༨. ཝེ་ཧཱ་ས་ཀུ་ཊི་སི་ཀྑཱ་པ་དཾ

༡༢༩. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན དྭེ བྷི་ཀྑཱུ ས་ངྒྷི་ཀེ ཝི་ཧཱ་རེ ཨུ་པ་རི་ཝེ་ཧཱ་ས་ཀུ་ཊི་ཡཱ ཝི་ཧ་ར་ནྟི?. ཨེ་ཀོ ཧེ་ཊྛཱ ཝི་ཧ་ར་ཏི [ཝི་ཧ་ར་ནྟི, ཨེ་ཀོ ཧེ་ཊྛཱ (?)], ཨེ་ཀོ ཨུ་པ་རི. ཨུ་པ་རི་མོ བྷི་ཀྑུ ཨཱ་ཧ་ཙྩ་པཱ་ད་ཀཾ མ་ཉྩཾ ས་ཧ་སཱ ཨ་བྷི་ནི་སཱི་དི. མ་ཉྩ་པཱ་དོ ནི་པྤ་ཏི་ཏྭཱ [པ་ཏི་ཏྭཱ (སྱཱ.)] ཧེ་ཊྛི་མ་སྶ བྷི་ཀྑུ་ནོ མ་ཏྠ་ཀེ ཨ་ཝ་ཏྠཱ་སི. སོ བྷི་ཀྑུ ཝི་སྶ་ར་མ་ཀཱ་སི. བྷི་ཀྑཱུ ཨུ་པ་དྷཱ་ཝི་ཏྭཱ ཏཾ བྷི་ཀྑུཾ ཨེ་ཏ་ད་ཝོ་ཙུཾ – ‘‘ཀི་སྶ ཏྭཾ, ཨཱ་ཝུ་སོ, ཝི་སྶ་ར་མ་ཀཱ་སཱི’’ཏི? ཨ་ཐ ཁོ སོ བྷི་ཀྑུ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ ས་ངྒྷི་ཀེ ཝི་ཧཱ་རེ ཨུ་པ་རི་ཝེ་ཧཱ་ས་ཀུ་ཊི་ཡཱ ཨཱ་ཧ་ཙྩ་པཱ་ད་ཀཾ མ་ཉྩཾ ས་ཧ་སཱ ཨ་བྷི་ནི་སཱི་དི་སྶ་ཏཱི’’ཏི! ཨ་ཐ ཁོ ཏེ བྷི་ཀྑཱུ ཏཾ བྷི་ཀྑུཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏྭཾ, བྷི་ཀྑུ, ས་ངྒྷི་ཀེ ཝི་ཧཱ་རེ ཨུ་པ་རི་ཝེ་ཧཱ་ས་ཀུ་ཊི་ཡཱ ཨཱ་ཧ་ཙྩ་པཱ་ད་ཀཾ མ་ཉྩཾ ས་ཧ་སཱ ཨ་བྷི་ནི་སཱི་ད་སཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, ས་ངྒྷི་ཀེ ཝི་ཧཱ་རེ ཨུ་པ་རི་ཝེ་ཧཱ་ས་ཀུ་ཊི་ཡཱ ཨཱ་ཧ་ཙྩ་པཱ་ད་ཀཾ མ་ཉྩཾ ས་ཧ་སཱ ཨ་བྷི་ནི་སཱི་དི་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –

༡༣༠. ‘‘ཡོ པ་ན བྷི་ཀྑུ ས་ངྒྷི་ཀེ ཝི་ཧཱ་རེ ཨུ་པ་རི་ཝེ་ཧཱ་ས་ཀུ་ཊི་ཡཱ ཨཱ་ཧ་ཙྩ་པཱ་ད་ཀཾ མ་ཉྩཾ ཝཱ པཱི་ཋཾ ཝཱ ཨ་བྷི་ནི་སཱི་དེ་ཡྻ ཝཱ ཨ་བྷི་ནི་པ་ཛྫེ་ཡྻ ཝཱ, པཱ་ཙི་ཏྟི་ཡ’’ནྟི.

༡༣༡. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.

ས་ངྒྷི་ཀོ ནཱ་མ ཝི་ཧཱ་རོ ས་ངྒྷ་སྶ དི་ནྣོ ཧོ་ཏི པ་རི་ཙྩ་ཏྟོ.

ཝེ་ཧཱ་ས་ཀུ་ཊི ནཱ་མ མ་ཛ྄ཛྷི་མ་སྶ པུ་རི་ས་སྶ ཨ་སཱི་ས་གྷ་ཊྚཱ.

ཨཱ་ཧ་ཙྩ་པཱ་ད་ཀོ ནཱ་མ མ་ཉྩོ ཨ་ངྒེ ཝི་ཛ྄ཛྷི་ཏྭཱ ཋི་ཏོ ཧོ་ཏི. ཨཱ་ཧ་ཙྩ་པཱ་ད་ཀཾ ནཱ་མ པཱི་ཋཾ ཨ་ངྒེ ཝི་ཛ྄ཛྷི་ཏྭཱ ཋི་ཏཾ ཧོ་ཏི.

ཨ་བྷི་ནི་སཱི་དེ་ཡྻཱཏི ཏ་སྨིཾ ཨ་བྷི་ནི་སཱི་ད་ཏི, ཨཱ་པ་ཏྟི པཱ་ཙི་ཏྟི་ཡ་སྶ.

ཨ་བྷི་ནི་པ་ཛྫེ་ཡྻཱཏི ཏ་སྨིཾ ཨ་བྷི་ནི་པ་ཛྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.

༡༣༢. ས་ངྒྷི་ཀེ ས་ངྒྷི་ཀ་ས་ཉྙཱི ཨུ་པ་རི་ཝེ་ཧཱ་ས་ཀུ་ཊི་ཡཱ ཨཱ་ཧ་ཙྩ་པཱ་ད་ཀཾ མ་ཉྩཾ ཝཱ པཱི་ཋཾ ཝཱ ཨ་བྷི་ནི་སཱི་ད་ཏི ཝཱ ཨ་བྷི་ནི་པ་ཛྫ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ས་ངྒྷི་ཀེ ཝེ་མ་ཏི་ཀོ…པེ… ས་ངྒྷི་ཀེ པུ་གྒ་ལི་ཀ་ས་ཉྙཱི ཨུ་པ་རི་ཝེ་ཧཱ་ས་ཀུ་ཊི་ཡཱ ཨཱ་ཧ་ཙྩ་པཱ་ད་ཀཾ མ་ཉྩཾ ཝཱ པཱི་ཋཾ ཝཱ ཨ་བྷི་ནི་སཱི་ད་ཏི ཝཱ ཨ་བྷི་ནི་པ་ཛྫ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ.

པུ་གྒ་ལི་ཀེ ས་ངྒྷི་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. པུ་གྒ་ལི་ཀེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. པུ་གྒ་ལི་ཀེ པུ་གྒ་ལི་ཀ་ས་ཉྙཱི ཨ་ཉྙ་སྶ པུ་གྒ་ལི་ཀེ, ཨཱ་པ་ཏྟི དུ་ཀྐ་ཊ་སྶ. ཨ་ཏྟ་ནོ པུ་གྒ་ལི་ཀེ, ཨ་ནཱ་པ་ཏྟི.

༡༣༣. ཨ་ནཱ་པ་ཏྟི – ཨ་ཝེ་ཧཱ་ས་ཀུ་ཊི་ཡཱ སཱི་ས་གྷ་ཊྚཱ་ཡ ཧེ་ཊྛཱ ཨ་པ་རི་བྷོ་གཾ ཧོ་ཏི, པ་ད་ར་ས་ཉྩི་ཏཾ ཧོ་ཏི, པ་ཊཱ་ཎི དི་ནྣཱ ཧོ་ཏི, ཏ་སྨིཾ ཋི་ཏོ ག་ཎྷ་ཏི ཝཱ ལ་གྒེ་ཏི ཝཱ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.

ཝེ་ཧཱ་ས་ཀུ་ཊི་སི་ཀྑཱ་པ་དཾ ནི་ཊྛི་ཏཾ ཨ་ཊྛ་མཾ.