༡. པ་ཋ་མ་སི་ཀྑཱ་པ་དཾ
ཨི་མེ ཁོ པ་ནཱ་ཡྻཱ་ཡོ ཏིཾ་ས ནི་སྶ་གྒི་ཡཱ པཱ་ཙི་ཏྟི་ཡཱ
དྷ་མྨཱ ཨུ་དྡེ་སཾ ཨཱ་ག་ཙྪ་ནྟི.
༧༣༣. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑུ་ནི་ཡོ བ་ཧཱུ པ་ཏྟེ ས་ནྣི་ཙ་ཡཾ ཀ་རོ་ནྟི. མ་ནུ་སྶཱ ཝི་ཧཱ་ར་ཙཱ་རི་ཀཾ ཨཱ་ཧི་ཎྜ་ནྟཱ པ་སྶི་ཏྭཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ བ་ཧཱུ པ་ཏྟེ ས་ནྣི་ཙ་ཡཾ ཀ་རི་སྶ་ནྟི, པ་ཏྟ་ཝཱ་ཎི་ཛྫཾ ཝཱ བྷི་ཀྑུ་ནི་ཡོ ཀ་རི་སྶ་ནྟི, ཨཱ་མ་ཏྟི་ཀཱ་པ་ཎཾ ཝཱ པ་སཱ་རེ་སྶ་ནྟཱི’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑུ་ནི་ཡོ པ་ཏྟ་ས་ནྣི་ཙ་ཡཾ ཀ་རི་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ པ་ཏྟ་ས་ནྣི་ཙ་ཡཾ ཀ་རོ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ པ་ཏྟ་ས་ནྣི་ཙ་ཡཾ ཀ་རི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༧༣༤. ‘‘ཡཱ པ་ན བྷི་ཀྑུ་ནཱི པ་ཏྟ་ས་ནྣི་ཙ་ཡཾ ཀ་རེ་ཡྻ, ནི་སྶ་གྒི་ཡཾ པཱ་ཙི་ཏྟི་ཡ’’ནྟི.
༧༣༥. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
པ་ཏྟོ ནཱ་མ དྭེ པ་ཏྟཱ – ཨ་ཡོ་པ་ཏྟོ, མ་ཏྟི་ཀཱ་པ་ཏྟོ. ཏ་ཡོ པ་ཏྟ་སྶ ཝ་ཎྞཱ – ཨུ་ཀྐ་ཊྛོ པ་ཏྟོ, མ་ཛ྄ཛྷི་མོ པ་ཏྟོ, ཨོ་མ་ཀོ པ་ཏྟོ. ཨུ་ཀྐ་ཊྛོ་ནཱ་མ་པ་ཏྟོ ཨ་ཌྜྷཱ་ལ༹ྷ་ཀོ་ད་ནཾ ག་ཎྷཱ་ཏི ཙ་ཏུ་བྷཱ་གཾ ཁཱ་ད་ནཾ ཏ་དུ་པི་ཡཾ བྱ་ཉྫ་ནཾ. མ་ཛ྄ཛྷི་མོ ནཱ་མ་པ་ཏྟོ ནཱ་ལི༹་ཀོ་ད་ནཾ ག་ཎྷཱ་ཏི ཙ་ཏུ་བྷཱ་གཾ ཁཱ་ད་ནཾ ཏ་དུ་པི་ཡཾ བྱ་ཉྫ་ནཾ. ཨོ་མ་ཀོ ནཱ་མ་པ་ཏྟོ པ་ཏྠོ་ད་ནཾ ག་ཎྷཱ་ཏི ཙ་ཏུ་བྷཱ་གཾ ཁཱ་ད་ནཾ ཏ་དུ་པི་ཡཾ བྱ་ཉྫ་ནཾ. ཏ་ཏོ ཨུ་ཀྐ་ཊྛོ ཨ་པ་ཏྟོ ཨོ་མ་ཀོ ཨ་པ་ཏྟོ.
ས་ནྣི་ཙ་ཡཾ ཀ་རེ་ཡྻཱཏི ཨ་ན་དྷི་ཊྛི་ཏོ ཨ་ཝི་ཀ་པྤི་ཏོ.
ནི་སྶ་གྒི་ཡོ ཧོ་ཏཱིཏི ས་ཧ ཨ་རུ་ཎུ་གྒ་མ་ནཱ ནི་སྶ་གྒི་ཡོ ཧོ་ཏི. ནི་སྶ་ཛྫི་ཏ་བྦོ ས་ངྒྷ་སྶ ཝཱ ག་ཎ་སྶ ཝཱ ཨེ་ཀ་བྷི་ཀྑུ་ནི་ཡཱ ཝཱ. ཨེ་ཝ་ཉྩ པ་ན, བྷི་ཀྑ་ཝེ, ནི་སྶ་ཛྫི་ཏ་བྦོ. ཏཱ་ཡ བྷི་ཀྑུ་ནི་ཡཱ ས་ངྒྷཾ ཨུ་པ་ས་ངྐ་མི་ཏྭཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཝུ་ཌྜྷཱ་ནཾ བྷི་ཀྑུ་ནཱི་ནཾ པཱ་དེ ཝ་ནྡི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཨེ་ཝ་མ་སྶ ཝ་ཙ་ནཱི་ཡོ – ‘‘ཨ་ཡཾ མེ, ཨ་ཡྻེ, པ་ཏྟོ ར་ཏྟཱ་ཏི་ཀྐ་ནྟོ ནི་སྶ་གྒི་ཡོ, ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མཱི’’ཏི. ནི་སྶ་ཛྫི་ཏྭཱ ཨཱ་པ་ཏྟི དེ་སེ་ཏ་བྦཱ. བྱ་ཏྟཱ་ཡ བྷི་ཀྑུ་ནི་ཡཱ པ་ཊི་བ་ལཱ་ཡ ཨཱ་པ་ཏྟི པ་ཊི་གྒ་ཧེ་ཏ་བྦཱ. ནི་སྶ་ཊྛ་པ་ཏྟོ དཱ་ཏ་བྦོ –
‘‘སུ་ཎཱ་ཏུ མེ, ཨ་ཡྻེ, ས་ངྒྷོ. ཨ་ཡཾ པ་ཏྟོ ཨི་ཏྠ་ནྣཱ་མཱ་ཡ བྷི་ཀྑུ་ནི་ཡཱ ནི་སྶ་གྒི་ཡོ ས་ངྒྷ་སྶ ནི་སྶ་ཊྛོ. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨི་མཾ པ་ཏྟཾ ཨི་ཏྠ་ནྣཱ་མཱ་ཡ བྷི་ཀྑུ་ནི་ཡཱ ད་དེ་ཡྻཱ’’ཏི.
ཏཱ་ཡ བྷི་ཀྑུ་ནི་ཡཱ ས་མྦ་ཧུ་ལཱ བྷི་ཀྑུ་ནི་ཡོ ཨུ་པ་ས་ངྐ་མི་ཏྭཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཝུ་ཌྜྷཱ་ནཾ བྷི་ཀྑུ་ནཱི་ནཾ པཱ་དེ ཝ་ནྡི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཨེ་ཝ་མ་སྶུ ཝ་ཙ་ནཱི་ཡཱ – ‘‘ཨ་ཡཾ མེ, ཨ་ཡྻཱ་ཡོ, པ་ཏྟོ ར་ཏྟཱ་ཏི་ཀྐ་ནྟོ ནི་སྶ་གྒི་ཡོ, ཨི་མཱ་ཧཾ ཨ་ཡྻཱ་ནཾ ནི་སྶ་ཛྫཱ་མཱི’’ཏི. ནི་སྶ་ཛྫི་ཏྭཱ ཨཱ་པ་ཏྟི དེ་སེ་ཏ་བྦཱ. བྱ་ཏྟཱ་ཡ བྷི་ཀྑུ་ནི་ཡཱ པ་ཊི་བ་ལཱ་ཡ ཨཱ་པ་ཏྟི པ་ཊི་གྒ་ཧེ་ཏ་བྦཱ. ནི་སྶ་ཊྛ་པ་ཏྟོ དཱ་ཏ་བྦོ –
‘‘སུ་ཎ་ནྟུ མེ ཨ་ཡྻཱ་ཡོ. ཨ་ཡཾ པ་ཏྟོ ཨི་ཏྠ་ནྣཱ་མཱ་ཡ བྷི་ཀྑུ་ནི་ཡཱ ནི་སྶ་གྒི་ཡོ ཨ་ཡྻཱ་ནཾ ནི་སྶ་ཊྛོ. ཡ་དི ཨ་ཡྻཱ་ནཾ པ་ཏྟ་ཀ་ལླཾ, ཨ་ཡྻཱ་ཡོ ཨི་མཾ པ་ཏྟཾ ཨི་ཏྠ་ནྣཱ་མཱ་ཡ བྷི་ཀྑུ་ནི་ཡཱ ད་དེ་ཡྻུ’’ནྟི.
ཏཱ་ཡ བྷི་ཀྑུ་ནི་ཡཱ ཨེ་ཀཾ བྷི་ཀྑུ་ནིཾ ཨུ་པ་ས་ངྐ་མི་ཏྭཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཨེ་ཝ་མ་སྶ ཝ་ཙ་ནཱི་ཡཱ – ‘‘ཨ་ཡཾ མེ, ཨ་ཡྻེ, པ་ཏྟོ ར་ཏྟཱ་ཏི་ཀྐ་ནྟོ ནི་སྶ་གྒི་ཡོ. ཨི་མཱ་ཧཾ ཨ་ཡྻཱ་ཡ ནི་སྶ་ཛྫཱ་མཱི’’ཏི. ནི་སྶ་ཛྫི་ཏྭཱ ཨཱ་པ་ཏྟི དེ་སེ་ཏ་བྦཱ. ཏཱ་ཡ བྷི་ཀྑུ་ནི་ཡཱ ཨཱ་པ་ཏྟི པ་ཊི་གྒ་ཧེ་ཏ་བྦཱ. ནི་སྶ་ཊྛ་པ་ཏྟོ དཱ་ཏ་བྦོ – ‘‘ཨི་མཾ པ་ཏྟཾ ཨ་ཡྻཱ་ཡ ད་མྨཱི’’ཏི.
༧༣༦. ར་ཏྟཱ་ཏི་ཀྐ་ནྟེ ཨ་ཏི་ཀྐ་ནྟ་ས་ཉྙཱ, ནི་སྶ་གྒི་ཡཾ པཱ་ཙི་ཏྟི་ཡཾ. ར་ཏྟཱ་ཏི་ཀྐ་ནྟེ ཝེ་མ་ཏི་ཀཱ, ནི་སྶ་གྒི་ཡཾ པཱ་ཙི་ཏྟི་ཡཾ. ར་ཏྟཱ་ཏི་ཀྐ་ནྟེ ཨ་ན་ཏི་ཀྐ་ནྟ་ས་ཉྙཱ, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ན་དྷི་ཊྛི་ཏེ ཨ་དྷི་ཊྛི་ཏ་ས་ཉྙཱ, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཝི་ཀ་པྤི་ཏེ ཝི་ཀ་པྤི་ཏ་ས་ཉྙཱ, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཝི་སྶ་ཛྫི་ཏེ ཝི་སྶ་ཛྫི་ཏ་ས་ཉྙཱ, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ན་ཊྛེ ན་ཊྛ་ས་ཉྙཱ… ཨ་ཝི་ན་ཊྛེ ཝི་ན་ཊྛ་ས་ཉྙཱ… ཨ་བྷི་ནྣེ བྷི་ནྣ་ས་ཉྙཱ… ཨ་ཝི་ལུ་ཏྟེ ཝི་ལུ་ཏྟ་ས་ཉྙཱ, ནི་སྶ་གྒི་ཡཾ པཱ་ཙི་ཏྟི་ཡཾ.
ནི་སྶ་གྒི་ཡཾ པ་ཏྟཾ ཨ་ནི་སྶ་ཛྫི་ཏྭཱ པ་རི་བྷུ་ཉྫ་ཏི, ཨཱ་པ་ཏྟི དུ་ཀྐ་ཊ་སྶ. ར་ཏྟཱ་ན་ཏི་ཀྐ་ནྟེ ཨ་ཏི་ཀྐ་ནྟ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ར་ཏྟཱ་ན་ཏི་ཀྐ་ནྟེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ར་ཏྟཱ་ན་ཏི་ཀྐ་ནྟེ ཨ་ན་ཏི་ཀྐ་ནྟ་ས་ཉྙཱ ཨ་ནཱ་པ་ཏྟི.
༧༣༧. ཨ་ནཱ་པ་ཏྟི ཨ་ནྟོ་ཨ་རུ་ཎེ ཨ་དྷི་ཊྛེ་ཏི, ཝི་ཀ་པྤེ་ཏི, ཝི་སྶ་ཛྫེ་ཏི, ན་སྶ་ཏི, ཝི་ན་སྶ་ཏི, བྷི་ཛྫ་ཏི, ཨ་ཙྪི་ནྡི་ཏྭཱ ག་ཎྷ་ནྟི, ཝི་སྶཱ་སཾ ག་ཎྷ་ནྟི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑུ་ནི་ཡོ ནི་སྶ་ཊྛ་པ་ཏྟཾ ན དེ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ནི་སྶ་ཊྛ་པ་ཏྟོ ན དཱ་ཏ་བྦོ. ཡཱ ན ད་དེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.
པ་ཋ་མ་སི་ཀྑཱ་པ་དཾ ནི་ཊྛི་ཏཾ.