༥. ནི་སཱི་ད་ན་ས་ནྠ་ཏ་སི་ཀྑཱ་པ་དཾ
༥༦༥. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཨ་ཐ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘ཨི་ཙྪཱ་མ་ཧཾ, བྷི་ཀྑ་ཝེ, ཏེ་མཱ་སཾ པ་ཊི་ས་ལླཱི་ཡི་ཏུཾ. ན་མྷི ཀེ་ན་ཙི ཨུ་པ་ས་ངྐ་མི་ཏ་བྦོ, ཨ་ཉྙ་ཏྲ ཨེ་ཀེ་ན པི་ཎྜ་པཱ་ཏ་ནཱི་ཧཱ་ར་ཀེ་ནཱ’’ཏི. ‘‘ཨེ་ཝཾ, བྷ་ནྟེ,’’ཏི ཁོ ཏེ བྷི་ཀྑཱུ བྷ་ག་ཝ་ཏོ པ་ཊི་སྶུ་ཎི་ཏྭཱ ནཱ་སྶུ་དྷ ཀོ་ཙི བྷ་ག་ཝ་ནྟཾ ཨུ་པ་ས་ངྐ་མ་ཏི, ཨ་ཉྙ་ཏྲ ཨེ་ཀེ་ན པི་ཎྜ་པཱ་ཏ་ནཱི་ཧཱ་ར་ཀེ་ན. ཏེ་ན ཁོ པ་ན ས་མ་ཡེ་ན སཱ་ཝ་ཏྠི་ཡཱ ས་ངྒྷེ་ན ཀ་ཏི་ཀཱ ཀ་ཏཱ ཧོ་ཏི – ‘‘ཨི་ཙྪ་ཏཱ་ཝུ་སོ, བྷ་ག་ཝཱ ཏེ་མཱ་སཾ པ་ཊི་ས་ལླཱི་ཡི་ཏུཾ. ན བྷ་ག་ཝཱ ཀེ་ན་ཙི ཨུ་པ་ས་ངྐ་མི་ཏ་བྦོ, ཨ་ཉྙ་ཏྲ ཨེ་ཀེ་ན པི་ཎྜ་པཱ་ཏ་ནཱི་ཧཱ་ར་ཀེ་ན. ཡོ བྷ་ག་ཝ་ནྟཾ ཨུ་པ་ས་ངྐ་མ་ཏི སོ པཱ་ཙི་ཏྟི་ཡཾ དེ་སཱ་པེ་ཏ་བྦོ’’ཏི. ཨ་ཐ ཁོ ཨཱ་ཡ་སྨཱ ཨུ་པ་སེ་ནོ ཝ་ངྒ་ནྟ་པུ་ཏྟོ, ས་པ་རི་སོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨཱ་ཙི་ཎྞཾ ཁོ པ་ནེ་ཏཾ བུ་དྡྷཱ་ནཾ བྷ་ག་ཝ་ནྟཱ་ནཾ ཨཱ་ག་ནྟུ་ཀེ་ཧི བྷི་ཀྑཱུ་ཧི ས་དྡྷིཾ པ་ཊི་ས་མྨོ་དི་ཏུཾ. ཨ་ཐ ཁོ བྷ་ག་ཝཱ ཨཱ་ཡ་སྨ་ནྟཾ ཨུ་པ་སེ་ནཾ ཝ་ངྒ་ནྟ་པུ་ཏྟཾ ཨེ་ཏ་ད་ཝོ་ཙ – ‘‘ཀ་ཙྩི ཝོ, ཨུ་པ་སེ་ན, ཁ་མ་ནཱི་ཡཾ ཀ་ཙྩི ཡཱ་པ་ནཱི་ཡཾ, ཀ་ཙྩི་ཏྠ ཨ་པྤ་ཀི་ལ་མ་ཐེ་ན ཨ་དྡྷཱ་ནཾ ཨཱ་ག་ཏཱ’’ཏི? ‘‘ཁ་མ་ནཱི་ཡཾ, བྷ་ག་ཝཱ, ཡཱ་པ་ནཱི་ཡཾ, བྷ་ག་ཝཱ. ཨ་པྤ་ཀི་ལ་མ་ཐེ་ན ཙ མ་ཡཾ, བྷ་ནྟེ, ཨ་དྡྷཱ་ནཾ ཨཱ་ག་ཏཱ’’ཏི.
ཏེ་ན ཁོ པ་ན ས་མ་ཡེ་ན ཨཱ་ཡ་སྨ་ཏོ ཨུ་པ་སེ་ན་སྶ ཝ་ངྒ་ནྟ་པུ་ཏྟ་སྶ ས་དྡྷི་ཝི་ཧཱ་རི་ཀོ བྷི་ཀྑུ བྷ་ག་ཝ་ཏོ ཨ་ཝི་དཱུ་རེ ནི་སི་ནྣོ ཧོ་ཏི. ཨ་ཐ ཁོ བྷ་ག་ཝཱ ཏཾ བྷི་ཀྑུཾ ཨེ་ཏ་ད་ཝོ་ཙ – ‘‘མ་ནཱ་པཱ་ནི ཏེ, བྷི་ཀྑུ, པཾ་སུ་ཀཱུ་ལཱ་ནཱི’’ཏི? ‘‘ན ཁོ མེ, བྷ་ནྟེ, མ་ནཱ་པཱ་ནི པཾ་སུ་ཀཱུ་ལཱ་ནཱི’’ཏི. ‘‘ཀི་སྶ པ་ན ཏྭཾ, བྷི་ཀྑུ, པཾ་སུ་ཀཱུ་ལི་ཀོ’’ཏི? ‘‘ཨུ་པ་ཛ྄ཛྷཱ་ཡོ མེ, བྷ་ནྟེ, པཾ་སུ་ཀཱུ་ལི་ཀོ. ཨེ་ཝཾ ཨ་ཧ་མྤི པཾ་སུ་ཀཱུ་ལི་ཀོ’’ཏི. ཨ་ཐ ཁོ བྷ་ག་ཝཱ ཨཱ་ཡ་སྨ་ནྟཾ ཨུ་པ་སེ་ནཾ ཝ་ངྒ་ནྟ་པུ་ཏྟཾ ཨེ་ཏ་ད་ཝོ་ཙ – ‘‘པཱ་སཱ་དི་ཀཱ ཁོ ཏྱཱ་ཡཾ, ཨུ་པ་སེ་ན, པ་རི་སཱ. ཀ་ཐཾ ཏྭཾ, ཨུ་པ་སེ་ན, པ་རི་སཾ ཝི་ནེ་སཱི’’ཏི? ‘‘ཡོ མཾ, བྷ་ནྟེ, ཨུ་པ་ས་མྤ་དཾ ཡཱ་ཙ་ཏི ཏ་མ་ཧཾ [ཏཱ་ཧཾ (ཀ.)] ཨེ་ཝཾ ཝ་དཱ་མི – ‘ཨ་ཧཾ ཁོ, ཨཱ་ཝུ་སོ, ཨཱ་ར་ཉྙི་ཀོ པི་ཎྜ་པཱ་ཏི་ཀོ པཾ་སུ་ཀཱུ་ལི་ཀོ. ས་ཙེ ཏྭ་མྤི ཨཱ་ར་ཉྙི་ཀོ བྷ་ཝི་སྶ་སི པི་ཎྜ་པཱ་ཏི་ཀོ པཾ་སུ་ཀཱུ་ལི་ཀོ, ཨེ་ཝཱ་ཧཾ ཏཾ ཨུ་པ་ས་མྤཱ་དེ་སྶཱ་མཱི’ཏི. ས་ཙེ མེ པ་ཊི་སྶུ་ཎཱ་ཏི ཨུ་པ་ས་མྤཱ་དེ་མི, ནོ ཙེ མེ པ་ཊི་སྶུ་ཎཱ་ཏི ན ཨུ་པ་ས་མྤཱ་དེ་མི. ཡོ མཾ ནི་སྶ་ཡཾ ཡཱ་ཙ་ཏི ཏ་མ་ཧཾ [ཏཱ་ཧཾ (ཀ.)] ཨེ་ཝཾ ཝ་དཱ་མི – ‘ཨ་ཧཾ ཁོ, ཨཱ་ཝུ་སོ, ཨཱ་ར་ཉྙི་ཀོ པི་ཎྜ་པཱ་ཏི་ཀོ པཾ་སུ་ཀཱུ་ལི་ཀོ. ས་ཙེ ཏྭ་མྤི ཨཱ་ར་ཉྙི་ཀོ བྷ་ཝི་སྶ་སི པི་ཎྜ་པཱ་ཏི་ཀོ པཾ་སུ་ཀཱུ་ལི་ཀོ, ཨེ་ཝཱ་ཧཾ ཏེ ནི་སྶ་ཡཾ ད་སྶཱ་མཱི’ཏི. ས་ཙེ མེ པ་ཊི་སྶུ་ཎཱ་ཏི ནི་སྶ་ཡཾ དེ་མི, ནོ ཙེ མེ པ་ཊི་སྶུ་ཎཱ་ཏི ན ནི་སྶ་ཡཾ དེ་མི. ཨེ་ཝཾ ཁོ ཨ་ཧཾ, བྷ་ནྟེ, པ་རི་སཾ ཝི་ནེ་མཱི’’ཏི.
‘‘སཱ་དྷུ སཱ་དྷུ, ཨུ་པ་སེ་ན. སཱ་དྷུ ཁོ ཏྭཾ, ཨུ་པ་སེ་ན, པ་རི་སཾ ཝི་ནེ་སི. ཛཱ་ནཱ་སི པ་ན ཏྭཾ, ཨུ་པ་སེ་ན, སཱ་ཝ་ཏྠི་ཡཱ ས་ངྒྷ་སྶ ཀ་ཏི་ཀ’’ནྟི? ‘‘ན ཁོ ཨ་ཧཾ, བྷ་ནྟེ, ཛཱ་ནཱ་མི སཱ་ཝ་ཏྠི་ཡཱ ས་ངྒྷ་སྶ ཀ་ཏི་ཀ’’ནྟི. ‘‘སཱ་ཝ་ཏྠི་ཡཱ ཁོ, ཨུ་པ་སེ་ན, ས་ངྒྷེ་ན ཀ་ཏི་ཀཱ ཀ་ཏཱ – ‘ཨི་ཙྪ་ཏཱ་ཝུ་སོ, བྷ་ག་ཝཱ ཏེ་མཱ་སཾ པ་ཊི་ས་ལླཱི་ཡི་ཏུཾ. ན བྷ་ག་ཝཱ ཀེ་ན་ཙི ཨུ་པ་ས་ངྐ་མི་ཏ་བྦོ, ཨ་ཉྙ་ཏྲ ཨེ་ཀེ་ན པི་ཎྜ་པཱ་ཏ་ནཱི་ཧཱ་ར་ཀེ་ན. ཡོ བྷ་ག་ཝ་ནྟཾ ཨུ་པ་ས་ངྐ་མ་ཏི སོ པཱ་ཙི་ཏྟི་ཡཾ དེ་སཱ་པེ་ཏ་བྦོ’ཏི. ‘‘པ་ཉྙཱ་ཡི་སྶ་ཏི, བྷ་ནྟེ, སཱ་ཝ་ཏྠི་ཡཱ ས་ངྒྷོ ས་ཀཱ་ཡ ཀ་ཏི་ཀཱ་ཡ, ན མ་ཡཾ ཨ་པ་ཉྙ་ཏྟཾ པ་ཉྙ་པེ་སྶཱ་མ པ་ཉྙ་ཏྟཾ ཝཱ ན ས་མུ་ཙྪི་ནྡི་སྶཱ་མ, ཡ་ཐཱ་པ་ཉྙ་ཏྟེ་སུ སི་ཀྑཱ་པ་དེ་སུ ས་མཱ་དཱ་ཡ ཝ་ཏྟི་སྶཱ་མཱ’’ཏི. ‘‘སཱ་དྷུ སཱ་དྷུ, ཨུ་པ་སེ་ན, ཨ་པ་ཉྙ་ཏྟཾ ན པ་ཉྙ་པེ་ཏ་བྦཾ, པ་ཉྙ་ཏྟཾ ཝཱ ན ས་མུ་ཙྪི་ནྡི་ཏ་བྦཾ, ཡ་ཐཱ་པ་ཉྙ་ཏྟེ་སུ སི་ཀྑཱ་པ་དེ་སུ ས་མཱ་དཱ་ཡ ཝ་ཏྟི་ཏ་བྦཾ. ཨ་ནུ་ཛཱ་ནཱ་མི, ཨུ་པ་སེ་ན, ཡེ ཏེ བྷི་ཀྑཱུ ཨཱ་ར་ཉྙི་ཀཱ པི་ཎྜ་པཱ་ཏི་ཀཱ པཾ་སུ་ཀཱུ་ལི་ཀཱ ཡ་ཐཱ་སུ་ཁཾ མཾ ད་སྶ་ནཱ་ཡ ཨུ་པ་ས་ངྐ་མ་ནྟཱུ’’ཏི.
༥༦༦. ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ བྷི་ཀྑཱུ བ་ཧི་དྭཱ་ར་ཀོ་ཊྛ་ཀེ ཋི་ཏཱ ཧོ་ནྟི – ‘‘མ་ཡཾ ཨཱ་ཡ་སྨ་ནྟཾ ཨུ་པ་སེ་ནཾ ཝ་ངྒ་ནྟ་པུ་ཏྟཾ པཱ་ཙི་ཏྟི་ཡཾ དེ་སཱ་པེ་སྶཱ་མཱ’’ཏི. ཨ་ཐ ཁོ ཨཱ་ཡ་སྨཱ ཨུ་པ་སེ་ནོ ཝ་ངྒ་ནྟ་པུ་ཏྟོ ས་པ་རི་སོ ཨུ་ཊྛཱ་ཡཱ་ས་ནཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ པ་ཀྐཱ་མི. ཨ་ཐ ཁོ ཏེ བྷི་ཀྑཱུ ཨཱ་ཡ་སྨ་ནྟཾ ཨུ་པ་སེ་ནཾ ཝ་ངྒ་ནྟ་པུ་ཏྟཾ ཨེ་ཏ་ད་ཝོ་ཙུཾ – ‘‘ཛཱ་ནཱ་སི ཏྭཾ, ཨཱ་ཝུ་སོ ཨུ་པ་སེ་ན, སཱ་ཝ་ཏྠི་ཡཱ ས་ངྒྷ་སྶ ཀ་ཏི་ཀ’’ནྟི. ‘‘བྷ་ག་ཝཱ་པི མཾ, ཨཱ་ཝུ་སོ, ཨེ་ཝ་མཱ་ཧ – ‘ཛཱ་ནཱ་སི པ་ན ཏྭཾ, ཨུ་པ་སེ་ན, སཱ་ཝ་ཏྠི་ཡཱ ས་ངྒྷ་སྶ ཀ་ཏི་ཀ’ནྟི? ན ཁོ ཨ་ཧཾ, བྷ་ནྟེ, ཛཱ་ནཱ་མི སཱ་ཝ་ཏྠི་ཡཱ ས་ངྒྷ་སྶ ཀ་ཏི་ཀ’’ནྟི. ‘‘སཱ་ཝ་ཏྠི་ཡཱ ཁོ, ཨུ་པ་སེ་ན, ས་ངྒྷེ་ན ཀ་ཏི་ཀཱ ཀ་ཏཱ – ཨི་ཙྪ་ཏཱ་ཝུ་སོ, བྷ་ག་ཝཱ ཏེ་མཱ་སཾ པ་ཊི་ས་ལླཱི་ཡི་ཏུཾ. ན བྷ་ག་ཝཱ ཀེ་ན་ཙི ཨུ་པ་ས་ངྐ་མི་ཏ་བྦོ, ཨ་ཉྙ་ཏྲ ཨེ་ཀེ་ན པི་ཎྜ་པཱ་ཏ་ནཱི་ཧཱ་ར་ཀེ་ན. ཡོ བྷ་ག་ཝ་ནྟཾ ཨུ་པ་ས་ངྐ་མ་ཏི སོ པཱ་ཙི་ཏྟི་ཡཾ དེ་སཱ་པེ་ཏ་བྦོ’’ཏི. ‘‘པ་ཉྙཱ་ཡི་སྶ་ཏི, བྷ་ནྟེ, སཱ་ཝ་ཏྠི་ཡཱ ས་ངྒྷོ ས་ཀཱ་ཡ ཀ་ཏི་ཀཱ་ཡ, ན མ་ཡཾ ཨ་པ་ཉྙ་ཏྟཾ པ་ཉྙ་པེ་སྶཱ་མ པ་ཉྙ་ཏྟཾ ཝཱ ན ས་མུ་ཙྪི་ནྡི་སྶཱ་མ, ཡ་ཐཱ་པ་ཉྙ་ཏྟེ་སུ སི་ཀྑཱ་པ་དེ་སུ ས་མཱ་དཱ་ཡ ཝ་ཏྟི་སྶཱ་མཱ་ཏི. ཨ་ནུ་ཉྙཱ་ཏཱ་ཝུ་སོ, བྷ་ག་ཝ་ཏཱ – ‘ཡེ ཏེ བྷི་ཀྑཱུ ཨཱ་ར་ཉྙི་ཀཱ པི་ཎྜ་པཱ་ཏི་ཀཱ པཾ་སུ་ཀཱུ་ལི་ཀཱ ཡ་ཐཱ་སུ་ཁཾ མཾ ད་སྶ་ནཱ་ཡ ཨུ་པ་ས་ངྐ་མ་ནྟཱུ’’’ཏི.
ཨ་ཐ ཁོ ཏེ བྷི་ཀྑཱུ – ‘‘ས་ཙྩཾ ཁོ ཨཱ་ཡ་སྨཱ ཨུ་པ་སེ་ནོ ཨཱ་ཧ – ‘ན ཨ་པ་ཉྙ་ཏྟཾ པ་ཉྙ་པེ་ཏ་བྦཾ, པ་ཉྙ་ཏྟཾ ཝཱ ན ས་མུ་ཙྪི་ནྡི་ཏ་བྦཾ, ཡ་ཐཱ་པ་ཉྙ་ཏྟེ་སུ སི་ཀྑཱ་པ་དེ་སུ ས་མཱ་དཱ་ཡ ཝ་ཏྟི་ཏ་བྦ’’’ནྟི. ཨ་སྶོ་སུཾ ཁོ བྷི་ཀྑཱུ – ‘‘ཨ་ནུ་ཉྙཱ་ཏཱ ཀི་ར བྷ་ག་ཝ་ཏཱ – ‘ཡེ ཏེ བྷི་ཀྑཱུ ཨཱ་ར་ཉྙི་ཀཱ པི་ཎྜ་པཱ་ཏི་ཀཱ པཾ་སུ་ཀཱུ་ལི་ཀཱ ཡ་ཐཱ་སུ་ཁཾ མཾ ད་སྶ་ནཱ་ཡ ཨུ་པ་ས་ངྐ་མ་ནྟཱུ’’’ཏི. ཏེ བྷ་ག་ཝ་ནྟཾ ད་སྶ་ནཾ པི་ཧེ་ནྟཱ [ད་སྶ་ནཱ་ཡ པི་ཧ་ཡ་མཱ་ནཱ (སྱཱ.)] ས་ནྠ་ཏཱ་ནི ཨུ་ཛ྄ཛྷི་ཏྭཱ ཨཱ་ར་ཉྙི་ཀ་ངྒཾ པི་ཎྜ་པཱ་ཏི་ཀ་ངྒཾ པཾ་སུ་ཀཱུ་ལི་ཀ་ངྒཾ ས་མཱ་དི་ཡིཾ་སུ. ཨ་ཐ ཁོ བྷ་ག་ཝཱ ས་མྦ་ཧུ་ལེ་ཧི བྷི་ཀྑཱུ་ཧི ས་དྡྷིཾ སེ་ནཱ་ས་ན་ཙཱ་རི་ཀཾ ཨཱ་ཧི་ཎྜ་ནྟོ ཨ་དྡ་ས ས་ནྠ་ཏཱ་ནི ཏ་ཧཾ ཏ་ཧཾ ཨུ་ཛ྄ཛྷི་ཏཱ་ནི. པ་སྶི་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཀ་སྶི་མཱ་ནི, བྷི་ཀྑ་ཝེ, ས་ནྠ་ཏཱ་ནི ཏ་ཧཾ ཏ་ཧཾ ཨུ་ཛ྄ཛྷི་ཏཱ་ནཱི’’ཏི? ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཏེ་ན ཧི, བྷི་ཀྑ་ཝེ, བྷི་ཀྑཱུ་ནཾ སི་ཀྑཱ་པ་དཾ པ་ཉྙ་པེ་སྶཱ་མི ད་ས ཨ་ཏྠ་ཝ་སེ པ་ཊི་ཙྩ – ས་ངྒྷ་སུ་ཊྛུ་ཏཱ་ཡ, ས་ངྒྷ་ཕཱ་སུ་ཏཱ་ཡ,…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༥༦༧. ‘‘ནི་སཱི་ད་ན་ས་ནྠ་ཏཾ པ་ན བྷི་ཀྑུ་ནཱ ཀཱ་ར་ཡ་མཱ་ནེ་ན པུ་རཱ་ཎ་ས་ནྠ་ཏ་སྶ སཱ་མ་ནྟཱ སུ་ག་ཏ་ཝི་ད་ཏྠི ཨཱ་དཱ་ཏ་བྦཱ དུ་བྦ་ཎྞ་ཀ་ར་ཎཱ་ཡ, ཨ་ནཱ་དཱ ཙེ བྷི་ཀྑུ པུ་རཱ་ཎ་ས་ནྠ་ཏ་སྶ སཱ་མ་ནྟཱ སུ་ག་ཏ་ཝི་ད་ཏྠིཾ ན་ཝཾ ནི་སཱི་ད་ན་ས་ནྠ་ཏཾ ཀཱ་རཱ་པེ་ཡྻ, ནི་སྶ་གྒི་ཡཾ པཱ་ཙི་ཏྟི་ཡ’’ནྟི.
༥༦༨. ནི་སཱི་ད་ནཾ ནཱ་མ ས་ད་སཾ ཝུ་ཙྩ་ཏི.
ས་ནྠ་ཏཾ ནཱ་མ ས་ནྠ་རི་ཏྭཱ ཀ་ཏཾ ཧོ་ཏི ཨ་ཝཱ་ཡི་མཾ.
ཀཱ་ར་ཡ་མཱ་ནེ་ནཱཏི ཀ་རོ་ནྟོ ཝཱ ཀཱ་རཱ་པེ་ནྟོ ཝཱ.
པུ་རཱ་ཎ་ས་ནྠ་ཏཾ ནཱ་མ ས་ཀིཾ ནི་ཝ་ཏྠ་མྤི ས་ཀིཾ པཱ་རུ་ཏ་མྤི.
སཱ་མ་ནྟཱ སུ་ག་ཏ་ཝི་ད་ཏྠི ཨཱ་དཱ་ཏ་བྦཱ དུ་བྦ་ཎྞ་ཀ་ར་ཎཱ་ཡཱཏི ཐི་ར་བྷཱ་ཝཱ་ཡ ཝ་ཊྚཾ ཝཱ ཙ་ཏུ་ར་སྶཾ ཝཱ ཚི་ནྡི་ཏྭཱ ཨེ་ཀ་དེ་སེ ཝཱ ས་ནྠ་རི་ཏ་བྦཾ ཝི་ཛ་ཊེ་ཏྭཱ ཝཱ ས་ནྠ་རི་ཏ་བྦཾ.
ཨ་ནཱ་དཱ ཙེ བྷི་ཀྑུ པུ་རཱ་ཎ་ས་ནྠ་ཏ་སྶ སཱ་མ་ནྟཱ སུ་ག་ཏ་ཝི་ད་ཏྠིནྟི ཨ་ནཱ་དི་ཡི་ཏྭཱ པུ་རཱ་ཎ་ས་ནྠ་ཏ་སྶ སཱ་མ་ནྟཱ སུ་ག་ཏ་ཝི་ད་ཏྠིཾ ན་ཝཾ ནི་སཱི་ད་ན་ས་ནྠ་ཏཾ ཀ་རོ་ཏི ཝཱ ཀཱ་རཱ་པེ་ཏི ཝཱ, པ་ཡོ་གེ དུ་ཀྐ་ཊཾ, པ་ཊི་ལཱ་བྷེ་ན ནི་སྶ་གྒི་ཡཾ ཧོ་ཏི. ནི་སྶ་ཛྫི་ཏ་བྦཾ ས་ངྒྷ་སྶ ཝཱ ག་ཎ་སྶ ཝཱ པུ་གྒ་ལ་སྶ ཝཱ. ཨེ་ཝ་ཉྩ པ་ན, བྷི་ཀྑ་ཝེ, ནི་སྶ་ཛྫི་ཏ་བྦཾ…པེ… ཨི་དཾ མེ, བྷ་ནྟེ, ནི་སཱི་ད་ན་ས་ནྠ་ཏཾ ཨ་ནཱ་དི་ཡི་ཏྭཱ པུ་རཱ་ཎ་ས་ནྠ་ཏ་སྶ སཱ་མ་ནྟཱ སུ་ག་ཏ་ཝི་ད་ཏྠིཾ ཀཱ་རཱ་པི་ཏཾ ནི་སྶ་གྒི་ཡཾ. ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མཱི་ཏི…པེ… ད་དེ་ཡྻཱ་ཏི…པེ… ཨཱ་ཡ་སྨ་ཏོ ད་མྨཱི་ཏི.
༥༦༩. ཨ་ཏྟ་ནཱ ཝི་པྤ་ཀ་ཏཾ ཨ་ཏྟ་ནཱ པ་རི་ཡོ་སཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཏྟ་ནཱ ཝི་པྤ་ཀ་ཏཾ པ་རེ་ཧི པ་རི་ཡོ་སཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. པ་རེ་ཧི ཝི་པྤ་ཀ་ཏཾ ཨ་ཏྟ་ནཱ པ་རི་ཡོ་སཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. པ་རེ་ཧི ཝི་པྤ་ཀ་ཏཾ པ་རེ་ཧི པ་རི་ཡོ་སཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ.
ཨ་ཉྙ་སྶ་ཏྠཱ་ཡ ཀ་རོ་ཏི ཝཱ ཀཱ་རཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ.
༥༧༠. ཨ་ནཱ་པ་ཏྟི – པུ་རཱ་ཎ་ས་ནྠ་ཏ་སྶ སཱ་མ་ནྟཱ སུ་ག་ཏ་ཝི་ད་ཏྠིཾ ཨཱ་དི་ཡི་ཏྭཱ ཀ་རོ་ཏི, ཨ་ལ་བྷ་ནྟོ ཐོ་ཀ་ཏ་རཾ ཨཱ་དི་ཡི་ཏྭཱ ཀ་རོ་ཏི, ཨ་ལ་བྷ་ནྟོ ཨ་ནཱ་དི་ཡི་ཏྭཱ ཀ་རོ་ཏི, ཨ་ཉྙེ་ན ཀ་ཏཾ པ་ཊི་ལ་བྷི་ཏྭཱ པ་རི་བྷུ་ཉྫ་ཏི, ཝི་ཏཱ་ནཾ ཝཱ བྷཱུ་མ་ཏྠ་ར་ཎཾ ཝཱ སཱ་ཎི་པཱ་ཀཱ་རཾ ཝཱ བྷི་སིཾ ཝཱ བི་བྦོ་ཧ་ནཾ ཝཱ ཀ་རོ་ཏི, ཨུ་མྨ་ཏྟ་ཀ་སྶ ཨཱ་དི་ཀ་མྨི་ཀ་སྶཱ་ཏི.
ནི་སཱི་ད་ན་ས་ནྠ་ཏ་སི་ཀྑཱ་པ་དཾ ནི་ཊྛི་ཏཾ པ་ཉྩ་མཾ.