༡༢. དུ་བྦ་ཙ་སི་ཀྑཱ་པ་དཾ
༤༢༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ ཀོ་ས་མྦི་ཡཾ ཝི་ཧ་ར་ཏི གྷོ་སི་ཏཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཚ་ནྣོ ཨ་ནཱ་ཙ་རཾ ཨཱ་ཙ་ར་ཏི. བྷི་ཀྑཱུ ཨེ་ཝ་མཱ་ཧཾ་སུ – ‘‘མཱ་ཝུ་སོ, ཚ་ནྣ, ཨེ་ཝ་རཱུ་པཾ ཨ་ཀཱ་སི. ནེ་ཏཾ ཀ་པྤ་ཏཱི’’ཏི. སོ ཨེ་ཝཾ ཝ་དེ་ཏི – ‘‘ཀིཾ ནུ ཁོ ནཱ་མ ཏུ་མྷེ, ཨཱ་ཝུ་སོ, མཾ ཝ་ཏྟ་བྦཾ མ་ཉྙ་ཐ? ཨ་ཧཾ ཁོ ནཱ་མ ཏུ་མྷེ ཝ་དེ་ཡྻཾ. ཨ་མྷཱ་ཀཾ བུ་དྡྷོ ཨ་མྷཱ་ཀཾ དྷ་མྨོ ཨ་མྷཱ་ཀཾ ཨ་ཡྻ་པུ་ཏྟེ་ན དྷ་མྨོ ཨ་བྷི་ས་མི་ཏོ. སེ་ཡྻ་ཐཱ་པི ནཱ་མ མ་ཧཱ་ཝཱ་ཏོ ཝཱ་ཡ་ནྟོ ཏི་ཎ་ཀ་ཊྛ་པ་ཎྞ་ས་ཊཾ [ཏི་ཎ་ཀ་ཊྛ་པ་ཎྞ་ཀ་ས་ཊཾ (ཀ.)] ཨེ་ཀ་ཏོ ཨུ་སྶཱ་རེ་ཡྻ, སེ་ཡྻ་ཐཱ ཝཱ པ་ན ན་དཱི པ་བྦ་ཏེ་ཡྻཱ ས་ངྑ་སེ་ཝཱ་ལ་པ་ཎ་ཀཾ ཨེ་ཀ་ཏོ ཨུ་སྶཱ་རེ་ཡྻ, ཨེ་ཝ་མེ་ཝ ཏུ་མྷེ ནཱ་ནཱ་ནཱ་མཱ ནཱ་ནཱ་གོ་ཏྟཱ ནཱ་ནཱ་ཛ་ཙྩཱ ནཱ་ནཱ་ཀུ་ལཱ པ་བྦ་ཛི་ཏཱ ཨེ་ཀ་ཏོ ཨུ་སྶ་རི་ཏཱ. ཀིཾ ནུ ཁོ ནཱ་མ ཏུ་མྷེ, ཨཱ་ཝུ་སོ, མཾ ཝ་ཏྟ་བྦཾ མ་ཉྙ་ཐ? ཨ་ཧཾ ཁོ ནཱ་མ ཏུ་མྷེ ཝ་དེ་ཡྻཾ! ཨ་མྷཱ་ཀཾ བུ་དྡྷོ ཨ་མྷཱ་ཀཾ དྷ་མྨོ ཨ་མྷཱ་ཀཾ ཨ་ཡྻ་པུ་ཏྟེ་ན དྷ་མྨོ ཨ་བྷི་ས་མི་ཏོ’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཚ་ནྣོ བྷི་ཀྑཱུ་ཧི ས་ཧ་དྷ་མྨི་ཀཾ ཝུ་ཙྩ་མཱ་ནོ ཨ་ཏྟཱ་ནཾ ཨ་ཝ་ཙ་ནཱི་ཡཾ ཀ་རི་སྶ་ཏཱི’’ཏི! ཨ་ཐ ཁོ ཏེ བྷི་ཀྑཱུ ཨཱ་ཡ་སྨ་ནྟཾ ཚ་ནྣཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏྭཾ, ཚ་ནྣ, བྷི་ཀྑཱུ་ཧི ས་ཧ་དྷ་མྨི་ཀཾ ཝུ་ཙྩ་མཱ་ནོ ཨ་ཏྟཱ་ནཾ ཨ་ཝ་ཙ་ནཱི་ཡཾ ཀ་རོ་སཱི’’ཏི? ‘‘ས་ཙྩཾ བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ‘‘ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, བྷི་ཀྑཱུ་ཧི ས་ཧ་དྷ་མྨི་ཀཾ ཝུ་ཙྩ་མཱ་ནོ ཨ་ཏྟཱ་ནཾ ཨ་ཝ་ཙ་ནཱི་ཡཾ ཀ་རི་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༤༢༥. ‘‘བྷི་ཀྑུ པ་ནེ་ཝ དུ་བྦ་ཙ་ཛཱ་ཏི་ཀོ ཧོ་ཏི ཨུ་དྡེ་ས་པ་རི་ཡཱ་པ་ནྣེ་སུ སི་ཀྑཱ་པ་དེ་སུ བྷི་ཀྑཱུ་ཧི ས་ཧ་དྷ་མྨི་ཀཾ ཝུ་ཙྩ་མཱ་ནོ ཨ་ཏྟཱ་ནཾ ཨ་ཝ་ཙ་ནཱི་ཡཾ ཀ་རོ་ཏི – ‘མཱ མཾ ཨཱ་ཡ་སྨ་ནྟོ ཀི་ཉྩི ཨ་ཝ་ཙུ་ཏྠ ཀ་ལྱཱ་ཎཾ ཝཱ པཱ་པ་ཀཾ ཝཱ, ཨ་ཧཾ་པཱ་ཡ་སྨ་ནྟེ ན ཀི་ཉྩི ཝ་ཀྑཱ་མི ཀ་ལྱཱ་ཎཾ ཝཱ པཱ་པ་ཀཾ ཝཱ, ཝི་ར་མ་ཐཱ་ཡ་སྨ་ནྟོ མ་མ ཝ་ཙ་ནཱ་ཡཱ’ཏི, སོ བྷི་ཀྑུ བྷི་ཀྑཱུ་ཧི ཨེ་ཝ་མ་སྶ ཝ་ཙ་ནཱི་ཡོ – ‘མཱ་ཡ་སྨཱ ཨ་ཏྟཱ་ནཾ ཨ་ཝ་ཙ་ནཱི་ཡཾ ཨ་ཀཱ་སི, ཝ་ཙ་ནཱི་ཡ་མེ་ཝཱ་ཡ་སྨཱ ཨ་ཏྟཱ་ནཾ ཀ་རོ་ཏུ, ཨཱ་ཡ་སྨཱ་པི བྷི་ཀྑཱུ ཝ་དེ་ཏུ ས་ཧ་དྷ་མྨེ་ན, བྷི་ཀྑཱུ་པི ཨཱ་ཡ་སྨ་ནྟཾ ཝ་ཀྑ་ནྟི ས་ཧ་དྷ་མྨེ་ན. ཨེ་ཝཾ སཾ་ཝ་དྡྷཱ ཧི ཏ་སྶ བྷ་ག་ཝ་ཏོ པ་རི་སཱ ཡ་དི་དཾ ཨ་ཉྙ་མ་ཉྙ་ཝ་ཙ་ནེ་ན ཨ་ཉྙ་མ་ཉྙ་ཝུ་ཊྛཱ་པ་ནེ་ནཱ་ཏི. ཨེ་ཝ་ཉྩ སོ བྷི་ཀྑུཾ བྷི་ཀྑཱུ་ཧི ཝུ་ཙྩ་མཱ་ནོ ཏ་ཐེ་ཝ པ་གྒ་ཎྷེ་ཡྻ, སོ བྷི་ཀྑུ བྷི་ཀྑཱུ་ཧི ཡཱ་ཝ་ཏ་ཏི་ཡཾ ས་མ་ནུ་བྷཱ་སི་ཏ་བྦོ ཏ་སྶ པ་ཊི་ནི་སྶ་གྒཱ་ཡ. ཡཱ་ཝ་ཏ་ཏི་ཡ་ཉྩེ ས་མ་ནུ་བྷཱ་སཱི་ཡ་མཱ་ནོ ཏཾ པ་ཊི་ནི་སྶ་ཛྫེ་ཡྻ, ཨི་ཙྩེ་ཏཾ ཀུ་ས་ལཾ; ནོ ཙེ པ་ཊི་ནི་སྶ་ཛྫེ་ཡྻ, ས་ངྒྷཱ་དི་སེ་སོ’’ཏི.
༤༢༦. བྷི་ཀྑཱུ པ་ནེ་ཝ དུ་བྦ་ཙ་ཛཱ་ཏི་ཀོ ཧོ་ཏཱིཏི དུ་བྦ་ཙོ ཧོ་ཏི དོ་ཝ་ཙ་སྶ་ཀ་ར་ཎེ་ཧི དྷ་མྨེ་ཧི ས་མ་ནྣཱ་ག་ཏོ ཨ་ཀྑ་མོ ཨ་པྤ་ད་ཀྑི་ཎ་གྒཱ་ཧཱི ཨ་ནུ་སཱ་ས་ནིཾ.
ཨུ་དྡེ་ས་པ་རི་ཡཱ་པ་ནྣེ་སུ སི་ཀྑཱ་པ་དེ་སཱུཏི པཱ་ཏི་མོ་ཀྑ་པ་རི་ཡཱ་པ་ནྣེ་སུ སི་ཀྑཱ་པ་དེ་སུ.
བྷི་ཀྑཱུ་ཧཱིཏི ཨ་ཉྙེ་ཧི བྷི་ཀྑཱུ་ཧི.
ས་ཧ་དྷ་མྨི་ཀཾ ནཱ་མ ཡཾ བྷ་ག་ཝ་ཏཱ པ་ཉྙ་ཏྟཾ སི་ཀྑཱ་པ་དཾ, ཨེ་ཏཾ ས་ཧ་དྷ་མྨི་ཀཾ ནཱ་མ.
ཏེ་ན ཝུ་ཙྩ་མཱ་ནོ ཨ་ཏྟཱ་ནཾ ཨ་ཝ་ཙ་ནཱི་ཡཾ ཀ་རོ་ཏི – ‘‘མཱ མཾ ཨཱ་ཡ་སྨ་ནྟོ ཀི་ཉྩི ཨ་ཝ་ཙུ་ཏྠ ཀ་ལྱཱ་ཎཾ ཝཱ པཱ་པ་ཀཾ ཝཱ, ཨ་ཧཾ་པཱ་ཡ་སྨ་ནྟེ ན ཀི་ཉྩི ཝ་ཀྑཱ་མི ཀ་ལྱཱ་ཎཾ ཝཱ པཱ་པ་ཀཾ ཝཱ. ཝི་ར་མ་ཐཱ་ཡ་སྨ་ནྟོ མ་མ ཝ་ཙ་ནཱ་ཡཱ’’ཏི.
སོ བྷི་ཀྑཱུཏི ཡོ སོ དུ་བྦ་ཙ་ཛཱ་ཏི་ཀོ བྷི་ཀྑུ.
བྷི་ཀྑཱུ་ཧཱིཏི ཨ་ཉྙེ་ཧི བྷི་ཀྑཱུ་ཧི. ཡེ པ་སྶ་ནྟི ཡེ སུ་ཎ་ནྟི ཏེ་ཧི ཝ་ཏྟ་བྦོ – ‘‘མཱ་ཡ་སྨཱ ཨ་ཏྟཱ་ནཾ ཨ་ཝ་ཙ་ནཱི་ཡཾ ཨ་ཀཱ་སི. ཝ་ཙ་ནཱི་ཡ་མེ་ཝ ཨཱ་ཡ་སྨཱ ཨ་ཏྟཱ་ནཾ ཀ་རོ་ཏུ. ཨཱ་ཡ་སྨཱ་པི བྷི་ཀྑཱུ ཝ་དེ་ཏུ ས་ཧ་དྷ་མྨེ་ན, བྷི་ཀྑཱུ་པི ཨཱ་ཡ་སྨ་ནྟཾ ཝ་ཀྑ་ནྟི ས་ཧ་དྷ་མྨེ་ན. ཨེ་ཝཾ སཾ་ཝ་དྡྷཱ ཧི ཏ་སྶ བྷ་ག་ཝ་ཏོ པ་རི་སཱ ཡ་དི་དཾ ཨ་ཉྙ་མ་ཉྙ་ཝ་ཙ་ནེ་ན ཨ་ཉྙ་མ་ཉྙ་ཝུ་ཊྛཱ་པ་ནེ་ནཱ’’ཏི. དུ་ཏི་ཡ་མྤི ཝ་ཏྟ་བྦོ. ཏ་ཏི་ཡ་མྤི ཝ་ཏྟ་བྦོ. ས་ཙེ པ་ཊི་ནི་སྶ་ཛྫ་ཏི, ཨི་ཙྩེ་ཏཾ ཀུ་ས་ལཾ; ནོ ཙེ པ་ཊི་ནི་སྶ་ཛྫ་ཏི, ཨཱ་པ་ཏྟི དུ་ཀྐ་ཊ་སྶ. སུ་ཏྭཱ ན ཝ་ད་ནྟི, ཨཱ་པ་ཏྟི དུ་ཀྐ་ཊ་སྶ. སོ བྷི་ཀྑུ ས་ངྒྷ་མ་ཛ྄ཛྷ་མྤི ཨཱ་ཀ་ཌྜྷི་ཏྭཱ ཝ་ཏྟ་བྦོ – ‘‘མཱ་ཡ་སྨཱ ཨ་ཏྟཱ་ནཾ ཨ་ཝ་ཙ་ནཱི་ཡཾ ཨ་ཀཱ་སི…པེ… ཨ་ཉྙ་མ་ཉྙ་ཝུ་ཊྛཱ་པ་ནེ་ནཱ’’ཏི. དུ་ཏི་ཡ་མྤི ཝ་ཏྟ་བྦོ. ཏ་ཏི་ཡ་མྤི ཝ་ཏྟ་བྦོ. ས་ཙེ པ་ཊི་ནི་སྶ་ཛྫ་ཏི, ཨི་ཙྩེ་ཏཾ ཀུ་ས་ལཾ; ནོ ཙེ པ་ཊི་ནི་སྶ་ཛྫ་ཏི, ཨཱ་པ་ཏྟི དུ་ཀྐ་ཊ་སྶ. སོ བྷི་ཀྑུ ས་མ་ནུ་བྷཱ་སི་ཏ་བྦོ. ཨེ་ཝ་ཉྩ པ་ན, བྷི་ཀྑ་ཝེ, ས་མ་ནུ་བྷཱ་སི་ཏ་བྦོ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –
༤༢༧. ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ཨི་ཏྠ་ནྣཱ་མོ བྷི་ཀྑུ བྷི་ཀྑཱུ་ཧི ས་ཧ་དྷ་མྨི་ཀཾ ཝུ་ཙྩ་མཱ་ནོ ཨ་ཏྟཱ་ནཾ ཨ་ཝ་ཙ་ནཱི་ཡཾ ཀ་རོ་ཏི. སོ ཏཾ ཝ་ཏྠུཾ ན པ་ཊི་ནི་སྶ་ཛྫ་ཏི. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨི་ཏྠ་ནྣཱ་མཾ བྷི་ཀྑུཾ ས་མ་ནུ་བྷཱ་སེ་ཡྻ ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ. ཨེ་སཱ ཉ་ཏྟི.
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ཨི་ཏྠ་ནྣཱ་མོ བྷི་ཀྑུ བྷི་ཀྑཱུ་ཧི ས་ཧ་དྷ་མྨི་ཀཾ ཝུ་ཙྩ་མཱ་ནོ ཨ་ཏྟཱ་ནཾ ཨ་ཝ་ཙ་ནཱི་ཡཾ ཀ་རོ་ཏི. སོ ཏཾ ཝ་ཏྠུཾ ན པ་ཊི་ནི་སྶ་ཛྫ་ཏི. ས་ངྒྷོ ཨི་ཏྠ་ནྣཱ་མཾ བྷི་ཀྑུཾ ས་མ་ནུ་བྷཱ་ས་ཏི ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ. ཡ་སྶཱ་ཡ་སྨ་ཏོ ཁ་མ་ཏི ཨི་ཏྠ་ནྣཱ་མ་སྶ བྷི་ཀྑུ་ནོ ས་མ་ནུ་བྷཱ་ས་ནཱ ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ.
‘‘དུ་ཏི་ཡ་མྤི ཨེ་ཏ་མ་ཏྠཾ ཝ་དཱ་མི…པེ… ཏ་ཏི་ཡ་མྤི ཨེ་ཏ་མ་ཏྠཾ ཝ་དཱ་མི – ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ཨི་ཏྠ་ནྣཱ་མོ བྷི་ཀྑུ བྷི་ཀྑཱུ་ཧི ས་ཧ་དྷ་མྨི་ཀཾ ཝུ་ཙྩ་མཱ་ནོ ཨ་ཏྟཱ་ནཾ ཨ་ཝ་ཙ་ནཱི་ཡཾ ཀ་རོ་ཏི. སོ ཏཾ ཝ་ཏྠུཾ ན པ་ཊི་ནི་སྶ་ཛྫ་ཏི. ས་ངྒྷོ ཨི་ཏྠ་ནྣཱ་མཾ བྷི་ཀྑུཾ ས་མ་ནུ་བྷཱ་ས་ཏི ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ. ཡ་སྶཱ་ཡ་སྨ་ཏོ ཁ་མ་ཏི ཨི་ཏྠ་ནྣཱ་མ་སྶ བྷི་ཀྑུ་ནོ ས་མ་ནུ་བྷཱ་ས་ནཱ ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ.
‘‘ས་མ་ནུ་བྷ་ཊྛོ ས་ངྒྷེ་ན ཨི་ཏྠ་ནྣཱ་མོ བྷི་ཀྑུ ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
༤༢༨. ཉ་ཏྟི་ཡཱ དུ་ཀྐ་ཊཾ, དྭཱི་ཧི ཀ་མྨ་ཝཱ་ཙཱ་ཧི ཐུ་ལླ་ཙྩ་ཡཱ, ཀ་མྨ་ཝཱ་ཙཱ་པ་རི་ཡོ་སཱ་ནེ ཨཱ་པ་ཏྟི ས་ངྒྷཱ་དི་སེ་ས་སྶ. ས་ངྒྷཱ་དི་སེ་སཾ ཨ་ཛ྄ཛྷཱ་པ་ཛྫ་ནྟ་སྶ ཉ་ཏྟི་ཡཱ དུ་ཀྐ་ཊཾ, དྭཱི་ཧི ཀ་མྨ་ཝཱ་ཙཱ་ཧི ཐུ་ལླ་ཙྩ་ཡཱ པ་ཊི་པྤ་སྶ་མྦྷ་ནྟི.
ས་ངྒྷཱ་དི་སེ་སོཏི…པེ… ཏེ་ན་པི ཝུ་ཙྩ་ཏི ས་ངྒྷཱ་དི་སེ་སོ་ཏི.
༤༢༩. དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱི ན པ་ཊི་ནི་སྶ་ཛྫ་ཏི, ཨཱ་པ་ཏྟི ས་ངྒྷཱ་དི་སེ་ས་སྶ.
དྷ་མྨ་ཀ་མྨེ ཝེ་མ་ཏི་ཀོ ན པ་ཊི་ནི་སྶ་ཛྫ་ཏི, ཨཱ་པ་ཏྟི ས་ངྒྷཱ་དི་སེ་ས་སྶ.
དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱི ན པ་ཊི་ནི་སྶ་ཛྫ་ཏི, ཨཱ་པ་ཏྟི ས་ངྒྷཱ་དི་སེ་ས་སྶ.
ཨ་དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ.
ཨ་དྷ་མྨ་ཀ་མྨེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ.
ཨ་དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ.
༤༣༠. ཨ་ནཱ་པ་ཏྟི ཨ་ས་མ་ནུ་བྷཱ་ས་ནྟ་སྶ, པ་ཊི་ནི་སྶ་ཛྫ་ནྟ་སྶ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
དུ་བྦ་ཙ་སི་ཀྑཱ་པ་དཾ ནི་ཊྛི་ཏཾ དྭཱ་ད་ས་མཾ.