༡༣. ཀུ་ལ་དཱུ་ས་ཀ་སི་ཀྑཱ་པ་དཾ
༤༣༡. [ཨི་དཾ ཝ་ཏྠུ ཙཱུ་ལ༹་ཝ. ༢༡] ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་སྶ་ཛི་པུ་ན་བྦ་སུ་ཀཱ ནཱ་མ [ནཱ་མ བྷི་ཀྑཱུ (ཀ.)] ཀཱི་ཊཱ་གི་རི་སྨིཾ ཨཱ་ཝཱ་སི་ཀཱ ཧོ་ནྟི ཨ་ལ་ཛྫི་ནོ པཱ་པ་བྷི་ཀྑཱུ. ཏེ [ཙཱུ་ལ༹་ཝ. ༢༩༣] ཨེ་ཝ་རཱུ་པཾ ཨ་ནཱ་ཙཱ་རཾ ཨཱ་ཙ་ར་ནྟི – མཱ་ལཱ་ཝ་ཙྪཾ རོ་པེ་ནྟི་པི རོ་པཱ་པེ་ནྟི་པི, སི་ཉྩ་ནྟི་པི སི་ཉྩཱ་པེ་ནྟི་པི, ཨོ་ཙི་ན་ནྟི་པི ཨོ་ཙི་ནཱ་པེ་ནྟི་པི, ག་ནྠེ་ནྟི་པི ག་ནྠཱ་པེ་ནྟི་པི, ཨེ་ཀ་ཏོ་ཝ་ཎྚི་ཀ་མཱ་ལཾ ཀ་རོ་ནྟི་པི ཀཱ་རཱ་པེ་ནྟི་པི, ཨུ་བྷ་ཏོ་ཝ་ཎྚི་ཀ་མཱ་ལཾ ཀ་རོ་ནྟི་པི ཀཱ་རཱ་པེ་ནྟི་པི, མ་ཉྫ་རི་ཀཾ ཀ་རོ་ནྟི་པི ཀཱ་རཱ་པེ་ནྟི་པི, ཝི་དྷཱུ་ཏི་ཀཾ ཀ་རོ་ནྟི་པི ཀཱ་རཱ་པེ་ནྟི་པི, ཝ་ཊཾ་ས་ཀཾ ཀ་རོ་ནྟི་པི ཀཱ་རཱ་པེ་ནྟི་པི, ཨཱ་ཝེ་ལ༹ཾ ཀ་རོ་ནྟི་པི ཀཱ་རཱ་པེ་ནྟི་པི, ཨུ་ར་ཙྪ་དཾ ཀ་རོ་ནྟི་པི ཀཱ་རཱ་པེ་ནྟི་པི. ཏེ ཀུ་ལི་ཏྠཱི་ནཾ ཀུ་ལ་དྷཱི་ཏཱ་ནཾ ཀུ་ལ་ཀུ་མཱ་རཱི་ནཾ ཀུ་ལ་སུ་ཎྷཱ་ནཾ ཀུ་ལ་དཱ་སཱི་ནཾ ཨེ་ཀ་ཏོ་ཝ་ཎྚི་ཀ་མཱ་ལཾ ཧ་ར་ནྟི་པི ཧ་རཱ་པེ་ནྟི་པི, ཨུ་བྷ་ཏོ་ཝ་ཎྚི་ཀ་མཱ་ལཾ ཧ་ར་ནྟི་པི ཧ་རཱ་པེ་ནྟི་པི, མ་ཉྫ་རི་ཀཾ ཧ་ར་ནྟི་པི ཧ་རཱ་པེ་ནྟི་པི, ཝི་དྷཱུ་ཏི་ཀཾ ཧ་ར་ནྟི་པི ཧ་རཱ་པེ་ནྟི་པི, ཝ་ཊཾ་ས་ཀཾ ཧ་ར་ནྟི་པི ཧ་རཱ་པེ་ནྟི་པི, ཨཱ་ཝེ་ལ༹ཾ ཧ་ར་ནྟི་པི ཧ་རཱ་པེ་ནྟི་པི, ཨུ་ར་ཙྪ་དཾ ཧ་ར་ནྟི་པི ཧ་རཱ་པེ་ནྟི་པི. ཏེ ཀུ་ལི་ཏྠཱི་ཧི ཀུ་ལ་དྷཱི་ཏཱ་ཧི ཀུ་ལ་ཀུ་མཱ་རཱི་ཧི ཀུ་ལ་སུ་ཎྷཱ་ཧི ཀུ་ལ་དཱ་སཱི་ཧི ས་དྡྷིཾ ཨེ་ཀ་བྷཱ་ཛ་ནེ་པི བྷུ་ཉྫ་ནྟི, ཨེ་ཀ་ཐཱ་ལ་ཀེ་པི པི་ཝ་ནྟི, ཨེ་ཀཱ་ས་ནེ་པི ནི་སཱི་ད་ནྟི, ཨེ་ཀ་མ་ཉྩེ་པི ཏུ་ཝ་ཊྚེ་ནྟི, ཨེ་ཀ་ཏྠ་ར་ཎཱ་པི ཏུ་ཝ་ཊྚེ་ནྟི, ཨེ་ཀ་པཱ་ཝུ་ར་ཎཱ་པི ཏུ་ཝ་ཊྚེ་ནྟི, ཨེ་ཀ་ཏྠ་ར་ཎ་པཱ་ཝུ་ར་ཎཱ་པི ཏུ་ཝ་ཊྚེ་ནྟི, ཝི་ཀཱ་ལེ་པི བྷུ་ཉྫ་ནྟི, མ་ཛྫ་མྤི པི་ཝ་ནྟི, མཱ་ལཱ་ག་ནྡྷ་ཝི་ལེ་པ་ན་མྤི དྷཱ་རེ་ནྟི, ན་ཙྩ་ནྟི་པི གཱ་ཡ་ནྟི་པི ཝཱ་དེ་ནྟི་པི ལཱ་སེ་ནྟི་པི, ན་ཙྩ་ནྟི་ཡཱ་པི ན་ཙྩ་ནྟི, ན་ཙྩ་ནྟི་ཡཱ་པི གཱ་ཡ་ནྟི, ན་ཙྩ་ནྟི་ཡཱ་པི ཝཱ་དེ་ནྟི, ན་ཙྩ་ནྟི་ཡཱ་པི ལཱ་སེ་ནྟི, གཱ་ཡ་ནྟི་ཡཱ་པི ན་ཙྩ་ནྟི, གཱ་ཡ་ནྟི་ཡཱ་པི གཱ་ཡ་ནྟི, གཱ་ཡ་ནྟི་ཡཱ་པི ཝཱ་དེ་ནྟི, གཱ་ཡ་ནྟི་ཡཱ་པི ལཱ་སེ་ནྟི, ཝཱ་དེ་ནྟི་ཡཱ་པི ན་ཙྩ་ནྟི, ཝཱ་དེ་ནྟི་ཡཱ་པི གཱ་ཡ་ནྟི, ཝཱ་དེ་ནྟི་ཡཱ་པི ཝཱ་དེ་ནྟི, ཝཱ་དེ་ནྟི་ཡཱ་པི ལཱ་སེ་ནྟི, ལཱ་སེ་ནྟི་ཡཱ་པི ན་ཙྩ་ནྟི, ལཱ་སེ་ནྟི་ཡཱ་པི གཱ་ཡ་ནྟི, ལཱ་སེ་ནྟི་ཡཱ་པི ཝཱ་དེ་ནྟི, ལཱ་སེ་ནྟི་ཡཱ་པི ལཱ་སེ་ནྟི. ཨ་ཊྛ་པ་དེ་པི ཀཱི་ལ༹་ནྟི, ད་ས་པ་དེ་པི ཀཱི་ལ༹་ནྟི, ཨཱ་ཀཱ་སེ་པི ཀཱི་ལ༹་ནྟི, པ་རི་ཧཱ་ར་པ་ཐེ་པི ཀཱི་ལ༹་ནྟི, ས་ནྟི་ཀཱ་ཡ་པི ཀཱི་ལ༹་ནྟི, ཁ་ལི་ཀཱ་ཡ་པི ཀཱི་ལ༹་ནྟི, གྷ་ཊི་ཀཱ་ཡ་པི ཀཱི་ལ༹་ནྟི, ས་ལཱ་ཀ་ཧ་ཏྠེ་ན་པི ཀཱི་ལ༹་ནྟི, ཨ་ཀྑེ་ན་པི ཀཱི་ལ༹་ནྟི, པ་ངྒ་ཙཱི་རེ་ན་པི ཀཱི་ལ༹་ནྟི, ཝ་ངྐ་ཀེ་ན་པི ཀཱི་ལ༹་ནྟི, མོ་ཀྑ་ཙི་ཀཱ་ཡ་པི ཀཱི་ལ༹་ནྟི, ཙི་ངྒུ་ལ་ཀེ་ན་པི ཀཱི་ལ༹་ནྟི, པ་ཏྟཱ་ལ༹ྷ་ཀེ་ན་པི ཀཱི་ལ༹་ནྟི, ར་ཐ་ཀེ་ན་པི ཀཱི་ལ༹་ནྟི, དྷ་ནུ་ཀེ་ན་པི ཀཱི་ལ༹་ནྟི, ཨ་ཀྑ་རི་ཀཱ་ཡ་པི ཀཱི་ལ༹་ནྟི, མ་ནེ་སི་ཀཱ་ཡ་པི ཀཱི་ལ༹་ནྟི, ཡ་ཐཱ་ཝ་ཛྫེ་ན་པི ཀཱི་ལ༹་ནྟི. ཧ་ཏྠི་སྨི་མྤི སི་ཀྑ་ནྟི, ཨ་སྶ་སྨི་མྤི སི་ཀྑ་ནྟི, ར་ཐ་སྨི་མྤི སི་ཀྑ་ནྟི, དྷ་ནུ་སྨི་མྤི སི་ཀྑ་ནྟི, ཐ་རུ་སྨི་མྤི སི་ཀྑ་ནྟི, ཧ་ཏྠི་སྶ་པི པུ་ར་ཏོ དྷཱ་ཝ་ནྟི, ཨ་སྶ་སྶ་པི པུ་ར་ཏོ དྷཱ་ཝ་ནྟི, ར་ཐ་སྶ་པི པུ་ར་ཏོ [པུ་ར་ཏོ དྷཱ་ཝ་ནྟི (སྱཱ.)] དྷཱ་ཝ་ནྟི་པི ཨཱ་དྷཱ་ཝ་ནྟི་པི, ཨུ་སྶེ་ལེ༹་ནྟི་པི, ཨ་པྥོ་ཊེ་ནྟི་པི, ནི་བྦུ་ཛ྄ཛྷ་ནྟི་པི, མུ་ཊྛཱི་ཧི་པི ཡུ་ཛ྄ཛྷ་ནྟི, ར་ངྒ་མ་ཛ྄ཛྷེ་པི ས་ངྒྷཱ་ཊིཾ པ་ཏྠ་རི་ཏྭཱ ན་ཙྩ་ཀིཾ [ན་ཙྩ་ནྟིཾ (སཱི. སྱཱ.)] ཨེ་ཝཾ ཝ་ད་ནྟི – ཨི་དྷ, བྷ་གི་ནི, ན་ཙྩ་སྶཱུ་ཏི, ན་ལཱ་ཊི་ཀ་མྤི དེ་ནྟི, ཝི་ཝི་དྷ་མྤི ཨ་ནཱ་ཙཱ་རཾ ཨཱ་ཙ་ར་ནྟི.
༤༣༢. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ བྷི་ཀྑུ ཀཱ་སཱི་སུ ཝ་སྶཾ་ཝུ་ཊྛོ སཱ་ཝ་ཏྠིཾ ག་ཙྪ་ནྟོ བྷ་ག་ཝ་ནྟཾ ད་སྶ་ནཱ་ཡ, ཡེ་ན ཀཱི་ཊཱ་གི་རི ཏ་ད་ཝ་ས་རི. ཨ་ཐ ཁོ སོ བྷི་ཀྑུ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཀཱི་ཊཱ་གི་རིཾ པི་ཎྜཱ་ཡ པཱ་ཝི་སི པཱ་སཱ་དི་ཀེ་ན ཨ་བྷི་ཀྐ་ནྟེ་ན པ་ཊི་ཀྐ་ནྟེ་ན ཨཱ་ལོ་ཀི་ཏེ་ན ཝི་ལོ་ཀི་ཏེ་ན ས་མི་ཉྫི་ཏེ་ན པ་སཱ་རི་ཏེ་ན ཨོ་ཀྑི་ཏྟ་ཙ་ཀྑུ ཨི་རི་ཡཱ་པ་ཐ་ས་མྤ་ནྣོ. མ་ནུ་སྶཱ ཏཾ བྷི་ཀྑུཾ པ་སྶི་ཏྭཱ ཨེ་ཝ་མཱ་ཧཾ་སུ – ‘‘ཀྭཱ་ཡཾ ཨ་བ་ལ་བ་ལོ ཝི་ཡ མ་ནྡ་མ་ནྡོ ཝི་ཡ བྷཱ་ཀུ་ཊི་ཀ་བྷཱ་ཀུ་ཊི་ཀོ ཝི་ཡ? ཀོ ཨི་མ་སྶ ཨུ་པ་ག་ཏ་སྶ པི་ཎྜ་ཀཾ ད་སྶ་ཏི? ཨ་མྷཱ་ཀཾ པ་ན ཨ་ཡྻཱ ཨ་སྶ་ཛི་པུ་ན་བྦ་སུ་ཀཱ ས་ཎྷཱ ས་ཁི་ལཱ སུ་ཁ་ས་མྦྷཱ་སཱ མི་ཧི་ཏ་པུ་བྦ་ངྒ་མཱ ཨེ་ཧི་སྭཱ་ག་ཏ་ཝཱ་དི་ནོ ཨ་བྦྷཱ་ཀུ་ཊི་ཀཱ ཨུ་ཏྟཱ་ན་མུ་ཁཱ པུ་བྦ་བྷཱ་སི་ནོ. ཏེ་སཾ ཁོ ནཱ་མ པི་ཎྜོ དཱ་ཏ་བྦོ’’ཏི.
ཨ་དྡ་སཱ ཁོ ཨ་ཉྙ་ཏ་རོ ཨུ་པཱ་ས་ཀོ ཏཾ བྷི་ཀྑུཾ ཀཱི་ཊཱ་གི་རི་སྨིཾ པི་ཎྜཱ་ཡ ཙ་ར་ནྟཾ. དི་སྭཱ་ན ཡེ་ན སོ བྷི་ཀྑུ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཏཾ བྷི་ཀྑུཾ ཨ་བྷི་ཝཱ་དེ་ཏྭཱ ཨེ་ཏ་ད་ཝོ་ཙ – ‘‘ཨ་པི, བྷ་ནྟེ, པི་ཎྜོ ལ་བྦྷ་ཏཱི’’ཏི? ‘‘ན ཁོ, ཨཱ་ཝུ་སོ, པི་ཎྜོ ལ་བྦྷ་ཏཱི’’ཏི. ‘‘ཨེ་ཧི, བྷ་ནྟེ, གྷ་རཾ ག་མི་སྶཱ་མཱ’’ཏི. ཨ་ཐ ཁོ སོ ཨུ་པཱ་ས་ཀོ ཏཾ བྷི་ཀྑུཾ གྷ་རཾ ནེ་ཏྭཱ བྷོ་ཛེ་ཏྭཱ ཨེ་ཏ་ད་ཝོ་ཙ – ‘‘ཀ་ཧཾ, བྷ་ནྟེ, ཨ་ཡྻོ ག་མི་སྶ་ཏཱི’’ཏི? ‘‘སཱ་ཝ་ཏྠིཾ ཁོ ཨ་ཧཾ, ཨཱ་ཝུ་སོ, ག་མི་སྶཱ་མི བྷ་ག་ཝ་ནྟཾ ད་སྶ་ནཱ་ཡཱ’’ཏི. ‘‘ཏེ་ན ཧི, བྷ་ནྟེ, མ་མ ཝ་ཙ་ནེ་ན བྷ་ག་ཝ་ཏོ པཱ་དེ སི་ར་སཱ ཝ་ནྡ, ཨེ་ཝ་ཉྩ ཝ་དེ་ཧི – ‘དུ་ཊྛོ, བྷ་ནྟེ, ཀཱི་ཊཱ་གི་རི་སྨིཾ ཨཱ་ཝཱ་སོ. ཨ་སྶ་ཛི་པུ་ན་བྦ་སུ་ཀཱ ནཱ་མ ཀཱི་ཊཱ་གི་རི་སྨིཾ ཨཱ་ཝཱ་སི་ཀཱ ཨ་ལ་ཛྫི་ནོ པཱ་པ་བྷི་ཀྑཱུ. ཏེ ཨེ་ཝ་རཱུ་པཾ ཨ་ནཱ་ཙཱ་རཾ ཨཱ་ཙ་ར་ནྟི – མཱ་ལཱ་ཝ་ཙྪཾ རོ་པེ་ནྟི་པི རོ་པཱ་པེ་ནྟི་པི, སི་ཉྩ་ནྟི་པི སི་ཉྩཱ་པེ་ནྟི་པི…པེ… ཝི་ཝི་དྷ་མྤི ཨ་ནཱ་ཙཱ་རཾ ཨཱ་ཙ་ར་ནྟི. ཡེ་པི ཏེ, བྷ་ནྟེ, མ་ནུ་སྶཱ པུ་བྦེ ས་དྡྷཱ ཨ་ཧེ་སུཾ པ་ས་ནྣཱ ཏེ་པི ཨེ་ཏ་ར་ཧི ཨ་སྶ་དྡྷཱ ཨ་པྤ་ས་ནྣཱ. ཡཱ་ནི་པི ཏཱ་ནི ས་ངྒྷ་སྶ པུ་བྦེ དཱ་ན་པ་ཐཱ་ནི ཏཱ་ནི་པི ཨེ་ཏ་ར་ཧི ཨུ་པ་ཙྪི་ནྣཱ་ནི. རི་ཉྩ་ནྟི པེ་ས་ལཱ བྷི་ཀྑཱུ, ནི་ཝ་ས་ནྟི པཱ་པ་བྷི་ཀྑཱུ. སཱ་དྷུ, བྷ་ནྟེ, བྷ་ག་ཝཱ ཀཱི་ཊཱ་གི་རིཾ བྷི་ཀྑཱུ པ་ཧི་ཎེ་ཡྻ ཡ་ཐཱ་ཡཾ ཀཱི་ཊཱ་གི་རི་སྨིཾ ཨཱ་ཝཱ་སོ ས་ཎྛ་ཧེ་ཡྻཱ’’’ཏི.
ཨེ་ཝ་མཱ་ཝུ་སོ་ཏི ཁོ སོ བྷི་ཀྑུ ཏ་སྶ ཨུ་པཱ་ས་ཀ་སྶ པ་ཊི་སྶུ་ཏྭཱ ཡེ་ན སཱ་ཝ་ཏྠི ཏེ་ན པ་ཀྐཱ་མི. ཨ་ནུ་པུ་བྦེ་ན ཡེ་ན སཱ་ཝ་ཏྠི ཛེ་ཏ་ཝ་ནཾ ཨ་ནཱ་ཐ་པི་ཎྜི་ཀ་སྶ ཨཱ་རཱ་མོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨཱ་ཙི་ཎྞཾ ཁོ པ་ནེ་ཏཾ བུ་དྡྷཱ་ནཾ བྷ་ག་ཝ་ནྟཱ་ནཾ ཨཱ་ག་ནྟུ་ཀེ་ཧི བྷི་ཀྑཱུ་ཧི ས་དྡྷིཾ པ་ཊི་ས་མྨོ་དི་ཏུཾ. ཨ་ཐ ཁོ བྷ་ག་ཝཱ ཏཾ བྷི་ཀྑུཾ ཨེ་ཏ་ད་ཝོ་ཙ – ‘‘ཀ་ཙྩི, བྷི་ཀྑུ, ཁ་མ་ནཱི་ཡཾ ཀ་ཙྩི ཡཱ་པ་ནཱི་ཡཾ, ཀ་ཙྩི་སི ཨ་པྤ་ཀི་ལ་མ་ཐེ་ན ཨ་དྡྷཱ་ནཾ ཨཱ་ག་ཏོ, ཀུ་ཏོ ཙ ཏྭཾ བྷི་ཀྑུ ཨཱ་ག་ཙྪ་སཱི’’ཏི? ‘‘ཁ་མ་ནཱི་ཡཾ, བྷ་ག་ཝཱ, ཡཱ་པ་ནཱི་ཡཾ, བྷ་ག་ཝཱ. ཨ་པྤ་ཀི་ལ་མ་ཐེ་ན ཙཱ་ཧཾ, བྷ་ནྟེ, ཨ་དྡྷཱ་ནཾ ཨཱ་ག་ཏོ. ཨི་དྷཱ་ཧཾ, བྷ་ནྟེ, ཀཱ་སཱི་སུ ཝ་སྶཾ་ཝུ་ཊྛོ སཱ་ཝ་ཏྠིཾ ཨཱ་ག་ཙྪ་ནྟོ བྷ་ག་ཝ་ནྟཾ ད་སྶ་ནཱ་ཡ ཡེ་ན ཀཱི་ཊཱ་གི་རི ཏ་ད་ཝ་ས་རིཾ. ཨ་ཐ ཁྭཱ་ཧཾ, བྷ་ནྟེ, པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཀཱི་ཊཱ་གི་རིཾ པི་ཎྜཱ་ཡ པཱ་ཝི་སིཾ. ཨ་དྡ་སཱ ཁོ མཾ, བྷ་ནྟེ, ཨ་ཉྙ་ཏ་རོ ཨུ་པཱ་ས་ཀོ ཀཱི་ཊཱ་གི་རི་སྨིཾ པི་ཎྜཱ་ཡ ཙ་ར་ནྟཾ. དི་སྭཱ་ན ཡེ་ནཱ་ཧཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ མཾ ཨ་བྷི་ཝཱ་དེ་ཏྭཱ ཨེ་ཏ་ད་ཝོ་ཙ – ‘ཨ་པི, བྷ་ནྟེ, པི་ཎྜོ ལ་བྦྷ་ཏཱི’ཏི? ‘ན ཁོ, ཨཱ་ཝུ་སོ, པི་ཎྜོ ལ་བྦྷ་ཏཱི’ཏི. ‘ཨེ་ཧི, བྷ་ནྟེ, གྷ་རཾ ག་མི་སྶཱ་མཱ’ཏི. ཨ་ཐ ཁོ, བྷ་ནྟེ, སོ ཨུ་པཱ་ས་ཀོ མཾ གྷ་རཾ ནེ་ཏྭཱ བྷོ་ཛེ་ཏྭཱ ཨེ་ཏ་ད་ཝོ་ཙ – ‘ཀ་ཧཾ, བྷ་ནྟེ, ཨ་ཡྻོ ག་མི་སྶ་སཱི’ཏི? ‘སཱ་ཝ་ཏྠིཾ ཁོ ཨ་ཧཾ, ཨཱ་ཝུ་སོ, ག་མི་སྶཱ་མི བྷ་ག་ཝ་ནྟཾ ད་སྶ་ནཱ་ཡཱ’ཏི. ཏེ་ན ཧི, བྷ་ནྟེ, མ་མ ཝ་ཙ་ནེ་ན བྷ་ག་ཝ་ཏོ པཱ་དེ སི་ར་སཱ ཝ་ནྡ, ཨེ་ཝ་ཉྩ ཝ་དེ་ཧི – ‘དུ་ཊྛོ, བྷ་ནྟེ, ཀཱི་ཊཱ་གི་རི་སྨིཾ ཨཱ་ཝཱ་སོ, ཨ་སྶ་ཛི་པུ་ན་བྦ་སུ་ཀཱ ནཱ་མ ཀཱི་ཊཱ་གི་རི་སྨིཾ ཨཱ་ཝཱ་སི་ཀཱ ཨ་ལ་ཛྫི་ནོ པཱ་པ་བྷི་ཀྑཱུ. ཏེ ཨེ་ཝ་རཱུ་པཾ ཨ་ནཱ་ཙཱ་རཾ ཨཱ་ཙ་ར་ནྟི – མཱ་ལཱ་ཝ་ཙྪཾ རོ་པེ་ནྟི་པི རོ་པཱ་པེ་ནྟི་པི, སི་ཉྩ་ནྟི་པི སི་ཉྩཱ་པེ་ནྟི་པི…པེ… ཝི་ཝི་དྷ་མྤི ཨ་ནཱ་ཙཱ་རཾ ཨཱ་ཙ་ར་ནྟི. ཡེ་པི ཏེ, བྷ་ནྟེ, མ་ནུ་སྶཱ པུ་བྦེ ས་དྡྷཱ ཨ་ཧེ་སུཾ པ་ས་ནྣཱ ཏེ་པི ཨེ་ཏ་ར་ཧི ཨ་སྶ་དྡྷཱ ཨ་པྤ་ས་ནྣཱ, ཡཱ་ནི་པི ཏཱ་ནི ས་ངྒྷ་སྶ པུ་བྦེ དཱ་ན་པ་ཐཱ་ནི ཏཱ་ནི་པི ཨེ་ཏ་ར་ཧི ཨུ་པ་ཙྪི་ནྣཱ་ནི, རི་ཉྩ་ནྟི པེ་ས་ལཱ བྷི་ཀྑཱུ ནི་ཝ་ས་ནྟི པཱ་པ་བྷི་ཀྑཱུ. སཱ་དྷུ, བྷ་ནྟེ, བྷ་ག་ཝཱ ཀཱི་ཊཱ་གི་རིཾ བྷི་ཀྑཱུ པ་ཧི་ཎེ་ཡྻ ཡ་ཐཱ་ཡཾ ཀཱི་ཊཱ་གི་རི་སྨིཾ ཨཱ་ཝཱ་སོ ས་ཎྛ་ཧེ་ཡྻཱ’ཏི. ཏ་ཏོ ཨ་ཧཾ, བྷ་ག་ཝཱ, ཨཱ་ག་ཙྪཱ་མཱི’’ཏི.
༤༣༣. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ བྷི་ཀྑུ་ས་ངྒྷཾ ས་ནྣི་པཱ་ཏཱ་པེ་ཏྭཱ བྷི་ཀྑཱུ པ་ཊི་པུ་ཙྪི – ‘‘ས་ཙྩཾ ཀི་ར, བྷི་ཀྑ་ཝེ, ཨ་སྶ་ཛི་པུ་ན་བྦ་སུ་ཀཱ ནཱ་མ ཀཱི་ཊཱ་གི་རི་སྨིཾ ཨཱ་ཝཱ་སི་ཀཱ ཨ་ལ་ཛྫི་ནོ པཱ་པ་བྷི་ཀྑཱུ ཏེ ཨེ་ཝ་རཱུ་པཾ ཨ་ནཱ་ཙཱ་རཾ ཨཱ་ཙ་ར་ནྟི – མཱ་ལཱ་ཝ་ཙྪཾ རོ་པེ་ནྟི་པི རོ་པཱ་པེ་ནྟི་པི, སི་ཉྩ་ནྟི་པི སི་ཉྩཱ་པེ་ནྟི་པི …པེ… ཝི་ཝི་དྷ་མྤི ཨ་ནཱ་ཙཱ་རཾ ཨཱ་ཙ་ར་ནྟི, ཡེ་པི ཏེ, བྷི་ཀྑ་ཝེ, མ་ནུ་སྶཱ པུ་བྦེ ས་དྡྷཱ ཨ་ཧེ་སུཾ པ་ས་ནྣཱ ཏེ་པི ཨེ་ཏ་ར་ཧི ཨ་སྶ་དྡྷཱ ཨ་པྤ་ས་ནྣཱ; ཡཱ་ནི་པི ཏཱ་ནི ས་ངྒྷ་སྶ པུ་བྦེ དཱ་ན་པ་ཐཱ་ནི ཏཱ་ནི་པི ཨེ་ཏ་ར་ཧི ཨུ་པ་ཙྪི་ནྣཱ་ནི; རི་ཉྩ་ནྟི པེ་ས་ལཱ བྷི་ཀྑཱུ ནི་ཝ་ས་ནྟི པཱ་པ་བྷི་ཀྑཱུ’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ‘‘ཀ་ཐ་ཉྷི ནཱ་མ ཏེ, བྷི་ཀྑ་ཝེ, མོ་གྷ་པུ་རི་སཱ ཨེ་ཝ་རཱུ་པཾ ཨ་ནཱ་ཙཱ་རཾ ཨཱ་ཙ་རི་སྶ་ནྟི – མཱ་ལཱ་ཝ་ཙྪཾ རོ་པེ་སྶ་ནྟི་པི རོ་པཱ་པེ་སྶ་ནྟི་པི, ས་ཉྩི་སྶ་ནྟི་པི སི་ཉྩཱ་པེ་སྶ་ནྟི་པི, ཨོ་ཙི་ནི་སྶ་ནྟི་པི ཨོ་ཙི་ནཱ་པེ་སྶ་ནྟི་པི, ག་ནྠི་སྶ་ནྟི་པི ག་ནྠཱ་པེ་སྶ་ནྟི་པི, ཨེ་ཀ་ཏོ་ཝ་ཎྚི་ཀ་མཱ་ལཾ ཀ་རི་སྶ་ནྟི་པི ཀཱ་རཱ་པེ་སྶ་ནྟི་པི, ཨུ་བྷ་ཏོ་ཝ་ཎྚི་ཀ་མཱ་ལཾ ཀ་རི་སྶ་ནྟི་པི ཀཱ་རཱ་པེ་སྶ་ནྟི་པི, མ་ཉྫ་རི་ཀཾ ཀ་རི་སྶ་ནྟི་པི ཀཱ་རཱ་པེ་སྶ་ནྟི་པི, ཝི་དྷཱུ་ཏི་ཀཾ ཀ་རི་སྶ་ནྟི་པི ཀཱ་རཱ་པེ་སྶ་ནྟི་པི, ཝ་ཊཾ་ས་ཀཾ ཀ་རི་སྶ་ནྟི་པི ཀཱ་རཱ་པེ་སྶ་ནྟི་པི, ཨཱ་ཝེ་ལ༹ཾ ཀ་རི་སྶ་ནྟི་པི ཀཱ་རཱ་པེ་སྶ་ནྟི་པི, ཨུ་ར་ཙྪ་དཾ ཀ་རི་སྶ་ནྟི་པི ཀཱ་རཱ་པེ་སྶ་ནྟི་པི. ཏེ ཀུ་ལི་ཏྠཱི་ནཾ ཀུ་ལ་དྷཱི་ཏཱ་ནཾ ཀུ་ལ་ཀུ་མཱ་རཱི་ནཾ ཀུ་ལ་སུ་ཎྷཱ་ནཾ ཀུ་ལ་དཱ་སཱི་ནཾ ཨེ་ཀ་ཏོ་ཝ་ཎྚི་ཀ་མཱ་ལཾ ཧ་རི་སྶ་ནྟི་པི ཧཱ་རཱ་པེ་སྶ་ནྟི་པི, ཨུ་བྷ་ཏོ་ཝ་ཎྚི་ཀ་མཱ་ལཾ ཧ་རི་སྶ་ནྟི་པི ཧཱ་རཱ་པེ་སྶ་ནྟི་པི, མ་ཉྫ་རི་ཀཾ ཧ་རི་སྶ་ནྟི་པི ཧཱ་རཱ་པེ་སྶ་ནྟི་པི, ཝི་དྷཱུ་ཏི་ཀཾ ཧ་རི་སྶ་ནྟི་པི ཧཱ་རཱ་པེ་སྶ་ནྟི་པི, ཝ་ཊཾ་ས་ཀཾ ཧ་རི་སྶ་ནྟི་པི ཧཱ་རཱ་པེ་སྶ་ནྟི་པི, ཨཱ་ཝེ་ལ༹ཾ ཧ་རི་སྶ་ནྟི་པི ཧཱ་རཱ་པེ་སྶ་ནྟི་པི, ཨུ་ར་ཙྪ་དཾ ཧ་རི་སྶ་ནྟི་པི ཧཱ་རཱ་པེ་སྶ་ནྟི་པི. ཏེ ཀུ་ལི་ཏྠཱི་ཧི ཀུ་ལ་དྷཱི་ཏཱ་ཧི ཀུ་ལ་ཀུ་མཱ་རཱི་ཧི ཀུ་ལ་སུ་ཎྷཱ་ཧི ཀུ་ལ་དཱ་སཱི་ཧི ས་དྡྷིཾ ཨེ་ཀ་བྷཱ་ཛ་ནེ་པི བྷུ་ཉྫི་སྶ་ནྟི, ཨེ་ཀ་ཐཱ་ལ་ཀེ་པི པི་ཝི་སྶ་ནྟི, ཨེ་ཀཱ་ས་ནེ་པི ནི་སཱི་དི་སྶ་ནྟི, ཨེ་ཀ་མ་ཉྩེ་པི ཏུ་ཝ་ཊྚི་སྶ་ནྟི, ཨེ་ཀ་ཏྠ་ར་ཎཱ་པི ཏུ་ཝ་ཊྚི་སྶ་ནྟི, ཨེ་ཀ་པཱ་ཝུ་ར་ཎཱ་པི ཏུ་ཝ་ཊྚི་སྶ་ནྟི, ཨེ་ཀ་ཏྠ་ར་ཎ་པཱ་ཝུ་ར་ཎཱ་པི ཏུ་ཝ་ཊྚི་སྶ་ནྟི, ཝི་ཀཱ་ལེ་པི བྷུ་ཉྫི་སྶ་ནྟི, མ་ཛྫ་མྤི པི་ཝི་སྶ་ནྟི, མཱ་ལཱ་ག་ནྡྷ་ཝི་ལེ་པ་ན་མྤི དྷཱ་རི་སྶ་ནྟི, ན་ཙྩི་སྶ་ནྟི་པི གཱ་ཡི་སྶ་ནྟི་པི ཝཱ་དེ་སྶ་ནྟི་པི ལཱ་སེ་སྶ་ནྟི་པི, ན་ཙྩ་ནྟི་ཡཱ་པི ན་ཙྩི་སྶ་ནྟི ན་ཙྩ་ནྟི་ཡཱ་པི གཱ་ཡི་སྶ་ནྟི ན་ཙྩ་ནྟི་ཡཱ་པི ཝཱ་དེ་སྶ་ནྟི ན་ཙྩ་ནྟི་ཡཱ་པི ལཱ་སེ་སྶ་ནྟི, གཱ་ཡ་ནྟི་ཡཱ་པི ན་ཙྩི་སྶ་ནྟི གཱ་ཡ་ནྟི་ཡཱ་པི གཱ་ཡི་སྶ་ནྟི གཱ་ཡ་ནྟི་ཡཱ་པི ཝཱ་དེ་སྶ་ནྟི གཱ་ཡ་ནྟི་ཡཱ་པི ལཱ་སེ་སྶ་ནྟི, ཝཱ་དེ་ནྟི་ཡཱ་པི ན་ཙྩི་སྶ་ནྟི ཝཱ་དེ་ནྟི་ཡཱ་པི གཱ་ཡི་སྶ་ནྟི ཝཱ་དེ་ནྟི་ཡཱ་པི ཝཱ་དེ་སྶ་ནྟི ཝཱ་དེ་ནྟི་ཡཱ་པི ལཱ་སེ་སྶ་ནྟི, ལཱ་སེ་ནྟི་ཡཱ་པི ན་ཙྩི་སྶ་ནྟི ལཱ་སེ་ནྟི་ཡཱ་པི གཱ་ཡི་སྶ་ནྟི ལཱ་སེ་ནྟི་ཡཱ་པི ཝཱ་དེ་སྶ་ནྟི ལཱ་སེ་ནྟི་ཡཱ་པི ལཱ་སེ་སྶ་ནྟི, ཨ་ཊྛ་པ་དེ་པི ཀཱི་ལི༹་སྶ་ནྟི ད་ས་པ་དེ་པི ཀཱི་ལི༹་སྶ་ནྟི, ཨ་ཀཱ་སེ་པི ཀཱི་ལི༹་སྶ་ནྟི, པ་རི་ཧཱ་ར་པ་ཐེ་པི ཀཱི་ལི༹་སྶ་ནྟི, ས་ནྟི་ཀཱ་ཡ་པི ཀཱི་ལི༹་སྶ་ནྟི, ཁ་ལི་ཀཱ་ཡ་པི ཀཱི་ལི༹་སྶ་ནྟི, གྷ་ཊི་ཀཱ་ཡ་པི ཀཱི་ལི༹་སྶ་ནྟི, ས་ལཱ་ཀ་ཧ་ཏྠེ་ན་པི ཀཱི་ལི༹་སྶ་ནྟི, ཨ་ཀྑེ་ན་པི ཀཱི་ལི༹་སྶ་ནྟི, པ་ངྒ་ཙཱི་རེ་ན་པི ཀཱི་ལི༹་སྶ་ནྟི, ཝ་ངྐ་ཀེ་ན་པི ཀཱི་ལི༹་སྶ་ནྟི, མོ་ཀྑ་ཙི་ཀཱ་ཡ་པི ཀཱི་ལི༹་སྶ་ནྟི, ཙི་ངྒུ་ལ་ཀེ་ན་པི ཀཱི་ལི༹་སྶ་ནྟི, པ་ཏྟཱ་ལ༹ྷ་ཀེ་ན་པི ཀཱི་ལི༹་སྶ་ནྟི, ར་ཐ་ཀེ་ན་པི ཀཱི་ལི༹་སྶ་ནྟི, དྷ་ནུ་ཀེ་ན་པི ཀཱི་ལི༹་སྶ་ནྟི, ཨ་ཀྑ་རི་ཀཱ་ཡ་པི ཀཱི་ལི༹་སྶ་ནྟི, མ་ནེ་སི་ཀཱ་ཡ་པི ཀཱི་ལི༹་སྶ་ནྟི, ཡ་ཐཱ་ཝ་ཛྫེ་ན་པི ཀཱི་ལི༹་སྶ་ནྟི, ཧ་ཏྠི་སྨི་མྤི སི་ཀྑི་སྶ་ནྟི, ཨ་སྶ་སྨི་མྤི སི་ཀྑི་སྶ་ནྟི, ར་ཐ་སྨི་མྤི སི་ཀྑི་སྶ་ནྟི, དྷ་ནུ་སྨི་མྤི སི་ཀྑི་སྶ་ནྟི, ཐ་རུ་སྨི་མྤི སི་ཀྑི་སྶ་ནྟི, ཧ་ཏྠི་སྶ་པི པུ་ར་ཏོ དྷཱ་ཝི་སྶ་ནྟི, ཨ་སྶ་སྶ་པི པུ་ར་ཏོ དྷཱ་ཝི་སྶ་ནྟི, ར་ཐ་སྶ་པི པུ་ར་ཏོ [པུ་ར་ཏོ དྷཱ་ཝི་སྶ་ནྟི (སྱཱ.)] དྷཱ་ཝི་སྶ་ནྟི་པི ཨཱ་དྷཱ་ཝི་སྶ་ནྟི་པི, ཨུ་སྶེ་ལེ༹་སྶ་ནྟི་པི, ཨ་པྥོ་ཊེ་སྶ་ནྟི་པི, ནི་བྦུ་ཛ྄ཛྷི་སྶ་ནྟི་པི, མུ་ཊྛཱི་ཧི་པི ཡུ་ཛ྄ཛྷི་སྶ་ནྟི, ར་ངྒ་མ་ཛ྄ཛྷེ་པི ས་ངྒྷཱ་ཊིཾ པ་ཏྠ་རི་ཏྭཱ ན་ཙྩ་ཀིཾ ཨེ་ཝཾ ཝ་ཀྑ་ནྟི ‘‘ཨི་དྷ བྷ་གི་ནི ན་ཙྩ་སྶཱུ’’ཏི ན་ལཱ་ཊི་ཀ་མྤི ད་སྶ་ནྟི, ཝི་ཝི་དྷ་མྤི ཨ་ནཱ་ཙཱ་རཾ ཨཱ་ཙ་རི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཝི་ག་ར་ཧི་ཏྭཱ དྷ་མྨིཾ ཀ་ཐཾ ཀ་ཏྭཱ སཱ་རི་པུ་ཏྟ་མོ་གྒ་ལླཱ་ནེ ཨཱ་མ་ནྟེ་སི – ‘‘ག་ཙྪ་ཐ ཏུ་མྷེ, སཱ་རི་པུ་ཏྟཱ, ཀཱི་ཊཱ་གི་རིཾ ག་ནྟྭཱ ཨ་སྶ་ཛི་པུ་ན་བྦ་སུ་ཀཱ་ནཾ བྷི་ཀྑཱུ་ནཾ ཀཱི་ཊཱ་གི་རི་སྨཱ པ་བྦཱ་ཛ་ནཱི་ཡ་ཀ་མྨཾ ཀ་རོ་ཐ. ཏུ་མྷཱ་ཀཾ ཨེ་ཏེ ས་དྡྷི་ཝི་ཧཱ་རི་ཀཱ’’ཏི.
‘‘ཀ་ཐཾ མ་ཡཾ, བྷ་ནྟེ, ཨ་སྶ་ཛི་པུ་ན་བྦ་སུ་ཀཱ་ནཾ བྷི་ཀྑཱུ་ནཾ ཀཱི་ཊཱ་གི་རི་སྨཱ པ་བྦཱ་ཛ་ནཱི་ཡ་ཀ་མྨཾ ཀ་རོ་མ? ཙ་ཎྜཱ ཏེ བྷི་ཀྑཱུ ཕ་རུ་སཱ’’ཏི. ‘‘ཏེ་ན ཧི ཏུ་མྷེ, སཱ་རི་པུ་ཏྟཱ, བ་ཧུ་ཀེ་ཧི བྷི་ཀྑཱུ་ཧི ས་དྡྷིཾ ག་ཙྪ་ཐཱ’’ཏི. ‘‘ཨེ་ཝཾ, བྷ་ནྟེ’’ཏི ཁོ སཱ་རི་པུ་ཏྟ་མོ་གྒ་ལླཱ་ནཱ བྷ་ག་ཝ་ཏོ པ་ཙྩ་སྶོ་སུཾ. ‘‘ཨེ་ཝ་ཉྩ པ་ན, བྷི་ཀྑ་ཝེ, ཀཱ་ཏ་བྦཾ. པ་ཋ་མཾ ཨ་སྶ་ཛི་པུ་ན་བྦ་སུ་ཀཱ བྷི་ཀྑཱུ ཙོ་དེ་ཏ་བྦཱ. ཙོ་དེ་ཏྭཱ སཱ་རེ་ཏ་བྦཱ. སཱ་རེ་ཏྭཱ ཨཱ་པ་ཏྟིཾ རོ་པེ་ཏ་བྦཱ. ཨཱ་པ་ཏྟིཾ རོ་པེ་ཏྭཱ བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –
༤༣༤. ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་མེ ཨ་སྶ་ཛི་པུ་ན་བྦ་སུ་ཀཱ བྷི་ཀྑཱུ ཀུ་ལ་དཱུ་ས་ཀཱ པཱ་པ་ས་མཱ་ཙཱ་རཱ. ཨི་མེ་སཾ པཱ་པ་ཀཱ ས་མཱ་ཙཱ་རཱ དི་སྶ་ནྟི ཙེ་ཝ སུ་ཡྻ་ནྟི ཙ. ཀུ་ལཱ་ནི ཙ ཨི་མེ་ཧི དུ་ཊྛཱ་ནི དི་སྶ་ནྟི ཙེ་ཝ སུ་ཡྻ་ནྟི ཙ. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨ་སྶ་ཛི་པུ་ན་བྦ་སུ་ཀཱ་ནཾ བྷི་ཀྑཱུ་ནཾ ཀཱི་ཊཱ་གི་རི་སྨཱ པ་བྦཱ་ཛ་ནཱི་ཡ་ཀ་མྨཾ ཀ་རེ་ཡྻ – ‘ན ཨ་སྶ་ཛི་པུ་ན་བྦ་སུ་ཀེ་ཧི བྷི་ཀྑཱུ་ཧི ཀཱི་ཊཱ་གི་རི་སྨིཾ ཝ་ཏྠ་བྦ’ནྟི. ཨེ་སཱ ཉ་ཏྟི.
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་མེ ཨ་སྶ་ཛི་པུ་ན་བྦ་སུ་ཀཱ བྷི་ཀྑཱུ ཀུ་ལ་དཱུ་ས་ཀཱ པཱ་པ་ས་མཱ་ཙཱ་རཱ. ཨི་མེ་སཾ པཱ་པ་ཀཱ ས་མཱ་ཙཱ་རཱ དི་སྶ་ནྟི ཙེ་ཝ སུ་ཡྻ་ནྟི ཙ. ཀུ་ལཱ་ནི ཙ ཨི་མེ་ཧི དུ་ཊྛཱ་ནི དི་སྶ་ནྟི ཙེ་ཝ སུ་ཡྻ་ནྟི ཙ. ས་ངྒྷོ ཨ་སྶ་ཛི་པུ་ན་བྦ་སུ་ཀཱ་ནཾ བྷི་ཀྑཱུ་ནཾ ཀཱི་ཊཱ་གི་རི་སྨཱ པ་བྦཱ་ཛ་ནཱི་ཡ་ཀ་མྨཾ ཀ་རོ་ཏི – ‘ན ཨ་སྶ་ཛི་པུ་ན་བྦ་སུ་ཀེ་ཧི བྷི་ཀྑཱུ་ཧི ཀཱི་ཊཱ་གི་རི་སྨིཾ ཝ་ཏྠ་བྦ’ནྟི. ཡ་སྶཱ་ཡ་སྨ་ཏོ ཁ་མ་ཏི ཨ་སྶ་ཛི་པུ་ན་བྦ་སུ་ཀཱ་ནཾ བྷི་ཀྑཱུ་ནཾ ཀཱི་ཊཱ་གི་རི་སྨཱ པ་བྦཱ་ཛ་ནཱི་ཡ་ཀ་མྨ་སྶ ཀ་ར་ཎཾ – ‘ན ཨ་སྶ་ཛི་པུ་ན་བྦ་སུ་ཀེ་ཧི བྷི་ཀྑཱུ་ཧི ཀཱི་ཊཱ་གི་རི་སྨིཾ ཝ་ཏྠ་བྦ’ནྟི, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ.
‘‘དུ་ཏི་ཡ་མྤི ཨེ་ཏ་མ་ཏྠཾ ཝ་དཱ་མི…པེ… ཏ་ཏི་ཡ་མྤི ཨེ་ཏ་མ་ཏྠཾ ཝ་དཱ་མི – སུ་ཎཱ་ཏུ མེ, བྷ་ནྟེ, ས་ངྒྷོ…པེ… སོ བྷཱ་སེ་ཡྻ.
‘‘ཀ་ཏཾ ས་ངྒྷེ་ན ཨ་སྶ་ཛི་པུ་ན་བྦ་སུ་ཀཱ་ནཾ བྷི་ཀྑཱུ་ནཾ ཀཱི་ཊཱ་གི་རི་སྨཱ པ་བྦཱ་ཛ་ནཱི་ཡ་ཀ་མྨཾ – ‘ན ཨ་སྶ་ཛི་པུ་ན་བྦ་སུ་ཀེ་ཧི བྷི་ཀྑཱུ་ཧི ཀཱི་ཊཱ་གི་རི་སྨིཾ ཝ་ཏྠ་བྦ’ནྟི. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
༤༣༥. ཨ་ཐ ཁོ སཱ་རི་པུ་ཏྟ་མོ་གྒ་ལླཱ་ན་པྤ་མུ་ཁོ བྷི་ཀྑུ་ས་ངྒྷོ ཀཱི་ཊཱ་གི་རིཾ ག་ནྟྭཱ ཨ་སྶ་ཛི་པུ་ན་བྦ་སུ་ཀཱ་ནཾ བྷི་ཀྑཱུ་ནཾ ཀཱི་ཊཱ་གི་རི་སྨཱ པ་བྦཱ་ཛ་ནཱི་ཡ་ཀ་མྨཾ ཨ་ཀཱ་སི – ‘ན ཨ་སྶ་ཛི་པུ་ན་བྦ་སུ་ཀེ་ཧི བྷི་ཀྑཱུ་ཧི ཀཱི་ཊཱ་གི་རི་སྨིཾ ཝ་ཏྠ་བྦ’ནྟི. ཏེ ས་ངྒྷེ་ན པ་བྦཱ་ཛ་ནཱི་ཡ་ཀ་མྨ་ཀ་ཏཱ ན ས་མྨཱ ཝ་ཏྟ་ནྟི, ན ལོ་མཾ པཱ་ཏེ་ནྟི, ན ནེ་ཏྠཱ་རཾ ཝ་ཏྟ་ནྟི, ན བྷི་ཀྑཱུ ཁ་མཱ་པེ་ནྟི, ཨ་ཀྐོ་ས་ནྟི པ་རི་བྷཱ་ས་ནྟི ཚ་ནྡ་གཱ་མི་ཏཱ དོ་ས་གཱ་མི་ཏཱ མོ་ཧ་གཱ་མི་ཏཱ བྷ་ཡ་གཱ་མི་ཏཱ པཱ་པེ་ནྟི, པ་ཀྐ་མ་ནྟི་པི, ཝི་བྦྷ་མ་ནྟི་པི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་སྶ་ཛི་པུ་ན་བྦ་སུ་ཀཱ བྷི་ཀྑཱུ ས་ངྒྷེ་ན པ་བྦཱ་ཛ་ནཱི་ཡ་ཀ་མྨ་ཀ་ཏཱ ན ས་མྨཱ ཝ་ཏྟི་སྶ་ནྟི, ན ལོ་མཾ པཱ་ཏེ་སྶ་ནྟི, ན ནེ་ཏྠཱ་རཾ ཝ་ཏྟི་སྶ་ནྟི, ན བྷི་ཀྑཱུ ཁ་མཱ་པེ་སྶ་ནྟི, ཨ་ཀྐོ་སི་སྶ་ནྟི པ་རི་བྷཱ་སི་སྶ་ནྟི, ཚ་ནྡ་གཱ་མི་ཏཱ དོ་ས་གཱ་མི་ཏཱ མོ་ཧ་གཱ་མི་ཏཱ བྷ་ཡ་གཱ་མི་ཏཱ པཱ་པེ་སྶ་ནྟི པ་ཀྐ་མི་སྶ་ནྟི་པི ཝི་བྦྷ་མི་སྶ་ནྟི་པཱི’’ཏི! ཨ་ཐ ཁོ ཏེ བྷི་ཀྑཱུ ཨ་སྶ་ཛི་པུ་ན་བྦ་སུ་ཀེ བྷི་ཀྑཱུ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར, བྷི་ཀྑ་ཝེ, ཨ་སྶ་ཛི་པུ་ན་བྦ་སུ་ཀཱ བྷི་ཀྑཱུ ས་ངྒྷེ་ན པ་བྦཱ་ཛ་ནཱི་ཡ་ཀ་མྨ་ཀ་ཏཱ ན ས་མྨཱ ཝ་ཏྟ་ནྟི…པེ… ཝི་བྦྷ་མ་ནྟི་པཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༤༣༦. ‘‘བྷི་ཀྑུ པ་ནེ་ཝ ཨ་ཉྙ་ཏ་རཾ གཱ་མཾ ཝཱ ནི་ག་མཾ ཝཱ ཨུ་པ་ནི་སྶཱ་ཡ ཝི་ཧ་ར་ཏི ཀུ་ལ་དཱུ་ས་ཀོ པཱ་པ་ས་མཱ་ཙཱ་རོ. ཏ་སྶ ཁོ པཱ་པ་ཀཱ ས་མཱ་ཙཱ་རཱ དི་སྶ་ནྟི ཙེ་ཝ སུ་ཡྻ་ནྟི ཙ, ཀུ་ལཱ་ནི ཙ ཏེ་ན དུ་ཊྛཱ་ནི དི་སྶ་ནྟི ཙེ་ཝ སུ་ཡྻ་ནྟི ཙ. སོ བྷི་ཀྑུ བྷི་ཀྑཱུ་ཧི ཨེ་ཝ་མ་སྶ ཝ་ཙ་ནཱི་ཡོ – ‘ཨཱ་ཡ་སྨཱ ཁོ ཀུ་ལ་དཱུ་ས་ཀོ པཱ་པ་ས་མཱ་ཙཱ་རོ, ཨཱ་ཡ་སྨ་ཏོ ཁོ པཱ་པ་ཀཱ ས་མཱ་ཙཱ་རཱ དི་སྶ་ནྟི ཙེ་ཝ སུ་ཡྻ་ནྟི ཙ, ཀུ་ལཱ་ནི ཙཱ་ཡ་སྨ་ཏཱ དུ་ཊྛཱ་ནི དི་སྶ་ནྟི ཙེ་ཝ སུ་ཡྻ་ནྟི ཙ. པ་ཀྐ་མ་ཏཱ་ཡ་སྨཱ ཨི་མ་མྷཱ ཨཱ་ཝཱ་སཱ. ཨ་ལཾ ཏེ ཨི་དྷ ཝཱ་སེ་ནཱ’ཏི. ཨེ་ཝ་ཉྩ སོ བྷི་ཀྑུ བྷི་ཀྑཱུ་ཧི ཝུ་ཙྩ་མཱ་ནོ ཏེ བྷི་ཀྑཱུ ཨེ་ཝཾ ཝ་དེ་ཡྻ – ‘ཚ་ནྡ་གཱ་མི་ནོ ཙ བྷི་ཀྑཱུ དོ་ས་གཱ་མི་ནོ ཙ བྷི་ཀྑཱུ མོ་ཧ་གཱ་མི་ནོ ཙ བྷི་ཀྑཱུ བྷ་ཡ་གཱ་མི་ནོ ཙ བྷི་ཀྑཱུ ཏཱ་དི་སི་ཀཱ་ཡ ཨཱ་པ་ཏྟི་ཡཱ ཨེ་ཀ་ཙྩཾ པ་བྦཱ་ཛེ་ནྟི ཨེ་ཀ་ཙྩཾ ན པ་བྦཱ་ཛེ་ནྟཱི’ཏི, སོ བྷི་ཀྑུ བྷི་ཀྑཱུ་ཧི ཨེ་ཝ་མ་སྶ ཝ་ཙ་ནཱི་ཡོ – ‘མཱ་ཡ་སྨཱ ཨེ་ཝཾ ཨ་ཝ་ཙ. ན ཙ བྷི་ཀྑཱུ ཚ་ནྡ་གཱ་མི་ནོ. ན ཙ བྷི་ཀྑཱུ དོ་ས་གཱ་མི་ནོ. ན ཙ བྷི་ཀྑཱུ མོ་ཧ་གཱ་མི་ནོ. ན ཙ བྷི་ཀྑཱུ བྷ་ཡ་གཱ་མི་ནོ. ཨཱ་ཡ་སྨཱ ཁོ ཀུ་ལ་དཱུ་ས་ཀོ པཱ་པ་ས་མཱ་ཙཱ་རོ. ཨཱ་ཡ་སྨ་ཏོ ཁོ པཱ་པ་ཀཱ ས་མཱ་ཙཱ་རཱ དི་སྶ་ནྟི ཙེ་ཝ སུ་ཡྻ་ནྟི ཙ. ཀུ་ལཱ་ནི ཙཱ་ཡ་སྨ་ཏཱ དུ་ཊྛཱ་ནི དི་སྶ་ནྟི ཙེ་ཝ སུ་ཡྻ་ནྟི ཙ. པ་ཀྐ་མ་ཏཱ་ཡ་སྨཱ ཨི་མ་མྷཱ ཨཱ་ཝཱ་སཱ. ཨ་ལཾ ཏེ ཨི་དྷ ཝཱ་སེ་ནཱ’ཏི. ཨེ་ཝ་ཉྩ སོ བྷི་ཀྑུ བྷི་ཀྑཱུ་ཧི ཝུ་ཙྩ་མཱ་ནོ ཏ་ཐེ་ཝ པ་གྒ་ཎྷེ་ཡྻ, སོ བྷི་ཀྑུ བྷི་ཀྑཱུ་ཧི ཡཱ་ཝ་ཏ་ཏི་ཡཾ ས་མ་ནུ་བྷཱ་སི་ཏ་བྦོ ཏ་སྶ པ་ཊི་ནི་སྶ་གྒཱ་ཡ. ཡཱ་ཝ་ཏ་ཏི་ཡ་ཉྩེ ས་མ་ནུ་བྷཱ་སཱི་ཡ་མཱ་ནོ ཏཾ པ་ཊི་ནི་སྶ་ཛྫེ་ཡྻ, ཨི་ཙྩེ་ཏཾ ཀུ་ས་ལཾ; ནོ ཙེ པ་ཊི་ནི་སྶ་ཛྫེ་ཡྻ, ས་ངྒྷཱ་དི་སེ་སོ’’ཏི.
༤༣༧. བྷི་ཀྑུ པ་ནེ་ཝ ཨ་ཉྙ་ཏ་རཾ གཱ་མཾ ཝཱ ནི་ག་མཾ ཝཱཏི གཱ་མོ་པི ནི་ག་མོ་པི ན་ག་ར་མྤི གཱ་མོ ཙེ་ཝ ནི་ག་མོ ཙ.
ཨུ་པ་ནི་སྶཱ་ཡ ཝི་ཧ་ར་ཏཱིཏི ཏ་ཏྠ པ་ཊི་བ་དྡྷཱ ཧོ་ནྟི ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པྤ་ཙྩ་ཡ་བྷེ་ས་ཛྫ་པ་རི་ཀྑཱ་རཱ.
ཀུ་ལཾ ནཱ་མ ཙ་ཏྟཱ་རི ཀུ་ལཱ་ནི – ཁ་ཏྟི་ཡ་ཀུ་ལཾ, བྲཱ་ཧྨ་ཎ་ཀུ་ལཾ, ཝེ་སྶ་ཀུ་ལཾ, སུ་དྡ་ཀུ་ལཾ.
ཀུ་ལ་དཱུ་ས་ཀོཏི ཀུ་ལཱ་ནི དཱུ་སེ་ཏི པུ་པྥེ་ན ཝཱ ཕ་ལེ་ན ཝཱ ཙུ་ཎྞེ་ན ཝཱ མ་ཏྟི་ཀཱ་ཡ ཝཱ ད་ནྟ་ཀ་ཊྛེ་ན ཝཱ ཝེ་ལུ༹་ཡཱ ཝཱ [ཝེ་ལུ༹་ནཱ ཝཱ (སྱཱ.)] ཝེ་ཛྫི་ཀཱ་ཡ ཝཱ ཛ་ངྒྷ་པེ་ས་ནི་ཀེ་ན ཝཱ.
པཱ་པ་ས་མཱ་ཙཱ་རོཏི མཱ་ལཱ་ཝ་ཙྪཾ རོ་པེ་ཏི་པི རོ་པཱ་པེ་ཏི་པི, སི་ཉྩ་ཏི་པི སི་ཉྩཱ་པེ་ཏི་པི, ཨོ་ཙི་ནཱ་ཏི་པི ཨོ་ཙི་ནཱ་པེ་ཏི་པི, ག་ནྠེ་ཏི་པི ག་ནྠཱ་པེ་ཏི་པི.
དི་སྶ་ནྟི ཙེ་ཝ སུ་ཡྻ་ནྟི ཙཱཏི ཡེ སཾ་མུ་ཁཱ ཏེ པ་སྶ་ནྟི, ཡེ ཏི་རོ་ཀྑཱ ཏེ སུ་ཎ་ནྟི.
ཀུ་ལཱ་ནི ཙ ཏེ་ན དུ་ཊྛཱ་ནཱིཏི པུ་བྦེ ས་དྡྷཱ ཧུ་ཏྭཱ ཏཾ ཨཱ་ག་མྨ ཨ་སྶ་དྡྷཱ ཧོ་ནྟི, པ་ས་ནྣཱ ཧུ་ཏྭཱ ཨ་པྤ་ས་ནྣཱ ཧོ་ནྟི.
དི་སྶ་ནྟི ཙེ་ཝ སུ་ཡྻ་ནྟི ཙཱཏི ཡེ སཾ་མུ་ཁཱ ཏེ པ་སྶ་ནྟི, ཡེ ཏི་རོ་ཀྑཱ ཏེ སུ་ཎ་ནྟི.
སོ བྷི་ཀྑཱུཏི ཡོ སོ ཀུ་ལ་དཱུ་ས་ཀོ བྷི་ཀྑུ.
བྷི་ཀྑཱུ་ཧཱིཏི ཨ་ཉྙེ་ཧི བྷི་ཀྑཱུ་ཧི. ཡེ པ་སྶ་ནྟི ཡེ སུ་ཎ་ནྟི. ཏེ་ཧི ཝ་ཏྟ་བྦོ – ‘‘ཨཱ་ཡ་སྨཱ ཁོ ཀུ་ལ་དཱུ་ས་ཀོ པཱ་པ་ས་མཱ་ཙཱ་རོ. ཨཱ་ཡ་སྨ་ཏོ ཁོ པཱ་པ་ཀཱ ས་མཱ་ཙཱ་རཱ དི་སྶ་ནྟི ཙེ་ཝ སུ་ཡྻ་ནྟི ཙ. ཀུ་ལཱ་ནི ཙཱ་ཡ་སྨ་ཏཱ དུ་ཊྛཱ་ནི དི་སྶ་ནྟི ཙེ་ཝ སུ་ཡྻ་ནྟི ཙ. པ་ཀྐ་མ་ཏཱ་ཡ་སྨཱ ཨི་མ་མྷཱ ཨཱ་ཝཱ་སཱ. ཨ་ལཾ ཏེ ཨི་དྷ ཝཱ་སེ་ནཱ’’ཏི.
ཨེ་ཝ་ཉྩ སོ བྷི་ཀྑུ བྷི་ཀྑཱུ་ཧི ཝུ་ཙྩ་མཱ་ནོ ཏེ བྷི་ཀྑཱུ ཨེ་ཝཾ ཝ་དེ་ཡྻ – ‘‘ཚ་ནྡ་གཱ་མི་ནོ ཙ བྷི་ཀྑཱུ, དོ་ས་གཱ་མི་ནོ ཙ བྷི་ཀྑཱུ, མོ་ཧ་གཱ་མི་ནོ ཙ བྷི་ཀྑཱུ, བྷ་ཡ་གཱ་མི་ནོ ཙ བྷི་ཀྑཱུ. ཏཱ་དི་སི་ཀཱ་ཡ ཨཱ་པ་ཏྟི་ཡཱ ཨེ་ཀ་ཙྩཾ པ་བྦཱ་ཛེ་ནྟི ཨེ་ཀ་ཙྩཾ ན པ་བྦཱ་ཛེ་ནྟཱི’’ཏི.
སོ བྷི་ཀྑཱུཏི ཡོ སོ ཀ་མྨ་ཀ་ཏོ བྷི་ཀྑུ.
བྷི་ཀྑཱུ་ཧཱིཏི ཨ་ཉྙེ་ཧི བྷི་ཀྑཱུ་ཧི. ཡེ པ་སྶ་ནྟི ཡེ སུ་ཎ་ནྟི ཏེ་ཧི ཝ་ཏྟ་བྦོ – ‘‘མཱ་ཡ་སྨཱ ཨེ་ཝཾ ཨ་ཝ་ཙ. ན ཙ བྷི་ཀྑཱུ ཚ་ནྡ་གཱ་མི་ནོ, ན ཙ བྷི་ཀྑཱུ དོ་ས་གཱ་མི་ནོ, ན ཙ བྷི་ཀྑཱུ མོ་ཧ་གཱ་མི་ནོ, ན ཙ བྷི་ཀྑཱུ བྷ་ཡ་གཱ་མི་ནོ. ཨཱ་ཡ་སྨཱ ཁོ ཀུ་ལ་དཱུ་ས་ཀོ པཱ་པ་ས་མཱ་ཙཱ་རོ. ཨཱ་ཡ་སྨ་ཏོ ཁོ པཱ་པ་ཀཱ ས་མཱ་ཙཱ་རཱ དི་སྶ་ནྟི ཙེ་ཝ སུ་ཡྻ་ནྟི ཙ. ཀུ་ལཱ་ནི ཙཱ་ཡ་སྨ་ཏཱ དུ་ཊྛཱ་ནི དི་སྶ་ནྟི ཙེ་ཝ སུ་ཡྻ་ནྟི ཙ. པ་ཀྐ་མ་ཏཱ་ཡ་སྨཱ ཨི་མ་མྷཱ ཨཱ་ཝཱ་སཱ. ཨ་ལཾ ཏེ ཨི་དྷ ཝཱ་སེ་ནཱ’’ཏི. དུ་ཏི་ཡ་མྤི ཝ་ཏྟ་བྦོ. ཏ་ཏི་ཡ་མྤི ཝ་ཏྟ་བྦོ.
ས་ཙེ པ་ཊི་ནི་སྶ་ཛྫ་ཏི, ཨི་ཙྩེ་ཏཾ ཀུ་ས་ལཾ. ནོ ཙེ པ་ཊི་ནི་སྶ་ཛྫ་ཏི, ཨཱ་པ་ཏྟི དུ་ཀྐ་ཊ་སྶ. སུ་ཏྭཱ ན ཝ་ད་ནྟི, ཨཱ་པ་ཏྟི དུ་ཀྐ་ཊ་སྶ. སོ བྷི་ཀྑུ ས་ངྒྷ་མ་ཛ྄ཛྷ་མྤི ཨཱ་ཀ་ཌྜྷི་ཏྭཱ ཝ་ཏྟ་བྦོ – ‘‘མཱ་ཡ་སྨཱ ཨེ་ཝཾ ཨ་ཝ་ཙ. ན ཙ བྷི་ཀྑཱུ ཚ་ནྡ་གཱ་མི་ནོ, ན ཙ བྷི་ཀྑཱུ དོ་ས་གཱ་མི་ནོ, ན ཙ བྷི་ཀྑཱུ མོ་ཧ་གཱ་མི་ནོ, ན ཙ བྷི་ཀྑཱུ བྷ་ཡ་གཱ་མི་ནོ. ཨཱ་ཡ་སྨཱ ཁོ ཀུ་ལ་དཱུ་ས་ཀོ པཱ་པ་ས་མཱ་ཙཱ་རོ. ཨཱ་ཡ་སྨ་ཏོ ཁོ པཱ་པ་ཀཱ ས་མཱ་ཙཱ་རཱ དི་སྶ་ནྟི ཙེ་ཝ སུ་ཡྻ་ནྟི ཙ. ཀུ་ལཱ་ནི ཙཱ་ཡ་སྨ་ཏཱ དུ་ཊྛཱ་ནི དི་སྶ་ནྟི ཙེ་ཝ སུ་ཡྻ་ནྟི ཙ. པ་ཀྐ་མ་ཏཱ་ཡ་སྨཱ ཨི་མ་མྷཱ ཨཱ་ཝཱ་སཱ. ཨ་ལཾ ཏེ ཨི་དྷ ཝཱ་སེ་ནཱ’’ཏི. དུ་ཏི་ཡ་མྤི ཝ་ཏྟ་བྦོ. ཏ་ཏི་ཡ་མྤི ཝ་ཏྟ་བྦོ. ས་ཙེ པ་ཊི་ནི་སྶ་ཛྫ་ཏི, ཨི་ཙྩེ་ཏཾ ཀུ་ས་ལཾ. ནོ ཙེ པ་ཊི་ནི་སྶ་ཛྫ་ཏི, ཨཱ་པ་ཏྟི དུ་ཀྐ་ཊ་སྶ. སོ བྷི་ཀྑུ ས་མ་ནུ་བྷཱ་སི་ཏ་བྦོ. ཨེ་ཝ་ཉྩ པ་ན, བྷི་ཀྑ་ཝེ, ས་མ་ནུ་བྷཱ་སི་ཏ་བྦོ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –
༤༣༨. ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ཨི་ཏྠ་ནྣཱ་མོ བྷི་ཀྑུ ས་ངྒྷེ་ན པ་བྦཱ་ཛ་ནཱི་ཡ་ཀ་མྨ་ཀ་ཏོ བྷི་ཀྑཱུ ཚ་ནྡ་གཱ་མི་ཏཱ དོ་ས་གཱ་མི་ཏཱ མོ་ཧ་གཱ་མི་ཏཱ བྷ་ཡ་གཱ་མི་ཏཱ པཱ་པེ་ཏི. སོ ཏཾ ཝ་ཏྠུཾ ན པ་ཊི་ནི་སྶ་ཛྫ་ཏི. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨི་ཏྠ་ནྣཱ་མཾ བྷི་ཀྑུཾ ས་མ་ནུ་བྷཱ་སེ་ཡྻ ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ. ཨེ་སཱ ཉ་ཏྟི.
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ཨི་ཏྠ་ནྣཱ་མོ བྷི་ཀྑུ ས་ངྒྷེ་ན པ་བྦཱ་ཛ་ནཱི་ཡ་ཀ་མྨ་ཀ་ཏོ བྷི་ཀྑཱུ ཚ་ནྡ་གཱ་མི་ཏཱ དོ་ས་གཱ་མི་ཏཱ མོ་ཧ་གཱ་མི་ཏཱ བྷ་ཡ་གཱ་མི་ཏཱ པཱ་པེ་ཏི. སོ ཏཾ ཝ་ཏྠུཾ ན པ་ཊི་ནི་སྶ་ཛྫ་ཏི. ས་ངྒྷོ ཨི་ཏྠ་ནྣཱ་མཾ བྷི་ཀྑུཾ ས་མ་ནུ་བྷཱ་ས་ཏི ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ. ཡ་སྶཱ་ཡ་སྨ་ཏོ ཁ་མ་ཏི ཨི་ཏྠ་ནྣཱ་མ་སྶ བྷི་ཀྑུ་ནོ ས་མ་ནུ་བྷཱ་ས་ནཱ ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ.
‘‘དུ་ཏི་ཡ་མྤི ཨེ་ཏ་མ་ཏྠཾ ཝ་དཱ་མི…པེ… ཏ་ཏི་ཡ་མྤི ཨེ་ཏ་མ་ཏྠཾ ཝ་དཱ་མི…པེ….
‘‘ས་མ་ནུ་བྷ་ཊྛོ ས་ངྒྷེ་ན ཨི་ཏྠ་ནྣཱ་མོ བྷི་ཀྑུ ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
༤༣༩. ཉ་ཏྟི་ཡཱ དུ་ཀྐ་ཊཾ, དྭཱི་ཧི ཀ་མྨ་ཝཱ་ཙཱ་ཧི ཐུ་ལླ་ཙྩ་ཡཱ, ཀ་མྨ་ཝཱ་ཙཱ་པ་རི་ཡོ་སཱ་ནེ ཨཱ་པ་ཏྟི ས་ངྒྷཱ་དི་སེ་ས་སྶ. ས་ངྒྷཱ་དི་སེ་སཾ ཨ་ཛ྄ཛྷཱ་པ་ཛྫ་ནྟ་སྶ ཉ་ཏྟི་ཡཱ དུ་ཀྐ་ཊཾ, དྭཱི་ཧི ཀ་མྨ་ཝཱ་ཙཱ་ཧི ཐུ་ལླ་ཙྩ་ཡཱ པ་ཊི་པྤ་སྶ་མྦྷ་ནྟི.
ས་ངྒྷཱ་དི་སེ་སོཏི ས་ངྒྷོ་ཝ ཏ་སྶཱ ཨཱ་པ་ཏྟི་ཡཱ པ་རི་ཝཱ་སཾ དེ་ཏི, མཱུ་ལཱ་ཡ པ་ཊི་ཀ་སྶ་ཏི, མཱ་ན་ཏྟཾ དེ་ཏི, ཨ་བྦྷེ་ཏི; ན ས་མྦ་ཧུ་ལཱ, ན ཨེ་ཀ་པུ་གྒ་ལོ. ཏེ་ན ཝུ་ཙྩ་ཏི – ‘ས་ངྒྷཱ་དི་སེ་སོ’ཏི, ཏ་སྶེ་ཝ ཨཱ་པ་ཏྟི་ནི་ཀཱ་ཡ་སྶ ནཱ་མ་ཀ་མྨཾ ཨ་དྷི་ཝ་ཙ་ནཾ. ཏེ་ན་པི ཝུ་ཙྩ་ཏི ས་ངྒྷཱ་དི་སེ་སོ་ཏི.
༤༤༠. དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱི ན པ་ཊི་ནི་སྶ་ཛྫ་ཏི, ཨཱ་པ་ཏྟི ས་ངྒྷཱ་དི་སེ་ས་སྶ.
དྷ་མྨ་ཀ་མྨེ ཝེ་མ་ཏི་ཀོ ན པ་ཊི་ནི་སྶ་ཛྫ་ཏི, ཨཱ་པ་ཏྟི ས་ངྒྷཱ་དི་སེ་ས་སྶ.
དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱི ན པ་ཊི་ནི་སྶ་ཛྫ་ཏི, ཨཱ་པ་ཏྟི ས་ངྒྷཱ་དི་སེ་ས་སྶ.
ཨ་དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ.
ཨ་དྷ་མྨ་ཀ་མྨེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ.
ཨ་དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ.
༤༤༡. ཨ་ནཱ་པ་ཏྟི ཨ་ས་མ་ནུ་བྷཱ་ས་ནྟ་སྶ, པ་ཊི་ནི་སྶ་ཛྫ་ནྟ་སྶ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཀུ་ལ་དཱུ་ས་ཀ་སི་ཀྑཱ་པ་དཾ ནི་ཊྛི་ཏཾ ཏེ་ར་ས་མཾ.
༤༤༢. ཨུ་དྡི་ཊྛཱ ཁོ, ཨཱ་ཡ་སྨ་ནྟོ, ཏེ་ར་ས ས་ངྒྷཱ་དི་སེ་སཱ དྷ་མྨཱ, ན་ཝ པ་ཋ་མཱ་པ་ཏྟི་ཀཱ, ཙ་ཏྟཱ་རོ ཡཱ་ཝ་ཏ་ཏི་ཡ་ཀཱ. ཡེ་སཾ བྷི་ཀྑུ ཨ་ཉྙ་ཏ་རཾ ཝཱ ཨ་ཉྙ་ཏ་རཾ ཝཱ ཨཱ་པ་ཛྫི་ཏྭཱ ཡཱ་ཝ་ཏཱི་ཧཾ ཛཱ་ནཾ པ་ཊི་ཙྪཱ་དེ་ཏི ཏཱ་ཝ་ཏཱི་ཧཾ ཏེ་ན བྷི་ཀྑུ་ནཱ ཨ་ཀཱ་མཱ པ་རི་ཝ་ཏྠ་བྦཾ. པ་རི་ཝུ་ཏྠ་པ་རི་ཝཱ་སེ་ན བྷི་ཀྑུ་ནཱ ཨུ་ཏྟ་རི ཚཱ་ར་ཏྟཾ བྷི་ཀྑུ་མཱ་ན་ཏྟཱ་ཡ པ་ཊི་པ་ཛྫི་ཏ་བྦཾ. ཙི་ཎྞ་མཱ་ན་ཏྟོ བྷི་ཀྑུ ཡ་ཏྠ སི་ཡཱ ཝཱི་ས་ཏི་ག་ཎོ བྷི་ཀྑུ་ས་ངྒྷོ ཏ་ཏྠ སོ བྷི་ཀྑུ ཨ་བྦྷེ་ཏ་བྦོ. ཨེ་ཀེ་ན་པི ཙེ ཨཱུ་ནོ ཝཱི་ས་ཏི་ག་ཎོ བྷི་ཀྑུ་ས་ངྒྷོ ཏཾ བྷི་ཀྑུཾ ཨ་བྦྷེ་ཡྻ, སོ ཙ བྷི་ཀྑུ ཨ་ན་བྦྷི་ཏོ, ཏེ ཙ བྷི་ཀྑཱུ གཱ་ར་ཡ྄ཧཱ, ཨ་ཡཾ ཏ་ཏྠ སཱ་མཱི་ཙི. ཏ་ཏྠཱ་ཡ་སྨ་ནྟེ པུ་ཙྪཱ་མི – ‘ཀ་ཙྩི་ཏྠ པ་རི་སུ་དྡྷཱ’? དུ་ཏི་ཡ་མྤི པུ་ཙྪཱ་མི – ‘ཀ་ཙྩི་ཏྠ པ་རི་སུ་དྡྷཱ’? ཏ་ཏི་ཡ་མྤི པུ་ཙྪཱ་མི – ‘ཀ་ཙྩི་ཏྠ པ་རི་སུ་དྡྷཱ’? པ་རི་སུ་དྡྷེ་ཏྠཱ་ཡ་སྨ་ནྟོ. ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི་ཏི.
ཏེ་ར་ས་ཀཾ ནི་ཊྛི་ཏཾ.
ཏ་སྶུ་དྡཱ་ནཾ –
ཝི་སྶ་ཊྛི ཀཱ་ཡ་སཾ་ས་གྒཾ, དུ་ཊྛུ་ལླཾ ཨ་ཏྟ་ཀཱ་མ་ཉྩ;
ས་ཉྩ་རི་ཏྟཾ ཀུ་ཊཱི ཙེ་ཝ, ཝི་ཧཱ་རོ ཙ ཨ་མཱུ་ལ་ཀཾ.
ཀི་ཉྩི་ལེ་ས་ཉྩ བྷེ་དོ ཙ, ཏ་སྶེ་ཝ ཨ་ནུ་ཝ་ཏྟ་ཀཱ;
དུ་བྦ་ཙཾ ཀུ་ལ་དཱུ་ས་ཉྩ, ས་ངྒྷཱ་དི་སེ་སཱ ཏེ་ར་སཱ་ཏི.
ས་ངྒྷཱ་དི་སེ་ས་ཀ་ཎྜཾ ནི་ཊྛི་ཏཾ.