༦. ཙཱ་རི་ཏྟ་སི་ཀྑཱ་པ་དཾ

༢༩༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨ་ཏོ ཨུ་པ་ན་ནྡ་སྶ ས་ཀྱ་པུ་ཏྟ་སྶ ཨུ་པ་ཊྛཱ་ཀ་ཀུ་ལཾ ཨཱ་ཡ་སྨ་ནྟཾ ཨུ་པ་ན་ནྡཾ ས་ཀྱ་པུ་ཏྟཾ བྷ་ཏྟེ་ན ནི་མ་ནྟེ་སི. ཨ་ཉྙེ་པི བྷི་ཀྑཱུ བྷ་ཏྟེ་ན ནི་མ་ནྟེ་སི. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ པུ་རེ་བྷ་ཏྟཾ, ཀུ་ལཱ་ནི པ་ཡི་རུ་པཱ་ས་ཏི. ཨ་ཐ ཁོ ཏེ བྷི་ཀྑཱུ ཏེ མ་ནུ་སྶེ ཨེ་ཏ་ད་ཝོ་ཙུཾ – ‘‘དེ་ཐཱ་ཝུ་སོ བྷ་ཏྟ’’ནྟི. ‘‘ཨཱ་ག་མེ་ཐ, བྷ་ནྟེ, ཡཱ་ཝཱ་ཡྻོ ཨུ་པ་ན་ནྡོ ཨཱ་ག་ཙྪ་ཏཱི’’ཏི. དུ་ཏི་ཡ་མྤི ཁོ ཏེ བྷི་ཀྑཱུ…པེ… ཏ་ཏི་ཡ་མྤི ཁོ ཏེ བྷི་ཀྑཱུ ཏེ མ་ནུ་སྶེ ཨེ་ཏ་ད་ཝོ་ཙུཾ – ‘‘དེ་ཐཱ་ཝུ་སོ, བྷ་ཏྟཾ; པུ་རེ ཀཱ་ལོ ཨ་ཏི་ཀྐ་མ་ཏཱི’’ཏི. ‘‘ཡ་མྤི མ་ཡཾ, བྷ་ནྟེ, བྷ་ཏྟཾ ཀ་རི་མྷཱ ཨ་ཡྻ་སྶ ཨུ་པ་ན་ནྡ་སྶ ཀཱ་ར་ཎཱ. ཨཱ་ག་མེ་ཐ, བྷ་ནྟེ, ཡཱ་ཝཱ་ཡྻོ ཨུ་པ་ན་ནྡོ ཨཱ་ག་ཙྪ་ཏཱི’’ཏི.

ཨ་ཐ ཁོ ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ པུ་རེ་བྷ་ཏྟཾ ཀུ་ལཱ་ནི པ་ཡི་རུ་པཱ་སི་ཏྭཱ དི་ཝཱ ཨཱ་ག་ཙྪ་ཏི. བྷི་ཀྑཱུ ན ཙི་ཏྟ་རཱུ་པཾ བྷུ་ཉྫིཾ་སུ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ ནི་མ་ནྟི་ཏོ ས་བྷ་ཏྟོ ས་མཱ་ནོ པུ་རེ་བྷ་ཏྟཾ ཀུ་ལེ་སུ ཙཱ་རི་ཏྟཾ ཨཱ་པ་ཛྫི་སྶ་ཏཱི’’ཏི…པེ… ས་ཙྩཾ ཀི་ར ཏྭཾ, ཨུ་པ་ན་ནྡ, ནི་མ་ནྟི་ཏོ ས་བྷ་ཏྟོ ས་མཱ་ནོ པུ་རེ་བྷ་ཏྟཾ ཀུ་ལེ་སུ ཙཱ་རི་ཏྟཾ ཨཱ་པ་ཛྫ་སཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, ནི་མ་ནྟི་ཏོ ས་བྷ་ཏྟོ ས་མཱ་ནོ པུ་རེ་བྷ་ཏྟཾ ཀུ་ལེ་སུ ཙཱ་རི་ཏྟཾ ཨཱ་པ་ཛྫི་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –

‘‘ཡོ པ་ན བྷི་ཀྑུ ནི་མ་ནྟི་ཏོ ས་བྷ་ཏྟོ ས་མཱ་ནོ པུ་རེ་བྷ་ཏྟཾ ཀུ་ལེ་སུ ཙཱ་རི་ཏྟཾ ཨཱ་པ་ཛྫེ་ཡྻ, པཱ་ཙི་ཏྟི་ཡ’’ནྟི.

ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.

༢༩༥. [མ་ཧཱ་ཝ. ༢༧༧] ཏེ་ན ཁོ པ་ན ས་མ་ཡེ་ན ཨཱ་ཡ་སྨ་ཏོ ཨུ་པ་ན་ནྡ་སྶ ས་ཀྱ་པུ་ཏྟ་སྶ ཨུ་པ་ཊྛཱ་ཀ་ཀུ་ལཾ ས་ངྒྷ་སྶ་ཏྠཱ་ཡ ཁཱ་ད་ནཱི་ཡཾ པཱ་ཧེ་སི – ‘‘ཨ་ཡྻ་སྶ ཨུ་པ་ན་ནྡ་སྶ ད་སྶེ་ཏྭཱ ས་ངྒྷ་སྶ དཱ་ཏ་བྦ’’ནྟི. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ གཱ་མཾ པི་ཎྜཱ་ཡ པ་ཝི་ཊྛོ ཧོ་ཏི. ཨ་ཐ ཁོ ཏེ མ་ནུ་སྶཱ ཨཱ་རཱ་མཾ ག་ནྟྭཱ བྷི་ཀྑཱུ པུ་ཙྪིཾ་སུ – ‘‘ཀ་ཧཾ, བྷ་ནྟེ, ཨ་ཡྻོ ཨུ་པ་ན་ནྡོ’’ཏི? ‘‘ཨེ་སཱ་ཝུ་སོ, ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ གཱ་མཾ པི་ཎྜཱ་ཡ པ་ཝི་ཊྛོ’’ཏི. ‘‘ཨི་དཾ, བྷ་ནྟེ, ཁཱ་ད་ནཱི་ཡཾ ཨ་ཡྻ་སྶ ཨུ་པ་ན་ནྡ་སྶ ད་སྶེ་ཏྭཱ ས་ངྒྷ་སྶ དཱ་ཏ་བྦ’’ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཏེ་ན ཧི, བྷི་ཀྑ་ཝེ, པ་ཊི་གྒ་ཧེ་ཏྭཱ ནི་ཀྑི་པ་ཐ ཡཱ་ཝ ཨུ་པ་ན་ནྡོ ཨཱ་ག་ཙྪ་ཏཱི’’ཏི.

ཨ་ཐ ཁོ ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ – ‘‘བྷ་ག་ཝ་ཏཱ པ་ཊི་ཀྑི་ཏྟཾ པུ་རེ་བྷ་ཏྟཾ ཀུ་ལེ་སུ ཙཱ་རི་ཏྟཾ ཨཱ་པ་ཛྫི་ཏུ’’ནྟི པ་ཙྪཱ་བྷ་ཏྟཾ ཀུ་ལཱ་ནི པ་ཡི་རུ་པཱ་སི་ཏྭཱ དི་ཝཱ པ་ཊི་ཀྐ་མི, ཁཱ་ད་ནཱི་ཡཾ ཨུ་སྶཱ་རི་ཡི་ཏྠ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ པ་ཙྪཱ་བྷ་ཏྟཾ ཀུ་ལེ་སུ ཙཱ་རི་ཏྟཾ ཨཱ་པ་ཛྫི་སྶ་ཏཱི’’ཏི…པེ… ས་ཙྩཾ ཀི་ར ཏྭཾ, ཨུ་པ་ན་ནྡ, པ་ཙྪཱ་བྷ་ཏྟཾ ཀུ་ལེ་སུ ཙཱ་རི་ཏྟཾ ཨཱ་པ་ཛྫ་སཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, པ་ཙྪཱ་བྷ་ཏྟཾ ཀུ་ལེ་སུ ཙཱ་རི་ཏྟཾ ཨཱ་པ་ཛྫི་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན བྷི་ཀྑ་ཝེ ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –

‘‘ཡོ པ་ན བྷི་ཀྑུ ནི་མ་ནྟི་ཏོ ས་བྷ་ཏྟོ ས་མཱ་ནོ པུ་རེ་བྷ་ཏྟཾ ཝཱ པ་ཙྪཱ་བྷ་ཏྟཾ ཝཱ ཀུ་ལེ་སུ ཙཱ་རི་ཏྟཾ ཨཱ་པ་ཛྫེ་ཡྻ, པཱ་ཙི་ཏྟི་ཡ’’ནྟི.

ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.

༢༩༦. ཏེ་ན ཁོ པ་ན ས་མ་ཡེ་ན བྷི་ཀྑཱུ ཙཱི་ཝ་ར་དཱ་ན་ས་མ་ཡེ ཀུ་ཀྐུ་ཙྩཱ་ཡ་ནྟཱ ཀུ་ལཱ་ནི ན པ་ཡི་རུ་པཱ་ས་ནྟི. ཙཱི་ཝ་རཾ པ་རི་ཏྟཾ ཨུ་པྤ་ཛྫ་ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ཨ་ནུ་ཛཱ་ནཱ་མི, བྷི་ཀྑ་ཝེ, ཙཱི་ཝ་ར་དཱ་ན་ས་མ་ཡེ ཀུ་ལཱ་ནི པ་ཡི་རུ་པཱ་སི་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –

‘‘ཡོ པ་ན བྷི་ཀྑུ ནི་མ་ནྟི་ཏོ ས་བྷ་ཏྟོ ས་མཱ་ནོ པུ་རེ་བྷ་ཏྟཾ ཝཱ པ་ཙྪཱ་བྷ་ཏྟཾ ཝཱ ཀུ་ལེ་སུ ཙཱ་རི་ཏྟཾ ཨཱ་པ་ཛྫེ་ཡྻ, ཨ་ཉྙ་ཏྲ ས་མ་ཡཱ, པཱ་ཙི་ཏྟི་ཡཾ. ཏ་ཏྠཱ་ཡཾ ས་མ་ཡོ. ཙཱི་ཝ་ར་དཱ་ན་ས་མ་ཡོ – ཨ་ཡཾ ཏ་ཏྠ ས་མ་ཡོ’’ཏི.

ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.

༢༩༧. ཏེ་ན ཁོ པ་ན ས་མ་ཡེ་ན བྷི་ཀྑཱུ ཙཱི་ཝ་ར་ཀ་མྨཾ ཀ་རོ་ནྟི, ཨ་ཏྠོ ཙ ཧོ་ཏི སཱུ་ཙི་ཡཱ་པི སུ་ཏྟེ་ན་པི ས་ཏྠ་ཀེ་ན་པི. བྷི་ཀྑཱུ ཀུ་ཀྐུ་ཙྩཱ་ཡ་ནྟཱ ཀུ་ལཱ་ནི ན པ་ཡི་རུ་པཱ་ས་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ཨ་ནུ་ཛཱ་ནཱ་མི, བྷི་ཀྑ་ཝེ, ཙཱི་ཝ་ར་ཀཱ་ར་ས་མ་ཡེ ཀུ་ལཱ་ནི པ་ཡི་རུ་པཱ་སི་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –

‘‘ཡོ པ་ན བྷི་ཀྑུ ནི་མ་ནྟི་ཏོ ས་བྷ་ཏྟོ ས་མཱ་ནོ པུ་རེ་བྷ་ཏྟཾ ཝཱ པ་ཙྪཱ་བྷ་ཏྟཾ ཝཱ ཀུ་ལེ་སུ ཙཱ་རི་ཏྟཾ ཨཱ་པ་ཛྫེ་ཡྻ, ཨ་ཉྙ་ཏྲ ས་མ་ཡཱ, པཱ་ཙི་ཏྟི་ཡཾ. ཏ་ཏྠཱ་ཡཾ ས་མ་ཡོ. ཙཱི་ཝ་ར་དཱ་ན་ས་མ་ཡོ, ཙཱི་ཝ་ར་ཀཱ་ར་ས་མ་ཡོ – ཨ་ཡཾ ཏ་ཏྠ ས་མ་ཡོ’’ཏི.

ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.

༢༩༨. ཏེ་ན ཁོ པ་ན ས་མ་ཡེ་ན བྷི་ཀྑཱུ གི་ལཱ་ནཱ ཧོ་ནྟི, ཨ་ཏྠོ ཙ ཧོ་ཏི བྷེ་ས་ཛྫེ་ཧི. བྷི་ཀྑཱུ ཀུ་ཀྐུ་ཙྩཱ་ཡ་ནྟཱ ཀུ་ལཱ་ནི ན པ་ཡི་རུ་པཱ་ས་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ཨ་ནུ་ཛཱ་ནཱ་མི, བྷི་ཀྑ་ཝེ, ས་ནྟཾ བྷི་ཀྑུཾ ཨཱ་པུ་ཙྪཱ ཀུ་ལཱ་ནི པ་ཡི་རུ་པཱ་སི་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –

༢༩༩. ‘‘ཡོ པ་ན བྷི་ཀྑུ ནི་མ་ནྟི་ཏོ ས་བྷ་ཏྟོ ས་མཱ་ནོ ས་ནྟཾ བྷི་ཀྑུཾ ཨ་ནཱ་པུ་ཙྪཱ པུ་རེ་བྷ་ཏྟཾ ཝཱ པ་ཙྪཱ་བྷ་ཏྟཾ ཝཱ ཀུ་ལེ་སུ ཙཱ་རི་ཏྟཾ ཨཱ་པ་ཛྫེ་ཡྻ, ཨ་ཉྙ་ཏྲ ས་མ་ཡཱ, པཱ་ཙི་ཏྟི་ཡཾ. ཏ་ཏྠཱ་ཡཾ ས་མ་ཡོ. ཙཱི་ཝ་ར་དཱ་ན་ས་མ་ཡོ, ཙཱི་ཝ་ར་ཀཱ་ར་ས་མ་ཡོ – ཨ་ཡཾ ཏ་ཏྠ ས་མ་ཡོ’’ཏི.

༣༠༠. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.

ནི་མ་ནྟི་ཏོ ནཱ་མ པ་ཉྩ་ནྣཾ བྷོ་ཛ་ནཱ་ནཾ ཨ་ཉྙ་ཏ་རེ་ན བྷོ་ཛ་ནེ་ན ནི་མ་ནྟི་ཏོ.

ས་བྷ་ཏྟོ ནཱ་མ ཡེ་ན ནི་མ་ནྟི་ཏོ ཏེ་ན ས་བྷ་ཏྟོ.

ས་ནྟཾ ནཱ་མ བྷི་ཀྑུཾ ས་ཀྐཱ ཧོ་ཏི ཨཱ་པུ་ཙྪཱ པ་ཝི་སི་ཏུཾ.

ཨ་ས་ནྟཾ ནཱ་མ བྷི་ཀྑུཾ ན ས་ཀྐཱ ཧོ་ཏི ཨཱ་པུ་ཙྪཱ པ་ཝི་སི་ཏུཾ.

པུ་རེ་བྷ་ཏྟཾ ནཱ་མ ཡེ་ན ནི་མ་ནྟི་ཏོ ཏཾ ཨ་བྷུ་ཏྟཱ་ཝཱི.

པ་ཙྪཱ་བྷ་ཏྟཾ ནཱ་མ ཡེ་ན ནི་མ་ནྟི་ཏོ ཏཾ ཨ་ནྟ་མ་སོ ཀུ་ས་གྒེ་ན་པི [ཨ་རུ་ཎུ་གྒ་མ་ནེ་པི (སཱི.)] བྷུ་ཏྟཾ ཧོ་ཏི.

ཀུ་ལཾ ནཱ་མ ཙ་ཏྟཱ་རི ཀུ་ལཱ་ནི – ཁ་ཏྟི་ཡ་ཀུ་ལཾ, བྲཱ་ཧྨ་ཎ་ཀུ་ལཾ, ཝེ་སྶ་ཀུ་ལཾ, སུ་དྡ་ཀུ་ལཾ.

ཀུ་ལེ་སུ ཙཱ་རི་ཏྟཾ ཨཱ་པ་ཛྫེ་ཡྻཱཏི ཨ་ཉྙ་སྶ གྷ་རཱུ་པ་ཙཱ་རཾ ཨོ་ཀྐ་མ་ནྟ་སྶ ཨཱ་པ་ཏྟི དུ་ཀྐ་ཊ་སྶ. པ་ཋ་མཾ པཱ་དཾ ཨུ་མྨཱ་རཾ ཨ་ཏི་ཀྐཱ་མེ་ཏི, ཨཱ་པ་ཏྟི དུ་ཀྐ་ཊ་སྶ. དུ་ཏི་ཡཾ པཱ་དཾ ཨ་ཏི་ཀྐཱ་མེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.

ཨ་ཉྙ་ཏྲ ས་མ་ཡཱཏི ཋ་པེ་ཏྭཱ ས་མ་ཡཾ.

ཙཱི་ཝ་ར་དཱ་ན་ས་མ་ཡོ ནཱ་མ ཨ་ན་ཏྠ་ཏེ ཀ་ཐི་ནེ ཝ་སྶཱ་ན་སྶ པ་ཙྪི་མོ མཱ་སོ, ཨ་ཏྠ་ཏེ ཀ་ཐི་ནེ པ་ཉྩ མཱ་སཱ.

ཙཱི་ཝ་ར་ཀཱ་ར་ས་མ་ཡོ ནཱ་མ ཙཱི་ཝ་རེ ཀ་ཡི་ར་མཱ་ནེ.

༣༠༡. ནི་མ་ནྟི་ཏེ ནི་མ་ནྟི་ཏ་ས་ཉྙཱི ས་ནྟཾ བྷི་ཀྑུཾ ཨ་ནཱ་པུ་ཙྪཱ པུ་རེ་བྷ་ཏྟཾ ཝཱ པ་ཙྪཱ་བྷ་ཏྟཾ ཝཱ ཀུ་ལེ་སུ ཙཱ་རི་ཏྟཾ ཨཱ་པ་ཛྫ་ཏི, ཨ་ཉྙ་ཏྲ ས་མ་ཡཱ, ཨཱ་པ་ཏྟི པཱ་ཙི་ཏྟི་ཡ་སྶ. ནི་མ་ནྟི་ཏེ ཝེ་མ་ཏི་ཀོ ས་ནྟཾ བྷི་ཀྑུཾ ཨ་ནཱ་པུ་ཙྪཱ པུ་རེ་བྷ་ཏྟཾ ཝཱ པ་ཙྪཱ་བྷ་ཏྟཾ ཝཱ ཀུ་ལེ་སུ ཙཱ་རི་ཏྟཾ ཨཱ་པ་ཛྫ་ཏི, ཨ་ཉྙ་ཏྲ ས་མ་ཡཱ, ཨཱ་པ་ཏྟི པཱ་ཙི་ཏྟི་ཡ་སྶ. ནི་མ་ནྟི་ཏེ ཨ་ནི་མ་ནྟི་ཏ་ས་ཉྙཱི ས་ནྟཾ བྷི་ཀྑུཾ ཨ་ནཱ་པུ་ཙྪཱ པུ་རེ་བྷ་ཏྟཾ ཝཱ པ་ཙྪཱ་བྷ་ཏྟཾ ཝཱ ཀུ་ལེ་སུ ཙཱ་རི་ཏྟཾ ཨཱ་པ་ཛྫ་ཏི, ཨ་ཉྙ་ཏྲ ས་མ་ཡཱ, ཨཱ་པ་ཏྟི པཱ་ཙི་ཏྟི་ཡ་སྶ.

ཨ་ནི་མ་ནྟི་ཏེ ནི་མ་ནྟི་ཏ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་ནི་མ་ནྟི་ཏེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་ནི་མ་ནྟི་ཏེ ཨ་ནི་མ་ནྟི་ཏ་ས་ཉྙཱི, ཨ་ནཱ་པ་ཏྟི.

༣༠༢. ཨ་ནཱ་པ་ཏྟི ས་མ་ཡེ, ས་ནྟཾ བྷི་ཀྑུཾ ཨཱ་པུ་ཙྪཱ པ་ཝི་ས་ཏི, ཨ་ས་ནྟཾ བྷི་ཀྑུཾ ཨ་ནཱ་པུ་ཙྪཱ པ་ཝི་ས་ཏི, ཨ་ཉྙ་སྶ གྷ་རེ་ན མ་གྒོ ཧོ་ཏི, གྷ་རཱུ་པ་ཙཱ་རེ་ན མ་གྒོ ཧོ་ཏི, ཨ་ནྟ་རཱ་རཱ་མཾ ག་ཙྪ་ཏི, བྷི་ཀྑུ་ནུ་པ་སྶ་ཡཾ ག་ཙྪ་ཏི, ཏི་ཏྠི་ཡ་སེ་ཡྻཾ ག་ཙྪ་ཏི, པ་ཊི་ཀྐ་མ་ནཾ ག་ཙྪ་ཏི, བྷ་ཏྟི་ཡ་གྷ་རཾ ག་ཙྪ་ཏི, ཨཱ་པ་དཱ་སུ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.

ཙཱ་རི་ཏྟ་སི་ཀྑཱ་པ་དཾ ནི་ཊྛི་ཏཾ ཚ་ཊྛཾ.