༢. བྷཱུ་ཏ་གཱ་མ་ཝ་གྒོ
༡. བྷཱུ་ཏ་གཱ་མ་སི་ཀྑཱ་པ་དཾ
༨༩. ཏེ་ན ས་མ་ཡེ་ན བུ་དྡྷོ བྷ་ག་ཝཱ ཨཱ་ལ༹་ཝི་ཡཾ ཝི་ཧ་ར་ཏི ཨ་གྒཱ་ལ༹་ཝེ ཙེ་ཏི་ཡེ. ཏེ་ན ཁོ པ་ན ས་མ་ཡེ་ན ཨཱ་ལ༹་ཝ་ཀཱ བྷི་ཀྑཱུ ན་ཝ་ཀ་མྨཾ ཀ་རོ་ནྟཱ རུ་ཀྑཾ ཚི་ནྡ་ནྟི་པི ཚེ་དཱ་པེ་ནྟི་པི. ཨ་ཉྙ་ཏ་རོ་པི ཨཱ་ལ༹་ཝ་ཀོ བྷི་ཀྑུ རུ་ཀྑཾ ཚི་ནྡ་ཏི. ཏ་སྨིཾ རུ་ཀྑེ ཨ་དྷི་ཝ་ཏྠཱ དེ་ཝ་ཏཱ ཏཾ བྷི་ཀྑུཾ ཨེ་ཏ་ད་ཝོ་ཙ – ‘‘མཱ, བྷ་ནྟེ, ཨ་ཏྟ་ནོ བྷ་ཝ་ནཾ ཀ་ཏྟུ་ཀཱ་མོ མ་ཡ྄ཧཾ བྷ་ཝ་ནཾ ཚི་ནྡཱི’’ཏི. སོ བྷི་ཀྑུ ཨ་ནཱ་དི་ཡ་ནྟོ ཚི་ནྡི ཡེ་ཝ, ཏ་སྶཱ ཙ དེ་ཝ་ཏཱ་ཡ དཱ་ར་ཀ་སྶ བཱ་ཧུཾ ཨཱ་ཀོ་ཊེ་སི. ཨ་ཐ ཁོ ཏ་སྶཱ དེ་ཝ་ཏཱ་ཡ ཨེ་ཏ་ད་ཧོ་སི – ‘‘ཡཾ་ནྣཱུ་ནཱ་ཧཾ ཨི་མཾ བྷི་ཀྑུཾ ཨི་དྷེ་ཝ ཛཱི་ཝི་ཏཱ ཝོ་རོ་པེ་ཡྻ’’ནྟི. ཨ་ཐ ཁོ ཏ་སྶཱ དེ་ཝ་ཏཱ་ཡ ཨེ་ཏ་ད་ཧོ་སི – ‘‘ན ཁོ མེ་ཏཾ པ་ཏི་རཱུ་པཾ ཡཱ་ཧཾ ཨི་མཾ བྷི་ཀྑུཾ ཨི་དྷེ་ཝ ཛཱི་ཝི་ཏཱ ཝོ་རོ་པེ་ཡྻཾ. ཡ་ནྣཱུ་ནཱ་ཧཾ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་ཡྻ’’ནྟི. ཨ་ཐ ཁོ སཱ དེ་ཝ་ཏཱ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སི. ‘‘སཱ་དྷུ སཱ་དྷུ དེ་ཝ་ཏེ! སཱ་དྷུ ཁོ ཏྭཾ, དེ་ཝ་ཏེ, ཏཾ བྷི་ཀྑུཾ ཛཱི་ཝི་ཏཱ ན ཝོ་རོ་པེ་སི. ས་ཙ་ཛྫ ཏྭཾ, དེ་ཝ་ཏེ, ཏཾ བྷི་ཀྑུཾ ཛཱི་ཝི་ཏཱ ཝོ་རོ་པེ་ཡྻཱ་སི, བ་ཧུ་ཉྩ ཏྭཾ, དེ་ཝ་ཏེ, ཨ་པུ་ཉྙཾ པ་ས་ཝེ་ཡྻཱ་སི. ག་ཙྪ ཏྭཾ, དེ་ཝ་ཏེ, ཨ་མུ་ཀ་སྨིཾ ཨོ་ཀཱ་སེ རུ་ཀྑོ ཝི་ཝི་ཏྟོ ཏ་སྨིཾ ཨུ་པ་ག་ཙྪཱ’’ཏི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ རུ་ཀྑཾ ཚི་ནྡི་སྶ་ནྟི་པི ཚེ་དཱ་པེ་སྶ་ནྟི་པི ཨེ་ཀི་ནྡྲི་ཡཾ ས་མ་ཎཱ ས་ཀྱ་པུ་ཏྟི་ཡཱ ཛཱི་ཝཾ ཝི་ཧེ་ཋེ་སྶ་ནྟཱི’’ཏི!
ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ལ༹་ཝ་ཀཱ བྷི་ཀྑཱུ རུ་ཀྑཾ ཚི་ནྡི་སྶ་ནྟི་པི ཚེ་དཱ་པེ་སྶ་ནྟི་པཱི’’ཏི…པེ… ‘‘ས་ཙྩཾ ཀི་ར ཏུ་མྷེ, བྷི་ཀྑ་ཝེ, རུ་ཀྑཾ ཚི་ནྡ་ཐཱ་པི ཚེ་དཱ་པེ་ཐཱ་པཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, རུ་ཀྑཾ ཚི་ནྡི་སྶ་ཐཱ་པི, ཚེ་དཱ་པེ་སྶ་ཐཱ་པི! ཛཱི་ཝ་ས་ཉྙི་ནོ ཧི, མོ་གྷ་པུ་རི་སཱ, མ་ནུ་སྶཱ རུ་ཀྑ་སྨིཾ, ནེ་ཏཾ མོ་གྷ་པུ་རི་སཱ ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༩༠. ‘‘བྷཱུ་ཏ་གཱ་མ་པཱ་ཏ་བྱ་ཏཱ་ཡ པཱ་ཙི་ཏྟི་ཡ’’ནྟི.
༩༡. བྷཱུ་ཏ་གཱ་མོ ནཱ་མ པ་ཉྩ བཱི་ཛ་ཛཱ་ཏཱ་ནི – མཱུ་ལ་བཱི་ཛཾ, ཁ་ནྡྷ་བཱི་ཛཾ, ཕ་ལུ༹་བཱི་ཛཾ, ཨ་གྒ་བཱི་ཛཾ, བཱི་ཛ་བཱི་ཛ་མེ་ཝ [བཱི་ཛ་བཱི་ཛ་ཉྩེ་ཝ (ཨི་ཏི་པི)] པ་ཉྩ་མཾ.
མཱུ་ལ་བཱི་ཛཾ ནཱ་མ – ཧ་ལི་དྡི, སི་ངྒི་ཝེ་རཾ, ཝ་ཙཱ, ཝ་ཙ་ཏྟཾ, ཨ་ཏི་ཝི་སཱ, ཀ་ཊུ་ཀ་རོ་ཧི་ཎཱི, ཨུ་སཱི་རཾ, བྷ་དྡ་མཱུ་ཏྟ་ཀཾ, ཡཱ་ནི ཝཱ པ་ན་ཉྙཱ་ནི་པི ཨ་ཏྠི མཱུ་ལེ ཛཱ་ཡ་ནྟི, མཱུ་ལེ ས་ཉྫཱ་ཡ་ནྟི, ཨེ་ཏཾ མཱུ་ལ་བཱི་ཛཾ ནཱ་མ.
ཁ་ནྡྷ་བཱི་ཛཾ ནཱ་མ – ཨ་སྶ་ཏྠོ, ནི་གྲོ་དྷོ, པི་ལ་ཀྑོ, ཨུ་དུ་མྦ་རོ, ཀ་ཙྪ་ཀོ, ཀ་པི་ཏྠ་ནོ, ཡཱ་ནི ཝཱ པ་ན་ཉྙཱ་ནི་པི ཨ་ཏྠི ཁ་ནྡྷེ ཛཱ་ཡ་ནྟི, ཁ་ནྡྷེ ས་ཉྫཱ་ཡ་ནྟི, ཨེ་ཏཾ ཁ་ནྡྷ་བཱི་ཛཾ ནཱ་མ.
ཕ་ལུ༹་བཱི་ཛཾ ནཱ་མ – ཨུ་ཙྪུ, ཝེ་ལུ༹, ན་ལོ༹, ཡཱ་ནི ཝཱ པ་ན་ཉྙཱ་ནི་པི ཨ་ཏྠི པ་བྦེ ཛཱ་ཡ་ནྟི, པ་བྦེ ས་ཉྫཱ་ཡ་ནྟི, ཨེ་ཏཾ ཕ་ལུ༹་བཱི་ཛཾ ནཱ་མ.
ཨ་གྒ་བཱི་ཛཾ ནཱ་མ – ཨ་ཛྫུ་ཀཾ, ཕ་ཎི་ཛྫ་ཀཾ, ཧི་རི་ཝེ་རཾ, ཡཱ་ནི ཝཱ པ་ན་ཉྙཱ་ནི་པི ཨ་ཏྠི ཨ་གྒེ ཛཱ་ཡ་ནྟི, ཨ་གྒེ ས་ཉྫཱ་ཡ་ནྟི, ཨེ་ཏཾ ཨ་གྒ་བཱི་ཛཾ ནཱ་མ.
བཱི་ཛ་བཱི་ཛཾ ནཱ་མ – པུ་བྦ་ཎྞཾ, ཨ་པ་ར་ཎྞཾ, ཡཱ་ནི ཝཱ པ་ན་ཉྙཱ་ནི་པི ཨ་ཏྠི བཱི་ཛེ ཛཱ་ཡ་ནྟི, བཱི་ཛེ ས་ཉྫཱ་ཡ་ནྟི, ཨེ་ཏཾ བཱི་ཛ་བཱི་ཛཾ ནཱ་མ.
༩༢. བཱི་ཛེ བཱི་ཛ་ས་ཉྙཱི ཚི་ནྡ་ཏི ཝཱ ཚེ་དཱ་པེ་ཏི ཝཱ, བྷི་ནྡ་ཏི ཝཱ བྷེ་དཱ་པེ་ཏི ཝཱ, པ་ཙ་ཏི ཝཱ པ་ཙཱ་པེ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. བཱི་ཛེ ཝེ་མ་ཏི་ཀོ ཚི་ནྡ་ཏི ཝཱ ཚེ་དཱ་པེ་ཏི ཝཱ, བྷི་ནྡ་ཏི ཝཱ བྷེ་དཱ་པེ་ཏི ཝཱ, པ་ཙ་ཏི ཝཱ པ་ཙཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. བཱི་ཛེ ཨ་བཱི་ཛ་ས་ཉྙཱི ཚི་ནྡ་ཏི ཝཱ ཚེ་དཱ་པེ་ཏི ཝཱ, བྷི་ནྡ་ཏི ཝཱ བྷེ་དཱ་པེ་ཏི ཝཱ, པ་ཙ་ཏི ཝཱ པ་ཙཱ་པེ་ཏི ཝཱ, ཨ་ནཱ་པ་ཏྟི. ཨ་བཱི་ཛེ བཱི་ཛ་ས་ཉྙཱི ཨཱ་པ་ཏྟི དུ་ཀྐ་ཊ་སྶ. ཨ་བཱི་ཛེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་བཱི་ཛེ ཨ་བཱི་ཛ་ས་ཉྙཱི, ཨ་ནཱ་པ་ཏྟི.
༩༣. ཨ་ནཱ་པ་ཏྟི – ‘‘ཨི་མཾ ཛཱ་ན, ཨི་མཾ དེ་ཧི, ཨི་མཾ ཨཱ་ཧ་ར, ཨི་མི་ནཱ ཨ་ཏྠོ, ཨི་མཾ ཀ་པྤི་ཡཾ ཀ་རོ་ཧཱི’’ཏི བྷ་ཎ་ཏི, ཨ་ས་ཉྩི་ཙྩ, ཨ་སྶ་ཏི་ཡཱ, ཨ་ཛཱ་ན་ནྟ་སྶ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
བྷཱུ་ཏ་གཱ་མ་སི་ཀྑཱ་པ་དཾ ནི་ཊྛི་ཏཾ པ་ཋ་མཾ.
༢. ཨ་ཉྙ་ཝཱ་ད་ཀ་སི་ཀྑཱ་པ་དཾ
༩༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ ཀོ་ས་མྦི་ཡཾ ཝི་ཧ་ར་ཏི གྷོ་སི་ཏཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཚ་ནྣོ ཨ་ནཱ་ཙཱ་རཾ ཨཱ་ཙ་རི་ཏྭཱ ས་ངྒྷ་མ་ཛ྄ཛྷེ ཨཱ་པ་ཏྟི་ཡཱ ཨ་ནུ་ཡུ་ཉྫཱི་ཡ་མཱ་ནོ ཨ་ཉྙེ་ན་ཉྙཾ པ་ཊི་ཙ་ར་ཏི – ‘‘ཀོ ཨཱ་པ་ནྣོ, ཀིཾ ཨཱ་པ་ནྣོ, ཀི་སྨིཾ ཨཱ་པ་ནྣོ, ཀ་ཐཾ ཨཱ་པ་ནྣོ, ཀཾ བྷ་ཎ་ཐ, ཀིཾ བྷ་ཎ་ཐཱ’’ཏི? ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཚ་ནྣོ ས་ངྒྷ་མ་ཛ྄ཛྷེ ཨཱ་པ་ཏྟི་ཡཱ ཨ་ནུ་ཡུ་ཉྫཱི་ཡ་མཱ་ནོ ཨ་ཉྙེ་ན་ཉྙཾ པ་ཊི་ཙ་རི་སྶ་ཏི – ཀོ ཨཱ་པ་ནྣོ, ཀིཾ ཨཱ་པ་ནྣོ, ཀི་སྨིཾ ཨཱ་པ་ནྣོ, ཀ་ཐཾ ཨཱ་པ་ནྣོ, ཀཾ བྷ་ཎ་ཐ, ཀིཾ བྷ་ཎ་ཐཱ’’ཏི…པེ… ས་ཙྩཾ ཀི་ར ཏྭཾ, ཚ་ནྣ, ས་ངྒྷ་མ་ཛ྄ཛྷེ ཨཱ་པ་ཏྟི་ཡཱ ཨ་ནུ་ཡུ་ཉྫཱི་ཡ་མཱ་ནོ ཨ་ཉྙེ་ན་ཉྙཾ པ་ཊི་ཙ་ར་སི – ཀོ ཨཱ་པ་ནྣོ, ཀིཾ ཨཱ་པ་ནྣོ, ཀི་སྨིཾ ཨཱ་པ་ནྣོ, ཀ་ཐཾ ཨཱ་པ་ནྣོ, ཀཾ བྷ་ཎ་ཐ, ཀིཾ བྷ་ཎ་ཐཱ་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, ས་ངྒྷ་མ་ཛ྄ཛྷེ ཨཱ་པ་ཏྟི་ཡཱ ཨ་ནུ་ཡུ་ཉྫཱི་ཡ་མཱ་ནོ ཨ་ཉྙེ་ན་ཉྙཾ པ་ཊི་ཙ་རི་སྶ་སི – ཀོ ཨཱ་པ་ནྣོ, ཀིཾ ཨཱ་པ་ནྣོ, ཀི་སྨིཾ ཨཱ་པ་ནྣོ, ཀ་ཐཾ ཨཱ་པ་ནྣོ, ཀཾ བྷ་ཎ་ཐ, ཀིཾ བྷ་ཎ་ཐཱ་ཏི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཏེ་ན ཧི, བྷི་ཀྑ་ཝེ, ས་ངྒྷོ ཚ་ནྣ་སྶ བྷི་ཀྑུ་ནོ ཨ་ཉྙ་ཝཱ་ད་ཀཾ རོ་པེ་ཏུ. ཨེ་ཝ་ཉྩ པ་ན, བྷི་ཀྑ་ཝེ, རོ་པེ་ཏ་བྦཾ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –
༩༥. ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ཚ་ནྣོ བྷི་ཀྑུ ས་ངྒྷ་མ་ཛ྄ཛྷེ ཨཱ་པ་ཏྟི་ཡཱ ཨ་ནུ་ཡུ་ཉྫཱི་ཡ་མཱ་ནོ ཨ་ཉྙེ་ན་ཉྙཾ པ་ཊི་ཙ་ར་ཏི. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཚ་ནྣ་སྶ བྷི་ཀྑུ་ནོ ཨ་ཉྙ་ཝཱ་ད་ཀཾ རོ་པེ་ཡྻ. ཨེ་སཱ ཉ་ཏྟི.
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ཚ་ནྣོ བྷི་ཀྑུ ས་ངྒྷ་མ་ཛ྄ཛྷེ ཨཱ་པ་ཏྟི་ཡཱ ཨ་ནུ་ཡུ་ཉྫཱི་ཡ་མཱ་ནོ ཨ་ཉྙེ་ན་ཉྙཾ པ་ཊི་ཙ་ར་ཏི. ས་ངྒྷོ ཚ་ནྣ་སྶ བྷི་ཀྑུ་ནོ ཨ་ཉྙ་ཝཱ་ད་ཀཾ རོ་པེ་ཏི. ཡ་སྶཱ་ཡ་སྨ་ཏོ ཁ་མ་ཏི ཚ་ནྣ་སྶ བྷི་ཀྑུ་ནོ ཨ་ཉྙ་ཝཱ་ད་ཀ་སྶ རོ་པ་ནཱ, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ.
‘‘རོ་པི་ཏཾ ས་ངྒྷེ་ན ཚ་ནྣ་སྶ བྷི་ཀྑུ་ནོ ཨ་ཉྙ་ཝཱ་ད་ཀཾ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
ཨ་ཐ ཁོ བྷ་ག་ཝཱ ཨཱ་ཡ་སྨ་ནྟཾ ཚ་ནྣཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ དུ་བྦྷ་ར་ཏཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
‘‘ཨ་ཉྙ་ཝཱ་ད་ཀེ པཱ་ཙི་ཏྟི་ཡ’’ནྟི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༩༦. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཚ་ནྣོ ས་ངྒྷ་མ་ཛ྄ཛྷེ ཨཱ་པ་ཏྟི་ཡཱ ཨ་ནུ་ཡུ་ཉྫཱི་ཡ་མཱ་ནོ ‘‘ཨ་ཉྙེ་ན་ཉྙཾ པ་ཊི་ཙ་ར་ནྟོ – ‘‘ཨཱ་པ་ཏྟིཾ ཨཱ་པ་ཛྫི་སྶཱ་མཱི’’ཏི ཏུ་ཎྷཱི་བྷཱུ་ཏོ ས་ངྒྷཾ ཝི་ཧེ་སེ་ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཚ་ནྣོ ས་ངྒྷ་མ་ཛ྄ཛྷེ ཨཱ་པ་ཏྟི་ཡཱ ཨ་ནུ་ཡུ་ཉྫཱི་ཡ་མཱ་ནོ ཏུ་ཎྷཱི་བྷཱུ་ཏོ ས་ངྒྷཾ ཝི་ཧེ་སེ་སྶ་ཏཱི’’ཏི…པེ… ས་ཙྩཾ ཀི་ར ཏྭཾ, ཚ་ནྣ, ས་ངྒྷ་མ་ཛ྄ཛྷེ ཨཱ་པ་ཏྟི་ཡཱ ཨ་ནུ་ཡུ་ཉྫཱི་ཡ་མཱ་ནོ ཏུ་ཎྷཱི་བྷཱུ་ཏོ ས་ངྒྷཾ ཝི་ཧེ་སེ་སཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, ས་ངྒྷ་མ་ཛ྄ཛྷེ ཨཱ་པ་ཏྟི་ཡཱ ཨ་ནུ་ཡུ་ཉྫཱི་ཡ་མཱ་ནོ ཏུ་ཎྷཱི་བྷཱུ་ཏོ ས་ངྒྷཾ ཝི་ཧེ་སེ་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཏེ་ན ཧི, བྷི་ཀྑ་ཝེ, ས་ངྒྷོ ཚ་ནྣ་སྶ བྷི་ཀྑུ་ནོ ཝི་ཧེ་ས་ཀཾ རོ་པེ་ཏུ. ཨེ་ཝ་ཉྩ པ་ན, བྷི་ཀྑ་ཝེ, རོ་པེ་ཏ་བྦཾ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –
༩༧. ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ཚ་ནྣོ བྷི་ཀྑུ ས་ངྒྷ་མ་ཛ྄ཛྷེ ཨཱ་པ་ཏྟི་ཡཱ ཨ་ནུ་ཡུ་ཉྫཱི་ཡ་མཱ་ནོ ཏུ་ཎྷཱི་བྷཱུ་ཏོ ས་ངྒྷཾ ཝི་ཧེ་སེ་ཏི. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཚ་ནྣ་སྶ བྷི་ཀྑུ་ནོ ཝི་ཧེ་ས་ཀཾ རོ་པེ་ཡྻ. ཨེ་སཱ ཉ་ཏྟི.
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ཚ་ནྣོ བྷི་ཀྑུ ས་ངྒྷ་མ་ཛ྄ཛྷེ ཨཱ་པ་ཏྟི་ཡཱ ཨ་ནུ་ཡུ་ཉྫཱི་ཡ་མཱ་ནོ ཏུ་ཎྷཱི་བྷཱུ་ཏོ ས་ངྒྷཾ ཝི་ཧེ་སེ་ཏི. ས་ངྒྷོ ཚ་ནྣ་སྶ བྷི་ཀྑུ་ནོ ཝི་ཧེ་ས་ཀཾ རོ་པེ་ཏི. ཡ་སྶཱ་ཡ་སྨཱ་ཏོ ཁ་མ་ཏི ཚ་ནྣ་སྶ བྷི་ཀྑུ་ནོ ཝི་ཧེ་ས་ཀ་སྶ རོ་པ་ནཱ, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ.
‘‘རོ་པི་ཏཾ ས་ངྒྷེ་ན ཚ་ནྣ་སྶ བྷི་ཀྑུ་ནོ ཝི་ཧེ་ས་ཀཾ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
ཨ་ཐ ཁོ བྷ་ག་ཝཱ ཨཱ་ཡ་སྨ་ནྟཾ ཚ་ནྣཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ དུ་བྦྷ་ར་ཏཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༩༨. ‘‘ཨ་ཉྙ་ཝཱ་ད་ཀེ ཝི་ཧེ་ས་ཀེ པཱ་ཙི་ཏྟི་ཡ’’ནྟི.
༩༩. ཨ་ཉྙ་ཝཱ་ད་ཀོ ནཱ་མ ས་ངྒྷ་མ་ཛ྄ཛྷེ ཝ་ཏྠུ་སྨིཾ ཝཱ ཨཱ་པ་ཏྟི་ཡཱ ཝཱ ཨ་ནུ་ཡུ་ཉྫཱི་ཡ་མཱ་ནོ ཏཾ ན ཀ་ཐེ་ཏུ་ཀཱ་མོ ཏཾ ན ཨུ་གྒྷཱ་ཊེ་ཏུ་ཀཱ་མོ ཨ་ཉྙེ་ན་ཉྙཾ པ་ཊི་ཙ་ར་ཏི – ‘‘ཀོ ཨཱ་པ་ནྣོ, ཀིཾ ཨཱ་པ་ནྣོ, ཀི་སྨིཾ ཨཱ་པ་ནྣོ, ཀ་ཐཾ ཨཱ་པ་ནྣོ, ཀཾ བྷ་ཎ་ཐ, ཀིཾ བྷ་ཎ་ཐཱ’’ཏི. ཨེ་སོ ཨ་ཉྙ་ཝཱ་ད་ཀོ ནཱ་མ.
ཝི་ཧེ་ས་ཀོ ནཱ་མ ས་ངྒྷ་མ་ཛ྄ཛྷེ ཝ་ཏྠུ་སྨིཾ ཝཱ ཨཱ་པ་ཏྟི་ཡཱ ཝཱ ཨ་ནུ་ཡུ་ཉྫཱི་ཡ་མཱ་ནོ ཏཾ ན ཀ་ཐེ་ཏུ་ཀཱ་མོ ཏཾ ན ཨུ་གྒྷཱ་ཊེ་ཏུ་ཀཱ་མོ ཏུ་ཎྷཱི་བྷཱུ་ཏོ ས་ངྒྷཾ ཝི་ཧེ་སེ་ཏི. ཨེ་སོ ཝི་ཧེ་ས་ཀོ ནཱ་མ.
༡༠༠. ཨཱ་རོ་པི་ཏེ ཨ་ཉྙ་ཝཱ་ད་ཀེ ས་ངྒྷ་མ་ཛ྄ཛྷེ ཝ་ཏྠུ་སྨིཾ ཝཱ ཨཱ་པ་ཏྟི་ཡཱ ཝཱ ཨ་ནུ་ཡུ་ཉྫཱི་ཡ་མཱ་ནོ ཏཾ ན ཀ་ཐེ་ཏུ་ཀཱ་མོ ཏཾ ན ཨུ་གྒྷཱ་ཊེ་ཏུ་ཀཱ་མོ ཨ་ཉྙེ་ན་ཉྙཾ པ་ཊི་ཙ་ར་ཏི – ‘‘ཀོ ཨཱ་པ་ནྣོ, ཀིཾ ཨཱ་པ་ནྣོ, ཀི་སྨིཾ ཨཱ་པ་ནྣོ, ཀ་ཐཾ ཨཱ་པ་ནྣོ, ཀཾ བྷ་ཎ་ཐ, ཀིཾ བྷ་ཎ་ཐཱ’’ཏི, ཨཱ་པ་ཏྟི དུ་ཀྐ་ཊ་སྶ. ཨཱ་རོ་པི་ཏེ ཝི་ཧེ་ས་ཀེ ས་ངྒྷ་མ་ཛ྄ཛྷེ ཝ་ཏྠུ་སྨིཾ ཝཱ ཨཱ་པ་ཏྟི་ཡཱ ཝཱ ཨ་ནུ་ཡུ་ཉྫཱི་ཡ་མཱ་ནོ ཏཾ ན ཀ་ཐེ་ཏུ་ཀཱ་མོ ཏཾ ན ཨུ་གྒྷཱ་ཊེ་ཏུ་ཀཱ་མོ ཏུ་ཎྷཱི་བྷཱུ་ཏོ ས་ངྒྷཾ ཝི་ཧེ་སེ་ཏི, ཨཱ་པ་ཏྟི དུ་ཀྐ་ཊ་སྶ. རོ་པི་ཏེ ཨ་ཉྙ་ཝཱ་ད་ཀེ ས་ངྒྷ་མ་ཛ྄ཛྷེ ཝ་ཏྠུ་སྨིཾ ཝཱ ཨཱ་པ་ཏྟི་ཡཱ ཝཱ ཨ་ནུ་ཡུ་ཉྫཱི་ཡ་མཱ་ནོ ཏཾ ན ཀ་ཐེ་ཏུ་ཀཱ་མོ ཏཾ ན ཨུ་གྒྷཱ་ཊེ་ཏུ་ཀཱ་མོ ཨ་ཉྙེ་ན་ཉྙཾ པ་ཊི་ཙ་ར་ཏི – ‘‘ཀོ ཨཱ་པ་ནྣོ, ཀིཾ ཨཱ་པ་ནྣོ, ཀི་སྨིཾ ཨཱ་པ་ནྣོ, ཀ་ཐཾ ཨཱ་པ་ནྣོ, ཀཾ བྷ་ཎ་ཐ, ཀིཾ བྷ་ཎ་ཐཱ’’ཏི, ཨཱ་པ་ཏྟི པཱ་ཙི་ཏྟི་ཡ་སྶ. རོ་པི་ཏེ ཝི་ཧེ་ས་ཀེ ས་ངྒྷ་མ་ཛ྄ཛྷེ ཝ་ཏྠུ་སྨིཾ ཝཱ ཨཱ་པ་ཏྟི་ཡཱ ཝཱ ཨ་ནུ་ཡུ་ཉྫཱི་ཡ་མཱ་ནོ ཏཾ ན ཀ་ཐེ་ཏུ་ཀཱ་མོ ཏཾ ན ཨུ་གྒྷཱ་ཊེ་ཏུ་ཀཱ་མོ ཏུ་ཎྷཱི་བྷཱུ་ཏོ ས་ངྒྷཾ ཝི་ཧེ་སེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༡༠༡. དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱི ཨ་ཉྙ་ཝཱ་ད་ཀེ ཝི་ཧེ་ས་ཀེ, ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ ཝེ་མ་ཏི་ཀོ ཨ་ཉྙ་ཝཱ་ད་ཀེ ཝི་ཧེ་ས་ཀེ, ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱི ཨ་ཉྙ་ཝཱ་ད་ཀེ ཝི་ཧེ་ས་ཀེ, ཨཱ་པ་ཏྟི པཱ་ཙི་ཏྟི་ཡ་སྶ. ཨ་དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ.
༡༠༢. ཨ་ནཱ་པ་ཏྟི ཨ་ཛཱ་ན་ནྟོ པུ་ཙྪ་ཏི, གི་ལཱ་ནོ ཝཱ ན ཀ་ཐེ་ཏི; ‘‘ས་ངྒྷ་སྶ བྷ་ཎྜ་ནཾ ཝཱ ཀ་ལ་ཧོ ཝཱ ཝི་གྒ་ཧོ ཝཱ ཝི་ཝཱ་དོ ཝཱ བྷ་ཝི་སྶ་ཏཱི’’ཏི ན ཀ་ཐེ་ཏི; ‘‘ས་ངྒྷ་བྷེ་དོ ཝཱ ས་ངྒྷ་རཱ་ཛི ཝཱ བྷ་ཝི་སྶ་ཏཱི’’ཏི ན ཀ་ཐེ་ཏི; ‘‘ཨ་དྷ་མྨེ་ན ཝཱ ཝ་གྒེ་ན ཝཱ ན་ཀ་མྨཱ་ར་ཧ་སྶ ཝཱ ཀ་མྨཾ ཀ་རི་སྶ་ཏཱི’’ཏི ན ཀ་ཐེ་ཏི; ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཨ་ཉྙ་ཝཱ་ད་ཀ་སི་ཀྑཱ་པ་དཾ ནི་ཊྛི་ཏཾ དུ་ཏི་ཡཾ.
༣. ཨུ་ཛ྄ཛྷཱ་པ་ན་ཀ་སི་ཀྑཱ་པ་དཾ
༡༠༣. ཏེ་ན ས་མ་ཡེ་ན བུ་དྡྷོ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ད་བྦོ མ་ལླ་པུ་ཏྟོ ས་ངྒྷ་སྶ སེ་ནཱ་ས་ན་ཉྩ པ་ཉྙ་པེ་ཏི བྷ་ཏྟཱ་ནི ཙ ཨུ་དྡི་ས་ཏི. ཏེ་ན ཁོ པ་ན ས་མ་ཡེ་ན མེ་ཏྟི་ཡ་བྷཱུ་མ་ཛ་ཀཱ [མེ་ཏྟི་ཡ་བྷཱུ་མྨ་ཛ་ཀཱ (སཱི. སྱཱ.)] བྷི་ཀྑཱུ ན་ཝ་ཀཱ ཙེ་ཝ ཧོ་ནྟི ཨ་པྤ་པུ་ཉྙཱ ཙ. ཡཱ་ནི ས་ངྒྷ་སྶ ལཱ་མ་ཀཱ་ནི སེ་ནཱ་ས་ནཱ་ནི ཏཱ་ནི ཏེ་སཾ པཱ་པུ་ཎ་ནྟི ལཱ་མ་ཀཱ་ནི ཙ བྷ་ཏྟཱ་ནི. ཏེ ཨཱ་ཡ་སྨ་ནྟཾ ད་བྦཾ མ་ལླ་པུ་ཏྟཾ བྷི་ཀྑཱུ ཨུ་ཛ྄ཛྷཱ་པེ་ནྟི – ‘‘ཚ་ནྡཱ་ཡ ད་བྦོ མ་ལླ་པུ་ཏྟོ སེ་ནཱ་ས་ནཾ པ་ཉྙ་པེ་ཏི, ཚ་ནྡཱ་ཡ ཙ བྷ་ཏྟཱ་ནི ཨུ་དྡི་ས་ཏཱི’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ མེ་ཏྟི་ཡ་བྷཱུ་མ་ཛ་ཀཱ བྷི་ཀྑཱུ ཨཱ་ཡ་སྨ་ནྟཾ ད་བྦཾ མ་ལླ་པུ་ཏྟཾ བྷི་ཀྑཱུ ཨུ་ཛ྄ཛྷཱ་པེ་སྶ་ནྟཱི’’ཏི…པེ… ‘‘ས་ཙྩཾ ཀི་ར ཏུ་མྷེ, བྷི་ཀྑ་ཝེ, ད་བྦཾ མ་ལླ་པུ་ཏྟཾ བྷི་ཀྑཱུ ཨུ་ཛ྄ཛྷཱ་པེ་ཐཱ’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, ད་བྦཾ མ་ལླ་པུ་ཏྟཾ བྷི་ཀྑཱུ ཨུ་ཛ྄ཛྷཱ་པེ་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
‘‘ཨུ་ཛ྄ཛྷཱ་པ་ན་ཀེ པཱ་ཙི་ཏྟི་ཡ’’ནྟི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༡༠༤. ཏེ་ན ཁོ པ་ན ས་མ་ཡེ་ན མེ་ཏྟི་ཡ་བྷཱུ་མ་ཛ་ཀཱ བྷི་ཀྑཱུ – ‘‘བྷ་ག་ཝ་ཏཱ ཨུ་ཛ྄ཛྷཱ་པ་ན་ཀཾ པ་ཊི་ཀྑི་ཏྟ’’ནྟི, ‘‘ཨེ་ཏྟཱ་ཝ་ཏཱ བྷི་ཀྑཱུ སོ་སྶ་ནྟཱི’’ཏི [ཝི་ཧེ་སི་སྶ་ནྟཱི་ཏི (ཨི་ཏི་པི)] བྷི་ཀྑཱུ་ནཾ སཱ་མ་ནྟཱ ཨཱ་ཡ་སྨ་ནྟཾ ད་བྦཾ མ་ལླ་པུ་ཏྟཾ ཁི་ཡྻ་ནྟི – ‘‘ཚ་ནྡཱ་ཡ ད་བྦོ མ་ལླ་པུ་ཏྟོ སེ་ནཱ་ས་ནཾ པ་ཉྙ་པེ་ཏི, ཚ་ནྡཱ་ཡ ཙ བྷ་ཏྟཱ་ནི ཨུ་དྡི་ས་ཏཱི’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ མེ་ཏྟི་ཡ་བྷཱུ་མ་ཛ་ཀཱ བྷི་ཀྑཱུ ཨཱ་ཡ་སྨ་ནྟཾ ད་བྦཾ མ་ལླ་པུ་ཏྟཾ ཁི་ཡྻི་སྶ་ནྟཱི’’ཏི…པེ… ‘‘ས་ཙྩཾ ཀི་ར ཏུ་མྷེ, བྷི་ཀྑ་ཝེ, ད་བྦཾ མ་ལླ་པུ་ཏྟཾ ཁི་ཡྻ་ཐཱ’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, ད་བྦཾ མ་ལླ་པུ་ཏྟཾ ཁི་ཡྻི་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༡༠༥. ‘‘ཨུ་ཛ྄ཛྷཱ་པ་ན་ཀེ ཁི་ཡྻ་ན་ཀེ པཱ་ཙི་ཏྟི་ཡ’’ནྟི.
༡༠༦. ཨུ་ཛ྄ཛྷཱ་པ་ན་ཀཾ ནཱ་མ ཨུ་པ་ས་མྤ་ནྣཾ ས་ངྒྷེ་ན ས་མྨ་ཏཾ སེ་ནཱ་ས་ན་པ་ཉྙཱ་པ་ཀཾ ཝཱ བྷ་ཏྟུ་དྡེ་ས་ཀཾ ཝཱ ཡཱ་གུ་བྷཱ་ཛ་ཀཾ ཝཱ ཕ་ལ་བྷཱ་ཛ་ཀཾ ཝཱ ཁ་ཛྫ་བྷཱ་ཛ་ཀཾ ཝཱ ཨ་པྤ་མ་ཏྟ་ཀ་ཝི་སྶ་ཛྫ་ཀཾ ཝཱ ཨ་ཝ་ཎྞཾ ཀ་ཏྟུ་ཀཱ་མོ, ཨ་ཡ་སཾ ཀ་ཏྟུ་ཀཱ་མོ, མ་ངྐུ་ཀ་ཏྟུ་ཀཱ་མོ, ཨུ་པ་ས་མྤ་ནྣཾ ཨུ་ཛ྄ཛྷཱ་པེ་ཏི ཝཱ ཁི་ཡྻ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱི ཨུ་ཛ྄ཛྷཱ་པ་ན་ཀེ ཁི་ཡྻ་ན་ཀེ ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ ཝེ་མ་ཏི་ཀོ ཨུ་ཛ྄ཛྷཱ་པ་ན་ཀེ ཁི་ཡྻ་ན་ཀེ ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱི ཨུ་ཛ྄ཛྷཱ་པ་ན་ཀེ ཁི་ཡྻ་ན་ཀེ ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ནུ་པ་ས་མྤ་ནྣཾ ཨུ་ཛ྄ཛྷཱ་པེ་ཏི ཝཱ ཁི་ཡྻ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨུ་པ་ས་མྤ་ནྣཾ ས་ངྒྷེ་ན ཨ་ས་མྨ་ཏཾ སེ་ནཱ་ས་ན་པ་ཉྙཱ་པ་ཀཾ ཝཱ བྷ་ཏྟུ་དྡེ་ས་ཀཾ ཝཱ ཡཱ་གུ་བྷཱ་ཛ་ཀཾ ཝཱ ཕ་ལ་བྷཱ་ཛ་ཀཾ ཝཱ ཁ་ཛྫ་བྷཱ་ཛ་ཀཾ ཝཱ ཨ་པྤ་མ་ཏྟ་ཀ་ཝི་སྶ་ཛྫ་ཀཾ ཝཱ ཨ་ཝ་ཎྞཾ ཀ་ཏྟུ་ཀཱ་མོ, ཨ་ཡ་སཾ ཀ་ཏྟུ་ཀཱ་མོ, མ་ངྐུ་ཀ་ཏྟུ་ཀཱ་མོ, ཨུ་པ་ས་མྤ་ནྣཾ ཝཱ ཨ་ནུ་པ་ས་མྤ་ནྣཾ ཝཱ ཨུ་ཛ྄ཛྷཱ་པེ་ཏི ཝཱ ཁི་ཡྻ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣཾ ས་ངྒྷེ་ན ས་མྨ་ཏཾ ཝཱ ཨ་ས་མྨ་ཏཾ ཝཱ སེ་ནཱ་ས་ན་པ་ཉྙཱ་པ་ཀཾ ཝཱ བྷ་ཏྟུ་དྡེ་ས་ཀཾ ཝཱ ཡཱ་གུ་བྷཱ་ཛ་ཀཾ ཝཱ ཕ་ལ་བྷཱ་ཛ་ཀཾ ཝཱ ཁ་ཛྫ་བྷཱ་ཛ་ཀཾ ཝཱ ཨ་པྤ་མ་ཏྟ་ཀ་ཝི་སྶ་ཛྫ་ཀཾ ཝཱ ཨ་ཝ་ཎྞཾ ཀ་ཏྟུ་ཀཱ་མོ, ཨ་ཡ་སཾ ཀ་ཏྟུ་ཀཱ་མོ, མ་ངྐུ་ཀ་ཏྟུ་ཀཱ་མོ, ཨུ་པ་ས་མྤ་ནྣཾ ཝཱ ཨ་ནུ་པ་ས་མྤ་ནྣཾ ཝཱ ཨུ་ཛ྄ཛྷཱ་པེ་ཏི ཝཱ ཁི་ཡྻ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱི ཨཱ་པ་ཏྟི དུ་ཀྐ་ཊ་སྶ.
༡༠༧. ཨ་ནཱ་པ་ཏྟི པ་ཀ་ཏི་ཡཱ ཚ་ནྡཱ དོ་སཱ མོ་ཧཱ བྷ་ཡཱ ཀ་རོ་ནྟཾ ཨུ་ཛ྄ཛྷཱ་པེ་ཏི ཝཱ ཁི་ཡྻ་ཏི ཝཱ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཨུ་ཛ྄ཛྷཱ་པ་ན་ཀ་སི་ཀྑཱ་པ་དཾ ནི་ཊྛི་ཏཾ ཏ་ཏི་ཡཾ.
༤. པ་ཋ་མ་སེ་ནཱ་ས་ན་སི་ཀྑཱ་པ་དཾ
༡༠༨. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑཱུ ཧེ་མ་ནྟི་ཀེ ཀཱ་ལེ ཨ་ཛ྄ཛྷོ་ཀཱ་སེ སེ་ནཱ་ས་ནཾ པ་ཉྙ་པེ་ཏྭཱ ཀཱ་ཡཾ ཨོ་ཏཱ་པེ་ནྟཱ ཀཱ་ལེ ཨཱ་རོ་ཙི་ཏེ ཏཾ པ་ཀྐ་མ་ནྟཱ ནེ་ཝ ཨུ་དྡྷ་རིཾ་སུ ན ཨུ་དྡྷ་རཱ་པེ་སུཾ, ཨ་ནཱ་པུ་ཙྪཱ པ་ཀྐ་མིཾ་སུ. སེ་ནཱ་ས་ནཾ ཨོ་ཝ་ཊྛཾ ཧོ་ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐཾ ཧི ནཱ་མ བྷི་ཀྑཱུ ཨ་ཛ྄ཛྷོ་ཀཱ་སེ སེ་ནཱ་ས་ནཾ པ་ཉྙ་པེ་ཏྭཱ ཏཾ པ་ཀྐ་མ་ནྟཱ ནེ་ཝ ཨུ་དྡྷ་རི་སྶ་ནྟི ན ཨུ་དྡྷ་རཱ་པེ་སྶ་ནྟི, ཨ་ནཱ་པུ་ཙྪཱ པ་ཀྐ་མི་སྶ་ནྟི, སེ་ནཱ་ས་ནཾ ཨོ་ཝ་ཊྛ’’ནྟི! ཨ་ཐ ཁོ ཏེ བྷི་ཀྑཱུ ཏེ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑཱུ ཨ་ཛ྄ཛྷོ་ཀཱ་སེ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༡༠༩. ‘‘ཡོ པ་ན བྷི་ཀྑུ ས་ངྒྷི་ཀཾ མ་ཉྩཾ ཝཱ པཱི་ཋཾ ཝཱ བྷི་སིཾ ཝཱ ཀོ་ཙྪཾ ཝཱ ཨ་ཛ྄ཛྷོ་ཀཱ་སེ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻ ན ཨུ་དྡྷ་རཱ་པེ་ཡྻ, ཨ་ནཱ་པུ་ཙྪཾ ཝཱ ག་ཙྪེ་ཡྻ, པཱ་ཙི་ཏྟི་ཡ’’ནྟི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༡༡༠. ཏེ་ན ཁོ པ་ན ས་མ་ཡེ་ན བྷི་ཀྑཱུ ཨ་ཛ྄ཛྷོ་ཀཱ་སེ ཝ་སི་ཏྭཱ ཀཱ་ལ་སྶེ་ཝ སེ་ནཱ་ས་ནཾ ཨ་བྷི་ཧ་ར་ནྟི. ཨ་དྡ་སཱ ཁོ བྷ་ག་ཝཱ ཏེ བྷི་ཀྑཱུ ཀཱ་ལ་སྶེ་ཝ སེ་ནཱ་ས་ནཾ ཨ་བྷི་ཧ་ར་ནྟེ. དི་སྭཱ་ན ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨ་ཊྛ མཱ་སེ ཨ་ཝ་སྶི་ཀ་ས་ངྐེ་ཏེ [ཝ་སི་ཏུཾ ཨ་ཝ་སྶི་ཀ་སཾ་ཀེ་ཏེ (ཨི་ཏི་པི)] མ་ཎྜ་པེ ཝཱ རུ་ཀྑ་མཱུ་ལེ ཝཱ ཡ་ཏྠ ཀཱ་ཀཱ ཝཱ ཀུ་ལ་ལཱ ཝཱ ན ཨཱུ་ཧ་ད་ནྟི ཏ་ཏྠ སེ་ནཱ་ས་ནཾ ནི་ཀྑི་པི་ཏུ’’ནྟི.
༡༡༡. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ས་ངྒྷི་ཀཾ ནཱ་མ ས་ངྒྷ་སྶ དི་ནྣཾ ཧོ་ཏི པ་རི་ཙྩ་ཏྟཾ.
མ་ཉྩོ ནཱ་མ ཙ་ཏྟཱ་རོ མ་ཉྩཱ – མ་སཱ་ར་ཀོ, བུ་ནྡི་ཀཱ་བ་དྡྷོ, ཀུ་ལཱི༹་ར་པཱ་ད་ཀོ, ཨཱ་ཧ་ཙྩ་པཱ་ད་ཀོ.
པཱི་ཋཾ ནཱ་མ ཙ་ཏྟཱ་རི པཱི་ཋཱ་ནི – མ་སཱ་ར་ཀཾ, བུ་ནྡི་ཀཱ་བ་དྡྷཾ, ཀུ་ལཱི༹་ར་པཱ་ད་ཀཾ, ཨཱ་ཧ་ཙྩ་པཱ་ད་ཀཾ.
བྷི་སི ནཱ་མ པ་ཉྩ བྷི་སི་ཡོ – ཨུ་ཎྞ་བྷི་སི, ཙོ་ལ༹་བྷི་ཏི, ཝཱ་ཀ་བྷི་སི, ཏི་ཎ་བྷི་སི, པ་ཎྞ་བྷི་སི.
ཀོ་ཙྪཾ ནཱ་མ – ཝཱ་ཀ་མ་ཡཾ ཝཱ ཨུ་སཱི་ར་མ་ཡཾ ཝཱ མུ་ཉྫ་མ་ཡཾ ཝཱ པ་བྦ་ཛ་མ་ཡཾ [བ་བྦ་ཛ་མ་ཡཾ (སཱི.)] ཝཱ ཨ་ནྟོ སཾ་ཝེ་ཋེ་ཏྭཱ བ་དྡྷཾ ཧོ་ཏི.
ས་ནྠ་རི་ཏྭཱཏི ས་ཡཾ ས་ནྠ་རི་ཏྭཱ.
ས་ནྠ་རཱ་པེ་ཏྭཱཏི ཨ་ཉྙཾ ས་ནྠ་རཱ་པེ་ཏྭཱ. ཨ་ནུ་པ་ས་མྤ་ནྣཾ ས་ནྠ་རཱ་པེ་ཏི, ཏ་སྶ པ་ལི་བོ་དྷོ. ཨུ་པ་ས་མྤ་ནྣཾ ས་ནྠ་རཱ་པེ་ཏི, ས་ནྠཱ་ར་ཀ་སྶ [ས་ནྠ་ཏ་སྶ (ཨི་ཏི་པི)] པ་ལི་བོ་དྷོ.
ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻཱཏི ན ས་ཡཾ ཨུ་དྡྷ་རེ་ཡྻ.
ན ཨུ་དྡྷ་རཱ་པེ་ཡྻཱཏི ན ཨ་ཉྙཾ ཨུ་དྡྷ་རཱ་པེ་ཡྻ.
ཨ་ནཱ་པུ་ཙྪཾ ཝཱ ག་ཙྪེ་ཡྻཱཏི བྷི་ཀྑུཾ ཝཱ སཱ་མ་ཎེ་རཾ ཝཱ ཨཱ་རཱ་མི་ཀཾ ཝཱ ཨ་ནཱ་པུ་ཙྪཱ མ་ཛ྄ཛྷི་མ་སྶ པུ་རི་ས་སྶ ལེ་ཌྜུ་པཱ་ཏཾ ཨ་ཏི་ཀྐ་མ་ནྟ་སྶ ཨཱ་པ་ཏྟི པཱ་ཙི་ཏྟི་ཡ་སྶ.
༡༡༢. ས་ངྒྷི་ཀེ ས་ངྒྷི་ཀ་ས་ཉྙཱི ཨ་ཛ྄ཛྷོ་ཀཱ་སེ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻ ན ཨུ་དྡྷ་རཱ་པེ་ཡྻ ཨ་ནཱ་པུ་ཙྪཾ ཝཱ ག་ཙྪེ་ཡྻ, ཨཱ་པ་ཏྟི པཱ་ཙི་ཏྟི་ཡ་སྶ. ས་ངྒྷི་ཀེ ཝེ་མ་ཏི་ཀོ…པེ… ས་ངྒྷི་ཀེ པུ་གྒ་ལི་ཀ་ས་ཉྙཱི ཨ་ཛ྄ཛྷོ་ཀཱ་སེ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻ ན ཨུ་དྡྷ་རཱ་པེ་ཡྻ, ཨ་ནཱ་པུ་ཙྪཾ ཝཱ ག་ཙྪེ་ཡྻ, ཨཱ་པ་ཏྟི པཱ་ཙི་ཏྟི་ཡ་སྶ.
ཙི་མི་ལི་ཀཾ ཝཱ ཨུ་ཏྟ་ར་ཏྠ་ར་ཎཾ ཝཱ བྷཱུ་མ་ཏྠ་ར་ཎཾ ཝཱ ཏ་ཊྚི་ཀཾ ཝཱ ཙ་མྨ་ཁ་ཎྜཾ ཝཱ པཱ་ད་པུ་ཉྪ་ནིཾ ཝཱ ཕ་ལ་ཀ་པཱི་ཋཾ ཝཱ ཨ་ཛ྄ཛྷོ་ཀཱ་སེ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻ ན ཨུ་དྡྷ་རཱ་པེ་ཡྻ, ཨ་ནཱ་པུ་ཙྪཾ ཝཱ ག་ཙྪེ་ཡྻ, ཨཱ་པ་ཏྟི དུ་ཀྐ་ཊ་སྶ. པུ་གྒ་ལི་ཀེ ས་ངྒྷི་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. པུ་གྒ་ལི་ཀེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. པུ་གྒ་ལི་ཀེ པུ་གྒ་ལི་ཀ་ས་ཉྙཱི ཨ་ཉྙ་སྶ པུ་གྒ་ལི་ཀེ, ཨཱ་པ་ཏྟི དུ་ཀྐ་ཊ་སྶ. ཨ་ཏྟ་ནོ པུ་གྒ་ལི་ཀེ ཨ་ནཱ་པ་ཏྟི.
༡༡༣. ཨ་ནཱ་པ་ཏྟི ཨུ་དྡྷ་རི་ཏྭཱ ག་ཙྪ་ཏི, ཨུ་དྡྷ་རཱ་པེ་ཏྭཱ ག་ཙྪ་ཏི, ཨཱ་པུ་ཙྪཾ ག་ཙྪ་ཏི, ཨོ་ཏཱ་པེ་ནྟོ ག་ཙྪ་ཏི, ཀེ་ན་ཙི པ་ལི་བུ་དྡྷཾ ཧོ་ཏི, ཨཱ་པ་དཱ་སུ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
པ་ཋ་མ་སེ་ནཱ་ས་ན་སི་ཀྑཱ་པ་དཾ ནི་ཊྛི་ཏཾ ཙ་ཏུ་ཏྠཾ.
༥. དུ་ཏི་ཡ་སེ་ནཱ་ས་ན་སི་ཀྑཱ་པ་དཾ
༡༡༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ས་ཏྟ་ར་ས་ཝ་གྒི་ཡཱ བྷི་ཀྑཱུ ས་ཧཱ་ཡ་ཀཱ ཧོ་ནྟི. ཏེ ཝ་ས་ནྟཱ་པི ཨེ་ཀ་ཏོ་ཝ ཝ་ས་ནྟི, པ་ཀྐ་མ་ནྟཱ་པི ཨེ་ཀ་ཏོ་ཝ པ་ཀྐ་མ་ནྟི. ཏེ ཨ་ཉྙ་ཏ་ར་སྨིཾ ས་ངྒྷི་ཀེ ཝི་ཧཱ་རེ སེ་ཡྻཾ ས་ནྠ་རི་ཏྭཱ ཏཾ པ་ཀྐ་མ་ནྟཱ ནེ་ཝ ཨུ་དྡྷ་རིཾ་སུ ན ཨུ་དྡྷ་རཱ་པེ་སུཾ, ཨ་ནཱ་པུ་ཙྪཱ པ་ཀྐ་མིཾ་སུ. སེ་ནཱ་ས་ནཾ ཨུ་པ་ཙི་ཀཱ་ཧི ཁཱ་ཡི་ཏཾ ཧོ་ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་ཏྟ་ར་ས་ཝ་གྒི་ཡཱ བྷི་ཀྑཱུ ས་ངྒྷི་ཀེ ཝི་ཧཱ་རེ སེ་ཡྻཾ ས་ནྠ་རི་ཏྭཱ ཏཾ པ་ཀྐ་མ་ནྟཱ ནེ་ཝ ཨུ་དྡྷ་རི་སྶ་ནྟི ན ཨུ་དྡྷ་རཱ་པེ་སྶ་ནྟི, ཨ་ནཱ་པུ་ཙྪཱ པ་ཀྐ་མི་སྶ་ནྟི, སེ་ནཱ་ས་ནཾ ཨུ་པ་ཙི་ཀཱ་ཧི ཁཱ་ཡི་ཏ’’ནྟི! ཨ་ཐ ཁོ ཏེ བྷི་ཀྑཱུ ས་ཏྟ་ར་ས་ཝ་གྒི་ཡེ བྷི་ཀྑཱུ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར, བྷི་ཀྑ་ཝེ, ས་ཏྟ་ར་ས་ཝ་གྒི་ཡཱ བྷི་ཀྑཱུ ས་ངྒྷི་ཀེ ཝི་ཧཱ་རེ སེ་ཡྻཾ ས་ནྠ་རི་ཏྭཱ ཏཾ པ་ཀྐ་མ་ནྟཱ ནེ་ཝ ཨུ་དྡྷ་རིཾ་སུ ན ཨུ་དྡྷ་རཱ་པེ་སུཾ, ཨ་ནཱ་པུ་ཙྪཱ པ་ཀྐ་མིཾ་སུ, སེ་ནཱ་ས་ནཾ ཨུ་པ་ཙི་ཀཱ་ཧི ཁཱ་ཡི་ཏ’’ནྟི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏེ, བྷི་ཀྑ་ཝེ, མོ་གྷ་པུ་རི་སཱ ས་ངྒྷི་ཀེ ཝི་ཧཱ་རེ སེ་ཡྻཾ ས་ནྠ་རི་ཏྭཱ ཏཾ པ་ཀྐ་མ་ནྟཱ ནེ་ཝ ཨུ་དྡྷ་རི་སྶ་ནྟི ན ཨུ་དྡྷ་རཱ་པེ་སྶ་ནྟི, ཨ་ནཱ་པུ་ཙྪཱ པ་ཀྐ་མི་སྶ་ནྟི, སེ་ནཱ་ས་ནཾ ཨུ་པ་ཙི་ཀཱ་ཧི ཁཱ་ཡི་ཏཾ! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༡༡༥. ‘‘ཡོ པ་ན བྷི་ཀྑུ ས་ངྒྷི་ཀེ ཝི་ཧཱ་རེ སེ་ཡྻཾ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻ ན ཨུ་དྡྷ་རཱ་པེ་ཡྻ, ཨ་ནཱ་པུ་ཙྪཾ ཝཱ ག་ཙྪེ་ཡྻ, པཱ་ཙི་ཏྟི་ཡ’’ནྟི.
༡༡༦. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ས་ངྒྷི་ཀོ ནཱ་མ ཝི་ཧཱ་རོ ས་ངྒྷ་སྶ དི་ནྣོ ཧོ་ཏི པ་རི་ཙྩ་ཏྟོ.
སེ་ཡྻཾ ནཱ་མ བྷི་སི, ཙི་མི་ལི་ཀཱ ཨུ་ཏྟ་ར་ཏྠ་ར་ཎཾ, བྷཱུ་མ་ཏྠ་ར་ཎཾ, ཏ་ཊྚི་ཀཱ, ཙ་མྨ་ཁ་ཎྜོ, ནི་སཱི་ད་ནཾ, པ་ཙྩ་ཏྠ་ར་ཎཾ, ཏི་ཎ་ས་ནྠཱ་རོ, པ་ཎྞ་ས་ནྠཱ་རོ.
ས་ནྠ་རི་ཏྭཱཏི ས་ཡཾ ས་ནྠ་རི་ཏྭཱ.
ས་ནྠ་རཱ་པེ་ཏྭཱཏི ཨ་ཉྙཾ ས་ནྠ་རཱ་པེ་ཏྭཱ.
ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻཱཏི ན ས་ཡཾ ཨུ་དྡྷ་རེ་ཡྻ.
ན ཨུ་དྡྷ་རཱ་པེ་ཡྻཱཏི ན ཨ་ཉྙཾ ཨུ་དྡྷ་རཱ་པེ་ཡྻ.
ཨ་ནཱ་པུ་ཙྪཾ ཝཱ ག་ཙྪེ་ཡྻཱཏི བྷི་ཀྑུཾ ཝཱ སཱ་མ་ཎེ་རཾ ཝཱ ཨཱ་རཱ་མི་ཀཾ ཝཱ ཨ་ནཱ་པུ་ཙྪཱ པ་རི་ཀྑི་ཏྟ་སྶ ཨཱ་རཱ་མ་སྶ པ་རི་ཀྑེ་པཾ ཨ་ཏི་ཀྐ་མ་ནྟ་སྶ ཨཱ་པ་ཏྟི པཱ་ཙི་ཏྟི་ཡ་སྶ. ཨ་པ་རི་ཀྑི་ཏྟ་སྶ ཨཱ་རཱ་མ་སྶ ཨུ་པ་ཙཱ་རཾ ཨ་ཏི་ཀྐ་མ་ནྟ་སྶ ཨཱ་པ་ཏྟི པཱ་ཙི་ཏྟི་ཡ་སྶ. ས་ངྒྷི་ཀེ ས་ངྒྷི་ཀ་ས་ཉྙཱི སེ་ཡྻཾ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻ ན ཨུ་དྡྷ་རཱ་པེ་ཡྻ, ཨ་ནཱ་པུ་ཙྪཾ ཝཱ ག་ཙྪེ་ཡྻ, ཨཱ་པ་ཏྟི པཱ་ཙི་ཏྟི་ཡ་སྶ. ས་ངྒྷི་ཀེ ཝེ་མ་ཏི་ཀོ སེ་ཡྻཾ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻ ན ཨུ་དྡྷ་རཱ་པེ་ཡྻ, ཨ་ནཱ་པུ་ཙྪཾ ཝཱ ག་ཙྪེ་ཡྻ, ཨཱ་པ་ཏྟི པཱ་ཙི་ཏྟི་ཡ་སྶ. ས་ངྒྷི་ཀེ པུ་གྒ་ལི་ཀ་ས་ཉྙཱི སེ་ཡྻཾ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻ ན ཨུ་དྡྷ་རཱ་པེ་ཡྻ, ཨ་ནཱ་པུ་ཙྪཾ ཝཱ ག་ཙྪེ་ཡྻ, ཨཱ་པ་ཏྟི པཱ་ཙི་ཏྟི་ཡ་སྶ.
༡༡༧. ཝི་ཧཱ་ར་སྶ ཨུ་པ་ཙཱ་རེ ཝཱ ཨུ་པ་ཊྛཱ་ན་སཱ་ལཱ་ཡཾ ཝཱ མ་ཎྜ་པེ ཝཱ རུ་ཀྑ་མཱུ་ལེ ཝཱ སེ་ཡྻཾ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻ ན ཨུ་དྡྷ་རཱ་པེ་ཡྻ, ཨ་ནཱ་པུ་ཙྪཾ ཝཱ ག་ཙྪེ་ཡྻ, ཨཱ་པ་ཏྟི དུ་ཀྐ་ཊ་སྶ. མ་ཉྩཾ ཝཱ པཱི་ཋཾ ཝཱ ཝི་ཧཱ་རེ ཝཱ ཝི་ཧཱ་ར་སྶཱུ་པ་ཙཱ་རེ ཝཱ ཨུ་པ་ཊྛཱ་ན་སཱ་ལཱ་ཡཾ ཝཱ མ་ཎྜ་པེ ཝཱ རུ་ཀྑ་མཱུ་ལེ ཝཱ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻ ན ཨུ་དྡྷ་རཱ་པེ་ཡྻ, ཨ་ནཱ་པུ་ཙྪཾ ཝཱ ག་ཙྪེ་ཡྻ, ཨཱ་པ་ཏྟི དུ་ཀྐ་ཊ་སྶ.
པུ་གྒ་ལི་ཀེ ས་ངྒྷི་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. པུ་གྒ་ལི་ཀེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. པུ་གྒ་ལི་ཀེ པུ་གྒ་ལི་ཀ་ས་ཉྙཱི ཨ་ཉྙ་སྶ པུ་གྒ་ལི་ཀེ ཨཱ་པ་ཏྟི དུ་ཀྐ་ཊ་སྶ. ཨ་ཏྟ་ནོ པུ་གྒ་ལི་ཀེ ཨ་ནཱ་པ་ཏྟི.
༡༡༨. ཨ་ནཱ་པ་ཏྟི ཨུ་དྡྷ་རི་ཏྭཱ ག་ཙྪ་ཏི, ཨུ་དྡྷ་རཱ་པེ་ཏྭཱ ག་ཙྪ་ཏི, ཨཱ་པུ་ཙྪཾ ག་ཙྪ་ཏི, ཀེ་ན་ཙི པ་ལི་བུ་དྡྷཾ ཧོ་ཏི, སཱ་པེ་ཀྑོ ག་ནྟྭཱ ཏ་ཏྠ ཋི་ཏོ ཨཱ་པུ་ཙྪ་ཏི, ཀེ་ན་ཙི པ་ལི་བུ་དྡྷོ ཧོ་ཏི, ཨཱ་པ་དཱ་སུ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
དུ་ཏི་ཡ་སེ་ནཱ་ས་ན་སི་ཀྑཱ་པ་དཾ ནི་ཊྛི་ཏཾ པ་ཉྩ་མཾ.
༦. ཨ་ནུ་པ་ཁ་ཛྫ་སི་ཀྑཱ་པ་དཾ
༡༡༩. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ཝ་ར་སེ་ཡྻཱ་ཡོ པ་ལི་བུ་ནྡྷེ་ནྟི, ཐེ་རཱ བྷི་ཀྑཱུ ཝུ་ཊྛཱ་པེ་ནྟི [ཨེ་ཏྠ ཏེ ཨི་ཏི ཀ་མྨ་པ་དཾ ཨཱུ་ནཾ ཝི་ཡ དི་སྶ་ཏི]. ཨ་ཐ ཁོ ཚ་བྦ་གྒི་ཡཱ་ནཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཀེ་ན ནུ ཁོ མ་ཡཾ ཨུ་པཱ་ཡེ་ན ཨི་དྷེ་ཝ ཝ་སྶཾ ཝ་སེ་ཡྻཱ་མཱ’’ཏི? ཨ་ཐ ཁོ ཚ་བྦ་གྒི་ཡཱ བྷི་ཀྑཱུ ཐེ་རེ བྷི་ཀྑཱུ ཨ་ནུ་པ་ཁ་ཛྫ སེ་ཡྻཾ ཀ་པྤེ་ནྟི – ཡ་སྶ ས་མྦཱ་དྷོ བྷ་ཝི་སྶ་ཏི སོ པ་ཀྐ་མི་སྶ་ཏཱི་ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ ཐེ་རེ བྷི་ཀྑཱུ ཨ་ནུ་པ་ཁ་ཛྫ སེ་ཡྻཾ ཀ་པྤེ་སྶ་ནྟཱི’’ཏི! ཨ་ཐ ཁོ ཏེ བྷི་ཀྑཱུ ཚ་བྦ་གྒི་ཡེ བྷི་ཀྑཱུ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ …པེ… ‘‘ས་ཙྩཾ ཀི་ར ཏུ་མྷེ, བྷི་ཀྑ་ཝེ, ཐེ་རེ བྷི་ཀྑཱུ ཨ་ནུ་པ་ཁ་ཛྫ སེ་ཡྻཾ ཀ་པྤེ་ཐཱ’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, ཐེ་རེ བྷི་ཀྑཱུ ཨ་ནུ་པ་ཁ་ཛྫ སེ་ཡྻཾ ཀ་པྤེ་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༡༢༠. ‘‘ཡོ པ་ན བྷི་ཀྑུ ས་ངྒྷི་ཀེ ཝི་ཧཱ་རེ ཛཱ་ནཾ པུ་བྦུ་པ་ག་ཏཾ བྷི་ཀྑུཾ ཨ་ནུ་པ་ཁ་ཛྫ སེ་ཡྻཾ ཀ་པྤེ་ཡྻ – ཡ་སྶ ས་མྦཱ་དྷོ བྷ་ཝི་སྶ་ཏི སོ པ་ཀྐ་མི་སྶ་ཏཱི’ཏི, ཨེ་ཏ་དེ་ཝ པ་ཙྩ་ཡཾ ཀ་རི་ཏྭཱ ཨ་ན་ཉྙཾ, པཱ་ཙི་ཏྟི་ཡ’’ནྟི.
༡༢༡. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ༢.༠༢༥༡ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ས་ངྒྷི་ཀོ ནཱ་མ ཝི་ཧཱ་རོ ས་ངྒྷ་སྶ དི་ནྣོ ཧོ་ཏི པ་རི་ཙྩ་ཏྟོ.
ཛཱ་ནཱ་ཏི ནཱ་མ ཝུ་ཌྜྷོ་ཏི ཛཱ་ནཱ་ཏི, གི་ལཱ་ནོ་ཏི ཛཱ་ནཱ་ཏི, ས་ངྒྷེ་ན དི་ནྣོ་ཏི ཛཱ་ནཱ་ཏི.
ཨ་ནུ་པ་ཁ་ཛྫཱཏི ཨ་ནུ་པ་ཝི་སི་ཏྭཱ.
སེ་ཡྻཾ ཀ་པྤེ་ཡྻཱཏི མ་ཉྩ་སྶ ཝཱ པཱི་ཋ་སྶ ཝཱ པ་ཝི་ས་ནྟ་སྶ ཝཱ ནི་ཀྑ་མ་ནྟ་སྶ ཝཱ ཨུ་པ་ཙཱ་རེ སེ་ཡྻཾ ས་ནྠ་ར་ཏི ཝཱ ས་ནྠ་རཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨ་བྷི་ནི་སཱི་ད་ཏི ཝཱ ཨ་བྷི་ནི་པ་ཛྫ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ.
ཨེ་ཏ་དེ་ཝ པ་ཙྩ་ཡཾ ཀ་རི་ཏྭཱ ཨ་ན་ཉྙནྟི ན ཨ་ཉྙོ ཀོ་ཙི པ་ཙྩ་ཡོ ཧོ་ཏི ཨ་ནུ་པ་ཁ་ཛྫ སེ་ཡྻཾ ཀ་པྤེ་ཏུཾ.
༡༢༢. ས་ངྒྷི་ཀེ ས་ངྒྷི་ཀ་ས་ཉྙཱི ཨ་ནུ་པ་ཁ་ཛྫ སེ་ཡྻཾ ཀ་པྤེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ས་ངྒྷི་ཀེ ཝེ་མ་ཏི་ཀོ ཨ་ནུ་པ་ཁ་ཛྫ སེ་ཡྻཾ ཀ་པྤེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ས་ངྒྷི་ཀེ པུ་གྒ་ལི་ཀ་ས་ཉྙཱི ཨ་ནུ་པ་ཁ་ཛྫ སེ་ཡྻཾ ཀ་པྤེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
མ་ཉྩ་སྶ ཝཱ པཱི་ཋ་སྶ ཝཱ པ་ཝི་ས་ནྟ་སྶ ཝཱ ནི་ཀྑ་མ་ནྟ་སྶ ཝཱ ཨུ་པ་ཙཱ་རཾ ཋ་པེ་ཏྭཱ སེ་ཡྻཾ ས་ནྠ་ར་ཏི ཝཱ ས་ནྠ་རཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨ་བྷི་ནི་སཱི་ད་ཏི ཝཱ ཨ་བྷི་ནི་པ་ཛྫ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཝི་ཧཱ་ར་སྶ ཨུ་པ་ཙཱ་རེ ཝཱ ཨུ་པ་ཊྛཱ་ན་སཱ་ལཱ་ཡཾ ཝཱ མ་ཎྜ་པེ ཝཱ རུ་ཀྑ་མཱུ་ལེ ཝཱ ཨ་ཛ྄ཛྷོ་ཀཱ་སེ ཝཱ སེ་ཡྻཾ ས་ནྠ་ར་ཏི ཝཱ ས་ནྠ་རཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨ་བྷི་ནི་སཱི་ད་ཏི ཝཱ ཨ་བྷི་ནི་པྤ་ཛྫ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. པུ་གྒ་ལི་ཀེ ས་ངྒྷི་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. པུ་གྒ་ལི་ཀེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. པུ་གྒ་ལི་ཀེ པུ་གྒ་ལི་ཀ་ས་ཉྙཱི ཨ་ཉྙ་སྶ པུ་གྒ་ལི་ཀེ ཨཱ་པ་ཏྟི དུ་ཀྐ་ཊ་སྶ. ཨ་ཏྟ་ནོ པུ་གྒ་ལི་ཀེ ཨ་ནཱ་པ་ཏྟི.
༡༢༣. ཨ་ནཱ་པ་ཏྟི གི་ལཱ་ནོ པ་ཝི་ས་ཏི, སཱི་ཏེ་ན ཝཱ ཨུ་ཎྷེ་ན ཝཱ པཱི་ལི༹་ཏོ པ་ཝི་ས་ཏི, ཨཱ་པ་དཱ་སུ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཨ་ནུ་པ་ཁ་ཛྫ་སི་ཀྑཱ་པ་དཾ ནི་ཊྛི་ཏཾ ཚ་ཊྛཾ.
༧. ནི་ཀྐ་ཌྜྷ་ན་སི་ཀྑཱ་པ་དཾ
༡༢༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ས་ཏྟ་ར་ས་ཝ་གྒི་ཡཱ བྷི་ཀྑཱུ ཨ་ཉྙ་ཏ་རཾ པ་ཙྩ་ནྟི་མཾ མ་ཧཱ་ཝི་ཧཱ་རཾ པ་ཊི་ས་ངྑ་རོ་ནྟི – ‘‘ཨི་དྷ མ་ཡཾ ཝ་སྶཾ ཝ་སི་སྶཱ་མཱ’’ཏི. ཨ་དྡ་སཾ་སུ ཁོ ཚ་བྦ་གྒི་ཡཱ བྷི་ཀྑཱུ ས་ཏྟ་ར་ས་ཝ་གྒི་ཡེ བྷི་ཀྑཱུ ཝི་ཧཱ་རཾ པ་ཊི་ས་ངྑ་རོ་ནྟེ. དི་སྭཱ་ན ཨེ་ཝ་མཱ་ཧཾ་སུ – ‘‘ཨི་མེ, ཨཱ་ཝུ་སོ, ས་ཏྟ་ར་ས་ཝ་གྒི་ཡཱ བྷི་ཀྑཱུ ཝི་ཧཱ་རཾ པ་ཊི་ས་ངྑ་རོ་ནྟི. ཧ་ནྡ ནེ ཝུ་ཊྛཱ་པེ་སྶཱ་མཱ’’ཏི! ཨེ་ཀ་ཙྩེ ཨེ་ཝ་མཱ་ཧཾ་སུ – ‘‘ཨཱ་ག་མེ་ཐཱ་ཝུ་སོ, ཡཱ་ཝ པ་ཊི་ས་ངྑ་རོ་ནྟི; པ་ཊི་ས་ངྑ་ཏེ ཝུ་ཊྛཱ་པེ་སྶཱ་མཱ’’ཏི.
ཨ་ཐ ཁོ ཚ་བྦ་གྒི་ཡཱ བྷི་ཀྑཱུ ས་ཏྟ་ར་ས་ཝ་གྒི་ཡེ བྷི་ཀྑཱུ ཨེ་ཏ་ད་ཝོ་ཙུཾ – ‘‘ཨུ་ཊྛེ་ཐཱ་ཝུ་སོ, ཨ་མྷཱ་ཀཾ ཝི་ཧཱ་རོ པཱ་པུ་ཎཱ་ཏཱི’’ཏི. ‘‘ན་ནུ, ཨཱ་ཝུ་སོ, པ་ཊི་ཀ་ཙྩེ་ཝ [པ་ཊི་ག་ཙྩེ་ཝ (སཱི.)] ཨཱ་ཙི་ཀྑི་ཏ་བྦཾ, མ་ཡ་ཉྩ་ཉྙཾ པ་ཊི་ས་ངྑ་རེ་ཡྻཱ་མཱ’’ཏི. ‘‘ན་ནུ, ཨཱ་ཝུ་སོ, ས་ངྒྷི་ཀོ ཝི་ཧཱ་རོ’’ཏི? ‘‘ཨཱ་མཱ་ཝུ་སོ, ས་ངྒྷི་ཀོ ཝི་ཧཱ་རོ’’ཏི. ‘‘ཨུ་ཊྛེ་ཐཱ་ཝུ་སོ, ཨ་མྷཱ་ཀཾ ཝི་ཧཱ་རོ པཱ་པུ་ཎཱ་ཏཱི’’ཏི. ‘‘མ་ཧ་ལླ་ཀོ, ཨཱ་ཝུ་སོ, ཝི་ཧཱ་རོ. ཏུ་མྷེ་པི ཝ་ས་ཐ, མ་ཡ་མྤི ཝ་སི་སྶཱ་མཱ’’ཏི. ‘‘ཨུ་ཊྛེ་ཐཱ་ཝུ་སོ, ཨ་མྷཱ་ཀཾ ཝི་ཧཱ་རོ པཱ་པུ་ཎཱ་ཏཱི’’ཏི ཀུ་པི་ཏཱ ཨ་ན་ཏྟ་མ་ནཱ གཱི་ཝཱ་ཡཾ ག་ཧེ་ཏྭཱ ནི་ཀྐ་ཌྜྷ་ནྟི. ཏེ ནི་ཀྐ་ཌྜྷཱི་ཡ་མཱ་ནཱ རོ་ད་ནྟི. བྷི་ཀྑཱུ ཨེ་ཝ་མཱ་ཧཾ་སུ – ‘‘ཀི་སྶ ཏུ་མྷེ, ཨཱ་ཝུ་སོ, རོ་ད་ཐཱ’’ཏི? ‘‘ཨི་མེ, ཨཱ་ཝུ་སོ, ཚ་བྦ་གྒི་ཡཱ བྷི་ཀྑཱུ ཀུ་པི་ཏཱ ཨ་ན་ཏྟ་མ་ནཱ ཨ་མྷེ ས་ངྒྷི་ཀཱ ཝི་ཧཱ་རཱ ནི་ཀྐ་ཌྜྷ་ནྟཱི’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ ཀུ་པི་ཏཱ ཨ་ན་ཏྟ་མ་ནཱ བྷི་ཀྑཱུ ས་ངྒྷི་ཀཱ ཝི་ཧཱ་རཱ ནི་ཀྐ་ཌྜྷི་སྶ་ནྟཱི’’ཏི! ཨ་ཐ ཁོ ཏེ བྷི་ཀྑཱུ ཚ་བྦ་གྒི་ཡེ བྷི་ཀྑཱུ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏུ་མྷེ, བྷི་ཀྑ་ཝེ, ཀུ་པི་ཏཱ ཨ་ན་ཏྟ་མ་ནཱ བྷི་ཀྑཱུ ས་ངྒྷི་ཀཱ ཝི་ཧཱ་རཱ ནི་ཀྐ་ཌྜྷ་ཐཱ’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, ཀུ་པི་ཏཱ ཨ་ན་ཏྟ་མ་ནཱ བྷི་ཀྑཱུ ས་ངྒྷི་ཀཱ ཝི་ཧཱ་རཱ ནི་ཀྐ་ཌྜྷི་སྶ་ཐ? ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༡༢༥. ‘‘ཡོ པ་ན བྷི་ཀྑུ བྷི་ཀྑུཾ ཀུ་པི་ཏོ ཨ་ན་ཏྟ་མ་ནོ ས་ངྒྷི་ཀཱ ཝི་ཧཱ་རཱ ནི་ཀྐ་ཌྜྷེ་ཡྻ ཝཱ ནི་ཀྐ་ཌྜྷཱ་པེ་ཡྻ ཝཱ, པཱ་ཙི་ཏྟི་ཡ’’ནྟི.
༡༢༦. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
བྷི་ཀྑུནྟི ཨ་ཉྙཾ བྷི་ཀྑུཾ.
ཀུ་པི་ཏོ ཨ་ན་ཏྟ་མ་ནོཏི ཨ་ན་བྷི་ར་དྡྷོ ཨཱ་ཧ་ཏ་ཙི་ཏྟོ ཁི་ལ་ཛཱ་ཏོ.
ས་ངྒྷི་ཀོ ནཱ་མ ཝི་ཧཱ་རོ ས་ངྒྷ་སྶ དི་ནྣོ ཧོ་ཏི པ་རི་ཙྩ་ཏྟོ.
ནི་ཀྐ་ཌྜྷེ་ཡྻཱཏི ག་བྦྷེ ག་ཧེ་ཏྭཱ པ་མུ་ཁཾ ནི་ཀྐ་ཌྜྷ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. པ་མུ་ཁེ ག་ཧེ་ཏྭཱ བ་ཧི ནི་ཀྐ་ཌྜྷ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨེ་ཀེ་ན པ་ཡོ་གེ་ན བ་ཧུ་ཀེ་པི དྭཱ་རེ ཨ་ཏི་ཀྐཱ་མེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ནི་ཀྐ་ཌྜྷཱ་པེ་ཡྻཱཏི ཨ་ཉྙཾ ཨཱ་ཎཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ [དུ་ཀྐ་ཊ་སྶ (ཀ་ཏྠ་ཙི)]. ས་ཀིཾ ཨཱ་ཎ་ཏྟོ བ་ཧུ་ཀེ་པི དྭཱ་རེ ཨ་ཏི་ཀྐཱ་མེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༡༢༧. ས་ངྒྷི་ཀེ ས་ངྒྷི་ཀ་ས་ཉྙཱི ཀུ་པི་ཏོ ཨ་ན་ཏྟ་མ་ནོ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ས་ངྒྷི་ཀེ ཝེ་མ་ཏི་ཀོ ཀུ་པི་ཏོ ཨ་ན་ཏྟ་མ་ནོ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ས་ངྒྷི་ཀེ པུ་གྒ་ལི་ཀ་ས་ཉྙཱི ཀུ་པི་ཏོ ཨ་ན་ཏྟ་མ་ནོ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ.
ཏ་སྶ པ་རི་ཀྑཱ་རཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཝི་ཧཱ་ར་སྶ ཨུ་པ་ཙཱ་རཱ ཝཱ ཨུ་པ་ཊྛཱ་ན་སཱ་ལཱ་ཡ ཝཱ མ་ཎྜ་པཱ ཝཱ རུ་ཀྑ་མཱུ་ལཱ ཝཱ ཨ་ཛ྄ཛྷོ་ཀཱ་སཱ ཝཱ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཏ་སྶ པ་རི་ཀྑཱ་རཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣཾ ཝི་ཧཱ་རཱ ཝཱ ཝི་ཧཱ་ར་སྶ ཨུ་པ་ཙཱ་རཱ ཝཱ ཨུ་པ་ཊྛཱ་ན་སཱ་ལཱ་ཡ ཝཱ མ་ཎྜ་པཱ ཝཱ རུ་ཀྑ་མཱུ་ལཱ ཝཱ ཨ་ཛ྄ཛྷོ་ཀཱ་སཱ ཝཱ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཏ་སྶ པ་རི་ཀྑཱ་རཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ.
པུ་གྒ་ལི་ཀེ ས་ངྒྷི་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. པུ་གྒ་ལི་ཀེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. པུ་གྒ་ལི་ཀེ པུ་གྒ་ལི་ཀ་ས་ཉྙཱི ཨ་ཉྙ་སྶ པུ་གྒ་ལི་ཀེ ཨཱ་པ་ཏྟི དུ་ཀྐ་ཊ་སྶ. ཨ་ཏྟ་ནོ པུ་གྒ་ལི་ཀེ ཨ་ནཱ་པ་ཏྟི.
༡༢༨. ཨ་ནཱ་པ་ཏྟི ཨ་ལ་ཛྫིཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཏ་སྶ པ་རི་ཀྑཱ་རཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨུ་མྨ་ཏྟ་ཀཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཏ་སྶ པ་རི་ཀྑཱ་རཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, བྷ་ཎྜ་ན་ཀཱ་ར་ཀཾ ཀ་ལ་ཧ་ཀཱ་ར་ཀཾ ཝི་ཝཱ་ད་ཀཱ་ར་ཀཾ བྷ་སྶ་ཀཱ་ར་ཀཾ ས་ངྒྷེ ཨ་དྷི་ཀ་ར་ཎ་ཀཱ་ར་ཀཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཏ་སྶ པ་རི་ཀྑཱ་རཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨ་ནྟེ་ཝཱ་སི་ཀཾ ཝཱ ས་དྡྷི་ཝི་ཧཱ་རི་ཀཾ ཝཱ ན ས་མྨཱ ཝ་ཏྟ་ནྟཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཏ་སྶ པ་རི་ཀྑཱ་རཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ནི་ཀྐ་ཌྜྷ་ན་སི་ཀྑཱ་པ་དཾ ནི་ཊྛི་ཏཾ ས་ཏྟ་མཾ.
༨. ཝེ་ཧཱ་ས་ཀུ་ཊི་སི་ཀྑཱ་པ་དཾ
༡༢༩. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན དྭེ བྷི་ཀྑཱུ ས་ངྒྷི་ཀེ ཝི་ཧཱ་རེ ཨུ་པ་རི་ཝེ་ཧཱ་ས་ཀུ་ཊི་ཡཱ ཝི་ཧ་ར་ནྟི?. ཨེ་ཀོ ཧེ་ཊྛཱ ཝི་ཧ་ར་ཏི [ཝི་ཧ་ར་ནྟི, ཨེ་ཀོ ཧེ་ཊྛཱ (?)], ཨེ་ཀོ ཨུ་པ་རི. ཨུ་པ་རི་མོ བྷི་ཀྑུ ཨཱ་ཧ་ཙྩ་པཱ་ད་ཀཾ མ་ཉྩཾ ས་ཧ་སཱ ཨ་བྷི་ནི་སཱི་དི. མ་ཉྩ་པཱ་དོ ནི་པྤ་ཏི་ཏྭཱ [པ་ཏི་ཏྭཱ (སྱཱ.)] ཧེ་ཊྛི་མ་སྶ བྷི་ཀྑུ་ནོ མ་ཏྠ་ཀེ ཨ་ཝ་ཏྠཱ་སི. སོ བྷི་ཀྑུ ཝི་སྶ་ར་མ་ཀཱ་སི. བྷི་ཀྑཱུ ཨུ་པ་དྷཱ་ཝི་ཏྭཱ ཏཾ བྷི་ཀྑུཾ ཨེ་ཏ་ད་ཝོ་ཙུཾ – ‘‘ཀི་སྶ ཏྭཾ, ཨཱ་ཝུ་སོ, ཝི་སྶ་ར་མ་ཀཱ་སཱི’’ཏི? ཨ་ཐ ཁོ སོ བྷི་ཀྑུ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ ས་ངྒྷི་ཀེ ཝི་ཧཱ་རེ ཨུ་པ་རི་ཝེ་ཧཱ་ས་ཀུ་ཊི་ཡཱ ཨཱ་ཧ་ཙྩ་པཱ་ད་ཀཾ མ་ཉྩཾ ས་ཧ་སཱ ཨ་བྷི་ནི་སཱི་དི་སྶ་ཏཱི’’ཏི! ཨ་ཐ ཁོ ཏེ བྷི་ཀྑཱུ ཏཾ བྷི་ཀྑུཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏྭཾ, བྷི་ཀྑུ, ས་ངྒྷི་ཀེ ཝི་ཧཱ་རེ ཨུ་པ་རི་ཝེ་ཧཱ་ས་ཀུ་ཊི་ཡཱ ཨཱ་ཧ་ཙྩ་པཱ་ད་ཀཾ མ་ཉྩཾ ས་ཧ་སཱ ཨ་བྷི་ནི་སཱི་ད་སཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, ས་ངྒྷི་ཀེ ཝི་ཧཱ་རེ ཨུ་པ་རི་ཝེ་ཧཱ་ས་ཀུ་ཊི་ཡཱ ཨཱ་ཧ་ཙྩ་པཱ་ད་ཀཾ མ་ཉྩཾ ས་ཧ་སཱ ཨ་བྷི་ནི་སཱི་དི་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༡༣༠. ‘‘ཡོ པ་ན བྷི་ཀྑུ ས་ངྒྷི་ཀེ ཝི་ཧཱ་རེ ཨུ་པ་རི་ཝེ་ཧཱ་ས་ཀུ་ཊི་ཡཱ ཨཱ་ཧ་ཙྩ་པཱ་ད་ཀཾ མ་ཉྩཾ ཝཱ པཱི་ཋཾ ཝཱ ཨ་བྷི་ནི་སཱི་དེ་ཡྻ ཝཱ ཨ་བྷི་ནི་པ་ཛྫེ་ཡྻ ཝཱ, པཱ་ཙི་ཏྟི་ཡ’’ནྟི.
༡༣༡. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ས་ངྒྷི་ཀོ ནཱ་མ ཝི་ཧཱ་རོ ས་ངྒྷ་སྶ དི་ནྣོ ཧོ་ཏི པ་རི་ཙྩ་ཏྟོ.
ཝེ་ཧཱ་ས་ཀུ་ཊི ནཱ་མ མ་ཛ྄ཛྷི་མ་སྶ པུ་རི་ས་སྶ ཨ་སཱི་ས་གྷ་ཊྚཱ.
ཨཱ་ཧ་ཙྩ་པཱ་ད་ཀོ ནཱ་མ མ་ཉྩོ ཨ་ངྒེ ཝི་ཛ྄ཛྷི་ཏྭཱ ཋི་ཏོ ཧོ་ཏི. ཨཱ་ཧ་ཙྩ་པཱ་ད་ཀཾ ནཱ་མ པཱི་ཋཾ ཨ་ངྒེ ཝི་ཛ྄ཛྷི་ཏྭཱ ཋི་ཏཾ ཧོ་ཏི.
ཨ་བྷི་ནི་སཱི་དེ་ཡྻཱཏི ཏ་སྨིཾ ཨ་བྷི་ནི་སཱི་ད་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་བྷི་ནི་པ་ཛྫེ་ཡྻཱཏི ཏ་སྨིཾ ཨ་བྷི་ནི་པ་ཛྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༡༣༢. ས་ངྒྷི་ཀེ ས་ངྒྷི་ཀ་ས་ཉྙཱི ཨུ་པ་རི་ཝེ་ཧཱ་ས་ཀུ་ཊི་ཡཱ ཨཱ་ཧ་ཙྩ་པཱ་ད་ཀཾ མ་ཉྩཾ ཝཱ པཱི་ཋཾ ཝཱ ཨ་བྷི་ནི་སཱི་ད་ཏི ཝཱ ཨ་བྷི་ནི་པ་ཛྫ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ས་ངྒྷི་ཀེ ཝེ་མ་ཏི་ཀོ…པེ… ས་ངྒྷི་ཀེ པུ་གྒ་ལི་ཀ་ས་ཉྙཱི ཨུ་པ་རི་ཝེ་ཧཱ་ས་ཀུ་ཊི་ཡཱ ཨཱ་ཧ་ཙྩ་པཱ་ད་ཀཾ མ་ཉྩཾ ཝཱ པཱི་ཋཾ ཝཱ ཨ་བྷི་ནི་སཱི་ད་ཏི ཝཱ ཨ་བྷི་ནི་པ་ཛྫ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ.
པུ་གྒ་ལི་ཀེ ས་ངྒྷི་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. པུ་གྒ་ལི་ཀེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. པུ་གྒ་ལི་ཀེ པུ་གྒ་ལི་ཀ་ས་ཉྙཱི ཨ་ཉྙ་སྶ པུ་གྒ་ལི་ཀེ, ཨཱ་པ་ཏྟི དུ་ཀྐ་ཊ་སྶ. ཨ་ཏྟ་ནོ པུ་གྒ་ལི་ཀེ, ཨ་ནཱ་པ་ཏྟི.
༡༣༣. ཨ་ནཱ་པ་ཏྟི – ཨ་ཝེ་ཧཱ་ས་ཀུ་ཊི་ཡཱ སཱི་ས་གྷ་ཊྚཱ་ཡ ཧེ་ཊྛཱ ཨ་པ་རི་བྷོ་གཾ ཧོ་ཏི, པ་ད་ར་ས་ཉྩི་ཏཾ ཧོ་ཏི, པ་ཊཱ་ཎི དི་ནྣཱ ཧོ་ཏི, ཏ་སྨིཾ ཋི་ཏོ ག་ཎྷ་ཏི ཝཱ ལ་གྒེ་ཏི ཝཱ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཝེ་ཧཱ་ས་ཀུ་ཊི་སི་ཀྑཱ་པ་དཾ ནི་ཊྛི་ཏཾ ཨ་ཊྛ་མཾ.
༩. མ་ཧ་ལླ་ཀ་ཝི་ཧཱ་ར་སི་ཀྑཱ་པ་དཾ
༡༣༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ ཀོ་ས་མྦི་ཡཾ ཝི་ཧ་ར་ཏི གྷོ་སི་ཏཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨ་ཏོ ཚ་ནྣ་སྶ ཨུ་པ་ཊྛཱ་ཀོ མ་ཧཱ་མ་ཏྟོ ཨཱ་ཡ་སྨ་ཏོ ཚ་ནྣ་སྶ ཝི་ཧཱ་རཾ ཀཱ་རཱ་པེ་ཏི. ཨ་ཐ ཁོ ཨཱ་ཡ་སྨཱ ཚ་ནྣོ ཀ་ཏ་པ་རི་ཡོ་སི་ཏཾ ཝི་ཧཱ་རཾ པུ་ན་པྤུ་ནཾ ཚཱ་དཱ་པེ་ཏི, པུ་ན་པྤུ་ནཾ ལེ་པཱ་པེ་ཏི. ཨ་ཏི་བྷཱ་རི་ཏོ ཝི་ཧཱ་རོ པ་རི་པ་ཏི. ཨ་ཐ ཁོ ཨཱ་ཡ་སྨཱ ཚ་ནྣོ ཏི་ཎ་ཉྩ ཀ་ཊྛ་ཉྩ སཾ་ཀ་ཌྜྷ་ནྟོ ཨ་ཉྙ་ཏ་ར་སྶ བྲཱ་ཧྨ་ཎ་སྶ ཡ་ཝ་ཁེ་ཏྟཾ དཱུ་སེ་སི. ཨ་ཐ ཁོ སོ བྲཱ་ཧྨ་ཎོ ཨུ་ཛ྄ཛྷཱ་ཡ་ཏི ཁི་ཡྻ་ཏི ཝི་པཱ་ཙེ་ཏི – ‘‘ཀ་ཐ་ཉྷི ནཱ་མ བྷ་ད་ནྟཱ ཨ་མྷཱ་ཀཾ ཡ་ཝ་ཁེ་ཏྟཾ དཱུ་སེ་སྶ་ནྟཱི’’ཏི! ཨ་སྶོ་སུཾ ཁོ བྷི་ཀྑཱུ ཏ་སྶ བྲཱ་ཧྨ་ཎ་སྶ ཨུ་ཛ྄ཛྷཱ་ཡ་ནྟ་སྶ ཁི་ཡྻ་ནྟ་སྶ ཝི་པཱ་ཙེ་ནྟ་སྶ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཚ་ནྣོ ཀ་ཏ་པ་རི་ཡོ་སི་ཏཾ ཝི་ཧཱ་རཾ པུ་ན་པྤུ་ནཾ ཚཱ་དཱ་པེ་སྶ་ཏི, པུ་ན་པྤུ་ནཾ ལེ་པཱ་པེ་སྶ་ཏི, ཨ་ཏི་བྷཱ་རི་ཏོ ཝི་ཧཱ་རོ པ་རི་པ་ཏཱི’’ཏི! ཨ་ཐ ཁོ ཏེ བྷི་ཀྑཱུ ཨཱ་ཡ་སྨ་ནྟཾ ཚ་ནྣཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏྭཾ, ཚ་ནྣ, ཀ་ཏ་པ་རི་ཡོ་སི་ཏཾ ཝི་ཧཱ་རཾ པུ་ན་པྤུ་ནཾ ཚཱ་དཱ་པེ་སི, པུ་ན་པྤུ་ནཾ ལེ་པཱ་པེ་སི, ཨ་ཏི་བྷཱ་རི་ཏོ ཝི་ཧཱ་རོ པ་རི་པ་ཏཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, ཀ་ཏ་པ་རི་ཡོ་སི་ཏཾ ཝི་ཧཱ་རཾ པུ་ན་པྤུ་ནཾ ཚཱ་དཱ་པེ་སྶ་སི, པུ་ན་པྤུ་ནཾ ལེ་པཱ་པེ་སྶ་སི, ཨ་ཏི་བྷཱ་རི་ཏོ ཝི་ཧཱ་རོ པ་རི་པ་ཏི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༡༣༥. ‘‘མ་ཧ་ལླ་ཀཾ པ་ན བྷི་ཀྑུ་ནཱ ཝི་ཧཱ་རཾ ཀཱ་ར་ཡ་མཱ་ནེ་ན ཡཱ་ཝ་དྭཱ་ར་ཀོ་སཱ ཨ་གྒ་ལ༹་ཊྛ་པ་ནཱ་ཡ ཨཱ་ལོ་ཀ་ས་ནྡྷི་པ་རི་ཀ་མྨཱ་ཡ དྭ་ཏྟི་ཙྪ་ད་ན་སྶ པ་རི་ཡཱ་ཡ ཨ་པྤ་ཧ་རི་ཏེ ཋི་ཏེ་ན ཨ་དྷི་ཊྛཱ་ཏ་བྦཾ. ཏ་ཏོ ཙེ ཨུ་ཏྟ་རིཾ ཨ་པྤ་ཧ་རི་ཏེ་པི ཋི་ཏོ ཨ་དྷི་ཊྛ་ཧེ་ཡྻ པཱ་ཙི་ཏྟི་ཡ’’ནྟི.
༡༣༦. མ་ཧ་ལླ་ཀོ ནཱ་མ ཝི་ཧཱ་རོ ས་སྶཱ་མི་ཀོ ཝུ་ཙྩ་ཏི.
ཝི་ཧཱ་རོ ནཱ་མ ཨུ་ལླི་ཏྟོ ཝཱ ཧོ་ཏི ཨ་ཝ་ལི་ཏྟོ ཝཱ ཨུ་ལླི་ཏྟཱ་ཝ་ལི་ཏྟོ ཝཱ.
ཀཱ་ར་ཡ་མཱ་ནེ་ནཱཏི ཀ་རོ་ནྟོ ཝཱ ཀཱ་རཱ་པེ་ནྟོ ཝཱ.
ཡཱ་ཝ དྭཱ་ར་ཀོ་སཱཏི པི་ཊྛ་ས་ངྒྷཱ་ཊ་སྶ [པཱི་ཋ་སཾ་གྷཱ་ཊ་སྶ (ཨི་ཏི་པི), པི་ཊྛི་ས་ངྒྷཱ་ཊ་སྶ (སྱཱ.)] ས་མ་ནྟཱ ཧ་ཏྠ་པཱ་སཱ.
ཨ་གྒ་ལ༹་ཊྛ་པ་ནཱ་ཡཱཏི དྭཱ་ར་ཊྛ་པ་ནཱ་ཡ.
ཨཱ་ལོ་ཀ་ས་ནྡྷི་པ་རི་ཀ་མྨཱ་ཡཱཏི ཝཱ་ཏ་པཱ་ན་པ་རི་ཀ་མྨཱ་ཡ སེ་ཏ་ཝ་ཎྞཾ ཀཱ་ལ༹་ཝ་ཎྞཾ གེ་རུ་ཀ་པ་རི་ཀ་མྨཾ མཱ་ལཱ་ཀ་མྨཾ ལ་ཏཱ་ཀ་མྨཾ མ་ཀ་ར་ད་ནྟ་ཀཾ པ་ཉྩ་པ་ཊི་ཀཾ.
དྭ་ཏྟི་ཙྪ་ད་ན་སྶ པ་རི་ཡཱ་ཡཾ ཨ་པྤ་ཧ་རི་ཏེ ཋི་ཏེ་ན ཨ་དྷི་ཊྛཱ་ཏ་བྦནྟི – ཧ་རི་ཏཾ ནཱ་མ པུ་བྦ་ཎྞཾ ཨ་པ་ར་ཎྞཾ. ས་ཙེ ཧ་རི་ཏེ ཋི་ཏོ ཨ་དྷི་ཊྛཱ་ཏི, ཨཱ་པ་ཏྟི དུ་ཀྐ་ཊ་སྶ. མ་གྒེ་ན ཚཱ་དེ་ནྟ་སྶ དྭེ མ་གྒེ ཨ་དྷི་ཊྛ་ཧི་ཏྭཱ ཏ་ཏི་ཡཾ མ་གྒཾ ཨཱ་ཎཱ་པེ་ཏྭཱ པ་ཀྐ་མི་ཏ་བྦཾ. པ་རི་ཡཱ་ཡེ་ན ཚཱ་དེ་ནྟ་སྶ དྭེ པ་རི་ཡཱ་ཡེ ཨ་དྷི་ཊྛ་ཧི་ཏྭཱ ཏ་ཏི་ཡཾ པ་རི་ཡཱ་ཡཾ ཨཱ་ཎཱ་པེ་ཏྭཱ པ་ཀྐ་མི་ཏ་བྦཾ.
༡༣༧. ཏ་ཏོ ཙེ ཨུ་ཏྟ་རི ཨ་པྤ་ཧ་རི་ཏེ་པི ཋི་ཏོ ཨ་དྷི་ཊྛ་ཧེ་ཡྻཱཏི ཨི་ཊྛ་ཀཱ་ཡ ༢.༠༢༦༢ ཚཱ་དེ་ནྟ་སྶ ཨི་ཊྛ་ཀི་ཊྛ་ཀཱ་ཡ ཨཱ་པ་ཏྟི པཱ་ཙི་ཏྟི་ཡ་སྶ. སི་ལཱ་ཡ ཚཱ་དེ་ནྟ་སྶ སི་ལཱ་ཡ སི་ལཱ་ཡ ཨཱ་པ་ཏྟི པཱ་ཙི་ཏྟི་ཡ་སྶ. སུ་དྷཱ་ཡ ཚཱ་དེ་ནྟ་སྶ པི་ཎྜེ པི་ཎྜེ ཨཱ་པ་ཏྟི པཱ་ཙི་ཏྟི་ཡ་སྶ. ཏི་ཎེ་ན ཚཱ་དེ་ནྟ་སྶ ཀ་ར་ལེ༹ ཀ་ར་ལེ༹ ཨཱ་པ་ཏྟི པཱ་ཙི་ཏྟི་ཡ་སྶ. པ་ཎྞེ་ན ཚཱ་དེ་ནྟ་སྶ པ་ཎྞེ པ་ཎྞེ ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ཏི་རེ་ཀ་དྭ་ཏྟི་པ་རི་ཡཱ་ཡེ ཨ་ཏི་རེ་ཀ་ས་ཉྙཱི ཨ་དྷི་ཊྛཱ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ཏི་རེ་ཀ་དྭ་ཏྟི་པ་རི་ཡཱ་ཡེ ཝེ་མ་ཏི་ཀོ ཨ་དྷི་ཊྛཱ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ཏི་རེ་ཀ་དྭ་ཏྟི་པ་རི་ཡཱ་ཡེ ཨཱུ་ན་ཀ་ས་ཉྙཱི ཨ་དྷི་ཊྛཱ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨཱུ་ན་ཀ་དྭ་ཏྟི་པ་རི་ཡཱ་ཡེ ཨ་ཏི་རེ་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨཱུ་ན་ཀ་དྭ་ཏྟི་པ་རི་ཡཱ་ཡེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨཱུ་ན་ཀ་དྭ་ཏྟི་པ་རི་ཡཱ་ཡེ ཨཱུ་ན་ཀ་ས་ཉྙཱི, ཨ་ནཱ་པ་ཏྟི.
༡༣༨. ཨ་ནཱ་པ་ཏྟི དྭ་ཏྟི་པ་རི་ཡཱ་ཡེ, ཨཱུ་ན་ཀ་དྭ་ཏྟི་པ་རི་ཡཱ་ཡེ, ལེ་ཎེ, གུ་ཧཱ་ཡ, ཏི་ཎ་ཀུ་ཊི་ཀཱ་ཡ, ཨ་ཉྙ་སྶ་ཏྠཱ་ཡ, ཨ་ཏྟ་ནོ དྷ་ནེ་ན, ཝཱ་སཱ་གཱ་རཾ ཋ་པེ་ཏྭཱ ས་བྦ་ཏྠ ཨ་ནཱ་པ་ཏྟི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
མ་ཧ་ལླ་ཀ་ཝི་ཧཱ་ར་སི་ཀྑཱ་པ་དཾ ནི་ཊྛི་ཏཾ ན་ཝ་མཾ.
༡༠. ས་པྤཱ་ཎ་ཀ་སི་ཀྑཱ་པ་དཾ
༡༣༩. ཏེ་ན ས་མ་ཡེ་ན བུ་དྡྷོ བྷ་ག་ཝཱ ཨཱ་ལ༹་ཝི་ཡཾ ཝི་ཧ་ར་ཏི ཨ་གྒཱ་ལ༹་ཝེ ཙེ་ཏི་ཡེ. ཏེ་ན ཁོ པ་ན ས་མ་ཡེ་ན ཨཱ་ལ༹་ཝ་ཀཱ བྷི་ཀྑཱུ ན་ཝ་ཀ་མྨཾ ཀ་རོ་ནྟཱ ཛཱ་ནཾ ས་པྤཱ་ཎ་ཀཾ ཨུ་ད་ཀཾ ཏི་ཎ་མྤི མ་ཏྟི་ཀ་མྤི སི་ཉྩ་ནྟི་པི སི་ཉྩཱ་པེ་ནྟི་པི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ལ༹་ཝ་ཀཱ བྷི་ཀྑཱུ ཛཱ་ནཾ ས་པྤཱ་ཎ་ཀཾ ཨུ་ད་ཀཾ ཏི་ཎ་མྤི མ་ཏྟི་ཀ་མྤི སི་ཉྩི་སྶ་ནྟི་པི སི་ཉྩཱ་པེ་སྶ་ནྟི་པཱི’’ཏི! ཨ་ཐ ཁོ ཏེ བྷི་ཀྑཱུ ཨཱ་ལ༹་ཝ་ཀེ བྷི་ཀྑཱུ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏུ་མྷེ, བྷི་ཀྑ་ཝེ, ཛཱ་ནཾ ས་པྤཱ་ཎ་ཀཾ ཨུ་ད་ཀཾ ཏི་ཎ་མྤི མ་ཏྟི་ཀ་མྤི སི་ཉྩ་ཐ་པི སི་ཉྩཱ་པེ་ཐ་པཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, ཛཱ་ནཾ ས་པྤཱ་ཎ་ཀཾ ཨུ་ད་ཀཾ ཏི་ཎ་མྤི མ་ཏྟི་ཀ་མྤི སི་ཉྩི་སྶ་ཐ་པི སི་ཉྩཱ་པེ་སྶ་ཐ་པི! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༡༤༠. ‘‘ཡོ པ་ན བྷི་ཀྑུ ཛཱ་ནཾ ས་པྤཱ་ཎ་ཀཾ ཨུ་ད་ཀཾ ཏི་ཎཾ ཝཱ མ་ཏྟི་ཀཾ ཝཱ སི་ཉྩེ་ཡྻ ཝཱ སི་ཉྩཱ་པེ་ཡྻ ཝཱ, པཱ་ཙི་ཏྟི་ཡ’’ནྟི.
༡༤༡. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ཛཱ་ནཱ་ཏི ནཱ་མ [ཛཱ་ནཾ ནཱ་མ (སྱཱ.)] སཱ་མཾ ཝཱ ཛཱ་ནཱ་ཏི ཨ་ཉྙེ ཝཱ ཏ་སྶ ཨཱ་རོ་ཙེ་ནྟི.
སི་ཉྩེ་ཡྻཱཏི ས་ཡཾ སི་ཉྩ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
སི་ཉྩཱ་པེ་ཡྻཱཏི ཨ་ཉྙཾ ཨཱ་ཎཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ [ཨཱ་པ་ཏྟི དུ་ཀྐ་ཊ་སྶ (ཀ་ཏྠ་ཙི)]. ས་ཀིཾ ཨཱ་ཎ་ཏྟོ བ་ཧུ་ཀ་མྤི སི་ཉྩ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༡༤༢. ས་པྤཱ་ཎ་ཀེ ས་པྤཱ་ཎ་ཀ་ས་ཉྙཱི ཏི་ཎཾ ཝཱ མ་ཏྟི་ཀཾ ཝཱ སི་ཉྩ་ཏི ཝཱ སི་ཉྩཱ་པེ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ས་པྤཱ་ཎ་ཀེ ཝེ་མ་ཏི་ཀོ ཏི་ཎཾ ཝཱ མ་ཏྟི་ཀཾ ཝཱ སི་ཉྩ་ཏི ཝཱ སི་ཉྩཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ས་པྤཱ་ཎ་ཀེ ཨ་པྤཱ་ཎ་ཀ་ས་ཉྙཱི ཏི་ཎཾ ཝཱ མ་ཏྟི་ཀཾ ཝཱ སི་ཉྩ་ཏི ཝཱ སི་ཉྩཱ་པེ་ཏི ཝཱ, ཨ་ནཱ་པ་ཏྟི. ཨ་པྤཱ་ཎ་ཀེ ས་པྤཱ་ཎ་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་པྤཱ་ཎ་ཀེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་པྤཱ་ཎ་ཀེ ཨ་པྤཱ་ཎ་ཀ་ས་ཉྙཱི, ཨ་ནཱ་པ་ཏྟི.
༡༤༣. ཨ་ནཱ་པ་ཏྟི ཨ་ས་ཉྩི་ཙྩ, ཨ་སྶ་ཏི་ཡཱ, ཨ་ཛཱ་ན་ནྟ་སྶ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ས་པྤཱ་ཎ་ཀ་སི་ཀྑཱ་པ་དཾ ནི་ཊྛི་ཏཾ ད་ས་མཾ.
བྷཱུ་ཏ་གཱ་མ་ཝ་གྒོ དུ་ཏི་ཡོ.
ཏ་སྶུ་དྡཱ་ནཾ –
བྷཱུ་ཏཾ ཨ་ཉྙཱ་ཡ ཨུ་ཛ྄ཛྷཱ་ཡཾ, པ་ཀྐ་མ་ནྟེ་ན ཏེ དུ་ཝེ;
པུ་བྦེ ནི་ཀྐ་ཌྜྷ་ནཱ་ཧ་ཙྩ, དྭཱ་རཾ ས་པྤཱ་ཎ་ཀེ་ན ཙཱ་ཏི.