༡༡. བྷེ་དཱ་ནུ་ཝ་ཏྟ་ཀ་སི་ཀྑཱ་པ་དཾ
༤༡༧. ཏེ་ན ས་མ་ཡེ་ན བུ་དྡྷོ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན དེ་ཝ་ད་ཏྟོ ས་ངྒྷ་བྷེ་དཱ་ཡ པ་ར་ཀྐ་མ་ཏི ཙ་ཀྐ་བྷེ་དཱ་ཡ. བྷི་ཀྑཱུ ཨེ་ཝ་མཱ་ཧཾ་སུ – ‘‘ཨ་དྷ་མྨ་ཝཱ་དཱི དེ་ཝ་ད་ཏྟོ, ཨ་ཝི་ན་ཡ་ཝཱ་དཱི དེ་ཝ་ད་ཏྟོ. ཀ་ཐ་ཉྷི ནཱ་མ དེ་ཝ་ད་ཏྟོ ས་ངྒྷ་བྷེ་དཱ་ཡ པ་ར་ཀྐ་མི་སྶ་ཏི ཙ་ཀྐ་བྷེ་དཱ་ཡཱ’’ཏི! ཨེ་ཝཾ ཝུ་ཏྟེ ཀོ་ཀཱ་ལི་ཀོ ཀ་ཊ་མོ་ད་ཀ་ཏི་སྶ་ཀོ ཁ་ཎྜ་དེ་ཝི་ཡཱ པུ་ཏྟོ ས་མུ་དྡ་ད་ཏྟོ ཏེ བྷི་ཀྑཱུ ཨེ་ཏ་ད་ཝོ་ཙུཾ – ‘‘མཱ་ཡ་སྨ་ནྟོ ཨེ་ཝཾ ཨ་ཝ་ཙུ་ཏྠ. དྷ་མྨ་ཝཱ་དཱི དེ་ཝ་ད་ཏྟོ, ཝི་ན་ཡ་ཝཱ་དཱི དེ་ཝ་ད་ཏྟོ. ཨ་མྷཱ་ཀ་ཉྩ དེ་ཝ་ད་ཏྟོ ཚ་ནྡ་ཉྩ རུ་ཙི་ཉྩ ཨཱ་དཱ་ཡ ཝོ་ཧ་ར་ཏི ཛཱ་ནཱ་ཏི ནོ བྷཱ་ས་ཏི ཨ་མྷཱ་ཀཾ་པེ་ཏཾ ཁ་མ་ཏཱི’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑཱུ དེ་ཝ་ད་ཏྟ་སྶ ས་ངྒྷ་བྷེ་དཱ་ཡ པ་ར་ཀྐ་མ་ནྟ་སྶ ཨ་ནུ་ཝ་ཏྟ་ཀཱ བྷ་ཝི་སྶ་ནྟི ཝ་གྒ་ཝཱ་ད་ཀཱ’’ཏི! ཨ་ཐ ཁོ ཏེ བྷི་ཀྑཱུ ཏེ ཨ་ནུ་ཝ་ཏྟ་ཀེ བྷི་ཀྑཱུ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར, བྷི་ཀྑ་ཝེ, བྷི་ཀྑཱུ དེ་ཝ་ད་ཏྟ་སྶ ས་ངྒྷ་བྷེ་དཱ་ཡ པ་ར་ཀྐ་མ་ནྟ་སྶ ཨ་ནུ་ཝ་ཏྟ་ཀཱ ཧོ་ནྟི ཝ་གྒ་ཝཱ་ད་ཀཱ’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ‘‘ཀ་ཐ་ཉྷི ནཱ་མ ཏེ, བྷི་ཀྑ་ཝེ, མོ་གྷ་པུ་རི་སཱ དེ་ཝ་ད་ཏྟ་སྶ ས་ངྒྷ་བྷེ་དཱ་ཡ པ་ར་ཀྐ་མ་ནྟ་སྶ ཨ་ནུ་ཝ་ཏྟ་ཀཱ བྷ་ཝི་སྶ་ནྟི ཝ་གྒ་ཝཱ་ད་ཀཱ! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༤༡༨. ‘‘ཏ་སྶེ་ཝ ཁོ པ་ན བྷི་ཀྑུ་སྶ བྷི་ཀྑཱུ ཧོ་ནྟི ཨ་ནུ་ཝ་ཏྟ་ཀཱ ཝ་གྒ་ཝཱ་ད་ཀཱ ཨེ་ཀོ ཝཱ དྭེ ཝཱ ཏ་ཡོ ཝཱ. ཏེ ཨེ་ཝཾ ཝ་དེ་ཡྻུཾ – ‘མཱ་ཡ་སྨ་ནྟོ ཨེ་ཏཾ བྷི་ཀྑུཾ ཀི་ཉྩི ཨ་ཝ་ཙུ་ཏྠ. དྷ་མྨ་ཝཱ་དཱི ཙེ་སོ བྷི་ཀྑུ, ཝི་ན་ཡ་ཝཱ་དཱི ཙེ་སོ བྷི་ཀྑུ. ཨ་མྷཱ་ཀ་ཉྩེ་སོ བྷི་ཀྑུ ཚ་ནྡ་ཉྩ རུ་ཙི་ཉྩ ཨཱ་དཱ་ཡ ཝོ་ཧ་ར་ཏི ཛཱ་ནཱ་ཏི ནོ བྷཱ་ས་ཏི ཨ་མྷཱ་ཀ་མྤེ་ཏཾ ཁ་མ་ཏཱི’ཏི, ཏེ བྷི་ཀྑཱུ བྷི་ཀྑཱུ་ཧི ཨེ་ཝ་མ་སྶུ ཝ་ཙ་ནཱི་ཡཱ – ‘མཱ་ཡ་སྨ་ནྟོ ཨེ་ཝཾ ཨ་ཝ་ཙུ་ཏྠ, ན ཙེ་སོ བྷི་ཀྑུ དྷ་མྨ་ཝཱ་དཱི, ན ཙེ་སོ བྷི་ཀྑུ ཝི་ན་ཡ་ཝཱ་དཱི, མཱ་ཡ་སྨ་ནྟཱ་ན་མྤི ས་ངྒྷ་བྷེ་དོ རུ་ཙྩི་ཏྠ, ས་མེ་ཏཱ་ཡ་སྨ་ནྟཱ་ནཾ ས་ངྒྷེ་ན, ས་མ་གྒོ ཧི ས་ངྒྷོ ས་མྨོ་ད་མཱ་ནོ ཨ་ཝི་ཝ་ད་མཱ་ནོ ཨེ་ཀུ་དྡེ་སོ ཕཱ་སུ ཝི་ཧ་ར་ཏཱི’ཏི. ཨེ་ཝ་ཉྩ ཏེ བྷི་ཀྑཱུ བྷི་ཀྑཱུ་ཧི ཝུ་ཙྩ་མཱ་ནཱ ཏ་ཐེ་ཝ པ་གྒ་ཎྷེ་ཡྻུཾ, ཏེ བྷི་ཀྑཱུ བྷི་ཀྑཱུ་ཧི ཡཱ་ཝ་ཏ་ཏི་ཡཾ ས་མ་ནུ་བྷཱ་སི་ཏ་བྦཱ ཏ་སྶ པ་ཊི་ནི་སྶ་གྒཱ་ཡ. ཡཱ་ཝ་ཏ་ཏི་ཡ་ཉྩེ ས་མ་ནུ་བྷཱ་སི་ཡ་མཱ་ནཱ ཏཾ པ་ཊི་ནི་སྶ་ཛྫེ་ཡྻུཾ, ཨི་ཙྩེ་ཏཾ ཀུ་ས་ལཾ, ནོ ཙེ པ་ཊི་ནི་སྶ་ཛྫེ་ཡྻུཾ, ས་ངྒྷཱ་དི་སེ་སོ’’ཏི.
༤༡༩. ཏ་སྶེ་ཝ ཁོ པ་ནཱཏི ཏ་སྶ ས་ངྒྷ་བྷེ་ད་ཀ་སྶ བྷི་ཀྑུ་ནོ.
བྷི་ཀྑཱུ ཧོ་ནྟཱིཏི ཨ་ཉྙེ བྷི་ཀྑཱུ ཧོ་ནྟི.
ཨ་ནུ་ཝ་ཏྟ་ཀཱཏི ཡཾ་དི་ཊྛི་ཀོ སོ ཧོ་ཏི ཡཾ་ཁ་ནྟི་ཀོ ཡཾ་རུ་ཙི་ཀོ ཏེ་པི ཏཾ་དི་ཊྛི་ཀཱ ཧོ་ནྟི ཏཾ་ཁ་ནྟི་ཀཱ ཏཾ་རུ་ཙི་ཀཱ.
ཝ་གྒ་ཝཱ་ད་ཀཱཏི ཏ་སྶ ཝ་ཎྞཱ་ཡ པ་ཀྑཱ་ཡ ཋི་ཏཱ ཧོ་ནྟི.
ཨེ་ཀོ ཝཱ དྭེ ཝཱ ཏ་ཡོ ཝཱཏི ཨེ་ཀོ ཝཱ ཧོ་ཏི དྭེ ཝཱ ཏ་ཡོ ཝཱ. ཏེ ཨེ་ཝཾ ཝ་དེ་ཡྻུཾ – ‘‘མཱ་ཡ་སྨ་ནྟོ ཨེ་ཏཾ བྷི་ཀྑུཾ ཀི་ཉྩི ཨ་ཝ་ཙུ་ཏྠ, དྷ་མྨ་ཝཱ་དཱི ཙེ་སོ བྷི་ཀྑུ, ཝི་ན་ཡ་ཝཱ་དཱི ཙེ་སོ བྷི་ཀྑུ, ཨ་མྷཱ་ཀ་ཉྩེ་སོ བྷི་ཀྑུ ཚ་ནྡ་ཉྩ རུ་ཙི་ཉྩ ཨཱ་དཱ་ཡ ཝོ་ཧ་ར་ཏི ཛཱ་ནཱ་ཏི ནོ བྷཱ་ས་ཏི ཨ་མྷཱ་ཀཾ་པེ་ཏཾ ཁ་མ་ཏཱི’ཏི.
ཏེ བྷི་ཀྑཱུཏི ཡེ ཏེ ཨ་ནུ་ཝ་ཏྟ་ཀཱ བྷི་ཀྑཱུ.
བྷི་ཀྑཱུ་ཧཱིཏི ཨ་ཉྙེ་ཧི བྷི་ཀྑཱུ་ཧི.
ཡེ པ་སྶ་ནྟི ཡེ སུ་ཎ་ནྟི ཏེ་ཧི ཝ་ཏྟ་བྦཱ – ‘‘མཱ་ཡ་སྨ་ནྟོ ཨེ་ཝཾ ཨ་ཝ་ཙུ་ཏྠ. ན ཙེ་སོ བྷི་ཀྑུ དྷ་མྨ་ཝཱ་དཱི, ན ཙེ་སོ བྷི་ཀྑུ ཝི་ན་ཡ་ཝཱ་དཱི. མཱ་ཡ་སྨ་ནྟཱ་ན་མྤི ས་ངྒྷ་བྷེ་དོ རུ་ཙྩི་ཏྠ. ས་མེ་ཏཱ་ཡ་སྨ་ནྟཱ་ནཾ ས་ངྒྷེ་ན. ས་མ་གྒོ ཧི ས་ངྒྷོ ས་མྨོ་ད་མཱ་ནོ ཨ་ཝི་ཝ་ད་མཱ་ནོ ཨེ་ཀུ་དྡེ་སོ ཕཱ་སུ ཝི་ཧ་ར་ཏཱི’’ཏི. དུ་ཏི་ཡ་མྤི ཝ་ཏྟ་བྦཱ. ཏ་ཏི་ཡ་མྤི ཝ་ཏྟ་བྦཱ. ས་ཙེ པ་ཊི་ནི་སྶ་ཛྫ་ནྟི, ཨི་ཙྩེ་ཏཾ ཀུ་ས་ལཾ; ནོ ཙེ པ་ཊི་ནི་སྶ་ཛྫ་ནྟི, ཨཱ་པ་ཏྟི དུ་ཀྐ་ཊ་སྶ. སུ་ཏྭཱ ན ཝ་ད་ནྟི, ཨཱ་པ་ཏྟི དུ་ཀྐ་ཊ་སྶ. ཏེ བྷི་ཀྑཱུ ས་ངྒྷ་མ་ཛ྄ཛྷ་མྤི ཨཱ་ཀ་ཌྜྷི་ཏྭཱ ཝ་ཏྟ་བྦཱ – ‘‘མཱ་ཡ་སྨ་ནྟོ ཨེ་ཝཾ ཨ་ཝ་ཙུ་ཏྠ. ན ཙེ་སོ བྷི་ཀྑུ དྷ་མྨ་ཝཱ་དཱི, ན ཙེ་སོ བྷི་ཀྑུ ཝི་ན་ཡ་ཝཱ་དཱི. མཱ་ཡ་སྨ་ནྟཱ་ན་མྤི ས་ངྒྷ་བྷེ་དོ རུ་ཙྩི་ཏྠ. ས་མེ་ཏཱ་ཡ་སྨ་ནྟཱ་ནཾ ས་ངྒྷེ་ན. ས་མ་གྒོ ཧི ས་ངྒྷོ ས་མྨོ་ད་མཱ་ནོ ཨ་ཝི་ཝ་ད་མཱ་ནོ ཨེ་ཀུ་དྡེ་སོ ཕཱ་སུ ཝི་ཧ་ར་ཏཱི’’ཏི. དུ་ཏི་ཡ་མྤི ཝ་ཏྟ་བྦཱ. ཏ་ཏི་ཡ་མྤི ཝ་ཏྟ་བྦཱ. ས་ཙེ པ་ཊི་ནི་སྶ་ཛྫ་ནྟི, ཨི་ཙྩེ་ཏཾ ཀུ་ས་ལཾ; ནོ ཙེ པ་ཊི་ནི་སྶ་ཛྫ་ནྟི, ཨཱ་པ་ཏྟི དུ་ཀྐ་ཊ་སྶ. ཏེ བྷི་ཀྑཱུ ས་མ་ནུ་བྷཱ་སི་ཏ་བྦཱ. ཨེ་ཝ་ཉྩ པ་ན, བྷི་ཀྑ་ཝེ, ས་མ་ནུ་བྷཱ་སི་ཏ་བྦཱ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –
༤༢༠. ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མོ ཙ ཨི་ཏྠ་ནཱ་མོ ཙ བྷི་ཀྑཱུ ཨི་ཏྠ་ནྣཱ་མ་སྶ བྷི་ཀྑུ་ནོ ས་ངྒྷ་བྷེ་དཱ་ཡ པ་ར་ཀྐ་མ་ནྟ་སྶ ཨ་ནུ་ཝ་ཏྟ་ཀཱ ཝ་གྒ་ཝཱ་ད་ཀཱ. ཏེ ཏཾ ཝ་ཏྠུཾ ན པ་ཊི་ནི་སྶ་ཛྫ་ནྟི. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨི་ཏྠ་ནྣཱ་མ་ཉྩ ཨི་ཏྠ་ནྣཱ་མ་ཉྩ བྷི་ཀྑཱུ ས་མ་ནུ་བྷཱ་སེ་ཡྻ ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ. ཨེ་སཱ ཉ་ཏྟི.
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མོ ཙ ཨི་ཏྠ་ནྣཱ་མོ ཙ བྷི་ཀྑཱུ ཨི་ཏྠ་ནྣཱ་མ་སྶ བྷི་ཀྑུ་ནོ ས་ངྒྷ་བྷེ་དཱ་ཡ པ་ར་ཀྐ་མ་ནྟ་སྶ ཨ་ནུ་ཝ་ཏྟ་ཀཱ ཝ་གྒ་ཝཱ་ད་ཀཱ. ཏེ ཏཾ ཝ་ཏྠུཾ ན པ་ཊི་ནི་སྶ་ཛྫ་ནྟི. ས་ངྒྷོ ཨི་ཏྠ་ནྣཱ་མ་ཉྩ ཨི་ཏྠ་ནྣཱ་མ་ཉྩ བྷི་ཀྑཱུ ས་མ་ནུ་བྷཱ་ས་ཏི ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ. ཡ་སྶཱ་ཡ་སྨ་ཏོ ཁ་མ་ཏི ཨི་ཏྠ་ནྣཱ་མ་སྶ ཙ ཨི་ཏྠ་ནྣཱ་མ་སྶ ཙ བྷི་ཀྑཱུ་ནཾ ས་མ་ནུ་བྷཱ་ས་ནཱ ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ.
‘‘དུ་ཏི་ཡ་མྤི ཨེ་ཏ་མ་ཏྠཾ ཝ་དཱ་མི…པེ… ཏ་ཏི་ཡ་མྤི ཨེ་ཏ་མ་ཏྠཾ ཝ་དཱ་མི – སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མོ ཙ ཨི་ཏྠ་ནྣཱ་མོ ཙ བྷི་ཀྑཱུ ཨི་ཏྠ་ནྣཱ་མ་སྶ བྷི་ཀྑུ་ནོ ས་ངྒྷ་བྷེ་དཱ་ཡ པ་ར་ཀྐ་མ་ནྟ་སྶ ཨ་ནུ་ཝ་ཏྟ་ཀཱ ཝ་གྒ་ཝཱ་ད་ཀཱ. ཏེ ཏཾ ཝ་ཏྠུཾ ན པ་ཊི་ནི་སྶ་ཛྫ་ནྟི. ས་ངྒྷོ ཨི་ཏྠ་ནྣཱ་མ་ཉྩ ཨི་ཏྠ་ནྣཱ་མ་ཉྩ བྷི་ཀྑཱུ ས་མ་ནུ་བྷཱ་ས་ཏི ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ. ཡ་སྶཱ་ཡ་སྨ་ཏོ ཁ་མ་ཏི ཨི་ཏྠ་ནྣཱ་མ་སྶ ཙ ཨི་ཏྠ་ནྣཱ་མ་སྶ ཙ བྷི་ཀྑཱུ་ནཾ ས་མ་ནུ་བྷཱ་ས་ནཱ ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ.
‘‘ས་མ་ནུ་བྷ་ཊྛཱ ས་ངྒྷེ་ན ཨི་ཏྠ་ནྣཱ་མོ ཙ ཨི་ཏྠ་ནྣཱ་མོ ཙ བྷི་ཀྑཱུ ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
༤༢༡. ཉ་ཏྟི་ཡཱ དུ་ཀྐ་ཊཾ, དྭཱི་ཧི ཀ་མྨ་ཝཱ་ཙཱ་ཧི ཐུ་ལླ་ཙྩ་ཡཱ, ཀ་མྨ་ཝཱ་ཙཱ་པ་རི་ཡོ་སཱ་ནེ ཨཱ་པ་ཏྟི ས་ངྒྷཱ་དི་སེ་ས་སྶ. ས་ངྒྷཱ་དི་སེ་སཾ ཨ་ཛ྄ཛྷཱ་པ་ཛྫ་ནྟཱ་ནཾ ཉ་ཏྟི་ཡཱ དུ་ཀྐ་ཊཾ, དྭཱི་ཧི ཀ་མྨ་ཝཱ་ཙཱ་ཧི ཐུ་ལླ་ཙྩ་ཡཱ པ་ཊི་པྤ་སྶ་མྦྷ་ནྟི. དྭེ ཏ་ཡོ ཨེ་ཀ་ཏོ ས་མ་ནུ་བྷཱ་སི་ཏ་བྦཱ, ཏ་དུ་ཏྟ་རི ན ས་མ་ནུ་བྷཱ་སི་ཏ་བྦཱ.
ས་ངྒྷཱ་དི་སེ་སོཏི…པེ… ཏེ་ན་པི ཝུ་ཙྩ་ཏི ‘‘ས་ངྒྷཱ་དི་སེ་སོ’’ཏི.
༤༢༢. དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱི ན པ་ཊི་ནི་སྶ་ཛྫ་ནྟི, ཨཱ་པ་ཏྟི ས་ངྒྷཱ་དི་སེ་ས་སྶ.
དྷ་མྨ་ཀ་མྨེ ཝེ་མ་ཏི་ཀཱ ན པ་ཊི་ནི་སྶ་ཛྫ་ནྟི, ཨཱ་པ་ཏྟི ས་ངྒྷཱ་དི་སེ་ས་སྶ.
དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱི ན པ་ཊི་ནི་སྶ་ཛྫ་ནྟི, ཨཱ་པ་ཏྟི ས་ངྒྷཱ་དི་སེ་ས་སྶ.
ཨ་དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ.
ཨ་དྷ་མྨ་ཀ་མྨེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ.
ཨ་དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ.
༤༢༣. ཨ་ནཱ་པ་ཏྟི ཨ་ས་མ་ནུ་བྷཱ་ས་ནྟཱ་ནཾ, པ་ཊི་ནི་སྶ་ཛྫ་ནྟཱ་ནཾ, ཨུ་མྨ་ཏྟ་ཀཱ་ནཾ, ཁི་ཏྟ་ཙི་ཏྟཱ་ནཾ, ཝེ་ད་ནཱ་ཊྚཱ་ནཾ, ཨཱ་དི་ཀ་མྨི་ཀཱ་ན་ནྟི.
བྷེ་དཱ་ནུ་ཝ་ཏྟ་ཀ་སི་ཀྑཱ་པ་དཾ ནི་ཊྛི་ཏཾ ཨེ་ཀཱ་ད་ས་མཾ.