༡༠. པ་ཐ་ཝཱི་ཁ་ཎ་ན་སི་ཀྑཱ་པ་དཾ

༨༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ ཨཱ་ལ༹་ཝི་ཡཾ ཝི་ཧ་ར་ཏི ཨ་གྒཱ་ལ༹་ཝེ ཙེ་ཏི་ཡེ. ཏེ་ན ཁོ པ་ན ས་མ་ཡེ་ན ཨཱ་ལ༹་ཝ་ཀཱ [ཨཱ་ལ༹་ཝི་ཀཱ (སྱཱ.)] བྷི་ཀྑཱུ ན་ཝ་ཀ་མྨཾ ཀ་རོ་ནྟཱ པ་ཐ་ཝིཾ ཁ་ཎ་ནྟི་པི ཁ་ཎཱ་པེ་ནྟི་པི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ པ་ཐ་ཝིཾ ཁ་ཎི་སྶ་ནྟི་པི ཁ་ཎཱ་པེ་སྶ་ནྟི་པི! ཨེ་ཀི་ནྡྲི་ཡཾ ས་མ་ཎཱ ས་ཀྱ་པུ་ཏྟི་ཡཱ ཛཱི་ཝཾ ཝི་ཧེ་ཋེ་ནྟཱི’’ཏི! ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ལ༹་ཝ་ཀཱ བྷི་ཀྑཱུ པ་ཐ་ཝིཾ ཁ་ཎི་སྶ་ནྟི་པི ཁ་ཎཱ་པེ་སྶ་ནྟི་པཱི’’ཏི…པེ… ‘‘ས་ཙྩཾ ཀི་ར ཏུ་མྷེ, བྷི་ཀྑ་ཝེ, པ་ཐ་ཝིཾ ཁ་ཎ་ཐ་པི ཁ་ཎཱ་པེ་ཐ་པཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, པ་ཐ་ཝིཾ ཁ་ཎི་སྶ་ཐ་པི ཁ་ཎཱ་པེ་སྶ་ཐ་པི! ཛཱི་ཝ་ས་ཉྙི་ནོ ཧི, མོ་གྷ་པུ་རི་སཱ, མ་ནུ་སྶཱ པ་ཐ་ཝི་ཡཱ. ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –

༨༥. ‘‘ཡོ པ་ན བྷི་ཀྑུ པ་ཐ་ཝིཾ ཁ་ཎེ་ཡྻ ཝཱ ཁ་ཎཱ་པེ་ཡྻ ཝཱ, པཱ་ཙི་ཏྟི་ཡ’’ནྟི.

༨༦. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.

པ་ཐ་ཝཱི ནཱ་མ དྭེ པ་ཐ་ཝི་ཡོ – ཛཱ་ཏཱ ཙ པ་ཐ་ཝཱི ཨ་ཛཱ་ཏཱ ཙ པ་ཐ་ཝཱི.

ཛཱ་ཏཱ ནཱ་མ པ་ཐ་ཝཱི – སུ་དྡྷ་པཾ་སུ སུ་དྡྷ་མ་ཏྟི་ཀཱ ཨ་པྤ་པཱ་སཱ་ཎཱ ཨ་པྤ་ས་ཀྑ་རཱ ཨ་པྤ་ཀ་ཋ་ལཱ ཨ་པྤ་མ་རུ་མྦཱ ཨ་པྤ་ཝཱ་ལི་ཀཱ, ཡེ་བྷུ་ཡྻེ་ན་པཾ་སུ་ཀཱ, ཡེ་བྷུ་ཡྻེ་ན་མ་ཏྟི་ཀཱ. ཨ་ད་ཌྜྷཱ་པི ཝུ་ཙྩ་ཏི ཛཱ་ཏཱ པ་ཐ་ཝཱི. ཡོ་པི པཾ་སུ་པུ་ཉྫོ ཝཱ མ་ཏྟི་ཀཱ་པུ་ཉྫོ ཝཱ ཨ་ཏི་རེ་ཀ་ཙཱ་ཏུ་མཱ་སཾ ཨོ་ཝ་ཊྛོ, ཨ་ཡ་མྤི ཝུ་ཙྩ་ཏི ཛཱ་ཏཱ པ་ཐ་ཝཱི.

ཨ་ཛཱ་ཏཱ ནཱ་མ པ་ཐ་ཝཱི – སུ་དྡྷ་པཱ་སཱ་ཎཱ སུ་དྡྷ་ས་ཀྑ་རཱ སུ་དྡྷ་ཀ་ཋ་ལཱ སུ་དྡྷ་མ་རུ་མྦཱ སུ་དྡྷ་ཝཱ་ལི་ཀཱ ཨ་པྤ་པཾ་སུ་ཀཱ ཨ་པྤ་མ་ཏྟི་ཀཱ, ཡེ་བྷུ་ཡྻེ་ན་པཱ་སཱ་ཎཱ, ཡེ་བྷུ་ཡྻེ་ན་ས་ཀྑ་རཱ, ཡེ་བྷུ་ཡྻེ་ན་ཀ་ཋ་ལཱ, ཡེ་བྷུ་ཡྻེ་ན་མ་རུ་མྦཱ, ཡེ་བྷུ་ཡྻེ་ན་ཝཱ་ལི་ཀཱ. ད་ཌྜྷཱ་པི ཝུ་ཙྩ་ཏི ཨ་ཛཱ་ཏཱ པ་ཐ་ཝཱི. ཡོ་པི པཾ་སུ་པུ་ཉྫོ ཝཱ མ་ཏྟི་ཀཱ་པུ་ཉྫོ ཝཱ ཨོ་མ་ཀ་ཙཱ་ཏུ་མཱ་སཾ ཨོ་ཝ་ཊྛོ, ཨ་ཡ་མྤི ཝུ་ཙྩ་ཏི ཨ་ཛཱ་ཏཱ པ་ཐ་ཝཱི.

ཁ་ཎེ་ཡྻཱཏི ས་ཡཾ ཁ་ཎ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.

ཁ་ཎཱ་པེ་ཡྻཱཏི ཨ་ཉྙཾ ཨཱ་ཎཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ས་ཀིཾ ཨཱ་ཎ་ཏྟོ བ་ཧུ་ཀ་མྤི ཁ་ཎ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.

༨༧. པ་ཐ་ཝི་ཡཱ པ་ཐ་ཝི་ས་ཉྙཱི ཁ་ཎ་ཏི ཝཱ ཁ་ཎཱ་པེ་ཏི ཝཱ, བྷི་ནྡ་ཏི ཝཱ བྷེ་དཱ་པེ་ཏི ཝཱ, ད་ཧ་ཏི ཝཱ ད་ཧཱ་པེ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ.

པ་ཐ་ཝི་ཡཱ ཝེ་མ་ཏི་ཀོ ཁ་ཎ་ཏི ཝཱ ཁ་ཎཱ་པེ་ཏི ཝཱ, བྷི་ནྡ་ཏི ཝཱ བྷེ་དཱ་པེ་ཏི ཝཱ, ད་ཧ་ཏི ཝཱ ད་ཧཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ.

པ་ཐ་ཝི་ཡཱ ཨ་པ་ཐ་ཝི་ས་ཉྙཱི ཁ་ཎ་ཏི ཝཱ ཁ་ཎཱ་པེ་ཏི ཝཱ, བྷི་ནྡ་ཏི ཝཱ བྷེ་དཱ་པེ་ཏི ཝཱ, ད་ཧ་ཏི ཝཱ ད་ཧཱ་པེ་ཏི ཝཱ, ཨ་ནཱ་པ་ཏྟི.

ཨ་པ་ཐ་ཝི་ཡཱ པ་ཐ་ཝི་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་པ་ཐ་ཝི་ཡཱ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་པ་ཐ་ཝི་ཡཱ ཨ་པ་ཐ་ཝི་ས་ཉྙཱི, ཨ་ནཱ་པ་ཏྟི.

༨༨. ཨ་ནཱ་པ་ཏྟི – ‘‘ཨི་མཾ ཛཱ་ན, ཨི་མཾ དེ་ཧི, ཨི་མཾ ཨཱ་ཧ་ར, ཨི་མི་ནཱ ཨ་ཏྠོ, ཨི་མཾ ཀ་པྤི་ཡཾ ཀ་རོ་ཧཱི’’ཏི བྷ་ཎ་ཏི, ཨ་ས་ཉྩི་ཙྩ, ཨ་ས་ཏི་ཡཱ, ཨ་ཛཱ་ན་ནྟ་སྶ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.

པ་ཐ་ཝཱི་ཁ་ཎ་ན་སི་ཀྑཱ་པ་དཾ ནི་ཊྛི་ཏཾ ད་ས་མཾ.

མུ་སཱ་ཝཱ་ད་ཝ་གྒོ པ་ཋ་མོ.

ཏ་སྶུ་དྡཱ་ནཾ –

མུ་སཱ ཨོ་མ་ས་པེ་སུ་ཉྙཾ, པ་ད་སེ་ཡྻཱ་ཡ ཝེ དུ་ཝེ;

ཨ་ཉྙ་ཏྲ ཝི་ཉྙུ་ནཱ བྷཱུ་ཏཱ, དུ་ཊྛུ་ལླཱ་པ་ཏྟི ཁ་ཎ་ནཱ་ཏི.