༨. ས་ནྣི་དྷི་ཀཱ་ར་ཀ་སི་ཀྑཱ་པ་དཾ
༢༥༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨ་ཏོ ཨཱ་ན་ནྡ་སྶ ཨུ་པ་ཛ྄ཛྷཱ་ཡོ ཨཱ་ཡ་སྨཱ བེ་ལ་ཊྛ་སཱི་སོ [བེ་ལ་ཊྛི་སཱི་སོ (སཱི.) ཝེ་ལ༹་ཊྛ་སཱི་སོ (སྱཱ.)] ཨ་ར་ཉྙེ ཝི་ཧ་ར་ཏི. སོ པི་ཎྜཱ་ཡ ཙ་རི་ཏྭཱ སུ་ཀྑ་ཀུ་རཾ ཨཱ་རཱ་མཾ ཧ་རི་ཏྭཱ སུ་ཀྑཱ་པེ་ཏྭཱ ནི་ཀྑི་པ་ཏི. ཡ་དཱ ཨཱ་ཧཱ་རེ་ན ཨ་ཏྠོ ཧོ་ཏི, ཏ་དཱ ཨུ་ད་ཀེ་ན ཏེ་མེ་ཏྭཱ ཏེ་མེ་ཏྭཱ བྷུ་ཉྫ་ཏི, ཙི་རེ་ན གཱ་མཾ པི་ཎྜཱ་ཡ པ་ཝི་ས་ཏི. བྷི་ཀྑཱུ ཨཱ་ཡ་སྨ་ནྟཾ བེ་ལ་ཊྛ་སཱི་སཾ ཨེ་ཏ་ད་ཝོ་ཙུཾ – ‘‘ཀི་སྶ ཏྭཾ, ཨཱ་ཝུ་སོ, ཙི་རེ་ན གཱ་མཾ པི་ཎྜཱ་ཡ པ་ཝི་ས་སཱི’’ཏི? ཨ་ཐ ཁོ ཨཱ་ཡ་སྨཱ བེ་ལ་ཊྛ་སཱི་སོ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི. ‘‘ཀིཾ པ་ན ཏྭཾ, ཨཱ་ཝུ་སོ, ས་ནྣི་དྷི་ཀཱ་ར་ཀཾ བྷོ་ཛ་ནཾ བྷུ་ཉྫ་སཱི’’ཏི? ‘‘ཨེ་ཝ་མཱ་ཝུ་སོ’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ བེ་ལ་ཊྛ་སཱི་སོ ས་ནྣི་དྷི་ཀཱ་ར་ཀཾ བྷོ་ཛ་ནཾ བྷུ་ཉྫི་སྶ་ཏཱི’’ཏི…པེ… ས་ཙྩཾ ཀི་ར ཏྭཾ, བེ་ལ་ཊྛ་སཱི་ས, ས་ནྣི་དྷི་ཀཱ་ར་ཀཾ བྷོ་ཛ་ནཾ བྷུ་ཉྫ་སཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, བེ་ལ་ཊྛ་སཱི་ས, ས་ནྣི་དྷི་ཀཱ་ར་ཀཾ བྷོ་ཛ་ནཾ བྷུ་ཉྫི་སྶ་སི! ནེ་ཏཾ, བེ་ལ་ཊྛ་སཱི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༢༥༣. ‘‘ཡོ པ་ན བྷི་ཀྑུ ས་ནྣི་དྷི་ཀཱ་ར་ཀཾ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཁཱ་དེ་ཡྻ ཝཱ བྷུ་ཉྫེ་ཡྻ ཝཱ, པཱ་ཙི་ཏྟི་ཡ’’ནྟི.
༢༥༤. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ས་ནྣི་དྷི་ཀཱ་ར་ཀཾ ནཱ་མ ཨ་ཛྫ པ་ཊི་གྒ་ཧི་ཏཾ ཨ་པ་ར་ཛྫུ ཁཱ་དི་ཏཾ ཧོ་ཏི.
ཁཱ་ད་ནཱི་ཡཾ ནཱ་མ པ་ཉྩ བྷོ་ཛ་ནཱ་ནི – ཡཱ་མ་ཀཱ་ལི་ཀཾ ས་ཏྟཱ་ཧ་ཀཱ་ལི་ཀཾ ཡཱ་ཝ་ཛཱི་ཝི་ཀཾ ཋ་པེ་ཏྭཱ ཨ་ཝ་སེ་སཾ ཁཱ་ད་ནཱི་ཡཾ ནཱ་མ.
བྷོ་ཛ་ནཱི་ཡཾ ནཱ་མ པ་ཉྩ བྷོ་ཛ་ནཱ་ནི – ཨོ་ད་ནོ, ཀུ་མྨཱ་སོ, ས་ཏྟུ, མ་ཙྪོ, མཾ་སཾ.
‘‘ཁཱ་དི་སྶཱ་མི བྷུ་ཉྫི་སྶཱ་མཱི’’ཏི པ་ཊི་གྒ་ཎྷཱ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ ཨཱ་པ་ཏྟི པཱ་ཙི་ཏྟི་ཡ་སྶ.
༢༥༥. ས་ནྣི་དྷི་ཀཱ་ར་ཀེ ས་ནྣི་དྷི་ཀཱ་ར་ཀ་ས་ཉྙཱི ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཁཱ་ད་ཏི ཝཱ བྷུ་ཉྫ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ས་ནྣི་དྷི་ཀཱ་ར་ཀེ ཝེ་མ་ཏི་ཀོ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཁཱ་ད་ཏི ཝཱ བྷུ་ཉྫ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ས་ནྣི་དྷི་ཀཱ་ར་ཀེ ཨ་ས་ནྣི་དྷི་ཀཱ་ར་ཀ་ས་ཉྙཱི ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཁཱ་ད་ཏི ཝཱ བྷུ་ཉྫ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ.
ཡཱ་མ་ཀཱ་ལི་ཀཾ ས་ཏྟཱ་ཧ་ཀཱ་ལི་ཀཾ ཡཱ་ཝ་ཛཱི་ཝི་ཀཾ ཨཱ་ཧཱ་ར་ཏྠཱ་ཡ པ་ཊི་གྒ་ཎྷཱ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ ཨཱ་པ་ཏྟི དུ་ཀྐ་ཊ་སྶ. ཨ་ས་ནྣི་དྷི་ཀཱ་ར་ཀེ ས་ནྣི་དྷི་ཀཱ་ར་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་ས་ནྣི་དྷི་ཀཱ་ར་ཀེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་ས་ནྣི་དྷི་ཀཱ་ར་ཀེ ཨ་ས་ནྣི་དྷི་ཀཱ་ར་ཀ་ས་ཉྙཱི, ཨ་ནཱ་པ་ཏྟི.
༢༥༦. ཨ་ནཱ་པ་ཏྟི ཡཱ་ཝ་ཀཱ་ལི་ཀཾ ཡཱ་ཝ་ཀཱ་ལེ ནི་ད་ཧི་ཏྭཱ བྷུ་ཉྫ་ཏི, ཡཱ་མ་ཀཱ་ལི་ཀཾ ཡཱ་མེ ནི་ད་ཧི་ཏྭཱ བྷུ་ཉྫ་ཏི, ས་ཏྟཱ་ཧ་ཀཱ་ལི་ཀཾ ས་ཏྟཱ་ཧཾ ནི་ད་ཧི་ཏྭཱ བྷུ་ཉྫ་ཏི, ཡཱ་ཝ་ཛཱི་ཝི་ཀཾ ས་ཏི པ་ཙྩ་ཡེ པ་རི་བྷུ་ཉྫ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ས་ནྣི་དྷི་ཀཱ་ར་ཀ་སི་ཀྑཱ་པ་དཾ ནི་ཊྛི་ཏཾ ཨ་ཊྛ་མཾ.