༣. ཏ་ཏི་ཡ་སི་ཀྑཱ་པ་དཾ
༧༤༣. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཐུ་ལླ་ན་ནྡཱ བྷི་ཀྑུ་ནཱི ཨ་ཉྙ་ཏ་རཱ་ཡ བྷི་ཀྑུ་ནི་ཡཱ ས་དྡྷིཾ ཙཱི་ཝ་རཾ པ་རི་ཝ་ཏྟེ་ཏྭཱ པ་རི་བྷུ་ཉྫི. ཨ་ཐ ཁོ སཱ བྷི་ཀྑུ་ནཱི ཏཾ ཙཱི་ཝ་རཾ ས་ངྒྷ་རི་ཏྭཱ [སཾ་ཧ་རི་ཏྭཱ (ཀ.)] ནི་ཀྑི་པི. ཐུ་ལླ་ན་ནྡཱ བྷི་ཀྑུ་ནཱི ཏཾ བྷི་ཀྑུ་ནིཾ ཨེ་ཏ་ད་ཝོ་ཙ – ‘‘ཡཾ ཏེ, ཨ་ཡྻེ, མ་ཡཱ ས་དྡྷིཾ ཙཱི་ཝ་རཾ པ་རི་ཝ་ཏྟི་ཏཾ, ཀ་ཧཾ ཏཾ ཙཱི་ཝ་ར’’ནྟི? ཨ་ཐ ཁོ སཱ བྷི་ཀྑུ་ནཱི ཏཾ ཙཱི་ཝ་རཾ ནཱི་ཧ་རི་ཏྭཱ ཐུ་ལླ་ན་ནྡཱ་ཡ བྷི་ཀྑུ་ནི་ཡཱ ད་སྶེ་སི. ཐུ་ལླ་ན་ནྡཱ བྷི་ཀྑུ་ནཱི ཏཾ བྷི་ཀྑུ་ནིཾ ཨེ་ཏ་ད་ཝོ་ཙ – ‘‘ཧ་ནྡཱ་ཡྻེ, ཏུ་ཡ྄ཧཾ ཙཱི་ཝ་རཾ, ཨཱ་ཧ་ར མེ’ཏཾ ཙཱི་ཝ་རཾ, ཡཾ ཏུ་ཡ྄ཧཾ ཏུ་ཡ྄ཧ་མེ་ཝེ་ཏཾ, ཡཾ མ་ཡ྄ཧཾ མ་ཡ྄ཧ་མེ་ཝེ་ཏཾ, ཨཱ་ཧ་ར མེ’ཏཾ, ས་ཀཾ པ་ཙྩཱ་ཧ་རཱ’’ཏི ཨ་ཙྪི་ནྡི. ཨ་ཐ ཁོ སཱ བྷི་ཀྑུ་ནཱི བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ བྷི་ཀྑུ་ནི་ཡཱ ས་དྡྷིཾ ཙཱི་ཝ་རཾ པ་རི་ཝ་ཏྟེ་ཏྭཱ ཨ་ཙྪི་ནྡི་སྶ་ཏཱི’’ཏི! ཨ་ཐ ཁོ ཏཱ བྷི་ཀྑུ་ནི་ཡོ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རཱ་ཙེ་སུཾ…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི བྷི་ཀྑུ་ནི་ཡཱ ས་དྡྷིཾ ཙཱི་ཝ་རཾ པ་རི་ཝ་ཏྟེ་ཏྭཱ ཨ་ཙྪི་ནྡ་ཏཱི་ཏི [ཨ་ཙྪི་ནྡཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི བྷི་ཀྑུ་ནི་ཡཱ ས་དྡྷིཾ ཙཱི་ཝ་རཾ པ་རི་ཝ་ཏྟེ་ཏྭཱ ཨ་ཙྪི་ནྡི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༧༤༤. ‘‘ཡཱ པ་ན བྷི་ཀྑུ་ནཱི བྷི་ཀྑུ་ནི་ཡཱ ས་དྡྷིཾ ཙཱི་ཝ་རཾ པ་རི་ཝ་ཏྟེ་ཏྭཱ སཱ པ་ཙྪཱ ཨེ་ཝཾ ཝ་དེ་ཡྻ – ‘ཧ་ནྡཱ་ཡྻེ, ཏུ་ཡ྄ཧཾ ཙཱི་ཝ་རཾ ཨཱ་ཧ་ར, མེ་ཏཾ ཙཱི་ཝ་རཾ, ཡཾ ཏུ་ཡ྄ཧཾ ཏུ་ཡ྄ཧ་མེ་ཝེ་ཏཾ, ཡཾ མ་ཡ྄ཧཾ མ་ཡ྄ཧ་མེ་ཝེ་ཏཾ, ཨཱ་ཧ་ར མེ་ཏཾ, ས་ཀཾ པ་ཙྩཱ་ཧ་རཱ’ཏི ཨ་ཙྪི་ནྡེ་ཡྻ ཝཱ ཨ་ཙྪི་ནྡཱ་པེ་ཡྻ ཝཱ, ནི་སྶ་གྒི་ཡཾ པཱ་ཙི་ཏྟི་ཡ’’ནྟི.
༧༤༥. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
བྷི་ཀྑུ་ནི་ཡཱ ས་དྡྷིནྟི ཨ་ཉྙཱ་ཡ བྷི་ཀྑུ་ནི་ཡཱ ས་དྡྷིཾ.
ཙཱི་ཝ་རཾ ནཱ་མ ཚ་ནྣཾ ཙཱི་ཝ་རཱ་ནཾ ཨ་ཉྙ་ཏ་རཾ ཙཱི་ཝ་རཾ ཝི་ཀ་པྤ་ནུ་པ་གཾ པ་ཙྪི་མཾ.
པ་རི་ཝ་ཏྟེ་ཏྭཱཏི པ་རི་ཏྟེ་ན ཝཱ ཝི་པུ་ལཾ, ཝི་པུ་ལེ་ན ཝཱ པ་རི་ཏྟཾ.
ཨ་ཙྪི་ནྡེ་ཡྻཱཏི ས་ཡཾ ཨ་ཙྪི་ནྡ་ཏི ནི་སྶ་གྒི་ཡཾ པཱ་ཙི་ཏྟི་ཡཾ.
ཨ་ཙྪི་ནྡཱ་པེ་ཡྻཱཏི ཨ་ཉྙཾ ཨཱ་ཎཱ་པེ་ཏི, ཨཱ་པ་ཏྟི དུ་ཀྐ་ཊ་སྶ. ས་ཀིཾ ཨཱ་ཎ་ཏྟཱ བ་ཧུ་ཀ་མྤི ཨ་ཙྪི་ནྡ་ཏི, ནི་སྶ་གྒི་ཡཾ ཧོ་ཏི. ནི་སྶ་ཛྫི་ཏ་བྦཾ ས་ངྒྷ་སྶ ཝཱ ག་ཎ་སྶ ཝཱ ཨེ་ཀ་བྷི་ཀྑུ་ནི་ཡཱ ཝཱ. ཨེ་ཝ་ཉྩ པ་ན, བྷི་ཀྑ་ཝེ, ནི་སྶ་ཛྫི་ཏ་བྦཾ…པེ… ‘‘ཨི་དཾ མེ ཨ་ཡྻེ ཙཱི་ཝ་རཾ བྷི་ཀྑུ་ནི་ཡཱ ས་དྡྷིཾ པ་རི་ཝ་ཏྟེ་ཏྭཱ ཨ་ཙྪི་ནྣཾ ནི་སྶ་གྒི་ཡཾ, ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མཱི’’ཏི…པེ… ད་དེ་ཡྻཱ་ཏི…པེ… ད་དེ་ཡྻུ་ནྟི…པེ… ཨ་ཡྻཱ་ཡ ད་མྨཱི་ཏི.
༧༤༦. ཨུ་པ་ས་མྤ་ནྣཱ་ཡ ཨུ་པ་ས་མྤ་ནྣ་ས་ཉྙཱ ཙཱི་ཝ་རཾ པ་རི་ཝ་ཏྟེ་ཏྭཱ ཨ་ཙྪི་ནྡ་ཏི ཝཱ ཨ་ཙྪི་ནྡཱ་པེ་ཏི ཝཱ, ནི་སྶ་གྒི་ཡཾ པཱ་ཙི་ཏྟི་ཡཾ. ཨུ་པ་ས་མྤ་ནྣཱ་ཡ ཝེ་མ་ཏི་ཀཱ ཙཱི་ཝ་རཾ པ་རི་ཝ་ཏྟེ་ཏྭཱ ཨ་ཙྪི་ནྡ་ཏི ཝཱ ཨ་ཙྪི་ནྡཱ་པེ་ཏི ཝཱ, ནི་སྶ་གྒི་ཡཾ པཱ་ཙི་ཏྟི་ཡཾ. ཨུ་པ་ས་མྤ་ནྣཱ་ཡ ཨ་ནུ་པ་ས་མྤ་ནྣ་ས་ཉྙཱ ཙཱི་ཝ་རཾ པ་རི་ཝ་ཏྟེ་ཏྭཱ ཨ་ཙྪི་ནྡ་ཏི ཝཱ ཨ་ཙྪི་ནྡཱ་པེ་ཏི ཝཱ, ནི་སྶ་གྒི་ཡཾ པཱ་ཙི་ཏྟི་ཡཾ.
ཨ་ཉྙཾ པ་རི་ཀྑཱ་རཾ པ་རི་ཝ་ཏྟེ་ཏྭཱ ཨ་ཙྪི་ནྡ་ཏི ཝཱ ཨ་ཙྪི་ནྡཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣཱ་ཡ ས་དྡྷིཾ ཙཱི་ཝ་རཾ ཝཱ ཨ་ཉྙཾ ཝཱ པ་རི་ཀྑཱ་རཾ པ་རི་ཝ་ཏྟེ་ཏྭཱ ཨ་ཙྪི་ནྡ་ཏི ཝཱ ཨ་ཙྪི་ནྡཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣཱ་ཡ ཨུ་པ་ས་མྤ་ནྣ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣཱ་ཡ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣཱ་ཡ ཨ་ནུ་པ་ས་མྤ་ནྣ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ.
༧༤༧. ཨ་ནཱ་པ་ཏྟི སཱ ཝཱ དེ་ཏི, ཏ་སྶཱ ཝཱ ཝི་སྶ་ས་ནྟཱི ག་ཎྷཱ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཏ་ཏི་ཡ་སི་ཀྑཱ་པ་དཾ ནི་ཊྛི་ཏཾ.