༣. ཨ་ནི་ཡ་ཏ་ཀ་ཎྜཾ
༡. པ་ཋ་མ་ཨ་ནི་ཡ་ཏ་སི་ཀྑཱ་པ་དཾ
ཨི་མེ ཁོ པ་ནཱ་ཡ་སྨ་ནྟོ དྭེ ཨ་ནི་ཡ་ཏཱ དྷ་མྨཱ
ཨུ་དྡེ་སཾ ཨཱ་ག་ཙྪ་ནྟི.
༤༤༣. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཨུ་དཱ་ཡཱི སཱ་ཝ་ཏྠི་ཡཾ ཀུ་ལཱུ་པ་ཀོ ཧོ་ཏི, བ་ཧུ་ཀཱ་ནི ཀུ་ལཱ་ནི ཨུ་པ་ས་ངྐ་མ་ཏི. ཏེ་ན ཁོ པ་ན ས་མ་ཡེ་ན ཨཱ་ཡ་སྨ་ཏོ ཨུ་དཱ་ཡི་སྶ ཨུ་པ་ཊྛཱ་ཀ་ཀུ་ལ་སྶ ཀུ་མཱ་རི་ཀཱ ཨ་ཉྙ་ཏ་ར་སྶ ཀུ་ལ་སྶ ཀུ་མཱ་ར་ཀ་སྶ དི་ནྣཱ ཧོ་ཏི. ཨ་ཐ ཁོ ཨཱ་ཡ་སྨཱ ཨུ་དཱ་ཡཱི པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ན ཏཾ ཀུ་ལཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ མ་ནུ་སྶེ པུ་ཙྪི – ‘‘ཀ་ཧཾ ཨི་ཏྠ་ནྣཱ་མཱ’’ཏི? ཏེ ཨེ་ཝ་མཱ་ཧཾ་སུ – ‘‘དི་ནྣཱ, བྷ་ནྟེ, ཨ་མུ་ཀ་སྶ ཀུ་ལ་སྶ ཀུ་མཱ་ར་ཀ་སྶཱ’’ཏི. ཏ་མྤི ཁོ ཀུ་ལཾ ཨཱ་ཡ་སྨ་ཏོ ཨུ་དཱ་ཡི་སྶ ཨུ་པ་ཊྛཱ་ཀཾ ཧོ་ཏི. ཨ་ཐ ཁོ ཨཱ་ཡ་སྨཱ ཨུ་དཱ་ཡཱི ཡེ་ན ཏཾ ཀུ་ལཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ མ་ནུ་སྶེ པུ་ཙྪི – ‘‘ཀ་ཧཾ ཨི་ཏྠ་ནྣཱ་མཱ’’ཏི? ཏེ ཨེ་ཝ་མཱ་ཧཾ་སུ – ‘‘ཨེ་སཱ་ཡྻ, ཨོ་ཝ་ར་ཀེ ནི་སི་ནྣཱ’’ཏི. ཨ་ཐ ཁོ ཨཱ་ཡ་སྨཱ ཨུ་དཱ་ཡཱི ཡེ་ན སཱ ཀུ་མཱ་རི་ཀཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཏ་སྶཱ ཀུ་མཱ་རི་ཀཱ་ཡ ས་དྡྷིཾ ཨེ་ཀོ ཨེ་ཀཱ་ཡ ར་ཧོ པ་ཊི་ཙྪ་ནྣེ ཨཱ་ས་ནེ ཨ་ལཾ་ཀ་མྨ་ནི་ཡེ ནི་ས་ཛྫཾ ཀ་པྤེ་སི ཀཱ་ལ་ཡུ་ཏྟཾ ས་མུ་ལླ་པ་ནྟོ ཀཱ་ལ་ཡུ་ཏྟཾ དྷ་མྨཾ བྷ་ཎ་ནྟོ.
ཏེ་ན ཁོ པ་ན ས་མ་ཡེ་ན ཝི་སཱ་ཁཱ མི་གཱ་ར་མཱ་ཏཱ བ་ཧུ་པུ་ཏྟཱ ཧོ་ཏི བ་ཧུ་ན་ཏྟཱ ཨ་རོ་ག་པུ་ཏྟཱ ཨ་རོ་ག་ན་ཏྟཱ ཨ་བྷི་མ་ངྒ་ལ་ས་མྨ་ཏཱ. མ་ནུ་སྶཱ ཡ་ཉྙེ་སུ ཚ་ཎེ་སུ ཨུ་སྶ་ཝེ་སུ ཝི་སཱ་ཁཾ མི་གཱ་ར་མཱ་ཏ་རཾ པ་ཋ་མཾ བྷོ་ཛེ་ནྟི. ཨ་ཐ ཁོ ཝི་སཱ་ཁཱ མི་གཱ་ར་མཱ་ཏཱ ནི་མ་ནྟི་ཏཱ ཏཾ ཀུ་ལཾ ཨ་ག་མཱ་སི. ཨ་དྡ་སཱ ཁོ ཝི་སཱ་ཁཱ མི་གཱ་ར་མཱ་ཏཱ ཨཱ་ཡ་སྨ་ནྟཾ ཨུ་དཱ་ཡིཾ ཏ་སྶཱ ཀུ་མཱ་རི་ཀཱ་ཡ ས་དྡྷིཾ ཨེ་ཀཾ ཨེ་ཀཱ་ཡ ར་ཧོ པ་ཊི་ཙྪ་ནྣེ ཨཱ་ས་ནེ ཨ་ལཾ་ཀ་མྨ་ནི་ཡེ ནི་སི་ནྣཾ. དི་སྭཱ་ན ཨཱ་ཡ་སྨ་ནྟཾ ཨུ་དཱ་ཡིཾ ཨེ་ཏ་ད་ཝོ་ཙ – ‘‘ཨི་དཾ, བྷ་ནྟེ, ན་ཙྪ་ནྣཾ ན་པྤ་ཏི་རཱུ་པཾ ཡཾ ཨ་ཡྻོ མཱ་ཏུ་གཱ་མེ་ན ས་དྡྷིཾ ཨེ་ཀོ ཨེ་ཀཱ་ཡ ར་ཧོ པ་ཊི་ཙྪ་ནྣེ ཨཱ་ས་ནེ ཨ་ལཾ་ཀ་མྨ་ནི་ཡེ ནི་ས་ཛྫཾ ཀ་པྤེ་ཏི. ཀི་ཉྩཱ་པི, བྷ་ནྟེ, ཨ་ཡྻོ ཨ་ན་ཏྠི་ཀོ ཏེ་ན དྷ་མྨེ་ན, ཨ་པི་ཙ དུ་སྶ་དྡྷཱ་པ་ཡཱ ཨ་པྤ་ས་ནྣཱ མ་ནུ་སྶཱ’’ཏི. ཨེ་ཝ་མྤི ཁོ ཨཱ་ཡ་སྨཱ ཨུ་དཱ་ཡཱི ཝི་སཱ་ཁཱ་ཡ མི་གཱ་ར་མཱ་ཏུ་ཡཱ ཝུ་ཙྩ་མཱ་ནོ ནཱ་དི་ཡི. ཨ་ཐ ཁོ ཝི་སཱ་ཁཱ མི་གཱ་ར་མཱ་ཏཱ ནི་ཀྑ་མི་ཏྭཱ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཨུ་དཱ་ཡཱི མཱ་ཏུ་གཱ་མེ་ན ས་དྡྷིཾ ཨེ་ཀོ ཨེ་ཀཱ་ཡ ར་ཧོ པ་ཊི་ཙྪ་ནྣེ ཨཱ་ས་ནེ ཨ་ལཾ་ཀ་མྨ་ནི་ཡེ ནི་ས་ཛྫཾ ཀ་པྤེ་སྶ་ཏཱི’’ཏི! ཨ་ཐ ཁོ ཏེ བྷི་ཀྑཱུ ཨཱ་ཡ་སྨ་ནྟཾ ཨུ་དཱ་ཡིཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏྭཾ, ཨུ་དཱ་ཡི, མཱ་ཏུ་གཱ་མེ་ན ས་དྡྷིཾ ཨེ་ཀོ ཨེ་ཀཱ་ཡ ར་ཧོ པ་ཊི་ཙྪ་ནྣེ ཨཱ་ས་ནེ ཨ་ལཾ་ཀ་མྨ་ནི་ཡེ ནི་ས་ཛྫཾ ཀ་པྤེ་སཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, མཱ་ཏུ་གཱ་མེ་ན ས་དྡྷིཾ ཨེ་ཀོ ཨེ་ཀཱ་ཡ ར་ཧོ པ་ཊི་ཙྪ་ནྣེ ཨཱ་ས་ནེ ཨ་ལཾ་ཀ་མྨ་ནི་ཡེ ནི་ས་ཛྫཾ ཀ་པྤེ་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༤༤༤. ‘‘ཡོ པ་ན བྷི་ཀྑུ མཱ་ཏུ་གཱ་མེ་ན ས་དྡྷིཾ ཨེ་ཀོ ཨེ་ཀཱ་ཡ ར་ཧོ པ་ཊི་ཙྪ་ནྣེ ཨཱ་ས་ནེ ཨ་ལཾ་ཀ་མྨ་ནི་ཡེ ནི་ས་ཛྫཾ ཀ་པྤེ་ཡྻ, ཏ་མེ་ནཾ ས་དྡྷེ་ཡྻ་ཝ་ཙ་སཱ ཨུ་པཱ་སི་ཀཱ དི་སྭཱ ཏི་ཎྞཾ དྷ་མྨཱ་ནཾ ཨ་ཉྙ་ཏ་རེ་ན ཝ་དེ་ཡྻ – པཱ་རཱ་ཛི་ཀེ་ན ཝཱ ས་ངྒྷཱ་དི་སེ་སེ་ན ཝཱ པཱ་ཙི་ཏྟི་ཡེ་ན ཝཱ, ནི་ས་ཛྫཾ བྷི་ཀྑུ པ་ཊི་ཛཱ་ན་མཱ་ནོ ཏི་ཎྞཾ དྷ་མྨཱ་ནཾ ཨ་ཉྙ་ཏ་རེ་ན ཀཱ་རེ་ཏ་བྦོ – པཱ་རཱ་ཛི་ཀེ་ན ཝཱ ས་ངྒྷཱ་དི་སེ་སེ་ན ཝཱ པཱ་ཙི་ཏྟི་ཡེ་ན ཝཱ ཡེ་ན ཝཱ སཱ ས་དྡྷེ་ཡྻ་ཝ་ཙ་སཱ ཨུ་པཱ་སི་ཀཱ ཝ་དེ་ཡྻ, ཏེ་ན སོ བྷི་ཀྑུ ཀཱ་རེ་ཏ་བྦོ. ཨ་ཡཾ དྷ་མྨོ ཨ་ནི་ཡ་ཏོ’’ཏི.
༤༤༥. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
མཱ་ཏུ་གཱ་མོ ནཱ་མ མ་ནུ་སྶི་ཏྠཱི, ན ཡ་ཀྑཱི ན པེ་ཏཱི ན ཏི་ར་ཙྪཱ་ན་ག་ཏཱ. ཨ་ནྟ་མ་སོ ཏ་ད་ཧུ་ཛཱ་ཏཱ་པི དཱ་རི་ཀཱ, པ་གེ་ཝ མ་ཧ་ཏྟ་རཱི.
ས་དྡྷིནྟི ཨེ་ཀ་ཏོ.
ཨེ་ཀོ ཨེ་ཀཱ་ཡཱཏི བྷི་ཀྑུ ཙེ་ཝ ཧོ་ཏི མཱ་ཏུ་གཱ་མོ ཙ.
ར་ཧོ ནཱ་མ ཙ་ཀྑུ་སྶ ར་ཧོ, སོ་ཏ་སྶ ར་ཧོ. ཙ་ཀྑུ་སྶ ར་ཧོནཱ་མ ན ས་ཀྐཱ ཧོ་ཏི ཨ་ཀྑིཾ ཝཱ ནི་ཁ་ཎཱི་ཡ་མཱ་ནེ བྷ་མུ་ཀཾ ཝཱ ཨུ་ཀྑི་པཱི་ཡ་མཱ་ནེ སཱི་སཾ ཝཱ ཨུ་ཀྑི་པཱི་ཡ་མཱ་ནེ པ་སྶི་ཏུཾ. སོ་ཏ་སྶ ར་ཧོནཱ་མ ན ས་ཀྐཱ ཧོ་ཏི པ་ཀ་ཏི་ཀ་ཐཱ སོ་ཏུཾ.
པ་ཊི་ཙྪ་ནྣཾ ནཱ་མ ཨཱ་ས་ནཾ ཀུ་ཊྚེ་ན ཝཱ [ཀུ་ཌྜེ་ན ཝཱ (སཱི. སྱཱ.)] ཀ་ཝཱ་ཊེ་ན ཝཱ ཀི་ལ་ཉྫེ་ན ཝཱ སཱ་ཎི་པཱ་ཀཱ་རེ་ན ཝཱ རུ་ཀྑེ་ན ཝཱ ཐ་མྦྷེ་ན ཝཱ ཀོ་ཏྠ་ལི༹་ཡཱ ཝཱ ཡེ་ན ཀེ་ན་ཙི པ་ཊི་ཙྪ་ནྣཾ ཧོ་ཏི.
ཨ་ལཾ་ཀ་མྨ་ནི་ཡེཏི ས་ཀྐཱ ཧོ་ཏི མེ་ཐུ་ནཾ དྷ་མྨཾ པ་ཊི་སེ་ཝི་ཏུཾ.
ནི་ས་ཛྫཾ ཀ་པྤེ་ཡྻཱཏི མཱ་ཏུ་གཱ་མེ ནི་སི་ནྣེ བྷི་ཀྑུ ཨུ་པ་ནི་སི་ནྣོ ཝཱ ཧོ་ཏི ཨུ་པ་ནི་པ་ནྣོ ཝཱ. བྷི་ཀྑུ ནི་སི་ནྣེ མཱ་ཏུ་གཱ་མོ ཨུ་པ་ནི་སི་ནྣོ ཝཱ ཧོ་ཏི ཨུ་པ་ནི་པ་ནྣོ ཝཱ. ཨུ་བྷོ ཝཱ ནི་སི་ནྣཱ ཧོ་ནྟི ཨུ་བྷོ ཝཱ ནི་པ་ནྣཱ.
ས་དྡྷེ་ཡྻ་ཝ་ཙ་སཱ ནཱ་མ ཨཱ་ག་ཏ་ཕ་ལཱ ཨ་བྷི་ས་མེ་ཏཱ་ཝི་ནཱི ཝི་ཉྙཱ་ཏ་སཱ་ས་ནཱ.
ཨུ་པཱ་སི་ཀཱ ནཱ་མ བུ་དྡྷཾ ས་ར་ཎཾ ག་ཏཱ, དྷ་མྨཾ ས་ར་ཎཾ ག་ཏཱ, ས་ངྒྷཾ ས་ར་ཎཾ ག་ཏཱ.
དི་སྭཱཏི པ་སྶི་ཏྭཱ.
ཏི་ཎྞཾ དྷ་མྨཱ་ནཾ ཨ་ཉྙ་ཏ་རེ་ན ཝ་དེ་ཡྻ – པཱ་རཱ་ཛི་ཀེ་ན ཝཱ ས་ངྒྷཱ་དི་སེ་སེ་ན ཝཱ པཱ་ཙི་ཏྟི་ཡེ་ན ཝཱ. ནི་ས་ཛྫཾ བྷི་ཀྑུ པ་ཊི་ཛཱ་ན་མཱ་ནོ ཏི་ཎྞཾ དྷ་མྨཱ་ནཾ ཨ་ཉྙ་ཏ་རེ་ན ཀཱ་རེ་ཏ་བྦོ – པཱ་རཱ་ཛི་ཀེ་ན ཝཱ ས་ངྒྷཱ་དི་སེ་སེ་ན ཝཱ པཱ་ཙི་ཏྟི་ཡེ་ན ཝཱ. ཡེ་ན ཝཱ སཱ ས་དྡྷེ་ཡྻ་ཝ་ཙ་སཱ ཨུ་པཱ་སི་ཀཱ ཝ་དེ་ཡྻ ཏེ་ན སོ བྷི་ཀྑུ ཀཱ་རེ་ཏ་བྦོ.
༤༤༦. སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ ནི་སི་ནྣོ མཱ་ཏུ་གཱ་མ་སྶ མེ་ཐུ་ནཾ དྷ་མྨཾ པ་ཊི་སེ་ཝ་ནྟོ’’ཏི, སོ ཙ ཏཾ པ་ཊི་ཛཱ་ནཱ་ཏི, ཨཱ་པ་ཏྟི་ཡཱ ཀཱ་རེ་ཏ་བྦོ. སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ ནི་སི་ནྣོ མཱ་ཏུ་གཱ་མ་སྶ མེ་ཐུ་ནཾ དྷ་མྨཾ པ་ཊི་སེ་ཝ་ནྟོ’’ཏི, སོ ཙེ ཨེ་ཝཾ ཝ་དེ་ཡྻ – ‘‘ས་ཙྩཱ་ཧཾ ནི་སི་ནྣོ, ནོ ཙ ཁོ མེ་ཐུ་ནཾ དྷ་མྨཾ པ་ཊི་སེ་ཝི’’ནྟི, ནི་ས་ཛྫཱ་ཡ ཀཱ་རེ་ཏ་བྦོ. སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ ནི་སི་ནྣོ མཱ་ཏུ་གཱ་མ་སྶ མེ་ཐུ་ནཾ དྷ་མྨཾ པ་ཊི་སེ་ཝ་ནྟོ’’ཏི, སོ ཙེ ཨེ་ཝཾ ཝ་དེ་ཡྻ – ‘‘ནཱ་ཧཾ ནི་སི་ནྣོ, ཨ་པི་ཙ ཁོ ནི་པ་ནྣོ’’ཏི, ནི་པ་ཛྫཱ་ཡ ཀཱ་རེ་ཏ་བྦོ. སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ ནི་སི་ནྣོ མཱ་ཏུ་གཱ་མ་སྶ མེ་ཐུ་ནཾ དྷ་མྨཾ པ་ཊི་སེ་ཝ་ནྟོ’’ཏི, སོ ཙེ ཨེ་ཝཾ ཝ་དེ་ཡྻ – ‘‘ནཱ་ཧཾ ནི་སི་ནྣོ ཨ་པི་ཙ ཁོ ཋི་ཏོ’’ཏི, ན ཀཱ་རེ་ཏ་བྦོ.
༤༤༧. སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ ནི་པ་ནྣོ མཱ་ཏུ་གཱ་མ་སྶ མེ་ཐུ་ནཾ དྷ་མྨཾ པ་ཊི་སེ་ཝ་ནྟོ’’ཏི, སོ ཙ ཏཾ པ་ཊི་ཛཱ་ནཱ་ཏི, ཨཱ་པ་ཏྟི་ཡཱ ཀཱ་རེ་ཏ་བྦོ. སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ ནི་པ་ནྣོ མཱ་ཏུ་གཱ་མ་སྶ མེ་ཐུ་ནཾ དྷ་མྨཾ པ་ཊི་སེ་ཝ་ནྟོ’’ཏི, སོ ཙེ ཨེ་ཝཾ ཝ་དེ་ཡྻ – ‘‘ས་ཙྩཱ་ཧཾ ནི་པ་ནྣོ, ནོ ཙ ཁོ མེ་ཐུ་ནཾ དྷ་མྨཾ པ་ཊི་སེ་ཝི’’ནྟི, ནི་པ་ཛྫཱ་ཡ ཀཱ་རེ་ཏ་བྦོ. སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ ནི་པ་ནྣོ མཱ་ཏུ་གཱ་མ་སྶ མེ་ཐུ་ནཾ དྷ་མྨཾ པ་ཊི་སེ་ཝ་ནྟོ’’ཏི, སོ ཙེ ཨེ་ཝཾ ཝ་དེ་ཡྻ – ‘‘ནཱ་ཧཾ ནི་པ་ནྣོ, ཨ་པི་ཙ ཁོ ནི་སི་ནྣོ’’ཏི, ནི་ས་ཛྫཱ་ཡ ཀཱ་རེ་ཏ་བྦོ. སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ ནི་པ་ནྣོ མཱ་ཏུ་གཱ་མ་སྶ མེ་ཐུ་ནཾ དྷ་མྨཾ པ་ཊི་སེ་ཝ་ནྟོ’’ཏི, སོ ཙེ ཨེ་ཝཾ ཝ་དེ་ཡྻ – ‘‘ནཱ་ཧཾ ནི་པ་ནྣོ ཨ་པི་ཙ ཁོ ཋི་ཏོ’’ཏི, ན ཀཱ་རེ་ཏ་བྦོ.
༤༤༨. སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ ནི་སི་ནྣོ མཱ་ཏུ་གཱ་མེ་ན ས་དྡྷིཾ ཀཱ་ཡ་སཾ་ས་གྒཾ ས་མཱ་པ་ཛྫ་ནྟོ’’ཏི, སོ ཙ ཏཾ པ་ཊི་ཛཱ་ནཱ་ཏི, ཨཱ་པ་ཏྟི་ཡཱ ཀཱ་རེ་ཏ་བྦོ…པེ… ས་ཙྩཱ་ཧཾ ནི་སི་ནྣོ ནོ ཙ ཁོ ཀཱ་ཡ་སཾ་ས་གྒཾ ས་མཱ་པ་ཛྫི་ནྟི, ནི་ས་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་སི་ནྣོ ཨ་པི་ཙ ཁོ ནི་པ་ནྣོ་ཏི, ནི་པ་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་སི་ནྣོ ཨ་པི་ཙ ཁོ ཋི་ཏོ་ཏི, ན ཀཱ་རེ་ཏ་བྦོ.
སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ ནི་པ་ནྣོ མཱ་ཏུ་གཱ་མེ་ན ས་དྡྷིཾ ཀཱ་ཡ་སཾ་ས་གྒཾ ས་མཱ་པ་ཛྫ་ནྟོ’’ཏི, སོ ཙ ཏཾ པ་ཊི་ཛཱ་ནཱ་ཏི, ཨཱ་པ་ཏྟི་ཡཱ ཀཱ་རེ་ཏ་བྦོ…པེ… ས་ཙྩཱ་ཧཾ ནི་པ་ནྣོ, ནོ ཙ ཁོ ཀཱ་ཡ་སཾ་ས་གྒཾ ས་མཱ་པ་ཛྫི་ནྟི, ནི་པ་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་པ་ནྣོ, ཨ་པི་ཙ ཁོ ནི་སི་ནྣོ་ཏི, ནི་ས་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་པ་ནྣོ, ཨ་པི་ཙ ཁོ ཋི་ཏོ་ཏི, ན ཀཱ་རེ་ཏ་བྦོ.
༤༤༩. སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ མཱ་ཏུ་གཱ་མེ་ན ས་དྡྷིཾ ཨེ་ཀོ ཨེ་ཀཱ་ཡ ར་ཧོ པ་ཊི་ཙྪ་ནྣེ ཨཱ་ས་ནེ ཨ་ལཾ་ཀ་མྨ་ནི་ཡེ ནི་སི་ནྣོ’’ཏི, སོ ཙ ཏཾ པ་ཊི་ཛཱ་ནཱ་ཏི, ནི་ས་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་སི་ནྣོ ཨ་པི་ཙ ཁོ ནི་པ་ནྣོ་ཏི, ནི་པ་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་སི་ནྣོ, ཨ་པི་ཙ ཁོ ཋི་ཏོ་ཏི, ན ཀཱ་རེ་ཏ་བྦོ.
༤༥༠. སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ མཱ་ཏུ་གཱ་མེ་ན ས་དྡྷིཾ ཨེ་ཀོ ཨེ་ཀཱ་ཡ ར་ཧོ པ་ཊི་ཙྪ་ནྣེ ཨཱ་ས་ནེ ཨ་ལཾ་ཀ་མྨ་ནི་ཡེ ནི་པ་ནྣོ’’ཏི, སོ ཙ ཏཾ པ་ཊི་ཛཱ་ནཱ་ཏི, ནི་པ་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་པ་ནྣོ, ཨ་པི་ཙ ཁོ ནི་སི་ནྣོ་ཏི, ནི་ས་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་པ་ནྣོ, ཨ་པི་ཙ ཁོ ཋི་ཏོ་ཏི, ན ཀཱ་རེ་ཏ་བྦོ.
ཨ་ནི་ཡ་ཏོཏི ན ནི་ཡ་ཏོ, པཱ་རཱ་ཛི་ཀཾ ཝཱ ས་ངྒྷཱ་དི་སེ་སོ ཝཱ པཱ་ཙི་ཏྟི་ཡཾ ཝཱ.
༤༥༡. ག་མ་ནཾ པ་ཊི་ཛཱ་ནཱ་ཏི, ནི་ས་ཛྫཾ པ་ཊི་ཛཱ་ནཱ་ཏི, ཨཱ་པ་ཏྟིཾ པ་ཊི་ཛཱ་ནཱ་ཏི, ཨཱ་པ་ཏྟི་ཡཱ ཀཱ་རེ་ཏ་བྦོ. ག་མ་ནཾ པ་ཊི་ཛཱ་ནཱ་ཏི, ནི་ས་ཛྫཾ ན པ་ཊི་ཛཱ་ནཱ་ཏི, ཨཱ་པ་ཏྟིཾ པ་ཊི་ཛཱ་ནཱ་ཏི, ཨཱ་པ་ཏྟི་ཡཱ ཀཱ་རེ་ཏ་བྦོ. ག་མ་ནཾ པ་ཊི་ཛཱ་ནཱ་ཏི, ནི་ས་ཛྫཾ པ་ཊི་ཛཱ་ནཱ་ཏི, ཨཱ་པ་ཏྟིཾ ན པ་ཊི་ཛཱ་ནཱ་ཏི, ནི་ས་ཛྫཱ་ཡ ཀཱ་རེ་ཏ་བྦོ. ག་མ་ནཾ པ་ཊི་ཛཱ་ནཱ་ཏི, ནི་ས་ཛྫཾ ན པ་ཊི་ཛཱ་ནཱ་ཏི, ཨཱ་པ་ཏྟིཾ ན པ་ཊི་ཛཱ་ནཱ་ཏི, ན ཀཱ་རེ་ཏ་བྦོ.
ག་མ་ནཾ ན པ་ཊི་ཛཱ་ནཱ་ཏི, ནི་ས་ཛྫཾ པ་ཊི་ཛཱ་ནཱ་ཏི, ཨཱ་པ་ཏྟིཾ པ་ཊི་ཛཱ་ནཱ་ཏི, ཨཱ་པ་ཏྟི་ཡཱ
ཀཱ་རེ་ཏ་བྦོ. ག་མ་ནཾ ན པ་ཊི་ཛཱ་ནཱ་ཏི, ནི་ས་ཛྫཾ ན པ་ཊི་ཛཱ་ནཱ་ཏི, ཨཱ་པ་ཏྟིཾ པ་ཊི་ཛཱ་ནཱ་ཏི, ཨཱ་པ་ཏྟི་ཡཱ ཀཱ་རེ་ཏ་བྦོ. ག་མ་ནཾ ན པ་ཊི་ཛཱ་ནཱ་ཏི, ནི་ས་ཛྫཾ པ་ཊི་ཛཱ་ནཱ་ཏི, ཨཱ་པ་ཏྟིཾ ན པ་ཊི་ཛཱ་ནཱ་ཏི, ནི་ས་ཛྫཱ་ཡ ཀཱ་རེ་ཏ་བྦོ. ག་མ་ནཾ ན པ་ཊི་ཛཱ་ནཱ་ཏི, ནི་ས་ཛྫཾ ན པ་ཊི་ཛཱ་ནཱ་ཏི, ཨཱ་པ་ཏྟིཾ ན པ་ཊི་ཛཱ་ནཱ་ཏི, ན ཀཱ་རེ་ཏ་བྦོ་ཏི.
པ་ཋ་མོ ཨ་ནི་ཡ་ཏོ ནི་ཊྛི་ཏོ.
༢. དུ་ཏི་ཡ་ཨ་ནི་ཡ་ཏ་སི་ཀྑཱ་པ་དཾ
༤༥༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཨུ་དཱ་ཡཱི – ‘‘བྷ་ག་ཝ་ཏཱ པ་ཊི་ཀྑི་ཏྟཾ མཱ་ཏུ་གཱ་མེ་ན ས་དྡྷིཾ ཨེ་ཀོ ཨེ་ཀཱ་ཡ ར་ཧོ པ་ཊི་ཙྪ་ནྣེ ཨཱ་ས་ནེ ཨ་ལཾ་ཀ་མྨ་ནི་ཡེ ནི་ས་ཛྫཾ ཀ་པྤེ་ཏུ’’ནྟི ཏ་སྶཱ་ཡེ་ཝ ཀུ་མཱ་རི་ཀཱ་ཡ ས་དྡྷིཾ ཨེ་ཀོ ཨེ་ཀཱ་ཡ ར་ཧོ ནི་ས་ཛྫཾ ཀ་པྤེ་སི ཀཱ་ལ་ཡུ་ཏྟཾ ས་མུ་ལླ་པ་ནྟོ ཀཱ་ལ་ཡུ་ཏྟཾ དྷ་མྨཾ བྷ་ཎ་ནྟོ. དུ་ཏི་ཡ་མྤི ཁོ ཝི་སཱ་ཁཱ མི་གཱ་ར་མཱ་ཏཱ ནི་མ་ནྟི་ཏཱ ཏཾ ཀུ་ལཾ ཨ་ག་མཱ་སི. ཨ་དྡ་སཱ ཁོ ཝི་སཱ་ཁཱ མི་གཱ་ར་མཱ་ཏཱ ཨཱ་ཡ་སྨ་ནྟཾ ཨུ་དཱ་ཡིཾ ཏ་སྶཱ་ཡེ་ཝ ཀུ་མཱ་རི་ཀཱ་ཡ ས་དྡྷིཾ ཨེ་ཀཾ ཨེ་ཀཱ་ཡ ར་ཧོ ནི་སི་ནྣཾ. དི་སྭཱ་ན ཨཱ་ཡ་སྨ་ནྟཾ ཨུ་དཱ་ཡིཾ ཨེ་ཏ་ད་ཝོ་ཙ – ‘‘ཨི་དཾ, བྷ་ནྟེ, ན་ཙྪ་ནྣཾ ན་པྤ་ཏི་རཱུ་པཾ ཡཾ ཨ་ཡྻོ མཱ་ཏུ་གཱ་མེ་ན ས་དྡྷིཾ ཨེ་ཀོ ཨེ་ཀཱ་ཡ ར་ཧོ ནི་ས་ཛྫཾ ཀ་པྤེ་ཏི. ཀི་ཉྩཱ་པི, བྷ་ནྟེ, ཨ་ཡྻོ ཨ་ན་ཏྠི་ཀོ ཏེ་ན དྷ་མྨེ་ན, ཨ་པི་ཙ དུ་སྶ་དྡྷཱ་པ་ཡཱ ཨ་པྤ་ས་ནྣཱ མ་ནུ་སྶཱ’’ཏི. ཨེ་ཝ་མྤི ཁོ ཨཱ་ཡ་སྨཱ ཨུ་དཱ་ཡཱི ཝི་སཱ་ཁཱ་ཡ མི་གཱ་ར་མཱ་ཏུ་ཡཱ ཝུ་ཙྩ་མཱ་ནོ ནཱ་དི་ཡི. ཨ་ཐ ཁོ ཝི་སཱ་ཁཱ མི་གཱ་ར་མཱ་ཏཱ ནི་ཀྑ་མི་ཏྭཱ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཨུ་དཱ་ཡཱི མཱ་ཏུ་གཱ་མེ་ན ས་དྡྷིཾ ཨེ་ཀོ ཨེ་ཀཱ་ཡ ར་ཧོ ནི་ས་ཛྫཾ ཀ་པྤེ་སྶ་ཏཱི’’ཏི! ཨ་ཐ ཁོ ཏེ བྷི་ཀྑཱུ ཨཱ་ཡ་སྨ་ནྟཾ ཨུ་དཱ་ཡིཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ …པེ… ‘‘ས་ཙྩཾ ཀི་ར ཏྭཾ, ཨུ་དཱ་ཡི, མཱ་ཏུ་གཱ་མེ་ན ས་དྡྷིཾ ཨེ་ཀོ ཨེ་ཀཱ་ཡ ར་ཧོ ནི་ས་ཛྫཾ ཀ་པྤེ་སཱི’’ཏི? ‘‘ས་ཙྩཾ བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, མཱ་ཏུ་གཱ་མེ་ན ས་དྡྷིཾ ཨེ་ཀོ ཨེ་ཀཱ་ཡ ར་ཧོ ནི་ས་ཛྫཾ ཀ་པྤེ་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༤༥༣. ‘‘ན ཧེ་ཝ ཁོ པ་ན པ་ཊི་ཙྪ་ནྣཾ ཨཱ་ས་ནཾ ཧོ་ཏི ནཱ་ལཾ ཀ་མྨ་ནི་ཡཾ, ཨ་ལ་ཉྩ ཁོ ཧོ་ཏི མཱ་ཏུ་གཱ་མཾ དུ་ཊྛུ་ལླཱ་ཧི ཝཱ་ཙཱ་ཧི ཨོ་བྷཱ་སི་ཏུཾ. ཡོ པ་ན བྷི་ཀྑུ ཏ་ཐཱ་རཱུ་པེ ཨཱ་ས་ནེ མཱ་ཏུ་གཱ་མེ་ན ས་དྡྷིཾ ཨེ་ཀོ ཨེ་ཀཱ་ཡ ར་ཧོ ནི་ས་ཛྫཾ ཀ་པྤེ་ཡྻ, ཏ་མེ་ནཾ ས་དྡྷེ་ཡྻ་ཝ་ཙ་སཱ ཨུ་པཱ་སི་ཀཱ དི་སྭཱ དྭི་ནྣཾ དྷ་མྨཱ་ནཾ ཨ་ཉྙ་ཏ་རེ་ན ཝ་དེ་ཡྻ – ས་ངྒྷཱ་དི་སེ་སེ་ན ཝཱ པཱ་ཙི་ཏྟི་ཡེ་ན ཝཱ. ནི་ས་ཛྫཾ བྷི་ཀྑུ པ་ཊི་ཛཱ་ན་མཱ་ནོ དྭི་ནྣཾ དྷ་མྨཱ་ནཾ ཨ་ཉྙ་ཏ་རེ་ན ཀཱ་རེ་ཏ་བྦོ – ས་ངྒྷཱ་དི་སེ་སེ་ན ཝཱ པཱ་ཙི་ཏྟི་ཡེ་ན ཝཱ. ཡེ་ན ཝཱ སཱ ས་དྡྷེ་ཡྻ་ཝ་ཙ་སཱ ཨུ་པཱ་སི་ཀཱ ཝ་དེ་ཡྻ ཏེ་ན སོ བྷི་ཀྑུ ཀཱ་རེ་ཏ་བྦོ. ཨ་ཡ་མྤི དྷ་མྨོ ཨ་ནི་ཡ་ཏོ’’ཏི.
༤༥༤. ན ཧེ་ཝ ཁོ པ་ན པ་ཊི་ཙྪ་ནྣཾ ཨཱ་ས་ནཾ ཧོ་ཏཱིཏི ཨ་པྤ་ཊི་ཙྪ་ནྣཾ ཧོ་ཏི ཀུ་ཊྚེ་ན ཝཱ ཀ་ཝཱ་ཊེ་ན ཝཱ ཀི་ལ་ཉྫེ་ན ཝཱ སཱ་ཎི་པཱ་ཀཱ་རེ་ན ཝཱ རུ་ཀྑེ་ན ཝཱ ཐ་མྦྷེ་ན ཝཱ ཀོ་ཏྠ་ལི༹་ཡཱ ཝཱ ཡེ་ན ཀེ་ན་ཙི ཨ་པྤ་ཊི་ཙྪ་ནྣཾ ཧོ་ཏི.
ནཱ་ལཾ ཀ་མྨ་ནི་ཡནྟི ན ས་ཀྐཱ ཧོ་ཏི མེ་ཐུ་ནཾ དྷ་མྨཾ པ་ཊི་སེ་ཝི་ཏུཾ.
ཨ་ལ་ཉྩ ཁོ ཧོ་ཏི མཱ་ཏུ་གཱ་མཾ དུ་ཊྛུ་ལླཱ་ཧི ཝཱ་ཙཱ་ཧི ཨོ་བྷཱ་སི་ཏུནྟི ས་ཀྐཱ ཧོ་ཏི མཱ་ཏུ་གཱ་མཾ དུ་ཊྛུ་ལླཱ་ཧི ཝཱ་ཙཱ་ཧི ཨོ་བྷཱ་སི་ཏུཾ.
ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ཏ་ཐཱ་རཱུ་པེ ཨཱ་ས་ནེཏི ཨེ་ཝ་རཱུ་པེ ཨཱ་ས་ནེ.
མཱ་ཏུ་གཱ་མོ ནཱ་མ མ་ནུ་སྶི་ཏྠཱི, ན ཡ་ཀྑཱི ན པེ་ཏཱི ན ཏི་ར་ཙྪཱ་ན་ག་ཏཱ, ཝི་ཉྙཱུ པ་ཊི་བ་ལཱ སུ་བྷཱ་སི་ཏ་དུ་བྦྷཱ་སི་ཏཾ དུ་ཊྛུ་ལླཱ་དུ་ཊྛུ་ལླཾ ཨཱ་ཛཱ་ནི་ཏུཾ.
ས་དྡྷིནྟི ཨེ་ཀ་ཏོ.
ཨེ་ཀོ ཨེ་ཀཱ་ཡཱཏི བྷི་ཀྑུ ཙེ་ཝ ཧོ་ཏི མཱ་ཏུ་གཱ་མོ ཙ.
ར་ཧོ ནཱ་མ ཙ་ཀྑུ་སྶ ར་ཧོ, སོ་ཏ་སྶ ར་ཧོ. ཙ་ཀྑུ་སྶ ར་ཧོ ནཱ་མ ན ས་ཀྐཱ ཧོ་ཏི ཨ་ཀྑིཾ ཝཱ ནི་ཁ་ཎཱི་ཡ་མཱ་ནེ བྷ་མུ་ཀཾ ཝཱ ཨུ་ཀྑི་པཱི་ཡ་མཱ་ནེ སཱི་སཾ ཝཱ ཨུ་ཀྑི་པཱི་ཡ་མཱ་ནེ པ་སྶི་ཏུཾ. སོ་ཏ་སྶ ར་ཧོ ནཱ་མ ན ས་ཀྐཱ ཧོ་ཏི པ་ཀ་ཏི་ཀ་ཐཱ སོ་ཏུཾ.
ནི་ས་ཛྫཾ ཀ་པྤེ་ཡྻཱཏི མཱ་ཏུ་གཱ་མེ ནི་སི་ནྣེ བྷི་ཀྑུ ཨུ་པ་ནི་སི་ནྣོ ཝཱ ཧོ་ཏི ཨུ་པ་ནི་པ་ནྣོ ཝཱ. བྷི་ཀྑུ ནི་སི་ནྣེ མཱ་ཏུ་གཱ་མོ ཨུ་པ་ནི་སི་ནྣོ ཝཱ ཧོ་ཏི ཨུ་པ་ནི་པ་ནྣོ ཝཱ. ཨུ་བྷོ ཝཱ ནི་སི་ནྣཱ ཧོ་ནྟི ཨུ་བྷོ ཝཱ ནི་པ་ནྣཱ.
ས་དྡྷེ་ཡྻ་ཝ་ཙ་སཱ ནཱ་མ ཨཱ་ག་ཏ་ཕ་ལཱ ཨ་བྷི་ས་མེ་ཏཱ་ཝི་ནཱི ཝི་ཉྙཱ་ཏ་སཱ་ས་ནཱ.
ཨུ་པཱ་སི་ཀཱ ནཱ་མ བུ་དྡྷཾ ས་ར་ཎཾ ག་ཏཱ, དྷ་མྨཾ ས་ར་ཎཾ ག་ཏཱ, ས་ངྒྷཾ ས་ར་ཎཾ ག་ཏཱ.
དི་སྭཱཏི པ་སྶི་ཏྭཱ.
དྭི་ནྣཾ དྷ་མྨཱ་ནཾ ཨ་ཉྙ་ཏ་རེ་ན ཝ་དེ་ཡྻ ས་ངྒྷཱ་དི་སེ་སེ་ན ཝཱ པཱ་ཙི་ཏྟི་ཡེ་ན ཝཱ. ནི་ས་ཛྫཾ བྷི་ཀྑུ པ་ཊི་ཛཱ་ན་མཱ་ནོ དྭི་ནྣཾ དྷ་མྨཱ་ནཾ ཨ་ཉྙ་ཏ་རེ་ན ཀཱ་རེ་ཏ་བྦོ – ས་ངྒྷཱ་དི་སེ་སེ་ན ཝཱ པཱ་ཙི་ཏྟི་ཡེ་ན ཝཱ. ཡེ་ན ཝཱ སཱ ས་དྡྷེ་ཡྻ་ཝ་ཙ་སཱ ཨུ་པཱ་སི་ཀཱ ཝ་དེ་ཡྻ, ཏེ་ན སོ བྷི་ཀྑུ ཀཱ་རེ་ཏ་བྦོ.
༤༥༥. སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ ནི་སི་ནྣོ མཱ་ཏུ་གཱ་མེ་ན ས་དྡྷིཾ ཀཱ་ཡ་སཾ་ས་གྒཾ ས་མཱ་པ་ཛྫ་ནྟོ’’ཏི, སོ ཙ ཏཾ པ་ཊི་ཛཱ་ནཱ་ཏི, ཨཱ་པ་ཏྟི་ཡཱ ཀཱ་རེ་ཏ་བྦོ. སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ ནི་སི་ནྣོ མཱ་ཏུ་གཱ་མེ་ན ས་དྡྷིཾ ཀཱ་ཡ་སཾ་ས་གྒཾ ས་མཱ་པ་ཛྫ་ནྟོ’’ཏི, སོ ཙེ ཨེ་ཝཾ ཝ་དེ་ཡྻ – ‘‘ས་ཙྩཱ་ཧཾ ནི་སི་ནྣོ, ནོ ཙ ཁོ ཀཱ་ཡ་སཾ་ས་གྒཾ ས་མཱ་པ་ཛྫི’’ནྟི, ནི་ས་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་སི་ནྣོ, ཨ་པི་ཙ ཁོ ནི་པ་ནྣོ་ཏི, ནི་པ་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་སི་ནྣོ, ཨ་པི་ཙ ཁོ ཋི་ཏོ་ཏི, ན ཀཱ་རེ་ཏ་བྦོ.
སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ ནི་པ་ནྣོ མཱ་ཏུ་གཱ་མེ་ན ས་དྡྷིཾ ཀཱ་ཡ་སཾ་ས་གྒཾ ས་མཱ་པ་ཛྫ་ནྟོ’’ཏི, སོ ཙ ཏཾ པ་ཊི་ཛཱ་ནཱ་ཏི, ཨཱ་པ་ཏྟི་ཡཱ ཀཱ་རེ་ཏ་བྦོ…པེ… ས་ཙྩཱ་ཧཾ ནི་པ་ནྣོ, ནོ ཙ ཁོ ཀཱ་ཡ་སཾ་ས་གྒཾ ས་མཱ་པ་ཛྫི་ནྟི, ནི་པ་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་པ་ནྣོ, ཨ་པི་ཙ ཁོ ནི་སི་ནྣོ་ཏི, ནི་ས་ཛྫཱ་ཡ ཀཱ་རེ་ཏ་བྦོ …པེ… ནཱ་ཧཾ ནི་པ་ནྣོ, ཨ་པི་ཙ ཁོ ཋི་ཏོ་ཏི, ན ཀཱ་རེ་ཏ་བྦོ.
སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻ་སྶ མ་ཡཱ སུ་ཏཾ ནི་སི་ནྣ་སྶ མཱ་ཏུ་གཱ་མཾ དུ་ཊྛུ་ལླཱ་ཧི ཝཱ་ཙཱ་ཧི ཨོ་བྷཱ་ས་ནྟ་སྶཱ’’ཏི, སོ ཙ ཏཾ པ་ཊི་ཛཱ་ནཱ་ཏི, ཨཱ་པ་ཏྟི་ཡཱ ཀཱ་རེ་ཏ་བྦོ. སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻ་སྶ མ་ཡཱ སུ་ཏཾ ནི་སི་ནྣ་སྶ མཱ་ཏུ་གཱ་མཾ དུ་ཊྛུ་ལླཱ་ཧི ཝཱ་ཙཱ་ཧི ཨོ་བྷཱ་ས་ནྟ་སྶཱ’’ཏི, སོ ཙེ ཨེ་ཝཾ ཝ་དེ་ཡྻ – ‘‘ས་ཙྩཱ་ཧཾ ནི་སི་ནྣོ, ནོ ཙ ཁོ དུ་ཊྛུ་ལླཱ་ཧི ཝཱ་ཙཱ་ཧི ཨོ་བྷཱ་སི’’ནྟི, ནི་ས་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་སི་ནྣོ, ཨ་པི་ཙ ཁོ ནི་པ་ནྣོ་ཏི, ནི་པ་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་སི་ནྣོ, ཨ་པི་ཙ ཁོ ཋི་ཏོ་ཏི, ན ཀཱ་རེ་ཏ་བྦོ.
སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻ་སྶ མ་ཡཱ སུ་ཏཾ ནི་པ་ནྣ་སྶ མཱ་ཏུ་གཱ་མཾ དུ་ཊྛུ་ལླཱ་ཧི ཝཱ་ཙཱ་ཧི ཨོ་བྷཱ་ས་ནྟ་སྶཱ’’ཏི, སོ ཙ ཏཾ པ་ཊི་ཛཱ་ནཱ་ཏི, ཨཱ་པ་ཏྟི་ཡཱ ཀཱ་རེ་ཏ་བྦོ…པེ… ས་ཙྩཱ་ཧཾ ནི་པ་ནྣོ ནོ ཙ ཁོ དུ་ཊྛུ་ལླཱ་ཧི ཝཱ་ཙཱ་ཧི ཨོ་བྷཱ་སི་ནྟི, ནི་པ་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་པ་ནྣོ, ཨ་པི་ཙ ཁོ ནི་སི་ནྣོ་ཏི, ནི་ས་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་པ་ནྣོ, ཨ་པི་ཙ ཁོ ཋི་ཏོ་ཏི, ན ཀཱ་རེ་ཏ་བྦོ.
༤༥༦. སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ མཱ་ཏུ་གཱ་མེ་ན ས་དྡྷིཾ ཨེ་ཀོ ཨེ་ཀཱ་ཡ ར་ཧོ ནི་སི་ནྣོ’’ཏི, སོ ཙ ཏཾ པ་ཊི་ཛཱ་ནཱ་ཏི, ནི་ས་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་སི་ནྣོ, ཨ་པི་ཙ ཁོ ནི་པ་ནྣོ་ཏི, ནི་པ་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་སི་ནྣོ, ཨ་པི་ཙ ཁོ ཋི་ཏོ་ཏི, ན ཀཱ་རེ་ཏ་བྦོ.
སཱ ཙེ ཨེ་ཝཾ ཝ་དེ་ཡྻ – ‘‘ཨ་ཡྻོ མ་ཡཱ དི་ཊྛོ མཱ་ཏུ་གཱ་མེ་ན ས་དྡྷིཾ ཨེ་ཀོ ཨེ་ཀཱ་ཡ ར་ཧོ ནི་པ་ནྣོ’’ཏི, སོ ཙ ཏཾ པ་ཊི་ཛཱ་ནཱ་ཏི, ནི་པ་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་པ་ནྣོ, ཨ་པི་ཙ ཁོ ནི་སི་ནྣོ་ཏི, ནི་ས་ཛྫཱ་ཡ ཀཱ་རེ་ཏ་བྦོ…པེ… ནཱ་ཧཾ ནི་པ་ནྣོ, ཨ་པི་ཙ ཁོ ཋི་ཏོ་ཏི, ན ཀཱ་རེ་ཏ་བྦོ.
ཨ་ཡ་མྤཱིཏི པུ་རི་མཾ ཨུ་པཱ་དཱ་ཡ ཝུ་ཙྩ་ཏི.
ཨ་ནི་ཡ་ཏོཏི ན ནི་ཡ་ཏོ, ས་ངྒྷཱ་དི་སེ་སོ ཝཱ པཱ་ཙི་ཏྟི་ཡཾ ཝཱ.
༤༥༧. ག་མ་ནཾ པ་ཊི་ཛཱ་ནཱ་ཏི ནི་ས་ཛྫཾ པ་ཊི་ཛཱ་ནཱ་ཏི ཨཱ་པ་ཏྟིཾ པ་ཊི་ཛཱ་ནཱ་ཏི, ཨཱ་པ་ཏྟི་ཡཱ ཀཱ་རེ་ཏ་བྦོ. ག་མ་ནཾ པ་ཊི་ཛཱ་ནཱ་ཏི ནི་ས་ཛྫཾ ན པ་ཊི་ཛཱ་ནཱ་ཏི ཨཱ་པ་ཏྟིཾ པ་ཊི་ཛཱ་ནཱ་ཏི, ཨཱ་པ་ཏྟི་ཡཱ ཀཱ་རེ་ཏ་བྦོ. ག་མ་ནཾ པ་ཊི་ཛཱ་ནཱ་ཏི ནི་ས་ཛྫཾ པ་ཊི་ཛཱ་ནཱ་ཏི ཨཱ་པ་ཏྟིཾ ན པ་ཊི་ཛཱ་ནཱ་ཏི, ནི་ས་ཛྫཱ་ཡ ཀཱ་རེ་ཏ་བྦོ. ག་མ་ནཾ པ་ཊི་ཛཱ་ནཱ་ཏི ནི་ས་ཛྫཾ ན པ་ཊི་ཛཱ་ནཱ་ཏི ཨཱ་པ་ཏྟིཾ ན པ་ཊི་ཛཱ་ནཱ་ཏི, ན ཀཱ་རེ་ཏ་བྦོ.
ག་མ་ནཾ ན པ་ཊི་ཛཱ་ནཱ་ཏི ནི་ས་ཛྫཾ པ་ཊི་ཛཱ་ནཱ་ཏི ཨཱ་པ་ཏྟིཾ པ་ཊི་ཛཱ་ནཱ་ཏི, ཨཱ་པ་ཏྟི་ཡཱ ཀཱ་རེ་ཏ་བྦོ. ག་མ་ནཾ ན པ་ཊི་ཛཱ་ནཱ་ཏི ནི་ས་ཛྫཾ ན པ་ཊི་ཛཱ་ནཱ་ཏི ཨཱ་པ་ཏྟིཾ པ་ཊི་ཛཱ་ནཱ་ཏི, ཨཱ་པ་ཏྟི་ཡཱ ཀཱ་རེ་ཏ་བྦོ. ག་མ་ནཾ ན པ་ཊི་ཛཱ་ནཱ་ཏི ནི་ས་ཛྫཾ པ་ཊི་ཛཱ་ནཱ་ཏི ཨཱ་པ་ཏྟིཾ ན པ་ཊི་ཛཱ་ནཱ་ཏི, ནི་ས་ཛྫཱ་ཡ ཀཱ་རེ་ཏ་བྦོ. ག་མ་ནཾ ན པ་ཊི་ཛཱ་ནཱ་ཏི ནི་ས་ཛྫཾ ན པ་ཊི་ཛཱ་ནཱ་ཏི ཨཱ་པ་ཏྟིཾ ན པ་ཊི་ཛཱ་ནཱ་ཏི, ན ཀཱ་རེ་ཏ་བྦོ་ཏི.
དུ་ཏི་ཡོ ཨ་ནི་ཡ་ཏོ ནི་ཊྛི་ཏོ.
༤༥༨. ཨུ་དྡི་ཊྛཱ ཁོ ཨཱ་ཡ་སྨ་ནྟོ དྭེ ཨ་ནི་ཡ་ཏཱ དྷ་མྨཱ. ཏ་ཏྠཱ་ཡ་སྨ་ནྟེ པུ་ཙྪཱ་མི – ‘‘ཀ་ཙྩི་ཏྠ པ་རི་སུ་དྡྷཱ’’? དུ་ཏི་ཡ་མྤི པུ་ཙྪཱ་མི – ‘‘ཀ་ཙྩི་ཏྠ པ་རི་སུ་དྡྷཱ’’? ཏ་ཏི་ཡ་མྤི པུ་ཙྪཱ་མི – ‘‘ཀ་ཙྩི་ཏྠ པ་རི་སུ་དྡྷཱ’’? པ་རི་སུ་དྡྷེ་ཏྠཱ་ཡ་སྨ་ནྟོ; ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི་ཏི.
ཏ་སྶུ་དྡཱ་ནཾ –
ཨ་ལཾ ཀ་མྨ་ནི་ཡ་ཉྩེ་ཝ, ཏ་ཐེ་ཝ ཙ ན་ཧེ་ཝ ཁོ;
ཨ་ནི་ཡ་ཏཱ སུ་པ་ཉྙ་ཏྟཱ, བུ་དྡྷ་སེ་ཊྛེ་ན ཏཱ་དི་ནཱ་ཏི.
ཨ་ནི་ཡ་ཏ་ཀ་ཎྜཾ ནི་ཊྛི་ཏཾ.