༦. དུ་ཏི་ཡ་ས་ཧ་སེ་ཡྻ་སི་ཀྑཱ་པ་དཾ
༥༥. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཨ་ནུ་རུ་དྡྷོ ཀོ་ས་ལེ་སུ ཛ་ན་པ་དེ [ཨེ་ཏྠ ཨ་མྦ་ཊྛ་སུ་ཏྟཱ་དི་ཊཱི་ཀཱ ཨོ་ལོ་ཀེ་ཏ་བྦཱ] སཱ་ཝ་ཏྠིཾ ག་ཙྪ་ནྟོ སཱ་ཡཾ ཨ་ཉྙ་ཏ་རཾ གཱ་མཾ ཨུ་པ་ག་ཙྪི. ཏེ་ན ཁོ པ་ན ས་མ་ཡེ་ན ཏ་སྨིཾ གཱ་མེ ཨ་ཉྙ་ཏ་རི་སྶཱ ཨི་ཏྠི་ཡཱ ཨཱ་ཝ་ས་ཐཱ་གཱ་རཾ པ་ཉྙ་ཏྟཾ ཧོ་ཏི. ཨ་ཐ ཁོ ཨཱ་ཡ་སྨཱ ཨ་ནུ་རུ་དྡྷོ ཡེ་ན སཱ ཨི་ཏྠཱི ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཏཾ ཨི་ཏྠིཾ ཨེ་ཏ་ད་ཝོ་ཙ – ‘‘ས་ཙེ ཏེ, བྷ་གི་ནི, ཨ་ག་རུ, ཝ་སེ་ཡྻཱ་མ ཨེ་ཀ་ར་ཏྟཾ ཨཱ་ཝ་ས་ཐཱ་གཱ་རེ’’ཏི. ‘‘ཝ་སེ་ཡྻཱ་ཐ, བྷ་ནྟེ’’ཏི. ཨ་ཉྙེ་པི ཨ་དྡྷི་ཀཱ ཡེ་ན སཱ ཨི་ཏྠཱི ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ ཏཾ ཨི་ཏྠིཾ ཨེ་ཏ་ད་ཝོ་ཙུཾ – ‘‘ས་ཙེ ཏེ, ཨ་ཡྻེ, ཨ་ག་རུ ཝ་སེ་ཡྻཱ་མ ཨེ་ཀ་ར་ཏྟཾ ཨཱ་ཝ་ས་ཐཱ་གཱ་རེ’’ཏི. ‘‘ཨེ་སོ ཁོ ཨ་ཡྻོ ས་མ་ཎོ པ་ཋ་མཾ ཨུ་པ་ག་ཏོ; ས་ཙེ སོ ཨ་ནུ་ཛཱ་ནཱ་ཏི, ཝ་སེ་ཡྻཱ་ཐཱ’’ཏི. ཨ་ཐ ཁོ ཏེ ཨ་དྡྷི་ཀཱ ཡེ་ནཱ་ཡ་སྨཱ ཨ་ནུ་རུ་དྡྷོ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨ་ནུ་རུ་དྡྷཾ ཨེ་ཏ་ད་ཝོ་ཙུཾ – ‘‘ས་ཙེ ཏེ, བྷ་ནྟེ, ཨ་ག་རུ, ཝ་སེ་ཡྻཱ་མ ཨེ་ཀ་ར་ཏྟཾ ཨཱ་ཝ་ས་ཐཱ་གཱ་རེ’’ཏི. ‘‘ཝ་སེ་ཡྻཱ་ཐ, ཨཱ་ཝུ་སོ’’ཏི. ཨ་ཐ ཁོ སཱ ཨི་ཏྠཱི ཨཱ་ཡ་སྨ་ནྟེ ཨ་ནུ་རུ་དྡྷེ ས་ཧ ད་སྶ་ནེ་ན པ་ཊི་བ་དྡྷ་ཙི་ཏྟཱ ཨ་ཧོ་སི. ཨ་ཐ ཁོ སཱ ཨི་ཏྠཱི ཡེ་ནཱ་ཡ་སྨཱ ཨ་ནུ་རུ་དྡྷོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨ་ནུ་རུ་དྡྷཾ ཨེ་ཏ་ད་ཝོ་ཙ – ‘‘ཨ་ཡྻོ, བྷ་ནྟེ, ཨི་མེ་ཧི མ་ནུ་སྶེ་ཧི ཨཱ་ཀི་ཎྞོ ན ཕཱ་སུ ཝི་ཧ་རི་སྶ་ཏི. སཱ་དྷཱ་ཧཾ, བྷ་ནྟེ, ཨ་ཡྻ་སྶ མ་ཉྩ་ཀཾ ཨ་བྦྷ་ནྟ་རཾ པ་ཉྙ་པེ་ཡྻ’’ནྟི. ཨ་དྷི་ཝཱ་སེ་སི ཁོ ཨཱ་ཡ་སྨཱ ཨ་ནུ་རུ་དྡྷོ ཏུ་ཎྷཱི་བྷཱ་ཝེ་ན. ཨ་ཐ ཁོ སཱ ཨི་ཏྠཱི ཨཱ་ཡ་སྨ་ཏོ ཨ་ནུ་རུ་དྡྷ་སྶ མ་ཉྩ་ཀཾ ཨ་བྦྷ་ནྟ་རཾ པ་ཉྙ་པེ་ཏྭཱ ཨ་ལ་ངྐ་ཏ་པྤ་ཊི་ཡ་ཏྟཱ ག་ནྡྷ་ག་ནྡྷི་ནཱི ཡེ་ནཱ་ཡ་སྨཱ ཨ་ནུ་རུ་དྡྷོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨ་ནུ་རུ་དྡྷཾ ཨེ་ཏ་ད་ཝོ་ཙ – ‘‘ཨ་ཡྻོ, བྷ་ནྟེ, ཨ་བྷི་རཱུ་པོ ད་སྶ་ནཱི་ཡོ པཱ་སཱ་དི་ཀོ, ཨ་ཧཾ ཙ་མྷི ཨ་བྷི་རཱུ་པཱ ད་སྶ་ནཱི་ཡཱ པཱ་སཱ་དི་ཀཱ. སཱ་དྷཱ་ཧཾ, བྷ་ནྟེ, ཨ་ཡྻ་སྶ པ་ཛཱ་པ་ཏི བྷ་ཝེ་ཡྻ’’ནྟི. ཨེ་ཝཾ ཝུ་ཏྟེ ཨཱ་ཡ་སྨཱ ཨ་ནུ་རུ་དྡྷོ ཏུ་ཎྷཱི ཨ་ཧོ་སི. དུ་ཏི་ཡ་མྤི ཁོ…པེ… ཏ་ཏི་ཡ་མྤི ཁོ སཱ ཨི་ཏྠཱི ཨཱ་ཡ་སྨ་ནྟཾ ཨ་ནུ་རུ་དྡྷཾ ཨེ་ཏ་ད་ཝོ་ཙ – ‘‘ཨ་ཡྻོ, བྷ་ནྟེ, ཨ་བྷི་རཱུ་པོ ད་སྶ་ནཱི་ཡོ པཱ་སཱ་དི་ཀོ, ཨ་ཧ་ཉྩ་མྷི ཨ་བྷི་རཱུ་པཱ ད་སྶ་ནཱི་ཡཱ པཱ་སཱ་དི་ཀཱ. སཱ་དྷུ, བྷ་ནྟེ, ཨ་ཡྻོ མ་ཉྩེ་ཝ པ་ཊི་ཙྪ་ཏུ [ས་མྤ་ཊི་ཙྪ་ཏུ (སྱཱ.)] ས་བྦ་ཉྩ སཱ་པ་ཏེ་ཡྻ’’ནྟི. ཏ་ཏི་ཡ་མྤི ཁོ ཨཱ་ཡ་སྨཱ ཨ་ནུ་རུ་དྡྷོ ཏུ་ཎྷཱི ཨ་ཧོ་སི. ཨ་ཐ ཁོ སཱ ཨི་ཏྠཱི སཱ་ཊ་ཀཾ ནི་ཀྑི་པི་ཏྭཱ ཨཱ་ཡ་སྨ་ཏོ ཨ་ནུ་རུ་དྡྷ་སྶ པུ་ར་ཏོ ཙ་ངྐ་མ་ཏི་པི ཏི་ཊྛ་ཏི་པི ནི་སཱི་ད་ཏི་པི སེ་ཡྻ་མྤི ཀ་པྤེ་ཏི. ཨ་ཐ ཁོ ཨཱ་ཡ་སྨཱ ཨ་ནུ་རུ་དྡྷོ ཨི་ནྡྲི་ཡཱ་ནི ཨོ་ཀྑི་པི་ཏྭཱ ཏཾ ཨི་ཏྠིཾ ནེ་ཝ ཨོ་ལོ་ཀེ་སི ན་པི ཨཱ་ལ་པི. ཨ་ཐ ཁོ སཱ ཨི་ཏྠཱི – ‘‘ཨ་ཙྪ་རི་ཡཾ ཝ་ཏ བྷོ, ཨ་བྦྷུ་ཏཾ ཝ་ཏ བྷོ! བ་ཧཱུ མེ མ་ནུ་སྶཱ ས་ཏེ་ན་པི ས་ཧ་སྶེ་ན་པི པ་ཧི་ཎ་ནྟི. ཨ་ཡཾ པ་ན ས་མ་ཎོ – མ་ཡཱ སཱ་མཾ ཡཱ་ཙི་ཡ་མཱ་ནོ – ན ཨི་ཙྪ་ཏི མ་ཉྩེ་ཝ པ་ཊི་ཙྪི་ཏུཾ ས་བྦ་ཉྩ སཱ་པ་ཏེ་ཡྻ’’ནྟི སཱ་ཊ་ཀཾ ནི་ཝཱ་སེ་ཏྭཱ ཨཱ་ཡ་སྨ་ཏོ ཨ་ནུ་རུ་དྡྷ་སྶ པཱ་དེ་སུ སི་ར་སཱ ནི་པ་ཏི་ཏྭཱ ཨཱ་ཡ་སྨ་ནྟཾ ཨ་ནུ་རུ་དྡྷཾ ཨེ་ཏ་ད་ཝོ་ཙ – ‘‘ཨ་ཙྩ་ཡོ མཾ, བྷ་ནྟེ, ཨ་ཙྩ་ག་མཱ ཡ་ཐཱ་བཱ་ལཾ ཡ་ཐཱ་མཱུ་ལ༹ྷཾ ཡ་ཐཱ་ཨ་ཀུ་ས་ལཾ ཡཱ་ཧཾ ཨེ་ཝ་མ་ཀཱ་སིཾ. ཏ་སྶཱ མེ, བྷ་ནྟེ, ཨ་ཡྻོ ཨ་ཙྩ་ཡཾ ཨ་ཙྩ་ཡ་ཏོ པ་ཊི་གྒ་ཎྷཱ་ཏུ ཨཱ་ཡ་ཏིཾ སཾ་ཝ་རཱ་ཡཱ’’ཏི. ‘‘ཏ་གྒྷ ཏྭཾ, བྷ་གི་ནི, ཨ་ཙྩ་ཡོ ཨ་ཙྩ་ག་མཱ ཡ་ཐཱ་བཱ་ལཾ ཡ་ཐཱ་མཱུ་ལ༹ྷཾ ཡ་ཐཱ་ཨ་ཀུ་ས་ལཾ ཡཱ ཏྭཾ ཨེ་ཝ་མ་ཀཱ་སི. ཡ་ཏོ ཙ ཁོ ཏྭཾ, བྷ་གི་ནི, ཨ་ཙྩ་ཡཾ ཨ་ཙྩ་ཡ་ཏོ དི་སྭཱ ཡ་ཐཱ་དྷ་མྨཾ པ་ཊི་ཀ་རོ་སི, ཏཾ ཏེ མ་ཡཾ པ་ཊི་གྒ་ཎྷཱ་མ. ཝུ་དྡྷི ཧེ་སཱ, བྷ་གི་ནི, ཨ་རི་ཡ་སྶ ཝི་ན་ཡེ ཡོ ཨ་ཙྩ་ཡཾ ཨ་ཙྩ་ཡ་ཏོ དི་སྭཱ ཡ་ཐཱ་དྷ་མྨཾ པ་ཊི་ཀ་རོ་ཏི ཨཱ་ཡ་ཏི་ཉྩ སཾ་ཝ་རཾ ཨཱ་པ་ཛྫ་ཏཱི’’ཏི.
ཨ་ཐ ཁོ སཱ ཨི་ཏྠཱི ཏ་སྶཱ ར་ཏྟི་ཡཱ ཨ་ཙྩ་ཡེ་ན ཨཱ་ཡ་སྨ་ནྟཾ ཨ་ནུ་རུ་དྡྷཾ པ་ཎཱི་ཏེ་ན ཁཱ་ད་ནཱི་ཡེ་ན བྷོ་ཛ་ནཱི་ཡེ་ན ས་ཧ་ཏྠཱ ས་ནྟ་པྤེ་ཏྭཱ ས་མྤ་ཝཱ་རེ་ཏྭཱ, ཨཱ་ཡ་སྨ་ནྟཾ ཨ་ནུ་རུ་དྡྷཾ བྷུ་ཏྟཱ་ཝིཾ ཨོ་ནཱི་ཏ་པ་ཏྟ་པཱ་ཎིཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཏཾ ཨི་ཏྠིཾ ཨཱ་ཡ་སྨཱ ཨ་ནུ་རུ་དྡྷོ དྷ་མྨི་ཡཱ ཀ་ཐཱ་ཡ ས་ནྡ་སྶེ་སི ས་མཱ་ད་པེ་སི ས་མུ་ཏྟེ་ཛེ་སི ས་མྤ་ཧཾ་སེ་སི. ཨ་ཐ ཁོ སཱ ཨི་ཏྠཱི – ཨཱ་ཡ་སྨ་ཏཱ ཨ་ནུ་རུ་དྡྷེ་ན དྷ་མྨི་ཡཱ ཀ་ཐཱ་ཡ ས་ནྡ་སྶི་ཏཱ ས་མཱ་ད་པི་ཏཱ ས་མུ་ཏྟེ་ཛི་ཏཱ ས་མྤ་ཧཾ་སི་ཏཱ – ཨཱ་ཡ་སྨ་ནྟཾ ཨ་ནུ་རུ་དྡྷཾ ཨེ་ཏ་ད་ཝོ་ཙ – ‘‘ཨ་བྷི་ཀྐ་ནྟཾ, བྷ་ནྟེ, ཨ་བྷི་ཀྐ་ནྟཾ, བྷ་ནྟེ! སེ་ཡྻ་ཐཱ་པི, བྷ་ནྟེ, ནི་ཀྐུ་ཛྫི་ཏཾ ཝཱ ཨུ་ཀྐུ་ཛྫེ་ཡྻ, པ་ཊི་ཙྪ་ནྣཾ ཝཱ ཝི་ཝ་རེ་ཡྻ, མཱུ་ལ༹ྷ་སྶ ཝཱ མ་གྒཾ ཨཱ་ཙི་ཀྑེ་ཡྻ, ཨ་ནྡྷ་ཀཱ་རེ ཝཱ ཏེ་ལ་པ་ཛྫོ་ཏཾ དྷཱ་རེ་ཡྻ – ཙ་ཀྑུ་མ་ནྟོ རཱུ་པཱ་ནི ད་ཀྑ་ནྟཱི་ཏི, ཨེ་ཝ་མེ་ཝཾ ཨ་ཡྻེ་ན ཨ་ནུ་རུ་དྡྷེ་ན ཨ་ནེ་ཀ་པ་རི་ཡཱ་ཡེ་ན དྷ་མྨོ པ་ཀཱ་སི་ཏོ. ཨེ་སཱ་ཧཾ, བྷ་ནྟེ, ཏཾ བྷ་ག་ཝ་ནྟཾ ས་ར་ཎཾ ག་ཙྪཱ་མི དྷ་མྨ་ཉྩ བྷི་ཀྑུ་ས་ངྒྷ་ཉྩ. ཨུ་པཱ་སི་ཀཾ མཾ ཨ་ཡྻོ དྷཱ་རེ་ཏུ ཨ་ཛྫ་ཏ་གྒེ པཱ་ཎུ་པེ་ཏཾ ས་ར་ཎཾ ག་ཏ’’ནྟི.
ཨ་ཐ ཁོ ཨཱ་ཡ་སྨཱ ཨ་ནུ་རུ་དྡྷོ སཱ་ཝ་ཏྠི་ཡཾ ག་ནྟྭཱ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཨ་ནུ་རུ་དྡྷོ མཱ་ཏུ་གཱ་མེ་ན ས་ཧ་སེ་ཡྻཾ ཀ་པྤེ་སྶ་ཏཱི’’ཏི! ཨ་ཐ ཁོ ཏེ བྷི་ཀྑཱུ ཨཱ་ཡ་སྨ་ནྟཾ ཨ་ནུ་རུ་དྡྷཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏྭཾ, ཨ་ནུ་རུ་དྡྷ, མཱ་ཏུ་གཱ་མེ་ན ས་ཧ་སེ་ཡྻཾ ཀ་པྤེ་སཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, ཨ་ནུ་རུ་དྡྷ, མཱ་ཏུ་གཱ་མེ་ན ས་ཧ་སེ་ཡྻཾ ཀ་པྤེ་སྶ་སི! ནེ་ཏཾ, ཨ་ནུ་རུ་དྡྷ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༥༦. ‘‘ཡོ པ་ན བྷི་ཀྑུ མཱ་ཏུ་གཱ་མེ་ན ས་ཧ་སེ་ཡྻཾ ཀ་པྤེ་ཡྻ པཱ་ཙི་ཏྟི་ཡ’’ནྟི.
༥༧. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
མཱ་ཏུ་གཱ་མོ ནཱ་མ མ་ནུ་སྶི་ཏྠཱི, ན ཡ་ཀྑཱི [ཡ་ཀྑི་ནཱི (ཀ.)], ན པེ་ཏཱི, ན ཏི་ར་ཙྪཱ་ན་ག་ཏཱ; ཨ་ནྟ་མ་སོ ཏ་ད་ཧུ་ཛཱ་ཏཱ་པི དཱ་རི་ཀཱ, པ་གེ་ཝ མ་ཧ་ཏྟ་རཱི.
ས་ཧཱཏི ཨེ་ཀ་ཏོ.
སེ་ཡྻཱ ནཱ་མ ས་བྦ་ཙྪ་ནྣཱ, ས་བྦ་པ་རི་ཙྪ་ནྣཱ, ཡེ་བྷུ་ཡྻེ་ན་ཙྪ་ནྣཱ, ཡེ་བྷུ་ཡྻེ་ན པ་རི་ཙྪ་ནྣཱ.
སེ་ཡྻཾ ཀ་པྤེ་ཡྻཱཏི ཨ་ཏྠ་ངྒ་ཏེ སཱུ་རི་ཡེ, མཱ་ཏུ་གཱ་མེ ནི་པ་ནྣེ བྷི་ཀྑུ ནི་པ་ཛྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. བྷི་ཀྑུ ནི་པ་ནྣེ མཱ་ཏུ་གཱ་མོ ནི་པ་ཛྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་བྷོ ཝཱ ནི་པ་ཛྫ་ནྟི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་ཊྛ་ཧི་ཏྭཱ པུ་ན་པྤུ་ནཾ ནི་པ་ཛྫ་ནྟི, ཨཱ་པ་ཏྟི པཱ་ཙི་ཏྟི་ཡ་སྶ.
༥༨. མཱ་ཏུ་གཱ་མེ མཱ་ཏུ་གཱ་མ་ས་ཉྙཱི ས་ཧ་སེ་ཡྻཾ ཀ་པྤེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. མཱ་ཏུ་གཱ་མེ ཝེ་མ་ཏི་ཀོ ས་ཧ་སེ་ཡྻཾ ཀ་པྤེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. མཱ་ཏུ་གཱ་མེ ཨ་མཱ་ཏུ་གཱ་མ་ས་ཉྙཱི ས་ཧ་སེ་ཡྻཾ ཀ་པྤེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨུ་པ་ཌྜྷ་ཙྪ་ནྣེ ཨུ་པ་ཌྜྷ་པ་རི་ཙྪ་ནྣེ, ཨཱ་པ་ཏྟི དུ་ཀྐ་ཊ་སྶ. ཡ་ཀྑི་ཡཱ ཝཱ པེ་ཏི་ཡཱ ཝཱ པ་ཎྜ་ཀེ་ན ཝཱ ཏི་ར་ཙྪཱ་ན་ག་ཏི་ཏྠི་ཡཱ ཝཱ ས་ཧ་སེ་ཡྻཾ ཀ་པྤེ་ཏི, ཨཱ་པ་ཏྟི དུ་ཀྐ་ཊ་སྶ. ཨ་མཱ་ཏུ་གཱ་མེ མཱ་ཏུ་གཱ་མ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་མཱ་ཏུ་གཱ་མེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་མཱ་ཏུ་གཱ་མེ ཨ་མཱ་ཏུ་གཱ་མ་ས་ཉྙཱི, ཨ་ནཱ་པ་ཏྟི.
༥༩. ཨ་ནཱ་པ་ཏྟི ས་བྦ་ཙྪ་ནྣེ ས་བྦ་ཨ་པ་རི་ཙྪ་ནྣེ, ས་བྦ་པ་རི་ཙྪ་ནྣེ ས་བྦ་ཨ་ཙྪ་ནྣེ [ཨ་ནཱ་པ་ཏྟི ས་བྦ་ཨ་ཙྪ་ནྣེ ས་བྦ་ཨ་པ་རི་ཙྪ་ནྣེ, (སཱི.)], ཡེ་བྷུ་ཡྻེ་ན ཨ་ཙྪ་ནྣེ, ཡེ་བྷུ་ཡྻེ་ན ཨ་པ་རི་ཙྪ་ནྣེ, མཱ་ཏུ་གཱ་མེ ནི་པ་ནྣེ བྷི་ཀྑུ ནི་སཱི་ད་ཏི, བྷི་ཀྑུ ནི་པ་ནྣེ མཱ་ཏུ་གཱ་མོ ནི་སཱི་ད་ཏི, ཨུ་བྷོ ཝཱ ནི་སཱི་ད་ནྟི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
དུ་ཏི་ཡ་ས་ཧ་སེ་ཡྻ་སི་ཀྑཱ་པ་དཾ ནི་ཊྛི་ཏཾ ཚ་ཊྛཾ.