༧. དྷ་མྨ་དེ་ས་ནཱ་སི་ཀྑཱ་པ་དཾ
༦༠. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཨུ་དཱ་ཡཱི སཱ་ཝ་ཏྠི་ཡཾ ཀུ་ལཱུ་པ་ཀོ ཧོ་ཏི, བ་ཧུ་ཀཱ་ནི ཀུ་ལཱ་ནི ཨུ་པ་ས་ངྐ་མ་ཏི. ཨ་ཐ ཁོ ཨཱ་ཡ་སྨཱ ཨུ་དཱ་ཡཱི པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ན ཨ་ཉྙ་ཏ་རཾ ཀུ་ལཾ ཏེ་ནུ་པ་ས་ངྐ་མི. ཏེ་ན ཁོ པ་ན ས་མ་ཡེ་ན གྷ་ར་ཎཱི ནི་ཝེ་ས་ན་དྭཱ་རེ ནི་སི་ནྣཱ ཧོ་ཏི, གྷ་ར་སུ་ཎྷཱ ཨཱ་ཝ་ས་ཐ་དྭཱ་རེ ནི་སི་ནྣཱ ཧོ་ཏི. ཨ་ཐ ཁོ ཨཱ་ཡ་སྨཱ ཨུ་དཱ་ཡཱི ཡེ་ན གྷ་ར་ཎཱི ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ གྷ་ར་ཎི་ཡཱ ཨུ་པ་ཀ་ཎྞ་ཀེ དྷ་མྨཾ དེ་སེ་སི. ཨ་ཐ ཁོ གྷ་ར་སུ་ཎྷཱ་ཡ ཨེ་ཏ་ད་ཧོ་སི – ‘‘ཀི ནུ ཁོ སོ ས་མ་ཎོ ས་སྶུ་ཡཱ ཛཱ་རོ ཨུ་དཱ་ཧུ ཨོ་བྷཱ་ས་ཏཱི’’ཏི?
ཨ་ཐ ཁོ ཨཱ་ཡ་སྨཱ ཨུ་དཱ་ཡཱི གྷ་ར་ཎི་ཡཱ ཨུ་པ་ཀ་ཎྞ་ཀེ དྷ་མྨཾ དེ་སེ་ཏྭཱ ཡེ་ན གྷ་ར་སུ་ཎྷཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ གྷ་ར་སུ་ཎྷཱ་ཡ ཨུ་པ་ཀ་ཎྞ་ཀེ དྷ་མྨཾ དེ་སེ་སི. ཨ་ཐ ཁོ གྷ་ར་ཎི་ཡཱ ཨེ་ཏ་ད་ཧོ་སི – ‘‘ཀིཾ ནུ ཁོ སོ ས་མ་ཎོ གྷ་ར་སུ་ཎྷཱ་ཡ ཛཱ་རོ ཨུ་དཱ་ཧུ ཨོ་བྷཱ་ས་ཏཱི’’ཏི? ཨ་ཐ ཁོ ཨཱ་ཡ་སྨཱ ཨུ་དཱ་ཡཱི གྷ་ར་སུ་ཎྷཱ་ཡ ཨུ་པ་ཀ་ཎྞ་ཀེ དྷ་མྨཾ དེ་སེ་ཏྭཱ པ་ཀྐཱ་མི. ཨ་ཐ ཁོ གྷ་ར་ཎཱི གྷ་ར་སུ་ཎྷཾ ཨེ་ཏ་ད་ཝོ་ཙ – ‘‘ཧེ ཛེ, ཀིཾ ཏེ ཨེ་སོ ས་མ་ཎོ ཨ་ཝོ་ཙཱ’’ཏི? ‘‘དྷ་མྨཾ མེ, ཨ་ཡྻེ, དེ་སེ་སི’’. ‘‘ཨ་ཡྻཱ་ཡ པ་ན ཀིཾ ཨ་ཝོ་ཙཱ’’ཏི? ‘‘མ་ཡ྄ཧ་མྤི དྷ་མྨཾ དེ་སེ་སཱི’’ཏི. ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻོ ཨུ་དཱ་ཡཱི མཱ་ཏུ་གཱ་མ་སྶ ཨུ་པ་ཀ་ཎྞ་ཀེ དྷ་མྨཾ དེ་སེ་སྶ་ཏི! ན་ནུ ནཱ་མ ཝི་སྶ་ཊྛེ་ན ཝི་ཝ་ཊེ་ན དྷ་མྨོ དེ་སེ་ཏ་བྦོ’’ཏི?
ཨ་སྶོ་སུཾ ཁོ བྷི་ཀྑཱུ ཏཱ་སཾ ཨི་ཏྠཱི་ནཾ ཨུ་ཛ྄ཛྷཱ་ཡ་ནྟཱི་ནཾ ཁི་ཡྻ་ནྟཱི་ནཾ ཝི་པཱ་ཙེ་ནྟཱི་ནཾ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཨུ་དཱ་ཡཱི མཱ་ཏུ་གཱ་མ་སྶ དྷ་མྨཾ དེ་སེ་སྶ་ཏཱི’’ཏི! ཨ་ཐ ཁོ ཏེ བྷི་ཀྑཱུ ཨཱ་ཡ་སྨ་ནྟཾ ཨུ་དཱ་ཡིཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏྭཾ, ཨུ་དཱ་ཡི, མཱ་ཏུ་གཱ་མ་སྶ དྷ་མྨཾ དེ་སེ་སཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, མཱ་ཏུ་གཱ་མ་སྶ དྷ་མྨཾ དེ་སེ་སྶ་སི. ནེ་ཏཾ མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
‘‘ཡོ པ་ན བྷི་ཀྑུ མཱ་ཏུ་གཱ་མ་སྶ དྷ་མྨཾ དེ་སེ་ཡྻ པཱ་ཙི་ཏྟི་ཡ’’ནྟི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༦༡. ཏེ་ན ཁོ པ་ན ས་མ་ཡེ་ན ཨུ་པཱ་སི་ཀཱ བྷི་ཀྑཱུ པ་སྶི་ཏྭཱ ཨེ་ཏ་ད་ཝོ་ཙུཾ – ‘‘ཨི་ངྒྷཱ་ཡྻཱ དྷ་མྨཾ དེ་སེ་ཐཱ’’ཏི. ‘‘ན, བྷ་གི་ནཱི, ཀ་པྤ་ཏི མཱ་ཏུ་གཱ་མ་སྶ དྷ་མྨཾ དེ་སེ་ཏུ’’ནྟི. ‘‘ཨི་ངྒྷཱ་ཡྻཱ ཚ་པྤ་ཉྩ་ཝཱ་ཙཱ་ཧི དྷ་མྨཾ དེ་སེ་ཐ, ས་ཀྐཱ ཨེ་ཏྟ་ཀེ་ན་པི དྷ་མྨོ ཨ་ཉྙཱ་ཏུ’’ནྟི. ‘‘ན, བྷ་གི་ནཱི, ཀ་པྤ་ཏི མཱ་ཏུ་གཱ་མ་སྶ དྷ་མྨཾ དེ་སེ་ཏུ’’ནྟི. ཀུ་ཀྐུ་ཙྩཱ་ཡ་ནྟཱ ན དེ་སེ་སུཾ. ཨུ་པཱ་སི་ཀཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཨ་མྷེ་ཧི ཡཱ་ཙི་ཡ་མཱ་ནཱ དྷ་མྨཾ ན དེ་སེ་སྶ་ནྟཱི’’ཏི! ཨ་སྶོ་སུཾ ཁོ བྷི་ཀྑཱུ ཏཱ་སཾ ཨུ་པཱ་སི་ཀཱ་ནཾ ཨུ་ཛ྄ཛྷཱ་ཡ་ནྟཱི་ནཾ ཁི་ཡྻ་ནྟཱི་ནཾ ཝི་པཱ་ཙེ་ནྟཱི་ནཾ. ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, མཱ་ཏུ་གཱ་མ་སྶ ཚ་པྤ་ཉྩ་ཝཱ་ཙཱ་ཧི དྷ་མྨཾ དེ་སེ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
‘‘ཡོ པ་ན བྷི་ཀྑཱུ མཱ་ཏུ་གཱ་མ་སྶ ཨུ་ཏྟ་རི་ཚ་པྤ་ཉྩ་ཝཱ་ཙཱ་ཧི དྷ་མྨཾ དེ་སེ་ཡྻ, པཱ་ཙི་ཏྟི་ཡ’’ནྟི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༦༢. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ – ‘‘བྷ་ག་ཝ་ཏཱ ཨ་ནུ་ཉྙཱ་ཏཾ མཱ་ཏུ་གཱ་མ་སྶ ཚ་པྤ་ཉྩ་ཝཱ་ཙཱ་ཧི དྷ་མྨཾ དེ་སེ་ཏུ’’ནྟི ཏེ ཨ་ཝི་ཉྙུཾ པུ་རི་ས་ཝི་གྒ་ཧཾ ཨུ་པ་ནི་སཱི་དཱ་པེ་ཏྭཱ མཱ་ཏུ་གཱ་མ་སྶ ཨུ་ཏྟ་རི་ཚ་པྤ་ཉྩ་ཝཱ་ཙཱ་ཧི དྷ་མྨཾ དེ་སེ་ནྟི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ ཨ་ཝི་ཉྙུཾ པུ་རི་ས་ཝི་གྒ་ཧཾ ཨུ་པ་ནི་སཱི་དཱ་པེ་ཏྭཱ མཱ་ཏུ་གཱ་མ་སྶ ཨུ་ཏྟ་རི་ཚ་པྤ་ཉྩ་ཝཱ་ཙཱ་ཧི དྷ་མྨཾ དེ་སེ་སྶ་ནྟཱི’’ཏི!
ཨ་ཐ ཁོ ཏེ བྷི་ཀྑཱུ ཚ་བྦ་གྒི་ཡེ བྷི་ཀྑཱུ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏུ་མྷེ, བྷི་ཀྑ་ཝེ, ཨ་ཝི་ཉྙུཾ པུ་རི་ས་ཝི་གྒ་ཧཾ ཨུ་པ་ནི་སཱི་དཱ་པེ་ཏྭཱ མཱ་ཏུ་གཱ་མ་སྶ ཨུ་ཏྟ་རི་ཚ་པྤ་ཉྩ་ཝཱ་ཙཱ་ཧི དྷ་མྨཾ དེ་སེ་ཐཱ’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, ཨ་ཝི་ཉྙུཾ པུ་རི་ས་ཝི་གྒ་ཧཾ ཨུ་པ་ནི་སཱི་དཱ་པེ་ཏྭཱ མཱ་ཏུ་གཱ་མ་སྶ ཨུ་ཏྟ་རི་ཚ་པྤ་ཉྩ་ཝཱ་ཙཱ་ཧི དྷ་མྨཾ དེ་སེ་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༦༣. ‘‘ཡོ པ་ན བྷི་ཀྑུ མཱ་ཏུ་གཱ་མ་སྶ ཨུ་ཏྟ་རི་ཚ་པྤ་ཉྩ་ཝཱ་ཙཱ་ཧི དྷ་མྨཾ དེ་སེ་ཡྻ, ཨ་ཉྙ་ཏྲ ཝི་ཉྙུ་ནཱ པུ་རི་ས་ཝི་གྒ་ཧེ་ན, པཱ་ཙི་ཏྟི་ཡ’’ནྟི.
༦༤. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
མཱ་ཏུ་གཱ་མོ ནཱ་མ མ་ནུ་སྶི་ཏྠཱི; ན ཡ་ཀྑཱི ན པེ་ཏཱི ན ཏི་ར་ཙྪཱ་ན་ག་ཏཱ; ཝི་ཉྙཱུ, པ་ཊི་བ་ལཱ སུ་བྷཱ་སི་ཏ་དུ་བྦྷཱ་སི་ཏཾ དུ་ཊྛུ་ལླཱ་དུ་ཊྛུ་ལླཾ ཨཱ་ཛཱ་ནི་ཏུཾ.
ཨུ་ཏྟ་རི་ཚ་པྤ་ཉྩ་ཝཱ་ཙཱ་ཧཱིཏི ཨ་ཏི་རེ་ཀ་ཚ་པྤ་ཉྩ་ཝཱ་ཙཱ་ཧི.
དྷ་མྨོ ནཱ་མ བུ་དྡྷ་བྷཱ་སི་ཏོ, སཱ་ཝ་ཀ་བྷཱ་སི་ཏོ, ཨི་སི་བྷཱ་སི་ཏོ, དེ་ཝ་ཏཱ་བྷཱ་སི་ཏོ, ཨ་ཏྠཱུ་པ་ས་ཉྷི་ཏོ, དྷ་མྨཱུ་པ་ས་ཉྷི་ཏོ.
དེ་སེ་ཡྻཱཏི པ་དེ་ན དེ་སེ་ཏི, པ་དེ པ་དེ ཨཱ་པ་ཏྟི པཱ་ཙི་ཏྟི་ཡ་སྶ. ཨ་ཀྑ་རཱ་ཡ དེ་སེ་ཏི, ཨ་ཀྑ་ར་ཀྑ་རཱ་ཡ ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ཉྙ་ཏྲ ཝི་ཉྙུ་ནཱ པུ་རི་ས་ཝི་གྒ་ཧེ་ནཱཏི ཋ་པེ་ཏྭཱ ཝི་ཉྙུཾ པུ་རི་ས་ཝི་གྒ་ཧཾ. ཝི་ཉྙཱུ ནཱ་མ པུ་རི་ས་ཝི་གྒ་ཧོ, པ་ཊི་བ་ལོ ཧོ་ཏི སུ་བྷཱ་སི་ཏ་དུ་བྦྷཱ་སི་ཏཾ དུ་ཊྛུ་ལླཱ་དུ་ཊྛུ་ལླཾ ཨཱ་ཛཱ་ནི་ཏུཾ.
༦༥. མཱ་ཏུ་གཱ་མེ མཱ་ཏུ་གཱ་མ་ས་ཉྙཱི ཨུ་ཏྟ་རི་ཚ་པྤ་ཉྩ་ཝཱ་ཙཱ་ཧི དྷ་མྨཾ དེ་སེ་ཏི, ཨ་ཉྙ་ཏྲ ཝི་ཉྙུ་ནཱ པུ་རི་ས་ཝི་གྒ་ཧེ་ན, ཨཱ་པ་ཏྟི པཱ་ཙི་ཏྟི་ཡ་སྶ. མཱ་ཏུ་གཱ་མེ ཝེ་མ་ཏི་ཀོ ཨུ་ཏྟ་རི་ཚ་པྤ་ཉྩ་ཝཱ་ཙཱ་ཧི དྷ་མྨཾ དེ་སེ་ཏི, ཨ་ཉྙ་ཏྲ ཝི་ཉྙུ་ནཱ པུ་རི་ས་ཝི་གྒ་ཧེ་ན, ཨཱ་པ་ཏྟི པཱ་ཙི་ཏྟི་ཡ་སྶ. མཱ་ཏུ་གཱ་མེ ཨ་མཱ་ཏུ་གཱ་མ་ས་ཉྙཱི ཨུ་ཏྟ་རི་ཚ་པྤ་ཉྩ་ཝཱ་ཙཱ་ཧི དྷ་མྨཾ དེ་སེ་ཏི, ཨ་ཉྙ་ཏྲ ཝི་ཉྙུ་ནཱ པུ་རི་ས་ཝི་གྒ་ཧེ་ན, ཨཱ་པ་ཏྟི པཱ་ཙི་ཏྟི་ཡ་སྶ.
ཡ་ཀྑི་ཡཱ ཝཱ པེ་ཏི་ཡཱ ཝཱ པ་ཎྜ་ཀ་སྶ ཝཱ ཏི་ར་ཙྪཱ་ན་ག་ཏ་མ་ནུ་སྶ་ཝི་གྒ་ཧི་ཏྠི་ཡཱ ཝཱ ཨུ་ཏྟ་རི་ཚ་པྤ་ཉྩ་ཝཱ་ཙཱ་ཧི དྷ་མྨཾ དེ་སེ་ཏི, ཨ་ཉྙ་ཏྲ ཝི་ཉྙུ་ནཱ པུ་རི་ས་ཝི་གྒ་ཧེ་ན, ཨཱ་པ་ཏྟི དུ་ཀྐ་ཊ་སྶ. ཨ་མཱ་ཏུ་གཱ་མེ མཱ་ཏུ་གཱ་མ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་མཱ་ཏུ་གཱ་མེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་མཱ་ཏུ་གཱ་མེ ཨ་མཱ་ཏུ་གཱ་མ་ས་ཉྙཱི, ཨ་ནཱ་པ་ཏྟི.
༦༦. ཨ་ནཱ་པ་ཏྟི ཝི་ཉྙུ་ནཱ པུ་རི་ས་ཝི་གྒ་ཧེ་ན, ཚ་པྤ་ཉྩ་ཝཱ་ཙཱ་ཧི དྷ་མྨཾ དེ་སེ་ཏི, ཨཱུ་ན་ཀ་ཚ་པྤ་ཉྩ་ཝཱ་ཙཱ་ཧི དྷ་མྨཾ དེ་སེ་ཏི, ཨུ་ཊྛ་ཧི་ཏྭཱ པུ་ན ནི་སཱི་དི་ཏྭཱ དེ་སེ་ཏི, མཱ་ཏུ་གཱ་མོ ཨུ་ཊྛ་ཧི་ཏྭཱ པུ་ན ནི་སཱི་ད་ཏི ཏ་སྨིཾ དེ་སེ་ཏི, ཨ་ཉྙ་སྶ མཱ་ཏུ་གཱ་མ་སྶ དེ་སེ་ཏི, པ་ཉྷཾ པུ་ཙྪ་ཏི, པ་ཉྷཾ པུ་ཊྛོ ཀ་ཐེ་ཏི, ཨ་ཉྙ་སྶ་ཏྠཱ་ཡ བྷ་ཎ་ནྟཾ མཱ་ཏུ་གཱ་མོ སུ་ཎཱ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
དྷ་མྨ་དེ་ས་ནཱ་སི་ཀྑཱ་པ་དཾ ནི་ཊྛི་ཏཾ ས་ཏྟ་མཾ.