༧. ན་ཧཱ་ན་སི་ཀྑཱ་པ་དཾ

༣༥༧. ཏེ་ན ས་མ་ཡེ་ན བུ་དྡྷོ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན བྷི་ཀྑཱུ ཏ་པོ་དེ ན་ཧཱ་ཡ་ནྟི. ཏེ་ན ཁོ པ་ན ས་མ་ཡེ་ན [ཨ་ཐ ཁོ (སཱི. སྱཱ.)] རཱ་ཛཱ མཱ་ག་དྷོ སེ་ནི་ཡོ བི་མྦི་སཱ་རོ ‘‘སཱི་སཾ ན་ཧཱ་ཡི་སྶཱ་མཱི’’ཏི ཏ་པོ་དཾ ག་ནྟྭཱ – ‘‘ཡཱ་ཝཱ་ཡྻཱ ན་ཧཱ་ཡ་ནྟཱི’’ཏི ཨེ་ཀ་མ་ནྟཾ པ་ཊི་མཱ་ནེ་སི. བྷི་ཀྑཱུ ཡཱ་ཝ ས་མ་ནྡྷ་ཀཱ་རཱ ན་ཧཱ་ཡིཾ་སུ. ཨ་ཐ ཁོ རཱ་ཛཱ མཱ་ག་དྷོ སེ་ནི་ཡོ བི་མྦི་སཱ་རོ ཝི་ཀཱ་ལེ སཱི་སཾ ན་ཧཱ་ཡི་ཏྭཱ, ན་ག་ར་དྭཱ་རེ ཐ་ཀི་ཏེ བ་ཧི་ན་ག་རེ ཝ་སི་ཏྭཱ, ཀཱ་ལ་སྶེ་ཝ ཨ་ས་མྦྷི་ནྣེ་ན ཝི་ལེ་པ་ནེ་ན ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ རཱ་ཛཱ་ནཾ མཱ་ག་དྷཾ སེ་ནི་ཡཾ བི་མྦི་སཱ་རཾ བྷ་ག་ཝཱ ཨེ་ཏ་ད་ཝོ་ཙ – ‘‘ཀི་སྶ ཏྭཾ, མ་ཧཱ་རཱ་ཛ, ཀཱ་ལ་སྶེ་ཝ ཨཱ་ག་ཏོ ཨ་ས་མྦྷི་ནྣེ་ན ཝི་ལེ་པ་ནེ་ནཱ’’ཏི? ཨ་ཐ ཁོ རཱ་ཛཱ མཱ་ག་དྷོ སེ་ནི་ཡོ བི་མྦི་སཱ་རོ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སི. ཨ་ཐ ཁོ བྷ་ག་ཝཱ རཱ་ཛཱ་ནཾ མཱ་ག་དྷཾ སེ་ནི་ཡཾ བི་མྦི་སཱ་རཾ དྷ་མྨི་ཡཱ ཀ་ཐཱ་ཡ ས་ནྡ་སྶེ་སི ས་མཱ་ད་པེ་སི ས་མུ་ཏྟེ་ཛེ་སི ས་མྤ་ཧཾ་སེ་སི. ཨ་ཐ ཁོ རཱ་ཛཱ མཱ་ག་དྷོ སེ་ནི་ཡོ བི་མྦི་སཱ་རོ བྷ་ག་ཝ་ཏཱ དྷ་མྨི་ཡཱ ཀ་ཐཱ་ཡ ས་ནྡ་སྶི་ཏོ ས་མཱ་ད་པི་ཏོ ས་མུ་ཏྟེ་ཛི་ཏོ ས་མྤ་ཧཾ་སི་ཏོ ཨུ་ཊྛཱ་ཡཱ་ས་ནཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ པ་ཀྐཱ་མི. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ བྷི་ཀྑུ་ས་ངྒྷཾ ས་ནྣི་པཱ་ཏཱ་པེ་ཏྭཱ བྷི་ཀྑཱུ པ་ཊི་པུ་ཙྪི – ‘‘ས་ཙྩཾ ཀི་ར, བྷི་ཀྑ་ཝེ, བྷི་ཀྑཱུ རཱ་ཛཱ་ན་མྤི པ་སྶི་ཏྭཱ ན མ་ཏྟཾ ཛཱ་ནི་ཏྭཱ ན་ཧཱ་ཡ་ནྟཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏེ, བྷི་ཀྑ་ཝེ, མོ་གྷ་པུ་རི་སཱ རཱ་ཛཱ་ན་མྤི པ་སྶི་ཏྭཱ ན མ་ཏྟཾ ཛཱ་ནི་ཏྭཱ ན་ཧཱ་ཡི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –

‘‘ཡོ པ་ན བྷི་ཀྑུ ཨོ་རེ་ན་དྡྷ་མཱ་སཾ ན་ཧཱ་ཡེ་ཡྻ, པཱ་ཙི་ཏྟི་ཡ’’ནྟི.