༣. མོ་ཧ་ན་སི་ཀྑཱ་པ་དཾ
༤༤༣. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ཨ་ནཱ་ཙཱ་རཾ ཨཱ་ཙ་རི་ཏྭཱ ‘‘ཨ་ཉྙཱ་ཎ་ཀེ་ན ཨཱ་པ་ནྣཱ་ཏི ཛཱ་ན་ནྟཱུ’’ཏི པཱ་ཏི་མོ་ཀྑེ ཨུ་དྡི་སྶ་མཱ་ནེ ཨེ་ཝཾ ཝ་ད་ནྟི – ‘‘ཨི་དཱ་ནེ་ཝ ཁོ མ་ཡཾ ཛཱ་ནཱ་མ, ཨ་ཡ་མྤི ཀི་ར དྷ་མྨོ སུ་ཏྟཱ་ག་ཏོ སུ་ཏྟ་པ་རི་ཡཱ་པ་ནྣོ ཨ་ནྭ་དྡྷ་མཱ་སཾ ཨུ་དྡེ་སཾ ཨཱ་ག་ཙྪ་ཏཱི’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ པཱ་ཏི་མོ་ཀྑེ ཨུ་དྡི་སྶ་མཱ་ནེ ཨེ་ཝཾ ཝ་ཀྑ་ནྟི – ཨི་དཱ་ནེ་ཝ ཁོ མ་ཡཾ ཛཱ་ནཱ་མ, ཨ་ཡ་མྤི ཀི་ར དྷ་མྨོ སུ་ཏྟཱ་ག་ཏོ སུ་ཏྟ་པ་རི་ཡཱ་པ་ནྣོ ཨ་ནྭ་དྡྷ་མཱ་སཾ ཨུ་དྡེ་སཾ ཨཱ་ག་ཙྪ་ཏཱི’’ཏི…པེ… ས་ཙྩཾ ཀི་ར ཏུ་མྷེ, བྷི་ཀྑ་ཝེ, པཱ་ཏི་མོ་ཀྑེ ཨུ་དྡི་སྶ་མཱ་ནེ ཨེ་ཝཾ ཝ་དེ་ཐ – ‘‘ཨི་དཱ་ནེ་ཝ ཁོ མ་ཡཾ ཛཱ་ནཱ་མ, ཨ་ཡ་མྤི ཀི་ར དྷ་མྨོ སུ་ཏྟཱ་ག་ཏོ སུ་ཏྟ་པ་རི་ཡཱ་པ་ནྣོ ཨ་ནྭ་དྡྷ་མཱ་སཾ ཨུ་དྡེ་སཾ ཨཱ་ག་ཙྪ་ཏཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, པཱ་ཏི་མོ་ཀྑེ ཨུ་དྡི་སྶ་མཱ་ནེ ཨེ་ཝཾ ཝ་ཀྑ་ཐ – ‘‘ཨི་དཱ་ནེ་ཝ ཁོ མ་ཡཾ ཛཱ་ནཱ་མ, ཨ་ཡ་མྤི ཀི་ར དྷ་མྨོ སུ་ཏྟཱ་ག་ཏོ སུ་ཏྟ་པ་རི་ཡཱ་པ་ནྣོ ཨ་ནྭ་དྡྷ་མཱ་སཾ ཨུ་དྡེ་སཾ ཨཱ་ག་ཙྪ་ཏཱི’’ཏི! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༤༤༤. ‘‘ཡོ པ་ན བྷི་ཀྑུ ཨ་ནྭ་དྡྷ་མཱ་སཾ པཱ་ཏི་མོ་ཀྑེ ཨུ་དྡི་སྶ་མཱ་ནེ ཨེ་ཝཾ ཝ་དེ་ཡྻ – ‘ཨི་དཱ་ནེ་ཝ ཁོ ཨ་ཧཾ ཛཱ་ནཱ་མི, ཨ་ཡ་མྤི ཀི་ར དྷ་མྨོ སུ་ཏྟཱ་ག་ཏོ སུ་ཏྟ་པ་རི་ཡཱ་པ་ནྣོ ཨ་ནྭ་དྡྷ་མཱ་སཾ ཨུ་དྡེ་སཾ ཨཱ་ག་ཙྪ་ཏཱི’ཏི. ཏ་ཉྩེ བྷི་ཀྑུཾ ཨ་ཉྙེ བྷི་ཀྑཱུ ཛཱ་ནེ་ཡྻུཾ ནི་སི་ནྣ་པུ་བྦཾ ཨི་མི་ནཱ བྷི་ཀྑུ་ནཱ དྭ་ཏྟི་ཀྑ་ཏྟུཾ པཱ་ཏི་མོ་ཀྑེ ཨུ་དྡི་སྶ་མཱ་ནེ, ཀོ པ་ན ཝཱ་དོ བྷི་ཡྻོ [བྷི་ཡྻོ་ཏི (སྱཱ.)], ན ཙ ཏ་སྶ བྷི་ཀྑུ་ནོ ཨ་ཉྙཱ་ཎ་ཀེ་ན མུ་ཏྟི ཨ་ཏྠི, ཡ་ཉྩ ཏ་ཏྠ ཨཱ་པ་ཏྟིཾ ཨཱ་པ་ནྣོ ཏ་ཉྩ ཡ་ཐཱ་དྷ་མྨོ ཀཱ་རེ་ཏ་བྦོ, ཨུ་ཏྟ་རི ཙ་སྶ མོ་ཧོ ཨཱ་རོ་པེ་ཏ་བྦོ – ‘ཏ་སྶ ཏེ, ཨཱ་ཝུ་སོ, ཨ་ལཱ་བྷཱ, ཏ་སྶ ཏེ དུ་ལླ་དྡྷཾ, ཡཾ ཏྭཾ པཱ་ཏི་མོ་ཀྑེ ཨུ་དྡི་སྶ་མཱ་ནེ ན སཱ་དྷུ་ཀཾ ཨ་ཊྛིཾ ཀ་ཏྭཱ [ཨ་ཊྛི་ཀ་ཏྭཱ (སྱཱ. ཀ.)] མ་ན་སི ཀ་རོ་སཱི’ཏི. ཨི་དཾ ཏ་སྨིཾ མོ་ཧ་ན་ཀེ པཱ་ཙི་ཏྟི་ཡ’’ནྟི.
༤༤༥. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ཨ་ནྭ་དྡྷ་མཱ་སནྟི ཨ་ནུ་པོ་ས་ཐི་ཀཾ.
པཱ་ཏི་མོ་ཀྑེ ཨུ་དྡི་སྶ་མཱ་ནེཏི ཨུ་དྡི་ས་ནྟེ.
ཨེ་ཝཾ ཝ་དེ་ཡྻཱཏི ཨ་ནཱ་ཙཱ་རཾ ཨཱ་ཙ་རི་ཏྭཱ – ‘‘ཨ་ཉྙཱ་ཎ་ཀེ་ན ཨཱ་པ་ནྣོ་ཏི ཛཱ་ན་ནྟཱུ’’ཏི པཱ་ཏི་མོ་ཀྑེ ཨུ་དྡི་སྶ་མཱ་ནེ ཨེ་ཝཾ ཝ་དེ་ཏི – ‘‘ཨི་དཱ་ནེ་ཝ ཁོ ཨ་ཧཾ ཛཱ་ནཱ་མི, ཨ་ཡ་མྤི ཀི་ར དྷ་མྨོ སུ་ཏྟཱ་ག་ཏོ སུ་ཏྟ་པ་རི་ཡཱ་པ་ནྣོ ཨ་ནྭ་དྡྷ་མཱ་སཾ ཨུ་དྡེ་སཾ ཨཱ་ག་ཙྪ་ཏཱི’’ཏི, ཨཱ་པ་ཏྟི དུ་ཀྐ་ཊ་སྶ.
ཏ་ཉྩེ མོ་ཧེ་ཏུ་ཀཱ་མཾ བྷི་ཀྑུཾ ཨ་ཉྙེ བྷི་ཀྑཱུ ཛཱ་ནེ་ཡྻུཾ ནི་སི་ནྣ་པུ་བྦཾ ཨི་མི་ནཱ བྷི་ཀྑུ་ནཱ དྭ་ཏྟི་ཀྑ་ཏྟུཾ པཱ་ཏི་མོ་ཀྑེ ཨུ་དྡི་སྶ་མཱ་ནེ, ཀོ པ་ན ཝཱ་དོ བྷི་ཡྻོ, ན ཙ ཏ་སྶ བྷི་ཀྑུ་ནོ ཨ་ཉྙཱ་ཎ་ཀེ་ན མུ་ཏྟི ཨ་ཏྠི, ཡ་ཉྩ ཏ་ཏྠ ཨཱ་པ་ཏྟིཾ ཨཱ་པ་ནྣོ, ཏ་ཉྩ ཡ་ཐཱ་དྷ་མྨོ ཀཱ་རེ་ཏ་བྦོ, ཨུ་ཏྟ་རི ཙ་སྶ མོ་ཧོ ཨཱ་རོ་པེ་ཏ་བྦོ. ཨེ་ཝ་ཉྩ པ་ན, བྷི་ཀྑ་ཝེ, ཨཱ་རོ་པེ་ཏ་བྦོ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –
༤༤༦. ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ཨི་ཏྠ་ནྣཱ་མོ བྷི་ཀྑུ པཱ་ཏི་མོ་ཀྑེ ཨུ་དྡི་སྶ་མཱ་ནེ ན སཱ་དྷུ་ཀཾ ཨ་ཊྛིཾ ཀ་ཏྭཱ མ་ན་སི ཀ་རོ་ཏི. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨི་ཏྠ་ནྣཱ་མ་སྶ བྷི་ཀྑུ་ནོ མོ་ཧཾ ཨཱ་རོ་པེ་ཡྻ. ཨེ་སཱ ཉ་ཏྟི.
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ཨི་ཏྠ་ནྣཱ་མོ བྷི་ཀྑུ པཱ་ཏི་མོ་ཀྑེ ཨུ་དྡི་སྶ་མཱ་ནེ ན སཱ་དྷུ་ཀཾ ཨ་ཊྛིཾ ཀ་ཏྭཱ མ་ན་སི ཀ་རོ་ཏི. ས་ངྒྷོ ཨི་ཏྠ་ནྣཱ་མ་སྶ བྷི་ཀྑུ་ནོ མོ་ཧཾ ཨཱ་རོ་པེ་ཏི. ཡ་སྶཱ་ཡ་སྨ་ཏོ ཁ་མ་ཏི ཨི་ཏྠ་ནྣཱ་མ་སྶ བྷི་ཀྑུ་ནོ མོ་ཧ་སྶ ཨཱ་རོ་པ་ནཱ, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ.
‘‘ཨཱ་རོ་པི་ཏོ ས་ངྒྷེ་ན ཨི་ཏྠ་ནྣཱ་མ་སྶ བྷི་ཀྑུ་ནོ མོ་ཧོ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
ཨ་ནཱ་རོ་པི་ཏེ མོ་ཧེ མོ་ཧེ་ཏི, ཨཱ་པ་ཏྟི དུ་ཀྐ་ཊ་སྶ. ཨཱ་རོ་པི་ཏེ མོ་ཧེ མོ་ཧེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༤༤༧. དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱི, ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ ཝེ་མ་ཏི་ཀོ, ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱི མོ་ཧེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ.
༤༤༨. ཨ་ནཱ་པ་ཏྟི ན ཝི་ཏྠཱ་རེ་ན སུ་ཏཾ ཧོ་ཏི, ཨཱུ་ན་ཀ་དྭ་ཏྟི་ཀྑ་ཏྟུཾ ཝི་ཏྠཱ་རེ་ན སུ་ཏཾ ཧོ་ཏི, ན མོ་ཧེ་ཏུ་ཀཱ་མ་སྶ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
མོ་ཧ་ན་སི་ཀྑཱ་པ་དཾ ནི་ཊྛི་ཏཾ ཏ་ཏི་ཡཾ.