༣. ཏ་ཏི་ཡ་ས་ངྒྷཱ་དི་སེ་ས་སི་ཀྑཱ་པ་དཾ
༦༨༧. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷ་དྡཱ་ཡ ཀཱ་པི་ལཱ་ནི་ཡཱ ཨ་ནྟེ་ཝཱ་སི་ནཱི བྷི་ཀྑུ་ནཱི བྷི་ཀྑུ་ནཱི་ཧི ས་དྡྷིཾ བྷ་ཎྜི་ཏྭཱ གཱ་མ་ཀཾ [གཱ་མ་ཀེ (སྱཱ.)] ཉཱ་ཏི་ཀུ་ལཾ ཨ་ག་མཱ་སི. བྷ་དྡཱ ཀཱ་པི་ལཱ་ནཱི ཏཾ བྷི་ཀྑུ་ནིཾ ཨ་པ་སྶ་ནྟཱི བྷི་ཀྑུ་ནི་ཡོ པུ་ཙྪི – ‘‘ཀ་ཧཾ ཨི་ཏྠ་ནྣཱ་མཱ, ན དི་སྶ་ཏཱི’’ཏི! ‘‘བྷི་ཀྑུ་ནཱི་ཧི ས་དྡྷིཾ, ཨ་ཡྻེ, བྷ་ཎྜི་ཏྭཱ ན དི་སྶ་ཏཱི’’ཏི. ‘‘ཨ་མྨཱ, ཨ་མུ་ཀ་སྨིཾ གཱ་མ་ཀེ ཨེ་ཏི་སྶཱ ཉཱ་ཏི་ཀུ་ལཾ. ཏ་ཏྠ ག་ནྟྭཱ ཝི་ཙི་ན་ཐཱ’’ཏི. བྷི་ཀྑུ་ནི་ཡོ ཏ་ཏྠ ག་ནྟྭཱ ཏཾ བྷི་ཀྑུ་ནིཾ པ་སྶི་ཏྭཱ ཨེ་ཏ་ད་ཝོ་ཙུཾ – ‘‘ཀི་སྶ ཏྭཾ, ཨ་ཡྻེ, ཨེ་ཀི་ཀཱ ཨཱ་ག་ཏཱ, ཀ་ཙྩི་སི ཨ་པྤ་དྷཾ་སི་ཏཱ’’ཏི? ‘‘ཨ་པྤ་དྷཾ་སི་ཏཱ་མྷི, ཨ་ཡྻེ’’ཏི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནཱི ཨེ་ཀཱ གཱ་མ་ནྟ་རཾ ག་ཙྪི་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནཱི ཨེ་ཀཱ གཱ་མ་ནྟ་རཾ ག་ཙྪ་ཏཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནཱི ཨེ་ཀཱ གཱ་མ་ནྟ་རཾ ག་ཙྪི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
‘‘ཡཱ པ་ན བྷི་ཀྑུ་ནཱི ཨེ་ཀཱ གཱ་མ་ནྟ་རཾ ག་ཙྪེ་ཡྻ, ཨ་ཡ་མྤི བྷི་ཀྑུ་ནཱི པ་ཋ་མཱ་པ་ཏྟི་ཀཾ དྷ་མྨཾ ཨཱ་པ་ནྣཱ ནི་སྶཱ་ར་ཎཱི་ཡཾ ས་ངྒྷཱ་དི་སེ་ས’’ནྟི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑུ་ནཱི་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༦༨༨. ཏེ་ན ཁོ པ་ན ས་མ་ཡེ་ན དྭེ བྷི་ཀྑུ་ནི་ཡོ སཱ་ཀེ་ཏཱ སཱ་ཝ་ཏྠིཾ ཨ་དྡྷཱ་ན་མ་གྒ་པྤ་ཊི་པ་ནྣཱ ཧོ་ནྟི. ཨ་ནྟ་རཱ་མ་གྒེ ན་དཱི ཏ་རི་ཏ་བྦཱ ཧོ་ཏི. ཨ་ཐ ཁོ ཏཱ བྷི་ཀྑུ་ནི་ཡོ ནཱ་ཝི་ཀེ ཨུ་པ་ས་ངྐ་མི་ཏྭཱ ཨེ་ཏ་ད་ཝོ་ཙུཾ – ‘‘སཱ་དྷུ ནོ, ཨཱ་ཝུ་སོ, ཏཱ་རེ་ཐཱ’’ཏི. ‘‘ནཱ་ཡྻེ, ས་ཀྐཱ ཨུ་བྷོ ས་ཀིཾ ཏཱ་རེ་ཏུ’’ནྟི. ཨེ་ཀོ ཨེ་ཀཾ ཨུ་ཏྟཱ་རེ་སི. ཨུ་ཏྟི་ཎྞོ ཨུ་ཏྟི་ཎྞཾ དཱུ་སེ་སི. ཨ་ནུ་ཏྟི་ཎྞོ ཨ་ནུ་ཏྟི་ཎྞཾ དཱུ་སེ་སི. ཏཱ པ་ཙྪཱ ས་མཱ་ག་ནྟྭཱ པུ་ཙྪིཾ་སུ – ‘‘ཀ་ཙྩི་སི, ཨ་ཡྻེ, ཨ་པྤ་དྷཾ་སི་ཏཱ’’ཏི? ‘‘པ་དྷཾ་སི་ཏཱ་མྷི, ཨ་ཡྻེ! ཏྭཾ པ་ན, ཨ་ཡྻེ, ཨ་པྤ་དྷཾ་སི་ཏཱ’’ཏི? ‘‘པ་དྷཾ་སི་ཏཱ་མྷི, ཨ་ཡྻེ’’ཏི. ཨ་ཐ ཁོ ཏཱ བྷི་ཀྑུ་ནི་ཡོ སཱ་ཝ་ཏྠིཾ ག་ནྟྭཱ བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནཱི ཨེ་ཀཱ ན་དཱི་པཱ་རཾ ག་ཙྪི་སྶ་ཏཱི’’ཏི! ཨ་ཐ ཁོ ཏཱ བྷི་ཀྑུ་ནི་ཡོ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནཱི ཨེ་ཀཱ ན་དཱི་པཱ་རཾ ག་ཙྪ་ཏཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནཱི ཨེ་ཀཱ ན་དཱི་པཱ་རཾ ག་ཙྪི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
‘‘ཡཱ པ་ན བྷི་ཀྑུ་ནཱི ཨེ་ཀཱ ཝཱ གཱ་མ་ནྟ་རཾ ག་ཙྪེ་ཡྻ, ཨེ་ཀཱ ཝཱ ན་དཱི་པཱ་རཾ ག་ཙྪེ་ཡྻ, ཨ་ཡ་མྤི བྷི་ཀྑུ་ནཱི པ་ཋ་མཱ་པ་ཏྟི་ཀཾ དྷ་མྨཾ ཨཱ་པ་ནྣཱ ནི་སྶཱ་ར་ཎཱི་ཡཾ ས་ངྒྷཱ་དི་སེ་ས’’ནྟི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑུ་ནཱི་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༦༨༩. ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ བྷི་ཀྑུ་ནི་ཡོ ཀོ་ས་ལེ་སུ ཛ་ན་པ་དེ སཱ་ཝ་ཏྠིཾ ག་ཙྪ་ནྟཱ [ག་ནྟྭཱ (ཀ.)] སཱ་ཡཾ ཨ་ཉྙ་ཏ་རཾ གཱ་མཾ ཨུ་པ་ག་ཙྪིཾ་སུ. ཏ་ཏྠ ཨ་ཉྙ་ཏ་རཱ བྷི་ཀྑུ་ནཱི ཨ་བྷི་རཱུ་པཱ ཧོ་ཏི ད་སྶ་ནཱི་ཡཱ པཱ་སཱ་དི་ཀཱ. ཨ་ཉྙ་ཏ་རོ པུ་རི་སོ ཏ་སྶཱ བྷི་ཀྑུ་ནི་ཡཱ ས་ཧ ད་སྶ་ནེ་ན པ་ཊི་བ་དྡྷ་ཙི་ཏྟོ ཧོ་ཏི. ཨ་ཐ ཁོ སོ པུ་རི་སོ ཏཱ་སཾ བྷི་ཀྑུ་ནཱི་ནཾ སེ་ཡྻཾ པ་ཉྙ་པེ་ནྟོ ཏ་སྶཱ བྷི་ཀྑུ་ནི་ཡཱ སེ་ཡྻཾ ཨེ་ཀ་མ་ནྟཾ པ་ཉྙཱ་པེ་སི. ཨ་ཐ ཁོ སཱ བྷི་ཀྑུ་ནཱི ས་ལླ་ཀྑེ་ཏྭཱ – ‘‘པ་རི་ཡུ་ཊྛི་ཏོ ཨ་ཡཾ པུ་རི་སོ; ས་ཙེ ར་ཏྟིཾ ཨཱ་ག་ཙྪི་སྶ་ཏི, ཝི་སྶ་རོ མེ བྷ་ཝི་སྶ་ཏཱི’’ཏི, བྷི་ཀྑུ་ནི་ཡོ ཨ་ནཱ་པུ་ཙྪཱ ཨ་ཉྙ་ཏ་རཾ ཀུ་ལཾ ག་ནྟྭཱ སེ་ཡྻཾ ཀ་པྤེ་སི. ཨ་ཐ ཁོ སོ པུ་རི་སོ ར་ཏྟིཾ ཨཱ་ག་ནྟྭཱ ཏཾ བྷི་ཀྑུ་ནིཾ ག་ཝེ་ས་ནྟོ བྷི་ཀྑུ་ནི་ཡོ གྷ་ཊྚེ་སི. བྷི་ཀྑུ་ནི་ཡོ ཏཾ བྷི་ཀྑུ་ནིཾ ཨ་པ་སྶ་ནྟི་ཡོ ཨེ་ཝ་མཱ་ཧཾ་སུ – ‘‘ནི་སྶཾ་ས་ཡཾ ཁོ སཱ བྷི་ཀྑུ་ནཱི པུ་རི་སེ་ན ས་དྡྷིཾ ནི་ཀྑ་ནྟཱ’’ཏི.
ཨ་ཐ ཁོ སཱ བྷི་ཀྑུ་ནཱི ཏ་སྶཱ ར་ཏྟི་ཡཱ ཨ་ཙྩ་ཡེ་ན ཡེ་ན ཏཱ བྷི་ཀྑུ་ནི་ཡོ ཏེ་ནུ་པ་ས་ངྐ་མི. བྷི་ཀྑུ་ནི་ཡོ ཏཾ བྷི་ཀྑུ་ནིཾ ཨེ་ཏ་ད་ཝོ་ཙུཾ – ‘‘ཀི་སྶ ཏྭཾ, ཨ་ཡྻེ, པུ་རི་སེ་ན ས་དྡྷིཾ ནི་ཀྑ་ནྟཱ’’ཏི? ‘‘ནཱ་ཧཾ, ཨ་ཡྻེ, པུ་རི་སེ་ན ས་དྡྷིཾ ནི་ཀྑ་ནྟཱ’’ཏི. བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནཱི ཨེ་ཀཱ ར་ཏྟིཾ ཝི་པྤ་ཝ་སི་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནཱི ཨེ་ཀཱ ར་ཏྟིཾ ཝི་པྤ་ཝ་སཱི་ཏི [ཝི་པྤ་ཝ་སཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནཱི ཨེ་ཀཱ ར་ཏྟིཾ ཝི་པྤ་ཝ་སི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
‘‘ཡཱ པ་ན བྷི་ཀྑུ་ནཱི ཨེ་ཀཱ ཝཱ གཱ་མ་ནྟ་རཾ ག་ཙྪེ་ཡྻ, ཨེ་ཀཱ ཝཱ ན་དཱི་པཱ་རཾ ག་ཙྪེ་ཡྻ, ཨེ་ཀཱ ཝཱ ར་ཏྟིཾ ཝི་པྤ་ཝ་སེ་ཡྻ, ཨ་ཡ་མྤི བྷི་ཀྑུ་ནཱི པ་ཋ་མཱ་པ་ཏྟི་ཀཾ དྷ་མྨཾ ཨཱ་པ་ནྣཱ ནི་སྶཱ་ར་ཎཱི་ཡཾ ས་ངྒྷཱ་དི་སེ་ས’’ནྟི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑུ་ནཱི་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༦༩༠. ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ བྷི་ཀྑུ་ནི་ཡོ ཀོ་ས་ལེ་སུ ཛ་ན་པ་དེ སཱ་ཝ་ཏྠིཾ ཨ་དྡྷཱ་ན་མ་གྒ་པྤ་ཊི་པ་ནྣཱ ཧོ་ནྟི. ཏ་ཏྠ ཨ་ཉྙ་ཏ་རཱ བྷི་ཀྑུ་ནཱི ཝ་ཙྩེ་ན པཱི་ལི༹་ཏཱ ཨེ་ཀི་ཀཱ ཨོ་ཧཱི་ཡི་ཏྭཱ [ཨོ་ཧི་ཡི་ཏྭཱ (ཀ.)] པ་ཙྪཱ ཨ་ག་མཱ་སི. མ་ནུ་སྶཱ ཏཾ བྷི་ཀྑུ་ནིཾ པ་སྶི་ཏྭཱ དཱུ་སེ་སུཾ. ཨ་ཐ ཁོ སཱ བྷི་ཀྑུ་ནཱི ཡེ་ན ཏཱ བྷི་ཀྑུ་ནི་ཡོ ཏེ་ནུ་པ་ས་ངྐ་མི. བྷི་ཀྑུ་ནི་ཡོ ཏཾ བྷི་ཀྑུ་ནིཾ ཨེ་ཏ་ད་ཝོ་ཙུཾ – ‘‘ཀི་སྶ ཏྭཾ, ཨ་ཡྻེ, ཨེ་ཀི་ཀཱ ཨོ་ཧཱི་ནཱ, ཀ་ཙྩི་སི ཨ་པྤ་དྷཾ་སི་ཏཱ’’ཏི? ‘‘པ་དྷཾ་སི་ཏཱ་མྷི, ཨ་ཡྻེ’’ཏི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ཀ་ཐ་ཉྷི ནཱ་མ བྷི་ཀྑུ་ནཱི ཨེ་ཀཱ ག་ཎ་མྷཱ ཨོ་ཧཱི་ཡི་སྶ་ཏཱི་ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནཱི ཨེ་ཀཱ ག་ཎ་མྷཱ ཨོ་ཧཱི་ཡ་ཏཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནཱི ཨེ་ཀཱ ག་ཎ་མྷཱ ཨོ་ཧཱི་ཡི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༦༩༡. ‘‘ཡཱ པ་ན བྷི་ཀྑུ་ནཱི ཨེ་ཀཱ ཝཱ གཱ་མ་ནྟ་རཾ ག་ཙྪེ་ཡྻ, ཨེ་ཀཱ ཝཱ ན་དཱི་པཱ་རཾ ག་ཙྪེ་ཡྻ, ཨེ་ཀཱ ཝཱ ར་ཏྟིཾ ཝི་པྤ་ཝ་སེ་ཡྻ, ཨེ་ཀཱ ཝཱ ག་ཎ་མྷཱ ཨོ་ཧཱི་ཡེ་ཡྻ, ཨ་ཡ་མྤི བྷི་ཀྑུ་ནཱི པ་ཋ་མཱ་པ་ཏྟི་ཀཾ དྷ་མྨཾ ཨཱ་པ་ནྣཱ ནི་སྶཱ་ར་ཎཱི་ཡཾ ས་ངྒྷཱ་དི་སེ་ས’’ནྟི.
༦༩༢. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨེ་ཀཱ ཝཱ གཱ་མ་ནྟ་རཾ ག་ཙྪེ་ཡྻཱཏི པ་རི་ཀྑི་ཏྟ་སྶ གཱ་མ་སྶ པ་རི་ཀྑེ་པཾ པ་ཋ་མཾ པཱ་དཾ ཨ་ཏི་ཀྐཱ་མེ་ནྟི་ཡཱ ཨཱ་པ་ཏྟི ཐུ་ལླ་ཙྩ་ཡ་སྶ, དུ་ཏི་ཡཾ པཱ་དཾ ཨ་ཏི་ཀྐཱ་མེ་ནྟི་ཡཱ ཨཱ་པ་ཏྟི ས་ངྒྷཱ་དི་སེ་ས་སྶ.
ཨ་པ་རི་ཀྑི་ཏྟ་སྶ གཱ་མ་སྶ ཨུ་པ་ཙཱ་རཾ པ་ཋ་མཾ པཱ་དཾ ཨ་ཏི་ཀྐཱ་མེ་ནྟི་ཡཱ ཨཱ་པ་ཏྟི ཐུ་ལླ་ཙྩ་ཡ་སྶ. དུ་ཏི་ཡཾ པཱ་དཾ ཨ་ཏི་ཀྐཱ་མེ་ནྟི་ཡཱ ཨཱ་པ་ཏྟི ས་ངྒྷཱ་དི་སེ་ས་སྶ.
ཨེ་ཀཱ ཝཱ ན་དཱི་པཱ་རཾ ག་ཙྪེ་ཡྻཱཏི ན་དཱི ནཱ་མ ཏི་མ་ཎྜ་ལཾ པ་ཊི་ཙྪཱ་དེ་ཏྭཱ ཡ་ཏྠ ཀ་ཏྠ་ཙི ཨུ་ཏྟ་ར་ནྟི་ཡཱ བྷི་ཀྑུ་ནི་ཡཱ ཨ་ནྟ་ར་ཝཱ་ས་ཀོ ཏེ་མི་ཡ་ཏི. པ་ཋ་མཾ པཱ་དཾ ཨུ་ཏྟ་ར་ནྟི་ཡཱ ཨཱ་པ་ཏྟི ཐུ་ལླ་ཙྩ་ཡ་སྶ. དུ་ཏི་ཡཾ པཱ་དཾ ཨུ་ཏྟ་ར་ནྟི་ཡཱ ཨཱ་པ་ཏྟི ས་ངྒྷཱ་དི་སེ་ས་སྶ.
ཨེ་ཀཱ ཝཱ ར་ཏྟིཾ ཝི་པྤ་ཝ་སེ་ཡྻཱཏི ས་ཧ ཨ་རུ་ཎུ་གྒ་མ་ནཱ དུ་ཏི་ཡི་ཀཱ་ཡ བྷི་ཀྑུ་ནི་ཡཱ ཧ་ཏྠ་པཱ་སཾ ཝི་ཛ་ཧ་ནྟི་ཡཱ ཨཱ་པ་ཏྟི ཐུ་ལླ་ཙྩ་ཡ་སྶ. ཝི་ཛ་ཧི་ཏེ ཨཱ་པ་ཏྟི ས་ངྒྷཱ་དི་སེ་ས་སྶ.
ཨེ་ཀཱ ཝཱ ག་ཎ་མྷཱ ཨོ་ཧཱི་ཡེ་ཡྻཱཏི ཨ་གཱ་མ་ཀེ ཨ་ར་ཉྙེ དུ་ཏི་ཡི་ཀཱ་ཡ བྷི་ཀྑུ་ནི་ཡཱ ད་སྶ་ནཱུ་པ་ཙཱ་རཾ ཝཱ ས་ཝ་ནཱུ་པ་ཙཱ་རཾ ཝཱ ཝི་ཛ་ཧ་ནྟི་ཡཱ ཨཱ་པ་ཏྟི ཐུ་ལླ་ཙྩ་ཡ་སྶ. ཝི་ཛ་ཧི་ཏེ ཨཱ་པ་ཏྟི ས་ངྒྷཱ་དི་སེ་ས་སྶ.
ཨ་ཡ་མྤཱིཏི པུ་རི་མཱ་ཡོ ཨུ་པཱ་དཱ་ཡ ཝུ་ཙྩ་ཏི.
པ་ཋ་མཱ་པ་ཏྟི་ཀནྟི ས་ཧ ཝ་ཏྠུ་ཛ྄ཛྷཱ་ཙཱ་རཱ ཨཱ་པ་ཛྫ་ཏི ཨ་ས་མ་ནུ་བྷཱ་ས་ནཱ་ཡ.
ནི་སྶཱ་ར་ཎཱི་ཡནྟི ས་ངྒྷ་མྷཱ ནི་སྶཱ་རཱི་ཡ་ཏི.
ས་ངྒྷཱ་དི་སེ་སོཏི…པེ… ཏེ་ན་པི ཝུ་ཙྩ་ཏི ས་ངྒྷཱ་དི་སེ་སོ་ཏི.
༦༩༣. ཨ་ནཱ་པ་ཏྟི དུ་ཏི་ཡི་ཀཱ བྷི་ཀྑུ་ནཱི པ་ཀྐ་ནྟཱ ཝཱ ཧོ་ཏི ཝི་བྦྷ་ནྟཱ ཝཱ ཀཱ་ལ་ངྐ་ཏཱ ཝཱ པ་ཀྑ་ས་ངྐ་ནྟཱ ཝཱ, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཏ་ཏི་ཡ་ས་ངྒྷཱ་དི་སེ་ས་སི་ཀྑཱ་པ་དཾ ནི་ཊྛི་ཏཾ.