༢. ཝི་ལེ་ཁ་ན་སི་ཀྑཱ་པ་དཾ
༤༣༨. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. [ཨི་དཾ ཝ་ཏྠུ ཙཱུ་ལ༹་ཝ. ༣༢༠] ཏེ་ན ཁོ པ་ན ས་མ་ཡེ་ན བྷ་ག་ཝཱ བྷི་ཀྑཱུ་ནཾ ཨ་ནེ་ཀ་པ་རི་ཡཱ་ཡེ་ན ཝི་ན་ཡ་ཀ་ཐཾ ཀ་ཐེ་ཏི, ཝི་ན་ཡ་སྶ ཝ་ཎྞཾ བྷཱ་ས་ཏི, ཝི་ན་ཡ་པ་རི་ཡ་ཏྟི་ཡཱ ཝ་ཎྞཾ བྷཱ་ས་ཏི, ཨཱ་དི་སྶ ཨཱ་དི་སྶ ཨཱ་ཡ་སྨ་ཏོ ཨུ་པཱ་ལི་སྶ ཝ་ཎྞཾ བྷཱ་ས་ཏི. བྷི་ཀྑཱུ་ནཾ ཨེ་ཏ་ད་ཧོ་སི [བྷི་ཀྑཱུ བྷ་ག་ཝཱ (སྱཱ. ཀ.)] – ‘‘བྷ་ག་ཝཱ ཁོ ཨ་ནེ་ཀ་པ་རི་ཡཱ་ཡེ་ན ཝི་ན་ཡ་ཀ་ཐཾ ཀ་ཐེ་ཏི, ཝི་ན་ཡ་སྶ ཝ་ཎྞཾ བྷཱ་ས་ཏི, ཝི་ན་ཡ་པ་རི་ཡ་ཏྟི་ཡཱ ཝ་ཎྞཾ བྷཱ་ས་ཏི, ཨཱ་དི་སྶ ཨཱ་དི་སྶ ཨཱ་ཡ་སྨ་ཏོ ཨུ་པཱ་ལི་སྶ ཝ་ཎྞཾ བྷཱ་ས་ཏི. ཧ་ནྡ མ་ཡཾ, ཨཱ་ཝུ་སོ, ཨཱ་ཡ་སྨ་ཏོ ཨུ་པཱ་ལི་སྶ ས་ནྟི་ཀེ ཝི་ན་ཡཾ པ་རི་ཡཱ་པུ་ཎཱ་མཱ’’ཏི, ཏེ ཙ བ་ཧཱུ བྷི་ཀྑཱུ ཐེ་རཱ ཙ ན་ཝཱ ཙ མ་ཛ྄ཛྷི་མཱ ཙ ཨཱ་ཡ་སྨ་ཏོ ཨུ་པཱ་ལི་སྶ ས་ནྟི་ཀེ ཝི་ན་ཡཾ པ་རི་ཡཱ་པུ་ཎ་ནྟི.
ཨ་ཐ ཁོ ཚ་བྦ་གྒི་ཡཱ་ནཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཨེ་ཏ་ར་ཧི ཁོ, ཨཱ་ཝུ་སོ, བ་ཧཱུ བྷི་ཀྑཱུ ཐེ་རཱ ཙ ན་ཝཱ ཙ མ་ཛ྄ཛྷི་མཱ ཙ ཨཱ་ཡ་སྨ་ཏོ ཨུ་པཱ་ལི་སྶ ས་ནྟི་ཀེ ཝི་ན་ཡཾ པ་རི་ཡཱ་པུ་ཎ་ནྟི. ས་ཙེ ཨི་མེ ཝི་ན་ཡེ པ་ཀ་ཏ་ཉྙུ་ནོ བྷ་ཝི་སྶ་ནྟི ཨ་མྷེ ཡེ་ནི་ཙྪ་ཀཾ ཡ་དི་ཙྪ་ཀཾ ཡཱ་ཝ་དི་ཙྪ་ཀཾ ཨཱ་ཀ་ཌྜྷི་སྶ་ནྟི པ་རི་ཀ་ཌྜྷི་སྶ་ནྟི. ཧ་ནྡ མ་ཡཾ, ཨཱ་ཝུ་སོ, ཝི་ན་ཡཾ ཝི་ཝ་ཎྞེ་མཱ’’ཏི. ཨ་ཐ ཁོ ཚ་བྦ་གྒི་ཡཱ བྷི་ཀྑཱུ བྷི་ཀྑཱུ ཨུ་པ་ས་ངྐ་མི་ཏྭཱ ཨེ་ཝཾ ཝ་ད་ནྟི – ‘‘ཀིཾ པ་ནི་མེ་ཧི ཁུ་དྡཱ་ནུ་ཁུ་དྡ་ཀེ་ཧི སི་ཀྑཱ་པ་དེ་ཧི ཨུ་དྡི་ཊྛེ་ཧི, ཡཱ་ཝ་དེ་ཝ ཀུ་ཀྐུ་ཙྩཱ་ཡ ཝི་ཧེ་སཱ་ཡ ཝི་ལེ་ཁཱ་ཡ སཾ་ཝ་ཏྟ་ནྟཱི’’ཏི! ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ ཝི་ན་ཡཾ ཝི་ཝ་ཎྞེ་སྶ་ནྟཱི་ཏི…པེ… ས་ཙྩཾ ཀི་ར ཏུ་མྷེ, བྷི་ཀྑ་ཝེ, ཝི་ན་ཡཾ ཝི་ཝ་ཎྞེ་ཐཱ་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, ཝི་ན་ཡཾ ཝི་ཝ་ཎྞེ་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༤༣༩. ‘‘ཡོ པ་ན བྷི་ཀྑུ པཱ་ཏི་མོ་ཀྑེ ཨུ་དྡི་སྶ་མཱ་ནེ ཨེ་ཝཾ ཝ་དེ་ཡྻ – ‘ཀིཾ པ་ནི་མེ་ཧི ཁུ་དྡཱ་ནུ་ཁུ་དྡ་ཀེ་ཧི སི་ཀྑཱ་པ་དེ་ཧི ཨུ་དྡི་ཊྛེ་ཧི, ཡཱ་ཝ་དེ་ཝ ཀུ་ཀྐུ་ཙྩཱ་ཡ ཝི་ཧེ་སཱ་ཡ ཝི་ལེ་ཁཱ་ཡ སཾ་ཝ་ཏྟ་ནྟཱི’ཏི, སི་ཀྑཱ་པ་ད་ཝི་ཝ་ཎྞ་ཀེ པཱ་ཙི་ཏྟི་ཡ’’ནྟི.
༤༤༠. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
པཱ་ཏི་མོ་ཀྑེ ཨུ་དྡི་སྶ་མཱ་ནེཏི ཨུ་དྡི་ས་ནྟེ ཝཱ ཨུ་དྡི་སཱ་པེ་ནྟེ ཝཱ ས་ཛ྄ཛྷཱ་ཡཾ ཝཱ ཀ་རོ་ནྟེ.
ཨེ་ཝཾ ཝ་དེ་ཡྻཱཏི – ‘‘ཀིཾ པ་ནི་མེ་ཧི ཁུ་དྡཱ་ནུ་ཁུ་དྡ་ཀེ་ཧི སི་ཀྑཱ་པ་དེ་ཧི ཨུ་དྡི་ཊྛེ་ཧི, ཡཱ་ཝ་དེ་ཝ ཀུ་ཀྐུ་ཙྩཱ་ཡ ཝི་ཧེ་སཱ་ཡ ཝི་ལེ་ཁཱ་ཡ སཾ་ཝ་ཏྟ་ནྟཱི་ཏི. ‘‘ཡེ ཨི་མཾ པ་རི་ཡཱ་པུ་ཎ་ནྟི ཏེ་སཾ ཀུ་ཀྐུ་ཙྩཾ ཧོ་ཏི, ཝི་ཧེ་སཱ ཧོ་ཏི, ཝི་ལེ་ཁཱ ཧོ་ཏི, ཡེ ཨི་མཾ ན པ་རི་ཡཱ་པུ་ཎ་ནྟི ཏེ་སཾ ཀུ་ཀྐུ་ཙྩཾ ན ཧོ་ཏི ཝི་ཧེ་སཱ ན ཧོ་ཏི ཝི་ལེ་ཁཱ ན ཧོ་ཏི. ཨ་ནུ་དྡི་ཊྛཾ ཨི་དཾ ཝ་རཾ, ཨ་ནུ་གྒ་ཧི་ཏཾ ཨི་དཾ ཝ་རཾ, ཨ་པ་རི་ཡཱ་པུ་ཊཾ ཨི་དཾ ཝ་རཾ, ཨ་དྷཱ་རི་ཏཾ ཨི་དཾ ཝ་རཾ, ཝི་ན་ཡོ ཝཱ ཨ་ནྟ་ར་དྷཱ་ཡ་ཏུ, ཨི་མེ ཝཱ བྷི་ཀྑཱུ ཨ་པ་ཀ་ཏ་ཉྙུ་ནོ ཧོ་ནྟཱུ’’ཏི ཨུ་པ་ས་མྤ་ནྣ་སྶ ཝི་ན་ཡཾ ཝི་ཝ་ཎྞེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༤༤༡. ཨུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི ཝི་ན་ཡཾ ཝི་ཝ་ཎྞེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཝེ་མ་ཏི་ཀོ ཝི་ན་ཡཾ ཝི་ཝ་ཎྞེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི ཝི་ན་ཡཾ ཝི་ཝ་ཎྞེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ཉྙཾ དྷ་མྨཾ ཝི་ཝ་ཎྞེ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣ་སྶ ཝི་ན་ཡཾ ཝཱ ཨ་ཉྙཾ ཝཱ དྷ་མྨཾ ཝི་ཝ་ཎྞེ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ.
༤༤༢. ཨ་ནཱ་པ་ཏྟི ན ཝི་ཝ་ཎྞེ་ཏུ་ཀཱ་མོ, ‘‘ཨི་ངྒྷ ཏྭཾ སུ་ཏྟ་ནྟེ ཝཱ གཱ་ཐཱ་ཡོ ཝཱ ཨ་བྷི་དྷ་མྨཾ ཝཱ པ་རི་ཡཱ་པུ་ཎ་སྶུ, པ་ཙྪཱ ཝི་ན་ཡཾ པ་རི་ཡཱ་པུ་ཎི་སྶ་སཱི’’ཏི བྷ་ཎ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཝི་ལེ་ཁ་ན་སི་ཀྑཱ་པ་དཾ ནི་ཊྛི་ཏཾ དུ་ཏི་ཡཾ.