༡. པ་ཋ་མ་པཱ་རཱ་ཛི་ཀཾ

༦༥༦. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན སཱ་ལ༹ྷོ མི་གཱ་ར་ན་ཏྟཱ བྷི་ཀྑུ་ནི་ས་ངྒྷ་སྶ ཝི་ཧཱ་རཾ ཀ་ཏྟུ་ཀཱ་མོ ཧོ་ཏི. ཨ་ཐ ཁོ སཱ་ལ༹ྷོ མི་གཱ་ར་ན་ཏྟཱ བྷི་ཀྑུ་ནི་ཡོ ཨུ་པ་ས་ངྐ་མི་ཏྭཱ ཨེ་ཏ་ད་ཝོ་ཙ – ‘‘ཨི་ཙྪཱ་མ་ཧཾ, ཨ་ཡྻེ, བྷི་ཀྑུ་ནི་ས་ངྒྷ་སྶ ཝི་ཧཱ་རཾ ཀཱ་ཏུཾ. དེ་ཐ མེ ན་ཝ་ཀ་མྨི་ཀཾ བྷི་ཀྑུ་ནི’’ནྟི. ཏེ་ན ཁོ པ་ན ས་མ་ཡེ་ན ཙ་ཏ་སྶོ བྷ་གི་ནི་ཡོ བྷི་ཀྑུ་ནཱི་སུ པ་བྦ་ཛི་ཏཱ ཧོ་ནྟི – ན་ནྡཱ, ན་ནྡ་ཝ་ཏཱི, སུ་ནྡ་རཱི་ན་ནྡཱ, ཐུ་ལླ་ན་ནྡཱ་ཏི. ཏཱ་སུ སུ་ནྡ་རཱི་ན་ནྡཱ བྷི་ཀྑུ་ནཱི ཏ་རུ་ཎ་པ་བྦ་ཛི་ཏཱ ཨ་བྷི་རཱུ་པཱ ཧོ་ཏི ད་སྶ་ནཱི་ཡཱ པཱ་སཱ་དི་ཀཱ པ་ཎྜི་ཏཱ བྱ་ཏྟཱ མེ་དྷཱ་ཝི་ནཱི ད་ཀྑཱ ཨ་ན་ལ་སཱ, ཏ་ཏྲུ་པཱ་ཡཱ་ཡ ཝཱི་མཾ་སཱ་ཡ ས་མ་ནྣཱ་ག་ཏཱ, ཨ་ལཾ ཀཱ་ཏུཾ ཨ་ལཾ སཾ་ཝི་དྷཱ་ཏུཾ. ཨ་ཐ ཁོ བྷི་ཀྑུ་ནི་ས་ངྒྷོ སུ་ནྡ་རཱི་ན་ནྡཾ བྷི་ཀྑུ་ནིཾ ས་མྨ་ནྣི་ཏྭཱ སཱ་ལ༹ྷ་སྶ མི་གཱ་ར་ན་ཏྟུ་ནོ ན་ཝ་ཀ་མྨི་ཀཾ ཨ་དཱ་སི. ཏེ་ན ཁོ པ་ན ས་མ་ཡེ་ན སུ་ནྡ་རཱི་ན་ནྡཱ བྷི་ཀྑུ་ནཱི སཱ་ལ༹ྷ་སྶ མི་གཱ་ར་ན་ཏྟུ་ནོ ནི་ཝེ་ས་ནཾ ཨ་བྷི་ཀྑ་ཎཾ ག་ཙྪ་ཏི – ‘‘ཝཱ་སིཾ དེ་ཐ, པ་ར་སུཾ [ཕ་ར་སུཾ (སྱཱ. ཀ.)] དེ་ཐ, ཀུ་ཋཱ་རིཾ [ཀུ་དྷཱ་རིཾ (ཀ.)] དེ་ཐ, ཀུ་དྡཱ་ལཾ དེ་ཐ, ནི་ཁཱ་ད་ནཾ དེ་ཐཱ’’ཏི. སཱ་ལ༹ྷོ་པི མི་གཱ་ར་ན་ཏྟཱ བྷི་ཀྑུ་ནུ་པ་སྶ་ཡཾ ཨ་བྷི་ཀྑ་ཎཾ ག་ཙྪ་ཏི ཀ་ཏཱ་ཀ་ཏཾ ཛཱ་ནི་ཏུཾ. ཏེ ཨ་བྷི་ཎྷ་ད་སྶ་ནེ་ན པ་ཊི་བ་དྡྷ་ཙི་ཏྟཱ ཨ་ཧེ་སུཾ.

ཨ་ཐ ཁོ སཱ་ལ༹ྷོ མི་གཱ་ར་ན་ཏྟཱ སུ་ནྡ་རཱི་ན་ནྡཾ བྷི་ཀྑུ་ནིཾ དཱུ་སེ་ཏུཾ ཨོ་ཀཱ་སཾ ཨ་ལ་བྷ་མཱ་ནོ ཨེ་ཏ་དེ་ཝ་ཏྠཱ་ཡ བྷི་ཀྑུ་ནི་ས་ངྒྷ་སྶ བྷ་ཏྟཾ ཨ་ཀཱ་སི. ཨ་ཐ ཁོ སཱ་ལ༹ྷོ མི་གཱ་ར་ན་ཏྟཱ བྷ་ཏྟ་གྒེ ཨཱ་ས་ནཾ པ་ཉྙ་པེ་ནྟོ – ‘‘ཨེ་ཏྟ་ཀཱ བྷི་ཀྑུ་ནི་ཡོ ཨ་ཡྻཱ་ཡ སུ་ནྡ་རཱི་ན་ནྡཱ་ཡ ཝུ་ཌྜྷ་ཏ་རཱ’’ཏི ཨེ་ཀ་མ་ནྟཾ ཨཱ་ས་ནཾ པ་ཉྙ་པེ་སི ‘‘ཨེ་ཏྟ་ཀཱ ན་ཝ་ཀ་ཏ་རཱ’’ཏི – ཨེ་ཀ་མ་ནྟཾ ཨཱ་ས་ནཾ པ་ཉྙ་པེ་སི. པ་ཊི་ཙྪ་ནྣེ ཨོ་ཀཱ་སེ ནི་ཀཱུ་ཊེ སུ་ནྡ་རཱི་ན་ནྡཱ་ཡ བྷི་ཀྑུ་ནི་ཡཱ ཨཱ་ས་ནཾ པ་ཉྙ་པེ་སི, ཡ་ཐཱ ཐེ་རཱ བྷི་ཀྑུ་ནི་ཡོ ཛཱ་ནེ་ཡྻུཾ – ‘‘ན་ཝ་ཀཱ་ནཾ བྷི་ཀྑུ་ནཱི་ནཾ ས་ནྟི་ཀེ ནི་སི་ནྣཱ’’ཏི; ན་ཝ་ཀཱ་པི བྷི་ཀྑུ་ནི་ཡོ ཛཱ་ནེ་ཡྻུཾ – ‘‘ཐེ་རཱ་ནཾ བྷི་ཀྑུ་ནཱི་ནཾ ས་ནྟི་ཀེ ནི་སི་ནྣཱ’’ཏི. ཨ་ཐ ཁོ སཱ་ལ༹ྷོ མི་གཱ་ར་ན་ཏྟཱ བྷི་ཀྑུ་ནི་ས་ངྒྷ་སྶ ཀཱ་ལཾ ཨཱ་རོ་ཙཱ་པེ་སི – ‘‘ཀཱ་ལོ, ཨ་ཡྻེ, ནི་ཊྛི་ཏཾ བྷ་ཏྟ’’ནྟི. སུ་ནྡ་རཱི་ན་ནྡཱ བྷི་ཀྑུ་ནཱི ས་ལླ་ཀྑེ་ཏྭཱ – ‘‘ན བ་ཧུ་ཀ་ཏོ སཱ་ལ༹ྷོ མི་གཱ་ར་ན་ཏྟཱ བྷི་ཀྑུ་ནི་ས་ངྒྷ་སྶ བྷ་ཏྟཾ ཨ་ཀཱ་སི; མཾ སོ དཱུ་སེ་ཏུ་ཀཱ་མོ. ས་ཙཱ་ཧཾ ག་མི་སྶཱ་མི ཝི་སྶ་རོ མེ བྷ་ཝི་སྶ་ཏཱི’’ཏི, ཨ་ནྟེ་ཝཱ་སི་ནིཾ བྷི་ཀྑུ་ནིཾ ཨཱ་ཎཱ་པེ་སི – ‘‘ག་ཙྪ མེ པི་ཎྜ་པཱ་ཏཾ ནཱི་ཧ་ར. ཡོ ཙེ མཾ པུ་ཙྪ་ཏི, ‘གི་ལཱ་ནཱ’ཏི པ་ཊི་ཝེ་དེ་ཧཱི’’ཏི. ‘‘ཨེ་ཝཾ, ཨ་ཡྻེ’’ཏི ཁོ སཱ བྷི་ཀྑུ་ནཱི སུ་ནྡ་རཱི་ན་ནྡཱ་ཡ བྷི་ཀྑུ་ནི་ཡཱ པ་ཙྩ་སྶོ་སི.

ཏེ་ན ཁོ པ་ན ས་མ་ཡེ་ན སཱ་ལ༹ྷོ མི་གཱ་ར་ན་ཏྟཱ བ་ཧི་དྭཱ་ར་ཀོ་ཊྛ་ཀེ ཋི་ཏོ ཧོ་ཏི སུ་ནྡ་རཱི་ན་ནྡཾ བྷི་ཀྑུ་ནིཾ པ་ཊི་པུ་ཙྪ་ནྟོ – ‘‘ཀ་ཧཾ, ཨ་ཡྻེ, ཨ་ཡྻཱ སུ་ནྡ་རཱི་ན་ནྡཱ? ཀ་ཧཾ, ཨ་ཡྻེ, ཨ་ཡྻཱ སུ་ནྡ་རཱི་ན་ནྡཱ’’ཏི? ཨེ་ཝཾ ཝུ་ཏྟེ སུ་ནྡ་རཱི་ན་ནྡཱ་ཡ བྷི་ཀྑུ་ནི་ཡཱ ཨ་ནྟེ་ཝཱ་སི་ནཱི བྷི་ཀྑུ་ནཱི སཱ་ལ༹ྷཾ མི་གཱ་ར་ན་ཏྟཱ་རཾ ཨེ་ཏ་ད་ཝོ་ཙ – ‘‘གི་ལཱ་ནཱ་ཝུ་སོ; པི་ཎྜ་པཱ་ཏཾ ནཱི་ཧ་རི་སྶཱ་མཱི’’ཏི. ཨ་ཐ ཁོ སཱ་ལ༹ྷོ མི་གཱ་ར་ན་ཏྟཱ – ‘‘ཡ་མྤཱ་ཧཾ ཨ་ཏྠཱ་ཡ [ཡཾ་པཱ་ཧཾ (སྱཱ.)] བྷི་ཀྑུ་ནི་ས་ངྒྷ་སྶ བྷ་ཏྟཾ ཨ་ཀཱ་སིཾ ཨ་ཡྻཱ་ཡ སུ་ནྡ་རཱི་ན་ནྡཱ་ཡ ཀཱ་ར་ཎཱ’’ཏི མ་ནུ་སྶེ ཨཱ་ཎཱ་པེ་ཏྭཱ – ‘‘བྷི་ཀྑུ་ནི་ས་ངྒྷཾ བྷ་ཏྟེ་ན པ་རི་ཝི་ས་ཐཱ’’ཏི ཝ་ཏྭཱ ཡེ་ན བྷི་ཀྑུ་ནུ་པ་སྶ་ཡོ ཏེ་ནུ་པ་ས་ངྐ་མི. ཏེ་ན ཁོ པ་ན ས་མ་ཡེ་ན སུ་ནྡ་རཱི་ན་ནྡཱ བྷི་ཀྑུ་ནཱི བ་ཧཱ་རཱ་མ་ཀོ་ཊྛ་ཀེ ཋི་ཏཱ ཧོ་ཏི སཱ་ལ༹ྷཾ མི་གཱ་ར་ན་ཏྟཱ་རཾ པ་ཏི་མཱ་ནེ་ནྟཱི. ཨ་དྡ་སཱ ཁོ སུ་ནྡ་རཱི་ན་ནྡཱ བྷི་ཀྑུ་ནཱི སཱ་ལ༹ྷཾ མི་གཱ་ར་ན་ཏྟཱ་རཾ དཱུ་ར་ཏོ་ཝ ཨཱ་ག་ཙྪ་ནྟཾ. དི་སྭཱ་ན ཨུ་པ་སྶ་ཡཾ པ་ཝི་སི་ཏྭཱ ས་སཱི་སཾ པཱ་རུ་པི་ཏྭཱ མ་ཉྩ་ཀེ ནི་པ་ཛྫི. ཨ་ཐ ཁོ སཱ་ལ༹ྷོ མི་གཱ་ར་ན་ཏྟཱ ཡེ་ན སུ་ནྡ་རཱི་ན་ནྡཱ བྷི་ཀྑུ་ནཱི ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ སུ་ནྡ་རཱི་ན་ནྡཾ བྷི་ཀྑུ་ནིཾ ཨེ་ཏ་ད་ཝོ་ཙ – ‘‘ཀིཾ ཏེ, ཨ་ཡྻེ, ཨ་ཕཱ་སུ, ཀི་སྶ ནི་པ་ནྣཱ་སཱི’’ཏི? ‘‘ཨེ་ཝ་ཉྷེ་ཏཾ, ཨཱ་ཝུ་སོ, ཧོ་ཏི ཡཱ ཨ་ནི་ཙྪ་ནྟཾ ཨི་ཙྪ་ཏཱི’’ཏི. ‘‘ཀྱཱ་ཧཾ ཏཾ, ཨ་ཡྻེ, ན ཨི་ཙྪི་སྶཱ་མི? ཨ་པི ཙཱ་ཧཾ ཨོ་ཀཱ་སཾ ན ལ་བྷཱ་མི ཏཾ དཱུ་སེ་ཏུ’’ནྟི. ཨ་ཝ་སྶུ་ཏོ ཨ་ཝ་སྶུ་ཏཱ་ཡ སུ་ནྡ་རཱི་ན་ནྡཱ་ཡ བྷི་ཀྑུ་ནི་ཡཱ ཀཱ་ཡ་སཾ་ས་གྒཾ ས་མཱ་པ་ཛྫི.

ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ བྷི་ཀྑུ་ནཱི ཛ་རཱ་དུ་བྦ་ལཱ ཙ་ར་ཎ་གི་ལཱ་ནཱ སུ་ནྡ་རཱི་ན་ནྡཱ་ཡ བྷི་ཀྑུ་ནི་ཡཱ ཨ་ཝི་དཱུ་རེ ནི་པ་ནྣཱ ཧོ་ཏི. ཨ་དྡ་སཱ ཁོ སཱ བྷི་ཀྑུ་ནཱི སཱ་ལ༹ྷཾ མི་གཱ་ར་ན་ཏྟཱ་རཾ ཨ་ཝ་སྶུ་ཏཾ ཨ་ཝ་སྶུ་ཏཱ་ཡ སུ་ནྡ་རཱི་ན་ནྡཱ་ཡ བྷི་ཀྑུ་ནི་ཡཱ ཀཱ་ཡ་སཾ་ས་གྒཾ ས་མཱ་པ་ཛྫ་ནྟཾ. དི་སྭཱ་ན ཨུ་ཛ྄ཛྷཱ་ཡ་ཏི ཁི་ཡྻ་ཏི ཝི་པཱ་ཙེ་ཏི – ‘‘ཀ་ཐ་ཉྷི ནཱ་མ ཨ་ཡྻཱ སུ་ནྡ་རཱི་ན་ནྡཱ ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཀཱ་ཡ་སཾ་ས་གྒཾ སཱ་དི་ཡི་སྶ་ཏཱི’’ཏི! ཨ་ཐ ཁོ སཱ བྷི་ཀྑུ་ནཱི བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ ས་ནྟུ་ཊྛཱ ལ་ཛྫི་ནི་ཡོ ཀུ་ཀྐུ་ཙྩི་ཀཱ སི་ཀྑཱ་ཀཱ་མཱ ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ སུ་ནྡ་རཱི་ན་ནྡཱ ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཀཱ་ཡ་སཾ་ས་གྒཾ སཱ་དི་ཡི་སྶ་ཏཱི’’ཏི! ཨ་ཐ ཁོ ཏཱ བྷི་ཀྑུ་ནི་ཡོ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. ཡེ ཏེ བྷི་ཀྑཱུ ཨ་པྤི་ཙྪཱ ས་ནྟུ་ཊྛཱ ལ་ཛྫི་ནོ ཀུ་ཀྐུ་ཙྩ་ཀཱ སི་ཀྑཱ་ཀཱ་མཱ ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ སུ་ནྡ་རཱི་ན་ནྡཱ བྷི་ཀྑུ་ནཱི ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཀཱ་ཡ་སཾ་ས་གྒཾ སཱ་དི་ཡི་སྶ་ཏཱི’’ཏི!

ཨ་ཐ ཁོ ཏེ བྷི་ཀྑཱུ སུ་ནྡ་རཱི་ན་ནྡཾ བྷི་ཀྑུ་ནིཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ བྷི་ཀྑུ་ས་ངྒྷཾ ས་ནྣི་པཱ་ཏཱ་པེ་ཏྭཱ བྷི་ཀྑཱུ པ་ཊི་པུ་ཙྪི – ‘‘ས་ཙྩཾ ཀི་ར, བྷི་ཀྑ་ཝེ, སུ་ནྡ་རཱི་ན་ནྡཱ བྷི་ཀྑུ་ནཱི ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཀཱ་ཡ་སཾ་ས་གྒཾ སཱ་དི་ཡ་ཏཱི’’ཏི [སཱ་དི་ཡཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ – ‘‘ཨ་ན་ནུ་ཙྪ་ཝི་ཀཾ, བྷི་ཀྑ་ཝེ, སུ་ནྡ་རཱི་ན་ནྡཱ་ཡ བྷི་ཀྑུ་ནི་ཡཱ ཨ་ན་ནུ་ལོ་མི་ཀཾ ཨ་པྤ་ཏི་རཱུ་པཾ ཨ་སྶཱ་མ་ཎ་ཀཾ ཨ་ཀ་པྤི་ཡཾ ཨ་ཀ་ར་ཎཱི་ཡཾ. ཀ་ཐ་ཉྷི ནཱ་མ, བྷི་ཀྑ་ཝེ, སུ་ནྡ་རཱི་ན་ནྡཱ བྷི་ཀྑུ་ནཱི ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཀཱ་ཡ་སཾ་ས་གྒཾ སཱ་དི་ཡི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ པ་ས་ནྣཱ་ནཾ ཝཱ བྷི་ཡྻོ་བྷཱ་ཝཱ་ཡ. ཨ་ཐ ཁྭེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ན་ཉྩེ་ཝ ཨ་པྤ་སཱ་དཱ་ཡ པ་ས་ནྣཱ་ན་ཉྩ ཨེ་ཀ་ཙྩཱ་ནཾ ཨ་ཉྙ་ཐ་ཏྟཱ་ཡཱ’’ཏི. ཨ་ཐ ཁོ བྷ་ག་ཝཱ སུ་ནྡ་རཱི་ན་ནྡཾ བྷི་ཀྑུ་ནིཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ དུ་བྦྷ་ར་ཏཱ་ཡ དུ་པྤོ་ས་ཏཱ་ཡ མ་ཧི་ཙྪ་ཏཱ་ཡ ཨ་ས་ནྟུ་ཊྛི་ཏཱ་ཡ [ཨ་ས་ནྟུ་ཊྛ་ཏཱ་ཡ (སྱཱ.), ཨ་ས་ནྟུ་ཊྛི་ཡཱ (ཀ.)] ས་ངྒ་ཎི་ཀཱ་ཡ ཀོ་ས་ཛྫ་སྶ ཨ་ཝ་ཎྞཾ བྷཱ་སི་ཏྭཱ, ཨ་ནེ་ཀ་པ་རི་ཡཱ་ཡེ་ན སུ་བྷ་ར་ཏཱ་ཡ སུ་པོ་ས་ཏཱ་ཡ ཨ་པྤི་ཙྪ་སྶ ས་ནྟུ་ཊྛ་སྶ [ས་ནྟུ་ཊྛི་ཡཱ (ཀ.)] ས་ལླེ་ཁ་སྶ དྷུ་ཏ་སྶ པཱ་སཱ་དི་ཀ་སྶ ཨ་པ་ཙ་ཡ་སྶ ཝཱི་རི་ཡཱ་ར་མྦྷ་སྶ ཝ་ཎྞཾ བྷཱ་སི་ཏྭཱ, བྷི་ཀྑཱུ་ནཾ ཏ་ད་ནུ་ཙྪ་ཝི་ཀཾ ཏ་ད་ནུ་ལོ་མི་ཀཾ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཏེ་ན ཧི, བྷི་ཀྑ་ཝེ, བྷི་ཀྑུ་ནཱི་ནཾ སི་ཀྑཱ་པ་དཾ པ་ཉྙ་པེ་སྶཱ་མི ད་ས ཨ་ཏྠ་ཝ་སེ པ་ཊི་ཙྩ – ས་ངྒྷ་སུ་ཊྛུ་ཏཱ་ཡ, ས་ངྒྷ་ཕཱ་སུ་ཏཱ་ཡ, དུ་མྨ་ངྐཱུ་ནཾ བྷི་ཀྑུ་ནཱི་ནཾ ནི་གྒ་ཧཱ་ཡ, པེ་ས་ལཱ་ནཾ བྷི་ཀྑུ་ནཱི་ནཾ ཕཱ་སུ་ཝི་ཧཱ་རཱ་ཡ, དི་ཊྛ་དྷ་མྨི་ཀཱ་ནཾ ཨཱ་ས་ཝཱ་ནཾ སཾ་ཝ་རཱ་ཡ, ས་མྤ་རཱ་ཡི་ཀཱ་ནཾ ཨཱ་ས་ཝཱ་ནཾ པ་ཊི་གྷཱ་ཏཱ་ཡ, ཨ་པྤ་ས་ནྣཱ་ནཾ པ་སཱ་དཱ་ཡ, པ་ས་ནྣཱ་ནཾ བྷི་ཡྻོ་བྷཱ་ཝཱ་ཡ, ས་དྡྷ་མྨ་ཊྛི་ཏི་ཡཱ ཝི་ན་ཡཱ་ནུ་གྒ་ཧཱ་ཡ. ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –

༦༥༧. ‘‘ཡཱ པ་ན བྷི་ཀྑུ་ནཱི ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཨ་དྷ་ཀྑ་ཀཾ ཨུ་བྦྷ་ཛཱ་ཎུ་མ་ཎྜ་ལཾ ཨཱ་མ་ས་ནཾ ཝཱ པ་རཱ་མ་ས་ནཾ ཝཱ ག་ཧ་ཎཾ ཝཱ ཚུ་པ་ནཾ ཝཱ པ་ཊི་པཱི་ལ༹་ནཾ ཝཱ སཱ་དི་ཡེ་ཡྻ, ཨ་ཡ་མྤི པཱ་རཱ་ཛི་ཀཱ ཧོ་ཏི ཨ་སཾ་ཝཱ་སཱ ཨུ་བྦྷ་ཛཱ་ཎུ་མ་ཎྜ་ལི་ཀཱ’’ཏི.

༦༥༨. ཡཱ པ་ནཱཏི ཡཱ ཡཱ་དི་སཱ ཡ་ཐཱ་ཡུ་ཏྟཱ ཡ་ཐཱ་ཛ་ཙྩཱ ཡ་ཐཱ་ནཱ་མཱ ཡ་ཐཱ་གོ་ཏྟཱ ཡ་ཐཱ་སཱི་ལཱ ཡ་ཐཱ་ཝི་ཧཱ་རི་ནཱི ཡ་ཐཱ་གོ་ཙ་རཱ ཐེ་རཱ ཝཱ ན་ཝཱ ཝཱ མ་ཛ྄ཛྷི་མཱ ཝཱ, ཨེ་སཱ ཝུ་ཙྩ་ཏི ཡཱ པ་ནཱ་ཏི.

བྷི་ཀྑུ་ནཱིཏི བྷི་ཀྑི་ཀཱ་ཏི བྷི་ཀྑུ་ནཱི; བྷི་ཀྑཱ་ཙ་རི་ཡཾ ཨ་ཛ྄ཛྷུ་པ་ག་ཏཱ་ཏི བྷི་ཀྑུ་ནཱི; བྷི་ནྣ་པ་ཊ་དྷ་རཱ་ཏི བྷི་ཀྑུ་ནཱི; ས་མ་ཉྙཱ་ཡ བྷི་ཀྑུ་ནཱི; པ་ཊི་ཉྙཱ་ཡ བྷི་ཀྑུ་ནཱི; ཨེ་ཧི བྷི་ཀྑུ་ནཱི་ཏི བྷི་ཀྑུ་ནཱི; ཏཱི་ཧི ས་ར་ཎ་ག་མ་ནེ་ཧི ཨུ་པ་ས་མྤ་ནྣཱ་ཏི བྷི་ཀྑུ་ནཱི; བྷ་དྲཱ བྷི་ཀྑུ་ནཱི; སཱ་རཱ བྷི་ཀྑུ་ནཱི; སེ་ཁཱ བྷི་ཀྑུ་ནཱི; ཨ་སེ་ཁཱ བྷི་ཀྑུ་ནཱི; ས་མ་གྒེ་ན ཨུ་བྷ་ཏོ་ས་ངྒྷེ་ན ཉ་ཏྟི་ཙ་ཏུ་ཏྠེ་ན ཀ་མྨེ་ན ཨ་ཀུ་པྤེ་ན ཋཱ་ནཱ་ར་ཧེ་ན ཨུ་པ་ས་མྤ་ནྣཱ་ཏི བྷི་ཀྑུ་ནཱི. ཏ་ཏྲ ཡཱ་ཡཾ བྷི་ཀྑུ་ནཱི ས་མ་གྒེ་ན ཨུ་བྷ་ཏོ་ས་ངྒྷེ་ན ཉ་ཏྟི་ཙ་ཏུ་ཏྠེ་ན ཀ་མྨེ་ན ཨ་ཀུ་པྤེ་ན ཋཱ་ནཱ་ར་ཧེ་ན ཨུ་པ་ས་མྤ་ནྣཱ, ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.

ཨ་ཝ་སྶུ་ཏཱ ནཱ་མ སཱ་ར་ཏྟཱ ཨ་པེ་ཀྑ་ཝ་ཏཱི པ་ཊི་བ་དྡྷ་ཙི་ཏྟཱ.

ཨ་ཝ་སྶུ་ཏོ ནཱ་མ སཱ་ར་ཏྟོ ཨ་པེ་ཀྑ་ཝཱ པ་ཊི་བ་དྡྷ་ཙི་ཏྟོ.

པུ་རི་ས་པུ་གྒ་ལོ ནཱ་མ མ་ནུ་སྶ་པུ་རི་སོ ན ཡ་ཀྑོ ན པེ་ཏོ ན ཏི་ར་ཙྪཱ་ན་ག་ཏོ ཝི་ཉྙཱུ པ་ཊི་བ་ལོ ཀཱ་ཡ་སཾ་ས་གྒཾ ས་མཱ་པ་ཛྫི་ཏུཾ.

ཨ་དྷ་ཀྑ་ཀནྟི ཧེ་ཊྛ་ཀྑ་ཀཾ.

ཨུ་བྦྷ་ཛཱ་ཎུ་མ་ཎྜ་ལནྟི ཨུ་པ་རི་ཛཱ་ཎུ་མ་ཎྜ་ལཾ.

ཨཱ་མ་ས་ནཾ ནཱ་མ ཨཱ་མ་ཊྛ་མ་ཏྟཾ.

པ་རཱ་མ་ས་ནཾ ནཱ་མ ཨི་ཏོ་ཙི་ཏོ ཙ ས་ཉྩོ་པ་ནཾ.

ག་ཧ་ཎཾ ནཱ་མ ག་ཧི་ཏ་མ་ཏྟཾ.

ཚུ་པ་ནཾ ནཱ་མ ཕུ་ཊྛ་མ་ཏྟཾ.

པ་ཊི་པཱི་ལ༹་ནཾ ཝཱ སཱ་དི་ཡེ་ཡྻཱཏི ཨ་ངྒཾ ག་ཧེ་ཏྭཱ ནི་པྤཱི་ལ༹་ནཾ སཱ་དི་ཡ་ཏི.

ཨ་ཡ་མྤཱིཏི པུ་རི་མཱ་ཡོ ཨུ་པཱ་དཱ་ཡ ཝུ་ཙྩ་ཏི.

པཱ་རཱ་ཛི་ཀཱ ཧོ་ཏཱིཏི སེ་ཡྻ་ཐཱ་པི ནཱ་མ པུ་རི་སོ སཱི་ས་ཙྪི་ནྣོ ཨ་བྷ་བྦོ ཏེ་ན ས་རཱི་ར་བ་ནྡྷ་ནེ་ན ཛཱི་ཝི་ཏུཾ, ཨེ་ཝ་མེ་ཝ བྷི་ཀྑུ་ནཱི ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཨ་དྷ་ཀྑ་ཀཾ ཨུ་བྦྷ་ཛཱ་ཎུ་མ་ཎྜ་ལཾ ཨཱ་མ་ས་ནཾ ཝཱ པ་རཱ་མ་ས་ནཾ ཝཱ ག་ཧ་ཎཾ ཝཱ ཚུ་པ་ནཾ ཝཱ པ་ཊི་པཱི་ལ༹་ནཾ ཝཱ སཱ་དི་ཡ་ནྟཱི ཨ་སྶ་མ་ཎཱི ཧོ་ཏི ཨ་ས་ཀྱ་དྷཱི་ཏཱ. ཏེ་ན ཝུ་ཙྩ་ཏི པཱ་རཱ་ཛི་ཀཱ ཧོ་ཏཱི་ཏི.

ཨ་སཾ་ཝཱ་སཱཏི སཾ་ཝཱ་སོ ནཱ་མ ཨེ་ཀ་ཀ་མྨཾ ཨེ་ཀུ་དྡེ་སོ ས་མ་སི་ཀྑ་ཏཱ, ཨེ་སོ སཾ་ཝཱ་སོ ནཱ་མ. སོ ཏཱ་ཡ ས་དྡྷིཾ ན་ཏྠི, ཏེ་ན ཝུ་ཙྩ་ཏི ཨ་སཾ་ཝཱ་སཱ་ཏི.

༦༥༩. ཨུ་བྷ་ཏོ་ཨ་ཝ་སྶུ་ཏེ ཨ་དྷ་ཀྑ་ཀཾ ཨུ་བྦྷ་ཛཱ་ཎུ་མ་ཎྜ་ལཾ ཀཱ་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི པཱ་རཱ་ཛི་ཀ་སྶ. ཀཱ་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི ཐུ་ལླ་ཙྩ་ཡ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི ཐུ་ལླ་ཙྩ་ཡ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.

ནི་སྶ་གྒི་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ནི་སྶ་གྒི་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.

ཨུ་བྦྷ་ཀྑ་ཀཾ ཨ་དྷོ་ཛཱ་ཎུ་མ་ཎྜ་ལཾ ཀཱ་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི ཐུ་ལླ་ཙྩ་ཡ་སྶ. ཀཱ་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.

༦༦༠. ཨེ་ཀ་ཏོ་ཨ་ཝ་སྶུ་ཏེ ཨ་དྷ་ཀྑ་ཀཾ ཨུ་བྦྷ་ཛཱ་ཎུ་མ་ཎྜ་ལཾ ཀཱ་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི ཐུ་ལླ་ཙྩ་ཡ་སྶ. ཀཱ་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.

ཨུ་བྦྷ་ཀྑ་ཀཾ ཨ་དྷོ་ཛཱ་ཎུ་མ་ཎྜ་ལཾ ཀཱ་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.

༦༦༡. ཨུ་བྷ་ཏོ་ཨ་ཝ་སྶུ་ཏེ ཡ་ཀྑ་སྶ ཝཱ པེ་ཏ་སྶ ཝཱ པ་ཎྜ་ཀ་སྶ ཝཱ ཏི་ར་ཙྪཱ་ན་ག་ཏ་མ་ནུ་སྶ་ཝི་གྒ་ཧ་སྶ ཝཱ ཨ་དྷ་ཀྑ་ཀཾ ཨུ་བྦྷ་ཛཱ་ཎུ་མ་ཎྜ་ལཾ ཀཱ་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི ཐུ་ལླ་ཙྩ་ཡ་སྶ. ཀཱ་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.

༦༦༢. ཨེ་ཀ་ཏོ་ཨ་ཝ་སྶུ་ཏེ ཨ་དྷ་ཀྑ་ཀཾ ཨུ་བྦྷ་ཛཱ་ཎུ་མ་ཎྜ་ལཾ ཀཱ་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.

༦༦༣. ཨ་ནཱ་པ་ཏྟི ཨ་ས་ཉྩི་ཙྩ, ཨ་སྶ་ཏི་ཡཱ, ཨ་ཛཱ་ན་ནྟི་ཡཱ, ཨ་སཱ་དི་ཡ་ནྟི་ཡཱ, ཨུ་མྨ་ཏྟི་ཀཱ་ཡ, ཁི་ཏྟ་ཙི་ཏྟཱ་ཡ, ཝེ་ད་ནཱ་ཊྚཱ་ཡ, ཨཱ་དི་ཀ་མྨི་ཀཱ་ཡཱ་ཏི.

པ་ཋ་མ་པཱ་རཱ་ཛི་ཀཾ ས་མ་ཏྟཾ [བྷི་ཀྑུ་ནི་ཝི་བྷ་ངྒེ སི་ཀྑཱ་པ་ད་ག་ཎ་ནཱ བྷི་ཀྑཱུ་ཧི§ཨ་སཱ་དྷཱ་ར་ཎ་ཝ་སེ་ན པ་ཀཱ་སི་ཏཱ་ཏི ཝེ་དི་ཏ་བྦཱ].