༡༠. ད་ས་མ་སི་ཀྑཱ་པ་དཾ
༧༧༨. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཐུ་ལླ་ན་ནྡཱ བྷི་ཀྑུ་ནཱི བ་ཧུ་སྶུ་ཏཱ ཧོ་ཏི བྷཱ་ཎི་ཀཱ ཝི་སཱ་ར་དཱ པ་ཊྚཱ དྷ་མྨིཾ ཀ་ཐཾ ཀཱ་ཏུཾ. བ་ཧཱུ མ་ནུ་སྶཱ ཐུ་ལླ་ན་ནྡཾ བྷི་ཀྑུ་ནིཾ པ་ཡི་རུ་པཱ་ས་ནྟི. ཏེ་ན ཁོ པ་ན ས་མ་ཡེ་ན ཐུ་ལླ་ན་ནྡཱ་ཡ བྷི་ཀྑུ་ནི་ཡཱ པ་རི་ཝེ་ཎཾ ཨུ་ནྡྲི་ཡ་ཏི [ཨུ་དྲཱི་ཡ་ཏི (སྱཱ.)]. མ་ནུ་སྶཱ ཐུ་ལླ་ན་ནྡཾ བྷི་ཀྑུ་ནིཾ ཨེ་ཏ་ད་ཝོ་ཙུཾ – ‘‘ཀི་སྶི་དཾ ཏེ, ཨ་ཡྻེ, པ་རི་ཝེ་ཎཾ ཨུ་ནྡྲི་ཡ་ཏཱི’’ཏི? ‘‘ན་ཏྠཱ་ཝུ་སོ, དཱ་ཡ་ཀཱ, ན་ཏྠི ཀཱ་ར་ཀཱ’’ཏི. ཨ་ཐ ཁོ ཏེ མ་ནུ་སྶཱ ཐུ་ལླ་ན་ནྡཱ་ཡ བྷི་ཀྑུ་ནི་ཡཱ པ་རི་ཝེ་ཎ་ཏྠཱ་ཡ ཚ་ནྡ་ཀཾ ས་ངྒྷ་རི་ཏྭཱ ཐུ་ལླ་ན་ནྡཱ་ཡ བྷི་ཀྑུ་ནི་ཡཱ པ་རི་ཀྑཱ་རཾ ཨ་དཾ་སུ. ཐུ་ལླ་ན་ནྡཱ བྷི་ཀྑུ་ནཱི ཏེ་ན ཙ པ་རི་ཀྑཱ་རེ་ན ས་ཡ་མྤི ཡཱ་ཙི་ཏྭཱ བྷེ་ས་ཛྫཾ ཙེ་ཏཱ་པེ་ཏྭཱ པ་རི་བྷུ་ཉྫི. མ་ནུ་སྶཱ ཛཱ་ནི་ཏྭཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ ཨ་ཉྙ་ད་ཏྠི་ཀེ་ན པ་རི་ཀྑཱ་རེ་ན ཨ་ཉྙུ་དྡི་སི་ཀེ་ན པུ་གྒ་ལི་ཀེ་ན ས་ཉྙཱ་ཙི་ཀེ་ན ཨ་ཉྙཾ ཙེ་ཏཱ་པེ་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ཨ་ཉྙ་ད་ཏྠི་ཀེ་ན པ་རི་ཀྑཱ་རེ་ན ཨ་ཉྙུ་དྡི་སི་ཀེ་ན པུ་གྒ་ལི་ཀེ་ན ས་ཉྙཱ་ཙི་ཀེ་ན ཨ་ཉྙཾ ཙེ་ཏཱ་པེ་ཏཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ཨ་ཉྙ་ད་ཏྠི་ཀེ་ན པ་རི་ཀྑཱ་རེ་ན ཨ་ཉྙུ་དྡི་སི་ཀེ་ན པུ་གྒ་ལི་ཀེ་ན ས་ཉྙཱ་ཙི་ཀེ་ན ཨ་ཉྙཾ ཙེ་ཏཱ་པེ་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༧༧༩. ‘‘ཡཱ པ་ན བྷི་ཀྑུ་ནཱི ཨ་ཉྙ་ད་ཏྠི་ཀེ་ན པ་རི་ཀྑཱ་རེ་ན ཨ་ཉྙུ་དྡི་སི་ཀེ་ན པུ་གྒ་ལི་ཀེ་ན ས་ཉྙཱ་ཙི་ཀེ་ན ཨ་ཉྙཾ ཙེ་ཏཱ་པེ་ཡྻ, ནི་སྶ་གྒི་ཡཾ པཱ་ཙི་ཏྟི་ཡ’’ནྟི.
༧༨༠. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱི་ཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨ་ཉྙ་ད་ཏྠི་ཀེ་ན པ་རི་ཀྑཱ་རེ་ན ཨ་ཉྙུ་དྡི་སི་ཀེ་ནཱཏི ཨ་ཉྙ་སྶ་ཏྠཱ་ཡ དི་ནྣེ་ན.
པུ་གྒ་ལི་ཀེ་ནཱཏི ཨེ་ཀཱ་ཡ བྷི་ཀྑུ་ནི་ཡཱ, ན ས་ངྒྷ་སྶ, ན ག་ཎ་སྶ.
ས་ཉྙཱ་ཙི་ཀེ་ནཱཏི ས་ཡཾ ཡཱ་ཙི་ཏྭཱ.
ཨ་ཉྙཾ ཙེ་ཏཱ་པེ་ཡྻཱཏི ཡཾ་ཨ་ཏྠཱ་ཡ དི་ནྣཾ ཏཾ ཋ་པེ་ཏྭཱ ཨ་ཉྙཾ ཙེ་ཏཱ་པེ་ཏི, པ་ཡོ་གེ དུ་ཀྐ་ཊཾ. པ་ཊི་ལཱ་བྷེ་ན ནི་སྶ་གྒི་ཡཾ ཧོ་ཏི. ནི་སྶ་ཛྫི་ཏ་བྦཾ ས་ངྒྷ་སྶ ཝཱ ག་ཎ་སྶ ཝཱ ཨེ་ཀ་བྷི་ཀྑུ་ནི་ཡཱ ཝཱ. ཨེ་ཝ་ཉྩ པ་ན, བྷི་ཀྑ་ཝེ, ནི་སྶ་ཛྫི་ཏ་བྦཾ…པེ… ‘‘ཨི་དཾ མེ, ཨ་ཡྻེ, ཨ་ཉྙ་ད་ཏྠི་ཀེ་ན པ་རི་ཀྑཱ་རེ་ན ཨ་ཉྙུ་དྡི་སི་ཀེ་ན པུ་གྒ་ལི་ཀེ་ན ས་ཉྙཱ་ཙི་ཀེ་ན ཨ་ཉྙཾ ཙེ་ཏཱ་པི་ཏཾ ནི་སྶ་གྒི་ཡཾ, ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མཱི’’ཏི…པེ… ད་དེ་ཡྻཱ་ཏི…པེ… ད་དེ་ཡྻུ་ནྟི…པེ… ཨ་ཡྻཱ་ཡ ད་མྨཱི་ཏི.
༧༨༡. ཨ་ཉྙ་ད་ཏྠི་ཀེ ཨ་ཉྙ་ད་ཏྠི་ཀ་ས་ཉྙཱ ཨ་ཉྙཾ ཙེ་ཏཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཉྙ་ད་ཏྠི་ཀེ ཝེ་མ་ཏི་ཀཱ ཨ་ཉྙཾ ཙེ་ཏཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཉྙ་ད་ཏྠི་ཀེ ཨ་ན་ཉྙ་ད་ཏྠི་ཀ་ས་ཉྙཱ ཨ་ཉྙཾ ཙེ་ཏཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. ནི་སྶ་ཊྛཾ པ་ཊི་ལ་བྷི་ཏྭཱ ཡ་ཐཱ་དཱ་ནེ ཨུ་པ་ནེ་ཏ་བྦཾ.
ཨ་ན་ཉྙ་ད་ཏྠི་ཀེ ཨ་ཉྙ་ད་ཏྠི་ཀ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨ་ན་ཉྙ་ད་ཏྠི་ཀེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨ་ན་ཉྙ་ད་ཏྠི་ཀེ ཨ་ན་ཉྙ་ད་ཏྠི་ཀ་ས་ཉྙཱ, ཨ་ནཱ་པ་ཏྟི.
༧༨༢. ཨ་ནཱ་པ་ཏྟི སེ་ས་ཀཾ ཨུ་པ་ནེ་ཏི, སཱ་མི་ཀེ ཨ་པ་ལོ་ཀེ་ཏྭཱ ཨུ་པ་ནེ་ཏི, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ད་ས་མ་སི་ཀྑཱ་པ་དཾ ནི་ཊྛི་ཏཾ.