༡. ཨ་ཙེ་ལ་ཀ་སི་ཀྑཱ་པ་དཾ
༢༦༩. ཏེ་ན ས་མ་ཡེ་ན བུ་དྡྷོ བྷ་ག་ཝཱ ཝེ་སཱ་ལི་ཡཾ ཝི་ཧ་ར་ཏི མ་ཧཱ་ཝ་ནེ ཀཱུ་ཊཱ་གཱ་ར་སཱ་ལཱ་ཡཾ. ཏེ་ན ཁོ པ་ན ས་མ་ཡེ་ན ས་ངྒྷ་སྶ ཁཱ་ད་ནཱི་ཡཾ ཨུ་སྶ་ནྣཾ ཧོ་ཏི. ཨ་ཐ ཁོ ཨཱ་ཡ་སྨཱ ཨཱ་ན་ནྡོ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སི. ‘‘ཏེ་ན་ཧཱ་ན་ནྡ, ཝི་གྷཱ་སཱ་དཱ་ནཾ པཱུ་ཝཾ དེ་ཧཱི’’ཏི. ‘‘ཨེ་ཝཾ བྷ་ནྟེ’’ཏི ཁོ ཨཱ་ཡ་སྨཱ ཨཱ་ན་ནྡོ བྷ་ག་ཝ་ཏོ པ་ཊི་སྶུ་ཎི་ཏྭཱ ཝི་གྷཱ་སཱ་དེ པ་ཊི་པཱ་ཊི་ཡཱ ནི་སཱི་དཱ་པེ་ཏྭཱ ཨེ་ཀེ་ཀཾ པཱུ་ཝཾ དེ་ནྟོ ཨ་ཉྙ་ཏ་རི་སྶཱ པ་རི་བྦཱ་ཛི་ཀཱ་ཡ ཨེ་ཀཾ མ་ཉྙ་མཱ་ནོ དྭེ པཱུ་ཝེ ཨ་དཱ་སི. སཱ་མ་ནྟཱ པ་རི་བྦཱ་ཛི་ཀཱ་ཡོ ཏཾ པ་རི་བྦཱ་ཛི་ཀཾ ཨེ་ཏ་ད་ཝོ་ཙུཾ – ‘‘ཛཱ་རོ ཏེ ཨེ་སོ ས་མ་ཎོ’’ཏི. ‘‘ན མེ སོ ས་མ་ཎོ ཛཱ་རོ, ཨེ་ཀཾ མ་ཉྙ་མཱ་ནོ དྭེ པཱུ་ཝེ ཨ་དཱ་སཱི’’ཏི. དུ་ཏི་ཡ་མྤི ཁོ…པེ… ཏ་ཏི་ཡ་མྤི ཁོ ཨཱ་ཡ་སྨཱ ཨཱ་ན་ནྡོ ཨེ་ཀེ་ཀཾ པཱུ་ཝཾ དེ་ནྟོ ཏ་སྶཱ་ཡེ་ཝ པ་རི་བྦཱ་ཛི་ཀཱ་ཡ ཨེ་ཀཾ མ་ཉྙ་མཱ་ནོ དྭེ པཱུ་ཝེ ཨ་དཱ་སི. སཱ་མ་ནྟཱ པ་རི་བྦཱ་ཛི་ཀཱ་ཡོ ཏཾ པ་རི་བྦཱ་ཛི་ཀཾ ཨེ་ཏ་ད་ཝོ་ཙུཾ – ‘‘ཛཱ་རོ ཏེ ཨེ་སོ ས་མ་ཎོ’’ཏི. ‘‘ན མེ སོ ས་མ་ཎོ ཛཱ་རོ, ཨེ་ཀཾ མ་ཉྙ་མཱ་ནོ དྭེ པཱུ་ཝེ ཨ་དཱ་སཱི’’ཏི. ‘‘ཛཱ་རོ ན ཛཱ་རོ’’ཏི བྷ་ཎྜིཾ་སུ. ཨ་ཉྙ་ཏ་རོ་པི ཨཱ་ཛཱི་ཝ་ཀོ པ་རི་ཝེ་ས་ནཾ ཨ་ག་མཱ་སི. ཨ་ཉྙ་ཏ་རོ བྷི་ཀྑུ པ་ཧཱུ་ཏེ་ན ས་པྤི་ནཱ ཨོ་ད་ནཾ མ་དྡི་ཏྭཱ ཏ་སྶ ཨཱ་ཛཱི་ཝ་ཀ་སྶ མ་ཧ་ནྟཾ པི་ཎྜཾ ཨ་དཱ་སི. ཨ་ཐ ཁོ སོ ཨཱ་ཛཱི་ཝ་ཀོ ཏཾ པི་ཎྜཾ ཨཱ་དཱ་ཡ ཨ་ག་མཱ་སི. ཨ་ཉྙ་ཏ་རོ ཨཱ་ཛཱི་ཝ་ཀོ ཏཾ ཨཱ་ཛཱི་ཝ་ཀཾ ཨེ་ཏ་ད་ཝོ་ཙ – ‘‘ཀུ་ཏོ ཏ་ཡཱ, ཨཱ་ཝུ་སོ, པི་ཎྜོ ལ་དྡྷོ’’ཏི? ‘‘ཏ་སྶཱ་ཝུ་སོ, ས་མ་ཎ་སྶ གོ་ཏ་མ་སྶ མུ་ཎྜ་ག་ཧ་པ་ཏི་ཀ་སྶ པ་རི་ཝེ་ས་ནཱ་ཡ ལ་དྡྷོ’’ཏི.
ཨ་སྶོ་སུཾ ཁོ ཨུ་པཱ་ས་ཀཱ ཏེ་སཾ ཨཱ་ཛཱི་ཝ་ཀཱ་ནཾ ཨི་མཾ ཀ་ཐཱ་ས་ལླཱ་པཾ. ཨ་ཐ ཁོ ཏེ ཨུ་པཱ་ས་ཀཱ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣཱ ཁོ ཏེ ཨུ་པཱ་ས་ཀཱ བྷ་ག་ཝ་ནྟཾ ཨེ་ཏ་ད་ཝོ་ཙུཾ – ‘‘ཨི་མེ, བྷ་ནྟེ, ཏི་ཏྠི་ཡཱ ཨ་ཝ་ཎྞ་ཀཱ་མཱ བུ་དྡྷ་སྶ ཨ་ཝ་ཎྞ་ཀཱ་མཱ དྷ་མྨ་སྶ ཨ་ཝ་ཎྞ་ཀཱ་མཱ ས་ངྒྷ་སྶ. སཱ་དྷུ, བྷ་ནྟེ, ཨ་ཡྻཱ ཏི་ཏྠི་ཡཱ་ནཾ ས་ཧ་ཏྠཱ ན ད་དེ་ཡྻུ’’ནྟི. ཨ་ཐ ཁོ བྷ་ག་ཝཱ ཏེ ཨུ་པཱ་ས་ཀེ དྷ་མྨི་ཡཱ ཀ་ཐཱ་ཡ ས་ནྡ་སྶེ་སི ས་མཱ་ད་པེ་སི ས་མུ་ཏྟེ་ཛེ་སི ས་མྤ་ཧཾ་སེ་སི. ཨ་ཐ ཁོ ཏེ ཨུ་པཱ་ས་ཀཱ བྷ་ག་ཝ་ཏཱ དྷ་མྨི་ཡཱ ཀ་ཐཱ་ཡ ས་ནྡ་སྶི་ཏཱ ས་མཱ་ད་པི་ཏཱ ས་མུ་ཏྟེ་ཛི་ཏཱ ས་མྤ་ཧཾ་སི་ཏཱ ཨུ་ཊྛཱ་ཡཱ་ས་ནཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ པ་ཀྐ་མིཾ་སུ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཏེ་ན ཧི, བྷི་ཀྑ་ཝེ, བྷི་ཀྑཱུ་ནཾ སི་ཀྑཱ་པ་དཾ པ་ཉྙ་པེ་སྶཱ་མི ད་ས ཨ་ཏྠ་ཝ་སེ པ་ཊི་ཙྩ – ས་ངྒྷ་སུ་ཊྛུ་ཏཱ་ཡ, ས་ངྒྷ་ཕཱ་སུ་ཏཱ་ཡ …པེ… ས་དྡྷ་མྨ་ཊྛི་ཏི་ཡཱ, ཝི་ན་ཡཱ་ནུ་གྒ་ཧཱ་ཡ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༢༧༠. ‘‘ཡོ པ་ན བྷི་ཀྑུ ཨ་ཙེ་ལ་ཀ་སྶ ཝཱ པ་རི་བྦཱ་ཛ་ཀ་སྶ ཝཱ པ་རི་བྦཱ་ཛི་ཀཱ་ཡ ཝཱ ས་ཧ་ཏྠཱ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ད་དེ་ཡྻ, པཱ་ཙི་ཏྟི་ཡ’’ནྟི.
༢༧༡. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ཨ་ཙེ་ལ་ཀོ ནཱ་མ ཡོ ཀོ་ཙི པ་རི་བྦཱ་ཛ་ཀ་ས་མཱ་པ་ནྣོ ན་གྒོ.
པ་རི་བྦཱ་ཛ་ཀོ ནཱ་མ བྷི་ཀྑུ་ཉྩ སཱ་མ་ཎེ་ར་ཉྩ ཋ་པེ་ཏྭཱ ཡོ ཀོ་ཙི པ་རི་བྦཱ་ཛ་ཀ་ས་མཱ་པ་ནྣོ.
པ་རི་བྦཱ་ཛི་ཀཱ ནཱ་མ བྷི་ཀྑུ་ནི་ཉྩ སི་ཀྑ་མཱ་ན་ཉྩ སཱ་མ་ཎེ་རི་ཉྩ ཋ་པེ་ཏྭཱ ཡཱ ཀཱ་ཙི པ་རི་བྦཱ་ཛི་ཀ་ས་མཱ་པ་ནྣཱ.
ཁཱ་ད་ནཱི་ཡཾ ནཱ་མ པ་ཉྩ བྷོ་ཛ་ནཱ་ནི – ཨུ་ད་ཀ་ད་ནྟ་པོ་ནཾ ཋ་པེ་ཏྭཱ ཨ་ཝ་སེ་སཾ ཁཱ་ད་ནཱི་ཡཾ ནཱ་མ.
བྷོ་ཛ་ནཱི་ཡཾ ནཱ་མ པ་ཉྩ བྷོ་ཛ་ནཱ་ནི – ཨོ་ད་ནོ, ཀུ་མྨཱ་སོ, ས་ཏྟུ, མ་ཙྪོ, མཾ་སཾ.
ད་དེ་ཡྻཱཏི ཀཱ་ཡེ་ན ཝཱ ཀཱ་ཡ་པ་ཊི་བ་དྡྷེ་ན ཝཱ ནི་སྶ་གྒི་ཡེ་ན ཝཱ དེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༢༧༢. ཏི་ཏྠི་ཡེ ཏི་ཏྠི་ཡ་ས་ཉྙཱི ས་ཧ་ཏྠཱ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ དེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཏི་ཏྠི་ཡེ ཝེ་མ་ཏི་ཀོ ས་ཧ་ཏྠཱ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ དེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཏི་ཏྠི་ཡེ ཨ་ཏི་ཏྠི་ཡ་ས་ཉྙཱི ས་ཧ་ཏྠཱ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ དེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨུ་ད་ཀ་ད་ནྟ་པོ་ནཾ དེ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ཏི་ཏྠི་ཡེ ཏི་ཏྠི་ཡ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་ཏི་ཏྠི་ཡེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་ཏི་ཏྠི་ཡེ ཨ་ཏི་ཏྠི་ཡ་ས་ཉྙཱི, ཨ་ནཱ་པ་ཏྟི.
༢༧༣. ཨ་ནཱ་པ་ཏྟི དཱ་པེ་ཏི ན དེ་ཏི, ཨུ་པ་ནི་ཀྑི་པི་ཏྭཱ དེ་ཏི, བཱ་ཧི་རཱ་ལེ་པཾ དེ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཨ་ཙེ་ལ་ཀ་སི་ཀྑཱ་པ་དཾ ནི་ཊྛི་ཏཾ པ་ཋ་མཾ.