༥. དུ་ཏི་ཡ་སེ་ནཱ་ས་ན་སི་ཀྑཱ་པ་དཾ

༡༡༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ས་ཏྟ་ར་ས་ཝ་གྒི་ཡཱ བྷི་ཀྑཱུ ས་ཧཱ་ཡ་ཀཱ ཧོ་ནྟི. ཏེ ཝ་ས་ནྟཱ་པི ཨེ་ཀ་ཏོ་ཝ ཝ་ས་ནྟི, པ་ཀྐ་མ་ནྟཱ་པི ཨེ་ཀ་ཏོ་ཝ པ་ཀྐ་མ་ནྟི. ཏེ ཨ་ཉྙ་ཏ་ར་སྨིཾ ས་ངྒྷི་ཀེ ཝི་ཧཱ་རེ སེ་ཡྻཾ ས་ནྠ་རི་ཏྭཱ ཏཾ པ་ཀྐ་མ་ནྟཱ ནེ་ཝ ཨུ་དྡྷ་རིཾ་སུ ན ཨུ་དྡྷ་རཱ་པེ་སུཾ, ཨ་ནཱ་པུ་ཙྪཱ པ་ཀྐ་མིཾ་སུ. སེ་ནཱ་ས་ནཾ ཨུ་པ་ཙི་ཀཱ་ཧི ཁཱ་ཡི་ཏཾ ཧོ་ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་ཏྟ་ར་ས་ཝ་གྒི་ཡཱ བྷི་ཀྑཱུ ས་ངྒྷི་ཀེ ཝི་ཧཱ་རེ སེ་ཡྻཾ ས་ནྠ་རི་ཏྭཱ ཏཾ པ་ཀྐ་མ་ནྟཱ ནེ་ཝ ཨུ་དྡྷ་རི་སྶ་ནྟི ན ཨུ་དྡྷ་རཱ་པེ་སྶ་ནྟི, ཨ་ནཱ་པུ་ཙྪཱ པ་ཀྐ་མི་སྶ་ནྟི, སེ་ནཱ་ས་ནཾ ཨུ་པ་ཙི་ཀཱ་ཧི ཁཱ་ཡི་ཏ’’ནྟི! ཨ་ཐ ཁོ ཏེ བྷི་ཀྑཱུ ས་ཏྟ་ར་ས་ཝ་གྒི་ཡེ བྷི་ཀྑཱུ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར, བྷི་ཀྑ་ཝེ, ས་ཏྟ་ར་ས་ཝ་གྒི་ཡཱ བྷི་ཀྑཱུ ས་ངྒྷི་ཀེ ཝི་ཧཱ་རེ སེ་ཡྻཾ ས་ནྠ་རི་ཏྭཱ ཏཾ པ་ཀྐ་མ་ནྟཱ ནེ་ཝ ཨུ་དྡྷ་རིཾ་སུ ན ཨུ་དྡྷ་རཱ་པེ་སུཾ, ཨ་ནཱ་པུ་ཙྪཱ པ་ཀྐ་མིཾ་སུ, སེ་ནཱ་ས་ནཾ ཨུ་པ་ཙི་ཀཱ་ཧི ཁཱ་ཡི་ཏ’’ནྟི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏེ, བྷི་ཀྑ་ཝེ, མོ་གྷ་པུ་རི་སཱ ས་ངྒྷི་ཀེ ཝི་ཧཱ་རེ སེ་ཡྻཾ ས་ནྠ་རི་ཏྭཱ ཏཾ པ་ཀྐ་མ་ནྟཱ ནེ་ཝ ཨུ་དྡྷ་རི་སྶ་ནྟི ན ཨུ་དྡྷ་རཱ་པེ་སྶ་ནྟི, ཨ་ནཱ་པུ་ཙྪཱ པ་ཀྐ་མི་སྶ་ནྟི, སེ་ནཱ་ས་ནཾ ཨུ་པ་ཙི་ཀཱ་ཧི ཁཱ་ཡི་ཏཾ! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –

༡༡༥. ‘‘ཡོ པ་ན བྷི་ཀྑུ ས་ངྒྷི་ཀེ ཝི་ཧཱ་རེ སེ་ཡྻཾ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻ ན ཨུ་དྡྷ་རཱ་པེ་ཡྻ, ཨ་ནཱ་པུ་ཙྪཾ ཝཱ ག་ཙྪེ་ཡྻ, པཱ་ཙི་ཏྟི་ཡ’’ནྟི.

༡༡༦. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.

ས་ངྒྷི་ཀོ ནཱ་མ ཝི་ཧཱ་རོ ས་ངྒྷ་སྶ དི་ནྣོ ཧོ་ཏི པ་རི་ཙྩ་ཏྟོ.

སེ་ཡྻཾ ནཱ་མ བྷི་སི, ཙི་མི་ལི་ཀཱ ཨུ་ཏྟ་ར་ཏྠ་ར་ཎཾ, བྷཱུ་མ་ཏྠ་ར་ཎཾ, ཏ་ཊྚི་ཀཱ, ཙ་མྨ་ཁ་ཎྜོ, ནི་སཱི་ད་ནཾ, པ་ཙྩ་ཏྠ་ར་ཎཾ, ཏི་ཎ་ས་ནྠཱ་རོ, པ་ཎྞ་ས་ནྠཱ་རོ.

ས་ནྠ་རི་ཏྭཱཏི ས་ཡཾ ས་ནྠ་རི་ཏྭཱ.

ས་ནྠ་རཱ་པེ་ཏྭཱཏི ཨ་ཉྙཾ ས་ནྠ་རཱ་པེ་ཏྭཱ.

ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻཱཏི ན ས་ཡཾ ཨུ་དྡྷ་རེ་ཡྻ.

ན ཨུ་དྡྷ་རཱ་པེ་ཡྻཱཏི ན ཨ་ཉྙཾ ཨུ་དྡྷ་རཱ་པེ་ཡྻ.

ཨ་ནཱ་པུ་ཙྪཾ ཝཱ ག་ཙྪེ་ཡྻཱཏི བྷི་ཀྑུཾ ཝཱ སཱ་མ་ཎེ་རཾ ཝཱ ཨཱ་རཱ་མི་ཀཾ ཝཱ ཨ་ནཱ་པུ་ཙྪཱ པ་རི་ཀྑི་ཏྟ་སྶ ཨཱ་རཱ་མ་སྶ པ་རི་ཀྑེ་པཾ ཨ་ཏི་ཀྐ་མ་ནྟ་སྶ ཨཱ་པ་ཏྟི པཱ་ཙི་ཏྟི་ཡ་སྶ. ཨ་པ་རི་ཀྑི་ཏྟ་སྶ ཨཱ་རཱ་མ་སྶ ཨུ་པ་ཙཱ་རཾ ཨ་ཏི་ཀྐ་མ་ནྟ་སྶ ཨཱ་པ་ཏྟི པཱ་ཙི་ཏྟི་ཡ་སྶ. ས་ངྒྷི་ཀེ ས་ངྒྷི་ཀ་ས་ཉྙཱི སེ་ཡྻཾ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻ ན ཨུ་དྡྷ་རཱ་པེ་ཡྻ, ཨ་ནཱ་པུ་ཙྪཾ ཝཱ ག་ཙྪེ་ཡྻ, ཨཱ་པ་ཏྟི པཱ་ཙི་ཏྟི་ཡ་སྶ. ས་ངྒྷི་ཀེ ཝེ་མ་ཏི་ཀོ སེ་ཡྻཾ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻ ན ཨུ་དྡྷ་རཱ་པེ་ཡྻ, ཨ་ནཱ་པུ་ཙྪཾ ཝཱ ག་ཙྪེ་ཡྻ, ཨཱ་པ་ཏྟི པཱ་ཙི་ཏྟི་ཡ་སྶ. ས་ངྒྷི་ཀེ པུ་གྒ་ལི་ཀ་ས་ཉྙཱི སེ་ཡྻཾ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻ ན ཨུ་དྡྷ་རཱ་པེ་ཡྻ, ཨ་ནཱ་པུ་ཙྪཾ ཝཱ ག་ཙྪེ་ཡྻ, ཨཱ་པ་ཏྟི པཱ་ཙི་ཏྟི་ཡ་སྶ.

༡༡༧. ཝི་ཧཱ་ར་སྶ ཨུ་པ་ཙཱ་རེ ཝཱ ཨུ་པ་ཊྛཱ་ན་སཱ་ལཱ་ཡཾ ཝཱ མ་ཎྜ་པེ ཝཱ རུ་ཀྑ་མཱུ་ལེ ཝཱ སེ་ཡྻཾ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻ ན ཨུ་དྡྷ་རཱ་པེ་ཡྻ, ཨ་ནཱ་པུ་ཙྪཾ ཝཱ ག་ཙྪེ་ཡྻ, ཨཱ་པ་ཏྟི དུ་ཀྐ་ཊ་སྶ. མ་ཉྩཾ ཝཱ པཱི་ཋཾ ཝཱ ཝི་ཧཱ་རེ ཝཱ ཝི་ཧཱ་ར་སྶཱུ་པ་ཙཱ་རེ ཝཱ ཨུ་པ་ཊྛཱ་ན་སཱ་ལཱ་ཡཾ ཝཱ མ་ཎྜ་པེ ཝཱ རུ་ཀྑ་མཱུ་ལེ ཝཱ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཏཾ པ་ཀྐ་མ་ནྟོ ནེ་ཝ ཨུ་དྡྷ་རེ་ཡྻ ན ཨུ་དྡྷ་རཱ་པེ་ཡྻ, ཨ་ནཱ་པུ་ཙྪཾ ཝཱ ག་ཙྪེ་ཡྻ, ཨཱ་པ་ཏྟི དུ་ཀྐ་ཊ་སྶ.

པུ་གྒ་ལི་ཀེ ས་ངྒྷི་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. པུ་གྒ་ལི་ཀེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. པུ་གྒ་ལི་ཀེ པུ་གྒ་ལི་ཀ་ས་ཉྙཱི ཨ་ཉྙ་སྶ པུ་གྒ་ལི་ཀེ ཨཱ་པ་ཏྟི དུ་ཀྐ་ཊ་སྶ. ཨ་ཏྟ་ནོ པུ་གྒ་ལི་ཀེ ཨ་ནཱ་པ་ཏྟི.

༡༡༨. ཨ་ནཱ་པ་ཏྟི ཨུ་དྡྷ་རི་ཏྭཱ ག་ཙྪ་ཏི, ཨུ་དྡྷ་རཱ་པེ་ཏྭཱ ག་ཙྪ་ཏི, ཨཱ་པུ་ཙྪཾ ག་ཙྪ་ཏི, ཀེ་ན་ཙི པ་ལི་བུ་དྡྷཾ ཧོ་ཏི, སཱ་པེ་ཀྑོ ག་ནྟྭཱ ཏ་ཏྠ ཋི་ཏོ ཨཱ་པུ་ཙྪ་ཏི, ཀེ་ན་ཙི པ་ལི་བུ་དྡྷོ ཧོ་ཏི, ཨཱ་པ་དཱ་སུ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.

དུ་ཏི་ཡ་སེ་ནཱ་ས་ན་སི་ཀྑཱ་པ་དཾ ནི་ཊྛི་ཏཾ པ་ཉྩ་མཾ.