༧. ས་ཉྩི་ཙྩ་སི་ཀྑཱ་པ་དཾ
༤༦༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ས་ཏྟ་ར་ས་ཝ་གྒི་ཡཱ་ནཾ བྷི་ཀྑཱུ་ནཾ ས་ཉྩི་ཙྩ ཀུ་ཀྐུ་ཙྩཾ ཨུ་པ་ད་ཧ་ནྟི – ‘‘བྷ་ག་ཝ་ཏཱ, ཨཱ་ཝུ་སོ, སི་ཀྑཱ་པ་དཾ པ་ཉྙ་ཏྟཾ – ‘ན ཨཱུ་ན་ཝཱི་ས་ཏི་ཝ་སྶོ པུ་གྒ་ལོ ཨུ་པ་ས་མྤཱ་དེ་ཏ་བྦོ’ཏི. ཏུ་མྷེ ཙ ཨཱུ་ན་ཝཱི་ས་ཏི་ཝ་སྶཱ ཨུ་པ་ས་མྤ་ནྣཱ. ཀ་ཙྩི ནོ ཏུ་མྷེ ཨ་ནུ་པ་ས་མྤ་ནྣཱ’’ཏི? ཏེ རོ་ད་ནྟི. བྷི་ཀྑཱུ ཨེ་ཝ་མཱ་ཧཾ་སུ – ‘‘ཀི་སྶ ཏུ་མྷེ, ཨཱ་ཝུ་སོ, རོ་ད་ཐཱ’’ཏི? ‘‘ཨི་མེ, ཨཱ་ཝུ་སོ, ཚ་བྦ་གྒི་ཡཱ བྷི་ཀྑཱུ ཨ་མྷཱ་ཀཾ ས་ཉྩི་ཙྩ ཀུ་ཀྐུ་ཙྩཾ ཨུ་པ་ད་ཧ་ནྟཱི’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ བྷི་ཀྑཱུ་ནཾ ས་ཉྩི་ཙྩ ཀུ་ཀྐུ་ཙྩཾ ཨུ་པ་ད་ཧི་སྶ་ནྟཱི’’ཏི…པེ… ས་ཙྩཾ ཀི་ར ཏུ་མྷེ, བྷི་ཀྑ་ཝེ, བྷི་ཀྑཱུ་ནཾ ས་ཉྩི་ཙྩ ཀུ་ཀྐུ་ཙྩཾ ཨུ་པ་ད་ཧ་ཐཱ་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, བྷི་ཀྑཱུ་ནཾ ས་ཉྩི་ཙྩ ཀུ་ཀྐུ་ཙྩཾ ཨུ་པ་ད་ཧི་སྶ་ཐ! ནེ་ཏཾ, མོ་གྷ་པུ་རི་སཱ ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༤༦༥. ‘‘ཡོ པ་ན བྷི་ཀྑུ བྷི་ཀྑུ་སྶ ས་ཉྩི་ཙྩ ཀུ་ཀྐུ་ཙྩཾ ཨུ་པ་ད་ཧེ་ཡྻ [ཨུ་པྤཱ་དེ་ཡྻ (ཨི་ཏི་པི)] – ‘ཨི་ཏི་སྶ མུ་ཧུ་ཏྟ་མྤི ཨ་ཕཱ་སུ བྷ་ཝི་སྶ་ཏཱི’ཏི ཨེ་ཏ་དེ་ཝ པ་ཙྩ་ཡཾ ཀ་རི་ཏྭཱ ཨ་ན་ཉྙཾ, པཱ་ཙི་ཏྟི་ཡ’’ནྟི.
༤༦༦. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
བྷི་ཀྑུ་སྶཱཏི ཨ་ཉྙ་སྶ བྷི་ཀྑུ་སྶ.
ས་ཉྩི་ཙྩཱཏི ཛཱ་ན་ནྟོ ས་ཉྫཱ་ན་ནྟོ ཙེ་ཙྩ ཨ་བྷི་ཝི་ཏ་རི་ཏྭཱ ཝཱི་ཏི་ཀྐ་མོ.
ཀུ་ཀྐུ་ཙྩཾ ཨུ་པ་ད་ཧེ་ཡྻཱཏི ‘‘ཨཱུ་ན་ཝཱི་ས་ཏི་ཝ་སྶོ མ་ཉྙེ ཏྭཾ ཨུ་པ་ས་མྤ་ནྣོ, ཝི་ཀཱ་ལེ མ་ཉྙེ ཏ་ཡཱ བྷུ་ཏྟཾ, མ་ཛྫཾ མ་ཉྙེ ཏ་ཡཱ པཱི་ཏཾ, མཱ་ཏུ་གཱ་མེ་ན ས་དྡྷིཾ ར་ཧོ མ་ཉྙེ ཏ་ཡཱ ནི་སི་ནྣ’’ནྟི ཀུ་ཀྐུ་ཙྩཾ ཨུ་པ་ད་ཧ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨེ་ཏ་དེ་ཝ པ་ཙྩ་ཡཾ ཀ་རི་ཏྭཱ, ཨ་ན་ཉྙནྟི ན ཨ་ཉྙོ ཀོ་ཙི པ་ཙྩ་ཡོ ཧོ་ཏི ཀུ་ཀྐུ་ཙྩཾ ཨུ་པ་ད་ཧི་ཏུཾ.
༤༦༧. ཨུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི ས་ཉྩི་ཙྩ ཀུ་ཀྐུ་ཙྩཾ ཨུ་པ་ད་ཧ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཝེ་མ་ཏི་ཀོ ས་ཉྩི་ཙྩ ཀུ་ཀྐུ་ཙྩཾ ཨུ་པ་ད་ཧ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི ས་ཉྩི་ཙྩ ཀུ་ཀྐུ་ཙྩཾ ཨུ་པ་ད་ཧ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ནུ་པ་ས་མྤ་ནྣ་སྶ ས་ཉྩི་ཙྩ ཀུ་ཀྐུ་ཙྩཾ ཨུ་པ་ད་ཧ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ.
༤༦༨. ཨ་ནཱ་པ་ཏྟི ན ཀུ་ཀྐུ་ཙྩཾ ཨུ་པ་ད་ཧི་ཏུ་ཀཱ་མོ ‘‘ཨཱུ་ན་ཝཱི་ས་ཏི་ཝ་སྶོ མ་ཉྙེ ཏྭཾ ཨུ་པ་ས་མྤ་ནྣོ, ཝི་ཀཱ་ལེ མ་ཉྙེ ཏ་ཡཱ བྷུ་ཏྟཾ, མ་ཛྫཾ མ་ཉྙེ ཏ་ཡཱ པཱི་ཏཾ, མཱ་ཏུ་གཱ་མེ་ན ས་དྡྷིཾ ར་ཧོ མ་ཉྙེ ཏ་ཡཱ ནི་སི་ནྣཾ, ཨི་ངྒྷ ཛཱ་ནཱ་ཧི, མཱ ཏེ པ་ཙྪཱ ཀུ་ཀྐུ་ཙྩཾ ཨ་ཧོ་སཱི’’ཏི བྷ་ཎ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ས་ཉྩི་ཙྩ་སི་ཀྑཱ་པ་དཾ ནི་ཊྛི་ཏཾ ས་ཏྟ་མཾ.