༥. ས་ཧ་སེ་ཡྻ་སི་ཀྑཱ་པ་དཾ
༤༩. ཏེ་ན ས་མ་ཡེ་ན བུ་དྡྷོ བྷ་ག་ཝཱ ཨཱ་ལ༹་ཝི་ཡཾ ཝི་ཧ་ར་ཏི ཨ་གྒཱ་ལ༹་ཝེ ཙེ་ཏི་ཡེ. ཏེ་ན ཁོ པ་ན ས་མ་ཡེ་ན ཨུ་པཱ་ས་ཀཱ ཨཱ་རཱ་མཾ ཨཱ་ག་ཙྪ་ནྟི དྷ་མྨ་སྶ་ཝ་ནཱ་ཡ. དྷ་མྨེ བྷཱ་སི་ཏེ ཐེ་རཱ བྷི་ཀྑཱུ ཡ་ཐཱ་ཝི་ཧཱ་རཾ ག་ཙྪ་ནྟི. ན་ཝ་ཀཱ བྷི་ཀྑཱུ ཏ་ཏྠེ་ཝ ཨུ་པ་ཊྛཱ་ན་སཱ་ལཱ་ཡཾ ཨུ་པཱ་ས་ཀེ་ཧི ས་དྡྷིཾ མུ་ཊྛ་སྶ་ཏཱི, ཨ་ས་མྤ་ཛཱ་ནཱ, ན་གྒཱ, ཝི་ཀཱུ་ཛ་མཱ་ནཱ, ཀཱ་ཀ་ཙྪ་མཱ་ནཱ སེ་ཡྻཾ ཀ་པྤེ་ནྟི. ཨུ་པཱ་ས་ཀཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷ་ད་ནྟཱ མུ་ཊྛ་སྶ་ཏཱི ཨ་ས་མྤ་ཛཱ་ནཱ ན་གྒཱ ཝི་ཀཱུ་ཛ་མཱ་ནཱ ཀཱ་ཀ་ཙྪ་མཱ་ནཱ སེ་ཡྻཾ ཀ་པྤེ་སྶ་ནྟཱི’’ཏི! ཨ་སྶོ་སུཾ ཁོ བྷི་ཀྑཱུ ཏེ་སཾ ཨུ་པཱ་ས་ཀཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑཱུ ཨ་ནུ་པ་ས་མྤ་ནྣེ་ན ས་ཧ་སེ་ཡྻཾ ཀ་པྤེ་སྶ་ནྟཱི’’ཏི! ཨ་ཐ ཁོ ཏེ བྷི་ཀྑཱུ ཏེ ན་ཝ་ཀེ བྷི་ཀྑཱུ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར, བྷི་ཀྑ་ཝེ, བྷི་ཀྑཱུ ཨ་ནུ་པ་ས་མྤ་ནྣེ་ན ས་ཧ་སེ་ཡྻཾ ཀ་པྤེ་ནྟཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏེ, བྷི་ཀྑ་ཝེ, མོ་གྷ་པུ་རི་སཱ ཨ་ནུ་པ་ས་མྤ་ནྣེ་ན ས་ཧ་སེ་ཡྻཾ ཀ་པྤེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
‘‘ཡོ པ་ན བྷི་ཀྑུ ཨ་ནུ་པ་ས་མྤ་ནྣེ་ན ས་ཧ་སེ་ཡྻཾ ཀ་པྤེ་ཡྻ པཱ་ཙི་ཏྟི་ཡ’’ནྟི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༥༠. ཨ་ཐ ཁོ བྷ་ག་ཝཱ ཨཱ་ལ༹་ཝི་ཡཾ ཡ་ཐཱ་བྷི་ར་ནྟཾ ཝི་ཧ་རི་ཏྭཱ ཡེ་ན ཀོ་ས་མྦཱི ཏེ་ན ཙཱ་རི་ཀཾ པ་ཀྐཱ་མི. ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན ཀོ་ས་མྦཱི ཏ་ད་ཝ་ས་རི. ཏ་ཏྲ སུ་དཾ བྷ་ག་ཝཱ ཀོ་ས་མྦི་ཡཾ ཝི་ཧ་ར་ཏི བ་ད་རི་ཀཱ་རཱ་མེ. བྷི་ཀྑཱུ ཨཱ་ཡ་སྨ་ནྟཾ རཱ་ཧུ་ལཾ ཨེ་ཏ་ད་ཝོ་ཙུཾ – ‘‘བྷ་ག་ཝ་ཏཱ, ཨཱ་ཝུ་སོ རཱ་ཧུ་ལ, སི་ཀྑཱ་པ་དཾ པ་ཉྙ་ཏྟཾ – ‘ན ཨ་ནུ་པ་ས་མྤ་ནྣེ་ན ས་ཧ་སེ་ཡྻཱ ཀ་པྤེ་ཏ་བྦཱ’ཏི. སེ་ཡྻཾ, ཨཱ་ཝུ་སོ རཱ་ཧུ་ལ, ཛཱ་ནཱ་ཧཱི’’ཏི. ཨ་ཐ ཁོ ཨཱ་ཡ་སྨཱ རཱ་ཧུ་ལོ སེ་ཡྻཾ ཨ་ལ་བྷ་མཱ་ནོ ཝ་ཙྩ་ཀུ་ཊི་ཡཱ སེ་ཡྻཾ ཀ་པྤེ་སི. ཨ་ཐ ཁོ བྷ་ག་ཝཱ ར་ཏྟི་ཡཱ པ་ཙྩཱུ་ས་ས་མ་ཡཾ པ་ཙྩུ་ཊྛཱ་ཡ ཡེ་ན ཝ་ཙྩ་ཀུ་ཊི ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨུ་ཀྐཱ་སི. ཨཱ་ཡ་སྨཱ་པི རཱ་ཧུ་ལོ ཨུ་ཀྐཱ་སི. ‘‘ཀོ ཨེ་ཏྠཱ’’ཏི? ‘‘ཨ་ཧཾ, བྷ་ག་ཝཱ, རཱ་ཧུ་ལོ’’ཏི. ‘‘ཀི་སྶ ཏྭཾ, རཱ་ཧུ་ལ, ཨི་དྷ ནི་སི་ནྣོ་སཱི’’ཏི? ཨ་ཐ ཁོ ཨཱ་ཡ་སྨཱ རཱ་ཧུ་ལོ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སི. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨ་ནུ་པ་ས་མྤ་ནྣེ་ན དི་ར་ཏྟ་ཏི་ར་ཏྟཾ ས་ཧ་སེ་ཡྻཾ ཀ་པྤེ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༥༡. ‘‘ཡོ པ་ན བྷི་ཀྑུ ཨ་ནུ་པ་ས་མྤ་ནྣེ་ན ཨུ་ཏྟ་རི་དི་ར་ཏྟ་ཏི་ར་ཏྟཾ ས་ཧ་སེ་ཡྻཾ ཀ་པྤེ་ཡྻ, པཱ་ཙི་ཏྟི་ཡ’’ནྟི.
༥༢. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ཨ་ནུ་པ་ས་མྤ་ནྣོ ནཱ་མ བྷི་ཀྑུཾ ཋ་པེ་ཏྭཱ ཨ་ཝ་སེ་སོ ཨ་ནུ་པ་ས་མྤ་ནྣོ ནཱ་མ.
ཨུ་ཏྟ་རི་དི་ར་ཏྟ་ཏི་ར་ཏྟནྟི ཨ་ཏི་རེ་ཀ་དི་ར་ཏྟ་ཏི་ར་ཏྟཾ.
ས་ཧཱཏི ཨེ་ཀ་ཏོ.
སེ་ཡྻཱ ནཱ་མ ས་བྦ་ཙྪ་ནྣཱ, ས་བྦ་པ་རི་ཙྪ་ནྣཱ, ཡེ་བྷུ་ཡྻེ་ན་ཙྪ་ནྣཱ, ཡེ་བྷུ་ཡྻེ་ན པ་རི་ཙྪ་ནྣཱ.
སེ་ཡྻཾ ཀ་པྤེ་ཡྻཱཏི ཙ་ཏུ་ཏྠེ དི་ཝ་སེ ཨ་ཏྠ་ངྒ་ཏེ སཱུ་རི་ཡེ, ཨ་ནུ་པ་ས་མྤ་ནྣེ ནི་པ་ནྣེ, བྷི་ཀྑུ ནི་པ་ཛྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. བྷི་ཀྑུ ནི་པ་ནྣེ, ཨ་ནུ་པ་ས་མྤ་ནྣོ ནི་པ་ཛྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་བྷོ ཝཱ ནི་པ་ཛྫ་ནྟི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་ཊྛ་ཧི་ཏྭཱ པུ་ན་པྤུ་ནཾ ནི་པ་ཛྫ་ནྟི, ཨཱ་པ་ཏྟི པཱ་ཙི་ཏྟི་ཡ་སྶ.
༥༣. ཨ་ནུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི ཨུ་ཏྟ་རི་དི་ར་ཏྟ་ཏི་ར་ཏྟཾ ས་ཧ་སེ་ཡྻཾ ཀ་པྤེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ནུ་པ་ས་མྤ་ནྣེ ཝེ་མ་ཏི་ཀོ ཨུ་ཏྟ་རི་དི་ར་ཏྟ་ཏི་ར་ཏྟཾ ས་ཧ་སེ་ཡྻཾ ཀ་པྤེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ནུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི ཨུ་ཏྟ་རི་དི་ར་ཏྟ་ཏི་ར་ཏྟཾ ས་ཧ་སེ་ཡྻཾ ཀ་པྤེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨུ་པ་ཌྜྷ་ཙྪ་ནྣེ ཨུ་པ་ཌྜྷ་པ་རི་ཙྪ་ནྣེ, ཨཱ་པ་ཏྟི དུ་ཀྐ་ཊ་སྶ. ཨུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨུ་པ་ས་མྤ་ནྣེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི, ཨ་ནཱ་པ་ཏྟི.
༥༤. ཨ་ནཱ་པ་ཏྟི དྭེ་ཏི་སྶོ ར་ཏྟི་ཡོ ཝ་ས་ཏི, ཨཱུ་ན་ཀ་དྭེ་ཏི་སྶོ ར་ཏྟི་ཡོ ཝ་ས་ཏི, དྭེ ར་ཏྟི་ཡོ ཝ་སི་ཏྭཱ ཏ་ཏི་ཡཱ་ཡ ར་ཏྟི་ཡཱ པུ་རཱ་རུ་ཎཱ ནི་ཀྑ་མི་ཏྭཱ པུ་ན ཝ་ས་ཏི, ས་བྦ་ཙྪ་ནྣེ, ས་བྦ་ཨ་པ་རི་ཙྪ་ནྣེ, ས་བྦ་པ་རི་ཙྪ་ནྣེ ས་བྦ་ཨ་ཙྪ་ནྣེ [ཝ་ས་ཏི, ས་བྦ་ཨ་ཙྪ་ནྣེ ས་བྦ་ཨ་པ་རི་ཙྪ་ནྣེ, (སཱི.)], ཡེ་བྷུ་ཡྻེ་ན ཨ་ཙྪ་ནྣེ, ཡེ་བྷུ་ཡྻེ་ན ཨ་པ་རི་ཙྪ་ནྣེ, ཨ་ནུ་པ་ས་མྤ་ནྣེ ནི་པ་ནྣེ བྷི་ཀྑུ ནི་སཱི་ད་ཏི, བྷི་ཀྑུ ནི་པ་ནྣེ ཨ་ནུ་པ་ས་མྤ་ནྣོ ནི་སཱི་ད་ཏི, ཨུ་བྷོ ཝཱ ནི་སཱི་ད་ནྟི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ས་ཧ་སེ་ཡྻ་སི་ཀྑཱ་པ་དཾ ནི་ཊྛི་ཏཾ པ་ཉྩ་མཾ.