༩. ཀ་མྨ་པ་ཊི་བཱ་ཧ་ན་སི་ཀྑཱ་པ་དཾ

༤༧༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ཨ་ནཱ་ཙཱ་རཾ ཨཱ་ཙ་རི་ཏྭཱ ཨེ་ཀ་མེ་ཀ་སྶ ཀ་མྨེ ཀ་ཡི་ར་མཱ་ནེ པ་ཊི་ཀྐོ་ས་ནྟི. ཏེ་ན ཁོ པ་ན ས་མ་ཡེ་ན ས་ངྒྷོ ས་ནྣི་པ་ཏི་ཏོ ཧོ་ཏི ཀེ་ན་ཙི་དེ་ཝ ཀ་ར་ཎཱི་ཡེ་ན. ཚ་བྦ་གྒི་ཡཱ བྷི་ཀྑཱུ ཙཱི་ཝ་ར་ཀ་མྨཾ ཀ་རོ་ནྟཱ ཨེ་ཀ་སྶ ཚ་ནྡཾ ཨ་དཾ་སུ. ཨ་ཐ ཁོ ས་ངྒྷོ – ‘‘ཨ་ཡཾ, ཨཱ་ཝུ་སོ, ཚ་བྦ་གྒི་ཡོ བྷི་ཀྑུ ཨེ་ཀ་ཀོ ཨཱ་ག་ཏོ, ཧ་ནྡ་སྶ མ་ཡཾ ཀ་མྨཾ ཀ་རོ་མཱ’’ཏི ཏ་སྶ ཀ་མྨཾ ཨ་ཀཱ་སི. ཨ་ཐ ཁོ སོ བྷི་ཀྑུ ཡེ་ན ཚ་བྦ་གྒི་ཡཱ བྷི་ཀྑཱུ ཏེ་ནུ་པ་ས་ངྐ་མི. ཚ་བྦ་གྒི་ཡཱ བྷི་ཀྑཱུ ཏཾ བྷི་ཀྑུཾ ཨེ་ཏ་ད་ཝོ་ཙུཾ – ‘‘ཀིཾ, ཨཱ་ཝུ་སོ, ས་ངྒྷོ ཨ་ཀཱ་སཱི’’ཏི? ‘‘ས་ངྒྷོ མེ, ཨཱ་ཝུ་སོ, ཀ་མྨཾ ཨ་ཀཱ་སཱི’’ཏི. ‘‘ན མ་ཡཾ, ཨཱ་ཝུ་སོ, ཨེ་ཏ་ད་ཏྠཱ་ཡ ཚ་ནྡཾ ཨ་ད་མྷཱ – ‘‘ཏུ་ཡ྄ཧཾ ཀ་མྨཾ ཀ་རི་སྶ་ཏཱི’’ཏི. ས་ཙེ ཙ མ་ཡཾ ཛཱ་ནེ་ཡྻཱ་མ ‘‘ཏུ་ཡ྄ཧཾ ཀ་མྨཾ ཀ་རི་སྶ་ཏཱི’’ཏི, ན མ་ཡཾ ཚ་ནྡཾ ད་དེ་ཡྻཱ་མཱ’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ དྷ་མྨི་ཀཱ་ནཾ ཀ་མྨཱ་ནཾ ཚ་ནྡཾ ད་ཏྭཱ པ་ཙྪཱ ཁཱི་ཡ་ན་དྷ་མྨཾ [ཁི་ཡྻ་དྷ་མྨཾ (ཨི་ཏི་པི)] ཨཱ་པ་ཛྫི་སྶ་ནྟཱི’’ཏི…པེ… ས་ཙྩཾ ཀི་ར ཏུ་མྷེ, བྷི་ཀྑ་ཝེ, དྷ་མྨི་ཀཱ་ནཾ ཀ་མྨཱ་ནཾ ཚ་ནྡཾ ད་ཏྭཱ པ་ཙྪཱ ཁཱི་ཡ་ན་དྷ་མྨཾ [ཁི་ཡྻ་དྷ་མྨཾ (ཨི་ཏི་པི)] ཨཱ་པ་ཛྫ་ཐཱ་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, དྷ་མྨི་ཀཱ་ནཾ ཀ་མྨཱ་ནཾ ཚ་ནྡཾ ད་ཏྭཱ པ་ཙྪཱ ཁཱི་ཡ་ན་དྷ་མྨཾ [ཁི་ཡྻ་དྷ་མྨཾ (ཨི་ཏི་པི)] ཨཱ་པ་ཛྫི་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –

༤༧༥. ‘‘ཡོ པ་ན བྷི་ཀྑུ དྷ་མྨི་ཀཱ་ནཾ ཀ་མྨཱ་ནཾ ཚ་ནྡཾ ད་ཏྭཱ པ་ཙྪཱ ཁཱི་ཡ་ན་དྷ་མྨཾ ཨཱ་པ་ཛྫེ་ཡྻ, པཱ་ཙི་ཏྟི་ཡ’’ནྟི.

༤༧༦. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.

དྷ་མྨི་ཀཾ ནཱ་མ ཀ་མྨཾ ཨ་པ་ལོ་ཀ་ན་ཀ་མྨཾ ཉ་ཏྟི་ཀ་མྨཾ ཉ་ཏྟི་དུ་ཏི་ཡ་ཀ་མྨཾ ཉ་ཏྟི་ཙ་ཏུ་ཏྠ་ཀ་མྨཾ དྷ་མྨེ་ན ཝི་ན་ཡེ་ན ས་ཏྠུ་སཱ་ས་ནེ་ན ཀ་ཏཾ, ཨེ་ཏཾ དྷ་མྨི་ཀཾ ནཱ་མ ཀ་མྨཾ. ཚ་ནྡཾ ད་ཏྭཱ ཁི་ཡྻ་ཏི ཨཱ་པ་ཏྟི པཱ་ཙི་ཏྟི་ཡ་སྶ.

༤༧༧. དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱི ཚ་ནྡཾ ད་ཏྭཱ ཁི་ཡྻ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ ཝེ་མ་ཏི་ཀོ ཚ་ནྡཾ ད་ཏྭཱ ཁི་ཡྻ་ཏི, ཨཱ་པ་ཏྟི དུ་ཀྐ་ཊ་སྶ. དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱི ཚ་ནྡཾ ད་ཏྭཱ ཁི་ཡྻ་ཏི, ཨ་ནཱ་པ་ཏྟི. ཨ་དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱི, ཨ་ནཱ་པ་ཏྟི.

༤༧༨. ཨ་ནཱ་པ་ཏྟི – ‘‘ཨ་དྷ་མྨེ་ན ཝཱ ཝ་གྒེ་ན ཝཱ ན ཀ་མྨཱ་ར་ཧ་སྶ ཝཱ ཀ་མྨཾ ཀ་ཏ’’ནྟི ཛཱ་ན་ནྟོ ཁི་ཡྻ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.

ཀ་མྨ་པ་ཊི་བཱ་ཧ་ན་སི་ཀྑཱ་པ་དཾ ནི་ཊྛི་ཏཾ ན་ཝ་མཾ.