༣. ས་བྷོ་ཛ་ན་སི་ཀྑཱ་པ་དཾ
༢༧༩. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ ས་ཧཱ་ཡ་ཀ་སྶ གྷ་རཾ ག་ནྟྭཱ ཏ་སྶ པ་ཛཱ་པ་ཏི་ཡཱ ས་དྡྷིཾ ས་ཡ་ནི་གྷ་རེ [ས་ཡ་ནཱི་གྷ་རེ (སྱཱ.)] ནི་ས་ཛྫཾ ཀ་པྤེ་སི. ཨ་ཐ ཁོ སོ པུ་རི་སོ ཡེ་ནཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨུ་པ་ན་ནྡཾ ས་ཀྱ་པུ་ཏྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ སོ པུ་རི་སོ པ་ཛཱ་པ་ཏིཾ ཨེ་ཏ་ད་ཝོ་ཙ – ‘‘ད་དེ་ཧཱ་ཡྻ་སྶ བྷི་ཀྑ’’ནྟི. ཨ་ཐ ཁོ སཱ ཨི་ཏྠཱི ཨཱ་ཡ་སྨ་ཏོ ཨུ་པ་ན་ནྡ་སྶ ས་ཀྱ་པུ་ཏྟ་སྶ བྷི་ཀྑཾ ཨ་དཱ་སི. ཨ་ཐ ཁོ སོ པུ་རི་སོ ཨཱ་ཡ་སྨ་ནྟཾ ཨུ་པ་ན་ནྡཾ ས་ཀྱ་པུ་ཏྟཾ ཨེ་ཏ་ད་ཝོ་ཙ – ‘‘ག་ཙྪ་ཐ, བྷ་ནྟེ, ཡ་ཏོ ཨ་ཡྻ་སྶ བྷི་ཀྑཱ དི་ནྣཱ’’ཏི. ཨ་ཐ ཁོ སཱ ཨི་ཏྠཱི ས་ལླ་ཀྑེ་ཏྭཱ – ‘‘པ་རི་ཡུ་ཊྛི་ཏོ ཨ་ཡཾ པུ་རི་སོ’’ཏི, ཨཱ་ཡ་སྨ་ནྟཾ ཨུ་པ་ན་ནྡཾ ས་ཀྱ་པུ་ཏྟཾ ཨེ་ཏ་ད་ཝོ་ཙ – ‘‘ནི་སཱི་ད་ཐ, བྷ་ནྟེ, མཱ ཨ་ག་མི་ཏྠཱ’’ཏི. དུ་ཏི་ཡ་མྤི ཁོ སོ པུ་རི་སོ…པེ… ཏ་ཏི་ཡ་མྤི ཁོ སོ པུ་རི་སོ ཨཱ་ཡ་སྨ་ནྟཾ ཨུ་པ་ན་ནྡཾ ས་ཀྱ་པུ་ཏྟཾ ཨེ་ཏ་ད་ཝོ་ཙ – ‘‘ག་ཙྪ་ཐ, བྷ་ནྟེ, ཡ་ཏོ ཨ་ཡྻ་སྶ བྷི་ཀྑཱ དི་ནྣཱ’’ཏི. ཏ་ཏི་ཡ་མྤི ཁོ སཱ ཨི་ཏྠཱི ཨཱ་ཡ་སྨ་ནྟཾ ཨུ་པ་ན་ནྡཾ ས་ཀྱ་པུ་ཏྟཾ ཨེ་ཏ་ད་ཝོ་ཙ – ‘‘ནི་སཱི་ད་ཐ, བྷ་ནྟེ, མཱ ཨ་ག་མི་ཏྠཱ’’ཏི.
ཨ་ཐ ཁོ སོ པུ་རི་སོ ནི་ཀྑ་མི་ཏྭཱ བྷི་ཀྑཱུ ཨུ་ཛ྄ཛྷཱ་པེ་སི – ‘‘ཨ་ཡཾ, བྷ་ནྟེ, ཨ་ཡྻོ ཨུ་པ་ན་ནྡོ མ་ཡ྄ཧཾ པ་ཛཱ་པ་ཏི་ཡཱ ས་དྡྷིཾ ས་ཡ་ནི་གྷ་རེ ནི་སི་ནྣོ. སོ མ་ཡཱ ཨུ་ཡྻོ་ཛཱི་ཡ་མཱ་ནོ ན ཨི་ཙྪ་ཏི ག་ནྟུཾ. བ་ཧུ་ཀི་ཙྩཱ མ་ཡཾ བ་ཧུ་ཀ་ར་ཎཱི་ཡཱ’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ ས་བྷོ་ཛ་ནེ ཀུ་ལེ ཨ་ནུ་པ་ཁ་ཛྫ ནི་ས་ཛྫཾ ཀ་པྤེ་སྶ་ཏཱི’’ཏི…པེ… ས་ཙྩཾ ཀི་ར ཏྭཾ, ཨུ་པ་ན་ནྡ, ས་བྷོ་ཛ་ནེ ཀུ་ལེ ཨ་ནུ་པ་ཁ་ཛྫ ནི་ས་ཛྫཾ ཀ་པྤེ་སཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, ས་བྷོ་ཛ་ནེ ཀུ་ལེ ཨ་ནུ་པ་ཁ་ཛྫ ནི་ས་ཛྫཾ ཀ་པྤེ་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༢༨༠. ‘‘ཡོ པ་ན བྷི་ཀྑུ ས་བྷོ་ཛ་ནེ ཀུ་ལེ ཨ་ནུ་པ་ཁ་ཛྫ ནི་ས་ཛྫཾ ཀ་པྤེ་ཡྻ, པཱ་ཙི་ཏྟི་ཡ’’ནྟི.
༢༨༡. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ས་བྷོ་ཛ་ནཾ ནཱ་མ ཀུ་ལཾ ཨི་ཏྠཱི ཙེ་ཝ ཧོ་ཏི པུ་རི་སོ ཙ, ཨི་ཏྠཱི ཙ པུ་རི་སོ ཙ ཨུ་བྷོ ཨ་ནི་ཀྑ་ནྟཱ ཧོ་ནྟི, ཨུ་བྷོ ཨ་ཝཱི་ཏ་རཱ་གཱ.
ཨ་ནུ་པ་ཁ་ཛྫཱཏི ཨ་ནུ་པ་ཝི་སི་ཏྭཱ.
ནི་ས་ཛྫཾ ཀ་པྤེ་ཡྻཱཏི མ་ཧ་ལླ་ཀེ གྷ་རེ པི་ཊྛ་ས་ངྒྷཱ་ཊ་སྶ [པི་ཊྛི་ས་ངྒྷཱ་ཊ་སྶ (སྱཱ.)] ཧ་ཏྠ་པཱ་སཾ ཝི་ཛ་ཧི་ཏྭཱ ནི་སཱི་ད་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཁུ་དྡ་ཀེ གྷ་རེ པི་ཊྛི་ཝཾ་སཾ ཨ་ཏི་ཀྐ་མི་ཏྭཱ ནི་སཱི་ད་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༢༨༢. ས་ཡ་ནི་གྷ་རེ ས་ཡ་ནི་གྷ་ར་ས་ཉྙཱི ས་བྷོ་ཛ་ནེ ཀུ་ལེ ཨ་ནུ་པ་ཁ་ཛྫ ནི་ས་ཛྫཾ ཀ་པྤེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ས་ཡ་ནི་གྷ་རེ ཝེ་མ་ཏི་ཀོ ས་བྷོ་ཛ་ནེ ཀུ་ལེ ཨ་ནུ་པ་ཁ་ཛྫ ནི་ས་ཛྫཾ ཀ་པྤེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ས་ཡ་ནི་གྷ་རེ ན་ས་ཡ་ནི་གྷ་ར་ས་ཉྙཱི ས་བྷོ་ཛ་ནེ ཀུ་ལེ ཨ་ནུ་པ་ཁ་ཛྫ ནི་ས་ཛྫཾ ཀ་པྤེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ན་ས་ཡ་ནི་གྷ་རེ ས་ཡ་ནི་གྷ་ར་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ན་ས་ཡ་ནི་གྷ་རེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ན་ས་ཡ་ནི་གྷ་རེ ན་ས་ཡ་ནི་གྷ་ར་ས་ཉྙཱི, ཨ་ནཱ་པ་ཏྟི.
༢༨༣. ཨ་ནཱ་པ་ཏྟི མ་ཧ་ལླ་ཀེ གྷ་རེ པི་ཊྛ་ས་ངྒྷཱ་ཊ་སྶ ཧ་ཏྠ་པཱ་སཾ ཨ་ཝི་ཛ་ཧི་ཏྭཱ ནི་སཱི་ད་ཏི, ཁུ་དྡ་ཀེ གྷ་རེ པི་ཊྛི་ཝཾ་སཾ ཨ་ན་ཏི་ཀྐ་མི་ཏྭཱ ནི་སཱི་ད་ཏི, བྷི་ཀྑུ དུ་ཏི་ཡོ ཧོ་ཏི, ཨུ་བྷོ ནི་ཀྑ་ནྟཱ ཧོ་ནྟི, ཨུ་བྷོ ཝཱི་ཏ་རཱ་གཱ, ན་ས་ཡ་ནི་གྷ་རེ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ས་བྷོ་ཛ་ན་སི་ཀྑཱ་པ་དཾ ནི་ཊྛི་ཏཾ ཏ་ཏི་ཡཾ.