༨. ཨུ་པ་སྶུ་ཏི་སི་ཀྑཱ་པ་དཾ
༤༦༩. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ པེ་ས་ལེ་ཧི བྷི་ཀྑཱུ་ཧི ས་དྡྷིཾ བྷ་ཎྜ་ནྟི. པེ་ས་ལཱ བྷི་ཀྑཱུ ཨེ་ཝཾ ཝ་ད་ནྟི – ‘‘ཨ་ལ་ཛྫི་ནོ ཨི་མེ, ཨཱ་ཝུ་སོ, ཚ་བྦ་གྒི་ཡཱ བྷི་ཀྑཱུ. ན ས་ཀྐཱ ཨི་མེ་ཧི ས་ཧ བྷ་ཎྜི་ཏུ’’ནྟི. ཚ་བྦ་གྒི་ཡཱ བྷི་ཀྑཱུ ཨེ་ཝཾ ཝ་ད་ནྟི – ‘‘ཀི་སྶ ཏུ་མྷེ, ཨཱ་ཝུ་སོ, ཨ་མྷེ ཨ་ལ་ཛྫི་ཝཱ་དེ་ན པཱ་པེ་ཐཱ’’ཏི? ‘‘ཀ་ཧཾ པ་ན ཏུ་མྷེ, ཨཱ་ཝུ་སོ, ཨ་སྶུ་ཏྠཱ’’ཏི? ‘‘མ་ཡཾ ཨཱ་ཡ་སྨ་ནྟཱ་ནཾ ཨུ་པ་སྶུ་ཏིཾ [ཨུ་པ་སྶུ་ཏི (?)] ཏི་ཊྛ་མྷཱ’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ བྷི་ཀྑཱུ་ནཾ བྷ་ཎྜ་ན་ཛཱ་ཏཱ་ནཾ ཀ་ལ་ཧ་ཛཱ་ཏཱ་ནཾ ཝི་ཝཱ་དཱ་པ་ནྣཱ་ནཾ ཨུ་པ་སྶུ་ཏིཾ [ཨུ་པ་སྶུ་ཏི (?)] ཏི་ཊྛི་སྶ་ནྟཱི’’ཏི…པེ… ས་ཙྩཾ ཀི་ར ཏུ་མྷེ, བྷི་ཀྑ་ཝེ, བྷི་ཀྑཱུ་ནཾ བྷ་ཎྜ་ན་ཛཱ་ཏཱ་ནཾ ཀ་ལ་ཧ་ཛཱ་ཏཱ་ནཾ ཝི་ཝཱ་དཱ་པ་ནྣཱ་ནཾ ཨུ་པ་སྶུ་ཏིཾ [ཨུ་པ་སྶུ་ཏི (?)] ཏི་ཊྛ་ཐཱ་ཏི? ‘‘ས་ཙྩ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, བྷི་ཀྑཱུ་ནཾ བྷ་ཎྜ་ན་ཛཱ་ཏཱ་ནཾ ཀ་ལ་ཧ་ཛཱ་ཏཱ་ནཾ ཝི་ཝཱ་དཱ་པ་ནྣཱ་ནཾ ཨུ་པ་སྶུ་ཏིཾ [ཨུ་པ་སྶུ་ཏི (?)] ཏི་ཊྛི་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༤༧༠. ‘‘ཡོ པ་ན བྷི་ཀྑུ བྷི་ཀྑཱུ་ནཾ བྷ་ཎྜ་ན་ཛཱ་ཏཱ་ནཾ ཀ་ལ་ཧ་ཛཱ་ཏཱ་ནཾ ཝི་ཝཱ་དཱ་པ་ནྣཱ་ནཾ ཨུ་པ་སྶུ་ཏིཾ ཏི་ཊྛེ་ཡྻ – ‘ཡཾ ཨི་མེ བྷ་ཎི་སྶ་ནྟི ཏཾ སོ་སྶཱ་མཱི’ཏི ཨེ་ཏ་དེ་ཝ པ་ཙྩ་ཡཾ ཀ་རི་ཏྭཱ ཨ་ན་ཉྙཾ, པཱ་ཙི་ཏྟི་ཡ’’ནྟི.
༤༧༡. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
བྷི་ཀྑཱུ་ནནྟི ཨ་ཉྙེ་སཾ བྷི་ཀྑཱུ་ནཾ.
བྷ་ཎྜ་ན་ཛཱ་ཏཱ་ནཾ ཀ་ལ་ཧ་ཛཱ་ཏཱ་ནཾ ཝི་ཝཱ་དཱ་པ་ནྣཱ་ནནྟི ཨ་དྷི་ཀ་ར་ཎ་ཛཱ་ཏཱ་ནཾ.
ཨུ་པ་སྶུ་ཏིཾ ཏི་ཊྛེ་ཡྻཱཏི ‘‘ཨི་མེ་སཾ སུ་ཏྭཱ ཙོ་དེ་སྶཱ་མི སཱ་རེ་སྶཱ་མི པ་ཊི་ཙོ་དེ་སྶཱ་མི པ་ཊི་སཱ་རེ་སྶཱ་མི མ་ངྐཱུ ཀ་རི་སྶཱ་མཱི’’ཏི ག་ཙྪ་ཏི, ཨཱ་པ་ཏྟི དུ་ཀྐ་ཊ་སྶ. ཡ་ཏྠ ཋི་ཏོ སུ་ཎཱ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. པ་ཙྪ་ཏོ ག་ཙྪ་ནྟོ ཏུ་རི་ཏོ ག་ཙྪ་ཏི སོ་སྶཱ་མཱི་ཏི, ཨཱ་པ་ཏྟི དུ་ཀྐ་ཊ་སྶ. ཡ་ཏྠ ཋི་ཏོ སུ་ཎཱ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. པུ་ར་ཏོ ག་ཙྪ་ནྟོ ཨོ་ཧི་ཡྻ་ཏི སོ་སྶཱ་མཱི་ཏི, ཨཱ་པ་ཏྟི དུ་ཀྐ་ཊ་སྶ. ཡ་ཏྠ ཋི་ཏོ སུ་ཎཱ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. བྷི་ཀྑུ་སྶ ཋི་ཏོ་ཀཱ་སཾ ཝཱ ནི་སི་ནྣོ་ཀཱ་སཾ ཝཱ ནི་པ་ནྣོ་ཀཱ་སཾ ཝཱ ཨཱ་ག་ནྟྭཱ མ་ནྟེ་ནྟཾ ཨུ་ཀྐཱ་སི་ཏ་བྦཾ, ཝི་ཛཱ་ནཱ་པེ་ཏ་བྦཾ, ནོ ཙེ ཨུ་ཀྐཱ་སེ་ཡྻ ཝཱ ཝི་ཛཱ་ནཱ་པེ་ཡྻ ཝཱ, ཨཱ་པ་ཏྟི པཱ་ཙི་ཏྟི་ཡ་སྶ.
ཨེ་ཏ་དེ་ཝ པ་ཙྩ་ཡཾ ཀ་རི་ཏྭཱ ཨ་ན་ཉྙནྟི ན ཨ་ཉྙོ ཀོ་ཙི པ་ཙྩ་ཡོ ཧོ་ཏི ཨུ་པ་སྶུ་ཏིཾ ཏི་ཊྛི་ཏུཾ.
༤༧༢. ཨུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི ཨུ་པ་སྶུ་ཏིཾ ཏི་ཊྛ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཝེ་མ་ཏི་ཀོ ཨུ་པ་སྶུ་ཏིཾ ཏི་ཊྛ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི ཨུ་པ་སྶུ་ཏིཾ ཏི་ཊྛ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ནུ་པ་ས་མྤ་ནྣ་སྶ ཨུ་པ་སྶུ་ཏིཾ ཏི་ཊྛ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ.
༤༧༣. ཨ་ནཱ་པ་ཏྟི – ‘‘ཨི་མེ་སཾ སུ་ཏྭཱ ཨོ་ར་མི་སྶཱ་མི ཝི་ར་མི་སྶཱ་མི ཝཱུ་པ་ས་མི་སྶཱ་མི [ཝཱུ་པ་ས་མེ་སྶཱ་མི (སཱི.)] ཨ་ཏྟཱ་ནཾ པ་རི་མོ་ཙེ་སྶཱ་མཱི’’ཏི ག་ཙྪ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཨུ་པ་སྶུ་ཏི་སི་ཀྑཱ་པ་དཾ ནི་ཊྛི་ཏཾ ཨ་ཊྛ་མཾ.