱ་རཱ་པི་ཏཾ, ཨ་ཉྙ་ཏྲ བྷི་ཀྑུ་ས་མྨུ་ཏི་ཡཱ, ནི་སྶ་གྒི་ཡཾ. ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མཱི་ཏི…པེ… ད་དེ་ཡྻཱ་ཏི…པེ… ད་དེ་ཡྻུ་ནྟི…པེ… ཨཱ་ཡ་སྨ་ཏོ ད་མྨཱི་ཏི.
༥༦༣. ཨ་ཏྟ་ནཱ ཝི་པྤ་ཀ་ཏཾ ཨ་ཏྟ་ནཱ པ་རི་ཡོ་སཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཏྟ་ནཱ ཝི་པྤ་ཀ་ཏཾ པ་རེ་ཧི པ་རི་ཡོ་སཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. པ་རེ་ཧི ཝི་པྤ་ཀ་ཏཾ ཨ་ཏྟ་ནཱ པ་རི་ཡོ་སཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. པ་རེ་ཧི ཝི་པྤ་ཀ་ཏཾ པ་རེ་ཧི པ་རི་ཡོ་སཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ.
༥༦༤. ཨ་ནཱ་པ་ཏྟི ཚ་བྦ་སྶཱ་ནི ཀ་རོ་ཏི, ཨ་ཏི་རེ་ཀ་ཚ་བྦ་སྶཱ་ནི ཀ་རོ་ཏི, ཨ་ཉྙ་སྶ་ཏྠཱ་ཡ ཀ་རོ་ཏི ཝཱ ཀཱ་རཱ་པེ་ཏི ཝཱ, ཨ་ཉྙེ་ན ཀ་ཏཾ པ་ཊི་ལ་བྷི་ཏྭཱ པ་རི་བྷུ་ཉྫ་ཏི, ཝི་ཏཱ་ནཾ ཝཱ བྷཱུ་མ་ཏྠ་ར་ཎཾ ཝཱ སཱ་ཎི་པཱ་ཀཱ་རཾ ཝཱ བྷི་སིཾ ཝཱ བི་བྦོ་ཧ་ནཾ ཝཱ ཀ་རོ་ཏི, བྷི་ཀྑུ་ས་མྨུ་ཏི་ཡཱ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཚ་བྦ་སྶ་སི་ཀྑཱ་པ་དཾ ནི་ཊྛི་ཏཾ ཙ་ཏུ་ཏྠཾ.